30 مارس 2009

مذبحة .. بلا دماء

حقا انها مذبحة بالغة  البشاعة  ولكن بدون نقطة دماء
انها مذبحة تجريف وتدمير 500فدان قمح بمنطقة الكوامل بمحافظة سوهاج


نشرت جريدة الأهرام في عددها الصادر يوم الخميس 26 مارس 2009 خبراً كارثياً عن قيام محافظة سوهاج بتدمير500 فدان منزرعة بالقمح بعد أن صدر قرار بإزالة الزراعات‏,‏ وبدأت الجرافات التنفيذ قبل شهرين فقط من حصاد محصول القمح المخضر في الأرض‏!‏. مخلفة بهذا التدمير خسائر حجمها 15‏ مليون جنيه فضلاً عن سحب الأرض من المزارعين في منطقة الكوامل بالطريق الصحراوي الغربي بسوهاج مع رفض مسئولي المحافظة منح المزارعين مهلة شهرين حتي يتمكنوا من جني المحصول‏,‏ كما أصروا علي رفض طلبهم بتقنين أوضاعهم‏,‏ أو تأجير الأرض لهم حتي يأتي جهاز مدينة سوهاج الجديدة لتنفيذ المشروعات الخدمية عليها‏.
ودافع الدكتور أبوالقاسم زهرة وكيل وزارة الزراعة بسوهاج عن الحملة التي قامت بها المحافظة ضد هؤلاء المزارعين‏,‏ قائلاً أنهم تعدوا على أراض مخصصة لمشروع إبني بيتك وكان يجب إخلاؤها لتسليمها لأصحابها
ده كان ملخص للخبر الذى تم نشره ‏بجريده الاهرام
والسؤال الملح فى الوقت الراهن وبغض النظر عن الوضع القانونى والروتين
اين كانت الاجهزة المعنية بمحافظة سوهاج عندما تم الاعتداء على تلك الاراضى ؟؟؟
لماذا تركتوهم يقومون باستصلاح الاراضى الصحراوية ؟؟؟
لمصلحة من تلك المذبحة البشعة ؟؟؟
لماذا لم تنتظر المحافظة حتى موعد الحصاد ؟؟علما بان موعد الحصاد باق عليه اقل من شهرين
نفترض جدلا ان من قام يالزراعة تعدى على املاك الدولة واراضيها لماذا لم تقم المحافظة بمصادرة المحصول لصالح الدولة مثلا
ما الفائدة من تدمير تلك الزراعات ؟؟
اكاد اجزم بان الاراضى لو تم زراعتها بانواع من المخدرات والبانجو لتم تركها
الموضوع بحتاج اسئلة عديدة واجابات شافية
ولكن مهما تكن الاجابة فالنتيجة كارثة بكل المقاييس،، فمصر من اكثر الدول استيرادا للقمح
ناهيك عن نداء الدولة وسياستها وتشجيعها لاستصلاح الصحراء وزراعتها  
هل يعقل بعد كل هذا المجهود وبعد ان وصلت الارض لمرحلة الانتاج يتم تدميرها بهذه الطريقة لكى يتم انشاء مشروع ابنى بيتك
اين هو تلك البيت مع العلم ان البديل موجود لقيام تلك المشروعات
ماهذا التناقض الغريب فى استصلاح الاراضى الصحراوية فمن تخصص لهم اراضى للزراعة يقومون يالبناء عليها ومن يقوم ياستصلاح الصحراء وزراعتها نقوم بتدميرها
الى متى تظل تلك الفوضى بمحافظة سوهاج ففى العام الماضى تم تشريد اكثر من 1200 مواطن وتم سحب 4000 فدان مزروعة لانشاء مطار سوهاج مع ان البديل ايضا موجود فى اماكن كثيرة بصحراء سوهاج
يا سادة انتم تعلمون ان سوهاج من اكثر المحافظات طردا للسكان لمحدودية الرقعة الزراعية بها
ومع ذلك يلجا ابناءها الى استصلاح الصحراء وزراعتها لزيادة الرقعة الزراعية
واعتقد ان مصر فى حاجة ماسة لكل شبر من ارضها فى الوقت الحالى
وفى حاجة ماسة الى كل جرام من القمح التى تستورده بالعملة الصعبة
لماذا هذا السفه والجنون وتدمير كل ما هو اخضر لمصلحة من يتم هذا على مسمع ومراىء من السادة المسئولين
ان ما حدث لتدمير القمح المصرى فى سوهاج لكارثة ووصمة عار فى جبينكم ايها المسئولين
وحسبى الله ونعم الوكيل

هناك 30 تعليقًا:

حنين القلب يقول...

