29 مايو 2008

دقيقة سكوت لله

**** ياهـــــل المغنـــى****


يااهل المغنى دماغنا وجعنا

دقيقه سكوت لله

داحنا شبعنا كلام ماله معنى

ياليل وياعين ويااّه

========

طلعت موضه غصون وبلابل

شابط فيها حزين شاكى وباكى

وقال موش عارف

يشكى ويبكى لمين

واللى جابت له الداء والكافيه

طرشه ماهش سامعاه

يااهل المغنى دماغنا وجعنا

دقيقه سكوت لله

========

ردى عليه ياطيور بينادى

وارمى له الجناحين

وانت كمان يابور الــــوادى

قل له رايح على فين

قل له اياك يرتاح يابابـــــوره

ويريحنــــــــــا معــــــاه

ياهل المغنى دماغنا وجعنا

دقيقه سكــــــوت لله

==========

كل جدع فرحان بشبابه

يقول فى عنيه دمـــوع

ياللى جلبتى شقاه وعذابه

حلّى لنــــا الموضــــوع

طالع نازل يلقى عـــــوازل

واقفــــــــه بتستنــــــاه

ياهل المغنى دماغنا وجعنا

دقيقه سكوت لله

==========

حافضين عشره اتناشر كلمه

نقل من الجـــــــــورنال

شوق وحنين وأمل وأمانــــــى

وصد وتيـــــــه ودلال

واللى اتعـــاد ينزاد ياخــــــــــوانا

وليل ونهــــــــار هـــوّاه

ياهل المغنى دماغنا وجعنـــــــــــا

دقيقه ســكوت لله

************

قصيده ياهل المغنى

للشاعر محمود بيرم التونسى

عجبتنى قوى وصورت حال المغنى

فى عصرنا الحالى

مع انه كان كاتبها فى زمن الطرب الاصيل

يا ترى لو سمع اللى بنسمعه حاليا كان ايقول ايه

نيابة عنه احب اقولهم برده

ياهل المغنى دماغنا وجعنا

دقيقة سكوت لله

23 مايو 2008

يوم مشهود


نعم انه يوم مشهود فى حياتى الخاصة والعامة انه يوم توقيع العدد الاول من مدونات مصرية للجيب ( مشروع وطن ) يوم الخميس 22-5-2008 يوم سيظل محفور فى الذاكرة لما شهده من احداث ولقاءات .
مع انى عارف ومتاكد ان الكثير من اخوانى واخواتى المدونين سوف يتحدثون عن ذلك اليوم بتفاصيل واسلوب شيق واكثر سلاسة وتعبيرا منى عما حدث فى ذلك اليوم ولكن فرحتى وسعادتى بذلك اليوم اجبرونى على الكتابة والحديث كى يظل عالق بذهنى ومدونتى .

بادىء ذى بدء اتقدم بخالص التهانى القلبية لكل من شارك فى اظهار هذا الكتيب وخروجه من رحم التدوين الى عالم النوروالى اصحاب الفكرة الرائعة .
كما اتقدم بخالص التهانى لاخوتى واحبابى فى الله الذين تم اختيار اعمال لهم لتكون من ضمن الطبعة الاولى فى العدد الاول من هذا الكتاب ،وطبعا هم من خيار المدونين واعمالهم متميزة بلا اشك واخص بالتهنئة احبابى واصدقائى المقربين :
ابى هانم بتنجانى ( بنبونية المدونين )
بيت خيخة واى كلام ( ام شريف لغائب الحاضر واللى كنت متاكد انها اتقوم بدور ام العروسة )
خالو احمد الصباغ ( كبير العائلة التدوينية )
دكتورة لماضة ( اخر طعامة )
دكتور محمد دكتور حر
استاذى العزيز / احمد على صاحب يوميات عيل مصرى
دكتورة ياسمين ( دكتورة اجدع بنوته )
وكل من شارك فى هذا العمل الرائع بالجهد او العمل او مجرد الحضور .
نرجع تانى للبداية وخروجى من الشغل مبكرا على غير العادة وذهابى الى مكتبة عمر بوك ستور فى شارع طلعت حرب
والمكان بالنسبة لى مش بعيد ومش غريب عليه وصلت هناك حوالى الساعة 6.40 مساء طلعت السلم على المكتبة لقيت زحمة وكانه مولد سيدى العريان المهم دخلت المكتبة ومن حسن حظى اتكعبلت فى اختى الغالية اللى باعتبرها قمر التدوين بروحها وخفة دمها ابى هانم ومعاها القمر الجديد اسلام خطيبها اللى سلمت عليه طبعا وباركتله واللى عايز اقوله عرفت تختار يا اسلام بجد وعايزين نفرح بيكم قريب ان شاء الله .
واتعرفت على مين بقى وكنت مش مصدق نفسى وانا باسلم عليها روح قلب ماما ام يوسف الغالية اللى قلبت كل تخيلاتى عنها وطلعت بنوته صغيرة وزى القمر وانا اللى فاكر انى اشوف ماما فاطمة وطلعت اصغر من يوسف كمان يعنى ممكن تبقى اخته الصغيرة .

