31 مايو 2010

لقاء عروس البحر - حديث الصور

تحديث 
بوست محتاج مشاركتكم جميعا عند بت خيخة واى كلام هنا 
**********
******* 
احيانا تمر على انسان لحظات يصبح فيها عاجزا عن التعبير عما داخله بالرغم من حالة النشوة والفرحة التى يعيشها ولا تطاوعه انامله لكى يصف تلك اللحظات النادرة ،ربما لان الفرحة جميلة بطريقة لا توصف وربما لان الفرحة كانت درب من الخيال وربما لان الفرحة ارتسمت على الشفاه وفى العيون فكان من الصعب التعبير عن فرحة العيون بكلمات صماء . لذا كانت الصور فى هذا البوست ابلغ من اى كلام فاخترت ان يقتصر البوست على بعض الصور من لقاء اسكندرية ربما عبرت اكثر منى عن جمال وروعة اللقاء الذى فاق الخيال فى روعته .
بداية الرحلة جولة سريعة داخل القلعة
برج القلعة من الداخل على هيئة مئذنة اعلى مسجد القلعة
احد ايوانات القلعة الاربعة على نمط المذاهب الاربعة
ارضية مسجد القلعة تحفة معمارية
صورة من الخارج للقلعة اثناء المغادرة
صورة البحر من اعلى القلعة
صورة من جانب القلعة لجمال البحر
تورت بمناسبة عيد ميلاد فاتيما  من مفاجات عاشقة الرومانسية ونانو هانم القدر... وانا

اشعلوا الشموع
لحظات تقطيع التورتة
وليد الدوغرى خلص على كل الاطباق مع انه اخر واحد وصل
ضياء ناوى يشترى الاتوبيس بدورين ويسكن فى الدور الارضى
اثناء التحرك لركوب المركب فى البحر
البحر من فوق سطح المركب

صورة بعيدة لمكتبة الاسكندرية اثناء الرحلة البحرية
عمر باشا منشكح بالرحلة داخل المركب 


شريف باشا ومصطفى ريان بص هنا يا مصطفى
اول مرة اشوف صورة مضلمة بالنهار كده تسلم ايديك يا مصطفى فنان من يومك
اليخت ده بتاعى

ناس بتبلط فى الميه وناس غرقانة فى شبر ميه

واقروا الفاتحة لابو العباس اسكندرية يا جدع ناس 

شكرا لكل من شرفنا بالحضور واضفى على جماله روعة وبهجة 
شكرا لاهل اسكندرية المارية طيبتهم وجدعنتهم 
شكرا لكرم الضيافة والجدعنة
شكر خاص لاهل اسكندرية  دودو وحنين القلب وعمر باشا ووشكر خاص لحنان على تعبها معانا ربنا يقومها بالسلامة وتشرفنا ومعاها رودينا 
شكر خاص جدا للاسرة الرائعة حقا استاذ محمد وريتشارد قلب القطة وابنهم مروان وميرهان شكرا جزيلا .
شكرا نانو هانم القدر وانا وبنتها واشرف ابنها شكرا  نبض اسكندرية وماى كورنر وبدراوى وهبة 
شكرا حنان الشافعى وانجى هات من الاخر والرائعة مى رحيق الورد وزهراء 
شكرا لاجمل صحبة سفر فاتيما . ضياء . شريف باشا . مصطفى ريان . وليد الدوغرى 
شكرا لكل من اهتم واتصل للاطمئنان علينا دكتور ة علا - دكتور ستيته - كيارا - ميرا - ندى الياسمين 
تفاصيل اللقاء بعيون اخرى 
يوم جميل وصحبة اجمل .. وليد الدوغرى
حضن الاحبة ... روح قلب ماما
صايع بحر ... قلب القطة

*************************************

تهنئة قلبية بمناسبة عيد ميلاد دكتورة علا صيدلانية طالعة نازلة 
كل سنة وانتى طيبة 
وعقبال مليون سنة الا يوم علشان الحسد يا دكتورة 
ربنا يسعدك ويكرمك فى سيف وشادن وتشوفيهم احسن ابناء فى الدنيا

