29 أغسطس 2008

رمضان على الابواب .... كل عام وانتم بخير

بسم الله الرحمن الرحيم

كل سنة وانتم بخير وبصحة وسعادة


طبعا كلنا فى انتظار ضيف عزيز على قلوبنا جميعا ضيف بننتظره مرة فى العام وعلشان كده هو عزيز وغالى قوى على قلوبنا بس السنة دى مختلف شوية عن كل عام حاسس باحساس مختلف انى وسط احبابى واصحابى فى عالم التدوين علشان كده ليه طعم مختلف شوية بالنسبة ليه وعلشان كده باقولكم كل سنة وانتم بخير واشهد الله انى احبكم فى الله جميعا ..

الفترة اللى فاتت كانت فترة مليئة بالاحداث العالمية والمحلية منذ لقاء اسكندرية مرورا ببؤجة الخير ثم اخيرا حفل توقيع العدد الثانى من مدونات مصرية للجيب ( مصر فى قطعة جاتوه).

طبعا شرفت بلقاء عدد كبير جدا من المدونين والمدونات خلال تلك اللقاءات مما زادنى سعادة وسرور بمعرفة اناس واشخاص اقل ما يوصفوا به انهم اناس رائعون واصحاب قلوب نقية شفافة ونظرا لانشغالى خلال الفترة الماضية والفترة القادمة كمان اسف لعدم متابعة كل المدونات اللى انا بحبها.

وخلال شهر رمضان ابقى متواجد احيانا لمتابعة الاحداث وادارة شئون وغالبا اتبقى فيه بوستات دينية خلال الشهر الكريم .

طبعا ناوى اسافر الصعيد اقعد كام يوم كده ليه زمان ما حضرتش رمضان فى الصعيد من عشرميت سنة كده

اهو فرصة نشوف الدنيا هناك وصلت لفين ومنها نغير جو القاهرة اللى اصبح يخنق ونشوف الاهل واصدقاء الدراسة

ياااااااااه بجد وحشتنى ايام الدراسة قوى ووحشنى النيل والجامعة فى سوهاج وحشتنى الخضرة والشجر والزرع

يلا كانت اياااااام الله يرحمها بقى .

المهم شدوا حيلكم فى رمضااااااااان عايزين حسنات كتير كفاية سيئات طول السنة وبلاش فوازير ومسلسلات وبلاش كنافة وقطايف علشان خاطر وزنكم والله بحس ان الشعب المصرى صايم طول السنة ومش بيفطر غير فى رمضان

وبمناسبة حلول شهر رمضان المعظم اقولكم على اجمل رسايل وصلتنى على الموبيل :

" ابليس بيهنيك بحلول رمضان وبيقولك شهر وراجع لك يا جميل "

" يقولون فى شهر رمضان تفتح ابواب الجنة وتغلق ابواب النار وتقيد الشياطين .. والله هتوحشنا "

" غدا اول ايام رمضان وتم اعلان ذلك فى الصعيد حيث شوهد الهلال على سيارة اسعاف "

اما انا عايز اقولكم " زهر وورد وريحان قطفته من حديقة الرحمن هدية لاعز الناس بحلول شهر رمضان"

كل سنة وانتم بخير

رمضان كريم

20 أغسطس 2008

كان حلما .. فخاطرا



نعم كان حلما فخاطرا واليوم اضحى حقيقة لا خيال
لقاء المدونين بمدينة الاسكندرية يوم 19 8-2008 كان درب من دروب الخيال او حلم من احلامى الصغيرة اننا نتقابل فى عروس البحر مع مدونى الاسكندرية والحمد لله ان الحلم تحقق برغم اعتذار عدد كبير من المدونين نظرا لظروف العمل او ظروف شخصية

البداية كانت مجرد فكرة عمل لقاء مدونين رغبة من بعض مدونى الاسكندرية والتعارف على اناس نكن لها كل حب وتقدير .لذا قررت عمل اللقاء بالاتفاق مع درة المدونين والاب الروحى لنا والدى العزيز ابو خالد واختى العزيزة دكتورة لماضة وتم اختيار اليوم والمكان ودعوة بعض الاصدقاء المدونين لحضور هذا اللقاء .

