4 مايو، 2009

كل سنة وانت ريسنا يا ريس


كل سنة وانت ريسنا يا ريس
عيد ميلادك الحادى والثمانون عيد لكل المصريين
واحد وثمانون عام يا ريس ربنا يزيد ويبارك منهم 28 سنة فى الحكم يا بلاش
مش عارف الناس بتحقد عليك ليه يا ريس بصراحة
يعنى ايه 28 سنة اكتر من المؤبد ب3 سنوات مع ان اللى بيتحكم عليه  مؤبد بيطلع بعد ثلاث ارباع المدة واحنا شعب محكوم عليه بالسجن مدى الحياة  جراء ما اقترفت ايدينا 
تصدق ياريس انت خسارة فى الشعب المصرىوعلشان كده انا هنصحك نصيحة لوجه الله تحرمهم من طلعتك البهية وتسيبهم فى غياهب الجب وظلمات اللحود
يا ريس ده شعب فقرى وعنده بطر على النعمة اللى فى ايده 
يا ريس اللى بيربى قطة وتمووت بيزعل عليها يا جدع
وانت كل يوم بيمووت من شعبك الاف يا راجل وانت ولا هنا
طب انا راضى ذمتك يا ريس اننا شعب حقود وعندنا قصر نظر
ايه رايك فى غضب الطبيعة على حضرتك ده النهاردة اليوم كله عواصف وتراب والجو يخنق سبحان الله حتى الطبيعة بتحتفل بعيد ميلادك  بركاتك يا ريس 
وبعدين علشان الواحد يروح الشغل يقعد ساعتين فى المواصلات فى طريق لا يستغرق اكثر من نصف ساعة فى وقت الذروة  وعربيات الامن المركزى والشرطة قافلة الطرق على الجانبيين وحضرات اللوازات  قاعدين  فى الشارع بزيهم الابيض الناصع اهو دلوقتى حريمهم هتطلب الخلع علشان هيروحوا كلهم طينة وهباب ومحتاجين قدعشرتاشر كيس اومو ابو رغوة   
عامة كل سنة وانت طيب يا ريس والعشرة ما تهونش علينا بس يا ريتها تهون عليك 
من عجائب الارقام فى عيد ميلادك يا ريس انك اتولدت فى 4مايو 1928 وليك 28 سنة فى الحكم  ،عيد ميلاك 81 ومسكت الحكم فى 14 اكتوبر  1981 
هل يا ترى النهاية هتكون مثل البداية ؟؟ نتمنى ذلك حتى تدخل موسوعة جينس 
سيدى الرئيس نتمنى لك عيد ميلاد مبارك
واحب اهديك تلك الاغنية الخالدة 

اخترناه اخترناه يومنا اسود وفلوسنا معاه
اخترناه اخترناه من اول عهده قفشناه
اخترناه اخترناه من اول كلمه عرفناه
اخترناه اخترناه وما في جيوبنا سلمناه

قولنا وقاله ما طول باله
وقفل للكاتب جرناله
واما يعاتب يلهف راتب
ماسمعناش عن حد هداااااه
علشان كده احنا اخترناااااه

ده هيديني ويرقيني
وفيه مصلحه بينه وبيني
ضرب رؤسكو ونهب فلوسكو
وبقولها ورزقي على الله
علشان كده احنا اخترنااااااه

كنا في زنقه وعوزه وخانقه
وديونا تكتيفه وزنقه
رسمو الخطه ونهبو الهبره
وسرقنا وباعنا وخلاااص
علشان كده احنا اخترنااااه
وفي لقاته بحرمياته
بينسى معاهم رسمياته
يفتح درجه وكل حبايبه
واكلين البلد وياااااااه
علشان كده احنا اخترنااااه
الاغنية عجبتنى قوى فنقلتها لحضراتكم

هناك 49 تعليقًا:

مهندس مصري يقول...

و علشان كده إحنا ما إختارناه
إبقى شوف البوست الجديد عندي و البوست القديم ده
مرتبط بأغنيتك
http://egyptioneng.blogspot.com/2007/10/blog-post_20.html
و هيييييييييييييييه

كيــــــــــــارا يقول...

ههههههههههههههه


والله ماعارفه ارد بايه

ربنا يهدي

************

ازيك ياخالد عامل ايه

mahasen saber يقول...

يا بوستاتك يا ابو همس اليي يقرا عنوان البوست ميشفش اليى فيه

وكله كوم و على جنب وحصيلة الارقام دى كوم

ضحكتنى بجد يا ابو همس
احنا صحيح مش وش نعمه والنعمه

أم أحمد المصرية يقول...