27 مايو 2010

تفاصيل لقاء اسكندرية+ تحديث

تحديث 
***********
بالنسبة لمدونى القاهرة المسافرين يوم السبت 29-5-2010
ان شاء الله هنتجمع فى ميدان رمسيس امام عمارة رمسيس امام محل العصير اللى فى الميدان الساعة 7 صباحا وهنتحرك فى السابعة والنصف وهنستقل ميكروباص الى اسكندرية اللى عايز يسافر معانا فى انتظاره لحد 7.30 هيكون موجود ان شاء الله ضياء وفاتيما وريم ومصطفى ريان وفيه ناس هتركب متاخر وهتيجى على مكان التجمع فى اسكندرية 
بصفة عامة مكان التجمع هيكون فى بحرى عند قلعة قايتباى المكان معروف للجميع 
ولاى استفسار فيه رقم موبيل اخر البوست 
ان شاء الله نشوفكم جميعا على خير 
************************************
 
بناء على طلب الجماهير المطحونة وتلبية لمطالب الطبقة الكادحة من مدونى ومدونات مصر المحروسة اليكم  تفاصيل لقاء اسكندرية 
الميعاد : السبت الموافق 29 مايو 2010 
المكان : اسكندرية المارية 
الزمان : من العاشرة صباحا 
مكان التجمع : عند باب قلعة قايتباى بمنطقة بحرى بالاسكندرية 
التجمع بالنسبة لاهل اسكندرية وجميع القادمين من خارجها هيكون عند باب القلعة من العاشرة صباحا وحتى الحادية عشرة بعدها رحلة  قصيرة داخل القلعة ومشاهدة الامواج وصراعها مع الصخور من فوق القلعة بعدها ممكن نتأجر مركب و وناخد بيها بلطة فى البحر بعدها هنحس بدوار البحر وعصافير البطن بتنهق وتلبيه لتلك العصافير الجائعة هنروح على  مطعم الزعيم ببحرى لتناول الغذاء او اى مطعم اخر وبعدها ايس كريم من جيلاتى  عزة او من عند الشيخ وفيق بعدها يوم مفتوح على شاطى الانفوشى امام الشيخ وفيق حيث الرمال والمياه والامواج  .

من الاخر كده اليوم ترفيهى وكل اللى فى نفسه فى حاجة يعملها اللى عنده موهبة اللعب فى الطين  يعمل بيوت من الرمال والى عنده موهبة الشحاتة والتسول المتاخر هنسيبه قدام  القلعة يقلب عيشه واللى عنده موهبة العوم والغطس هناخد معانا طشت بزعانف للغطس 
واللى عنده رغى او حرمان من حنان الام  معانا فاتيما هانم خير من يقوم بذلك  يعنى مش هنحرمكوا من حاجة ابدا 
اضافة الى انكم هتشوفوا عمر باشا ومامته وخالتو دودو واخر جيل المدونات  مارو هانم قلب القطة وكل مدونى اسكندرية والقاهرة والاقاليم .
وطبعا لو كل ده اعتذر ولا يهمكوا كفاية انكم هتشوفونى وده فى حد ذاته لقاء ولا فى الاحلام ( التواضع مطلوب طبعا ) 
بالنسبة لمدونى القاهرة هناك عدة احتمالات للسفر 
الاحتمال الاول:اننا نأجر اتوبيس رحلات ذهاب وعودة وتنقلات داخل اسكندرية وهيكون التجمع السادسة صباحا فى رمسيس  وده فى حالة ان عدد المسافرين هيزيد عن 15 شخص يعنى اللى ناوى يسافر يا ريت يبلغنا قبلها بفترة .
الاحتمال الثانى اننا نتجمع فى السادسة صباحا ونركب ميكروباص من رمسيس وننزل محطة مصر وده فى حالة انكم عايزين نسافر مع بعض مجموعة .
الاحتمال الاخير : اننا نسافر كالمعتاد فى السوبر الجيت من موقف عبدالمنعم رياض ونركب الساعة السادسة صباحا.
فى انتظار مقترحاتكم بالنسبة لبرنامج اليوم
ولمدونى القاهرة فى انتظار اختيار طريقة السفر وسوف نوافيكم بكافة  تفاصيل السفر قبل السفر ب72 ساعة على الاقل 
يلا علشان تعرفوا انكم تعيشون فى ازهى عصور الديمقراطية 
اى خدمة انتم تقشروا واحنا ناكل 
لاى استفسار يمنكم الاتصال 
0101345140

