20 يونيو 2008

القمر اسمه ايه ؟؟

تحديث اخير

البقــاء لله

توفى والد الاخت العزيزة صاحبة مدونة حنين القلب

نسالكم الفاتحة

تحديث تانى

**********

الاخت الرائعة سومه نزلت البوست ده ردا على بوست

مذكرات زوج

تحديث

خبــر عاجـل

======

اليكم هذا الخبر والحاضر يعلم الغايب غدا باذن الله تعالى سوف يتم نشر بوست مذكرات زوج فى مدونة فرنسا والرايق السيدات يمتنعون والرجال عايزكم تشجعونا لحد الصبح ويا خوفى يا بدران منكم .

=================

اخوانى واخواتى المدونين :

طبعا وحشتونى ودايما بتوحشونى ولكن ظروف غصب عنى بتخلينى مش مركز فى التدوين الفترة الماضية منها ظروف العمل وظروف عائلية لكن بما ان التدوين اصبح ادمان فأقر وأعترف انى مدمن حتى النخاع لذلك برغم انشغالى مقدرش ابعد كتير ولازمن ولابد انى اتابعكم باستمرار.

ومن هذا المنطلق اود ان تشاركونى افراحى واحزانى وكذلك عايز رايكم فى مواضيع كتيرة قوى منها ما هو شخصى ومنها ما هو عام

الموضوع الشخصى :

ان شاء الله اخويا الصغير ربنا ايكرمه ببنوته زى القمر الاسبوع القادم وبما اننى الاخ الكبير فمطلوب منى اختيار اسم للمولودة القادمة باذن الله انا فى دماغى اسماء كتير اقولكم عليها وانتم تضيفوا او تختاروا من بين الاسماء المذكورة عايز مشاركتكم وتفاعلكم والاسم الفائز ليه جائزة كبيرة كيس اسبوع بحاله وممكن صينية فتة كمان اعتقد الجائزة تشجع انكم تشاركوا فى الاستفتاء مش كده

الاسماء المقترحة من العبد لله

تسابيح - اهلة - تسنيم - حنين - شهد - فجر - غيداء- رهف -جنى - رويم - بيسان - أناهيد - رواء- سوار- جمانه-ليساء -ترنيم - ود - ميلاء - هديل -نغم

كفاية كده عليكم وابدعوا فى الاضافة .

البوست القادم ايكون عن مناقشة اراء ومقترحات البوست السابق مجرد فكرة من خلال وجهات نظر مختلفة

اشوفكم صدفة .

12 يونيو 2008

مجرد فكرة

اصبح عالم التدوين عالم واقعى وليس افتراضى كما كنا نظن فى بادىء الامر فمنذ حفل توقيع العدد الاول لكتاب مدونات مصرية للجيب ( مشروع وطن ) والتعارف بين المدونين وروح المودة والالفة التى جمعت بيننا كمدونين ومدى السعادة والفرحة التى انتابت كثيرا منهم بمعرفة اشخاص واصدقاء يكنون لهم قدر كبير من المودة والاحترام مما ادى الى عقد لقاءات متتالية ومقابلات وتجمعات كثيرة ومنها على سبيل المثال اللقاءات الدورية على مقهى البورصة لشخصيات جديدة فى عالم التدوين وكذلك الاجتماع النسائى بنادى الزراعيين التى تولت الدعوة له الاخت العزيزة نوران الشاملى صاحبة مدونة بت خيخة واىكلام وكم كان الاجتماع جميل وتم التعارف على شخصيات جميلة فى عالم التدوين وكم كانت السعادة فيما بينهم بهذا التجمع وده كان واضح من خلال التدوينات التى تحدثت عن هذا التجمع الجميل .
كذلك الفكرة الرائعة التى تبناها اخى وصديقى محمود صاحب مدونة رئيس جمهورية نفسى فى انشاء مدونة جديدة باسم العدالة للجميع لمساعدة الاخوة المدونين فى حل بعض المشاكل التى تصادفهم من الناحية القانونية باعتبار انه محامى طبعا .
وكذلك فكرة الرائعة والمتالقة دائما اختى العزيزة ابى هانم بانشاء مدونة بيكيا للبيع لمساعدة المدونين فى بيع الاشياء القديمة وغير المستخدمة على اعتبار انها الحج عبدالغفور البرعى فى وكالة البلح .
ومن هذا المنطلق وحرصا على زيادة الترابط الاسرى بين الاخوة والاخوات من المدونين وزيادة اواصر التواصل والود فيما بينهم هناك بعض الاقكار البسيطة لتحقيق جزء من تلك الترابط تناقشت مع بعض الاخوة بشانها واعرضها على حضراتكم للمشاركة فيها بارائكم ومقترحاتكم البناءة :
الاقتراح الاول:
-عمل اجتماع دورى وليكن شهريا لتجمع اكبر عدد من المدونين ومناقشة اهم القضايا التى تخص السواد الاعظم من المدونين على ان يكون الاجتماع بالقاهرة وفى بعض المحافظات التى بها تجمع كبير من المدونين لاتاحة الفرصة للتعرف على اكبر عدد من الاخوة المدونين .