شعب جاحد صحيح الريس ضيع عمره عليه و بردوا مش عاجبه
اخي العزيز
حبقي ابعت لك عيش و حلاوة

بدراوى يقول...

اخترناه و باعيناه
من غير لجنة و لأ و أه
:-)

Appy يقول...

انا مخترتش حد والله العظيم والله على ما اقول شهيد
اه يا عميل يا خاين هههههههههه طيب مكنتش عاوزه اسيح لك بس وحياه الغالى لاعملها

حنين القلب يقول...

مييييييييييييين ده ؟؟

انا مش اعرفك
وانا اصلا جيت هنا غلط

حنين القلب يقول...

باشا
باشااااااااا
باشااااااااااااااااا

انا هعترف من اول قفا

ده اسمه خاااااااالد وساكن فى
بص يا باشا هبعت ليك كل اللى اعرفه عنك ومش تتعب نفسك ولا تضرب

بالمناسبه
كل سنه وانت طيب يا ريس
ويا رب دايما بصحه وخير

قفايا مش لعبه يا جدعاااااااااااااان

هههههههههههههههههههههههههههههههه

عاشقة الأحزان يقول...

السلام عليكم
أضم صوتى لصوتك
لالا تعليق
ههههههههههههههه
معتحياتى
بس ياترى حد ممكن يزورنا ويجيب لينا عبش وحلاوة
هههههههههه
تحياتى
إيناس

الفراغ يقول...

ايه ياهمس الكلام الكبير ده
والله ليك حق تقول اكتر من كدا
ربنا معاك..

MǿиY El-Shreef يقول...

ههههههههههههههههه

ربنا يرقيه بقى وينزل يحكم العالم السفلي :D:D

Abo 7anf يقول...

السلام عليكم
شكرا يمواطن

على راى ام احمد شعب جاحد
متخفش هنجبلك عيش و سدق

المعلم محمد صاحب المطعم - طعمية سخنة يقول...
أزال المؤلف هذا التعليق.
المعلم محمد صاحب المطعم - طعمية سخنة يقول...

يا عم بص لنص الكوباية المليان
بص شوف ......... ايه ده
الكوباية اتسرقققققققققققققققت

mohamed ghalia يقول...

لا ياعم مش هعلق احسن اتشد ههههههههههه

حياتى نغم يقول...

السلام عليكم / تعيش حضرتك وتفتكر ، تدوينة لذيذة وأخيراً عرفت الكلمات الأصليه للأغنيه .

yoyo يقول...

صباحك سكر
ايوه يا أبو همس تسلم ايدك و الله
طبعا طبعا كل سنة والريس معانا
هو احنا نقدر نعيش من غيره
دا زى الميه والهوا بالنسبة لينا
دا عشرة عمر اكتر من سخان اوليمبك ياراجل
ههههههههههه دا حتى شوف النهاردة الجو كان عامل ازاى
هههههههههههه

انا هاعترف على طول
و الله بريئة يا بيه
اهىء اهىء اهىء اهى ءاهىء
ايوه هو خالد
هههههههههههه

و صيتك العيال وابو العيال
مش تنسى العيش و الجنبة عشان مش بحب الحلاوة
هههههههههه

تسلم ايدك ربنا يحفظك يارب
تحياتى
يويو

عاشقه الرومانسيه يقول...

ياسيدى كل سنه وهو طيب بس بعيد عننا
ده ماسك الحكم من قبل مااتولد بسنه
قربت انا اتخرج من الدنيا وهو لسه على الكرسى
والله حاجه تخنق
افففف

حاجات جوايا يقول...

اخترناه طبعا يا ابو همس من غير بطاقة ترشيح
ههههههههههههههه

حد يقدر يقول غير كده ؟؟
احنا عندنا ولاد عايزيين يتربوا ههههههه

...........
من سنتين تقريبا قرأت قصيدة حلوة على مدونة اسمها ( ما يحكمشى)إهداء للريس
لما قرات كلماتك افتكرتها وعملت سيرش على جوجل وجبتها هههههههههه


اهى تبقى موسيقى تصويرية للبوست
هههههههههههههههههه



........



