17 أبريل 2008

إيجابيات .. سلبيات

ان تقوم المحليات والاحياء برصف الشوارع الجانبية فى المناطق الشعبية ده شىء ايجابى طبعا
لكن ان تقوم بتكسير الاسفلت بعد فترة قصيرة ده طبعا قمة السلبية والفوضى .
وهذا ما يحدث فعلا فى معظم الشوارع المصرية فى يوم و ليلة نفاجىء بان الشارع سوف يتم رصفه وهذا شىء يسعدنا بالفعل ولكن بعد فترة لا تتجاوز عشرة ايام نفاجىء بتكسير فى الاسفلت بالطول والعرض ،طب ليه ايه اللى حصل لا ده احنا انقوم بتغيير كابلات التليفون بس للمنطقة طب كويس ،بعدها باسبوع فقط يتم التكسير مرة اخرى خير انتوا نسيتم الفوطة فى بطن المريض قصدى ماكينة اللحام ، لاطبعا احنا شركة الغاز انقوم بتوصيل الغاز الطبيعى للمنطقة ده خبر سعيد وحاجة كويسة جدا ،بعد الانتهاء من الحفر وردم الشارع بعد اقل من اسبوع يتم الحفر للمرة الثالثة لا دى مش حكاية بقى ايه تانى اصل كابلات الكهرباء اتتغير ونبعدها عن المجارى ومواسير المياه مفيش مشكلة .
السؤال الغبى اللى انا نفسى اساله كل ده متعملش ليه قبل عملية الاسفلت فين التنسيق بين الشركات فين لجان التخطيط والمتابعة فين الرقابة اين المنسق العام لكل هذا الكم من الفوضى والتخبط فى القرارات والتنفيذ واهدار المال العام والخاص ،
مش مفروض برده قبل عملية الرصف يتم مخاطبة جميع الشركات المعنية لاتمام عمليات الاحلال والتجديد والتنسيق لتنفيذ جميع الاعمال ولا اهدار المال العام وسرقته بقى شىء لابد منه .
ان يقوم افراد الشرطة بنقل مواطن مصاب بجلطة فى الشارع ونقله الى المستشفى ومعه مبلغ 60 الف جنيه وتسليمها لامانات المستشفى فده طبعا قمة الايجابية وتحية وتقدير لهم .
ان يقوم بعض امناء الشرطة بسب وضرب المواطنين وسحلهم فى الشوراع والشتيمة بابشع الالفاظ فى الثالثة صباحا على مرمى ومسمع من المارة اعتقد انه شىء سلبى جدا .

قيام بعض الاشخاص بالدخول للتعليق فى بعض المدونات وقيامهم بالسب واستعراض سفالتهم لمجرد اختلاف وجهة النظر او الاراء اعتقد انه قمة السلبية والانحطاط فى مستوى التفكير .
فقيامك باستعراض سفالتك واهانتك للاخرين من خلف الشاشة لاينم عن شجاعتك وعدم رد الشخص على سفالتك ليس ضعف منه.