طبعا انا كنت بصراحة خايف قوى قوى وقلقان بدرجة فوق الوصف لدرجة انى قعدت من قبل اللقاء بيومين من غير نوم ويوم اللقاء نزلت من البيت قبل السادسة صباحا بعد محاولات يائسة مع النوم اللى خاصم عيونى وقررت انى اسافر اسكندرية واكون اول واحد هناك وفعلا نزلت واتجهت الى الموقف وركبت الميكروباص الساعة 7.15 صباحا متجه الى اسكندرية وفعلا اول مرة احس ان السفر متعة والطريق سهل جدا والامور ميسرة والحمد لله طبعا قبلها كنت مظبط مع احمد سكر اننا نسافر مع بعض وبعدين سوووو اتصل بيه وكنا ناويين نسافر مع بعض برده بس نظرا لظروف الاخ سكر وانه كان بياكل رز مع اهل الكهف فاخدته نومة وصحى متاخر وبيتصل يقولى انت فين قولتله انا قربت اوصل يا باشا صح النوم المهم انا استعجلت ومشيت اتصلت بابو خالد بعد ما ركبت قالى انا لسه راكب زيك وفى الطريق ، المهم اجمل مفاجاءة سمعتها وحسيت انى سعيد قوى قوى هى اتصال فاتيما بيه وبتقولى انا جاية اللقاء ما كنتش مصدق نفسى وطاير من الفرح قلتلها معقولة مش ممكن بجد مش مصدق قالت انا نازلة اهو وجاية ، بصراحة كده كنت عايز انزل من الميكروباص وارجع اجيبها معانا بص مع الاسف كنت فى الصحراء وكنا قطعنا اكتر من نصف المسافة المهم قولتلها سوووووو جاى اتصلك بيه وحاولو تيجوا مع بعض المهم هى زى حالاتى طلعت مستعجلة وركبت سوبر جيت وجاءت لوحدها وسووووو ظبط مع سكر وجم مع بعض انا وصلت اسكندرية الساعة 9.30 ونزلت الموقف لقيت الدنيا زحمة وحسيت ان مصر كلها احتلت اسكندرية المهم وقفت تاكسى وعلى محطة الرمل جرى نزلنى التاكسى قدام المكان بالظبط قلت الحمد لله مفيش توهان النهاردة دخلت المكان بصراحة عجبنى لحد ما وقلت اهو ينفع لحد ما نتجمع وبعدين لو مش عجبنا نروح مكان تانى وطبعا وصلت اول واحد وانتظرت الحضور الكرام ونبدا مراسم اللقاء ونشوف اولى المفاجات.

