27 ديسمبر 2008

اجازة

كل عام وانتم بخير 
بمناسبة راس السنة الهجرية 
وكل سنة وانتم بخير 
بمناسبة راس السنة الميلادية 
وربنا يجعلها سنة سعيدة عليكم جميعا 
واسف جدا لتقصيرى معكم 
اجازة قصيرة وسنعود باذن الله

24 ديسمبر 2008

التدوينة البيضاء

تضامنا مع مدونى تونس






15 ديسمبر 2008

بوش والجزمة


انا سعيد قوى قوى وده لسببين
اولهم طبعا ضرب منتظر الزيدى مراسل قناة البغدادية الرئيس الامريكى جورج بوش بالجزمة فى مؤتمر صحفى بالعراق
ودى كانت نهاية سعيدة لعام 2008بالنسبة للعرب ونهاية تعيسة جدا للرئيس بوش
رئيس اكبر دولة فى العالم بينضرب بالجزمة وفين فى العراق اكبر دولة ذاقت الظلم والتمزق على يد بوش 
النهاية طبيعية جدا جدا لحاكم ظالم ومغرور 
بجد كان نفسى ينضرب بالقفا كمااان 
علشان اغنيله صعبان عليا قفاك
هو فعلا تظاهر بالبرود واللا مبالاة امام الكاميرات وده طبعه لانه بااااااااارد وساقع كماااااان
بس رد الفعل العربى والعالمى كان مختلف تماما والكل كان شمتان فى الجزمة ابن الجزمة
ومن غرائب الموقف ان الصحفى خلع  الحذاء كاملا ليضرب به بوش والراجل مشى حافى وده حال الصحفيين بعد كده فى اى مؤتمر صحفى
حذاء منتظر الزيدى اصبح اشهر حذاء فى التاريخ  ده بقى اشهر من قبقاب شجرة الدر وكمااااان اشهر من حذاء الطنبورى
وخفى حنين 
سؤال محيرنى قوى يا ترى مصير الجزمة هيكون ايه ؟؟؟!!!!!!؟ 
هل يتم التحفظ عليها كمستند فى القضية؟؟؟ 
ولا سوف تباع فى مزاد علنى ؟؟؟ 
ولا منتظر هيفضل حافى  من غيرها ؟؟؟
بس بصراحة تسلم ايديك يا منتظر
وده رابط لمشاهدة الفيديو حصريا  
 
ثانى حاجة فرحتنى هى عودة فرنسا هانم للتدوين سريعا واشكر الاخ منتظر لانه هو السبب الرئيسى فى رجوعها حتى شوفوا كده  

12 ديسمبر 2008

عيد ميلاد سعيد

 عيد ميلاد مين الليلة
عيد ميلاد قمر العيلة 
 عيد ميلاد ابى هانم 
كل سنة وانتى طيبة 
وعقبال 3 سنين و3 شهور و3 ايام 
 
  
  تورتة للمعازيم  
 
تورتة بمناسبة عيد الميلاد



تورتة مخصوص علشان ابو الفصاد
  
تورتة علشان المدونين والمدونات 
وطبعا انا اخدت نصيبى مقدما
 
وده هديتى بمناسبة عيد الميلاد 
كتاب الله 
افضل الكتب 
كل سنة وانتى طيبة يا رحااااااااب 
وعيد سعيد عليكم كلكم 
وكل سنة وانتم بخير 
ودايما مجمعين فى الخير

6 ديسمبر 2008

عندك خروف زيادة


كل سنة وانتم طيبين
كل سنة وانتم بالعيد فرحانين 
ولخروف العيد مشتاقين
ونظرا لان العيد فرحة وكلنا بيحب الفرحة علشان كده بهذه المناسبة هاجاوب على تاج العيد بناء على رغبة اختى فى الله سالى صاحبة مدونة  حاجات جوايا
       
 1-ماذا يمثل لك العيد ؟ وما أكثر شئ يبهجك في مظاهر العيد ؟
 
العيد مناسبة سعيدة ومكافاة من رب العزة لعباده بعد عبادة محببة للنفس سواء كانت صوم او مناسك حج فالعيد فرحة
اكثر شىء يبهجنى فى مظاهر العيد الفرحة فى عيون الناس ومصافحة الاخرين وتهنئتهم بالعيد  والاطفال وفرحتها بلبس العيد       
  