اول تعليق

هقرا وارجع

حنين القلب يقول...

حسبنا الله ونعم الوكيل

والله ما عارفه اقول ايه؟؟
بس اكيد اللى بيحصل ده لمصلحه حد من الكبار وبعدين ده اللى بيحصل دايما

انا متهيألى انهم اصلا عايزين يدمروا البلد مش يصلحوها

وبعدين هى فارقه مع مين محتاجين قمح ولا مش محتاجين
ولا ناس تعبت واستلفت علشان تزرع ويجى قبل الجنى بشهرين يجرفوا ويضيع مجهودهم

بجد انا مخنوقه من اللى بيحصل
ولازم يكون فيه حل بقى
قرفنا من اللى بيخربوا
قرفنا من عمال يكسب من وراه خراب البلد

حسبنا الله ونعم الوكيل

حنين القلب يقول...

خالد

المهم حد من الاسرة الكريمه ليه دخل فى الموضوع ده ؟؟

اتمنى تكون الكارثه دى بعيد عنكم

وربنا معاهم

الفراغ يقول...

اسمحلى اغير العنوان
انه مزبحه على شرف دماء ابناء الوطن
انا كل يوم بحتقر نفسى
احنا ساكتين ليه..ليه راضيين عن حكومه بالشكل العفن ده
واهالى سوهاج ليه سكتوا..ليه معملوش زى اهالى دمياط واوقفوا هذه المذبحه
ليه ماباعتوش استغاثه لرئيس الجمهوريه
هانعمل ايه اذا كان بلدنا كدا مافيهاش حد بيفكر من المسئولين فى صالح هذا البلد
المهم عندهم بس ينفذوا اوامر تخدم مطامعمه فى رضا الاعلى منه..وهو مايعرفش ولا واخد باله ان فى اعلى واعلى وهو الله سبحانه وتعالى الاعلى منه ومنى ومن الللى بيخدم اغراضهم
واولا واخير ..حسبى الله ونعم الوكيل
وللاسف انى اكتب هذا الكلام لكى اريح ضميرى فقط..ولانى لن افعل شيئا لهذا البلد..فانى برضه.. ضميرى مش مرتاح انه ينزف دماُ

mahasen saber يقول...

بئه بعد ده كله والمواد المسرطنه بذمتك يا استاذ خالد فيه حاجه فى بلادنا اسمها وزارة زراعه

ولاا فيه قوانيين تجرم تبوير الارض الزراعيه

حسبى الله ونعم الوكيل
نسيوا حديث الرسول اليى بيحثنا على الزراعه والغرس

وبعدين القمح ده افهم انا جريمته ايه

مجداوية يقول...

السلام عليكم


يا سلام على الذمة
يا سلام على الانضباط

ده ايه الناس اللي عندها ضمير دي
بقى بياخدوا الأرض ويهلكوا الزرع عشان متعديين على أرض مخصصة لابني بيتك

ياسلاااااام أهو كده اليقظة

طيب حنفترض متعديين ايه ذنب الزرع واهدار ملايين اتصرفت في استصلاح الأرض طيب ما يخلوا الفلاحيين دول يشتروها انما يهلكوا الزرع!! ده افساد في الأرض
قولهم باطل يراد به باطل


و ينطبق عليهم قول الله سبحانه وتعالى في سورة البقرة :

وَمِنَ النَّاسِ مَنْ يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللَّهَ عَلَىٰ مَا فِي قَلْبِهِ وَهُوَ أَلَدُّ الْخِصَامِ (204)
وَإِذَا تَوَلَّىٰ سَعَىٰ فِي الْأَرْضِ لِيُفْسِدَ فِيهَا وَيُهْلِكَ الْحَرْثَ وَالنَّسْلَ ۗ وَاللَّهُ لَا يُحِبُّ الْفَسَادَ (205)
وَإِذَا قِيلَ لَهُ اتَّقِ اللَّهَ أَخَذَتْهُ الْعِزَّةُ بِالْإِثْمِ ۚ فَحَسْبُهُ جَهَنَّمُ ۚ وَلَبِئْسَ الْمِهَادُ (206)


صدق الله العظيم

يارب توب علينا يارب

mohamed ghalia يقول...

