15 مارس، 2009

هل اصبحنا ؟؟

هل اصبحنا فى نظر الاخرين يهود ومنافقين ؟؟؟
فى نهاية شهر فبراير الماضى  واثناء اندماجى فى انهاء بعض الاعمال اليومية الخاصة بالعمل جاءتنى رسالة تنبيهية على برنامج سكيب وهو برنامج لا استخدمه اطلاقا ولكن اعتز به لانه عن طريقه دخلت عالم التدوين
الرسالة كانت من شخص مجهول بالنسبة لى واليكم  مقتطفات من الحديث الذى دار بيننا
الشخص: السلام عليكم
خالد : وعليكم السلام ورحمة الله 
الشخص : انا سعيد من الجزائر 
خالد : اهلا بحضرتك وانا خالد من مصر 
الشخص : من مصر
خالد : اه اى خدمة 
سعيد : صدقة.. انت حيوان صح  
خالد : شكرا ده من ذوقك
لحد كده الموضوع عادى ما اخدتش فى دماغى وقولت انه شخص عادى وكان متخيل انه هيكلم بنت بس حظه طلع مع ولد
واندمجت فى انهاء باقى الشغل ونسيت الموضوع
تانى يوم فى نفس الميعاد لقيت رسالة تنبيهية اخرى وكنت مخنوق ومش طايق نفسى  قلت اشوف مين لقيت الاتى
سعيد : انا بكره مصر وبكره كل المصريين انتم يهود
خالد : على فكرة كرهك ولا حبك مش هيفرق كتير مع مصر والمصريين وبالراحة على نفسك
سعيد : انتم يهود ومنافقين انتم عار على العرب
خالد : اللهم طولك يا روح اه وبعدين ايه كماااااان
سعيد : انتم عندكم سفير لاسرائيل 
خالد : هههههههههه هو اللى مزعلك السفير  
سعيد : انتم خونة انتم ليه مافتحوش المعبرعلشان غزة انتم يهود
خالد: بص يا اخى اولا ما ينفعش انك تشبه مسلمين بانهم يهود ومنافقين مهما تكن الاسباب
وبعدين بلاش تسمع الانباء من مصادر واحدة قد تكون مغرضة او ليها اهداف اخرى الواضح ان حضرتك مش واخد بالك من حاجات كتير
سعيد: الجزائرمليهاش علاقة مع اسرائيل وما عندناش سفير 
خالد : كلام جميل طب ايه اللى عملتوه انتم ولا العرب للقضية الفلسطينية  
خالد :مش هقولك الحكومة عملت ايه ولا النظام عمل كذا وكذا لانه بصراحة كل الانظمة العربية بلا استثناء وبمافيهم النظام فى الجزائر مقصرين وتعاملوا مع الموقف بسلبية
سعيد : انت بتشتغل ايه
خالد : محاسب وحضرتك ؟؟
سعيد : صحفى فى جريدة الخبر الرياضية
خالد : اه صحفى وبتقول كده لانك بتاخد الانباء من مصدر واحد مش اكتر
سعيد : انا ليه اخ استشهد فى فلسطين
خالد : ربنا يرحمه ونحتسبه شهيدا عند الله بس كلنا لينا اقارب واخوة شهداء  ونتمنى ان نكون مثلهم  
سعيد: امين وشكرا لك 
خالد: يا اخى نحن عرب ومسلمين ونتهم بعض ويعادى بعضنا البعض ونسينا العدو ونسينا القضية الاساسية انا احب الفت نظر حضرتك الى ان مصر  كشعب مختلف عن النظام تماما 
يا اخى فى محنة غزة الشعب باكلمه كان يقتطع من قوت يومه لمساعدة الاخوة فى غزة ناهيك عن المواقف الانسانية التى شاهدتها بنفسى اثناء زيارة المرضى الفلسطينيين بالمستشفيات المصرية 
وبالمناسبة انا مدون مصرى وممكن اديك لينك مدونتى ومدونات مصرية رصدت الحالة بكل صدق وشفافية 
بل هناك مدونات انشئت خصيصا لنصرة غزة والتعريف بالقضية الفلسطينية والدفاع عنها مثل مدونة كلنا مقاومة 
سعيد: اولا انا اسف 
خالد : ولا يهمك حصل خير انا هدفى اننا نكون اخوة كعرب وتصبح قضيتنا واحدة وهدفنا واحد 
سعيد : ان شاء الله لما ارجع من الشغل نبقى نكمل حديثنا 
خالد : باذن الله وانا سعيد بمعرفتك وفى انتظارك 
لحد هنا الحديث انتهى على خير 
لكن هناك اسئلة دارت فى خيالى بعض الحديث:
هل نحن فعلا اصبحنا يهود ومنافقين فى نظر العرب ؟؟؟
اذا كنا كذلك فى نظر الاخرين فما هى نظرتنا لانفسنا ؟؟؟
مهما تكن الاجابات فمصر ليس نظام فقط مصر تاريخ وشعب
مصر نايمة  بس النوم فى العسل طال يا مصر
مصر بتحتضر بس لسه فيها الروح
اولادك خنقوكى يا مصر بس لسه بتقاومى
صح النوم يا مصر

