31 مايو 2009

تااااااااج .. ولا مفر

 شكر خاص للاخت العزيزة سالى حاجات جوايا على اهداء هذا التاج 
وتصميمها انى اجاوبه 
مع انى مشغول  بس حاضر يا ام دودو وطلباتك اوامر 
وشخبطة حضرتك تخطيط لمستقبلنا
من أنت ؟ وما الذى تفعله هنا ؟
انا ملاك فى صورة انسان 
وانسان فى صورة شيطان 
واحيانا كده بحس انا انا انا انا انا انا 
انا معرفش
وما الذى افعله
بلعب فى مدونتى ومدونات الجيران    

إسرائيل تقصف كل جنوب ممكن بحثا عنك ، أى شمال ستقصد؟
بحثا عنى انا طب  ما تقصف هو انا احسن من اللى ماتوا
فى غزة ولا فى دير ياسين ولا صبرا وشتيلا ولا فى الحرم الابراهيمى ولا ايه وايه !!!؟؟؟
اعتقد الجنوب هيكون افضل من الشمال فى تلك الحالة
.
أنت مكلف بحذف حرف من حروف اللغة العربية .. أيها ستختار ولماذا ؟
طبعا صعب جدا لانها لغة القران ولغة اهل الجنة ان شاء الله 
ولكن نفترض جدلا انى هختار حرف 
يبقى حروف كلمة 
غدر - خيانة - ظلم- قسوة
وكده يبقى عليه العوض فى اللغة العربية
.
لو قدر لك أن تدخل السجن فما هي القضية التي تتمنى ان تدخل بها إليه؟
سبحان الله سؤال بجد غريب ودى امنية ده خيبة قوية 
ولكن ربما تكون احدى هذه القضايا 
الدفاع عن دينى 
الدفاع عن ارضى 
محاربة الفساد 
بالمناسبة.. منذ متى اكتشفت نفسك؟
مع الاسف ما زالت مرحلة الاستشكاف جارية
الى ان يقضى الله امرا كان مفعولا

على مفترق طريق الافتتان ، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟

اللى نعرفه احسن من اللى ما نعرفوش ونتجه يمينا 
وغالبا حلم كل واحد منا هو نفسه ما لم يحلم به البشر

نحن لا نعيش حياتنا بل نتعلم فيها كيف نعيش ما تعليقك؟

اممممممممممم
لا نحن نعيش الحياة ونتعلم منها 
و سنظل نتعلم الى ان يرث  الله الارض ومن عليها

بجملة واحدة فقط أكتب تعريفاً لكل كلمة من الكلمات التالية
الوطن
احب بلاد الله الى قلبى 
الأم
جنة الله فى ارضه 
الليل
سكون وظلام ونجوم وقمر سهران 
الحب
داء ودواء لكل عاشق 
أمريكا
سرطان يسرى فى جسد العالم الثالث
المرأة
ام واخت وزوجة وابنة 
خلقت من اجل ادم 
واستطاعت ان تسخره لهواها
الصمت
احيانا ابلغ من الكلام 
واحيانا هو الكلام فى صمت
الانترنت
العالم كله بين يديك 
 

أخترمنصباً واتخذ قرارا ؟
ما بلاش النفوس بتتغير بالمناصب
رئيس مراجيح مولد النبى  

قرارى
مرجحة كل فاسد ومرتشى وديكتاتور 
ومستبد
وهووووب 
المرجيحة طارت فى الهوا واستقرت فى جهنم 
والبقاء لله فيكى يا مصر

قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟
هما قالوا واحنا ما سمعناش  
وفيين التغييب ده اذا كان بقوا من اشهر النساء
انا على نفسى مستنى اى واحدة تقول فيا عصيدة شعر باللحمة المفرومة 


أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل
بالطبع لا 
ده اكيد اللى حاطط السؤال ده مسجل خطر استفزاز النفس البشرية
لا شكرا انا كده مبسوط وبشرب شاى من غير نعناع 
إلى أين تمضي كلمات الحب .. بعد أن نقولها؟
الى الاذن ومنه الى غرفة مظلمة تسمى القلب 
وبعدها  تتحول الى احاسيس ومشاعر 
اذا كانت صادقة  
او لا تتعدى الاذن الوسطى اذا كانت غير صادقة
هل تجد علاقة بشكل أو بآخر بين المرأة وقطاع الطرق ؟
اكثر سؤال عجبنى فى التاج 
بالطبع توجد علاقة حميمة 
 قاطع الطريق بيسرق فلوسك
والمراة ولله الحمد بتسرق كل حاجة  قلبك وروحك وعمرك كماان