2-اوصف لنا طقوسك في العيد .. من ليلة العيد لآخر يوم ؟
 
مفيش حاجة معينة بصراحة غير صلاة العيد وبعد كده بنقضيها نوم اما واحنا اطفال كنا بنخرج ونتفسح مع اصحابنا
   
 احكي لنا أطرف موقف حصلك في العيد ؟3- 
كنت لسه فى ابتدائى وفى الصعيد وكان عندنا خروف كل ما يشوفنى يجرى ورايا وينطحنى جه العيد وكنا هندبحه وطبعا انا فرحان جدا انه هيندبح ووقفت اتفرج عليه وطبعا لابس جلابية العيد  ولقيت عمى جايبه وجاااااى للجزار يدبحه انطلق مين ايده وجه جرى عليا نطحنى انا وواقف لقيت نفسى واقع فى بركة الدم وطبعا الكل بيضحك على منظرى وكان اخر عهدى بيه الله يرحمه 
 

-بتحرص على تهنئة الأهل والأقارب والأصدقاء بالعيد .. ولا مش بتهتم ؟؟ 

ده شىء اكيد طبعا هو مظاهر العيد بتقتصر على كده معايا تهنئة وزيارات للاقارب

مين أول حد تزوره أو تكلمه في التليفون /الموبايل عشان تهنيه بالعيد ؟

 
غالبا بيت عمى لانهم جنبى على طول وبتصل بالاهل والاصدقاء فى البلد
 
 -إيه الفرق بين العيد الحالي .. وعيد (أيام الطفولة )؟ -
 
فرق السماء والارض طبعا زمان كان ليه طعم مختلف تماما كنا بنجيب لبس العيد وبنخرج نلعب وبناخد عيديات دلوقتى بنجيب لبس بس مش لينا طبعا وبندفع عيديات ونشترى لحمة  يلا الله يرحم ايام زمااااان
       
كلمنا عن ذكرياتك في العيد

ذكرياتى بتنحصر بين اغنية يا ليلة العيد لام كلثوم بحب الاغنية دى قوى لانها هى اللى بتحسسنى انه بكرة عيد 
وبعدين صلاة العيد وزيارة الاهل والاقارب وبعدها خلود الى النوم او مشاهدة التليفزيون وكل عيد وانتم معيدين 

 -تفتكر الحياة من غير عيد .. هتفرق كتير ؟؟؟

اكيد طبعا كفاية انه اسمه عيد وانه منحة من ربنا سبحانه وتعالى للترفية وزيارة الاقارب وصلة الرحم وتهنئة الاصدقاء ومظاهر الود والالفة اللى بقت عملة نادرة حاليا
 
إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟ 
.
اول رسالة كانت من فودا فون وبتقول :هدية العيد للك انت بس كلم  5555  مجانا خلال 5 ايام واختار كول تون ببلاش 
وطبعا انا مش من هواة الكول تون علشان كده هدية مش مقبولة شايفين الحظ 
ورسالة تانية بتقول بمناسبة عيد الاضحى المبارك حبيت اكون اول واحد يقولك : عندك خروف زيادة ؟؟
طبعا من واحد رخم اكيد واحب اقوله تعالى وانت تشوف ...

احم احم .. لسه بتاخد عيدية ؟؟ من مين ؟؟ وبتديها لمين ؟

هههههه كان زماااااااان دلوقتى انا بدفع عيديات ليه وللزمن اصل بسم الله ما شاء الله العيلة متشعبة وما بيعرفوش تنظيم الاسرة .

إيه رأيك في التاج ؟

  
تسلم ايديكى يا ست سالى وكل سنة وانتى طيبة ومن ربنا قريبة 

 تحب تمرره لمين من المدونين ؟ اذكر على الأقل 10

ما بلاش
عامة احب اهديه لبابا وماما وتيتا وخالتو وعمو وكل جيرانى واصدقائى واحب اسمع اغنية يا ليلة العيد
بصراحة بقى احب ادبس كل من:


حنين القلب 
عبده الرايق
قوس قزح  
فرنسا هانم
روح قلب ماما 
احمد سكر 
عاشقة القمر 
محمد غالية 
همس
زمردة 
احمد سوووو
بت خيخة واى كلام
قلب مصرى  
رندا
صبرنى يا رب  
نهر الحب 
هى فوضى 
اهوده عيبه
زهرة الجنة  
وطبعا كل زوار مدونتى وجيرانى المدونين 
اشربوا بالهنا والشفا
كل سنة وانتم طيبين 
وعيد سعيد عليكم وعلى الامة الاسلامية جميعا
ومبروك عليكم خروف العيد