23 ديسمبر 2010

لقاء المنصورة

بالرغم اننى شخص لا يشغلنى كثيرا نهايات وبدايات الاعوام لانها تذكرنا بضياع عام من العمر وبداية عام اخر .
لكن ربما تكون نهاية عام 2010 مختلفة قليلا لانها ستكون بصحبة اناس تحبها فى الله وفى مكان مختلف لانه وسط الطبيعة الخضراء وبدعوة كريمة من اهل المنصورة بقيادة زعيم جمعية المراة المتوحشة  ندى الياسمين وذلك لزيارة دار الايتام بالمنصورة ،يعنى هنودع عام ونستقبل عام جديد بفعل خير وفى مكان ساحر ومع اهل التدوين من مختلف المحافظات 
الميعاد : يوم الجمعة 31-12-2010 
المكان : مدينة السحر والجمال مدينة المنصورة
 كل سنة وانتم طيبين وعام سعيد عليكم جميعا 2011
بوستات عن اللقاء 
***************

12 ديسمبر 2010

ما بعد البؤجة


من الصعب ان تبدا خطوة للامام وتتبعها خطوات الاخرين وفجاة تجد نفسك تتراجع خطوات للخلف ومطلوب من الاخرين ان يتقدموا للامام وكأنك بشر وهم ملائكة احساس انتابنى قبل لقاء البؤجة الاخير كان بداخلى احساس بالهروب من ذاتى ومن الاخرين ،احساس بداخلى يدعونى بالبعد وترك الساحة لمن هم افضل منى واقدر على  العطاء والحمدلله انهم كثيرون .
ولكن هناك شىء اكبر من كل هذا انه ثقة الاخرين فيك وتشجيعهم لك على مواصلة خطواتك للامام  والبعد عن الهروب لاى سبب من الاسباب ربما اكون بطبعى شخص غير انهزامى ولا اقبل بالانسحاب مهما تكن الظروف والمبررات لانه من الافضل لك ان تعيش رجلا ليوم من ان تعيش دهرا جبانا .
مقدمة لا داعى لها ولا مبرر لها غير تذكرة النفس والاخرين باننا طالما بدانا خطوة للخير لايجوز التراجع عنها مهما تكن الاسباب
ونبدا الحكاية من جديد حكاية كل شاب وفتاة كل رجل وسيدة حكاية كل مدون ومدونة ساهم وشارك معانا فى البؤجة منذ بدايتها وحتى البؤجة الاخيرة شكرا ليكم وجزاكم الله خيرا وجعلها فى ميزان حسناتكم جميعا .
الفكرة بدات صغيرة وباعداد لا تتجاوز أصابع اليد الواحدة ولكن بتوفيق من الله وبفضل مجهود الاخت قوس قزح ورحاب وفاتيما وخيخة وكل المدونين الذين شاركوا بمالهم ووقتهم ومجهودهم ودعواتهم اصبحت البؤجة من اكبر واهم التجمعات  الخيرية بين المدونين .
بؤجة الخير الاخيرة كانت مختلفة عن البؤج السابقة فى كل شىء من حيث الحضور  وكم التبرعات العينية والمادية .
اولى تلك الاختلافات المشاركة الفعالة والحضور المميز لاهل اسكندرية المارية( مارو قلب القطة - ودودو عاشقة الرومانسية  - ايمان الحب الجميل وبنتها علياء )  لان حضورهم اعطى اليوم طعم ومذاق خاص فلهم منى كل تقدير وشكر وعرفان لان  الكلمات لاتستطيع وصفهم وتبخسهم كثيرا من حقهم لذا ادعوا الله ان يجعله فى ميزان حسناتهم جميعا
والحضور الدائم والمشاركة الجميلة من اهل بور سعيد اللى  بينورونا دائما فى اعمال الخير نهر الحب ونسمة اختها سفراء الخير دائما والمشاركة الفعالة من اهل الشرقية والمنصورة وطنطا والاسماعيلية وكل محافظات مصر سؤاء من حضر أو اتصل تليفونيا  وشاركنا  فرحة اللقاء .
شكر لاهل السودان الشقيق متمثل فى الاتصال الدائم من عاشقة القمر للاطمئنان على الجميع شكرا يا سمية ، وشكرا دكتورة علا على المكالمات الدائمة وافتقدنا وجودكم
اهل القاهرة دائمى الحضور والمشاركة شكرا ليكم وجزاكم الله خيرا يا اجمل ناس وصحبة    ابو حميد - ضياء - مصطفى ريان - عمرو يسرى - حسنى المستفز -كريم شاب فقرى - كيمو صوت من مصر - وليد الدوغرى - احمد سكر دول  الرجالة الجدعان  اللى بتظهر وقت الشدة