موقف الاحزاب والاخوان من الاضراب الاخير وانتخابات المحليات قمة الايجابية ولصالح الحزب الوطنى .
ايجابى ليه لاننا اكتشفنا الحقيقة المرة اننا دولة بلا احزاب فعالة وكذبة الاخوان الكبيرة ظهرت على حقيقتها لذا يجب على الافراد والمؤسسات الوطنية ان تعمل لوحدها بدون احزاب ولا اخوان وخير مثال ما فعله الافراد على الفيس بوك وخصوصا جروب اضراب 6 ابريل .
ان تاكل وشعبك جائع ان تشرب وشعبك ظمان شىء عادى جدا فى حكامنا العرب ، لكن ان تلبس حذاء صناعة فرنسية قيمته ما يعادل 200 الف جنيه مصرى وشعبك محاصر ومش لاقى اكل ولا شرب ولا حتى مايستره من برد الشتاء وحر الصيف وتزعم انك رئيس منظمة تحرير فلسطين فهذا ليس سلبية ولكن شىء اخر ....
ان تحارب العدو المغتصب لكى تحرر ارضك وتدافع عن عرضك فهذه قمة الايجابية والجميع لابد ان يقف خلفك .
لكن ان يقوم احد ائمة المساجد فى فلسطين باصدار فتوى فى خطبة الجمعة باستباحة دم الجنود المصريين فى سيناء فهذه ليست سلبية بل وقاحة .
ان تخطىء مرة مش عيب المهم ان تتعلم من الخطأ انا مع الاسف ما تعلمتش من الخطا على اعتبار انه اللى تعرفه احسن من اللى ما تعرفوش ، ليه لانى قررت انى احلق عند بولو تانى وفى وقت متاخر برده بس الحمد لله ربنا ستر هو ازال اثار العدوان السابق ومحى اثاره لكن مع الاسف قام بعمل عدوان اخر اشد بشاعة طبعا مش اقولكم عليه وخصوصا البت خيخة اصلها استاذة تسييح وجرس ههههههه.

طبعا السلبيات كتير قوى قوى .. وبصراحة الايجابيات برده كتير ..
كل اللى اتمناه ان السلبيات تنتهى من حياتنا وتعم الايجابيات

قولوا امين ....

هناك 48 تعليقًا:

Desert cat يقول...

موضوع التكسير وتركيب الكابلات ونقل الكابلات ده شكله منتشر فى كل المحافظات والشوارع وده ان دل فانما يدل على انه سبوبة جامدة بياكلوا من وراها عيش وبرجر وكنتاكى وجاتوة
موضوع استعراض السفالة فى المدونات أأأأأأأأأى كدا خبطنى بطوبة اصلك جيت لى على الجرح
ده انا معمولى مدونات مخصوصه لشتيمتى
بخلاف البعدة اللى مخصيين لى بوستات
تلاقى الواحد فيهم يصحى من النوم يجرى على الكمبيوتر قبل ما يفتح عينه يعنى وهى لسه فيها عماص يدخل المدونة بتاعتى يشوفنى كاتبة ايه وطبعا يخاف يتكلم عندى اصل هيتمسح بيه سيراميك البلوج وييتعمل منه قماشة معفنة يتمسح بيها الحيطان وفى النهاية يتسيئ بيه الحمام يقوم رايح فاتح البلوج بتاعه وفاتح بوست جديد ومحدد العنوان كبير وبونط يخرم العين ولازم يكتب فيه اسم القطط ويقعد يستعرض لنا فى اخلاقه وقاذرته وبيئته اييييه اللهم عافينا معلشى الشخص ده بيبقى عيل وسخ واللى يرد عليه يبقى اوسخ منه وعلشان انا بنضف بيهم السيراميك والحيطان عندى فى البلوج فبكتفى بنضافة البلوج بتاعى ومبدخلش المدونات الوسخة دى .... وبسيبهم يقعدوا يهوهو مع بعض ... اما بقى موضوع الاضراب
الا هو انت عندك وقت تقرى يعنى ولا ايه
عموما هكمل
الاخوان المتنسونيين مش كان لازم اصلا اضراب علشان يبانو على حقيقتهم
ما هم بايننين من زمان بس الاطيشهم بيحاولوا يجملوهم قدامنا وتلاقى العيل من دول يقولك انا مش اخوانى بس ليا الشرف ابقى منهم ... طز فيك منين مش اخوانى ومنين قاعد ترجع فى وشنا قذارة وسفالة وحقارة وقلة ادب .... واذا كان ده فكر الاخوان يبقى طز فى الاخوان ومرشد الاخوان واللى بيشتم علشان الاخوان مع الاحتفاظ بحقوق الطزات الثلاث لمهديهم المنتظر ... الراجل بتاع فلسطين ده دلوعة اسرائيل وماما امريكا ما طز فى الشعب عنه ما كل ولا لبس الاخوان عمال يشحتوا عليهم وتبرعوا ... ولا يؤمن من كان نائما وجاره جائعا ... وعلشان كدا هما احلوا قتلنا ... انما لو بنديهم بالجزمة كانوا خافوا يهوبوا ناحيتنا
ميرسى يا خالد على سعة صدرك

Abo 7anf يقول...