- حنين القلب : انسانة جميلة خفيفة الظل جدعة وطيبة جدا جدا والكارثة انها طلعت خجولة قوى ووشها بيحمر وتبص فى الارض دايما وهى اللى مقطعانى فى التعليقات والمدونات بس بجد بجد اول ما شوفتها حسيت انها اختى واعرفها من عشرميت سنة روحت جبتها من قدام سينما امير كانت تايهة يا ولداه وقال ايه من اسكندرية بس بصراحة كنت فى قمة السعادة انى قابلت انسانة طيبة زيها واقولها ربنا يكرمك ويفرح قلبك دايما واللقاء الجاى يكون مخصوص علشان سبوع النونو وخلى الفيشار عليكى برده .( ملحوظة ما تاخديش على كده يعنى دى حالة مؤقتة بعدين اهلا بالمعارك )
- مها زين( انها الحياة) يا لهوووووووووووى مش ممكن خفة الدم والشقاوة والجو والمهرجان اللى عملته فى اللقاء اتصلت بيها اعرف هى فين قالتى انها عند السينما وانا عمال اشرحلها المكان وانا بصراحة مش عارف انا فين وجيت ازاى اصلا لقيتها بتقولى انا جاية اهو ومعايا اتنين صحابى قابلنى قدام الكوفى طبعا طلعت استناهم وقلت اى مجموعة يكون عددهم ثلاثة اسالهم وانا ونصيبى ممكن الموضوع يعدى على خير وممكن ينتهى بعلقة سخنة ونبات فى التخشيبة للصبح بس ربنا ستر وطلعوا اول ثلاثة جم ودخلت بكل شجاعة وانا متوجس خيفة مين فيكم مها لقيت واحدة زى العسل كده بتقولى انا مها قولتلها اتفضلى يا دكتورة وكان معاها اتنين من صاحبتها زى العسل برده هدوء وعقل وخفة دم وعرفت فى الاخر هى جابتهم معاها ليه انا كنت فاكر انهم بودى جارد وناويين على نية لكل من تسول له نفسه انه يحتك بالبرنس مها زين طلع الموضوع اكبر من كده بكتير وجايين علشان يقوموا بتسجيل وتصوير الدكاترة مها وهى بتكشف على الدكتورة لماضة وحنين القلب ولبست البالطو بتاع لماضة واشتغلت كشف وقياس ضغط حسيت انها عايزة تقولهم اسفة جدا مضطرة اضحى بالمريض علشان خاطر انا اعيش بس بصراحة يا مها نورتى المكان وعملتى جو من المرح وخفة الدم يا برنس ومبروك عليكى العدد التانى من مدونات مصرية للجيب والف مبرووووووووووووووك حلو التسييييح والتصييييييييييييت ده صح .
- ابو خالد : وطالما قلت ابو خالد يبقى سمع هس ونسمع احلى سلام من بور سعيد لحد مطروح ومن اسكندرية لحد اسوان لاجدع واجمل شخصية فى عالم التدوين واللى بوجوده اى مكان يبقى جنة وبحس انى طاير فى السماء طالما هو جنبى وعايز اقوله حاجة بسيطة ربنا يخليك لينا ويبارك فى عمر حضرتك وما يحرمناش منك ابداااااااا ولا من حبك وحنانك لكل المدونين والمدونات الاحياء منهم والاموات .
- دكتورة لماضة : رسالة حب وتقدير وعرفان لاجمل واطيب شخصية قابلتها فى حياتى الجدعنة والشهامة وخفة الدم واللماضة والطعامة تبقى ايه يا حلوين شطار تبقى لماضة الف الف شكر على تعبك واهتمامك بينا وتشريفك اللقاء يا دكتورة وعقبال ما نشوفك كده اشهر دكتورة فى بر مصر المحروسة .
- دكتور محمود ( بطوط حبوب ) منوفى الجنسية وسعيد بها وانا كمان سعيد انك من المنوفية لانك اكدت عندى انطباعى وحبى للمنايفة بالرغم مما يقال عنهم بس بصراحة كل الى عرفتهم عشقتهم وحبيتهم الا واحد بس ومع الاسف الكل عارفه كفاية انه خانق بلد بحالها المهم بطوط طلع شخصية جميلة قوى اخلاق جدا جدا خفيف الظل كعادته دائما رزين ومثقف بس يا خسارة بيحب النوم وفقرة النوم من الفقرات المحببة لنفسه وعلشان كده كان بيدخل فى غيبوبة ويخرج منها سريعا وبصفته دكتور اسنان قام بالكشف مجانا على الاخ سوووووو بس اعتقد انه بيجر رجل الزبون وناوى ياخد ثمن الكشف فى الاستشارة منوفى يا جرعان والطبع يغلب بصراحة سعيد بمقابلتك وتشريفك يا بطوط باشا .
مصطفى ساجى : وده الضلع الثانى فى مثلث المنوفية وجه مع بطوط انسان هادى ورزين ومثقف قليل الكلام بس مبتسم دائما ابتسامة خجل سعيد بتشريفك يا صاحب اكبر عدد من المدونات المغلقة وكفاية علينا حلم وسط الضباب .
رومانسى :الضلع الثالث فى المثلث المنوفى شخص هادى جدا جدا منتبه ومركز مع الجميع بيخزن على سى دى فى الجانب الشمال من المخ البشرى ليعيد البث فى الوقت المناسب .
- مهندس / محمد حسن( اسكندرانى اوى ) من اجمل الحاجات اللى انا شوفتها بكل امانة انسان ناضج صاحب فكر عالى انسان تحس انه خليط من الاخلاق والثقافة والشهامة وخفة الدم والوعى بما يحدث مع قليل من ماء البحر ورمال الشاطىء تحطهم فى خلاط سعة 5000 لتر يطلع انسان بيعشق تراب اسكندرية اسمه محمد حسن بجد واجهة مشرفة لشباب مصر العاملين بالخارج انسان تثق به من اول وهلة وتتمنى انه يبقى اخ وصديق لك طوا العمر احب اقولك يا باشمهندس سعيد جدا جدا بمعرفة حضرتك وتشريفك وكنا نتمنى تقعد معانا لاخر اليوم بس الظروف بقى وخيرها فى غيرها واتمنى اننا نشوفك دايما على خير .
- احمد سكر : سكر وصل يا جدعان بعد غياب اصله كان محتكر السكر اللى فى البلد كله لحسابه طبعا يا سكر انت حاجة حلوة فى حياتى وكفاية انى بحلى بيك كل حاجة فى حياتى بس طبعا ما يمنعش انك بتظهر هادى قدام الناس وانت اخر شقاوة وعندك خفة دم تحسد عليها وكنت عايزنى اشترك معاك فى مؤامرة وعايزنى اقلب شنطة حنين القلب اللى عاملة زى شنطة الحقن بس على مين بصراحة كنت طمعان فى المانجة وشنطة سووووو كانت فاضية واكبر بس نسيت اقوووووول لسووووو كان هيتصرف هو يلا شردة بالجامد قوى عرفتى يا مها ولا لسه عدى الجماااااايل .
احمد سووووو : (عجوز وعنده الف سنه ) يااااااااااااه يا جدعان الشخص ده مالوش مثيل كل يوم اعرفه احبه اكتر واتعلق بيه اكتر واكتر انسان مصرى من الزمن الجميل تسمع عنه فى الحكايات خفة دم بتلقائية شديدة جدا مثقف وموهووووووووووب بجد ربنا يكرمك واشوفك حاجة كبيرة قوى قد تمثال الحرية كده وكفاية عليك كده علشان تيجى تعلق وما تزعلش .
فاتيما روح قلب ماما قمر المدونين والكريزة اللى بتنور وبتجمل الحياة التدوينية سعيد جدا بتشريفك يا ام يوسف برغم الظروف القاسية بس بجد من اجمل الحاجات فى اللقاء تشريفك لان الكل كان عايز يشوف ام يوسف ويستمتع بحنان الامومة الجميل وكفاية انك اخدتى حنين القلب وريحتينا من صداعها شوية بس هو انتم كنتم فين ده كله فى بيت الراحة انا قلت حنين خطفتك ولا حاجة كان نفسنا تكملى اليوم معانا بس كفاية انك جيتى واسعدتينا بوجودك ربنا ما يحرمنا منك ولا من حنية الامومة وربنا يقرب البعيد وتشوفى يوسف احسن واحد فى الدنيا بس بصراحة حسيت كده انتى وحنين شبه بعض فى حاجات كتير وقريبين من بعض سبحان الله .
- شيماء سمير ( احتمال ) مفاجاة من العيار الثقيل تشريفك يا شيماء ودعوة كريمة من الرائع دوما ابو خالد لحضورك وتشريفك اللقاء والقاء بعض القصائد من ديوانك الاول اطياف الصمت وانبهار الحضور بطريقة الالقاء واعجابهم بالديوان احب اقولك انك انسانة رقيقة وشفافة وفناااااااااااااانة موهوبة بجد ربنا يوفقك دوما وكفاية عليكى ابو خالد ونظرة الفخر والاعتزاز بابنة رائعة مثلك .
- زمردة : انسانة هادية ورقيقة بس مع الاسف ما شرفتش بالتعرف عليها كويس بس سعيد بحضورك وتشريفك طبعا
- اميرة ( سهر الليالى ) جت من الشغل علينا بدعوة كريمة من لماضة انسانة هادية ورقيقة جدا وما قعدتش كتير وما لحقناش نتعرف عليها بس برده كفاية تعبها وتشريفها .
مييييييييين تانى اه مدونة وزوجها من اسكندرية اسف ما لحقتش اتعرف بيهم كانوا مستعجلين قوى بس برده شكرا لتشريفهم وخيرها فى غيرها .


