9 أبريل 2008

بلاها اضرااااب ... بلاها بلطجة

بلاها اضراب00 بلاها بلطجة
نعم الاضراب عدى وراح وفى ديله انكسارات واحزان
من وجهة نظرى الاضراب نجح بنسبة عالية جدا لاسباب منها :-
- الصحوة الشعبية الغير مسبوقة للمجتمع بكل طوائفه سواء صحوة ايجابية بالمشاركة او سلبية بعدم النزول والمقاطعة . - بداية الوعى الشعبى بالاضراب والاعتصام كاداة للضغط على الحكومات .
- احساسنا بادميتنا وحقنا المسلوب وكرامتنا المهانة .
- خوفنا على بلدنا و مستقبلنا ومستقبل اولادنا .
طبعا اختلف رد الفعل من مكان لاخر .. وان كان اشدها فى المحلة الكبرى بلا شك .
المهم الاضراب كان مجرد تنبيه بسيط للحكومة والراى العام اننا لسه موجودين وعايشين .
انا عايز اتكلم عن حاجة تانية بعيد عن الاضراب ومش عايز اهاجم الحكومة ولا ادافع عنها.
بما اننا لسه عايشين ولسه بنفكر ولسه متمسكين ببلدنا وترابها ايه رايكم نشوف عيوبنا الاول
وده مجرد وجهة نظر شخصية ، بادى ذى بدء عايز اتكلم عن النظام والحكومة ومش المقصود النظام الحالى ولا الحكومة الحالية .
اتكلم بصفة عامة عن الحكومات السابقة والحالية والاتية وكذلك الانظمة واقتصرفى كلامى على عناصر اساسية وعامة:
-الديمقراطية وحرية الرأى:-
كلمة جميلة وامنية غالية لينا كلنا بس مع الاسف بيضحك على الشعوب بيها من الدول المتقدمة وغير المتقدمة
واجزم انه لا توجد ديمقراطية حقيقية على مستوى العالم منذ خلق الخليقة وحتى يرث الله الارض ومن عليها
باستثناء صدر الاسلام وفترات حكم الخلفاء الراشدين.
احنا كافراد فى بيوتنا ومدارسنا وجامعاتنا لا نتمتع بتطبيق الديمقراطية وحرية الرأى ولا حتى فى اعمالنا اذا كان مجلس الشعب واعضاءه لا يتمتعون بذلك ولا يطالبون بها من الاساس لمصالح شخصية .
ومن هذا المنطلق لن تجد حكومة تطبق الديمقراطية كما نتمناها ولا حتى جزء منها لان فاقد الشىء لا يعطيه .
لذا يجب علينا انا نبدا بانفسنا فى تطبيق الديمقراطية وحرية الرأى فى مجتمعاتنا وعلى من حولنا ونعطى مساحة من الحرية للراى والراى الاخر وطبعا فى عصرنا الحالى اختلاف الراىء يفسد كل شىء حتى المسقعة .
لان افراد الحكومة والنظام من هم الا نتاج مجتمع غير ديمقراطى لا يعرف معنى للحريات اذن لا نطالب الديكتاتورية بمزيد من الديمقراطية .
- الفساد والتزوير :
كل اناء ينضح بما فيه ونحن مجتمع من اهم سماته الفساد والتشجيع على الفساد فى الارض ونصرة الفاسد ومحاربة الصالح .
- سؤال بسيط من يقوم بتزوير الانتخابات ؟؟؟؟
اتحدى الجميع لو اثبت ان النظام متمثل فى الرئيس وحده هو من يقوم بتزوير الانتخابات بنفسه,او حتى الوزراء مجتمعين هم من يقوم بذلك بانفسهم .
نعم اعوانهم ورجالهم هم من يقوموا بذلك . ولكن من هم اعوانهم ورجالهم؟؟
هم افراد المجتمع موظفين كانوا او افراد هم من زورا وباعوا اصواتهم بملاليم لمن يدفع .
اذن نحن من يزور الانتخابات وارادة الشعب لصالح الحكومات والنظام ونهتف عاش الملك مات الملك .