حسبنا الله ونعم الوكيل
لا تعليق

عمرو جويلى يقول...

همس الأحباب
السلام عليكم
بلدنا بينها وبين التخطيط بلاد
شوفت مثل بيقول الهايف بيجيى فى الهايفة .......
ما هذا السفه
يا أستاذ خالد أنا أجزم بأنه لو فيه حد بيحاسبهم ما كانوا أقدموا على مثل هذه الخطوة
وحسبن الله ونعم الوكيل

حاجات جوايا يقول...

لصالح أصحاب مشروع ابنى بيتك طبعا
مش مهم خالص شقا المزارعين وتعبهم وانتظارهم لجنى المحاصيل والعيش والربح منها
المهم المليارات اللى هتدخل جيب طابور المرتشين من مشروع ابنى بيتك
قمح ايه بس
دى لو الارض مزروعة بنى آدميين هيجرفوها برضه

حسبى الله ونعم الوكيل

صبرني يارب يقول...

كنت لسه باتكلم فى الموضوع ده امبارح انا ورضا والله

فعلا مسخره

الى مجنني بجد ان الصحرا هناك بالشمال واليمين

اشمعن الى اتزرعوا دوووووووووووووووول

وبعدين يعنى ما اراضي الدوله متسلكه من كل ناحيه شويه

شوره جاز والله العظيم

حاجه بقت تقرررررررررررررررررررف

الربان يقول...

تحياتي اخي الكريم

هذه المشكلة اعتقد انها اصبحت متكررة ليس فقط في سوهاج و لكن ايضا في مناطق اخري.

و تسمع تبريرات لهذا الحل العقيم الذي
يسارع اليه اي مسؤول فيأمر بالتدمير
و التخريب...لانه الحل الاسهل.

في رأيي اننا نحتاج الي مسؤوليين تنفيذيين مثل المحافظين و رؤساء المدن
اقول مسؤولين لهم رؤية و جرأة في اتخاذ القرار...ان ينظروا للمشكلة من مناظير
مختلفة و من جوانب متعددة...

اضعف الايمان: ترك المحصول لمدة شهرين..
يستفيد المزارع و أيضا الدولة لان المحصول سيقلل من كمية استيراد الدولة
من القمح...و يوفر عمله صعبه...
كما ان مراعاة و رعاية المحصول تتطلب قوي عاملة يعني هايحد من البطاله....

لكن علي ما يبدو ان المسؤول اخذ بالاسهل....


انها أزمة إدارة....،هكذا اري ، ان مشكلتنا في مصر هي نقص الكفأة في
الادارة... واقصد الادارة العلمية
و الابتكار و التجويد...

تحياتي و تقديري اخي الكريم

Empress appy يقول...

انت بتقرى الاهرام يا خالد خسأت يا راجل
حد يقرا الكلام ده
طيب علشان هو فى الاهرام مش هصدقه ها بقى

بنت الصالحين يقول...

لمصلحة من لمصلحه من؟؟؟

هههههه


والله العظيم حاجه تحرق الدم

انا كنت بعيد عن التدوين والمدونين بسبب الامتحانات
طلعت من شرنقتي علي كارثة
جيت مدونتك لقيت كارثة ابشع

لاحول ولاقوة الا بالله


هو ايه ده

مفيش حد يقفلهم دول ولا ايه

ال يافرعون ايه فرعنك .....

Kiara يقول...

دي مجزرة بجد

ايه الهبل دا

حسبي الله ونعم الوكيل بجد

mohamed يقول...