وبعدين تعرفت على اجمل بنوته مصرية رودى ومعاها القمر الصغير نور بنتها اللى باحس انها تؤام همس فى الشقاوة وخفة الدم ربنا يحرسها ليها وتفرح بيها يارب.
وبعدين قابلت صاحبى وروح قلبى الواد العجوز قوى المبدع والرائع دائما سوووو اللى عنده زهايمر على طول ههههه
اه مش ممكن مع انى ما عرفتوش فى الاول بس شكله بيوحى انه هو طبعا السكر احمد باشا سكر اللى تشرفت بمعرفته طبعا وكنت سعيد انى عرفته لوحدى وبعدين قابلت مين اه انا فعلا محظوظ انى قابلته خلال اسبوع مرتين وده من حسن حظى طبعا هو الاستاذ / احمد على صاحب يوميات عيل مصرى وده شخصية جذابة وليها كريزما غريبة بجد .
وطبعا يجى الدور على خالو احمد الصباغ اللى باحس انه كبير العيلة التدوينية وكان قايم بدور ام العروسة هههههه
وطبعا قابلت اخرالعنقود سكر معقود الرقيقة امانى ومعاها ابو مالك صاحب المضيفة اللى كنت سعيد بمقابلتهم .
طال انتظارى لرؤياك وانت من انت هى من علمتنى التدوين واقحمتنى اقحاما فى هذا العالم العجيب انها ست الضاكتورة لماضة هانم اللى كنت سعيد برؤيتها ومن جوايا كنت منتظر هذا اللقاء بتوجس وخيفة لما تتمتع به من خفة دم منقطعة النظير واللى احلم انى اشوف همس دكتورة لمضة زيها كده .
انتهى الحفل بمفاجاة غير متوقعة بالنسبة لى مفاجاة سارة جدا جدا من العيار الثقيل واللى عشانه كتبت البوست ده مخصوص واللى كنت محظوظ ان يكون لى شرف مقابلته انه الاب الرائع بكل ما تحمل الكلمة من معانى انه والدى العزيز والاب الحنون نجم عالم التدوين ابو خالد الذى اشفقت عليه من طول المشوار وتعب السفر .
واللى كان لى عظيم الشرف بمرافقته من مقر المكتبة الى مقهى البورصة ذهابا وايابا بمفردنا وده شرف عظيم لى افتخر به واتفشخرعليكم وعارف انكم اتحسدونى عليه وبصراحة من حقكم لانى فعلا قضيت بصحبته سويعات من ارق واجمل لحظات الحياة،وصلنا ومعى والدى العزيز ابو خالد الى مقر البورصة وتقابلنا مع ابى وسكر وسوووووو وفاتيما وبدا توافد باقى افراد العائلة التدوينية الى البورصة .
وكانت المفاجاة السارة لنا جميعا هى اللفتة النبيلة من المبدعة والمتالقة دائما ابى والرائع بحق سووووووو وهو الاحتفال بالعيد الماسى للغالية على قلوبنا ام يوسف ( حلوة الماسى مش كده ) وده اللى بيثبت اننا اسرة واحدة بنحس بالام وافراح باقى افراد العائلة التدوينية .
تيجى المفاجاة الغير متوقعة على الاطلاق انى اقابل شخصيات باحترمها جدا ولكن لم اتوقع انى اراها بهذه السرعة