استاذ خالد
للاسف دى بقت حياه الكتير
انا سمعتها من كذا دكتور علم نفس فى الكليه عندنا
ان غالبيه المصريين عندهم انفصام فى الشخصيه
واما حكايه الرصف والتكسير تانى يوم
دا علشان الهدايا
مهو كل عمليه رصف بهديا
والاخوان
انا طول عمرى شايفهم زى غيرهم
بس بشعار حلو
مفيش فرق
والسفاله بتاعت البيشتموا فى المدونات
دا مش لاختلاف وجهات النظر
دا لضعف حجه البيشتم
مهو مش قادر يرد فبيشتم
وتقبل مرورى

بطوط حبوب يقول...

التدوينه دى اظن مش هتلاقى عليها اعتراض من اى حد
المهم
حكايه الرصف دى عشان كل كا الاعمال تزيد كل ما الرشاوى تزيد واللعب فى الميزانيه تزيد
مش معقوله اقولك انا رصفت ب 200 جنيه
انما ممكن اقولك انا رصفت 5 مرات ب 1000 جنيه
هقولك يانهار اسود ب 1000 جنيه
هتقولى مش خمس مرات

موضوع الفتوى بتاع فلسطين دى تقريبا طلعت فشنك والراجل قال مقلتش

وموضوع الاخوان زى مقال ابو حنف
زى غيرهم بس بشعار حلو

غير معرف يقول...

عزيزي خالد

شوف موضوع السفلته و بعد كده كسرها سمعته شخصيا من واحد معانا في الشغل و ساكن في عزبه النخل يقولك الشارع اللي هو ساكن فيه اتكسر و اتسفلت مليون مره
مره عشان يركبوا الكهربا و مره عشان التليفون و مره عشان المجاري

بتهيئلي ياخالد كل مره بيعملوا كده بيشكلوا لجنه و هبش بقه من اللي ألبك يحبه
لكن لو خلصوا كلو في مره واحده الهبش مش حيكون اللي هو
ده تحليلي للموضوع و الله أعلم و بصراحه انا شايفه ان ده اهدار للمال العام لكن مين اللي مهتم اساسا بالمال العام اللي ماسكين المناصب ديه كل همهم الفلوس و بس و اللي حيطلعلهم من اللجان اللي بتتشكل

تحياتي علي موضوعك المميز

د/اجدع بنوته يقول...

اميين

انا قولت انك خلاص مش هتمشى حتى م الشارع اللى فيه محل بولو

مش تروحله برجلك تانى

طبعا معاك ف كل السلبيات والايجابيات

فرنسا هانم يقول...

انتو شعب مش ناوى يتقدم ولا يتحضر ابدا
انتوا مش فاهمين الحكومه صح
وطالما مش فاهمين بلاش تتكلموا
انا هفهمك
الاخت حكومه
او الست احياء
او الخاله بلديه
بتسفلت الطريق وتصرف عليه الشىء الفلانى
وبعد فتره بسيطه
بتكتشف ان لون الاسفلت مش مريح المواطن
فتقوم بتغيره بقوه وشجاعه وتصرف عليه الشىء الفلانى
وبعد فتره
تكتشف ان فى مواطن اتزحلق فى حته اسفلت خشنه
تقوم بكل شجاعه تغير الاسفلت وتصرف الشىء الفلانى
وبعد كده
صوتوا عليييييييييييييييييينا
وعلى فلوسنا اللى نهبوها

فاتيما يقول...