الاقتراح الثاني:
- تنظيم رحلات مصيف جماعى للمدونين واسرهم ببعض المدن الساحلية خلال اشهر الصيف .
الاقتراح الثالث:
-الاعلان عن تنظيم حفل افطار جماعى فى شهر رمضان المعظم لكافة المدونين فى احد الاماكن التى تتميز بطابع اسلامى بحيث تكون وجبة الافطار فى متناول الجميع ( وممكن نفطركم على مائدة الرحمن فى الشارع )
الاقتراح الرابع :
- تنظيم رحلات دورية لزيارة بعض المناطق السياحية والمواقع التاريخية بمصرنا الحبيبة .
الاقتراح الخامس :
- عمل حملات دورية لزيارة بعض المستشفيات وخاصة مستشفى 57357 لعلاج سرطان الاطفال وتقديم بعض التبرعات النقدية اوالعينية او المشاركة المعنوية للاطفال المرضى وكذلك زيارة بعض دار المسنين وقضاء بعض الوقت مع كبار السن وتعويضهم الحرمان من زيارة ابنائهم وعقوق بعض الابناء واهمال المجتمع لهم وكذلك دور الايتام وذوى الاحتياجات الخاصة وقضاء بعض الوقت مع هؤلاء الاطفال وادخال السرور على انفسهم .
طبعا اضافة الى حملات التبرع بالدم التى تقوم بها المبدعة دائما الاخت العزيزة بت خيخة واى كلام واللى هى مش خيخة خالص بصراحة .
تلك مجرد افكار ورؤى بسيطة للمناقشة وفى انتظار اقتراحاتكم البناءة .
دمتم جميعا بخير...