طبعا الاجتماع اشتمل على الكثير من الحوارات والمناقشات وخصوصا فكرة لمااااااااضة عن حق الملكية الفكرية للمدونيين وكيفية الحفاظ على حق المدون فى الحفاظ على حقوقه الادبية وكان اغلب الاقتراحات التسجيل فى الشهر العقارى او عمل ميثاق شرف للمدونين او خلى اللى يسرق يسرق هى جاءت على الافكار ما كله بيتسرق فى البلد وكذلك مناقشة السلبيات فى السينما المصرية والمونات ومدى تاثيرها على المصريين العاملين بالخارج ودى ليها بوست خاص ان شاء الله ،وكذلك استطرق الحديث للسؤال عن غياب قمر التدوين وشمسه الغائب الحاضر فى قلوب الجميع فرنسا هانم ربنا يتم شفائها على خير وترجع بالسلامة تنورنا واحب اقولها يا فرنسا اسمك وحبك منقوش فى القلوب للابد .
لحد كده انتهى اللقاء فى الكوفى شوب وانصرف كل من مها وصاحبتها وسافرت فاتيما وانصرف مهندس محمد حسن .
خرجنا من الكوفى الى البحر ماهو مش ينفع نروح اسكندرية ومش نشوف البحر كنت رحت فيها طبعا المهم اتجهنا الى منطقة بحرى والقلعة وطبعا لازمن نشوف ونسمع من بحرى وبنحبوه وعل الامة بنستنوووووه ايووووووووه يا جدعان منظر البحر يجنن وخصوصا ساعة الغروب المنظر تحفة واسكندرية جميلة برده المهم اتجهنا ناحية القلعة وبعدين دخلنا مطعم علشان ناكل بناء على طلب الطفل الطخين اللى دايما جوعان سووووو باشا اللى بيعشق الكلام عن الاكل والمطاعم ويدخل يشوف الاكل يقعد ساكت ومؤدب المهم قعدنا كل واحد طلب الاكل بتاعه كبده وبيتزا وكشرى وحاجات كتير كده المهم اجمل ما فى الموضوع ان سكر وابو خالد طلبوا بيتزا الاكل كله جه وقربنا نخلص والبيتزا مش عايزة تيجى المهم جات واحدة بيتزا لسكر وقعد الراجل ياكل ويدور على فواكه البحر وابقى قابلنى لو شفت رجل جمبرى واحدة الراجل عمال ياكل وابو خالد منتظر البيتزا بتاعته وبعدين جه الراجل يقول من طالب بيتزا فواكه البحر اييييييييييييييه فواكه البحر ومال سكر بياكل ايه طلعت البيتزا بتاعت ابو خالد وبتاعت سكر هى المتاخرة ابو خالد بص لسكر وبلهجة بور سعيدية جميلة انت اكلت بتاعتى وانا قاعد بتفرج عليكم .
المهم خلصنا اكل وطلعنا نحلى عند عزة مييييييين عزة مش عارف المهم احنا طلبنا ايس كريم والاخ سووووو طلب ام على وابو على والعيلة الكريمة بس مع الاسف ام على ما طلعتش حلوة واستكفى بابو على بس
المهم خلص اليوم الجميل الرائع وانصرف الجميع ابو خالد لبور سعيد وبطوط على المنوفية وسوووو وسكر وانا على القاهرة فى عربية سكر وطبعا انا ليه يومين ما نمتش وكنت طمعان اقعد فى الكنبة اللى ورا واديها الحنان بس الواد سووووو عمل الدنيئة واحتل الكنبة وناااااام وانا قعدت جنب سكر وكان هاين عليه اسيبه وانام بس بصراحة خفت لان سكر كان تعبان ومرهق ونفسه ينام هو كمان قلنا وعلى ايه بلاها نووووووم النهاردة كمان المهم استريحنا شوية فى الطريق ورحت جبت مشبك لهمس ومامتها قلت اضحك عليهم واسمى جبت حاجة روحت البيت قالولى جبت معاك من البحر قولتلهم مشبك قالوا يا ما جاب الغراب لامه وقعدوا ياكلو برده المهم انا كنت جعاااااااااااان نوم وعايز اناااااام علشان اروح الصبح الشغل والساعة بقت 4.30 الفجر قلت غراااااب غررررررراب وده جزاءت اللى يجيب حاجة لمراته .
فى النهاية شكر وتقدير وعرفان لكل الحضور وعتااااااب بسيط لكل اللى ما جاش وخصوصا الرااااايق ومواطن مصرى نايم براحتك يا اسلام .

