7 مارس 2008

الحب والزواج

خير اللهم اجعله خير حاجة جت على بالى من كتر ما باسمع وباشوف عن عزوف بعض الشباب والبنات عن الزواج بدون حب قبل الزواج ( حلوة عزوف دى ) يعنى هو موضوع يستاهل نتكلم عنه ولا ما فيش داعى هو صحيح الظروف الاقتصادية خلتنا عزفنا عن كل حاجة سواء عن الحب والزواج واى حاجة حلوة بس من وجهة نظرى مشكلة وتحتاج لمناقشة.

وبالمناسبة دى نقرا الحوار ده من حوارات هو وهى ونشوف اراء الاخوة والاخوات ده لو حد عبرنى اصلا وقرأ البوست .

هى : اخشى ان تسام الحب!!

هو : كيف اسام الحب.. والنظرة فى عينيك متجددة وحديثك يبعث فى نفسى الدفء!!

هى : من يدرى لو تزوجنا ماذا سيكون مصير هذا الحب ؟

هو : من يحب لابد ان يفكر فى الزواج ..

هى : واذا لم يكن الزواج مستطاعا ؟

هو : يبدو انك ترفضين الزواج ..

هى: اخاف من المشاكل ، هل يمكنك ان تقول لى كم عدد السعداء من المتزوجين ؟

هو: اتعنين ما تقولين ؟

هى : لو اننى وافقت وتزوجتك ماذا سيحدث ؟

هو : سيكون لنا بيت واطفال ..

هى : ولكنك ستملكنى ، ساصبح شيئا تراه كل يوم سوف تضيق بى وتملنى !!

هو : انت امراة غريبة .

هى : بل امراة تدافع عن حبها ، امراة لا تريد ان تعيش لتاكل وتشرب وتنجب اطفالا..

هو : انها سنة الحياة !!

هى :الحب هو حياتى الحقيقية ..اريد ان تكون حياتى مملوءة بالخوف والقلق واللهفة ..اكره ان اعيش فى برود .

هو : لقد خدعتنى !!

هى : انا لم اخدعك .. انها فلسفتى فى الحياة ..

هو : ولكنى لن اعيش بلا زواج .. كنت انت املى الوحيد ..

هى : تزوج بمن تشاء ، اننى لا امنعك .

هو : وتدعين انك تحبيننى !!

هى : انا لن اتزوجك لاننى احبك ولا اريد ان اقتل هذا الحب !!

هو : الحب الذى لا ينتهى بالزواج حب ناقص !!

هى : وماذ ينقصك ؟

هو : ان تكونى زوجتى واما لأولادى ، ان تكونى رفيقة عمرى ، هذا ما يفعله كل الناس ..

هى : انا لست مثلهم ، لا اريد ان افسد حياتى بالمشاكل !!

هو : انت انسانة انانية ، وتركها وانصرف وهو يكاد يحترق من الغيظ .

كلمات للاستاذ / سمير عبد القادر بجريدة الاخبار ..

السؤال : هل حقا الزواج يقتل الحب ؟؟؟

ده سؤال للمتزوجين اولا وغير المتزوجين طبعا ..

بس المهم مش عايز حد يحدف طوب ولا زلط علشان خاطر الزجاج ما يتكسرش والشاشة كمان لسه جديدة

يعنى ممكن اللى ايحدف يحدف طماطم و بطاطس وبدنجان رومى ويا سلام لو معاهم زجاجة زيت لزوم عمل المسقعة

ماهى فعلا الحياة بقت مسقعة .
ويجعله عامر ...

هناك 27 تعليقًا:

المـــفـــــــقــــــــوعـــــة مــرارتـهــا يقول...

الحب بعد الزواج بيبقي مختلف عن الحب قبل الجواز ... قبله مابيكونش فيه مسئولية وبيبقي حب فقط لوجه الحب والتسبيل حتي الزعل قبل الجواز بيبقي حلو وبيبقي بعده صلح جميل
اما بعده فالعشرة بتخلي الزوجين واخدين علي بعض بزيادة وكل واحد مابيجملش من طباعه وبيبان علي أصله

همس الاحباب يقول...

اختى المفقوعة مرارتها
شرفتينى طبعا وعندك حق فى اللى انتى قولتيه طبعا حضرتك متجوزة واضح
بس فعلا قبل مفيش مسئولية زى بعد الجواز
تحياتى ليكى

Desert cat يقول...