يا خالد
اما انت عليك حاجات كدا ...
ليه بس سوء الظن دا ...
يعنى العمال و الموظفين اللى قاعدين فى الحى دول طيب يقعدوا يعملوا إيه طول النهار
موش احسن من النميمة و تقشير الخضار و قراية الجرايد المستقلة اللى هتبوظ دماعهم ...ينزلوا يشتغلوا و ينشغلوا شوية ...
متحبكهاش بقى
و بعدين موضوع الشتيمة دا بقى مناخ عام و الكل بقى خلقه ضيق قوى و موش طايق كلمة و لا يقبل بالرأى الآخر موش عارفة ليه يعنى ؟؟
فيها إيه لما نختلف انا و انت فى الرأى؟
ما كل واحد حر و الدنيا براح بنضيقها ليه؟؟
بس هنقول إيه
و موضوع باولو دا بقى موش هتكلم فيه عشان المفروض المدام هيا اللى تحط حد للمهزلة الباولية دى بقى
تحياتى يا أبو همس

همس الاحباب يقول...

عزيزتى قطة الصحراء
ههههههههه
كل ده تعليق ده بوست بحاله يا قطة
طبعا انا عارف ده كله وعلشان كده انا بسال امتى انبطل سرقة ونهب
اما الشتيمة والسفالة فحدث ولا حرج عنها وخصوصا معاكى طبعا ومع الاخوات والاخوة المدونين
وربنا يشفى ويهدى عباده
منورة دائما وتحياتى ليكى يا قطة

همس الاحباب يقول...

اخى العزيز ابو حنف
اهلا بيك دائما
وطبعا كلامك مظبوط وانا متفق معك فى كل كلامك
تحياتى

همس الاحباب يقول...

بطوط حبوب
ازيك يا دكتور وحمدلله على السلامة
وسعيد جدا بزيارتك
انا موافق يسرقوا طب ما بدل ما يرصفوا ويكسروا فى نفس الشارع ويرجعوا تانى يرصفوا طب ما يكملو رصف باقى الشوارع وكله ايستفاد وايرزق من فضله على الاقل يخزوا العين عنهم شوية
وبالنسبة لفتوى الشيخ ما فيش دخان من غير نار وكله بيقول وبعدين يكذب كلامه بس ده ليه تسجيل بصوته والله واعلم
تحياتى

همس الاحباب يقول...

اجندا حمرا
منورة مدونتى المتواضعة
ومعاكى حق كله عايز يهبش وخلاص وتنحرق البلد وناسها
الكل بيقول يلا نفسى
سعيد بزيارتك وتقبلى تحياتى

همس الاحباب يقول...

د/ اجدع بنوته
حمدلله على السلامة
هههههههه
طب اعمل ايه ما هو جنبى فى الشارع وهو اللى بيبقى فاتح لوقت متاخر
وبعدين اهو اللى تعرفه احسن من اللى ما تعرفوش
تحياتى ليكى

همس الاحباب يقول...

خالتى فرنسا هانم
وحشانى يا خالتو
ههههههه فعلا عندك حق تصدقى انا طلعت قليل ادب وظلمتهم انا اسف بجد
وفعلا اصوت معاكى واقول يا لهوى كمان
تحياتى يا اجدع خالتو

همس الاحباب يقول...

الغالية قوى ام يوسف
منورانى والدنيا بتضرب صواريخ لقدومك
معلش بقى ما خدتش بالى وظلمت الاحياء
بس الاولى من التكسير والرصف انهم يستفادوا بالعمال والموظفين فى رصف شوارع تانية بدل التكسير والرصف من جديد وكله شغل برده ولا انتى ايه رايك
موضوع بولو ده انتى متابعة اهو من زمان طب اعمل ايه حظى كده قريب منى وبعدين هو شاطر على فكرة بس ليه تقاليع غريبة انا مش متعود عليها صعيدى بقى والمدام مبسوطة طبعا وبتتريق
تحياتى ليكى ولاجمل يوسف فى الدنيا
يا ام يوسف

رئـــــيسـة حزب الأحلام يقول...

ايجابى ليه لاننا اكتشفنا الحقيقة المرة اننا دولة بلا احزاب فعالة وكذبة الاخوان افكارك حلوة اوى والجملة دى حقيقية مائة فى المائة
وتحياتى لافكارك

الـسـيـدة نـون يقول...