هناك 36 تعليقًا:

حنين القلب يقول...

هييييييييييييييييييييه

رجعت تانى اول تعليق

الحمد لله

اروح اقرى وارجع تانى

حنين القلب يقول...

احنا مش يهود ولا منافقين وده مش من وجهه نظرنا بس لالا ده من وجهه ناس كتير

ومش علشان واحد قال كده يبقى نصدقه

وبعدين زى ما انت قولت ده نظام وحكومه احنا ذننبنا ايه؟؟
هو السفير ده قاعد معانا فى البيت
ولا احنا نملك نطلعه من مصر ومش طلعناه وفتح المعبر ده برضه مش بمزاجنا

يا اخوانا
احنا محكومييييييييين
مش حاكميييييييييين

حنين القلب يقول...

خاااااااااااااالود

فيه حاجه مهمه بره الموضوع ده

من امتى اللى بيشتمك بتقوله شكرا ده من ذوقك
اومال مبهدلنى ليه؟؟
ولا لازم اسافر الجزائر واكلمك من هناك علشان تحترمنى ؟؟؟

ماااااااااشى وربنا لوريك

سومه...مجنونه فى بلد عاقل يقول...

بص يا خالد
فى مثل عامى كدا بيقولوه اللى بيته من ازاز ميحدفش الناس بالطوب
احنا طين احنا زفت احنا اسوأ من اليهود انا موافقه
بس العرب مش ملايكه دول اسوأ مننا ولو كل واحد قعد للتانى عدله مصايبه مش حيخلص لا توجد دوله عربيه عادله حتى الان دول الخليج فلوسهم لامريكا دول المغرب محدش يعرف عنهم شىء كفايه ان الحجاب ممنوع عندهم فى المدارس والشغل ولغتهم الاولى فرنساوى...
السودان والصومال وجيبوتى ودول افريقيا اللى تحت مزابح ومجاعات
............
المشكله ان الناس فاهمه ان عدم احتكاكهم بالموضوع يبرا موقفهم لا
القضيه مش قضيه مين عنده سفير ومين معندوش القضيه ان اللى بيتكلم وليه موقف ولو قليل افضل من اللى معندوش موقف خالص...
فى دول ملهمش اى مواقف نهائيا غير السب والشتيمه والتنديد...
وانا على فكره مبغلطش الريس لما قال احنا عملنا كتير مع اسرائيل...بس بغلطه لما يقول احنا عملنا لفلسطين لان اللى بيعمل بيعمل لنفسه احنا عملنا لينا ومحدش عمل معانا..
كمان المفروض الوقت القادم منقعدش نشتم ونعدد لبعض المفروض محدش يقول انت مبتعملش ليه
لا المفروض انا ابدا بنفسى واعمل بعدين احاسب الاخرين بس بعد محاسبه نفسى اولا
هم بقى فين مواقفهم عشان يحاسبونا؟؟
اللى بياكلنا منهم ولا يشربنا من جيبه ييجى يقول...
قكك منهم كل واحد شايف نفسه صح
وعلى فكره احنا الشعب الوحيد اللى عارف انه غلط بس مش الباقى ملايكه لا عارف انه غلط واللى حواليه اسوا منه كمان

سومه...مجنونه فى بلد عاقل يقول...