معلشى يا خالد الحب هو الحب مبيختلفش بعد الزواج
بالعكس بينمو اكثر
زيه زى الشجرة كل ما بتهتم بيها وتراعيها بتكبر وتعطيك ثمار
هكذا الحب والزواج هو النهاية الطبيعية للحب والثمار هم الاطفال
كون الوضع بيختلف واحد الطرفين او الطرفين معا بيحسوا بملل فده بيكون خلل فى العلاقة نفسها وبتتحول من حب لروتين ... شغل ونوم وتربية عيال وان الله يحب المحسنين
فى الحالة دى كل واحد يشوف الخلل الى عنده فين ويصلحه ووقتها الحياة حتكون اورانج ان شاء الله

انين الحزن يقول...

حلو البوست اوي علي فكره

بس عايزة اقولك حاجه الاول الزيت غلي اوي

انت طمعان في ازازه كامله طب قول شويه كدا لعمل المسقعه

.....
راي بقه

الحب لو بجد مهما حصل من مشاكل ومسئوليه والحاجات الكتير بتاعت الجواز دي
لو حب حقيقي مش بيحسوا باي مشاكل وبيبقي طعمه احلي

يعني مش بيختلف ولا حاجه دا من رأي
بما اني بحب الحب اوي يعني


سلاوووووووز بقي وكدا
وزة

آخر العنقود يقول...

السلام عليكم

انا طبعا مش خبرة اوى فى امواضيع دى
بس برده مايمنعش انى يكون ليا راى ولا اييييه؟

اولا انا اللى اعرفه ان الحب بيكون هوه هو بعد الجواز لكن بيدأ ياخد اشكال تانية يعنى بيختلف فى الكيفية مش فى الدرجة
يعنى من حيث الاحساس بالمسئولية
واللى انا بعتبرها فى حد ذاتها حب
لان معنى انى اكون مسئولة عن شخص معين وبعمل على اسعاده ده كده حب

احنا لو بنحب بجد مش هيكون فى خلافات ومشاكل

لو بنحب بجد كل حاجة فى حياتنا هتكون حلوة

لو بنحب بجد كل واحد هيخاف على شعور التانى ومش هيزعله

بس ده لو فعلا بنحب بجد

تحياتى ليك ومعذرة على الاطالة
تقبل مرورى

Empress appy يقول...

بص يا بتاع المصقعه انت
هقولك المشكله مع وجود مشاكل اصلا فى الجواز فبيقل الحب قبل ما تدخل لمشاكل الجواز يعنى يبقوا اتنين فى بيت واحد انما تعالى لو حد تعب ولا زعل ولا اتكعبل حتى فى حرف السجاده هتلاقى التانى وقف جنب وزعل عليه
وعقبال لما افرح فيك وانت متكعبل فى حرف السجاده هههههههههههههههههههه

همس الاحباب يقول...

عزيزتى قطة الصحراء
انا طبعا مش معترض على كلام حضرتك
هو فعلا احيانا الحب ينمو ويزيد بعد الزواج اكثر من قبل بس برده ايبقى فى روتين فى الحياة
واتمنالك طبعا حياة اورانج وموف كمان
تحياتى

همس الاحباب يقول...

اختى الغالية وزة
ميرسى لذوقك قوى مع انى كنت خايف منه قوى ومش عايز انزله
اعمل ايه انتى عارفة الازازة بتطير بسرعة نظرا لعوامل التعريةالاقتصادية بس ما تخافيش اعزمك على المسقعة وانا متفق معاكى يا وزة وربنا يكرمك ويسعدك يا رب
تحياتى خالد

همس الاحباب يقول...

العزيزة اخر العنقود
طبعا انا سعيد بزيارتك جدا جدا
واتمنى التواصل
وطبعا رايك صحيح ومنطقى وانا متفق معاكى فيه وفعلا لو بنحب بجد كل شىء يهون .
تحياتى ليكى

همس الاحباب يقول...

اختى العزيزة آبى هانم على سن ورمح
طبعا انتى من حقك تقولى اى حاجة بتاع المسقعة بتاع الخيار انا ما اقدرش ارد طبعا لانك مش اتحدفى زيت انتى اتحدفى زير واتسيبى خرفان وانا ما اقدرش على كده
طبعا انا سعيد جدا بزيارتك وكلامك مظبوط فعلا وعارف انك بتعزينى قوى وعايزانى اتكعبل فى السجادة مش كده
طيب احب اقولك انسى يا عمرو
عقبالك كده لما تتكعبلى فى غسيل السجادة مش حرفها بس
تحياتى ..

Marwa Friday يقول...

