31 أغسطس 2009

تحديث بخصوص يوم الافطار

اولا
مكان الفطار هيكون تسيباس بدل ابو خالد و ده اقتراح بنت خيخة
و هو فى اول شارع الهرم
و اسعار وجباته تترواح بين 30 و 35
و الوجبات هى
دجاج مشوي 32.50 جنية
سمبوسك لحمة - ورق عنب - نصف فرخة مشوية - أرز خلطة - طحينة

شيش طاووق 30.50 جنية
سمبوسك جبنة - كبيبة -أوراك دجاج مشوية - أرز خلطة - طحينة

دجاج بانية 32.50 جنية
سمبوسك لحمة -ورق عنب - صدور دجاج بانيه - بوم فريت - مكرونة فرن - طحينة

كفتة مشوية 29.50 جنية
سمبوسك جبنة - كبيبة - كفتة بلدي مشوية علي الفحم - أرز خلطة - طحينة

دجاج صيني 31.50 جنية
شوربة خضروات صيني - سمبوسك جبنة - كبيبة - قطع دجاج مع الصوص الصيني مع الخضراوات - أرز أبيض - سلطة

إسكالوب بانية 35.00 جنية
سمبوسك جبنة - كبيبة - شرائح لحم بتلو بلدي - بوم فريت - مكرونة فرن - طحينة

كباب وكفتة 35.00 جنية
سمبوسك جبنة - ورق عنب - كباب وكفتة بلدي مشوي - أرز بالخلطة - طحينة

كوردن بلو 32.00 جنية
سمبوسك لحمة - كبيبة - كوردن بلو - بوم فريت - مكرونة فرن - سلطة خضرا

طاجن خضروات باللحمة 31.50 جنية
سمبوسك جبنة - كبيبة - خضروات الموسم باللحم - أرز أبيض - سلطة خضرا

طاجن بطاطس باللحمة 31.50 جنية
سمبوسك لحمة - ورق عنب - بطاطس باللحم البلدي - أرز أبيض - سلطة خضرا

مع كل وجبة عصير و شوربة وحلويات شرقية

اهم حاجة اللى هيطلب مشويات يبلغنى قبلها حتى لو السبت الصبح علشان المشوى بياخد وقت فى التحضير

ثانيا
انا قلت نضرب عصفورين بحجر و طلبت من جمعية صحبة خير تعمل هى الوجبات
علشان تكون مصدر رزق للستات فى منطقة اسطبل عنتر
و بيقوم بالاشراف عليهم القائمين بادارة الجمعية
و هتكون الوجبة بنفس مواصفات الوجبة الاولى
بس الفرق ان هتتبدل ثمرة الفاكهة بعلبة عصير و 3 بلحات

جدوال اليوم كالاتى ان شاء الله

الساعة 3 التجمع قدام مستشفى ابو الريش اليابانى
الساعة 3:30 هنقسم نفسنا لفريقين واحد للتوزيع فى مستشفى ابو الريش و التانى فى مستشفى المنيرة
الساعة 4 معاد وصول الوجبات
الساعة 5:30 التحرك لتسيباس فى شارع الهرم


بالنسبة للناس اللى عايزة تدفع الفلوس قبلها
ممكن من خلال مقابلة مع الاستاذ خالد
فى اى مكان قريب من مكان شغله او بيته سوا الجيزة او الهرم او الدقى
او ممكن من خلالى يوم الاربعاء لو هم فى مصر الجديدة او مدينة نصر

اللى مش هيقدر يبلغنا قبل يوم الاربعاء بعدد الوجبات اللى هيتبرع بها
ممكن وقتها نجمع المبالغ دى و نهديها لاى من الحالات الحرجة و بتحتاج دوا غالى

جزاكم الله كل خير

لمزيد من التفاصيل عند قوس قزح


23 أغسطس 2009

تفاصيل افطار صائم


كل عام و انتم بخير

و رمضان كريم

و يارب يتقبل صيامنا و صلاتنا و قيامنا فيه

السنة اللى فاتت ربنا وفقنا و عملنا يوم جميل التقينا فيه على الخير 
و اسعدنا اطفال كتير معنا فى مستشفى ابو الريش