شريف باشا وخطيبته اللى نورونا وشرفونا بالحضور ربنا يتمم بخير ونشوفكم عصفورين كناريا فى الكوشة  بس بلاش القهوة يا باشا يوم الفرح .
شفقة هانم واحسان بك وجودكم ليه طعم تانى اكيد ربنا ما يحرمكم منى وخصوصا احسان بك ما تنساش الدرس الخصوصى .
استاذ / هانى نط فى الكوز سعدت جدا بتشريفك وحضور حضرتك وشكرا على الهدايا القيمة 
د/ ستيته  معشوقة المدونين  حضورك اثلج صدورونا جميعا 
منى ابو السعود بالرغم من عدم معرفتى بحضرتك لكن ربنا يكرمك لانك الوحيدة اللى حفظتى ماء الوجه لاهل القاهرة مع مدونى اسكندرية جزاكى الله خيرا .
كيارا وسونى 2000 تؤام الشقاوة والعفرته 
ريم رسائل بلا بريد ما فيش اختلاف وجودك اسعد الجميع 
غادة محسن واصدقائها حضور خاص للبؤجة كالعادة
ساجى الجدعنة والجراة كلها
حفيدة عرابى حضور مميز كالعادة واللى مدرستش تاريخ فى الجامعة
بنات االفيس بوك حضور مميز كالعادة ومشاركة فعالة 
قوس قزح امممممممممم.. وش الخير ورمانة الميزان 
اكيد نسيت ناس كتير جدا جدا لهم منى كل تقدير واعتزاز 
اليوم كان رائع جدا بوجود ناس هدفها الخير وحب الخير 
اليوم كان ملىء بالاحداث الجميلة والتهريج والصحبة الرائعة 
ابتسامة سعادة ونظرة فخر واعتزاز كانت مرسومة على وجوه مسئولى الجمعية بكم البؤج والتبرعات وجودة ونظافة الاشياء المتبرع بها .
لا اختلاف ان من اهم سلبيات اليوم عدم حضور فاتيما لانها كانت الغائب الحاضر فى قلوب الجميع وغيابها اثر سلبيا على الجميع وخاصة العنصر النسائى الذى افتقد احضانها وحنانها واهتمامها الخاص بهم 
بالرغم  من تاكدى من غيابها قبل اللقاء لكن احساسى انها ستكون موجودة بروحها مع الجميع وهذا ما حدث بالفعل ونالت دعوات اتمنى من الله ان تكون من نصيبها وان يزيح عنها ويفرج الهم والكرب ويسعدها  ان شاء الله .
فاتيما : بخصوص التعليق ما ينفعش ازعل منك انا مقدر ظروفك جدا جدا لكن رغبتى فى حضورك علشان الناس اللى بيحبوكى وعلشان تخرجى من حالتك النفسية ليس الا وانتى لسه عندك شك انى زى هانى وماجد يبقى عليه العوض يا ام يوسف .
ابو خالد : كان عندى امل كبير انك تحضر بس اكيد الظروف غير مواتية  حضورك له طعم خاص . 
حنين القلب : كان عندى امل كبير يكون حضورك الاول للقاهرة بصحبة عمر باشا .
خيخة  غياب غير مبرر وغير متوقع
كيكى عووو : فاتك نص عمرك ونص الفرخة كمان .
منووونة : كأن القدر اراد ان يحرمنا من الاشقاء فاتيما ومنونة .  
رحاب كوكب ابى : كل سنة وانتى طيبة والبؤجة الجااية معانا ان شاء الله
تفاصيل اليوم يا نهار ابيض ومال اللى فاااااات ده كان ايه ده مقدمة فقط اللى مستعجل يرجع يقرا من الاول تانى 
اليوم بدأ منذ التاسعة صباحا على غير العادة نشاط واستيقاظ مبكر لان فاتيما مش جااااية ولازمن حد يكون موجود من بدرى ولكن تاتى الرياح بما لا تشتهى السفن فالبرغم من نزولى مبكرا ووصولى فى العاشرة صباحا الا ان اتصال عاشقة الرومانسية اصابنى بالاحباط لانهم وصلوا المكان وفى انتظارنا نحن اهل القاهرة يلا واجب عليهم عملناها قبلكم يا مارو كده خالصين المهم قابلت اهل اسكندرية الجميلة وناسها الطيبين عند الجمعية مارو وايمان ودودو وعالية ومعاهم منى ابو السعود من القاهرة واللى طلعت بميت راجل واجدع مننا كلنا .