بلاش التزوير كم منا شارك فى الانتخابات وادلى بصوته لمن يريد ؟؟
يا سادة نسبة المشاركة متدنية من الافراد والاحزاب التائهة وعديمة الاحساس بمسئوليات الوطن وقاطعوا الانتخابات ماشى قاطعنا الانتخابات ماذا سيحدث فوز بالتزكية وهو المطلوب اثباته ،التاريخ لم يتوقف يا سادة لمن هم اعظم منكم شأنا . انا واحد من الاشخاص اقسم بالله لم ادخل لجنة انتخابية طوال حياتى وهذه سلبية لا انكرها وموجودة فى كثير من حولى يعنى انا صوتى هو اللى ايغير الكون دى المقولة الشهيرة على كل الالسنة فى الانتخابات نعم صوتك ممكن يغير الكون ليه لا ..
- الاحتكاروالبطالة :
نعم الحكومات تساعد وتشجع الاحتكار لاننا ساعدناهم على ذلك واعطناهم الفرصة لذلك عندما وافقنا على الخصخصة بمفهومها الخاطى وزينها البعض بانها هى الخلاص والنجاة مما نحن فيه نظرا لسوء الادارة والمصالح الشخصية للبعض،واذا كان من مبادىء ثورة يوليو القضاء على الاحتكار فالثورة نفسها اول من شجع على الاحتكارواحتكرواجميع المناصب لانفسهم ولمن ابدوا ولاءهم ،ونحن كافراد نشجع الاحتكار وخصوصا التجار منا الذين يقومون بتعطيش السوق بحجب البضائع لزيادة اسعارها واصحاب العقارات الذين يقومون بالمبالغة فى الاسعار ويقولون الحديد والاسمنت زادات اسعارهم ، نعم الاسعار زادات ولكن ما تم بناءه كان بالاسعار القديمة اليس كذلك اذن نحن من نشجع على الاحتكار ونساعد الحكومة عليه.ونحكتر انفسنا بانفسنا .
لو تكلمنا على النواحى الادارية حدث ولا حرج فنحن نتمتع بفوضى ادارية لا مثيل لها ويكفى اننا كموظفين اصبحنا مرتشين ومخالفين لضمائرنا و لكل الاعراف الانسانية كذلك واذا كان رئيس ديوان رئيس الجمهورية يقول فى مجلس الشعب ان الفساد فى المحليات اصبح للركب فانى اقول له لقد فاق ذلك بكثير واصبح يلجمنا ورائحته ازكمت الانوف .
يا سادة نحن من نعظم بل ونسجد ونركع لرؤساءنا فى العمل ونقهر مرؤسينا لنيل رضا رئيسنا فى العمل .
بل نحن من نجعل الحاكم اله ونسجد له ونركع له من دون الله عز وجل نعم هذا مايحدث فى المصالح الحكومية وغير الحكومية .
لماذا كل هذا انهم بشر مثلك وليس ملك او رسول يوحى اليه كل اخطاء الحاكم تقصير منا نحن اما عندما يصيب فى حكمه فهذا من ابداعات معاليه وعقله المتزن ونظرته الثاقبة كفانا نفاق وخوف وجبن لكى ينصلح حال البلاد ايها العباد .
نعم لكل قاعدة شواذ ومنا الصالح والطالح .. لكن طالما نريد الاصلاح لابد ان نواجه عيوبنا واخطاءنا وان نتدراكها والا نصبح كالنعام ندفن رؤسنا فى الرمال.ونترك كل شىء على الحكومة والنظام وهيهات ان يحدث صلاح للحال .
انا اطالب وانادى باننا نجعل حب البلد فوق حبنا لذاتنا ..
عايزين مصلحة البلد تتغلب على مصالحنا الشخصية ..
عايز حبنا لدينا ووطنا اغلى من حبنا لانفسنا واولادنا ..
لا ننتظر اصلاح الحكومة والنظام بالكلام والشعارات بل يجب علينا الاخذ بالاسباب .
"وقل اعملوا فسيرى الله عملكم ورسوله والمؤمنون "