بس برده راجع تااااااانى يا اسكندرية


موضوعات ذات صلة

يوم من عمرى حنين القلب

ايووووووه ياجدعان مها زين

المهم انى روحت روح قلب ماما

كوفى شوب وقلعة بس بطوط حبوب

12 أغسطس 2008

اسكندرية رايح .. جاى

نداء عاجل وهام

الى كل مدونى مصر المحروسة
تحديث
مكان التجمع باذن الله تعالى
15 طريق الحرية - شارع فؤاد - محطة الرمل
سنتر رمسيس للحفلات ( سينما رمسيس سابقا )
الاسكندرية
====================

سيتم باذن الله عقد لقاء مدونين بمدينة الاسكندرية يوم الثلاثاء 19-8-2008 من الحادية عشر صباحا

اللقاء سوف يتم برعاية ابو المدونين والدى العزيز ابو خالد

وبدعوة كريمة من الدكتورة لماضة على سن ورمح

وسوف نوافيكم بمكان التجمع وكيفية الوصول اليه قريبا

يا ريت اللى ظروفه تسمح بالحضور يبلغنا لنكون فى شرف استقباله

لمزيد من الاستفسار يمكنكم الاتصال بالارقام التالية

ابو خالد 0108994310- خالد همس الاحباب 0101345140

=================================


شكر وتقدير للاخت العزيزة قوس قزح على هذا المشروع الخيرى جعله الله فى ميزان حسناتها