بعدها توجهنا الى مقر الجمعية الجديد وسلمنا البضاعة يا معلمة ونزلت انا ورشا نجيب كيارا وسونى من محطة المترو وسبنا عمرو يسرى وحسنى المستفز على الكوفى اللى تحت الجمعية  وصلت كيارا وسونى ورجعنا للجمعية ابص بعينى الاقى زعيمة العصابة مارو هانم  جايبة الناس وقاعدة بيهم على الكافتيريا وطالبة قهوة دوبل وبتوزع المهام على الصبيان والسريحة ومش ناقص غير شيشة قص البرج وتبقى المعلمة الباتعة، بعدها توافد الصبيان قصدى المدونين حضرمصطفى ريان وضياء وقوس قزح وساجى وايناس نهر الحب ونسمة اختها  وحفيدة عرابى وجاءت عبير من الاسماعيلية وريهام من الفيس بوك وابو حميد ومفاجاة اللقاء شريف باشا وخطيبته ،فجاة حضرت دكتورة ستيته واستقبلت استقبال صلاح الدين بعد فتح اورشليم وخاصة من ريتشارد قلب القطة التى انقضت عليها انقضاض القط على فريسته والحمد لله خرجت من بين براثنها بسلام .
بعدها حضر ا/ هانى نط فى الكوز واللى وزع علينا كتيب رائع لمحاسبة النفس وتقييم اعمالنا على مدار العام كما حضر الدويتو التدوينى الرائع شفقة واحسان ،بعدها اتجهنا معشر الشباب  لصلاة الجمعة وعلى غير العادة خرج مصطفى ريان اولنا من الصلاة واثار الغضب والحنق تكسو وجهه البرىء من طول الخطبة واستفزاز الامام ومعه كل الحق ، بعدها اتجهنا الى الجمعية لانتظار باقى الحضور وقمنا بتوزيع انفسنا على العربيات الموجودة  للذهاب الى الحسين وركبت البنات اولا طبقا للمقولة السيدات اولا ومش عارف انهو شخص قالها بصراحة لانها مقولة خاطئة جدا لانى فؤجئت بعد ما الجميع ركب وتحركت العربيات انى واقف وحدى وما فيش حد سال فيه لكن من حسن الحظ لقيت بعض الشباب رايحيين يركبوا المترو ركبت معاهم وخدناها مواصلات وكانت فكرة عبقرية من شاب فقرى ومصطفى ريان وعمرو يسرى وحسنى المستفز لاننا وصلنا قبل الجميع وبسهولة وييسر .
عند الحسين تجمعنا وانضم الينا كيمو صوت من مصر وغادة محسن وصحباتها وصبرنى يا رب واسرتها الجميلة واتجهنا الى بيت زينب خاتون وهو بيت اثرى من العصر المملوكى طبعا العيال انطلقت فى ارجاء البيت وكانهم اول مرة يشوفوا مكان براح مش علب سردين وانطلق كيمو وضياء ومصطفى ريان الى اعلى السطح  وبعدها حركة نص كم من كيمو مع مصطفى ريان طلعه فوق السطح وبعدين شال السلم وسابه متشعلق فوق ومن مزنقى هذا اعلنها صريحة انه هناك مخطط  شرير من ابناء المطرية  متمثل فى وليد الدوغرى وكيمو ضد ابناء حلوان متمثل فى  مصطفى ريان وبصفتى على الحياد بقولهم ما ينفعش كده مرة الهريسة ومرة السلم  انا جااااااااى بهدى النفوس على فكرة يعنى يا ريت هجوم من ابناء حلوان على المطرية لانه كده حرام ههههههه . طبعا الناس الكبارة اللى زى حالتى جلسوا فى فى صحن البيت يتابعوا الاخرين وانضم للجلسة الاستاذ هانى وابو حميد وايمان الحب الجميل ،بعدها اتجهنا الى مطعم جاد لتناول الغذاء وانضم الينا وليد الدوغرى واحمد سكر بعدها انتهى اليوم بالنسبة لى ولاهل اسكندرية الذين غادروا الى محطة القطار  وتركنا الجميع ليقضوا باقى اليوم فى الكافيه ماشية معاكم يا ولاد المحظوظة .
بعدها توجهت مع اهل اسكندرية لتوديعهم وركبت المترو من محطة رمسيس لقيت مهرجان وضرب وتكسير بين مشجعى الزمالك ورجال الامن بعد مشادة كلامية والفاظ نابية لمشجعى الزمالك بعد فوز فريقهم على بنى عبيد فى كاس مصر والحمد لله انه بيفوز فى المناسبات كانت مصر زمانها متكسرة .
كل سنة وانتم طيبين وكل بؤجة منورين 
جزاكم الله خيرا 
تفاصيل اليوم بعيون هؤلاء :-