15 مايو 2010

استكمالا لاعمال الخير + لقاء اسكندرية+ تحديث

 استكمالا لمشروع الصدقة الجارية 
الخبير الاجنبى والفريق الطبى المعاون له سوف يصل فى الثالث من يونيو القادم لاجراء عشرة عمليات غلق الثقب بين الاذين والبطين فى القلب بمستشفى ابو الريش للاطفال 
وقد تم مخاطبة جهات خيرية وبرامج تليفزيونية عديدة للمساهمة فى تكاليف العمليات العشر المزمع اجرائها 
لذا نناشد اهل الخير للمساهمة ولو بجزء بسيط فى تلك العمليات  فالمستشفى فى حاجة ماسة لشراء  جهاز غلق الثقب بين الاذنين بالقلب 
اسم الجهاز OCCLUTECH
وثمن الجهاز حوالى عشرة الاف جنيه  وسوف يستخدم بواسطة خبير اجنبى لاجراء عشرة عمليات مجانا لعشرة اطفالتبلغ تكلفة العملية الواحدة حوالى عشرة الاف جنيه اى باجمالى تكلفة 100000 جم ( مائة الف جنيه لاغير ) وسوف يتم اجراء العمليات مجانا
لراغبى التبرع يمكنهم التبرع بمكتب ا. د/ رشا عمار نائب مدير مستشفى ابو الريش للاطفال او ارسالها للاخت العزيزة بت خيخة او لى شخصيا وسوف يتم تسليمها لادارة المستشفى للمساهمة فى المشروع الخيرى .
وما زال التنسيق مستمر مع ادارة المستشفى لمعرفة اخر التطورات والمستجدات ومن المزمع عقد لقاء مع ادارة المستشفى وبعد الهيئات الخيرية قبل حضور الخبير الاجنبى والفريق المعاون له باسبوع  لتقييم حجم التبرعات ومعرفة الخطة المستقبلية فى ضوء حجم التبرعات المتاحة 
( ملحوظة ما وصلنى من تبرعات حتى الان مبلغ 1250 جم من عدد 2 من اهل الخير جزاءهم الله خيرا )

**************
************
تحديث هام
فيه واحد محتاج مساعدتكوا ياجماعة وهو ظهر فى حلقة الاربعاء 12/5 /2010 - من برنامج صبايا ومحتاج زراعة كبد وهو العائل الوحيد لاسرتة وامة المصابة بالجلطة ولدية اطفال وهو المسئول الوحيد عنهم بعد ربنا ... واخواتة متوفيين وهو المسئول عن امة المصابة بالجلطة ومحتاج زراعة كبد فى الصين لانة يعانى من تليف كامل ولا يستطيع الاكل او النوم حتى باليل ... واطفالة مساكين بيعانوا وبيعيطوا جنبة .. ومحتاج اى ايد تمتد لة بأى مساعدة ياجماعة الله يكرمكوا علشان الوقت مش فى صالحة .. فحاولوا تفرجوا عنة كربتة حتى يفرج الله عنكم ان شاء الله كربكم اللهم امين والمسلمين وانشر او اتبرع وشارك فى الخير كما قال رسولنا العظيم ومعلم البشرية جمعاء فى حديثة هذا :-أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله =
وعنوان البنك للتبرع :-
المؤسسة العامة للتكافل الاجتماعى
رقم حساب :- 122/1/32336
بنك مصر
ومن خارج مصر
s.code :-bmiseg / cx140
 
****************
*************
لقاء الاسكندرية القادم باذن الله تعالى 
يوم السبت الموافق 29-5-2010 
وسنوافيكم بكافة التفاصيل لاحقا