بؤجة الخير

4 أغسطس 2008

يوم .. لكن غير كل الايام

تحـــــديث

تهنئة قلبية للاخت العزيزة / مها زين صاحبة مدونة انها الحياة

بمناسبة النجاح والتفوق وحصولها على المركز الاول كمان وعقبال الدكتوراة يا ست مها

وكفايه دح بقى انتى بقيتى سوسة خالص مش عاتقة سباقات ماراثون ولا ماجستير الرحمة حلوة برده

انا مش بقر ولا بحسد انا ماسك رجل الكنبة اهو ..

==========================

طبعا اسف جدا على التاخير بس بصراحة ظروف الشغل مخليانى مش مركز فى المدونة ولا متابعة باقى المدونات بانتظام بس بصراحة اليوم من روعته وجماله ما كانش ينفع نمر عليه مرور الكرام .

نعم كان يوم ولا فى الاحلام يوم التبرع بالدم بمركز المصل واللقاح


البداية كانت دعوة كريمة لحملة التبرع بالدم من الاخت العزيزة نوران ( بت خيخة) والميعاد كان يوم 1-8 الساعة العاشرة صباحا امام المركز وبما اننى بحب السهر وده غصب عنى بصراحة فكنت مش عارف اصحى ازاى وانا نايم الساعة 5.30 صباحا لكن سبحان الله الساعة 8 لقيت نفسى صاحى وكلى نشاط وكانى نايم ليه اسبوع، قمت فطرت ودى مش بتحصل ابدا ولكن استعدادا للتبرع بالدم ومش عايزين فضايح وسط المجتمع التدوينى نزلت متجها لمحطة المترو ركبت المترو ونزلت محطة الدقى انتظر والدى العزيز ابو خالد (ذكريات ابوخالد) ومدونى بورسعيد والاخ العزيز نيجرو وصلت المحطة 9.15 صباحا وطبعا عارف انهم مش هيوصلوا قبل 10.30 طبعا وبما اننى لوحدى فى محطة المترو والدنيا رايقة والجو مكيف طبعا جبت شيشة وقعدت على الدكة بتاعت العساكر اراقب حركة الركاب لقيت راجل كبير السن داخل عليه وبكل حزم بيقولى انت قاعد هنا خلى بالك فيه ناس بتعدى من فوق الحديد ومش بتقطع تذاكر انا طبعا ازبهليت ووشى احمروقولتله حاضر يا حاج من عينى انت تؤمر شوية ولقيت شاب بينادى عليه وبيقولى التذكرة اتحشرت فى المكنة تعالى شوفها طبعا على اساس انى خبير ومستشار فى المترو طبعا بكل برود رديت شوف حد تانى انا مش تبع هنا بصراحة .

شوية ولقيت سووو ( عجوز وعنده 30 سنة ) جاى من بعيد وبيضحك على منظرى وانا قاعد على الدكة وحسيت انه طمعان فى القعدة بصراحة بس الحمد لله ربنا ستر ولقيت ابو خالد حضر ومعاه جروب بور سعيد وفى نفس الوقت وصل نيجرو .

نيجرو كان معايا على التليفون وهو طالع سلم المترو قلت ايه اهو خلينا نرغى شوية علشان اعرفه وفعلا مجرد ما لمحته جريت عليه وخدته بالحضن وحسيت انى باعرفه من زمان قوى قوى هو انسان مجرد ما تشوفه تحبه ويدخل القلب بدون استئذان انسان جميل واخلاق وخفيف الظل لدرجة مش معقولة وطلع بيحب الاكل زى سووووو .

بابا ابو خالد طبعا بصراحة لو كتبت بكل لغات العالم عن هذا الانسان مش اقدر اوفيه جزء من حقه بجد تعجز الكلمات عن وصفه وعن حبه وحنانه للمدونين بجد بجد اب رائع بكل المقاييس وفعلا اجمل هدية فى عالم التدوين معرفتى بشخصه الكريم وبيزيدنى شرف ان الكثير بيعتقد انى ابنه حقيقى وده شرف وسعادة انى اكون ابن لهذا الانسان الاكثر من رائع .

سوووو بصراحة مش عارف اقول ايه واوصف مشاعرى تجاه ومدى حبى وتعلقى بهذه الشخصية يكفى انه تؤام روحى وبحس بجو من المرح والسعادة طالما موجود فى المكان انسان شفاف ويحمل بداخله فنان من الزمن الاصيل صاحب مبدا بمعنى الكلمة .