ابعتلك جيش النمل بتاعى:))

mony يقول...

السلام عليكم و رحمة الله و بركاته

من اهم خطط العدو(اليهود)اننا نكون متفرقين
بنكره بعض
علشان يعرفوا يتغلبوا علينا
"اكلت يوم اكل الثور الابيض"

فلو مش ناجحين انهم يحتلوا قطعة ارض بكل اسلحتهم الفتاكة و خسروا اما انفسهم و امام العام

فهم بيحولوا انتصارهم بانهم يفرقوا المسلمين عن بعض


و جزاه الله خيرا الشيخ وجدي غنيم لما ظهر علي قناة الجزيرة(المسيئة لسمعة شعب مصر)
(ممكن تشوفه علي اليو تيوب)

و اكثر شئ اتكلم فيه هو ظلم كثير من العرب للشعب المصري و اتهامه بالتواطء مع اليهود

أحمـــــــــــــد أبو العلا يقول...

من أسوأ الحاجات في أزمة غزه أننا كلنا قعدنا نرمي التهم على بعض ونسينا عدونا الأساسي
نسينا مين اللي بيقتل
نسينا مين اللي بيتراجع ويتخاذل

للأسف اليهود نجحوا في أنهم يصرفوا انباهنا عن القضيه الحقيقه

موناليزا يقول...

عجبنى ردك عليه
واللى يلوم مصر وشعبها يقولنا بلده وشعبه عملوا ايه

mohamed يقول...

اولا اشكرك لزيارتك
تانيا
الحوار الى دار بينك وبين الجزائرى
اولا هو هاحم الشعب المصرى
تانبا رمانا باننا منافقين
او غبر مسلمين
هذا السلوك منه يتنافى مع قواعد الحوار واديه اسلاميا
فلا يجوز التعميم ابدا
ولايجوز حساب الاخ على ما يرتكبه
غيره, كل أنسان محاسب على فعله
ولبس فعل غيره
لو كنت مكانك
لانهيت الحديث معه
لان الله اعطاه عقل لايستعمله
سيدنا على رضى الله عنه قال
تاظرت الف عالم وغلبتهم
وناظرنى جاهل فغلبنى
لان الجهل اهواء وعصبيه
لك الله على صبرك

Appy يقول...

لا يا خالد احنا مش كده وانت جاوبت صح عليه هما مبيعرفوش كل حاجه ومينفعش حد يحكم على حد فى بلد تانيه

فاتيما يقول...

و الله يا خالد إنت جاوبت عليه بشكل ممتاز ...
بالهدوء و رحابة الصدر و السماحة اللى متأصلة فينا لعرب و مصريين
و للأسف زى ما قلت بنفسك ...
الانظمة حاجة و الشعوب حاجة تانية
و الناس على الناس رحمة بس لما بتلاقى المنفذ و الطريقة اللى تعبر بيها عن تعاطفها دا ...
أتمنى لما الأخ سعيد ييجى يزورك هنا
يعرف إننا كلنا اخوة و بنعتز بيه كشقيق من بلد جميل و عظيم زى الجزائر
و خالص تحياتى ليكم إنتما الأتنين
و لهموسة حبيبتى و والدتها

رئـــــيسـة حزب الأحلام يقول...

طب هم عملوا ايه
ابسط حاجة هم عايزين يدخلونا فى حرب وهم يتفرجوا ويضحكوا علينا دة اللى هيبسطهم لما يتجمعوا فى كلمه يبقى يتكلموا
تحياتى لحضرتك

مجداوية يقول...

السلام عليكم

أولا ألف شكر على ذكر مدونة كلنا مقاومة ويارب تكون على أد حسن ظنك بهاوجزاك الله كل خير على ردودك الصائبة لكن