26 نوفمبر 2010

بؤجة الخيرالشتوية+ تحديث

 كل سنة وانتم بخير وعيد سعيد عليكم جميعا 
 بمشيئة الله تعالى تقرر تحديد ميعاد بؤجة الخير الشتوية
الميعاد : الجمعة الموافق 10 ديسمبر 2010 
المكان : جمعية صحبة خير بمسجد زهراء مصر القديمة 
الزمان : من العاشرة والنصف صباحا امام  مقر الجمعية الكائن 20 شارع احمد خيرى فوق كافتيريا السرايا بعد محطة مترو الزهراء بحوالى 100 متر تقريبا 
دى خريطة لمحطة مترو الزهراء و لونها بالازرق اما اللون الاحمر فهو لمكان المسجد وده اسهل للناس اللى هتستخدم المترو

فى حالة اى استفسار او حد تاه عن المكان  ممكن يتصل على الرقم ده 

0101345140
وبعد الانتهاء من تسليم البؤج وصلاة الجمعة فى أقرب مسجد سنتوجه الى مكان قريب لتناول الغذاء وغالبا هيكون فى منطقة السيدة زينب او نادى المحامين .
وفكرة البؤجة تتلخص فى الاتى 
- بما انكم طالعين من العيد واكل الفتة واللحمة عمل عمايله معاكم فبساطة كده انت وبتبدل الملابس الصيفى بالملابس الشتوى تشوف ايه اللى انت مش محتاجه منها يكون ضاق عليك او خلاص زهقت منه او موضته خلاص فات اوانها او ربنا كرمك وعامل دايت وتجمع الحاجات دى مع اى حاجة تكون مش عايزها فى بيتك ملايات - فوط - احذية - ادوات منزلية - اى حاجة انت مستغنى عنها و نروح كلنا لعشوائيات اسطبل عنتروعزبة خيرالله ونديها للناس هناك فى جمعية صحبة خير وهم بيخدوها و بيعملوا بها معرض للاسر الفقيرة و تتباع لهم الحاجات باسعار رمزية و المبلغ اللى يتجمع من المعرض بتستغله الجمعية فى عمل خيرى تانى و ده علشان الناس اللى هتتباع لهم الحاجة تحس انها اشترتها بفلوسها وانها مش متسولة.
يا ريت واحنا بنقرا البوست نفتكر انه فى الوقت اللى عندنا فيه حاجات كتير قوى مش بنحتاجها  وبنقول لنفسنا خليها مركونة يمكن نحتاج لها تاكد ان ربنا سبحانه وتعالى هيعوضك خير منها فى الدنيا والاخرة .
وكمان تخيل برد الشتاء القارص وتخيل ولو لثوان انك مكان الشخص الفقير او إن ابنك اواخوك فى مثل هذا الموقف فماذا تفعل من اجلهم ؟؟؟!!!
والتبرع ممكن يكون بأى شىء عينى او مادى او حتى معنوى بوجودكم ومشاركتكم وتشجيعكم للاخرين .
ياريت كل مدون يقدر ينزل بوست عن الموضوع يبقى جزاه الله خيراعلشان نبلغ اكبر عدد ممكن .
والدال على الخير كفاعله 
جزاكم الله خيرا 
*************
تحديث 
***********
http://www.1st-art-gallery.com/thumbnail/106006/1/Charity-Or-The-Indigent-Family$27,-1865.jpg
سقعانه يا ناس دفونى
بالحضن الدافى غيتونى

وهوكله على الرحمن
عملك عنده يا انسان
استرنى بالفستان
ارفع عنى الحرمان
ف قلوبكم الواسعه خدونى
استرو جسمى ودفو عيونى
الصورة والكلمات منقولة من عند مارو هانم قلب القطة

*************
ان شاء الله بعد تسليم البؤج هنتوجه الى منطقة الحسين 
لتناول الغذاء والمشروبات وقضاء وقت ممتع ان شاء الله 
وده بناء على رغبة بعض الاخوة والاخوات من المدونين

14 نوفمبر 2010

ذكريات العيد


بالرغم من حالة الزهايمر التى نعيشها الان فما زالت ذكريات الطفولة والصبا عالقة بالاذهان بالرغم من مرورعشرات السنين على تلك المرحلة فما زلنا نتذكرها بكل خير،ومن تلك الذكريات الجميلة ذكرى عيد الاضحى المبارك ومظاهر البهجة والفرحة فى الريف احتفالا بالعيد.

اولى تلك الذكريات ذكريات الطفولة ومرحلة ما قبل الدراسة تحديدا عندما كنا صغارا نلهو كصبية وسط الحقول وعندما كنا نقوم برعى الاغنام وكم هى ممتعة وتعلمنا الصبر والتفكر فى مخلوقات الله وجمال الطبيعة بالرغم من اننا كنا نخرج للرعى على مضض  كان هناك اهتمام خاص بخروف العيد اوالجدى الصغير  ذكر الماعز ) فعندما يولد الخروف اوالجدى ويتم نذره كأضحية منذ تلك اللحظة يبدا الاهتمام بمأكله ومشربه وكأه طفل مدلل من أبويه يأكل أطيب الغلال وأخضر الحشائش ويشرب من ماء نظيف بالرغم من اننا كنا كاطفال نشرب من ماء الترع وقنوات الرى أحيانا لكن الاضحية نسقيها ماء نظيف خوفا عليها من الامراض لان  لها شروط مقدسة لكى تجوز كأضحية كما علمونا أجدادنا وانها سنة عن الحبيب المصطفى صلى الله عليه وسلم.
 كانت الاضحية تنال اهتمام خاص منا كبار وصغار فيتم تنظيفها بالماء وإزالة ما بها من صوف لكى يظهر عليها الاكل وهى صغيرة وقبل ذبحها يقوم بتنظيفها جيدا لان الفروة تستخدم فى اغراض شتى فى المنزل وكذلك أصواف الاغنام تستخدم فى صناعة أكلمة  ومفروشات تستخدم فى المنادر الكبيرة بالريف المصرى ( وهى مكان اقامة المناسبات من افراح اوعزاء ).