12 مايو 2010

تهنئة سريعة


تهنئة قلبية لكل من الاخت العزيزة / داليا قوس قزح 
بمناسبة عيد ميلادها 13 مايو

كل سنة وانتى طيبة وعقبال 100 سنة
************
تهنئة قلبية  بمناسبة عقد قران 
الاخت العزيزة شيماء سمير (  احتمال
14 مايو 2010

الف مليون مبروك وربنا يتمم بخير وعقبال الزفاف السعيد 
*************
تهنئة قلبية بعيد ميلاد الاخت العزيزة ريم ام كنزى
كل سنة وانتى طيبة وعقبال 100 سنة  
****************
تهنئة قلبية بعيد ميلاد الاخت العزيزة 
فاتيما ام يوسف 
( روح قلب ماما )15 مايو 

كل سنة وانتى طيبة وعقبال 100 سنة
كل سنة وجميع الاخوة والاخوات 
مواليد شهر مايو 
بخير وسعادة وعقبال مليون سنة 
عيد ميلاد سعيد للجميع 
ان شاء الله

6 مايو 2010

هام... وعاااجل


 
بناء على دعوة كريمة من الاخ الفاضل صاحب مدونة طهر فؤادك وجمعية الامل لرعاية مرضى السرطان بمحافظة سوهاج للمشاركة فى معرض الملابس لصالح مرضى السرطان فرع سوهاج  ادعو الاخوة والاخوات الكرام فى المشاركة لنشر هذا الموضوع على وجه السرعة كما ادعو الاخوة والاخوات من مدونى سوهاج للمشاركة الايجابية والتطوع فى هذا المعرض ولو سمحت ظروف العمل عندى سوف اكون من اول المشاركين باذن الله.
علما بان المعرض سيقام خلال الفترة من يوم الاحد الموافق 9-5-2010 ولمدة اسبوع ومواعيده سوف تكون من الحادية عشر صباحا وحتى السادسة مساء 
********************
إعلان هام
مطلوب متطوعين ومتطوعات لمعرض الملابس لصالح مرضى السرطان فرع سوهاج
السلام عليكم ورحمة الله وبركاتة
الموضوع مهم جدا جدا ياجماعة الله يكرمكوا ومحتاج مساعدتكوا على نشرة لان محتاجين متطوعين لمعرض الملابس الذى تنظمه جمعية الامل لرعاية مرضى السرطان بسوهاج بقاعة المؤتمرات بجزيرة الزهور ودخلة لصالح مرضى السرطان وياريت ياجماعة تنشروا الموضوع واى حد عارف حد فى سوهاج يبعتلة الرسالة او ابعت لاى حد ممكن يكون يقدر يشارك معانا فى معرض سوهاج من متطوعين ومتطوعات ومتخليش الرسالة تقف عندك علشان يبقى ليك مساهمة حتى ولو بنشر الخبر ...ضرورى ياجماعة مبقاش وقت خلاص المعرض قرب ان شاء الله ومدتة اسبوع فأنشروا الله يكرمكوا بسرعة ليعم الخير ان شاء الله والدال على الخير كفاعلة كما قال رسولنا العظيم ومعلم البشرية جمعاء فى حديثة هذا :-أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله
ومعلومات: الاتصال والتواصل للتطوع للمشاركة معنا فى المعرض الاتصال والتنسيق مع منسق الجمعية للمعرض عن طريق التليفون او الايميل
محمول: 0146044802
E.mail: g.elamal@yahoo.com