و يمكن يومها شوفنا ان اغلب الاطفال سنهم صغير و بيحتاج وجود مرافق معهم و
غالبا بيكون المرافق ده ام الطفل او باباه .. الناس دى لاحظنا انهم وقت الفطار
بيدور على اى حاجة بسيطة تنفع يفطروا بها لدرجة ان فى امهات فرحت بشوية
البسكويت اللى وزعناهم للاطفال علشان تخليها للفطار


طفل مريض و بيتالم حاجة صعبة جدا .. لكن فى نفس الوقت المرافق له بتكون حالته اصعب لانه مش


عارف يخفف عنه ازاى .. و علشان كده الفكرة المرة دى هتكون للناس دى .. محاولة للتخفيف عنهم و نقولهم اننا بنشارككم حتى لو بوجبة افطار بسيطة




و طبعا اللى يحب منا يقدم تبرع مادى او عينى بجانب الوجبة يبقى جزاه الله خيرا


الوجبة هتكون عبارة عن : رز + خضار + قطعة فراخ او لحمة + مخلل


عيش + ثمرة فاكهة


و هيكون تكلفيتها 10 جنيه


و المعاد هيكون يوم 5 سبتمبر


الساعة 3 قدام باب مستشفى ابو الريش اليابانى للاطفال


نفس المستشفى اللى اتجمعنا فيها قبل كده




و لو ربنا اكرمنا و كان عدد الوجبات يفرح و عددها كتير ممكن نفطر التمرجية


بتوع المستشفى او نطلع على المستشفى اللى جنبها و هى مستشفى المنيرة لاطفال و


نوزع على المرافقين هناك


و اليوم ده مش بس للناس ده كمان لنا احنا لان الرسول الكريم قال " مَن فطَّر


صائماً كان له مثل أجره غير أنه لا ينقص من أجر الصائم شيء "يعنى ان شاء الله 
ناخد اجر صيام كل شخص قدمنا له وجبة



و فى حاجة عايزة اقولها للناس اللى مش هتقدر تشارك فى التبرع انهم ممكن


يحضروا معنا و يشاركوا فى توزيع الوجبات و التخفيف عن الاطفال و اكيد ده


بردو له اجر عند الله


و طبعا لاننا مش هنلحق نرجع بيوتنا على وقت الفطار ممكن بعدها نروح نفطر مع


بعض فى نفس المكان اللى روحناه المرة اللى فاتت - جزا الله سوو هو اللى راح


صور المكان و جاب قائمة الاسعار منه - محل ابو خالد فى شارع شمبيليون و


ده بيقدم مشويات و رز و سلطات و سعر الفطار عنده ممكن يكون فى حدود ال 50 جنيه


و لو حد عنده اقتراح بمكان تانى للفطار ياريت يقول


اما بقى عن الوجبات اللى هنقدمها للناس فيفضل كل حد ناوى يشارك معنا يبعت يقولنا على الايميل او برسالة على الموبايل بالعدد اللى ناوى يشارك به علشان احجزه


المرة دى مينفعش نحدد يومها لازم على الاقل يوم الاربع اكون عارفة عدد الوجبات اللى هحجزها علشان تتحضر ليوم السبت


ده ايميلات الناس المسئولة عن اليوم











و ده ارقام ممكن تبعتوا رسالة عليها او تسالوا على اى شىء خاص باليوم ده


داليا صاحبة مدونة قوس قزح


0117742287


 خالد صاحب مدونة همس الاحباب


0101345140



اللهم ارزقنى و اياكم فى هذا الشهر رحمة الايتام و إطعام الطعام و إفشاء السلام و


صحبة الكرام يا ارحم الراحمين

15 أغسطس 2009

مواطن مقهور ( يا ريتنى كنت بوبى )!!؟





يا ريتنى كنت مكان الكلب اللى فى السلسلة

كلمات قالها شاب لفتاة على كورنيش النيل اثناء صحبتها لكلبها الكلمات كانت تنم عن غزل للفتاة على ما اظن ولكن الكلمات كانت لها وقع اخر عندى
ربما يكون الشاب يريد ان يغازل الفتاة مع تحفظى على الاسلوب والطريقة ولكن جالت بخاطرى اشياء اخرى
أولها لو كان الشاب تحقق له ما يريد واصبح مكان الكلب المربوط فى السلسلة ماذا سيفعل هل سيكتفى بالنباح والتلذذ بالسلسلة والانقياد وراء تلك الفتاة ام ماذا !!!؟؟؟؟
من وجهة نظرى انه لو اصبح مكان الكلب سيحقق كل طموحاته واكثر كيف !!!؟؟؟
اول تلك الطموحات ضمان المسكن المناسب وما ادراك ما مسكن الكلب عند تلك الطبقة لابد من توافر بيئة صحية ونوما هادئا ومريحا للكلب واشك ان هذا الشاب ينام مع اكثر من تسعة اشقاء فى غرفة لا تتجاوز 9 متر تملئها الرطوبة ولا تدخلها الشمس فهنيئا لك الحصول على المسكن