شيماء الجيزى واخيها عوض شخصية خفيفة الظل مرحة عشرية جدا جدا فنانة بجد وفكرها عالى قوى قوى .

ايناس ( نهر الحب ) انسانة رقيقة رائعة تفكيرها منظم جدا مهتمة بقضايا ومشاكل المجتمع الحيوية بحيى فيها جرأتها وشجاعتها ولباقتها وتمسكها بقضية الزواج والعنوسة والخرس الزوجى بكل استماتة .

نسمة اخت ايناس الرقة وخفة الدم والهدوء الذى يسبق العاصفة هههههههه هادية قليلة الكلام فى بداية اليوم وفجاة انفجرت ينابيع الحكمة والذكاء وبصراحة مبقيناش قادرين عليها ومتوقع انها اتبقى مدونة جامدة قوى لدرجة اننا هنقفل المدونات ونبيع مناديل فى الاشارات .

وصلنا مكان التبرع بالدم وطبعا كان اول المستقبلين ام العروسة صاحبة الليلة الرائعة بجد بت خيخة واى كلام اللى طبعا غنية عن اى وصف وتعريف يكفى انها انسانة رائعة استطاعت تجميعنا للخير وكفاية تحس بالفرحة فى عينيها بالتجمع وتحس انها عايزة تركب اجنحة وتطير بيهم وواخدة بالها من كل كبيرة وصغيرة وتحس انها اخت للجميع حتى بعد ما خلص اليوم ومشيت انسحبت بهدوء وبدون كلمة وداع علشان ما تحسسناش بغيابها وعلشان كده بقولها ربنا يجعله فى ميزان حسناتك ويبارك ليكى فى شريف ويحفظه من كل سوء .

جينا بقى للصداع المزمن والنحلة والدبور ابى هانم وخرفانها يبقى الجدعنة والشهامة وبنت البلد الجدعة قوى قوى بغض النظر عن طولة لسانها وايدها اللى هرتنى ضرب والمفاجاة طلع عندها دم واتبرعت وانا طلع ما عنديش دم وفضحتنى فضيحة بجلاجل بس احب اقولها انكم بتتبرعوا بدم خرفان اما انا عندى شربات بس .

فاتيما ( روح قلب ماما ) يبقى حنية الام وحنانها يبقى الاخت والصديقة الجدعة تحس انها من زمن الامهات الجميل بس برقة وشياكة زى هوانم جاردن سيتى كده ربنا يكرمك وتفرحى بيوسف يا ام يوسف ودايما معانا وقمر بتنور لقاءتنا بالبهجة والسعادة

مهندسة داليا صاحبة ام يوسف انسانة هادية ورقيقة وحاسس انها اتدخل التدوين قريب من فرحتها بالناس الموجودة .

داليا ( قوس قزح ) اراء جريئة ثقة بالنفس جدعنة وشهامة بلا حدود والجانب الاخر من ام العروسة ساندت خيخة معنويا فى المجهود الخاص بالمتبرعين وكانت مهتمة بالجميع بصراحة احب اقولك انى سعيد جدا بمعرفتك وكل يوم بعزك اكتر من اللى قبله ربنا يكرمك يا ام نور وتفرحى باولادك .

رودى ( بنوته مصرية ) خفة الدم المصرية والجدعنة بلا حدود يبقى العزيزة ام نور فراشة طايرة بينا بخفة دمها وروحها المصرية الاصيلة والف سلامة عليكى يا ام نور وسماح المرة دى علشان خاطر نور .

ايهاب ( الشنكوتى الكبير ) شاب هادى رزين مختلف تماما عن تعليقاته سعيد جدا بالتعرف عليه ومقابلته بصراحة لانه انسان مهذب

كريم ( يوميات مطلق ) شاب مهذب رائع جدا وهادىء تتشرف بالتعرف عليه .

احمد كمال ( رحايا العمر ) اول مقابلة وعمرى ما دخلت مدونته بس انسان قمة الاحترام وكان من اجمل المفاجات فى اللقاء وسعيد بمعرفته جدا .

ابن حجر العسقلانى انسان محترم جدا خفيف الظل تحس انه مستمع جيد ومتحدث لبق .

هيثم الدهشان ( همسات العشق ) شاب صعيدى بيحمل الاصالة وعبق التاريخ هادى الطباع موهوب بجد .