2 مايو 2010

البؤجة دى ... قديمة


 الحمد لله على  توفيقه ونعمه التى لا تعد ولا تحصى 
احساس غريب ينتابنى قبل اى لقاء اوتجمع تدوينى بالرغم من العدد الهائل من اللقاءات التى حضرتها ولكن احساسى قبل بؤجة الخير يوم الجمعة 30ابريل 2010 كان احساس مختلف تماما احساس انسان مقبل على امتحان ومستعد له جيدا ويكاد ان يكون متوقع الاسئلة الواردة فى ورقة الامتحان ولكن الخوف والقلق مسيطر على تفكيره وتصرفاته مما يجعله فى حالة اشبه بطالب الثانوية العامة يوم امتحان الفيزياء .
بدا اليوم معى مبكرا جدا وعلى غير عادتى ونزلت مسرعا  متجها الى موقف الترجمان بناء على رغبة اخى الكريم احمد K لانه نظرا لظروفه لم يستطع الحضور ولكن اصر على ارسال بؤجته كعادته دوما سباق بالخير وخاصة فى بؤجة الخير وفى طريقى الى الموقف جاءنى اتصال هاتفى من الاخ العزيز ابو حميد يسالنى عن الميعاد والمكان وانه فى الطريق الى هناك بعدها بثوانى جاءنى اتصال من السيدة الجديرة بكل احترام وتقدير الحاجة ام البتول وبتسالنى انت فين فبقولها انا فى الطريق الى رمسيس رايح الترجمان اجيب حاجة وراجع تانى قالتلى انا فى غمرة عشر دقايق واكون عندك  وبالفعل انتظرتها عند جريدة الاهرام وبكل كرم واخلاق منها وقلة ذوق منى تعبتها معايا فى الذهاب الى موقف الترجمان علشان نجيب بؤجة الخير اللى جاية من الغردقة نزلت اسال على البؤجة لقيت المسئول بيقولى العربية لسة واصلة من الغردقة وقدامها نصف ساعة علشان ننزل الحاجة ونراجعها ... نعم طب والست اللى قاعدة فى الشمس ما ينفعش اتصلت باحمد فى الغردقة اللى بصراحة تعب معايا بجد وكلم الراجل واقنعه ينزل حاجة بتاعته الاول قلت الحمد لله ذهبنا للعربية القادمة من البحرالاحمرولقيت الحبال والسلب المربوط بايدى الصعايدة محتاج عمنا جوجل ارث لفك الطلاسم وبداية الحبل من نهايته وبعد مجهود شاق توصلنا لفك الطلاسم ونزلنا البؤجة اللى اعتقد ان احمد باشا جمع بؤج اهل الغردقة وضواحيها برمالها وصخورها وحطها فى البؤجة لكن الحمد لله تم نقلها الى سيارة الحاجة ام البتول اللى بقت مخزن للبؤج بصراحة ربنا يكرمها ويجازيها خيرا 
واتجهنا الى مقر الجمعية وجاءنى اتصال من الاخ العزيز اللى رفع ضغطى بسؤاله عن مكان الجامع وجعلنى اصرخ بكل الجمل الاعتراضية .. يا لهوتى يا مانت مش عارف المكان ومال الناس الجديدة تعمل ايه والاخ العزيز ده كان الاستاذ ضياء وبصحبته الاخت ميرا ودول من اكتر الناس اللى شاركوا فى حضور بؤج الخير السابقة وبيقولوا انهم تايهين يا لهوتينى على البشر .
بعدها اتصل الاخ العزيز والوافد الجديد احمد الارموطى وصفتله المكان وقولتله هناك هتلاقى فاتيما وشريف وضياء وابو حميد وميرا واحنا جايين فى الطريق 
بتصل بفاتيما ام يوسف بقولها اكيد انتى وصلتى من بدرى قالتلى لا انا لسه فى المترو .. نعم ايه اللى بيحصل يا جدعان فاتيما اتحسدت يا رجالة وجاءت متاخرة ومش هقول على السبب وانها تاهت فى المترو رايح جااااااى .. عدى الجمايل لسه التقل ورا .