والله أنا مش مستغربة الحوار ولا كلامه لأننا ساكتين على الحكومة وبنكتفي بالحسبنة والحولقةواحنا مش مستضعفين مش كلنا أقصد لأن فيه ناس في ايدها تغير وساكته وناس في ايدها تكون قدوة ومستخبية وخايفة ,,صحيح احنا بنخالف الحكومة على طول الخط لكن خايفين وساكتين والسكوت رضا أو على الأقل خنوع لأن لسه الدنيا مزغلله الناس عشان كده خايفة وبتفكر في مستقبل عيالها اللي هو أصلا ملوش ملامح وسايبين لهم ميراث أسود من قرن الخروب من العار والاستسلام,,أنا اليوم كنت نازلة على سلالم المدرسة وبصيت للطلبة وهم نازلين ولاقتني بدون أن أدري بأردد عبارة مفيش فايدة
استحالة تتصور حالهم وهم المفروض في مدرسة متميزة ,,الوضع أكبر من الاصلاح الفردي أو على مستوى الأفراد ,, ده اللى أنا وصلته لأن الاصلاح الفردي بطيء جدا أمام اكتساح المد العلماني اللي بيغيب عقولناوفساد الحكومة وتواطئها

احنا محتاجين زلزلة أو تسونامي أو حاجة تفوقنا

احنا محتاجين معجزة من ربنا


ملحوظة
كنت نشرت هذا التعليق عندي لأن كانت هناك مشكلة تمنع ارسال التعليق والحمد لله اكتشفتها بعد نشره عندي من العصر وانا بحاول ارسله
طلع اني كنت حاطة علامة (أكبر من ) بالخطأ وهي اللي كانت مسببة المشكلة ويقولي التاج مكسور أقول هو فين التاج ده بس
طلعت العلامة دي هي التاج المكسور
:)
أديني لحمت التاج واتصلح
السلطنية
:)

Bondoka يقول...

للاسف احنا فعلا شكلنا وحش اوى قدام نفسنا حتى فبل الناس التانيه

بس ماتوصلش يعنى انهم كل شويه يشتموا فينا

هما مش عارفين يعملوا حاجه وعايزين يدخلونا حرب هنخسرها هنخسرها

لما يفوقوا كده ونبقى كلمه واحده وراى وراى واحد ان شاء الله ننتصر

maha zein يقول...

بس عارف
لو انا منك مكنتش استحملت كلامه ده
وكنت طلعت فيه جامد
او علي الاقل مكنتش اتكلمت معاه اصلا
بس عارف
انت باسلوبك ده الهادي الرصين من غير ما تغلط
خليته يخجل من نفسك
خليته يعد يسمعلك

بجد اسلوبك في الحوار كان رائع جدا

ومعلش اعذره
فعلا في ناس كتير من خلال اللى بتسمعه من الاخبار بتشعر ان مضر بلد الخونة
ان كنت اتفق معه في اننا لم نفعل شىء كحكومة
اما الشعب
فأحنا كنا اكثر الشعوب تأثرا وفعلا من ال غزة

بجد ربنا يباركلك يا ابو همس

mohamed ghalia يقول...

هل نحن فعلا اصبحنا يهود ومنافقين فى نظر العرب ؟؟؟
اذا كنا كذلك فى نظر الاخرين فما هى نظرتنا لانفسنا ؟؟؟
مهما تكن الاجابات فمصر ليس نظام فقط مصر تاريخ وشعب
مصر نايمة بس النوم فى العسل طال يا مصر
مصر بتحتضر بس لسه فيها الروح
اولادك خنقوكى يا مصر بس لسه بتقاومى
صح النوم يا مصر
أخويا العزيز خالد
مستحيل نقول على مصر كده
لأنى زى ما قولت شوف التاريخ
مصر دى أكتر دولة وقفت جنب القضية الفلسطينية فى وقت الكل اتخلى عنها
مصر هى القدوة للدول وده يمكن الى خلا أعدائها يوقعوا العرب مع مصر مستغلين الأحداث الأخيرة
لأنى مصر دايما الرأس لو وقعت كله هيقع
يكفى انى قطر والسعودية فيهم قواعد أمريكية ومصر رفضت ده تمام
يكفى انى سوريا انضربت من اسرائيل بالطيران ومعلقتش
ولا رئيس ليبيا الى مش وراه غير الكلام وبس
انا بقول اننا أحسن الوحشين
ومبنكرش غلط حكوماتنا
بس احنا عمرنا مكنا منافقين ابداااااااا
شعبنا بيعشق اى حاجة فيها رائحة الدين
دمت بكل الود أخى

وومن يقول...