قبل الوقفة بيوم يتم الاحتفال بالخروف من جانبنا كأطفال كنا نقوم بتزيينه بالوان واشكال لتميزه عن باقى الاغنام والخراف الأخرى اضافة الى الاهتمام بأكله ومشربه على إنفراد دون مزاحمة من باقى القطيع والغريب فى الامر انك تجده ينظر الينا وكانه يتسائل لماذا كل هذا الاهتمام وأحيانا تجد فى عيونه نظرة وداع مصحوبة بدموع محبوسة وكأنه انسان يودعك  بل أرق قلبا من بنى البشر .
يوم العيد نستقيظ مبكرا نلبس الثياب الجديدة ونذهب لزيارة المقابر مع جدتنا أوعماتنا قبل طلوع الشمس لزيارة اموات العائلة وقراءة الفاتحة ترحما عليهم وتوزيع بعض المخبوزات من العيش او الفايش مع  حبات الفاكهة للفقراء الذين يمرون على القبور
وكانت تلك الزيارة للقبور فرحة ما بعدها فرحة لنا كاطفال لاننا كنا نقابل اقاربنا من السيدات كبار السن ونتسابق لتحيتهم لا حبا فيهم ولكن لكى نحظى باكبر عيدية ممكنة والتى غالبا لا تتعدى الخمسة قروش او كما يطلقون عليها ربع ريال ومنهم من كان يجود علينا بنصف ريال نتقاسمه كأخوة وغالبا ما يتم صرف العيدية على بعض الحلوى والالعاب البدائية .
وبعد شروق الشمس بقليل كنا نتسابق للعودة مبكرا الى المنزل قبل قدوم الجزارلذبح الاضحية ويتم تجهيز المكان وادوات الذبح وبعدها نتسابق لاحضارالخروف من حظيرة المواشى والتى نجده غالبا مستكينا ومستلقى على الارض كانه يعلم خاتمته ونقوم بسحبه وسط عاصفة من الماماءات والنحيب من جانب الخراف والاغنام الاخرى تذكرنى بجنازات البشر لحظة وداع ذويهم .
 بعدها نتجه بالخروف الى مكان الذبح والتجهيز ونقوم بمساعدة الجزار فى تكتيف الاضحية ليقوم بذبحها ثم تعليقها وسلخها ثم اخراج احشائها وتنظفيها وتقطيع الاضحية ليتم توزيعها الى ثلاث اجزاء ثلث لاهل البيت وثلث للاقارب وثلث للفقراء وكم هى لحظات سعيدة تمرعلينا ونحن نلعب بدماء الاضحية وطبع أصابع اليد الملطخة بالدماء على الابواب الخشبية القديمة .
 بعدها تبدا مرحلة كنت أعشقها جدا وهى مرحلة توزيع الاضحية على الاقارب والفقراء مع والدى أوأعمامى فالاقارب غالبا ما نستفاد منهم بالحلوى اوالعيديات البسيطة اما الفقراء فكانت مكافآتهم اشد سخاءا فيكفيك ان ترى نظرة السعادة والرضا فى عيونهم وتنالك دعوة طيبة من  قلوبهم .
 اما مرحلة الشباب والدراسة  فاختلفت كثيراعن سابقتها احتفاءا بالعيد التى اقتصرت على صلاة العيد وانتظار توزيع الاضحية وضاعت العيدية وسط وجود جيل اصغر من الاطفال يتسابق لنيل العيدية بدلا منك وان كان لنا حظ بسيط من دعوات الاقارب والفقراء.
 -اما المرحلة الحالية فحدث ولا حرج كفانا صلاة العيد وأصبحنا من نعطى العيديات ويا ليتها كانت  نصف ريال او حتى ريال كامل بل اصبحت مثل الاسعار نااااااار يا حبيبى ناااااااااار .
ناهيك عن زحمة المدن واختفاء اواصر المودة وصلة الرحم واصبحت مظاهر الاضحية تقتصر على مشاهدة اللحوم معلقة فى محلات الجزارة يراها الفقراء ويتحسرون على زمن ولى وفاااااااااات وتلهج السنتهم بالدعاء على نظام وحكومات جعلتهم يتمنون ان ياخذوا صورة تذكارية مع المرحوم خروف طيب الله ثراه ليشاهدها اولادهم واحفادهم ليعرفوا اننا كنا نشاهد اللحمة .
كل سنة وانتم معيدين وفى الفتة غرقانين
وربنا يشحط رصيدكم بنصف كيلو كفته او حتى ربع كيلو لحمة جملى .
عيد اضحى سعيد عليكم باذن الله.

30 أكتوبر 2010

دعوة للتبرع بالدم


ميعادنا للتبرع بالدم
هيكون يوم الجمعة الموافق 5 نوفمبر
التجمع الساعة 10 صباحا
قدام هيئة المصل واللقاح( فاكسيرا )  بالدقي

اللى جنب وزارة الزراعة  
بشارع البطل احمد عبدالعزيز 
اقرب محطة مترو الدقى  
لمزيد من التفاصيل هنا
************ 
بالنسبة لحالة المريض فى البوست السابق 
الحمد لله اخد اول جرعة وحالته فى تحسن مستمر
الحمد لله بالرغم من ان مبلغ التبرع بسيط 
لكن ساعد فى شراء الجرعة فى ميعادها
وأدى الى تحسن حالة مريض
وما زال باب الخير مفتوح للجميع 
مع تمنياتنا بالشفاء للجميع 
وجزاكم الله خيرا ..