المبدعة دائما واميرة الالوان فى عالم التدوين والمشهورة بمدونتها رينبو او قوس قزح ودى مفاجاة سارة لى بصراحة
المفاجاة اللى اكثر من رائعة ان يتواجد امامى على بعد خطوات حماة همس واللى كلنا بنعشق حكايتها مع حماتها سوسو هانم صاحبة مدونة مفقوعة مرارتها من حماتها او حماتى ملاك ومش باين عليها فقعت المرارة بصراحة وكانت بتضحك علينا وانا عارف انى فيفى اتحطها جوه عينيها لانها فعلا انسانة طيبة ورقيقة وتتميز بخفة الظل .
يا احلامك يا رئيسة حزب الاحلام فعلا اسم مدونتك بيدل على شخصيتك انسانة هادية وتحس انها بتحلم وهى صاحية كمان بس احلامها مشروعة وديمقراطية والمفاجاة انها اخت مفقوعة مرارتها تخيلوا دى .
واللى كانت منعزلة عننا شوية او مستغربة الموقف الرقيقة والطيبة كلاكيت تانى وتانى واللى متعرفناش عليها كويس .
طبعا فيه ناس كنت اعرفها من البورصة وناس اول مرة اشوفها وسعيد بمعرفتها طبعا وناس كتير شفتها وما اسعدنيش الحظ انى اتعرف بيها لهم منى الكل الحب والتقدير .
طبعا كان معانا بصوتهم وروحهم صديقى العزيز محمود رئيس جمهورية نفسى والغالية قوى واللى عايشة فى دور انها مخطوبة وعروسة بقى وزة وانين الحزن اللى بقولها ربنا يسعدك ويوفقك دائما .
طبعا كان نفسى يكون معانا قوى وكنت ابقى طاير من الفرح وممكن اضرب صواريخ واطير بالونات وابقى ارهابى وسط البلد توم وجيرى عالم التدوين حبايب قلبى فرنسا هانم ربنا يشفيها وعبده باشا الرايق .
وكنت اتمنى انى احظى بشرف مقابلتها والاستفادة من خبراتها اختى الكبيرة مجداوية والاخت العزيزة موناليزا واستاذى العزيز الربان ، وكل من زرته فى مدونته او شرفنى بالزيارة له منى كل تقدير واحترام .
نعم كان يوم مشهود وزاخر باجمل المشاعر الانسانية الشفافة والرقيقة وما زاد اليوم بهجة لنفسى هو صحبتى للاب الحنون ابو خالد الذى احسست انه يعشق كل صغير وكبير فى عالم التدوين من يعرفه ولا يعرفه حتى ظننت اننا اثناء سيرنا فى الشارع كاد ان يوقف المارة وعابرى السبيل ليسئلهم انتم مدونون لكى يصافحهم ويتعرف باسرته فى العائلة التدوينية ومن شدة سعادتى بوجوده معى تمنيت ان الوقت يتوقف سويعات وسويعات ورغم التزاماتى ورنين التليفون الذى جعلته صامتا لكى لا ارد على اى مكالمة تشغلنى ولو لحظات عن الاستفادة من حديثه وصحبته .
حقا انه يوم مشهود واتمنى من الله عز وجل ان يتكرر هذا اليوم كثيرا فى حياتى .
لكم منى كل حب واحترام وتقدير ..
اخوكم خالد