انا عجبنى البوست ده اوى
لانه فيه تضاد
وبالتضاد تتميز الاشياء
انت يا خالد وضحتلنا اد ايه فيه حاجات جميلة بتحصل واحنا مش واخدين بالنا منها
وكمان وضحتلنا ان فيه حاجات زى الزفت موجودة
بتحرق دمنا

تحياتى ليك
اختك خيخة

only spot يقول...

سلام عليكم
الحسنه تخص والسيئه تعم
مبدا للاسف بنعيش بيه كلنا بمعنى اننا مش بنشوف غير السلبيات فقد اما الايجابيات بتكون خاصه بالافراد فقد واعتقد ان ده ظلم بس واقع بنعيشه
بمعنى اما حد يغلط القيامه بتقوم بدون ما نحاول اننا نصلح الغلط ده او نشوف الجانب الايجابى من الشخص ده وللاسف اصبحنا نعيش صراعات وتصيد للاخرين فى الاخطاء
وابسط شئ اننا نغلط ونتهم بعض وخلاص
متفقه معاك فى كل كلمه وخالص تحياتى ليك

موناليزا يقول...

تعرف لو هنمشيها مقارنة بين الايجابيات والسلبيات يبقى كده بنظلم الايجابيات لانها بالمقارنة بالسلبيات لاتذكر
ملحوظة:هو مفيش غبر بولو فى المنطقة ولا ايه؟ وبعدين بعد مابتشوف نفسك فى المرايا بتديله الفلوس عادى كده ولا بيبقى عامللك خصم؟

مجداوية يقول...

أخى الكريم
خالد

رصد ممتاز للايجابيات والسلبيات واللى ذكرته نقطة من بحر ,,ومن الايجابيات انك تحلق شعرك وتهندم شكلك ومن السلبيات انك تحلق عند نفس الحلاق اللى بيبوظلك شعرك !! سألتك قبل كده هم ليه الرجال بيصروا يروحوا للحلاقين اللى بيبوظوا شعرهم دافت عنه وقلت ده كويس دى بس كانت هفوة ,,اظاهر احنا بنحب نكون ضحايا ههههه ,,تعرف عندنا فى الآسكندرية شالوا سدوا فتحات فى الرصيف لمرور العربيات فى شارع حيوى جدا كام مرة ؟؟؟ ثلاث مرات يسدوا ويفتحوا ويسدوا ويفتحوا وكل اللى انت وصفته بالحرف تم عندنا عشان تعرف ان دى سياسة مطبقة فى جميع المحافظات أومال هيهلبوا منين فاكرالخروف بتاع نجيب الريحانى لما نصح عباس فارس انه يسرق بس بفهلوة مش بغشومية يعنى يعمل بنود كتير زى أكل كذا وحبل لزوم ربط الخروف كذا وحلق صوف الخروف كذا وجردل لزوم شرب الخروف كذا وهكذا ,,هم بقى طبقوا الوصفة دى بالظبط كاتالى
رصف الشارع كذا
حفر الشارع لزوم الكهربا كذا
ردم حفر الشارع بعد الكهربا كذا
حفر الشارع لزوم الغاز كذا
ردم حفر الشارع بعد الغاز كذا
حفر الشارع لزوم التليفونات كذا
ردم ......... تعبت
وهكذا وهكذا
جيوبهم تتنفخ وكروشهم تتنفخ وكله يتنفخ واللى مش عاجبه ايه ؟؟ لأ ,,
يشرب من البحر

مجداوية يقول...

أخى الكريم
معندكش أخبار عن وزة (أنين الحزن ) حضرتك قولت ان الجهاز عندها بايظ ده لو بيتصلح فى الصين كان زمانه اتصلح ,,هى مختفية ليه ومش بترد على الايميلات هم معندهمش سايبر فى المنطقة ,,متعرفش حد يطمنا عليها بس

عبده الرايق يقول...