نظرا لأن النعمة فاقت حدها
ولأننا مش قدها
ولأن فعلا أنجازاتك
فوق طاقتنا نعدها
ولأننا غرقنا فى جمايل
مستحيل حنردها
نستحلفك ....... نسترحمك
نستعطفك .......نستكرمك
ترحمنا من طلعة جنابك
حبتين
عايزين نجرب خلقة تانية
ولو يومين
أسمع بقى
إحنا زهقنا من النعيم
ونفسنا فى يومين شقى
عايزين نجرب الاضطهاد
ونعوم ونغرق فى الفساد
بينى وبينك حضرتك
دا شعب فقرى مايستحقش جنتك
أنا عارفه شعب ماينفعوش
إلا شارون وبلير وبوش
عايز يجرب الأمتهان
ويعيش عميل للأمريكان
بيمد "غازه" لأسرائيل
ويومين كمان ويمد نيل
أهو يعنى نشرب مية واحدة
ندوب فى بعض
ماء وماء وماء
ونفض سيرة الانتماء
وبلاها نعرة وطنطنة
تبقى البلاد "مستوطنة "
(متسلطنة بالسرطنة)
إية اللى خدناه م الكرامة والإباء
حبة خطب وكلام...كلام إحنا راهنا على النظام ورضينا بخيار السلام
(بخيــــــــــــــار)
حنسد عين الشمس بيه علشان مايطلعش النهار
ويطلع لمين؟حبة معارضة مغرضين؟وحسب بيان السلطة شلة مأجورين؟
ياعم فضك سيرة وارضى بقسمتك دا شعب مش فاهم أكيد يالا أطرده من رحمتك
وإن كنت غاوى الحكم خليك مطرحك هغطس واقب وأعود بشعب يريحك راضى وعمره مايجرحك أخرس ومايسمعش وأعميلك عنيه
مش كل قرش يبص فيه مايقولش لأه /وفين / وليه يضرب ينفض فى السليم وعلى الصراط المستقيم كل اللى يعرف ينطقه عاش الزعيم يحيا الزعيم


وده لينك المدونة لأمانة النقل
http://mayehkomsh.blogspot.com/


وكل سنة وانتوا واحنا والمسلمين طيبين

مجداوية يقول...

السلام عليكم

ليه كده يا أبو همس
انت نسيت همس ولا ايه ؟

مش لازم التهنئة القلبية دي

ماهو عارف أن الشعب كله سعيد جداااااا

ومبسوط جداااااااااا

ومزقطط
مش حضرتك مزقطط

ومن زقططك تهت مع الفرحة

وقلت الكلام اللي يودي في داهية


واللهي لايقة
:)
:)

طيب نودي الحلاوة على البيت وعلى على الشغل

التورتة يعني

:)
:)

القلب الحزين يقول...

أخترناة أزاي بس
دة أحنا اتولدنا وهو ريس
كبرنا واتعلمنا وبرضة وهو ريس
وهنعجز ونموت وهو ريس
واذا كان عجبنا طبعا حد يقدر يكح
بس انا من أول قفا هختارة بلاا منازع طبعا
ههههههههههههههههههههه
وبعدين أحنا هنتطبر علي النعمة
عاش جلالة الملك يا يعيش يا يعيش
اةةةةةةةةةةةةةةةةةةة يابلد

على عبدالله يقول...

طاب اسيب بلدياتى ياكل عيش وحلاوة لوحده
ما يصحش
وكرهناه وكرهناه
من غير ليه او لا واه
:)

جنّي يقول...

السلام عليكم

ازيك يا عم خالد

ايوووه .. حلاوةايه وعيش ايه اللي بيقولوا عليها علي ومجداوية .. دول ها يفولوا عليك .. مش انت برضه تقصد الريس متقال .. ولا الريس بيرة ( اللي كان بيكتب اغاني عدوية )..

على كل اللي تعرف ديته اقتله وانت قلت اللي في نفسنا كلنا ودا ما لوش دية ..

همس الاحباب يقول...

مهندس مصرى
ههههههه
ماشى يا هندسة عيونى
حضرتك تقشر واحنا ناكل

همس الاحباب يقول...

كيارا
هههههههههه
ههههههههه
منورة يا كيارا
الحمد لله وربنا يستر
حاسس بحاجة مش كويسة
تحياتى

همس الاحباب يقول...

محاسن صابر
هههههههه
انا بقول كده يا ام بودى
احنا مش وش نعمة
ما تنسيش العيش والكباب

همس الاحباب يقول...

ام احمد المصرية
هههههه
بلاش حلاوة والنبى خليها جبنة او كباب
منورة اخت العزيزة

همس الاحباب يقول...