ناموا شهور
صحيوا ثوانى
انتفضوا دقائق
أنطلقوا كالفيضان
لماذا لان الارض زرعت قمحا
والقمح زراعته حرام حرام
لان القمح أذا طحن ينتج دقيقا
والدقيق أذا عجن أنتج خبزا
والخبز يأكله الناس
والناس أذا أكلت شبعت
وأذا شبعوا أمتلئت بطونهم
فأذا أمتلئت بطونهم أستعملوا عقلهم
وأذا أستعملوا عقولهم تكلموا وانتجوا
وتزوجوا
وبما أن القاعده منع المفاسد مقدم على جلب المنافع
ومنعا للكلام الذى يجلب الصداع والضوضاء
ومنعا للانتاج الذى يجلب النقود
والنقود وكثرتها تغرى بالفاسد
ومنعا للزواج الذى يجلب الذريه
التى تزيد السكان وتزيد الازدحام
قد صدر فرمان
بأقتلاع القمح الذى سيجلب كل المفاسد
زاد الله حكمتهم حكمه وعقلهم عقلا

Gannah يقول...

مش قادرة اصدق اللى بيحصل ده
ايه الغباء الحكومى ده؟؟
وليه اصلا ميملكوش الناس دى الارض بعد تعبهم فيها ..ما الارض بتتوزع يمين وشمال وببلاش على رجال الاعمال اللى مبيدوش اى انتاج وبيبعوها بعد كده باضعاف اضعاف تمنها
ميغيروا مكان مشوع ابنى بيتك..ايه المشكلة؟؟
بجد حسبى الله ونعم الوكيل فيهم
طب الناس تزرع ليه وتستصلح ارض ليه بعد كده؟؟
ولمصلحة مين اللى بيحصل ده؟؟
المفروض حاجة زى كده يتشال فيها المحافظ ووكيل وزارة الزراعة
احنا دولة بتشحت القمح يبقى ازاى ندمر محصوله حتى لو على ارض وضعها غير قانونى
الظاهر هنفضل نسأل ولا مجيب؟؟
وفين نائب مجلس الشعب فى المنطقة؟؟ وليه متحركش قبل الجرافات؟؟
بجد كل ما الواحد يقول فيه امل يعملوا حاجة تثبت ان طالما الحكومة دى موجودة يبقى مافيش اى امل
لنا الله
تحياتى

صبرني يارب يقول...

تعالى خد التاج

هع هع هع

رسيت عليك يا حلو

MǿиY El-Shreef يقول...

يااااااااااه

15 مليون

الناس دي عقلها فين .. هو مجرد تمشيه كلام وبس

والله حرام .. الرسول عليه الصلاه والسلام لو يوم القيامه قام وفيواحد ف ايده فسيله يزرعها

تقوم بكل سهوله كده تنجرف 500 فدان

حسبي الله ونعم الوكيل

اكيد الموضوع في انّ

ربنا يكون ف عونهم

..

متابعه ياخالد

Mony يقول...

فعلا و الله عندك حق حسبنا الله و نعم الوكيل

اظاهر و الله اعلم ان في ايد خفيه ضد القمح بالذات
شوية يعدموا محصول بكمية مهولة بحجة انه مسرطن
و شوية تانية بحجة انها من املاك الدولة


لا حول ولا قوة الا بالله

انا لله و انا اليه راجعون

رحــــيـل يقول...

لاء مسخره بجد هو مفيش حد عاقل كان يقف فى وشهم ويمنعهم

حرام بجد عليهم المحصول ده منهم لله حسبي الله ونعم الوكيل فيهم


خالص تقديري واحترامي

rtrcbh يقول...

السلام عليكم ورحمه الله وبركاته

السادة الأفاضل زوار مدونتي الأعزاء ، أساتذتي الفضلاء ، إخوتي من المدونين والمدونات ،أصدقائي الأعزاء
تحية طيبة وبعد
أتشرف بدعوتكم اليوم إلى زيارة مدونتي ( مدونة ادم ويحيى ) وذلك بصفتكم أحد الشركاء الأساسين فيها بآرائكم وتعليقاتكم على موضوعاتها وزيارتكم لها
لحضور ندوة بعنوان

( ادم ويحيى ، تجربة تدوين )

اليوم هو استفتاء على تجربة تدوين

اليوم نعرف من هو أبو يحيى وادم وكذلك ادم ويحيى من هم ومن والدتهم

اليوم نعرف حقيقة هذه المدونة وما هي رسالتها الحقيقة وهدفها

اليوم رسالة اعتذار لكم عن بعض الأمور

اليوم رسالة شكر من كل قلبي على أمور أخرى

اليوم استفتاء حول منهج مدونة ادم ويحيى

اليوم هو رسالة منكم لي حول ما طالعتموه بيوم من الأيام بهذه المدونة
فأرجوا أن لا تبخلوا على بتعليقكم على هذه ألتدوينه
في انتظار زيارتكم
والسلام عليكم ورحمة الله وبركاته
د/أبو يحيى وادم

Asmaa mahaba يقول...