فليبدا كل فرد فى المجتمع باصلاح عيوبه واخطائه فى المجتمع بنفسه وشاهدوا النتيجة بأنفسكم
الوزراء والنظام مهما طال امدهم فى الحكم فسياتى يوم ويرحلوا سواء رضوا ام لم يرضوا فذلك قضاء الله وحده .
ولكن الماساة سوف تتكرر مع كل نظام وحكومة لانهم نتاج هذا المجتمع .
فهم من ابناء هذا البلد مع الاسف الشديد ولا انكر حبهم لمصر لكن حبهم للمنصب والجاه اكبر واكبر .

هذه كانت مجرد وجهة نظر .. لا اكثر ..

هناك 34 تعليقًا:

فاتيما يقول...

طب لما الواحد يتقى ربنا فى شغله و يحاول يعمل اللى عليه و مالوش دعوة بغيره ...
مبيقولش ما كله على دا الحال جت عليا أنا ؟
و لما الواحد يتقى ربنا فى حياته الشخصية و يحاول يكون مثالى و معطاء و بيبص للمستقبل و انه يكون أسرة و يخلف ولاد يعملوا خير لنفسهم و للدنيا
و لما الواحد يتقى ربنا فى علاقاته الأجتماعية و لا يحسد و لا يتحشر و لا ياذى حد ... بالعكس يجامل و يطبطب و برضو يبقى فى حاله ميقرفش حد ...
لما الواحد يعمل دا كله يا خالد تسمى دى سلبية برضو ؟
انت عارف الحاجات اللى فاتت دى محتاجة جهاد من النفس قد إيه عشان تعملها من غير ما تخسر حد و لا تخسر نفسك ...
للأسف البلطجى و الفاسد و المؤذى صوتهم عالى و أيديهم طايلة ...
و محاربتهم ممكن ..لأ .. دا عن خبرة ...محاربتهم بتخسرك كتير
و لولا الواحد ربنا بيحبه كان ممكن عقله يفوت خالص و فيوزاته كلها تضرب ...
أنا صعبان عليا حاجة فى اللى قولته
إن كلامك دا موجهة لناس ..للأسف ضميرها مات من زمان و شبع موت
و الضرب فى الميت .....
انت عارف من غير ما اقولك
و لو ان من كتر ما الكلمة دى بقت تتقال ... الحرام نفسه بقى يكتر قوى عن الأول
تحياتى يا عزيزى

عبده الرايق يقول...

خالود حبيب قلبى
انا كنت عايز اقف عند نقطه معينه هى حته التزوير
وان الشعب هو اللى بيزور
=====
اذن نحن من يزور الانتخابات وارادة الشعب لصالح الحكومات والنظام ونهتف عاش الملك مات الملك .
=======
ياصديقى العزيز هو فى دبانه تقدر ترعص او تزن فى النظام من غير اوامر البيج بوص

Empress appy يقول...

اممممممممممممم
موافقه على جميع ما جاء فى وجهه نظرك وبما اننا سلبين فانا معاك
ربنا يحميك ايه العقل ده بس يا خلووود
ده مش انا لوحدى اللى طلع ليه ضرس العقل

همس الاحباب يقول...

استاذتى العزيزة قوى / ام يوسف
طبعا انا سعيد سعادة غامرة بزيارة حضرتك لمدونتى الرائعة
وانا فعلا مقصر جدا فى زيارة حضرتك
بس طبعا حضرتك سباقة دائما
بالنسبة لكلام حضرتك طبعا انا متفق معاه قلبا وقالبا وطبعا انا حزين جدا لما يحدث من حولى وفيه حاجات كتير ما ينفعش اقولها فى بوست واحد بل عشرات ولكن كلامك كله فى الصميم واتمنى اننا كلنا تبقى عندنا صحوة وجهاد للنفس علشان مستقبل بلدنا واولادنا
شاكر لحضرتك كلامك وزيارتك الغالية
وتقبلى تحياتى واحترامى خالد

همس الاحباب يقول...

حبيب قلبى من جوه عبده باشا
منورنى يا باشا ومنور البرنامج العام
مع الاسف اه يا اخى احنا اللى بنعمل كده واحنا اللى بنبيع اصواتنا بالفلوس ونساعد على التزوير وندافع عنه والبيج بوس مش مطلع على قلوب 70 مليون ومش ممكن يشترى ضميرهم الا لو كانو هم عايزين كده ولا ايه راى حضرتك فى المحليات وفسادها برده البيج البوس هو السبب الوحيد
تحياتى يا باشا
خالد

همس الاحباب يقول...