هذا فراق بيني وبينك .. متى ولمن تقولها ؟
للمعاصى والذنوب 
لانسان نصحته مرارا وتكرارا ولم يستجب
كيف هو غداً ؟
غدا فى علم الغيب 
ولكن هو للمتقين خير 
ولاعداء الاسلام خزى وعار

أمرر التاج الى
اول خمس تعليقات على هذا التاج 
طالما لم يسبق لاجابة عليه
وكل تاج وانتم طيبين

هناك 52 تعليقًا:

حنين القلب يقول...

هيييييييييييييييييييييييه

اول تعليق
وبفلوسى وبراحتى

عندك مانع؟؟؟

اروح اقرى واجى

حنين القلب يقول...

ايه الاجابات الهايله ده
دكتور زراعى ياخواتى
يا لهوووووووووووى

والنبى حسيت انك دماغ كبيرة واجاباتك بجد حلوة

بس قولى مين اللى مجاوب عنها
بينى وبينك والله مش هجيب سيرة لحد

حنين القلب يقول...

خالود عايز تدخل السجن دفاعا عن الوطن
ههههههههههههههههههههههه

ده انت السنه اللى فاتت لما اخدت 25سنه يعنى مؤبد كنت بتدافع عن الوطن برضه ولا علشان كنت بتهرب شربات مخدرة
طبعا يابنى ما شرابك لازم يكون مخدر وكنت بتبيعه بدل المخدرات لحد ما اتقبض عليك وهربت منهم

وربنا لابلغ عنك

همس الاحباب يقول...

حنين القلب
يا خسارة انتى اخر تعليق يا ماما
سلامة النظر
وبفلوسك كممان
لا ما عنديش مانع طالما بفلوسك

حنين القلب يقول...

والست بتاخد كل حاجه

وانتوا يا عينى اللى مش بتاخدوا مننا حاجه خالص

وربنا اصلا انت لو طلع عليك حرامى هيديلك 5جنيه ويمكن تسرح معاه وتبقى اتعلمت شغلانه تنفعك

همس الاحباب يقول...

حنين القلب
ههههههههه
تصدقى دمك خفيف كرركررر
هو فين الدم اساسا
بينى وبينك من غير ما حد يعرف
عمو خالد
عندك مانع
بس الحمد لله ان الاجابات عجبتك
ما انتى مش عاجبك العجب

حنين القلب يقول...

بما انى اخدت الخمس تعليقات
ومن حقى اخد التاج

بس بقى مش عايزة منك حاجه

يلا بقى هىء

همس الاحباب يقول...

حنين القلب
هههههههه
بجد هما كانوا 25 سنة بس
طب الحمد لله اهو الواحد يرتاح منك ومن المدونة
ولا ايه رايك هاخد اللاب توب بتاعك معايا
شربات طب خليها مناديل يععععع

حنين القلب يقول...

ايوووووووووووووووووووووه يا جدعان هتفضل علطول مادى كده
يعنى هعلق وكمان ادفع فلوس

لا يا عمو خالد
انا عندى دم ولوتحب تشوف تعالى اشرحك
ههههههههههههههههههههه

على فكرة مش عجبتنى اوى
بس يلا علشان نرفع من روحك المعنويه
وش بيطلع لسانه وبيغيظك

همس الاحباب يقول...

حنين القلب
مين قالك كده احنا بناخد طبعا
خذ التليفزيون صلحه
خد العيل فسحه
خد على دماغك
كله خد خد ما فيش هاااات خالص
حرامى و5 جنيه ايه البخل ده
حتى الحرامى بتاعك بخيل زيك طب خليها 50 جم
والله حرامى كله ذوق

همس الاحباب يقول...

حنين القلب
ههههههههه
اشربى بالهنا والشفا
كل تاج وانتى سلطانية يا مسقعة

حنين القلب يقول...

