27 مارس، 2009

يا اسكندرية يا


معلش اعذرونى على التاخير   انا دايما متاخر فى كل حاجة
وبصراحة مش عارف اكتب ايه عن اللقاء بعد اللى قريته فى البوستات اللى تحدثت عن اللقاء
بس صراحة اللقاء يستاهل انى اتكلم عليه لانه يوم من اجمل الايام لما تقابل ناس تحمل من الطيبة والكرم الكثير والكثير
لقاء اسكندرية يوم 24 -3-2009 تم بدعوة من العزيزة على قلوبنا جميعا  فاتيما روح قلب ماما بناء على طلب من هنودة علشان عايزة تشوفها  وطبعا احنا رحنا معاهم غتاتة
المهم اللقاء بدا حوالى الساعة السادسة صباحا بمقابلة الصديق الجديد هشام صاحب مدونة جعلونى مريضا نفسيا واللى حسيت انه انسان محترم جدا واخلاق وحسسنى  فى البداية انى اعرفه من زمان قوى وطلع ولا مريض ولاحاجة وبيشتغلنا يا جدعان
بعدها قابلنا فاتيما ومعاها ماجد اخوها واللى سعدت قوى بمعرفته وحسيت ان الاخلاق والجدعنة وراثة عندهم
ركبنا السوبر جيت واتجهنا الى اسكندرية اللى لسه راجع منها من اقل من اسبوع لكن حاسس انى  غايب عنها من سنين
طبعا وصلنا اسكندرية ورحنا نادى الاطباء كانت الساعة لم تتجاوز التاسعة والنصف  صباحا ووقفنا على الكورنيش فى انتظار الست الدكتورة لماضة هانم ومدونى الاسكندرية الاعزاء وطبعا الدكتورة لماضة خدتها نومة وجاءت متاخرة يا جدعان يلا هنشرد فيكم للصبح
طبعا اول الحاضرين من مدونى اسكندرية كانت عروسة الليلة وصاحبة الفكرة الست هنودة واللى كانت جاية  ومش عارفة لا فاتيما ولا حد من المدونين يا ولداه  وبخبرتى المعملية الفذة بقولها انتى مدونة تعالى اصل كان مكتوب عليها مدونة وتايهة فى الغربة  
ولسه بقولها اسمك ايه وبتقولى هند وبقولها دى فاتيما وعينك ما تشوف الا النور ولقيت بالاحضان يا بلدنا وزغاريد والمحاقظ باعت قوات الدفاع المدنى تفك الاشتباك اصلكم ما تعرفوش فاتيما اصبحت ليها شعبية ولا عبدالناصر ايام تاميم القناة  
المهم هنودة طلعت بنت بلد قوى وانسانة ملائكية  من جواها ومبتسمة دائما وده انطباعنا كلنا 
تانى واحدة جت كانت شيمو القمر صاحبة اعترافات قلب ودى اول مرة نتعرف بيها بنت زى القمر فى تفكيرها واخلاقها وخفة دمها اسكندرية بقى
بعدها جاءت مين يا جدعان مدونة مش عارف هى جاءت ليه اصلا مع انى كنت منبه عليها انها مش تيجى بس جاءت علشان تغيظنى  احب اقولها اه احنا عاملين زى توم وجيرى  بس بجد انتى انسانة طيبة جدا وجدعة جدا وبحس انك زى همس وعلشان كده بقولك ربنا ما يحرميكش منى وانا هجيبلك معايا مصاصة المرة الجاية علشان  تقعدى على جنب  تلعبى بيها يا ست حنين القلب
واخيرا ظهرت فى الافق دكتورة لماضة على سن ورمح  حسيت ان عرابى ماشى على الكورنيش يا جدعان بحصانه وبيقول لقد ولدتنا امهاتنا دكاترة وسع يا ياض منك ليه
وطبعا لماضة مش  محتاجة انى اوصفها بحاجة غير انها بنت بميت راجل
دخلنا نادى الاطباء وبدا التوافد التدوينى .جت  سالى مدونة حرووووف ربنا يكرمها وتبقى كلمات انسانة رقيقة وخفيفة الظل  وليها حضور مميز وجاءت  حنان الشافعى ودكتورة داليا ونبض اسكندرية ودول بصراحة ما لحقتش اخد اى انطباع عنهم غير انهم مبهورين ومش متعودين على اللقاءات لسه .
وبعد كده جاءت مين عاشقة الرومانسية اللى اتضح بعد كده انها عاشقة فاتيما مش الرومانسية وبس واللى طارت فى الهواء كده وارتمت فى حضن فاتيما ونسيت نفسها لمدة سنة كده ودى مش هينفع معاها غير قوات الامن المركزى لفض المظاهرة 
وعاشقة الرومانسية انسانة طيبة بلا حدود وعندها شهامة وجدعنة بتاعت ولاد البلد ايام الحرافيش 
وطبعا كان  فاكهة اللقاء احمد اسير الجراح واللى جه نورنا وانا سعيد جدا بمعرفته واللى وعدنا انه هينورنا فى القاهرة .
طبعا الجلسة تناولت حكايات وقصص التدوين واللقاءات وكده 
بعدها  اتجهنا الى بحرى علشان نقف على القمة بس مع الاسف ما لحقتش نقف معاهم لانى رحت  مشوار سريع ورجعت تانى
على بحرى علشان قررنا ان نرجع القاهرة بدرى علشان فاتيما
وقابلت مييييين يا جدعان زمردة والى كان ليها تار بايت عندى وعايزة تفجرنى بس على ميييييين يا خسارة ما لحقتش تخلص اى
حاجة عامة خيرها فى غيرها 
طبعا ما قدرش انسى الغائب الحاضر برسايله وبقلبه مهندس محمد اسكندرانى قوى اللى افتقدناه قوى وبقوله ربنا يوفقك ونلتقى على خير فى الاجازة 
وداليا قوس قزح اللى اصرت انها تشاركنا اللقاء بمكالمتها الرقيقة وتسلم على الحضور
وحبيب قلبى نجم الضاحكون والتدوين عبده باشا الرايق اللى ناوى يعزمنا فى السويس على حسابنا طبعا 
وكمااااان احمد سكر اللى كان قاعد فوق جناح الطيارة وبيكلمنا علشان يعرف احنا فيييييين وبيسال على الجميع معلش يا سكر
المرة الجااااية مش هسيبك لازمن تيجى معانا   
والغائب الحاضر فى قلوبنا بابا ابو خالد اللى كان نفسى يشرفنا بالحضور بس الظروف ما سمحتش وطبعا اتصل اكتر من مرة علشان يطمئن علينا
ولحد هنا كفاية عليكو قوى كده وكملوا هنا 
روح قلب ماما .... كنا هناك فى الجنة
عاشقة   الرومانسية ....لقاء السحاب
 إعترافات قلب ..... أجمل إعتراف
حنين القلب .... تصدقوا وحشتونى