بدراوى
هههههههه
مبروك عليك الاختيار يا باشا
تحياتى واسعدتنى زيارتك

همس الاحباب يقول...

حنين القلب
اهو انتى بالذات اللى شجعتينى اعمل كده
وانا اعرفك عز المعرفة
ههههههههههههه

همس الاحباب يقول...

حنين القلب
ههههههههه
الجبن سيد الاخلاق
والجرى نص الجدعنة
هو انا هنضرب لوحدى
لا يمكن
بص يا باشا انا ولا اعرف اقول حاجة من دى
ده انا حتى معايا شهادة نحو الامية
هى البت دى اللى شجعتنى وكتبت البوست كماان
اى خدمة

همس الاحباب يقول...

ابى
ههههههههههه
ليه كده انتى ليكى كوكب لوحدك
مش تبعنا يعنى
ربنا ما يحرمك من خرفانك
ههههههههههه

همس الاحباب يقول...

عاشقة الاحزان
ههههههههه
كويس لقيت زمل اهو
اعتقد ان الندالة هتظهر فى المواقف دى ولا حد هيعرفنا
يلا ناخد العيش والحلاوة معانا
هههههههههه
منورة يا ايناس
تحياتى لحضرتك

همس الاحباب يقول...

الفراغ
هههههههههه
بلاش انتى يا ماما
خليكى بره
اهو حتى نضمن انه حد يطمئن علينا
ويبعتلنا لحمة وفتة ورز
ههههههههههههههه

همس الاحباب يقول...

مونى الشريف
تصدقى دى فكرة
ايه رايك ما تقنعيه بكده
هههههههههه

همس الاحباب يقول...

ابو حنف
هههههههههه
كلك واجب يا ابو حنف
منور يا دكترة

كيــــــــــــارا يقول...

ههههههههههههههههههه

لا خليها تويسه عثاني

ذكري رحبل قلم يقول...
أزال المؤلف هذا التعليق.
همس الاحباب يقول...

المعلم محمد صاحب المطعم
ههههههههههه
ههههههههه
متاكد انك جايب كوباية معاك
ربنا يستر على المطعم
نورتنى يا محمد

همس الاحباب يقول...

محمد غالية
سلامتك من الشدة
هو فيه شدة اكتر من كده
ربنا يستر

همس الاحباب يقول...

حياتى نغم
ربنا يبارك فى حضرتك
اسعدتنى زيارة حضرتك

همس الاحباب يقول...

يويو
هههههههههه
بقى كده
ولا اعرفك يا بنتى
ده انا حتى اول مرة اشوفك هنا
هههههه
ربنا يسعدك يا ستى وتنورينا دايما
تحياتى وتقديرى

همس الاحباب يقول...

عاشقة الرومانسية
وانا بقول هو لازق ليه
كله بسببك با دودو
لازمن كنتى تيجى كنتى اتاخرتى شوية كان زهق ومشى
هههههههههه

همس الاحباب يقول...

حاجات جوايا
هههههههههه
الله يكرمك هى فعلا كانت ناقصة موسيقى تصويرية
كده ضمنا العيش والحلاوة
هو مين اللى طفا النور يا جدعان
منور ة يا سالى
وربنا يحفظك من كل سوء
تحباتى

همس الاحباب يقول...

مجداوية
انا فعلا مزقطط ومبسوط
بس علشان خاطر التورتة مش حاجة تانية
ربنا يبارك فى حضرتك
تحياتى وتقديرى

همس الاحباب يقول...

القلب الحزين
هههههههههه
سلامتك من ضرب القفا يا باشا
ربنا قادر على كل شىء
كانت دامت لمين
كل من عليها فان
تحياتى

همس الاحباب يقول...

على عبد الله
تسلم يا باشا
ايوه كده الصعايدة والجدعنة والشهامة
فكرنى اعزمك على التكية مرة فى سوهاج
ههههههه
منور يا باشا

همس الاحباب يقول...

جنى
ههههههههههه
انا فعلا كان قصدى كده
بس اعمل ايه الناس فهمت غلط
يلا ربنا كريم وقادر على كل شىء
منور يا استاذ سعيد

همس الاحباب يقول...

كيارا
ههههههههه
خلاص تويسه علثانك يا عثل
سلامة سنانك
هههههههههههههه

همس الاحباب يقول...

ذكرى رحيل قلم
سبحان الله
كله فى علم الغيب
مفيش حاجة مستبعدة
سعيد بزيارة حضرتك
تحياتى