تضامنا مع حملة لغتى ..هويتى

اضغط هنا

5 يونيو 2008

made in china

تحديث واجب
======
تهنئة قلبية للاخت العزيزة
بمناسبة عقد القران
الف مليون مبروك
وبالرفاء والبنين
=======
منذ ايام نزلت مول للكمبيوتر علشان اجيب جهاز كمبيوتر حديث للشغل فانتهزت الفرصة وجمعت جهاز يواكب تطورالعصر ويتماشى مع التكنولوبيا بالملوخية ،نزلت قلت نشوف ايه الموجود فى السوق طبعا لاقيت حاجات حلوة كتير بصراحة بس جاءتلى حاجة كده غريبة من الانبهار والازبهلال على شوية عبط ليه بقى.
كل ما امسك حاجة اقرا بلد الصنع made in china من اول المفعوص اللى بيسموه ماوس الى اكبر حاجة وهى الشاشة برده made in china ايه اللى بيحصل يا رجالة انا كنت عارف انه الكمبيوتر بيبقى تجميع من كل بلد حاجة مثلا الشاشة ماليزى او تايوانى وبعض المستلزمات كورى على صينى وكله ماشى .
لا دلوقتى من الالف للياء كله صينى اللهم لا اعتراض .
السؤال اللى محيرنى بجد!!!
المنتجات الصينية غزت العالم بشكل رهيب وكل حاجة تلاقيها مكتوب عليها صنع فى الصين
يعنى سجاجيد الصلاة صنع الصين يا مسلمين
فوانيس رمضان بتاعت وحوى يا وحوى صنع الصين
لعب الاطفال بكل اشكالها صنع الصين .
الاجهزة المنزلية والادوات الكهربائية من الصين .
حتى مندوبى المبيعات فى الشوارع من الصين .
بكرة قمر الدين والملوخية والبامية نستوردها من الصين
الحاجة الوحيدة اللى ممكن ما نستوردهاش من الصين هى الفول المصرى لانهم لو بعتونا فول مش بعيد نبقى زيهم ونخترع كل حاجة ومنتجاتنا تغزو اسواق العالم ونبطل نوم فى العسل .
سؤال غبى من واحد بياكل فول ازاى الصين وصلت لهذه المرحلة المتقدمة من التكنولوجيا والسيطرة على اسواق العالم ؟؟؟
الصين عدد سكانها يربو على المليار نسمة اصبحت قوة عظمى وليها حق الفيتو وحق بيع عيش الفينو كمان.
وتلاقى فى كل منزل مصنع تحت السلم او فوق السطوح بس مش زى مصانع الزبالة اللى عندنا وكل حاجة ليها اهمية ومفيدة عندهم وليها استخدام وممكن يصنعوا منها منتجات تبدا من الابرة للصاروخ .
كنا بندرس زماااان فى اولى كلية تجارة مبادىء الادارة من عوامل نجاح اى مشروع توافر 3 عناصر اساسية :
1- راس المال ( وده موجود فى مصر وعندنا اغنى اغنياء العالم اللهم لا حسد )
2- الايدى العاملة ( بسم الله ماشاء اكتر من الهم على القلب بنتكعبل فيهم على النواصى والمقاهى يشرحوا القلب الحزين عواطليه بالوراثة )
3- المواد الخام ( مصر غنية بمواردها الطبيعية والمواد الخام وجوها ربيع طول السنة كانوا بيقولوا كده فى الدراسات الاجتماعية فى ابتدائى واعدادى ولاهما غيروا المناهج وغسلوها بتايد ابو خمسين قرش )
الحمد لله كل العناصر متوفرة لقيام مشروع ناجح وقيام صناعات محلية تنافس المستورد الصينى .
طب يا ترى ايه السبب فى تخلفنا والسبب فى تقدم دولة مثل الصين ( طبعا الاسباب كتيرة بس بصراحة مش مقتنع بيها )
هى الصين ليها حضارة تمتد عبر الاف السنين والمصريين برده عندهم حضارة منذ الاف السنين .
الصين حافظت على حضارتها وريادتها ولم تتوانى او تتفاخر بحضارة منذ القدم ووقفت محلك سر .
احنا حافظنا على حضارتنا وبنفخر باننا احفاد الفراعنة بناة الاهرام وابو الهول
وبنغنى وبناة الاهرام فى سالف الدهر كفونى الكلام عند التحدى .
اى تحدى اللى بنتكلم عليه شوية حجارة وتماثيل وياريت بنحافظ عليها او بنستغلها صح لكن بنهربها ونسرقها او تتسرق مننا ومش بنعرف نرجعها كمان.
يلا ما علينا من التماثيل خلينا فى المساخيط قصدى فى المنتجات الصينية .
لا بجد الصين غزت العالم باجهزة تكنولوجية هائلة واصبحت قوى عظمى لها شانها فى زمن قياسى جدا بل سحقت دول عظمى وتفوقت عليها .
نعم المنتجات اللى موجودة فى مصر رديئة بعض الشىء وده مش عيب منهم العيب فينا بنحب نسترخص ونشترى بملاليم علشان نبيع بالملايين ونبقى رجال اعمال معاهم الملايين ومش مهم الجودة ومش مهم مصلحة الشعب ما هو كله ماشى .
يا ترى امتى انصحى من النوم ونلحق بركب الامم المتقدمة ؟؟؟
تعرفوا انا خايف يوم اقوم من النوم الاقى مراتى مكتوب عليها صنع فى الصين .
بس يا ترى ايبقى معاها كتالوج وقطع غيار ولا اللى هيتكسر يترمى و نجيب غيره !!!!!!!
واللهم لا اعتراض ..