هناك 58 تعليقًا:

اسكندراني اوي يقول...

ابو همس يا غالي
جميييل اوي اللقاء
ووصفك ليه واالحصل فيه
انا كان على عيني عارف والله لقائكم ده خلاني طول النهار اقعد افتكر ماقبلتنا اللي كانت برضه في اسكندريه
ربنا يجمعنا على خير
ودايما مجتمعين في الفرح والسعاده يارب

سلام والسلام امانه لوالدنا الاستاذ ابو خالد وقوله اسكندراني اوي واحشه حضنك اوي اوي

استودعكم الله ونشوفك على خير

عاشقه الرومانسيه يقول...

ايه ده؟
ايه التشريد ده كله؟


وبعد كده جاءت مين عاشقة الرومانسية اللى اتضح بعد كده انها عاشقة فاتيما مش الرومانسية وبس واللى طارت فى الهواء كده وارتمت فى حضن فاتيما ونسيت نفسها لمدة سنة كده ودى مش هينفع معاها غير قوات الامن المركزى لفض المظاهرة
****************************
طيب انا باعشق فاتيما بجد
عندك مانع
(وش بيطلع لسانه)

وعاشقة الرومانسية انسانة طيبة بلا حدود وعندها شهامة وجدعنة بتاعت ولاد البلد ايام الحرافيش
***********************
احم احم
(وش مكثوف)


والله انت اللى سكر ياخالد
والله كل واحد منكم محتاج يوم لواحده علشان نتعرف اكتر
ايووووه ياجدعاااان
اليوم فات هوا

يارب تتكرر

وحشتنى ياابو همس

أسير الجراح يقول...