خالد حبيب قلبى
الف مسا وتحيه من حته قلبيه جوانيه
شوف ياغالى
احد افراد الشرطه اللى سلم ال 60 الف جند لامانات المستشفى ده هو ده المصرى
فعلا هو ده المصرى الحقيقى
اما اللى ضربوا المواطن فى الفجر
هما دول ولاد ال ..........حذفته الرقابه

الربان يقول...

تحياتي

اولا موضوع الاسفلت ببساطة يعني انه لا تنسيق بين الجهات الحكومية و كل جهة تعمل بمعزل عن الاخري.

في هذه المدينة العربية التي اعمل بها يكسرون الشارع لسبب او لاخر...لكن اخي الكريم هم يفعلون ذلك بالمسطرة..
و بمجرد انتهاء الغرض يتم اعادة الرصف
للجزء المكسور و ايضا رصف بالمسطرة.

اختلاف الرأي...لا يجلب سفالة..و لا بذاءة...لكن السفالة و البذاءة تجلب بالتأكيد اختلاف الرأي.

الاحزاب....الحزب الوطني افسد الحياة السياسية في مصر...لم يسمح بظهور احزاب
قوية... اليس رئيس مجلس الشوري هو نفسه رئيس لجنة الاحزاب...

تحياتي و تقديري.

همس الاحباب يقول...

رئيسة حزب الاحلام
منورة يا استاذة
وميرسى على زيارتك الغالية وكلامك الرقيق قوى
تقبلى تحياتى خالد

همس الاحباب يقول...

بت خيخة واى كلام
العزيزةقوى ام شريف
ازيك يا جميل ليك وحشة والله
الحمد لله ان البوست عجبك دى شهادة اعتز بيها طبعا
والحاجات اللى زى الزفت اللى بتحرق دمنا انا اسف جدا طبعا عارف انك مضايقة من الموضوع ده
بس احب اقولك انك عندنا اكبر واعز من اى شىء وكلنا بنحبك وبنموووت فى شيكو كمان
على فكرة انتى مش عجبانى ليكى فترة
مش انتى خيخة القوية اللى احنا عرفناها المود عندك مش هو خالص
تحياتى ليكى ولاحلى شيكو فى الدنيا
خالد

همس الاحباب يقول...

only spot
حمدلله على السلامة ومنورة يا شيماء
انا معاكى طبعا فى كلامك
واتمنى اننا نبقى ايجابيين ونشجع الايجابية
زى ما بنهاجم السلبيات
تحياتى ليكى
خالد

Empress appy يقول...

نووووووووونووووو يا خلود وانا بقول عليك عاقل يا راجل

انا لو منك مش هما يسفلتوا ويكسروا ويرجعوا يسفلتوا هات بتاع من اللى بتكسر هههههههه واقعد كسر لهم تانى
يا خلود سبوبه طيب تصدق لسه مسفلتين عندنا ومكملتش اسبوع والطريق هبط لتحت تانى تقولى ازاى اقولك معرفش وزن زياده تقريبا ههههههههه
والله يا خالد مش عارفه اقولك ايه ولا ايه بس ربنا يا×د كله بقى
وبعدين سفاله ايه فىالمدونات يا خويا عيب دول ناس بس بتوع الانونيمس دول اسمهم بيقع منهم وهما دخلين الا عيب عليك يا خالوود كده يا راجل
ربنا يهدهم بقى ما علينا انا عملت لهم مطبات
بس خلاص علشان مضربش انا

همس الاحباب يقول...

موناليزا الغالية
والله فيه ايجابيات كتير برده
بس احنا مش واخدين بالنا منها لاننا بطبعنا جوانا الخير والشر
ههههههههه بولو لا فيه غيره بس خلاص اتعودت عليه بالعكس ما فيش اى خصم بل بيحاسبنى الطاق اتنين ولذلك هو متمسك بيه وبيتصل بيه مخصوص علشان اروح احلق عنده
تحياتى

همس الاحباب يقول...