انت مش حسيت بيهم طبعا منتا تلاقيك واخد عليهم
ده احنا اللى هنرتاح منك
بس اموت واعرف هما كانوا بيشموا ايه فى شرباتك ده انت مش بتسيب الشراب الا لما يكون استك وبس
يمكن بيحبوا ريحه الاستك
هههههههههههههههههههههههههههههه

اللاب توب وبتاعى
تصدق وربنا ضحكتنى هبقى ابعتلك ريموت التليفزيون ده اللى عندى ينفع
هههههههههههههههههههههههههههههههه

همس الاحباب يقول...

حنبن القلب
ما هو انتى اللى بتقولى بفلوسى
مع انى مش شايف منك سحتوت
وبعدين لو شرحتينى مش هتلاقى دم
هتلاقى شربات تحبى تشوفى
هههههههه
احسن انها ماعجبكتيش
وبعدين روحى المعدنية والمعنوية مرفوعة من غير تعليقك
ابتسامة شريرة

همس الاحباب يقول...

حنين القلب
هههههههه
ههههههه.
ريحة الاستك
حلوة وملعوبة يا شراب من غير استك
ريموت ايه
ده اخرك يا امى
فعلا انا نسيت انى بكلم واحدة من العصر الحجرى اخرتها القناة الاولى والثانية
والثالثة اقول يا غربتى
هههههههههه
منورة يا حنونة دايما

بـِصَمتـِـ أميرة ــــى يقول...

ههههههههههه
حلوة اوى الاجابات
لأ
علوه صعيع يعنى

يخربيت مخك ياسالى
لفيتى على كل الناس بالتاج بتاعك ده


جيت هنا اصقف وبما انك ماكنتش فى البيت
قلت اخرج بئى ويبقى صوت صقفتى

تقبل مرورى
:)
ملكة بحجابى

♥نبع الغرام♥♪≈ يقول...

السلام عليكم


بسم الله ماشاء الله
اجابات موفقه

تعرف التاج جه جالى وكنت مبدعه فيه

ههههههههههه

ربنا يسعدك

احيك من كل قلبى
تحياتى
انوسه

Remas يقول...

اجابات جميلة زى شخصية صاحبها يا ابو همس

هو انت وحنين لسا ناقر ونقير كدا ؟

ما تعملو هدنة شوية

بس والله انتو الاتنين زى العسل

عمرو جويلى يقول...

الأخ خالد
السلام عليكم
إجابات رائعة وأعزك الله عز وجل وتنم عن شخصية متدينة مثقفة يملؤها بغدٍ أفضل
دمت بكل الخير
ولا حرمنا الله من ودك الكريم

mimi يقول...

همس

حمد الله علي السلامة ومبروك التاج عليك .. اجاباتك عاقلة اوي .. برغم محاولاتك لاحتلال مدونات الجيران ..

بس ربنا اراد ان حنين القلب تحتل مدونتك ... يوم ليك ويوم عليك

الاجابة اللي عجبتني اوي :
" قاطع الطريق بيسرق فلوسك
والمراة ولله الحمد بتسرق كل حاجة قلبك وروحك وعمرك كماان"

تحياتي

أمل حمدي يقول...

ازيك يا ابو همس

الحمد لله اني جيت متأخرة شوية أصل مش بحب التيجان دي

أنت فعلا ملاك فى صورة انسان

ربنا يبارك فيك يارب

اجاباتك جميلة

دمت بحفظ الله

rovy يقول...

السلام عليكم
الحقيقه يا استاذ خالد اجابات حضرتك جميله و مميزه و حساها ظريفه جدا و دمها خفيف ..
مبروك عليك التاج و علينا المتوج ..

دمت بكل الخير

ارق تحياتى

عاشقه الرومانسيه يقول...

كل تاج وانت طيب ياابو همس
اجاباتك جميييييييييييله


سبحان الله ياخالد ربنا بيسلط ابدان على ابدان

حنونه قايمه بالواجب وزياده

حلوه وصله الردح دى استمروااااااااااا
(:

حياتى نغم يقول...

السلام عليكم / إجابات حضرتك جميله وأجملها منصبك والمراجيح أضحك الله سنك :)
بوركتم ودمتم بكل خير .

الفراغ يقول...

ايه الجمال ده يا خالد
بجد اجابه زكيه.وخصوصا رئيس المراجحيه
منصب مكناش واخدين بالنا منه..ولكنك جعلته اهم منصب ينفع للى فى بلدنا
وانا من رايى تعزمهم ببلاش..هما خدوا على ان بلدنا ملكهم
بس ان شاء الله يقعوا على جدور رقبتهم

همس الاحباب يقول...