20 أكتوبر 2010

طلب مساعدة .... عاجل وهام + تحديث

تحديث هام 
ميعاد الجرعة القادمة يوم الاربعاء القادم  27-10-2010واسرة المريض لا تمتلك من ثمن الجرعة شىء ،لانه مع الاسف اول مرة احس بتخاذل من الجميع .
رجاء اخير يا ريت اللى يبعت حوالة او بعتها بالفعل يبلغ اهل المريض لسرعة صرفها او ابلاغى عن طريق الهاتف اوالايميل kh_cyc2006@hotmail.com او عن طريق المدونة بغير معرف لسرعة انقاذ حياة مريض ورب اسرة .
جزاكم الله خيرا
*****************
 احيانا ينتاب المرء منا حالة من العجز عن التفكير او الشعور بالتقصير تجاه الاخرين 
واحيانا اخرى تتقاذفنا امواج الحياة وتجذبنا بعيدا عن شاطىء الحياة ولكن عندما يريد الله لنا خيرا يرسل من ياخذ بايدينا او من يدلنا الى فعل الخير اومساعدة شخص ما وتلك نعمة من الله نحمده ونقدسه عليها فالشكر للاخ الكريم صاحب مدونة طهر فؤادك على دعوته الكريمة لمساعدة شخص مريض يحتاج منا المساعدة والى نص الرسالة
 فاكر جمعية الامل (فرع سوهاج ) اللى كانت عاملة معرض ملابس لمساعدة مرضى السرطان يارب تكون افتكرتها... المهم جت ليهم حالة بس صعبة شوية ومحتاجة كلنا نتكاتف مع بعض ونساعدها وهكتبلك تفاصيل الحالة ويارب تنشرها ونحاول نساعدها كلنا باللى نقدر علية ان شاء الله وهى على لسان الحالة طبعا ربنا يشفيها ويعافينا جميعا اللهم امين والمسلمين
بتقول :-اسمه بخيت محمود أحمد والذى يعمل بالهيئة العامة للتأمينات الاجتماعية بســوهاج
وبيقول :-
حيث انني مريض بمرض ( السرطان فى الكلى ) وتم اجراء عملية لاستئصال الورم على نفقتي الخاصة بتاريخ 26/11/2009 ثم تم دخولى الى معهد اورام اسيوط بتاريخ 5/12/2009 واوصى الطبيب المعالج بضرورة الاستمرار فى العلاج بدواء (sutent) وذلك لمدة 18 شهرا حتى يتم الشفاء وتبلغ قيمة علبة الدواء 23 الف جنيها ونظرا لارتفاع سعر الدواء عن قدرتي المالية فقد وافقت شركة فايزر للادوية على تخفيض 50% من قيمة الدواء وحيث ان الدواء بعد تخفيض 50% تبلغ قيمته 11.500 الف جنيها .ونظرا لظروفى المالية الصعبة حيث انني اعول اسرة فأرجو من سيادتكم التكرم بالموافقة على مساعدتي لشراء هذا الدواء بصفة مستمرة أو مساهمة اهل الخير ويعتبرهذا الدواء الوحيد فى علاجي الذى تحسنت عليه صحتي حيث اننى فى حاجة الى 6 جرعات حتى اتماثل للشفاء .
وجعلكم الله عونا للمحتاجين
ت/0115428158
العنوان/سوهاج- شارع ابو الحسن البصري خلف شارع 15
الى هنا انتهت الرسالة من صاحب الرسالة وبدا دورنا فى مساعدته كل بقدر استطاعته فمن يريد النشر او التنويه عن الحالة فى مدونته او على موقع الفيس بؤك  فشكرا له وجزاءكم  الله خيرا 
ومن يريد التبرع فيمكنه ارسال حوالة بريدية باسم السيدة / ماجدة بخيت محمد ابراهيم وهى زوجة المريض على مكتب بريد سوهاج الفرعى  بالحميات ورقم التليفون المذكور بعاليه يخص الحالة ايضا .
او من يرغب بارسال حوالة بنكية اوالتبرع نقدا فانا مستعد لاستقبالها وارسالها الى الحالة باليد ،ولاى استفسار يمكنكم الاتصال برقم المريض بعاليه او الاتصال على رقمى 0101345140.
برجاء الاهتمام بالنشر ودعوة الاقارب والاصدقاء من خارج التدوين  للمشاركة بقدر المستطاع .
دعوة خاصة للمدونات الاتية بالمشاركة فى النشر او التنويه 
فاتيما  ام يوسف 
قوس قزح
بت خيخة واى كلام 
د. ستيته 
وكل مدون اومدونة قرا الموضوع ويريد المشاركة 
جزاءكم الله خيرا .
فالدال على الخير كفاعله 

9 أكتوبر 2010

اربع نساء فى حياة كل رجل

 من وحى بعض البوستات وحديث جانبى ونقاش فى احد اللقاءات على ضفاف النيل عن تجارب الحياة وعلاقة الزوج بزوجته بصفة خاصة وعلاقة ادم بحواء بصفة عامة  راودنى سؤال غريب لماذا يحب الرجل اكثر من امرأة والعكس صحيح  ؟؟؟.
ما يخص الرجل :-
الرجل بطبعه يتسم بالطمع والملل لذلك يريد من زوجته ان تكون له اربع نساء بداخلها .
لان طبيعة الرجل تحتم عليه ان يعيش مع اربع نساء يتأثربهم ويظل بداخله حنين لهم   فاول سيدة تراها عينيه هى امه وتكون المصدر الاساسى فى حياته الذى يبعث له الحنان فيحب امه لحنانها وعطائها الذى بلا حدود وسعة صدرها وتسامحها و تشجيعها والاخذ بيده فى الضراء ومشاركته فى الفرح وتكون بجانبه فى مرضه انه يريد من زوجته ان تكون امه التى فقدها بعد زواجه ويظل يحن اليها كلما احس بحاجته اليها .
والسيدة الثانية الحبيبة العاشقة التى يتمناها كل رجل بداخله التى تتفنن فى سرقة قلبه واثارة رجولته كما يريد ان يحس انه مع امراة تبهره بانوثتها وسحرها وصوتها الحنون الدافىء الناعم وكلماتها الرقيقة المليئة بالحب والحنان ويريدها ان تذوب بين يديه عشقا ( والحمدلله انقرضت وفى طريقها الى الفناء )