خلاص يعنى جات على سوهاج اللى حتبوظ يا ابو همس
وبعدين انت معندكش بعد فكرى هم لما يجرفوا الارض ويبوظوها نبقى بنشجع الاستيراد والشحاته والشحات ليه نص البلد سوياسه حكومتنا يعنى

Unknown يقول...

خالد بجد لازم تجى
معقولة يبقى لقاء ومتجيش؟
يا عيب الشوم؟؟

جنّي يقول...

السلام عليكم

احييك اخي خالد على حسك الوطني فقليل من الناس من يهتم بهذا الموضوع أو يلقي له بالا ..

هل تعلم ان صندوق النقد الدولي واعانة امريكا تشترط عدم زيادة الرقعة الزراعية المخصصة لزراعة القمح ان لم تتقلص بفعل فاعل لاثبات صدق عمالتهم ..

دعواتك لي بتمام الشفاء ..

أمل حمدي يقول...

نعم كما قال جني دا مخطط لاذلال مصر بتخطيط صهيوني وللاسف بايدي مصرية

حسبنا الله ونعم الوكيل

فشكووول يقول...

ازيك يا همس يا حبيبى
والله وحشتنى جدا ووحشتنى مشاغباتك التدوينيه .. وخصوصا هذه المشاغبه

شوف ياهمس انا حااقولك على حاجه ... انت عارف من كتاباتى انى معارض للحكومه فى كل شيئ وانى مختلف معهم طول الخط . بس

عارف يا همس احنا شعب بنحب المخالفه وبنحب نعمل اللى فى دماغنا ... بمعنى ان اللى تعدوا على الارض وهما عارفين انها مخصصه لمشروع ما (اى مشروع) عليهم ان يتحملوا نتيجة مخالفتهم. هذا من ناحيه وانا لا استطيع ان اخطأ الحكومه فى قرارها الاستيلاء على الارض مره ثانيه.

لكن كان لازم برضه على الحكومه دراسة المشروع واعداد المكان الملائم له غير هذا المكان الصالح للزراعه وخصوصا انهم دائما يصرخون بعدم السماح ببناء الارض الزراعيه عشان محدودية الرقعه الزراعيه بمصر.

وكان لازم على الحكومه انها تترك الفلاحين حتى يجنوا محصولهم ويستطيعوا ان يفعلوا بهم ما يشاؤون كما فعلوا معهم هذه المره فلو ارادت الحكومه ما وقف امامها شيئ

او كان لازم على الحكومه على الاقل مصادرة هذه الزراعات لصالح الدوله عشان ما نخسرش ثروه قوميه تتجاوز كماقلت 15 مليون جنيه

طبعا انت عارف ضيق افق جماعتنا وانها بلد لا يتم فيها التخطيط لاى شيئ وكلها على الله .

تحياتى

م/ الحسيني لزومي يقول...

همس الاحباب
ادعو الله ان يستجيب لامنياتك وامنياتنا

----------
تفتكر اللي حصل في سوهاج وتجريف الارض لو حصل في دوله شعبها عند وعي كان عدي بسلام

Tamer Nabil Moussa يقول...

السلام عليكم

ازيك ياخالد اخبارك اية

---

انا قريت الخبر والمصيبة دى وحسبى الله ونعم الوكيل فى السبب فى كدة واللى ساعد فى تدمير الثروة دى

تحياتى

♥نبع الغرام♥♪≈ يقول...

السلام عليكم ورحمة الله وبركاته
تقبل مرورى أخى الفاضل الأول وليس الاخير ان شاء الله تعالى
وبصراحه قرءت الموضوع ده وأتأثرت قووى
وإن شاء الله ربنا يتقبل الدعاء
وحسبى الله ونعم الوكيل
تقبل تحياتى

عاشــــــ النقاب ـقــــة"نونو" يقول...

الى متى ؟؟؟لحد ما يبان لنا اصحاب
والله فيه مؤامرة ان البلددي تخرب
وحسبي الله ونعم الوكيل
تحياتي