ملكة بحجابى
الف شكر لحضرتك ده من ذوقك بس
وسالى صاحبة واجب طول عمرها
بس الواجب كان تقيل حبتين
احسن بردوا مش عايزين ازعاج للجيران
هههههههه
نورتى حضرتك

همس الاحباب يقول...

عاشقة الاحزان
انتى دايما مبدعة يا ايناس
والحمدلله ان الاجابات عجبتك
دمتى بكل ود
تحياتى

همس الاحباب يقول...

ريم
ههههههههه
ربنا يكرمك ويسعدك دايما يا ست الكل
وبعدين هدنة ايه ده احتلااال
ينفع كده تحتل المدونة وانا ساكت
هههههههه
منورانى دايما وسعيد بتواصل حضرتك

همس الاحباب يقول...

اللؤلؤة
اخى الكريم
بارك الله فيك وجزاك خيرا
وسعيد جدا بزيارنك وتواصلك المستمر
تقبل تحياتى وتقديرى

همس الاحباب يقول...

ميمى
الله يسلم حضرتك
وما يحرمناش من كرم اخلاقك وذوقك
بقى كده فرحانة ان حنبن احتلت المدونة
ماشى يا ستى
الحمدلله انها عجبتك خلى بالك بقى
تحياتى وتقديرى

همس الاحباب يقول...

ماما امولة
ربنا يكرمك ويسعدك دايما يا ام عبد الرحمن
ده من ذوق حضرتك وكرم اخلاقك
واتمنى انى اكون عند حسن ظنك دائما
تحياتى وتقديرى لحضرتك

همس الاحباب يقول...

روفى
يارك الله فى حضرتك
وجزاكى خيرا
والف شكر لتشريفك وتواصلك الدائم
دمتى بصحة وسعادة
تحياتى وتقديرى

همس الاحباب يقول...

عاشقة الرومانسية
وانتى طيبة يا دودو
ده من ذوقك بس
اه طبعا ما هى صاحبتك مين يشهد للعروسة
العريس طبعا
ههههههههه
منورة يا دودو

همس الاحباب يقول...

حياتى نغم
جزاكى الله خيرا
والحمد لله ان الاجابة عجبتك
دمتى بكل ود

همس الاحباب يقول...

الفراغ
يا سلام من عيونى با ماما
طبعا العزومة والمشاريب على حسابى انتى تقشرى واحنا ناكل
منورانى دايما وسعيد بوجودك دائما
تحياتى وتقديرى

رحــــيـل يقول...

خالد

اجاباتك لذيذه جدا يجد
عجبنى قوى تعريفك للمرأه والفرق بينها وبين قطاع الطرق ايون كده هو ده الكلام ههههههه

تحياتى وخالص احترامى وتقديرى

همس الاحباب يقول...

رحيل
هههههههه
الحمد لله انه عجبك التعريف
انا خفت من اهدار دمى
دمتى بكل ود
تحياتى

أم أحمد المصرية يقول...

بالهنا و الشفا التاج سبقتك في حاله اصل سالي مستقصدانا :)))))
بس تعرف انا بح اقرأ تيجان الاصدقاء بتعرفني بهم اكتر
عجني جدا ردك علي سؤال هذا فراق بيني و بينك
وقانا الله جميعا شر المعاصي

mahasen saber يقول...

ابو همس تعرف ان ام دودو احتمال كبير تعلقنى على مدخل دمياط

لانها قالتلى اجاوب التاج وفى التليفون اتفقنا انى هجاوبه وبعدين انسى انا وانزل بوست فضفضه عن اليى جوايا

ارجوك بئه تتوسط خير ما بينا اصل سالى دى اختى اليى مشفتهاش فلو زعلت معرفش هصالحها ازاى

هسيب الموضوع على الله وعليك وعلى رقة قلب ام دودو

mahasen saber يقول...

اما الاجابات بئه فانا غشتلى كام اجابه كده ينفعونى وقت ما احله

بس اول اجابه ملاك دى متناسبنيش خالص
فمردتش اغشها قلت هتبقى معايا مكشوفه قوى واحتمال يعملولولى انتا وسالى محضر غش

ربنا يكرمك انتا انسان رائع قلبا وقالبا واليى يعرفك من قريب او بعيد اكيد يا ابو همس هو الكسبان

ميرا ( وومن ) يقول...