يا خسارة مش لحقت تانى تعليق


ماشى يا عشقة سبقتينى


كدة بردو يا خلود


ماشى فكاهة اللقاء

هعديها

لكن المرة الجاية مش هعديها ابدا


تسلم يارب يا خلود


وبجد سعيد جدا بمعرفت حضرتك


وحشتنى موووووووووت



اسير الجراح

فاتيما يقول...

مين دا اللى جه غتاتة
دنا اللى رخمت عليك و تقريباً كدا عملت حركة إبتزاز عاطفى نتاوى عشان تيجى معانا أكمنك يعنى اخويا و المشوار دا كان هيبقى صعب و مخيف من غيرك ...
معاك بحس إنى ماشية مع ماجد اخويا تمام ...و الله و دون اى مجاملة
ربنا يخليك يا خالد و يكرمك قد ما بتكرم غيرك
و عقبال كل تجمع ما يبقى فى الخير و الفرح ...
خالص تحياتى يا اخى العزيز

مجداوية يقول...

السلام عليكم

اسكندرية نورت بيكم وربنا يديم صحبتكم الطيبة واليوم ده بالذات انا عديت عليكم رايح جاى بالعربية كنت في المعهد وانا اقول الدنيا مالها منورة كده ليه
:)

اعترافات قلب يقول...

إيه الجمال ده
إحنا تشرفنا كثيرا بلقاءك
كلامك حلو قوى

تحياتى
شيمو القمر

مهندس مصري يقول...

لقاء حلو قوي
و اللقاء الجاي معاكم إن شاء الله

حنين القلب يقول...

انت لسه فاكر
دحنا نسينا اليوم ونسيناك اصلا

وانت اللى جيت غتاته مش احنا

ويا ريت تبطل تغتت تانى

حنين القلب يقول...

انا ايه اللى جابنى
انا جايه علشان فاتيما انت مالك

وهتجيب ليه مصاصه
والنبى اسكت هو انا بشوف منك حاجه

ده انت بخيييييييل

حنين القلب يقول...

خالود
الا قولى روحت فين وسيبتهم
ها
ها
اعترف
روحت فيييييييييين
تقابل الجو ؟؟؟
الله يسهله يلا عم

حنين القلب يقول...

نتكلم شويه جد بقى

انا والله اللى مبسوطه انى شوفتك ويا ريت يبقى كل يوم فيه لقاء علشان نشوفك وتنورنا يا عم

اى خدمه كلمتين حلوين
من غير توم وجيرى

سلام يا جيرى

حررروووف يقول...

ها ها ها زورتني وجيت عندنا البلوج نور يافندم واية الكلام الحلو دة عن دة من ذوقك حضرتك

اسكندرية نورت بزيارتكم وبجد يوم محفور في ذاكرتي ورفع منروحي كتير
ياربت تكرروها تاني
دمت بالف خير

كيــــــــــــارا يقول...

كان نفسي اكون معاكم

يلا مش في نصيب اهم شي انكم انبسطوا وفرحتوا

تحياتي

Bondoka يقول...

ماشاء الله شكله كان لقاء جميل

واحلى حاجه هى انتوا طبعا

ربنا يديم الصداقه والود

وومن يقول...

الله ماشاء الله بجد شكل اللقاء كان فعلا مايتحسبش من العمر

والحمد لله انكم انبسطم وانت محرمتناش من حاجة وخلتنا كأننا كنا معاكم

عقبال كل زيارة ياااااارب

نهر الحب يقول...

ياااااااه على جمال اليوم
اللى نقلتة لنا ياريتنى كنت معاكم
:( زعلت والله ان اليوم فاتنى
انا كمان الحمد لله اليوم كان حلو هنا
وتم بفضل الله

ahmed_k يقول...

ياااااااه يا خالد برضو كده يكون في لقاء في أسكندريه ومتعلنوش عنه بدري
علشان اللي منفيين في أعالي البحار زيي
يلحقوا ييجوا
أنا يا خالد مليش دعوه
حضروا لروحه تاني لأسكندريه
بس اديني خبر بدري يا أبو همس
ألا بصحيح أنت ليه مدتنيش رقم موبايلك يوم البؤجه ؟؟
حسيبلك رقمي في الكنترول تبقى تطلبني ماشي

سلااااااام

رندا يقول...