وصلنا الحمد لله الى مقر الجمعية وبدا التوافد الكريم من الاخوة والاخوات المشاركين كيارا هانم فى نيو لوك جديد لدرجة ان شريف بيقولى فاتيما جاءت بقوله لا مش فاتيما دى مين طلعت كيارا والواد انصطدم يا جودعان وكان هاين عليه يكسر النظارة بس طلع العيب مش فى النظارة  بصراحة .. بعدها حضرت الست فاتيما هانم التايهة واتجهنا الى مقر الجمعية بعد احضار الجميع وتم نقل البؤج الى مقر الجمعية وانتظرنا حضور باقى المدونين .. حضرت سفيرة الصعيد وخير من يمثله ست الكل د/ علا صيدلانية طالعة نازلة وزوجها د / اشرف واولادهم  سيف وشادن وحضورهم اسعدنا جدا جدا
بعدها حضرت قوس قزح بصحبة زوجها واللى كنت عارف انها هتحضر علشان تجيب البؤجة وتمشى على طول نظرا لظروف طارئة والحمد لله ادت المهمة وانصرفت مسرعة ولكن انا شرفت بالتحدث مع المهندس احمد اللى طلع شخصية رائعة جدا واخلاق فوق الوصف ااه انا صدعته شوية  بس سعدت بالتحدث معه فعلا الطيور على اشكالها تقع والطيبين للطيبات .
بعدها حضرت ست الستات ورقيقة الرقيقات بشهادة الجميع وتستحق عن جدارة ريم هانم واللى سعدنا بوجودها جدا .
بعدها حضر الاخ العزيز وليد كنج توت وزوجته وابنهما عمر ودول حدوتة لان وجودهم بيسعدنى دائما وبحس بالفة تجاهم نظرا لوجودهم المميز .
طبعا جلسنا نحن معشر الشباب على كوفى شوب اسفل الجمعية وتركنا المدونات فى مقر الجمعية جلسنا سويا نحتسى الشاى وشرفنا بالحضور الاخ الكريم مصطفى ريان واللى دار النقاش حوله لانه مشروع كاتب عالمى وسيصبح يوما من المشاهير ولو حدث هذا فسوف يتبرا منا ويتناسى تلك الجلسة وتعالت الضحكات من الجميع .
بعدها توجهنا لصلاة الجمعة فى مسجد قريب وكان خطيب المسجد متناقض بعض الشىء فى خطبته وكان يدعونا الى عدم ضرب الزوجة على الوجه مع التصريح الضمنى بضرب الزوجة لكن بعيد عن الوجه  يعنى ممكن نكسر ايدها ورجلها ورقبتها كمان بشرط يكون بعيد عن الوجه افادكم الله يا شيخنا ساطبق نصائحكم قريبا هههههههه.
ثم توجهنا الى نادى المحامين وجلسنا وقت ممتع جدا جدا وتوافد علينا الاخ الغالى جدا وليد باشا هى وظروفها اللى حسيت انه هيختفى قريبا من كتر النحافة وحضرت معاه الرقيقة الست منونة .
بعدها حضر تؤام روحى وحبيب قلبى سووووو باشا اللى ظبط الشماسى والقعدة بطريقة مهندس الديكور بعدها حضرت الست رغدة هانم اللى حسستنى ان البلد لسه فيها ستات رجالة .
اخر الوافدين الاخ العزيز عادل اللى  حسيت انه  مش فى المود وكان مختفى الفترة الماضية .
كلمتين وبس 
ام البتول وابنتها البتول  شكرا لتعبكم جدا حضوركم اعطى لليوم مذاق خاص ولا ازكيكى على الله فانتى سيدة جديرة بكل احترام وتقدير وده انطباعى من اول لقاء شفت حضرتك فيه .
ابو حميد : اخلاق وشهامة اولاد البلد الجدعان ربنا يكرمك والف سلامة على عمر يا ابو عمر 
شريف باشا : رجل بمعنى الكلمة طيابة متناهية جدعنة ما حصلتش كوكتيل عجيب من كل الصفات الحميدة ربنا يسعدك ويكرمك وخلى بالك من صحتك وخف السجاير والقهوة 