ثاني تلك الطموحات ضمان الماكل والمشرب وعن اكل الكلاب حدث ولا حرج فكل ما يخطر على بالك واللى ان شاء الله ما خطرش هتلاقيه امامك معلب ومغلف وبجودة عالية وفى اوقات منتظمة وربما ظل الشاب بدون اكل طول اليوم او عدة ايام

ثالث تلك الطموحات لو اراد ان يدخل دنيا ويتأهل ويعمل اسرة اصل الوحدة وحشة يا جدعان وده كلب رقيق وحساس وعاطفى ويعشق الرومانسية ومقضيها يسمع كوز المحبة اتخرم وكلبى دليلى ستجد الاسرة تتسابق لكى تبحث له عن كلبة اصيلة وبنت كلاب طيبين ومن عيلة لها باع طويل فى النباح وتكون مطيعة ومش بعيد ننشر كام اعلان فى الجرائد والمجلات عن مواصفات العروسة المطلوبة وصورة للعريس الموقر، اما اذا كان الكلب بيلعب بديله ومظبط مع كلبة الجيران ففى هذه الحالة خير البر عاجله ويوم عندكم ويوم عندنا احسن ما يطفشوا ويتجوزو من ورانا ويخلفولنا كلاب شوارع
رابع الطموحات سيضمن مكان وماوى وتعليم على اعلى مستوى لابنائه ورعاية صحية وترفيهية واشتراك فى النوادى ومصيف ومشتى كماااان وفسحة على الكورنيش يوميا صباحا ومساء واسترجاع ذكريات الحرمان ايام ما كنت بشر ومفيش مانع انك تعاكس لولو( كلبة الجيران ) عيش يا ابن المحظوظة
مضيت فى طريقى استرجع بعض الذكريات الخاصة بالكلاب وجدت الاتى

ان الكلاب طبقات وانواع وفصائل ومعادن كمااااان

فهناك كلاب الشوارع التى تعيش على المخلفات وبواقى القمامة وتعيش فى الشارع حرة طليقة تعيش وتمووووت ولايشعر بها احد


وهناك كلاب الحراسة الخاصة والمدربة والتى تحظى باهتمام وتدريب واكل من نوع خاص نظرا للحاجة الى خدماتها وبعد انجاز المهمة يبقى كلب ومات



وهناك كلاب العز واكل الوز ودى حكايتها حكاية لانها بتحظى باهتمام ورعاية خاصة جدا نظرا لانها كلاب من نوعيات خاصة كما يشاع وتحظى برعاية صحية خاصة وتعالج فى مستشفيات فى اوربا نظرا لسوء المستشفيات فى بلدنا


واكثر ما اعجبنى هو اهتمام تلك الاشخاص باكل الكلاب ونوعيته وطريقة التسوية ونوعية الاكل ( اللحوم من غير عضم حفاظا على اسنان البوبى والفراخ من غير جلد لان معدته حساسة) تلك الكلمات قالتها سيدة لشيف امامى مما جلعنى اصاب بهيستريا من الضحك متذكرا البنى ادمين الذين يعيشون على مخلفات الاطعمة ويشربون مياه المجارى ويا كلون الفاكهة المسرطنة والقمح المشع والخضار المروى بمياه المجارى ناهيك عن الفول والكبده الملوثة والكشرى اللى اعتقد ان البوبى لو شاف منظره هيغمن عليه وممكن يدخل مصحة نفسية بباريس لعلاجه نفسيا مما اصابه من منظر تلك الاطعمة لاقدر الله
موقف اخر حدث مع بواب احدى العمارات عندما اعطاه احد ساكنى العمارة قائمة ببعض المتطلبات الخاصة بسى بوبى والراجل بحسن نية اتجه الى اقرب صيدلية لشراء الاحتياجات على انها ادوية لصاحب الكلب ورجع للساكن ليخبره بان ادوية حضرته غير موجودة بالصيدلية ورد عليه صاحب الكلب بانها ليست ادوية دى الاكل الخاص بالكلب يا متخلف
متى تنظر الحكومة الى الشعب وتعامله نفس تلك المعاملة او جزء منها!!؟؟؟