عارف ياخالد كل لما بحس ان الكل جميل اوى كدة بحس انى كنت معاكم بجد
بس قلبى معاكم اكيد
بجد نفسى اوى اشوف الكل ياررررررريت
انا الى خسرانة :(

ربنا يجمعكم فى الخير يارب على طول

بحبكم كووولكم فى الله

kochia يقول...

انا مبسوطة انه كان يوم حلو كدة وان شاء الله يتكرر تاني

تحياتي

همس الاحباب يقول...

اسكندرانى اوى
والله احنا كماااان كان نفسنا تكون موجود قوى ونسعد بلقاء حضرتك
وان شاء الله فى الاجازة لازمن نتقابل وهنعمل لقاء اكبر من كده ونلتقى جميعا على خير
الله يسلمك وطبعالازمن يوصل سلامك
منورنى دائما يا هندسة

همس الاحباب يقول...

عاشقة الرومانسية
ههههههه
لا يا ستى ما عنديش طبعا
لان فاتيما حبيبة الكل
وعندك حق انك تعشيقها
ربنا يديم المعروف ما بينكم
وان شاء الله نلتقى فى مرات جااااية
ونتعرف على كل الشخصيات الجميلة
وانا كمااااان سعدت بمعرفتك اخت جدعة وكلها ذوق
تحياتى

همس الاحباب يقول...

اسير الجراح
ولا يهمك اول واخر تعليق تحت امرك

الحمد لله اننا سعدنا بلقاءك
ودائما نلتقى على خير
وانا اسعد طبعا بتلك المعرفة
وانت كماااان ليك وحشة من عنا للاسكندرية رايح جاااااى
ههههه
دمت بكل خير

همس الاحباب يقول...

فاتيما
ههههههه
ايه ده مين ده
يا ست الكل بلاش الكلام الكبير ده
احسن بصدق وتبقى مشكلة
ههههههه
ربنا يبارك فيكى ويكرمك دنيا واخرة
احنا طبعا اخوات وده واجب عليا طبعا
ان شاء الله نلتقى دائما على خير
ودايما منورانا فى كل لقاء با ام يوسف
بس المرة الجاااية يكون يوسف خلص امتحان ويجى معانا ان شاء الله
دمتى بكل ود

همس الاحباب يقول...

مجداوية
وعليكم السلام ورحمة الله وبركاته
طبعا اسكندرية منورة باهلها
وتصدقى بالله حضرتك من الناس اللى كنت اتمنى اشوفها يوم اللقاء وكنت عايز سيبلك كومنت باللقاء بس طبعاعارف انك ضد اللقاءات والتجمعات فقلت بلاش احراج
عامة الحمد لله على كل حال
وربا يكرمك يا ست الكل وتفرحى بنسمة واولادها ان شاء الله
دمتى بكل ود

همس الاحباب يقول...

اعترافات قلب
الشرف لينا احنا يا شيمو
ربنا يكرمك يا ستى
ودائما نلتقى على خير
تحياتى

همس الاحباب يقول...

مهندس مصرى
الحمد لله كان لقاء جميل
ده شىء اكيد ان شاء الله لازم نعمل لقاء مخصوص بمناسبة عودتك بالسلامة
فى انتظارك يا هندسة
تحياتى

همس الاحباب يقول...

حنين القلب
وانا كماااان نسيت
بس فيه ناس كانت بتزن علشان البوست ينزل
اه طبعا انا جيت غتاتة

همس الاحباب يقول...

حنين القلب
ههههههه
ماشى ياستى
انا وفاتيما واحد
عامة انتى نورتى
مصاصة يا دوب على قدك علشان نرتاح من الصداع
ههههههه
بصراحة عمرك ما شوفتى منى حاجة
طب ممكن تبعتى الخمسة جنيه تمن المصاصة مقدما

همس الاحباب يقول...

حنين القلب
ههههههه
الجو كان متقلب يومها
فسيبته وقابلت الطقس ( وش مطلع لسانه )
وبعدين انتى مالك بحاجات الكبار
خليكى فى المصاصة يا شاطرة

مجداوية يقول...