ضياء : عقدتنى بطولك بس بحبك يا خى وبحس ان بلدنا لسه فيها طيبة وخير 
ميرا : دايما عاملة مشاكل واستفزت مصطفى ريان لدرجة الواد كان هينهار من النرفزة بس طيبة وغلبانة وبنتنا برده .
الارموطى : سعدت بوجودك جدا انت شخصية طيبة ومحترمة جدا اعتقد انك عرفت الطريق وسكوتك ده طبيعى لانه اول لقاء .
مصطفى ريان : مشروع كاتب عبقرى وانسان رائع وطيب بس مع الاسف خايف عليه من الوحوش الادمية وقسوة الحياة لان طيبته زائدة عن الحد ربنا يوفقك ويصلح جميع احوالك .
دكتورة علا وزوجها واولادها :ربنا يبارك فيكم ويسعدكم دائما ناس صافية من جواها وبترى الناس حلوة وجميلة اسعدنا وجودكم بجد ودائما سباقين بكل خير 
ريم هانم : مخلوقة معجونة رقة واخلاق تحس أنها من كوكب آخرربنا يبارك فى حضرتك وتفرحى بكرما وكنزى .
كيارا : بنوته من الزمن الجميل تتمنى انك تشوف بنتك او اختك فى  اخلاقها وطيبتها ربنا يسعدك ونشوفك اجمل عروسة قريبا .
وليد هى وظروفها : كنت هزعل جدا لو مجتش لانك شىء اساسى فى اى لقاء ربنا يسعدك ونشوفك فى الكوشة قريب بس نصيحة بلاش تعزمنى ما نضمنش الظروف يا عم الحج وبعدين العروسة تشوفنى وتخلع تبقى مشكلة انا خايف على البدلة بصراحة هههههههه.
منونة : اخلاق وعقل واحترام بنات  مصر اللى بنفخر بيهم دائما 
رغدة طرطشة : ههههههه بموت على نفسى من الضحك لما بتخيل منظرك انتى وشريف وسواق التاكسى بس بجد انا متضامن معك .
فاتيما : طبعا مش هتكلم عنك لان الكل عارف انتى ايه وبعدين انا زعلان لانك ما نزلتيش بوست لكن كل مرة اشوفك اكتشف فيكى حاجة جديدة وكفاية حركة المصاصات بتدل على انك ام عظيمة لاى حد حتى لو كان شحط ( شرير جدا وشردة بس متخافيش انا الوحيد اللى اخدت بالى ) هههههههههه ربنا يسعدك بيوسف وتشوفيه احسن واحد فى الدنيا وبعدين بلاش تسيحى لاخوكى علشان غلطة مطبعية فى تعليق بلاش تبقى قطاعة ارزاق .
شكرا خاص لكل من حضر وشارك معانا فى نجاح يوم البؤجة 
شكر خاص للاستاذ احمد K وتعبه معايا وفى انتظار حضورك ان شاء الله 
شكر خاص لدودو عاشقة الرومانسية وحنين القلب على اتصالهم ومشاركتهم المعنوية الدائمة .
افتقدت وجودهم كثيرا ..
رحاب كوكب ابى ربنا يسعدك وترجعى بالف سلامة 
خيخة : طلعتى خيخة كبيرة واتصلت بيكى لانى عارف انك مش جاااية لعل المانع خير
احمد سكر : ربنا يكون فى عونك.
اهل بورسعيد الباسلة : ابو خالد- ماما امولة - ايناس نهر الحب ونسمة ومحمد ابو عجيلة  ربنا يطمنا عليكم ويتم شفاكم على خير افتقدتكم كثيرا .
الحاضر الغائب دكتورة ستيته شكرا على اتصالك وتشجيعك الدائم ربنا يطمنا عليكى بس محتاجين نتعلم منك كتير وكتير بلاش تبخلى علينا ربنا يكرمك .
استاذ عبدالجليل : ربنا يطمنا عليك  ونشوفك قريبا ان شاء الله .
د/ احمد عبدالعدل واستاذ احمد كمال كان ينقصنا تواجدكم جدا 
 جزاكم الله خيرا وجعله فى ميزان حسناتكم
وكل بؤجة خير وانتم طيبين  
*******
اللقاء القادم هيكون فى اسكندرية ان شاء الله نهاية شهر مايو الحالى
هتكون فيه مفاجات سارة للجميع