17 مايو 2008

خطوبة.. سعيدة

تهنئة قلبية
بسم الله الرحمن الرحيم

" ومن آياته ان خلق لكم من انفسكم ازواجا لتسكنوا اليها وجعل بينكم مودة ورحمة "

صدق الله العظيم


تهنئة قلبية من مدونة همس الاحباب


ومن كل المدونين والمدونات للاخت العزيزة وزة


صاحبة مدونة انين الحزن


بمناسبة الخطوبة السعيدة


طبعا عزة الخطوبة بتاعتها


يوم الاثنين الموافق 19-5-2008


اتتخطب لواحد اسمه منيع


اللى يدخل يبارك يخلى باله من الاسم


عــزة ومنيع



الف مليون مبرووووووووووك

يا وزة

وعقبال الزفاف ان شاء الله


الكل يمد ايده وياخد شيكولاته


ويروح يبارك ويهنىء


لاجمل عروسين


ويقولهم خطوبة سعيدة


ويغنى معاهم ويقول




يادبلة الخطوبةعقبالنا كلنا




عقبال عندكم جميعا ويارب يجعل ايامكم كلها هنا وأفـراح

والعاقبة عندكم فى المسرات ،،،


==================

نداء الى فرنسا هانم




اعتقد ان الخبر اللى فوق ده يستحق منك


انك ترجعى علشان تباركى لابنتك وحبيبتك وزة


وتقوليلها مبروك وتاخديها فى حضنك


وانا متاكد من انك اكتر واحدة اتبقى سعيدة بالخبر ده


14 مايو 2008

انا ....ميييييييين

التاج ده جاى من اجمل وارق وزة فى عالم التدوين( صاحبة مدونة انين الحزن ) واللى ابقى فى يوم من الايام حماها واطلع عينها علشان التاج ده اللى تهربت منه كتير وحاولت ابعد عنه بشتى السبل بس اعمل ايه فى التدبيسة دى
عامة انا قلت اجاوب عليه اكراما لمازن ومحد ش يسال مين مازن وايه دخله بالموضوع .
التاج بيقول ايه

تكلم عن نفسك فى عشر نقاط :-
يا نهار ابيض عشرنقاط مرة واحدة يلا بينا نشوف
1- كنت طفل بيحمل براءة الاطفال وشاب بيحمل احلام وطموحات كل الشباب وحاليا انسان بداخله كل المتناقضات اللى فى الكون .وصدق رب العزة " ونفس وما سواها فالهمها فجورها وتقواها ".
2- تولدت فى الريف وتربيت وسط المزارع والحقول تعلمت الطيبة والعطاء من الارض الطيبة تعلمت الصبر والكفاح من الفلاحين الغلابة .
3- كان نفسى احفظ القران واتعلم امور دينى وابقى فرد نافع لدينى وامتى لكن اصبحت من اشد المقصرين
4- بحب البساطة والهدوء وبكره الزحمة والصوت العالى واحيانا بحس انى انسان سلبى بدرجة تخنق.
5- كنت اتمنى احقق كل طموحاتى واهدافى فى الحياة وابقى شخص ملتزم اكثر واكثر بكل القيم والمبادىء .
6- بحب الرومانسية والخيال فى الشعر وفى عقلى الباطن وبحب اعيش الواقع على ارض الواقع .
7- ببقى سعيد بسعادة الاخرين وبحزن لحزنهم مش بحب حد يزعل منى ولا ازعل من حد مش بحب العتاب الا مع شخص بكون بعزه وبحترمه وبحب الصداقة والتعارف فى اطار من المحبة والاحترام المتبادل .
8- بكره الانانية والغيرة العمياء وبكره الصيف علشان بيبقى عندى شغل كتير ومش بروح المصيف والناس بتبقى زهقانة وبعشق السهر وبموووت فى الليل وسكونه.
9- بحب الاستقرار وبكره السفربحب التهريج وبكره الكابة مع انى احيانا ببقى استاذ كابة وبتطلب معايا شوية نكد وكابة بس بترجع تروق وتحلى .
10- بحب اهلى واصحابى وبمووووووووووت فى همس لانها اكتر مخلوقة ممكن تنسينى قسوة الحياة وتشدنى ضحكتها وبراءتها فى الحياة وبتقولى اجمل كلمة فى الدنيا بحب بابا .
هو فيه حاجات كتير جوايا بس كفايه كده النهاردة .

اختار خمسة واهديهم التاج .