السلام عليكم

والله أنا يزيدني شرف مقابلتكم يا أخي الكريم وصحيح انا مش بأحضر تجمعات لكن المرة الجاية ابقى قولي وأناإن شاء الله حآجي أسلم وأمشي ,,

ربنا يديم محبتكم في الله

همس الاحباب يقول...

حنين القلب
ههههه
البوقين دول تثبيت علشان اتكسف وخلى عندى دم
مع الاسف انتى عارفة انه مفيش من زمااااان
بعنى مش بنفع انك تثبيتنى
ومع ذلك انا اللى سعدت بلقاءك
وربنا يديم المعروف بينا ويديم علينا المحبة فى الله
نورتى يا توم

همس الاحباب يقول...

حروووف
البلوج منور بحضرتك
ويا ستى انتى تؤمرى
وان شاء الله هنعمل لقاءات كتير
ودائما تشرفينا وتنورينا طبعا
وسعدت جدا بمعرفتك ومعرفة الجمع الكريم
دمتى بكل ود

همس الاحباب يقول...

كيارا
وانا بقول المدونة نورت ليه
ان شاء الله تنورينا المرات القادمة
الحمد لله كان لقاء جميل
تحياتى

همس الاحباب يقول...

بندقة
الحمد لله
وان شاء الله نشوفك فى لقاءات قادمة
ربنا يكرمك وبوفقك دائما
تحياتى

همس الاحباب يقول...

وومن
الحمد لله
مع ان اللقاء كان محتاجك انتى كماان
ان شاء الله المرة الجااية تعملى حسابك
تكونى معانا

همس الاحباب يقول...

نهر الحب
الحمد لله على كل حال
وانا اسف انى مقدرتش اجى يوم بور سعيد
بس ان شاء الله المرة الجاية هنحاول نكون موجود
الحمد لله ودايما موفقة
جزاكى الله خيرا وجعله فى ميزان حسناتك
دمتى بكل ود

همس الاحباب يقول...

kاحمد
هههههه
معلش يا عمنا عديها المرة دى
وان شاء الله تنورنا المرة الجاية
بس معلش اللقاء كان ليه ظروف خاصة وجه فجاة
ان شاء الله تنورنا فى القاءات القادمة
هو انت مش معاك رقمى مش ممكن
يا عمنا انا رقمى منتشر لو سالت اى حد هتلاقيه معاه
عامة رقمى 0101345140
اى خدمة يا برنس
تحياتى

همس الاحباب يقول...

رندا
ربنا يكرمك دنيا واخرة
انا عارف ومقدر ظروفك
وانتى فعلا معانا بقلبك وروحك الجميلة النقية
ربنا يبارك فى حضرتك
وان شاء الله نشوفك على خير
دمتى بكل ود

همس الاحباب يقول...

كوشيا
الحمد لله
ونتمنى انك تنورينا فى اللقاءات القادمة
دمتى بكل ود

همس الاحباب يقول...

مجداوية
وعليكم السلام
انا سعيد جدا بمتابعة حضرتك
وطبعا الشرف لينا اننا نتعرف على حضرتك
وطبعا كده انتى شجعتبنا اننا نعمل لقاء بكرة مخصوص علشان خاطر حضرتك
ههههههه
باذن الله اللقاء القادم هبلغ حضرتك قبله بفترة كافية
وطبعا شرف لينا حضورك حتى ولو لثوان معدودة
تحياتى لحضرتك

أسير الجراح يقول...

انا جى ارد هنااااااااااااا


يا باشا انت تاخد اجمل وارق باقة حب


واجمل وارق باقة ورد

وتاخد كل حاجة انت عاوزها

ابعتلك اليوزر وخد المدونة


ههههههههههههههههههههههههة

تسلم يا خالد والله وحشتنى جدا

ربنا يزيد الحب والمودة

كل الاحترام

اسير الجراح

لماضة يقول...

انت بتسيحلي عشان راحت عليا نومه
هههههههههه
بس جيت الحمد لله يا باشا
نورتوا اسكندريه

أسير الجراح يقول...

بقولك الميل بتاعى اهو

weka_weka49@yahoo.om

كيكى يقول...