طب انت حصلك كدة مع حد متعفرفهوش اومال لو تعرفه وعشرة بقي بس هو من بلد تانية

وبدل ما يقولك ازيك يقولك ليش يامصريين قافلين المعبر

علي اساس اني معايا نسخة من المفتاح في جيبي

بس تقول ايه بقي في الناس اللي بتسمع من غير ما تفهم

لا يا ابو همس احنا لا منافقين ولا يهود
احنا بس علشان علي طول في وش المدفع تبص تلاقي كل واحد عاوز يرمي الغلط علينا مهو احنا بقي الأخت الكبيرة اللي لازم تتحمل المسئولية

علي فكرة انا لو مكانك مكنتش رديت كدة خااااالص وكمان بترد وانت مش طايق نفسك اومال لو في قمة هدؤك كنت عملت ايه ربنا يكتر من امثالك ويقلل من الجهلة دول قول آمين

أحسن تـستاهـل يقول...

مممممممممممم
بص انا هقولك
لياواحدة صحبتي فلسطسنسة اتصلت بيا بعد الحرب والاول قعدت تتريأ وتقولي بتضحكي يا مها اه طبعا ما انتو مش عارفة ايه وايه واحنا هنا متبهدلين (كله كلام تريأه)
بعدين في الاخر قالتلي احنا عارفين كل حاجة وحاسين بيكو
انتو مسجونين في بلادكو ولا قادرين تعملوا حاجة
وبقت تفكر معايا ازاي نوصل صوتنا وازاي نعبر عن الغضب اللي جوانا

معلش يا أبيه خالد ع اللي بنشوفه
الجهل وحش.. والاعلام اوحش اللي بيصور للجهلة والغافلين حاجات خاطئة وبيصدقوها
دي ناس مش عارفة ومحتاجة اللي يعرفها

ربنا يبارك فيك ويكتر من امثالك ويعينا على نصرة القضية قول آمين


ياللا قول
:)

مها ميهوووو

حاجات جوايا يقول...

العالم العربى ده لو عالم اسلامى بجد
يعرف يعنى ايه اسلام
مكنش ده بقى حالنا كلنا
مصريين وعرب
كله بيرمى الغلط على كله
وكله اصلا غلطان
مش غلطانين بس فى نظر بعض
ولا فى حق القضية الفلسطينية
كلنا غلطانين فى حق اسلامنا وعروبتنا
غلطانين ومكسوفين من ربنا لما يسألنا ليه رضينا بكده لمسلمين زينا
اد كده احنا ضعفاء ؟؟
ولا حب الدنيا لهانا ؟
ولا الانانية بقت سياستنا ومحدش بيفكر غير فى نفسه ولا اييييييه ؟؟؟
اسئلة كتيررررر عشان نجاوب عليها صح لازم كلنا نصلح عقيدتنا كمسلمين مصريين وعرب .. وهنلاقيها جاوبت نفسها

خالص تقديرى لهدوئك وثباتك
ربنا يعينك يا ابو همس

صبرني يارب يقول...

ِشوف يا استاذنا

انا بما انى انا اتخنقت من العرب الى مش بيفهموا بما فيهم بعض المصريين اصلا

فطز فى نظرتهم لنا

والى بيدوه لنا يقطعوه والحب الغامر ا لى مغرق قلوبهم على العرب والمسلمين برضه مش عايزينه

حاجه قرف يعنى

حقيقى احنا كعرب شعب سطحي واي اعلامي اهبل ممكن يضحك علينا

ولعلمك بدأت اشك ان مصر الى خنقت شعبها

لكن للاسف مصر اساسا هى شعبها مش عارفه مين خنق مين فى الاخر

تحياتي يا فندم

اسامه عبدالعال يقول...

الموضوع ده مترسخ فى ذهنهم من زمان ياخالد هما بيفتكروا اننا حلفاء لليهود وده ان شفته بعينى وسطهم فى الغربه فى حين ان دوله زى الاردن مثلا علاقتها قويه جدا مع اسرائيل فى الخفاء ومع ذلك تجد من الاردنيون من يسبون المصريين ليل نهار وتقريبا كده بيحملونا اى حاه تحصل وحشه فى الدنيا ومش فاهم ليه كل ده

اللؤلؤة يقول...