تنويه هااااام جدا انا ليس ضد الرفق بالحيوان ولكن مع الرفق بالمواطن المقهور كما لايوجد اى حقد طبقى بينى وبين سى بوبى

والله على ما اقول شهيد

لذا لزم التنويه

8 أغسطس 2009

دعوة إفطار صائم



 بسم الله الرحمن الرحيم 

كل عام وانتم بخير بمناسبة قرب حلول شهر رمضان المعظم
اعاده الله علينا وعلى الامة الاسلامية بالخير واليمن والبركات

دعوة الى الاخوة والاخوات مدونى مصر المحروسة  
لعمل يوم لإفطار صائم

عن زيد بن خالد الجهني قال : قال صلى الله عليه وسلم : " مَن فطَّر صائماً كان له مثل أجره غير أنه لا ينقص من أجر الصائم شيء " .
رواه الترمذي ( 807 ) وابن ماجه ( 1746 )


المكان : مستشفى ابو الريش الجامعى 
الميعاد يوم الجمعة 4-9-2009
او يوم السبت 5-9-2009
التجمع هيكون الساعة الثالثة عصرا بالمستشفى
اليوم عبارة عن تبرع بقيمة وجبة افطار للامهات المرافقات للاطفال المرضى
وكذلك قسم التمريض بالمستشفى  (كل حسب امكانياته )؟

عقب توزيع الوجبات سنتوجه الى مكان قريب 
لعمل افطار جماعى للمدونين المشاركين فى اللقاء
علما بان تكلفة الوجبة المقدمة وعدد الوجبات المطلوبة 
سنوافيكم بها فى  بداية شهر رمضان المعظم
واى استفسار او اقتراح سنرد عليه فورا فى  جميع المدونات المشاركة 
فى عمل اللقاء
  
وكذلك كل مدونة تشارك فى النشر عن اللقاء
الهدف الاساسى من هذا البوست هو عمل استفتاء لاختيار احد الايام المناسبة لكم من بين يومى الجمعة والسبت 4 أو 5-9-2009
وبناء عليه يتم تحديد باقى الخطوات
وكل عام وانتم بخير

2 أغسطس 2009

الحياة بقى لونها ايه


الف مليون مبروك للمهندس احمد القاضى 
صاحب مدونة يا مراكبى بخصوص حفل توقيع العدد الاول 

 
الكتاب عبارة عن مجموعة من القصص القصيرة كل قصة تعالج مشكلة من مشكلاتنا الحياتية باسلوب مختلف تماما عما عهدناه من الكتابات الاخرى فالكاتب استخدم اسلوب السهل الممتنع فى كتابة القصة  فاختياره للاسلوب الساخر بدون ابتذال  لمعالجة بعض المشاكل رائع جدا وكذلك كلماته البسيطة التى تحمل من المعانى الكثير والكثير 
الاسلوب سلس للغاية والكتاب يجعلك مشدود لقراءته من الغلاف الى الغلاف
ودائما مبدع كعادتك وفى انتظار المزيد من الاصدارات الرائعة يا هندسة
 
*****************
الف مليون مبروك لدودو عاشقة الرومانسية على الخطوبة السعيدة

وعقبال الليلة الكبيرة 
الحمد لله شرفت بحضور حفل الخطوبة الرائع 
والعريس والعروسة كانوا منورين طبعا يسم الله ما شاء الله 
ربنا يتمم بخير ويجعل ايامهم كلها افراح

كما سعدت بمقابلة حنين القلب ام عتريس 
اللى كنت خايف من حضورها نظرا لبركاتها اللى بتحل على المكان 
وخوفا على العريس والعروسة اللى ممكن يغيروا القاعة بسبب وجودها 
وسعدت بمقابلة سالى حروف كماااان
الف مليون مبروك يا دودو
********************

كل سنة وانتم طيبين 
وعقبال 100 سنة 
النهاردة عيد ميلادهم