انا جبت البوست من اوله الاخرة انى افهم اللقاء عشان اييييييييييية
طلع فى الاخر احم احم لقاء تدوينى
وانا اقول ياااااااااربى هو نسى يكتب راحو عشان اية ازاى ينسى يكتب!!!
بس اسكندارية مرة واحدة يااااااااا
دنا بنزل سلم بيتنا بالعافيه**
عموما بجد الواحد فى اللقاءت ميبقاش عارف يوصف شعورة كفاية بقى عشان مفتكرش اللقاءت الى روحتها واعيييييط
عووووووووووووووووووووو

maha zein يقول...

ولا كلمة
خلاص
انا قررت اقطعكوا كلكوا

هانت عليكم العشرة
هانت
نسيت اللذي مضا ولقاء الاسكندرية اللى فات
بقه لا حد يجي يقولي ولا الهوا
خلاص
ماشي ماشي

روحوا كلكوا
وربنا يقويكوا علي لقاءات تانية بدوني
مهو خلاص بقه
اللى علي علي وراح اسكندرية

حاجات جوايا يقول...

أجمل ما فى الحياة حقا أن نحياها ونستمتع بلحظاتنا فيها

أغبطكم على اللقاءات الممتعة دى
ربنا يجمعكم دايما فى الخير ويسعد أوقاتكم

خالص ودى

ماما أمولة يقول...

يا جمال اسكندرية

نصف عمري قضيته فيها

ما أجمل أيامها فهي مدينتي الثانية

اكيد كان لقاء جميل بكم

ربنا يديم المحبة اللهم امين

همس الاحباب يقول...

اسير الجراح
ربنا يكرمك اخى العزيز
وهدية مقبولة من اخ كريم
تحياتى وحبى لشخصك الجميل

همس الاحباب يقول...

لماضة
طبعا لازمن نشردوكم
ونسبح فى المنطقة
نورتينا يا دكتورة
وربنا يكرمك ونلتقى دائما على خير
تحياتى

الطائر الحزين يقول...

زادكم الله سرورا وبهجة

همس الاحباب يقول...

كبكى عوو
عندنا يا مرحبا
معلش يا ستى المرة الجاية هنعمل اللقاء على السلم عندكم
علشان ما تتعبيش نفسك وتنزلى السلم
انا مقدر الظروف وعارف ان صحتك على قدك
يلا حكم السن بقى
ههههه
نورتينى يا كيكى هانم
تحياتى

همس الاحباب يقول...

مها زين
هههههههه
واحنا نقدر يا دكتورة
بس هو جه فجاة كده
ليكى على فى اللقاء القادم هبلغك قبلها يا ستى
ورينى شطارتك انتى وتعالى بس ونورينا زى اللقاء السابق
دمتى بكل خير

همس الاحباب يقول...

حاجات جوايا
ربنا يسعدك ويكرمك يا ست الكل وتفرحى بدودو
وان شاء الله هنعمل لقاء فى دمياط خاص علشان حضرتك
بس المهم ان ظروفك تسمح
تحياتى وتقديرى اختى العزيزة

همس الاحباب يقول...

ماما امولة
ربنا يسعدك يا ماما
وان شاء الله نراكى قريبا فى بور سعيد
واللقاء القادم اتمنى انك تنورينا
تحياتى وتقديرى

همس الاحباب يقول...

الطائر الحزين
اخى العزيز
ربنا يكرمك ولك مثله وزبادة
بارك الله فيك
واسف جدا لتقصيرى مع حضرتك
تحياتى وتقديرى

رئـــــيسـة حزب الأحلام يقول...

الله كان نفسى ابقى معاكم
بس يلا ربنا يزود اللقاءات الجميلة دى وربنا يعيد الايام عليكم بالخير
تحياتى لحضرتك

همس الاحباب يقول...

رئيسة حزب الاحلام
ان شاء الله المرات القادمة تنورينا
دمتى بكل ود
تحياتى لحضرتك

Hannoda يقول...

آسفة جدا على التأخير يا خالد لكن كان لظروف السفر اللي اتلخبط جدددا

كان يوم رائع بجد.. سعدت بيكم جدا و بالطبع الغالب على الكل من إحترام و محبة أول مرة في حياتي ألاقيهم طاغين كده على تجمع كبير

اول لقاء لي في التدوين و كان رائع جدا و كسبت منه معرفة ناس قيمة جدا

نورتوا اسكندرية ونورتونا
واسعدني جدا التعرف على شخصية يعتمد عليها زيك

اسفة على التأخير :(

ووحشتوني قوي