بصراحة التاج ده كارثة من كوارث الطبيعة وصعب قوى علشان كده انا اهديه لكل اللى ايعلق عليه بشرط طبعا ما يكونش جاوب عيله .قبل كده ولو عايز يجاوب تانى بالرحب والسعة يتفضل بالهنا والشفا .

لازمن ابلغهم
من عينى طبعا الاول اعرف هم مين وانا اروح اخبط عليهم .
وعامة ليكى يوم يا وزة روحى يا شيخة ربنا يكرمك بدكر بط وتعزمينا على العشاء
.

10 مايو 2008

اعتذار واجب

اعتذار
اعتذر لاخوانى واخواتى المدونين لرفع البوست السابق مؤقتا وقفل التعليقات عليه
نظرا لما حدث من تجاوزات لم اكن اتوقعها ولا اتمنى ان تحدث فى المدونة ولا اى مدونة اخرى
واكرر اعتذارى واحترامى وتقديرى للاستاذة / مجداوية ولكل من دخل وعلق على البوست
ولكل من دخل ولم يعلق واكرر اسفى واعتذارى للجميع
خــــالد

8 مايو 2008

حرااااااامى

المكان : ميدان الجيزة نهاية الكوبرى نزلة مراد
الساعة : الواحدة والنصف ظهرا
التاريخ : 7-5-2008
الاحـــــــداث :-
زحمة يا دنيا زحمة زحمة ولا عادش لحمة ،الدنيا زحمة وهيصة جنب ميكروباص واقف وخناقات وهتافات والكل بيضرب فى كله عادى يمكن بيزاحموا علشان يركبوا الميكروباص و لاحاجة مع الاسف تخمين خاطىء .
الموضوع ببساطة مسكوا حرامى يا خبر ابيض حرامى مرة واحدة وفين فى ميدان الجيزة وفى عز الضهريا جبروتك يا شجاعتك يا اخى ، الكارثة انه طلع راجل كبير فى بداية العقد الرابع يعنى عنده حوالى 42 سنة .
ولابس جلابية صعيدى كمان وايه سرق سلسلة سيدة منقبة وطلع سلاح ابيض ( مطواة ) وحطها فى جنبها وقالها طلعى كل اللى معاكى ، طبعا الست ارتبكت من الخوف المهم وسط الزحمة الناس مسكته والكل قام بالواجب من ضرب على القفا وضرب بالشلوت والكل بصراحة ما قصر الكل طلع قهره وكبته من زيادة الاسعار فى الاخ الحرامى ومسكوه وراحوا على اقرب نقطة شرطة ومعاهم السيدة المسروقة .
طبعا انا اصلا متاخر عن الشغل ومش فاضى اجامل بصراحة لانى حاسس بمرارة وحزن واسى فوق الوصف .
حرامى ماشى وبيسرق ما علينا اما فى وضح النهار وفى ميدان عام ووسط الجماهير وشخص واضح انه مالوش فى موضوع السرقة من اساسه اهو ده شىء صعب ومستحيل لو ما شوفتش الموقف بعينى اللى اياكلهم الدود ما كنتش صدقت واعتبرتها نكتة بايخة ،لكن مع الاسف شفت الموقف بعينى ، يا ترى وصلنا لهذه المرحلة اننا نقوم بالسرقة بالاكراه فى وضح النهار ،الحرامى معروف انه جبان ويتسلل فى الظلام كالخفافيش ودائما ما يسرق فى غفلة والناس نيام اما البلطجى ممكن يثبت ضحيته فى الظلام وفى اماكن خالية من المارة والجمهور ويقلب كل اللى معه ويتركه ويهرب لهذا الحد وصلت بنا الامور ايتها الحكومة الذكية اصبح الشعب لصوص بفعل فاعل ومتى نهارا جهارا .
طبعا تركت الموقف وذهبت الى العمل واثناء الطريق وعلى الجانب الاخر من الطريق وامام مديرية امن الجيزة حدثت خناقة ومشادة بين اثنين من اصحاب السيارات الملاكى نزلوا من سياراتهم واوقفوا الطريق وطبعا تشابك بالايدى وقصائد من السب والردح والشتائم ..الخ ، طبعا بتوع المرور واقفين على بعد امتار ولا تحرك لهم ساكن والمارة منهم من وقف للفرجة والبعض تتدخل لفض الاشتباك ، عجبنى تعليق سيدة بجوارى انا عايزة استنى اشوف مدير الامن ايعمل ايه هو وبتوع المديرية الجميع ابتسم ايعمل ايه ولا حاجة طبعا .. لهذه الدرجة شاطت الاعصاب وارتفعت الحناجر بالسباب والشتائم لاتفه الاسباب .

