6 أبريل، 2008

اضرااااب

اضرااااااااااب .. ده كلام
بيقولوا الشعب المصرى عامل اضراااااااااااب واعتصام يوم 6ابريل
طب ليه يا شعب بتضرب ليه وبتعتصم ليه هو حد داسلك على طرف
اه انعمل اضراب على الحكومة علشان ناخد حقنا ..
برافو يا شعب وصح النوم بس يا ترى اتعملوا اضراب ليه وعلشان ايه .
علشان الاسعار ارتفعت طب وايه يعنى ما طول عمرها الاسعار بترتفع
ولسه اترتفع كمان وكمان.. وابقى سلملى على الحكومة وزيادة الاسعار بعد الاضراب .
يا شعب عيب عليك ليك اكثرمن 7000سنة بتتسرق وبتاخد على قفاك وانت ساكت
ايه اللى صحاك من النوم خير اللهم اجعله خير اوعى تكون ناموسة نغصت عليك نومك
اتقولى الحكومة عايزة تجوعنا طب وماله ما احنا طول عمرنا جعانين
ممكن الحكومة يكون قصدها انها تعودنا على الصيام وخايفة علينا من التخمة ،وعايزة تعرفنا على فوائد الصيام وتقضى على الشيطان اللى بيجرى فى عروقنا ودمنا .
اتقولى الحكومة مصت دمنا وسرقت قوتنا وقوت اولادنا .
ودى فيها ايه لو على الدم سهل بالجوع دمنا اينشف ومش اتلاقى دم تمصه
ويمكن الحكومة بتحب تتفرج على افلام مصاصى الدماء وتقلده ،ولو على السرقة سهلة احنا كده ولا كده بنسرق فى بعض جاءت على الحكومة يعنى .
اتقولى الحكومة خصخصتنا وباعت تراب البلد .
طب وايه يعنى ما عواد باع ارضه والتراب كان ببلاش الحكومة الله يكرمها باعته بملاليم .
اتقولى الحكومة زورت الانتخابات وعاثت فى الارض فساد.
طب وايه يعنى من حقها تزور وتفسد فى الارض وتتكبر وتدوس علينا بالجزم ما احنا صراصير طالعة من بالوعات المجارى .
اتقولى الحكومة بتضربنا وبتسحلنا .
طب وايه يعنى ده حتى ضرب الحبيب زى اكل الزبيب وسحله احلى من البغاشة
اتقولى البطالة والهجرة غير الشرعية .
طب ما هى الحكومة الرشيدة جابتلكم عقود عمل كخدم وخادمات فى السعودية مش تحمدوا ربنا
وقالتلكم من طلع من داره تقل مقداره ( ده مثل ستى والله دايما تقوله هى ومسافرة ) .
فهمونى عايزين ايه من الحكومة الرشيدة اللى هى من نعم الله علينا كفايه رئيسها هو نظيف وهو فعلا اسم على مسمى ورئيسنا ربنا يديله طولة العمر مبارك وولى العهد بتاعنا اسمه جمال ويا جمال ايامه .
مش كفاية الاسماء الحلوة دى علينا ،ولا انتم كده عندكم عقدة الخواجة وعايزين كلاشينكوف ومغاورى ومجاويش
بالذمة ده اسمه كلام .
افيقوا يا شعب وبلاش بطر احسن النعمة تزول عنكم ..


نرجع تانى لموضوع الاضراب .
انا بصراحة عملت اضراب من يوم السبت وما رحتش الشغل
النهاردة بقى الاحد يوم الاضراب صحيت من النوم قلت انزل اشوف الدنيا فيها ايه
وايه اخبار الاضراب والناس واهى فرصة المدام ما تعرفش انى عامل اضراب
احسن هى كمان تعمل اضراب فى البيت عن الاكل والغسيل وتبقى مشكلة عويصة وتبقى الحكومة بره وجوه مطلعة عينا .
نزلت الشارع لقيت الجو تراب وحاجات غريبة كده قلت سبحان الله حتى الجو عامل اضراب مع الشعب المصرى
بشرة خير طلعت شارع الهرم لقيت الدنيا فاضية والشارع رايق .
طب كويس نزلت ميدان الجيزة قلت اروح اشوف الاضراب فى الميادين يمكن اشارك فى المظاهرات
ويمكن اطلع فى التليفزيون وعلى الفضائيات وممكن اطلع فى برنامج ما يطلبه المستمعون قصدى ما يطلبه المضربون والمعتصمون .
بس مع الاسف ما لقيتش حاجة غير عربية مطافى فى الميدان.
قلت اروح عند مجلس الدولة اهو بالمرة جنب الشغل اشوف الدنيا فيها ايه
لقيت الحال زى كل يوم الاختلاف الوحيد ان الشوارع رايقة والمواصلات سهلة بس.
والدنيا تراب وقفت على شط النيل ما شفتش الشط التانى من التراب .
يا ترى الاضراب ايه اللى تم فيه وايه هى النتائج بعد الاضراب .
يا خبر بفلوس بكرة ايبقى ببلاش.

هناك 8 تعليقات:

مجداوية يقول...

استنى العاشرة مساء والقاهرة اليوم وانت تعرف زى ما أنا مستنياهم كده

وبعدين مقولتش عامل اضراب من يوم السبت ليه انت مصدقت يا سيد

الحكومة قبل الاضراب لغت الجمارك على السلع عشان ترخص من خوفها واحتمال ترجع الجمارك تانى لو الاضراب طلع على فاشوش
وآه يا بلد

appy يقول...

ههههههههههههه عرفت ولا لا طيب لما تفهم حاجه قول

monaliza يقول...

هو انا برضه مستنية ذيك بس الاخبار كلها بتقول ان المحلة كان فيها احلى شغل ضرب ورصاص واضراب واضراب يعنى
الباقى بقى محدش جاب سيرتهم فى حاجة ولو عرفت حاجة حصلت عندكم ابقى قولنا ينوبك ثواب برضه

Desert cat يقول...

هو خوطة ايجابية وكويسة جدا
والاضراب نتيجته مش هتتحسم من يوم
بس يقال ان فى اضراب تانى يوم 4/5 وده اللى انا مش مطمنة له
ربنا يستر

بنوته مصرية يقول...

انا كمان كان نفسي انزل الشارع

بس آآآبي هي اللي منعتني وخوفتني

ياريتني كنت نزلت ههههههههه

بس ربنا يستر بجد بعد الاضراب

تحياتي
رودي

Rainbow يقول...

يعنى بجد كان فى اضراب فى اماكن كتير ؟؟
مش المحلة بس ولا ايه ؟
الجرايد و الفضائيات بيقولوا مفيش غير المحلة الكبرى
حد يقولى يا جماعة لاحسن انا كانت كسفتى بمبى :(

بت خيخة وأى كلام يقول...

هو انا كل ما ادخل بلوج الاقى صاحبه كاتب عن الاضراب
ماتشوفلنا حاجة تانية بقى
جبتولى حالة اكتئاب

همس الاحباب يقول...

شكرا لكل الافاضل
اللى شرفونى بالزيارة والتعليق
وشكرا قوى لتواصلكم
وسعيد بالا خوة الجدد اللى شرفونى كمان
خالص تحياتى
خالد