استاذتى العزيزة / ابى هانم
طبعا كلام حضرتك وسامعلى جبينى
بس احنا فين وحضرتك فين احنا لسه بنتعلم من حضرتك يا استاذة
وربنا يوفقنا لما فيه الخير دائما
تحياتى وتقديرى
خالد

Desert cat يقول...

اولا وجهة نظر جامدة واحييك عليها
المفروض فعلا اننا نبدا بنفسنا
وكل واحد يصلح من نفسه ويتقن عمله ويتقى الله فيه ويراعى ضميره
بالنسبة بقى للديمقراطية فحدث ولا حرج اذا كنا احنا بعيد عنها والدليل عندك فى البلوج بتاعى ادخل اتفرج على الناس اللى عايزه ديمقراطية عاملين فيا ايه
تحياتى

Abo 7anf يقول...

استاذ خالد
انا معاك فى كل المكتوب
وطبعا وجهه نظر سليمه جدا جدا
بس فى كلمه سمعتها مره
مفيش حرامى بيسرق إلا لما يكون فى حرامى فوقه بيغطيه
وان لو الواحد لو قطع راس الافعى بتموت
بس اكيد لازم نحسن من نفسنا
ونكون احنا احسن
علشان نعيش

همس الاحباب يقول...

اختى العزيزة / قطة الصحراء
ميرسى على كلماتك الرقيقة
مع الاسف الشديد شفت ما حدش قالى ودى سفالة وده حال البلد اللى احنا فيها
تحياتى
خالد

همس الاحباب يقول...

اخى ابو حنف
منورنى دائما
وكلامك مظبوط طبعا ولا اختلاف
انا فاهم كلامك بس برده ليه حرامى كبير يحمى حرامى صغير
نفسى يكون فيه شريف كبير يشجع شريف صغير
ولا انت ايه رايك
تحياتى خالد

ويكا يقول...

ايه الحلاوة دي يا خلود
بس الحنكة والسياسة دول نزلوا عليك أمتى
ده انت لا ليك في الطور ولا في الطحين
طيب ياعم الأنتيخ
انتا عملت ايه في يوم الإضراب
اعتصمت في البيت - قفلت القهوة اليوم ده احتجاجاً واعتراضاً واعتصاماً
طبعاً مافيش حاجة من دي حصلت
وسلملي على الترمااااااي
تحياتي عمك ويكا

فرنسا هانم يقول...

مش عارفه يا خالد حاسه ان كلامك صح
وحاسه ان الشعب اضعف من ان تلقى عليه بالمسئوليه
انا حاسه اننا مخدرين
مسلوبين الاراده
وزى ماانت قلت الحكام من البلد دى
لكن حبهم للجاه اكبر
وده اللى مخليهم كاتمين نفسنا

غير معرف يقول...

انا جيت هنا اهو
طيب مارد حضرتك كويس اوى
اسأليها بقه ليه هى قافله التعليقات
وليه التعليق اللى على مزاجها بس اللى بينزل
طيب ماهر ردت بقلة ادب اكتر منى فى التعليق على تعليقى
طيب
فى يوم هاتعرفوها على حقيقتها زى ماانا عرفتها
تحياتى

غير معرف يقول...

اه نسيت اقول
ابقى شيل عنوان المدونة
من على صورة المصحف
انت عبيط مثلا ؟
مش عارف انت بتعمل ايه ؟

همس الاحباب يقول...

ويكا
طبعا دى عادتك ولا اتشتريها
اتفضل عبيط كده طول عمرك
ولا تجهيزات الجواز لحست مخك
مش عارف تفرق بين التهريج والجد
بلاش عبط حظك انك النهاردة اجازة

همس الاحباب يقول...

فرنسا هانم
خالتى الغالية منورة الدنيا كلها
مع الاسف ده حقيقة وواقع احنا عايشين وما خفى كان اعظم اصبحنا سلبيين ودى افة خطيرة فى المجتمع ربنا يسترها معانا ونفوق بجد
تحياتى خالد

همس الاحباب يقول...