دائما ما كنت اضع هذه الحكمة نصب اعينى ودائما اطبقها على نفسى
اول الغضب جنون واخره ندم تحولت الان اول الغضب جنون واخره جنون برده يا بشر .
يا ترى ده سببه زيادة الاسعار وحالة الضباب والجوع الذى نعيشه ام هناك اسباب اخرى ؟؟؟؟؟؟؟
انتهى يوم العمل الشاق وتوجهت الى الدكتور فى وسط البلد فى التاسعة مساء خرجت من الشغل قرفان وزهقان اتمشيت على كورنيش النيل لاستقل المترو من محطة الاوبرا الى وسط البلد .
المفاجاة ان تذكرة المترو لسه ما زادتش طب والله كويس لسه فى حاجة باقية على حالها فى بلدنا ،لكن من المؤسف ما وجدته فى المترو من اهمال وفوضى وتاخير وزحمة غير مبررة وانتشار الباعة الجائلين فى محطات المترو ،حتى عربات المترو اصبحت لا تسر عدو ولا حبيب يااااااااااه حتى انت يا مترو اصابك ما اصابنا من عجز وشيخوخة
لما كانت الشركة الفرنسية مسئولة عن تشغيل جهاز المترو كان الوضع مختلف الكل يسير كعقارب الساعة بدون غفوة
اما الان فحدث ولا حرج عن الفوضى والاهمال بل وصلت الى ان يقود احد الاشخاص المترو لعدة محطات ويكتشف امره بالصدفة البحتة قال ايه صديقه سائق المترو علمه القيادة وذهب السائق وتركه بمفرده لقضاء بعد المصالح الشخصية على ان يقابله بعد 10 محطات .
لهذا الحد ارواح البشر رخيصة والكوارث طبيعية واللامبالاة مستفحلة بيننا .
فعلا ناس تمسك التراب يبقى ذهب وناس تمسك الذهب يبقى تراب .
وعجبى عليكى يا مصر ..

2 مايو 2008

علاوة ... علاوة



يا حلاوة يا ولاد

الريس بتاعنا بيخطب وبيقول كلام كبير قوى احلى من كلام شهر زاد فى الف ليلة وليلة وبيقول كمان فيه علاوات ومنح وجوايز وفكر ثوانى تكسب دقايق.

وتصفيق حاد جدا للريس بتاعنا وقلبه الكبير وعطفه علينا ما احنا برده اولاده واحفاده مش كده ولا ايه ولا احنا ولاد البطة السوداء .

طبعا الريس بيخطب بمناسبة عيد العمال كل سنة وانتو طيبين يا عمال اللى مش عامل مالوش نصيب فى الكعكة وخليه واقف فى طابور البطالة شوية .

طبعا الريس بتاعنا كان بيخطب خطاب رسمى ومجمع كبار رجال الدولة ورجال الحكومة طبعا والبشوات وكبار رجال الاعمال، والريس بتاعنا طلع متابع كل كبيرة وصغيرة فى البلد اتابع على مدار الساعة ازمة طوابير العيش وارتفاع الاسعار طب الحمد لله ان حضرتك متابع وانه فيه ازمة فى البلد وانك طالبت الحكومة بحلها فورا والسيد رئيس مجلس الوزارء تعهد بانهاء ازمة طوابير العيش خلال 6 اسابيع والكلام ده كان بالتحديد فى 23-3-2008 يعنى باقى 3 ايام والازمة تنفرج طبقا لكلام الدكتور احمد نظيف يا مسهل .