اما الثالثة فهى الصديقة التى يبث اليها همومه ومشاكله ويستشيرها فى اموره ويريد منها صديقة تحفظ سره وتستر عيبه ولا تفشى سره وتفضح عيوبه بين صديقاتها .. يريد منها احيانا العقل والحكمة والمشورة وان تحس به وبمشاكله وحينما يتكلم تستمع اليه وحينما يعود الى المنزل لا تكثر فى الشكوى من اعباء المنزل والاولاد فيلجا الزوج الى الصمت او ترك البيت وقضاء معظم الوقت مع اصدقائه الذين يفهمونه ويسمعونه .
اما الرابعة والاخيرة هى الخادمة وهى التى تكون مهمة فى حياة كل رجل حيث يحتاج اليها فى اعداد الطعام بيديها حتى لو كانت لديك خادمة ويريد ان ترتب له اشيائه بنفسها يريد لمستك بالمنزل والاعتناء بملابسه ومظهره ومظهرك ومظهراولادك . عزيزتى حواء هذا هو الرجل عبارة عن طفل كبير يحتاج منكى الى حنان وتدليل  اعترفى بتقصيرك فى حقه وعاهديه على اصلاح ما فات وعلى ان يرى منكى ما يتمنى وهكذا اذا أردتى ان تملكيه وحدك فتكونى اربع نساء فى جسد واحد تملكى قلبه وعقله وروحه يا مطلعة روحه .
ما يخص المرأة :
لا يختلف الحال كثيرا عن الرجل فالزوجة تريد من زوجها ان يقوم بدور كل شخص هام فى حياتها فاحيانا يكون والدها بحنانه وعطفه ورعايته وتقويمها دائما الى الطريق الصحيح، وتريد منه ان يكون زوجا عاشقا ولهانا يلقى على مسامعها كلمات الحب والغزل ويشعرها انها اميرته ومحبوبته الوحيدة ويتغزل بها وفيها تشعر باحتوائه لها ولمشاعرها ، تريد منه ان يكون أخا وقت الشدة وصديقا وقت الحاجة  ومكمن اسرارها لانه الرجل الوحيد الذى لا تخجل من التعرى امامه .
عزيزى الزوج الملكوم هذه هى حواء بحر عميق لا بداية ولا نهاية له فكن سباحا ماهرا او ربان يدير الدفة باقتدار وحرفية شديدين فحواء كل اسلحتها جاهزة ومهما فعلت فلن تستطيع ان تملك قلبها وروحها بسهولة .
على الهامش : ليس هذا تحيز للرجل ولا ذم فى النساء بقدر ما هو واقع ملموس لان الانثى عاطفية بطبعها بعكس الرجل فغالبا ما تتاثر بموقف او كلمة فتجعلك ملكا متوجا اوتتاثر بموقف اخر فتجعل عيشتك زفت وقطران او اكثر من هذا حسب امكانياتها .

29 سبتمبر 2010

تفاصيل السفر الى اسكندرية



 بالنسبة لمدونى القاهرة المسافرين يوم السبت 2-10-2010
ان شاء الله هنتجمع فى ميدان رمسيس امام عمارة رمسيس امام محل العصير اللى فى الميدان الساعة 6.30 صباحا وهنتحرك فى السابعة صباحا ( قبل زحمة المواصلات والمدارس ) وهنستقل ميكروباص الى اسكندرية اللى عايز يسافر معانا فى انتظاره لحد 7 صباحا  هيكون موجود ان شاء الله ضياء وفاتيما ومصطفى ريان وفيه ناس  هتركب القطر زى وليد الدوغرى وكيمو وشاب فقرى
بصفة عامة مكان التجمع هيكون فى نادى دار مصر  اللى جنب نادى المهندسين  ودى كلها منطقة اندية جنب بعض زى نادى المهندسين والمحامين والاطباء  يعنى المكان مشهور ومعروف للجميع 
ولاى استفسار فيه ارقام موبيلات عند  عاشقة الرومانسية هنا 
او عند قلب القطة هنا
وتفاصيل عن اللقاء والناس اللى بتفكر تيجى عند فاتيما هنا
وده رقم موبيلى لاى استفسار 
0101345140
ان شاء الله نشوفكم جميعا على خير 