اختى العزيزة / مجداوية
اولا انا سعيد جدا بزيارتك وسعيد انك من اسكندرية كمان
اما بولو ده بقى قدرى الظاهر بس هى عملية تعود مش اكتر لانه قريب منى وظروف شغلى بتحتم انى اروح متاخر مش اكتر وخلاص يا ستى انا اغيره المرة الجاية بس لو حصل حاجة يبقى ذنبى فى رقبتك ههههه
بالنسبة للفتحات والشوارع دى موجودة فى كل المحافظات وكل الشوارع مع الاسف
ومتفق معاكى طبعا فى كلامك
بس ليه بدل التكسير والحفر واعادة الاسفلت ما يستغلوش ده فى رصف شارع اخر وهكذا وبرده ايبقى فيه نهب وسرقة واكراميات والكروش اتتملى برده
مع خالص تحياتى

همس الاحباب يقول...

العزيزة / مجداوية
بالنسبة للاخت وزة هى الحمد لله كويسة وبخير والجهاز اتصلح والحمد لله بس النت عندها فاصل واحتمال يشتغل خلال الاسبوع الحالى ولو محتاجة اى خدمة انا تحت امر حضرتك بس هى بخير والحمدلله .
تحياتى خالد

همس الاحباب يقول...

حبيب قلبى / عبده باشا
وحشتنى قوى يا رايق
ومنور النايل سات يا رايق
طبعا دول ولاد مصر المخلصين ودول ولاد البطة السودة مش كده ههههههه
بس سيبك انت برده 60 الف جند كانوا يحلوا مشاكل الكادر مش كده هههههههه
تحياتى يا باشا
خالد

همس الاحباب يقول...

استاذى العزيز / الربان
منورنى ومنور مدونتى المتواضعة
وطبعا انا متفق معاك قلبا وقالبا
فى كل كلامك واتمنى اننا نبقى ايجابيين وبلاش سلبية كفاية بجد احنا فى انحدار
اكيد طبعا السفالة وقلة الادب تجلب اختلاف الراىء وعلشان كده ليه مش نتناقش بادب واحترام وكل واحد يبدى رايه بديمقراطية وادب والاختلاف مش عيب
بالعكس ده اختلاف الفقهاء انفسهم رحمة بالعباد فما بالك بنا نحن
تحياتى ليك يا استاذى
خالد

همس الاحباب يقول...

عزيزتى / ابى اللى بحب دماغها قوى
هههههههه
سمعا وطاعة يا سيدتى بكرة اكسرلهم الشوارع كلها
مع الاسف حتى الشغل اللى بيتعمل من غير ضمير وغير مطابق للمواصفات .
اما السفالة ليها ناسها برده وعلى راى كلامك دول دماغهم محشورة فى كعب الشوز ربنا يهديهم
لا متخافيش انتى وراكى قلل وخرفان قصدى رجالة ووحوش محدش يقدر يمسك يا جميل .
اه يا دماغى .
تحياتى ليكى خالد

القط البرى يقول...

ممكن اتعرف بكى
انامدون جديد
وانا القط البرى

رئيس جمهوريه نفسى يقول...

خالد باشا
الى انت بتكلم فيه ده الف باء السرقه فى المحليات يا باشا الفساد فى المحليات وصل للركب ده كلام زكريا عزمى فى التسعينات يعنى حاليا ماتت غرقانه كمان يا باشا المحليات بتضيع حوالى مليار جنيه سنويا من قوت الشعب
موضوع سفالة التعليقات عادى يا برنس كل اناء ينضج بما فيه فكبر الطاسه بعد عملت بولو فى دماغك وولا يهمك يعنى خير رد على السفيه السكوت
محمود

قوس قزح يقول...