همس الأحباب
السلام عليكم
للأسف كثير من الإخوة العرب يطلقون علينا ألفاظ قاسية ما أنزل الله بها من سلطان بسبب نظام الحكم الرشيد ونحن منها براء
دمت بكل الخير

Gannah يقول...

غريبة جداا أن يصدر هذا الخلط فى المفاهيم من صحفى
المفترض فيه الدقة فى متابعة الأخبار ومحاولة الفهم الصحيح
امال لو نزلنا للمستوى الأقل تعليما وثقافة هيكون الرأى فى دور مصر شكله ايه ؟؟
ولا يمكن الفهم والفقه مش مرتبط لا بالتعليم ولا بالثقافة ومحتاج بس عقل مفتوح وغير متحيز
أعجبتنى ردودك
ويارب مصر تصحى
لحسن فعلا النوم طول قوى
تحياتى

جنّي يقول...

السلام عليكم

كيف حالك اخونا خالد ..

احييك على صبرك وطريقتك في ادارة الحوار حتى انك غيرت مفاهيم الرجل وجعلته يعتذر .. وان كنت اشك انه صحفي لنفس السبب الذي ساقته جنة ..

طبعا ستجد من المعلقين من سيسب العرب كما فعل محاورك تماما وسبنا وتأخذهم العزة بالاثم حبا في مصر.. ومنهم من سيسب النظام او مصر كرها في النظام ويتفق مع ما قاله محاورك ..

الحقيقة ان الكثيرين من الشعوب العربية مغيبين عن كثير من الحقائق بالرغم من الثورة الاعلامية والحاسوبيةالتي نعيشها اما بسبب عمليات غسيل المخ التي يحدثها الاعلام الرسمي لعقول الناس او لاسباب اخرى تتعلق فالافراد انفسهم بسبب الحالى الاقتصادية السيئة التي يعيشونها ..

بلادنا العربية محتاجة حالات تغيير كثيرة حتى تتغير الشعوب وتستيقظ ..

اشكرك وتحيتي

شفقة هانم واحسان بك يقول...

صح النوم يا مصر

كعادتك دائما يا خالد
أمتعتني وأتحفتني بالبوست
ولا تعليق

أخوك/ إحســان

الربان يقول...

تحياتي أخي خالد..

في رأيي ان ما حدث هو نتاج ما تبثه الفضائيات المغرضة...و من استضافتها لبعض الاشخاص الذين لا هم لهم الا مهاجمة مصر...و قد تم اختزال
" قضية فلسطين " كلها في فتح "المعابر" ...ثم فتح المعابر تم اختزالة في فتح معبر "رفح"....

و أظهروا مصر بصورة التواطيء مع اسرائيل.... بالرغم من ان " جميع الدول العربية " مجتمعه لا تستطيع فعل
اي شيء بدون مصر......

تحياتي أخي الكريم و جعل الله صبرك علي
اخينا من الجزائر في ميزان حسناتك.

مهندس مصري يقول...

الله ينور عليك
عرفت ترد عليه صح
ربنا يهديهم و يعرفوا الحقيقة
بس هو قليل الأدب

نهر الحب يقول...

السلام عليكم ورحمة الله وبركاتة
خالد ازيك
لازم الكل يعرف ان موقف الشعوب يختلف عن موقف الحكومات ودا مش فى مصر بس لا فى كل العالم ودا كان واضح جدا فى المظاهرات العالمية وردود افعال الحكومات المتخاذلة
اما عن سعيد الهمام فماذا فعل او حتى الجزائر هل طردت السفير ؟
مصر للاسف كان موقفها فعلا حساس جدا
لان لو مصر اتخذات اي قرار من شنأنه اعلان حرب فورية فهل نحن فى استعداد دينى ونفسى ومادى للحرب ؟
لا يمكن ان ندخل حرب نخسرها ؟

صحيح انا مش مع تعنت الحكومة
لكن للصدق مصر لو فتحت الحدود لمرور المعونات مثلا كل ما يحدث ان اسرائيل تقصفها ورا من الجانب الاخر ؟
يعنى المسائل مش مصر بس مصر واسرائيل ودول الجوار والفيتو وغيرها
اما عنا فلم نكن يوما ويهود ولن نكون بأذن الله
نحن نحاول وحكوماتنا تختلف عنا
تحياتى

كيف تربح الاف الدولارات من الانترنت يقول...