محمد نوشه ( انا مش معاهم ) ولا انا معاهم شاب مصرى بيحمل جينات الجدعنة والرجولة سعيد انى شوفته طبعا

المنسى شاب هادى محترم عايز يتعرف على الجميع

ضياء صاحب اجمل اغماءة فى الدنيا وبقى اشهر من عبدالسلام النابلسى انسان طيب جدا وعشرى وسعيد بجو الاسرة وحابب يتعرف على كل الناس .

مها مهاميهو ( احسن تستاهل ) صاحبة اشهر واخف دم فى التعليقات كانت بتجننى وتفطسنى من الضحك من تعليقاتها طلعت يا عينى بنوته صغيرة تطلع فى كى جى تو وقال ايه لسه بتشرب شاى بحليب كانت قاعدة هادية مستغربة الجو يعنى بس من جواها عايزة تتلامض وتنكش بس مكسوفة قال عندها دم يعنى ( شوية من اللى بتعمله فيه ) بس سعيد انى شوفتها بصراحة.

ميرا ( امراة بعقل رجل ) بنوته شقيه بس جدعة ومرحة مع انى متعرفتش بيها قوى بس جدعة برده .

احمد الصباغ كبير العيلة التدوينية واستاذ قلم المرور وتنظيم اللقاءات وادارة الحوار وطبعا ده غنى عن التعريف واللى دايما ببقى سعيد بمقابلته واهتمامه بالمدونين .

عروسة اليوم وكل يوم د/ مروة عامر ( لماضة ) كل سنة وانتى طيبة وعقبال 100 سنة وكل سنة وانتى وسطنا لماضة هانم اللى مشفتش لماضتها غير فى المدونة اما فى الواقع بنوته رقيقة وهادية وبتتكسف من خيالها ووشها بيحمر بس انا بعشق لماضتها بصراحة وليها معزة خاصة عندى وببقى سعيد بوجودها وسطنا وبحب اسمع كلمة ماما فاطمة منها وهى بتجرى ورا فاتيما .

سلوى سمير ( استرها يارب ) رئيسة حزب الاحلام ياعينى على الهدوء والدماغ العالية واختها سالى حاسس انهم مستغربين الجو شوية بس كانوا مبسوطين من نظرات عينيهم وطبعا الحاضر الغائب مفقوعة مرارتها سحر الشهيرة بسوسو طبعا ما حضرتش لانها فى زيارة خاصة للست فيفى وتستاهل اللى هيجرى فيها طبعا انا شمتان فيها بصراحة بس بحس انها بتقعد مع فيفى تتعلم منها فن الحموات وتطلعه على الرايق وعياله ربنا يجعل كلامنا خفيف عليها .

دعاء ( مواجهات ) والكلام الكبير قوى والتخبيط وفى الاخر طلعت يا عينى على الهدوء والرقة والخجل ولا اعرف مين دعاء مواجهات بس بصراحة كنت سعيد جدا انى قابلتها مع ان الظروف ما سمحتش اننا نتكلم مع بعض بس خيرها فى غيرها والجيات اكتر مش كده .

بصراحة دول اللى افتكرتهم من الناس اللى كانوا موجودين وانطباعى عنهم .

طبعا خلصنا التبرع وانا طبعا متبرعتش بصراحة وكنت مضايق قوى بس سعيد انى بشارك معاهم وكنت مستعد لنقل الضحايا وخصوصا البت ابى بس ربنا ستر وهى اللى قامت بنقل المصابين ببطوط لنادى الزراعيين بعدها اتجهنا الى النادى ورحنا نصلى الجمعة فى مسجد اعتقد انه على حدود الجيزة الشمالية ولبست قبقاب اه والله لبست قبقاب زى بتاع شجرة الدر ولقيت الواد سوووو بيبص وبيضحك عليه وعايز يعمل الدنيئة ويصورنى بس على مين عيب بس ايه ما كدبش خبر استفرد بنيجرو وصوره وكمان صور نفسه هما كده المبدعين عندهم ربع ضارب .

بصراحة اليوم كان روعة وغاية فى الجمال وقضينا يوم فى منتهى السعادة لدرجة انى زوغت من الشغل والموبيل فصل شحن ونسيت الدنيا بحالها.وانتهى اليوم بوداع اغلى الناس ابو خالد واهل بورسعيد وكان نفسى ارجع البورصة تانى علشان اشوف نيجرو بس مع الاسف ما لحقتش اسلم عليه ولا اودعه .

بصراحة التغطية الجامدة قوى للحدث ممكن تلاقوها هنا زى مابحلم لفاتيما-- وقال تدرى لسوووو.