الشنكوتى
اهلا وسهلا نورت طالما جيت مؤدب
سيبك من ردى وكلامى انا دلوقتى
بالنسبة للاخت قطة الصحراء قافلة التعليقات ليه دى حرية شخصية ومدونتها وهى حرة فيها ده اولا
ثانيااللى زيك واللى زى امثالك لازم تتقفل عليهم التعليقات علشان سفالتهم وطولة لسانهم ايه ذنبها وذنب اهلها انك تشتمها وتشتمهم وتوصفهم بالفاظ سوقية ومنحدرة
وهى حرة تنزل اللى على مزاجها غريبة قوى انك تفرض على الاشخاص رايك
انت تقول رايك بكل ادب واحترام ماليكش اكتر من كده
لا طبعا ردت على تعليقك بما يتناسب مع كلام حضرتك وهى لو عليها كانت اتمسح بيك البلاط بس راعت ان المدونة بيدخلها ناس محترمة مش اكتر
واعتقد ان السفالة لا يرد عليها الا بسفالة مثلها صح ولا ايه رايك.
طب كويس يعنى انت أوانتى تعرفها كويس اهو طب ما تواجهها وجها لوجه واكشف عن هويتك ولا انت خايف من ولا بلاش ..
وحقيقةايه اللى انت بتتكلم عنها كل علاقتنا فى عالم التدوين اساسها الاحترام وابداء اراء مش اكتر يعنى تقريبا عمرنا ما انشوف بعض ولا انتقابل
واختلافنا مش معناه نشتم ونقل ادبنا على بعض ولا انت ايه رايك ..
كفاية كده ..

همس الاحباب يقول...

الشنكوتى
فى دى فعلا عندك حق انا فعلا ما خدتش بالى وشكرا لتنبيهك .
اما انا عبيط ومش عارف انا بعمل ايه
فمش ارد عليك لان العيب لو جه من اهل العيب ما يبقاش عيب
عارف يبقى ايه ..

مجداوية يقول...

فيه قاعدة ايمانية بتقول ,مالا يدرك كله لا يترك كله
يعنى المفروض علينا نعمل اللى نقدر عليه ونغير نفسنا ونطالب بتغيير الفساد والفاسدين واى تغيير للحسن ولو قليل حنكون احنا اللى كسبانين واول الغيث قطرة ودعوة الاصلاح لازم تكون للكل للشعب وللحكومة احنا شعب عايز يتربى من أول وجديد وخير مُربى وخير معلم للخلاق ولكل التعاملات هو رسولنا الكريم وما جاء به فى القرىن وسنته صلى الله عليه وسلم ,ومنهج الله منهج متكامل لمن يريد الاصلاح وكل واحد يبدأ بنفسه ويتغير ويصلح ما فى نفسه وأكيد لو كلنا اتصلحنا حينصلح حالنا ,وهى مش موضوع البيضة ولا الفرخة مفيش بيضة ومفيش فرخة ربنا خلق من كل زوجين اثنين يعنى بالاسقاط على ده يبقى احنا والحكومة لازم نتغير مع بعض لأن كله من كله والحال من بعضه ولا تعايرنى ولا أعايرك الهم طايلنى وطايلك,,دى الخلاصة بعد ما الواحد مخه ورم من التفكير

همس الاحباب يقول...

استاذتى العزيزة / مجداوية
خير الكلام ما قل ودل
وانتى جبتى المفيد واللى انا قاصده من كلامى مش اكثر
الاصلاح يبدا من الافراد والحكومة
ولا صلاح للحال بغير ذلك
تحياتى
خالد

موناليزا يقول...

وجهة نظر تحترم

صوت من مصر يقول...

ده حال الدنيا بجد يا خالد لكن تروى يمكن الامور تنعدل وفى اضراب تانى لكن ادعو ان يكون بلا خراب 4 مايو
كل سنه وهو طيب

(احمد سكر ) يقول...

السلام عليكم
ازيك يااستاذ خالد

بجد انا هنا وانا بقرا مقالك الرائع

حسيت بجد انى بقرأ مقاله صحفيه وافيه

ماشاء الله عليك

لك فائق احترامى وتقديرى

اما يعم بخصوص الحكومه والفساد والاحتكار وو...وو... و صدقنى هتتعب نفسك ع الفاضى
عارف ليه علشان زى اابى ماقالتلك احنا سلبيين

تحياتى احمد سكر

الربان يقول...