كيف تبدأ مشوار الربح من الانترنت هذا

لكي تربح من الانترنت لابد وان تتعلم أشياء كثيرة عن المهنة التي تود العمل بها فكي تكون طبيب لابد من دراسة الطب ولكي تكون مهندس لابد من دراسة الهندسة هذه طبيعة الحال كذلك الحال مع الربح من الانترنت فباعتبارك ستخوض مجالا جديد بالنسبة لك فلابد من التعلم المستمر لهذه المهنة الجديدة المشوقة السهلة جدا واليك شرح جيد جدا في كيفية أن تبدأ في الربح من الانترنت والحصول على وظائف وتعلم التجارة الالكترونية وسهولة الحصول على وظيفة ثابتة


كيف تربح الاف الدولارات من الانترنت

كيف تربح اموال وأنت على الأنترنت

أبدا ألان اربح من الانترنت وتعلم التجارة الالكترونية اعرف أنواع الربح من الانترنت

ماما أمولة يقول...

صعب قوي احساس الظلم

ومن عرب ولهم نفس الانظمة ونفس الظروف

كل واحد بيرمي الحمل على التاني

حسبنا الله ونعم الوكيل في اللي كانوا السبب انهم وصلوا الشعوب لكدا

احييك على هدوءك في النقاش الايجابي

دمت بحفظ الله

(أم البنين) يقول...

ظلمونا سامحهم الله
جزاك الله خيرا

Sherif يقول...

يشرفنى ان ادعوك لحضور حفل توقيع أول كتاب لى فى عالم الادب " لست الا بعض الاوراق" والذى يقام باذن الله يوم الاحد 5 ابريل 2009

المكان : مكتبة ديوان بمصر الجديدة
العنوان : 105 شارع ابو بكر الصديق مصر الجديدة – مقابل نادى ضباط الجلاء بمصر الجديدة
التاريخ : الاحد 5 ابريل 2009
الميعاد : 7 مساءا

فى انتظار تشريفك

محمد يقول...

كل سنه وانتى ومن تحبى بخير وسعاده فى يوم الام
عمو محمد
شوية كلام
مشاعر وأفكار

Hannoda يقول...

كلامك أبكاني .. أنا جربت و لمست آراء الناس برة و آراء الجنسيات التانية في المصريين

ومش مهم قوي رأيهم فينا لإن زي ما قلت ماحناش كعرب ناقصين عداوة و تركيز على اللي يخلينا نغضب من بعضنا

أنا اللي آلمني آخر ثلاث سطور في البوست

فعلا مصر نايمة في العسل
مابقتش عارفة البلد ده ماسية ازاي
صامدة ازاي؟
بجد صامده ازاي و الغالبية من اللي ماسكين شؤونها فاسدين و مابيفكروش غير بس في أرصدتهم و أوضاعهم

و الناس.. الشعب غرقان في دوامة ولا عمره حايخرج منها

أنا حاسة ان البلد ما بقتش بلد خلاص
بجد بقت الاوضاع توجع القلب

الحقيقه المصريه يقول...

بشرى ساره لجميع مدونين مصر وخبر هام وعاجل
انتصرناااااااااااااااا
وتحيا مصر وعاشت بورسعيد..وبيان عاجل
تابع الحقيقه المصريه
او من خلال هذا اللنك للاهميه وسمعيني زغروطه على المدونه

http://elhakika.blogspot.com/2009/03/blog-post_25.html

عاشــــــ النقاب ـقــــة"نونو" يقول...

سلم لسانك وربنا يبارك فيك يارب
ادارة الموقف من ناحيتك في منتهى الحنكة وانقلب الموقف لتصحيح مفاهيم ويمكن الامر يختلف مع هذا الصحفي ويقدر يتكلم مع غيره ويحصل فرق وتغيير ودة اللي نفسنا كلنا يحصل بدل ما نتبادل اتهامت ونشوف بعض بعيون صهاينة نتحد ونتكاتف ضدهم وربنا يوفق
تحياتي