23 سبتمبر 2010

عيد ميلاد سعيد + لقاء اسكندرية

بلغنى ايها المدون السعيد ذو الرأى الرشيد 
انه فى مثل هذ اليوم 
 24 سبتمبر
حضر الى عالمنا السعيد فى يوم غابت عنه الشمس والنجوم والكواكب 
مولود زاده كآبة وياس واحباط  
  واحتفالا بتلك المناسبة السعيدة فقد قررنا عمل احتفال  بتلك المناسبة السعيدة بلا شك
النهاردة يوم ميلاد 
أجدع اخت وأطيب قلب 
ام عمر افندى
وبما ان عمر افندى خصخصوه 
وعقبال ما يخصخصوا اللى فى بالى ونرتاح
وبهذه المناسبة الكل مدعو للحضور
وفى انتظار تشريفكم
ونبدا مراسم الاحتفال

كل سنة وانتى طيبة وعقبال 100 سنة
  
  
الهدايا ورد بكل الالوان علشان خاطر اطيب قلب
 
وده كتاب رب العباد
هدية همس وشابى لطنط ام بقلظ 
يلا خلى الشعب يعيش
 
ويلا حالا بالا بالا هنوا ابو الفصاد
 

وطبعا هناك فرق بين الكرم والبخل 
 تورت وعصير مش مسقعة  
 
 
  
  
  
  
 
ركن المشروبات والعصائر
 
 
  
  
  

****
كل سنة وأنتى طيبة يا ام عمر
وعقبال 97 سنة و 3 ايام و30 ثانية
كفاية عليكى كده 
*******************
واخيرا مع زست 
تقررعمل لقاء تدوينى ترفيهى خزعبلاتى مراجحيى بمدينة الاسكندرية 
يوم السبت الموافق 2 اكتوبر والمراجيح عامة 
يوووه خليها الدعوة عامة 
وربنا ما يزنقكم فى مرجيحة ابدا 

لمزيد من التفاصيل هتلاقيها هنا عند رئيس مراجيح مولد النبى

7 سبتمبر 2010

عيد سعيد



كل عام وانتم بخير 
عيد سعيد عليكم جميعا

29 أغسطس 2010

شكرا ...اهل الخير

شكرا لكل من ساهم او شارك ماديا اومعنويا  فى نجاح اليوم 
شكرا لكل من ساعد على رسم بسمة على شفاه طفل مريض 
جزاكم الله خيرا ،،

22 أغسطس 2010

تفاصيل التجمع الخيرى 28-8

اسماء الادوية المطلوبة 
اولا : فيجام--امينو جلووبين ivig--ال 5 جرام ب 1170
ثانيا : وان الفا نقط سعر ة 186 جنية
ثالثا: مينارين اسبراى ب 115 جنية
رابعا: بنتازا ب168 جنية
خامسا: تينام
سادسا: كولشسين المستورد
سابعا بالميكورت-كالسيمات-ريميكاد حقن-الواحدة ب 3000 جنية
********
 تفاصيل اليوم
تفاصيل التجمع الخيرى بمستشفى ابو الريش اليابانى يوم السبت 28-8-2010 
التجمع الساعة الثالثة عصرا امام  المستشفى ونستمر لحد الخامسة مساء باذن الله 
بعدها سنتوجه الى مكان الفطار الجماعى بمطعم ابو العز 117 شارع بور سعيد امام محطة مترو السيدة زينب المحل يبعد امتار عن المستشفى ودى خريطة المكان 
 
ودى صور حية لصالة الطعام من الداخل 

ودى قائمة الوجبات من رقم 1 حتى 12 لسهولة الاختيار برقم الوجبة 

رجاء اختياررقم الوجبة المفضلة لديكم مقدما لابلاغها لادارة المطعم قبل موعد الفطار بساعتين على الاقل بالنسبة اللى هيطلب حمام الطلب قبلها ب24 ساعة على الاقل .
شكر خاص لكل من ساهم بالنشر فى مدونته او التنويه عن اللقاء فالدال على الخير كفاعله .
نداء هام جدا لكل انسان لا تستقل مبلغ التبرع ولا تخجل من تواضع القيمة مهما تكن حتى لو كان مبلغ التبرع جنيه واحد فالحسنة بعشرة امثالها الى سبعمائة ضعف والله يضاعف لمن يشاء .
بالنسبة االى عايز يبعت حوالة بنكية البيانات المطلوبة لارسال الحوالة هى :
المرسل اليه : خالد عثمان هاشم بكر
رقم التليفون : 0101345140 
البنك المرسل اليه : بنك مصر - فرع الاورمان - او فرع الجيزة
واللى قريب من الجيزة او الهرم اوالدقى ممكن نتقابل وناخد منه التبرع فى اى مكان قريب منه .
حاجة اخيره اللى عايز يتبرع لشراء لعب للاطفال ممكن نجمع الفلوس وفيه اقتراح من داليا قوس قزح انها تنزل معاهم وتشتريها من الموسكى يوم الجمعة 27-8 بعد الفطار ان شاء الله.
ده ايميلات الناس المسئولة عن اليوم
و ده ارقام ممكن تبعتوا رسالة عليها او تسالوا على اى شىء خاص باليوم ده
داليا صاحبة مدونة قوس قزح
0148693432
 خالد صاحب مدونة همس الاحباب
 0101345140
 
*****كل عام وانتم بخير ******