حكاية الشوارع و السفلتة و بعدها التكسير دى سبوبة للهيئة بدون كلام و تحسها اكتر كمان فى تغيير الوزرات تلاقى الوزير الجديد يلغى اغلب اللى عمله القديم علشان مش معقول اول ما يدخل الوزراة يفضل فى بيته ابوا شارع مش مرصوف لازم يتنقل المهندسين ولا الزمالك او حتى يجى على نفسه و يروح القطامية

الشرطة ده كبت و الله العالم دى عندها مشاكل نفسية انه يمسك انسان و يضرب فيه او يعذبه و تلاقى مبررهم ده حرامى ابن ... او ده قاتل مراته و عياله
طيب ماهو هياخد جزاءه ..لا بيضربوهم كأن السرقة او القتيل حصلت لقريب فيهم
الاحزاب : انا اللى بقيت متاكدة منه ان اى شخص بيقعد على الكرسى بيتلطش فى عقله به و ينسى كل كلامه عن المبادىء

الفلسطينين دول ربنا يعينهم لتر البنزين عندهم ب 50 جنيه و يارتهم عايزنه علشان يستخدموا عربيتهم لا دول محتاجينه علشان يشغلوا المواتير اللى بتشغل كهربا البيت ..حسبى الله فى كل اللى لابسين الجزم من فلوس الفلسطينين ودمهم

بولو ده حتى اسمه يدل على انه فنان
انت بس تلاقيك كنت بتتحرك كتير تحت ايده :)

امين يا رب العالمين

Barrak يقول...

كلام جميل يحتاجه كل مواطن عربي

يكفينا التمعن بسلبيات الامور


اشكرك

عروسة ننوسة يقول...

بشكرك على موضوعك واثارتك لي...تحياتى لك

Unknown يقول...

اخى الفاضل

طبعا سوف تظل السلبيات والايجابيات

موجودة الى يوم الدين ولكن لو نحن عدنا

الى الله واللتزمنا جميعا بما ورد فى الكتب السماوية ونصحنا به الرسل لن ترى هذه

السلبيات ..فقد قال الحبيب صلى الله عليه وسلم : ( تركت فيكم ما ان تمسكتم به لن تضلوا بعدى ابدا كتاب الله وسنتى )صدق رسول الله صلى الله عليه وسلم

غير معرف يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Monitor de LCD, I hope you enjoy. The address is http://monitor-de-lcd.blogspot.com. A hug.

غير معرف يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Home Broker, I hope you enjoy. The address is http://home-broker-brasil.blogspot.com. A hug.

almasry يقول...

ده اللى انا بقول عليه نيل فى التنيل يصبح متنيل طبعا مدش فاهم وانا كمان تقريبا مش فاهم لكن فعلا عندك حق عيب قوى اما نعمل حاجه خير ونرميها فى البحر دول مش بيرموها فى البحر لكن بيرموها على شط المصرف .. يلا ربنا ينتقم من اللى بيعملوا كده

تحيـــــاتى
المصــــــــــــــرى

القط البرى يقول...

همس الاحباب ده معنى جميل ممكن اتعرف بيه انا القط البرى العمر11سنةومعلوماتى مفيدة وجميلة ونكتى طريفة وظريفة وايضا فقرة اضحك مع القط البرى
القط صاحى ومستنى منك تعليق لاقرا فيه رايك بصراحة

iam القط البرى

همس الاحباب يقول...

القط البرى
اهلا بيك ومنور
تحياتى خالد

همس الاحباب يقول...

رئيس جمهورية نفسى
محمود باشا
منور يا ريس المدونة والمدونات اللى جنبها
طبعا كلامك مظبوط يا ريس
تحياتى وسعيد بزيارتك
خالد

همس الاحباب يقول...

rainbow
منورة المدونة وسعيد بزيارة حضرتك
وشكرا عاى كلامك وتعليقك الجامد
تحياتى خالد

همس الاحباب يقول...

barrk
ميرسى ليك
ويا رب تبقى ايجابيات كلها
منورنى دائما
تحياتى
خالد

همس الاحباب يقول...

gannah
منورة المدونة
واهلا وسهلا بيكى دائما
تحياتى ليكى
خالد

همس الاحباب يقول...

استاذى العزيز / حسن توفيق
منورنى يا عمو
وكلامك فى الصميم
تحياتى وشكرا لتواصلك
تحياتى
خالد