تحياتي

نخطيء اذا فهمنا ان عمال المحلة اضربوا
للاشتراك في الاضراب..
لكنهم يا سيدي سبق لهم ان اضربوا وكانت لهم مطالب...منها الاجور...تعيين ابتائهم بالشركة....تغيير الادارة...
ذهبت اليهم الوزيرة ...وزيرة القوي العاملة و اخرون...ووعدوهم بتلبية طلباتهم...
بالفعل تم عزل مجلس الادارة...و الان تمت احالته الي النيابة العامة...

الطلبين الاخرين...ماطلت الحكومة ، كعادتها، في التنفيذ....و ظنت ان الامور قد استقرت لها...

العمال انتهزوا فرصة دعوة 6 ابريل لتجديد المطالبة بطلباتهم...و اعتقد
انهم حققوا ما ارادوا...الا اذا عادت الحكومة و لحست ( نعذرة علي اللفظ) وعودها و ايضا كالعادة.

اما الفساد فهو آفة تنخر في كل امم الارض...لكن لانخفاض مستوي المعيشة في مصر
فقد استشري يا سيدي ....

نحن كشعب مطلوب منا الا نساعد علي الافساد و الفساد...لا للرشوة...لا للمحسوبية....لا للوساطة لاخذ حقوق الغير.....الخ..

ربنا يولي من يصلح و يرزقه البطانة الصالحة التي تدله علي الخير و تعينه عليه.

تحياتي و تقديري.

د/اجدع بنوته يقول...

بوست جيد جدا

ومخدوووم كويس اوى

وواضح ان اصبح مايشغلنا جميعا حرية الراى والديمقراطيه

تحياتى

غير معرف يقول...

عزيزي خالد

اول و اكيد مش الأخيره

بخصوص الأضراب اللي حصل هو كان علامه ان الشعب له صوت و بدأ يتكلم

و صدقني ياخالد لو حتي محموعات وقفت سوا و هي صامته مش غير اي كلام برضه حيكون ليها معني

في رأيي ان الفساد بيبتدي بالأفراد يعني لازم كل واحد يصلح من نفسه و بعدين يبص للمجموعه
و عبارات زي و انا مالي مفروض تنتهي من حياتنا و الديموقراطيه لازم ماتكونش مجرد كلمه بنقولها لكن أفعال بنعملها

تحياتي ليك و في انتظار جديدك

Unknown يقول...

عندك حق بس اختلف معاك فة موضوع اننا بنصنع التزوير و الفساد بأدينا

فيه واحدة مدونة حكت عندها كارثة تعرضتلها فى الاتنخابات أجبروها هناك و منهم ظابط انها ترشح ناس معينة

الذنب كله مش عندن الشعب صدقنى

همس الاحباب يقول...

العزيزة موناليزا
منورة وشكرا لكى
تحياتى خالد

همس الاحباب يقول...

صوت من مصر
منور يا محمد واتمنى ذلك
وربنا يصلح الاحوال
تحياتى خالد

همس الاحباب يقول...

استاذ/ احمد سكر
منور وسعيد جدا بزيارتك
وميرسى على كلامك الجميل
طبعا احنا سلبيين ونتمنى نبطل السلبية
تحياتى ليك يا استاذى
خالد

همس الاحباب يقول...

استاذى العزيز / الربان
كنورنى يا استاذ دائما
وسعيد جدا بزيارة حضرتك
وطبعا انا متفق مع وجهة نظر حضرتك
وكلامك مظبوط طبعا
واتمنى انهم ينفذوا وعودهم
تحياتى خالد

همس الاحباب يقول...

د/ اجدع بنوته
منورة وحمدلله على السلامة
وميرسى لكلامك الرقيق
تحياتى خالد

همس الاحباب يقول...

اجندا حمرا
سعيد بزيارتك واتمنى التواصل دائما
طبعا انا متفق معاكى جدا
وكلامك صجيح طبعا
تحياتى خالد

همس الاحباب يقول...

الاخت/ عاليا حليم
اولا سعيد بزيارتك
ووجهة نظرك صحيحة طبعا
بس يا ترى الشخص ده اللى فرض عليها الاختيار مش برده من افراد الشعب اللى بيساعدوا على التزوير
واحنا فعلا لو عارفين حقوقنا وواجباتنا صح محدش ايفرض علينا الاختيار
وربنا يوفقنا لما فيه الخير
تحياتى لكى
خالد