طب كويس إني جيت متأخره

طب تصدق والله انا اول مرة قريت اجابات التاج دة قولت مني الغبي اللي عامله - مع الإعتذار لصاحب / صاحبه التاج -

فعلا استرخمتة جداً بس اتضح إن العيب مش في التاج العيب بجد في اللي جاوب

مكنتش عارفة ابلع الإجابات خالص
بس اجاباتك بقي اجمل حاجة فيها حاسيتها تلقائية ومش غريبة عنك

سبهللة يقول...

عجبنى اوى جوابك على سؤال اسرائيل

إسرائيل تقصف كل جنوب ممكن بحثا عنك ، أى شمال ستقصد؟بحثا عنى انا طب ما تقصف هو انا احسن من اللى ماتوا فى غزة ولا فى دير ياسين ولا صبرا وشتيلا ولا فى الحرم الابراهيمى ولا ايه وايه !!!؟؟؟اعتقد الجنوب هيكون افضل من الشمال فى تلك الحالة

هى دى الرجولة
ال وبيقولوا الرجالة ماتوا فى73
ما انت لسه عايش اهو
ربنا يديك الصحة وطول العمر

همس الاحباب يقول...

ام احمد المصرية
الله يهنيكى يا رب
الحمدلله
وده من ذوق حضرتك
دمتى بكل ود
تحياتى

همس الاحباب يقول...

محاسن صابر
ام بيرو
منورة يا ام بيرو
وان شاء الله ام دودو هتسامحك وهتقدر ظروفك انا واثق من كده
وعامة انا اضم صوتى لصوتها ونطالبك باجابة التاج
هههههههه

همس الاحباب يقول...

محاسن صابر
مين قال كده
انتى ملاك الملائكة يا ستى
ربنا يكرمك ويسعدك
وان شاء الله نشوف اجابات متميزة من شخصية متميزة
تحياتى وتقديرى

أسير الجراح يقول...

بسم الله ما شاء الله عليك يا خلود


الله واكبر نمسك الخشب

والشكوش والمسامير


ههههههههههههههههههههههههة


اجباتك روعة

دمت اخى فى حفظ الله


اسير الجراح

حاجات جوايا يقول...

هههههههههههههههه
حلوة شخبطة حضرتك تخطيط لمستقبلنا دى
ههههههههههههههههههههههه

تسلم يا ابو همس على اجابة التاج رغم انشغالك :)

أمريكا
سرطان يسرى فى جسد العالم الثالث


السرطان بقاله علاج الحمد لله
والمهم الحالة النفسية للمريض وقوة ارادته فى التغلب على المرض
ربنا يعافيك ويعافينى ويعافى المسلمين يارب

خالص شكرى وتحيتى واحترامى
:)

yoyo يقول...

صباحك سكر يا خالود

اجابتك جميلة اوى اوى
ومشاء الله عليك يعنى
طبعا انت ملاك والله مش شيطان ابدا

ماشى ماشى هى المراة بتسرق برده
ههههههههههه سرقة عن سرقة تختلف طبعا

دمت اخى بالف خير وصحة
تحياتى
يويو

Kiara يقول...

هههههههههههههههههههههههه

الحمد لله اني موش اول خمسه

اجاباتك جميله ياخالد

بلاش تغطسسسسسسس بقي

maha zein يقول...

مالك يا شيخ متحامل علينا كده
ده احنا حتي غلابة
نياهاهاهاهاهاه

تاج حلو ولظيظ

وانت حليته بردو بذكاء ودهاء

بقولك انا عوزة اتمرجح بالله عليك
لما اللفة بتاعت المسؤلين تخلص قولي
ربنا يبارك فيك ويعزك

سبهللة يقول...

خالد
دة الميل بتاعى
raniarachad@yahoo.com
ابعت لى الميل بتاعك وقولى فيه انك همس الاحباب عشان ابعت لك دعوة لقراءة مدونتى لانها اتقفلت للعامة وبقت مفتوحة للى عندهم دعوات بس
سلام عليكم

غير معرف يقول...

تحياتك لمدونتك
ومبرزك على التاج
اسمح لى بان ادعوك لزيارة و متابعة مدونتى

و هذا الرابط الأخير
عن الشيخ إمام عيسى

http://shayunbiqalbi.blogspot.com/2009/06/blog-post_07.html

مودتى

سهر يقول...

تدوينة لطيفة
واجابات بسيطة وتلقائية