السيد رئيس الجمهورية تكرم بمنح العاملين بالدولة علاوة خاصة قدرها 30 % ( زيادة غير مسبوقة طبعا ) تصفيق حاد وتهليل وعاش مبارك رجل الحرب والسلام وربنا يديك على قد نيتك يا ريس .

ده كلام جميل ولا غبار عليه انا عايز افهم حاجة بس هما الناس اللى كانت بتصفق بحرارة وعناق البعض وزغاريط من السيدات ليه علشان 30 %علاوة اشك والله ليه بقى لان الزيادة للعاملين بالقطاع العام والحكومة ودول الغالبية منهم طلعوا معاش مبكر من زمان والباقى اتخصخص مع الخصخصة مش مهم دى كمان الزيادة دى على ما سمعت انها بتتراوح ما بين 32.40 جم للدرجة السادسة الى 201 جم لوكيل الوزارة بحسبة بسيطة كده يعنى نصيب الفرد فى اليوم كام يترواح ما بين 1.06 جم للحد الادنى الى 6.60 جم يوميا للحد الاقصى . يعنى بمعدل 4 ارغفة من ابو ربع جنيه ولبانة بشلن الى ما يعادل 26 رغيف من ابو ربع جنيه و2 لبانة بشلن اه والله تصدقوا هى كده .

بلاش نمردة ونكران للجميل واللى يجى من الصعايدة فايدة ، طب الاخوة والاخوات كبار رجال الدولة اللى ايديهم تعبت من كتر التصفيق ( الاحصائية بتقول انه تم التصفيق 21 مرة اشدهم طبعا كانت لحظة اعلان نسبة العلاوة ب30% ) على اعتبار انهم من الدرجة الممتازة جميعهم يعنى اياخدوا كل واحد 201 جم تييييييييييت يا بلاش طب ايعملوا بيهم ايه ولا ايه ايزودوا مصاريف الفلبنيات والسواقين ولا ايه بالظبط بس دول بياخدوا بالدولار يعنى 201 جم ايطلعوا كام دولار اكيد ايجيبوا كيس شيبسى و حاجة ساقعة صاروخ مش كده برده.

يلا ما علينا ده رزق بتاع ربنا وكرم من الرئيس والحكومة والحمد لله عليه وبما انى مش تبع الحكومة ولا القطاع العام يبقى اكيد القطاع الخاص ايبقى كريم معانا ويخصم مننا 30 % مساهمة للدولة .

سيبك من مبلغ العلاوة كام الاجمل انها تنفذ من اول مايو مش اول يوليو كما هو المعتاد يعنى الاسعار اتولع قبل الجو ما يسخن كمان،طبعا الريس بفطنته المعهودة خد باله من كده وشدد على الرقابة على الاسعار فى الاسواق يشكر طبعا واللى عجبنى قوى انه طالب الحكومة بتوفير الموارد الحقيقية لتلك الزيادة وشدد على الاهتمام بالمحليات وظروفهم القاسية ( يعنى عبده الرايق جاله الكادر اهو وايسدد كل ديونه وايروش نفسه وايجيب حتة همر بسواق كمان يعنى خلى بالك يا فرنسا هانم منه يعنى ممكن ينفع فى توصيلة ولا حاجة ) .

الحمد لله يعنى فيه موارد فى البلد ذهب ياقوت مرجان احمدك يا رب وبما ان العلاوة تحتاج زيادة تقدر من 4 الى 5 مليار جنيه فى الموزانة الجديدة للدولة وبما ان عجز الموزانة الحالى 70 مليار جنيه يعنى احتمال كبير يزيد عن 75 مليار فى الموزانة القادمة 2008/2009.

طب الزيادة فى الاجور الحكومة اتعمل فيها ايه والعجز ده اتوديه فين طبعا قدام الحكومة 3 حلول لا رابع لهم .

1- البحث عن موارد جديدة للدخل تحقق زيادة فى ايرادات الموزانة تعادل تلك الزيادة فى الاجور وده شىء صعب ومستحيل لاننا بعنا المصانع والارض بتراب الفلوس المورد الوحيد انهم يبيعوا الشعب ده لو لقيوا حد يشتريه اصلا يبقوا ضربوا عصفورين بحجر جابوا فلوس وتخلصوا من قرف الشعب ومشاكله .

2- تخفيض بنود الانفاق الحكومى والمصاريف النثرية اللى بالمليارات وطبعا ده شىء مستحيل يعنى البشوات يعيشوا عيشة التقشف والزهد ده كلام .

3 - الدين الخارجى وده اسهل طريقة بتنفذها الحكومات بمعنى انها تستلف من الدول والاشخاص على هيئة قروض وسندات بفائدة مبالغ فيها طبعا ودى خيبة ما بعدها خيبة لان اثرها يمتد لسنوات طويلة ويتاثر بها من سياتى بعدنا زى ما يحدث معنا الان ديون خارجية تسدد بنظام الجدولة منذ سنوات وحكومات ترحل لحكومات وشعب يئن ويجوع لسنوات وسنوات .

طيب كل ده ليه علشان اديك جنيه باليمين اخده 3 بالشمال طب مبلاها سوسو وخد نادية وبلاها الام والجنين وكفاية تعيش انت ، طب الحل بسيط و اسهل واضمن من كده ، يعنى دعم رغيف العيش 20 مليار جنيه يا خبر ابيض عيش دعمه 20 مليار ومش بيتاكل اصلا ومال لو عيش صح كان الدعم بقى كام طب فيه حلول والخبراء قالوا عليها وتطبيقها سهل وغير مكلف ، دعم المواد البترولية والطاقة 63 مليار سنويا زغرطى ياللى انتى مش غرمانة يعنى ابيع الغاز والبترول بنصف تكلفته لليهود والاجانب واديهم دعم كمان ايه الهنا اللى احنا فيه وازود المستثمرين بالطاقة والغاز بملاليم وهما يلموا الملايين ده اسمه كلام يلا رزق الهبل على الحكومة ..

لو الحكومة قامت بالسيطرة على الاسعار وحاربت الاحتكار وقامت بادارة المؤسسات والمصانع الانتاجية وفرضت الرقابة الصارمة على مؤسساتها الحيوية وخفضت من الانفاق الحكومى غير المبرر مش اسهل واخف وطئا من زيادة الاجور التى لا تسمن ولاتغنى من جوع .

اتذكر موقف منذ اكثر من اربع سنوات بينى وبين امين الصندوق بخصوص مبلغ العلاوة وكنت مسئول عن اعداد كشوف المرتبات وكانت نسبة العلاوة 10% بحد ادنى 30 جم وحد اقصى 120 جم وساعتها كانت الاسعار رخيصة جدا بالنسبة للوقت الحالى ،وبادرنى بقوله ما فيش علاوة ليكم بكل تجهم وحزم فرديت بكل بساطة انا على نفسى مش عايز علاوة واتكلم بالنيابة عن باقى العاملين انهم برده مش عايزين العلاوة بس بشرط ان حضرتك تضمن لى عدم زيادة الاسعار فى الخارج فتبسم ضاحكا وانا اضمنها ازاى دى ،فرديت وانا ما اضمنش اننا نتنازل عن العلاوة برده وفعلا تمت الزيادة وقتها .

يعنى مش مهم العلاوة كام المهم انفلات الاسعار لا يلتهم العلاوة واضعاف مبلغ العلاوة يعنى اللى ناخده باليمين ندفعه اضعاف مضاعفة بالشمال .طب يا ترى اصحاب المهن الحرة والاعمال الخاصة والعاطلين والقطاع الخاص نصيبهم ايه من التورتة وكعكة الرئاسة .

يلا نقول المنحة يا ريس ..

تحديث واجب 4-5-2008

كل سنة وحضرتك طيب يا ريس وعقبال مليون سنة

ده مش كلامى لوحدى ده كلام مصر كلها حتى شوفوا كده

الجمهورية

الاهرام

الاخبار