حب إيه اللي انت جاي تقول عليه
ههههههه
عارف يا خالد
لما يكون عندنا حب حقيقي للكيان الكبير اللي احنا عايشين فيه وانتماء له
أعتقد إن الحب مش هيتغير لا بعد ولا قبل الزواج.. الحب هو الحب واللي بيحب عمره ما بيكره على رأي الأفلام العربي(الأبيض والأسود)!.. تحياتي

همس الاحباب يقول...

الاستاذة الكبيرة قوى
مروه جمعة
طبعا نورتينى وحمدلله على السلامة من الهروب
انا متابعك بس شكلك كنتى مشغولة شوية
المهم طبعا الحب هو الحب واللى يحب عمره ما يكره بس ياترى ايختلف ولا ايفضل زى ما هو الله واعلم بكده
تحياتى ليكى

منوفيـــايــة يقول...

أولا"...عاوزة اقول ان فعلا" ده تفكير سائد جدا ف المجتمع موضوع ان " اول ما الجواز يدخل م الباب ..الحب يخرج م الشباك"...بيقولو كده
انا عن نفسى مش خبرة بس انت قولت ان السؤال عام... ورأيي انه
طالما الحب ده صادق وخالي من اى مصالح دنيوية وصافى لله...أكيد عمره ما هيروح ولا هيقل
يمكن المشاكل ساعات بتنسينا اننا بحب بعض وبتنسينا الصلة اللى بتربطنا والروتين بيخللى الحياة ممله
بس اكيد لو الطرفين متمسكين ببعض وكل طرف فيهم بيسعى لسعادة الآخر أكيد السعادة هتتوجد بينهم
والمشاكل دى ممكن تتحول لحاله عابرة لكن الحب الصادق باق باق باق ... ياولدى
اسعدتنى زيارتى لمدونتك
تقبل مرورى
سلااااااام

همس الاحباب يقول...

الاخت مستجدة
سعيد جدا بزيارتك لمدونتى المتواضعة وارجو التواصل
وانا مقتنع جدا برايك
وربنا يوفقك ويسعدك دايما
تحياتى ليكى

الـسـيـدة نـون يقول...

ايام زمان كنت بحب اوى اقرا العمود ده
بعد كدة حسيت انه عمود خنيئ ومابقتش بحب اقراه

الجواز بيقتل الحب
امممممممممممممممممممممم
امممممممممممممممممممممممم
الجواز مسؤلية بنت كلب
مش لعب عيال ولا شهر عسل دائم
الجواز تقييد لحريتك وحريتها
الجواز ماينفعش فيه انا عايز او انا عايزة
الجواز معناه انتوا عايزين ايه علشان توصلوا لبر الامان
ولو فيه اطفال يبقى الاهم هو التفكير فى مصلحة العيال قبل ما تفكروا فى نفسكم
واضح انك مش متجوز يا خالد
سلام
اختك خيخة

همس الاحباب يقول...

خيخة هانم
ازيك
كلامك صحيح طبعا وانا عارف ومقدر والمتجوز هو اللى ايحس بكده

بس مع الاسف دخلت القفص يااختىعلشان كده حاسس بكلامك
تحياتى ..

Unknown يقول...

هى انسانة غريبة شوية ما فيش واحدة فى راى تحب واحد و تسمع منه الكلام ده و ياكدلها كذا مرة و تقوله تزوج بمن شئت مادام بيحبهاو بيحلم يعيش معاها هى بس تخلى بالها منه و ماتهملوش بعد الزواج و هى تبقى سعيدة

-----------------

اما بالنسبة لاسباب العزوف عن الزواج من كلا الجنسين لاسباب اجتماعية و اقتصادية كتير زى خوف الولد من سلوك البنات من الى بيسمعه و يشوفه و كذلك البنت برده و فيه ولاد بيخافوا من مسؤلية الزواج اصلا و عايزين يعشوا بحريتهم الزواج بالنسبة تقييد و كذلك برده البنت بتخاف لا الزوج يقيد طموحها و علاقتها باصدقاءها و اقاربها
برده غلو الاسعار و اسباب كتير

Unknown يقول...

عم خالد
اوعدك ان شاء الله لما الاقيه ويلاقينى
همسك فيه واحاول قدر المستطاع ميرميش نفسه من البلكونة
وبعدين ملكش دعوه بعمك عامر

مجداوية يقول...

ربنا سبحانه وتعالى وصف علاقة الزواج بالمودة والرحمة فاذا كان هناك تعريف للحب يبقى هو ده وخصوصا الرحمة لو بتحب حد حتبقى رحيم معاه وحط تحت بند الرحمة كل امور الحياة يعنى متتعبوش ولا تزعله ولا تخونه ولا تجرحه ولا ولا ولا .... الخ الخ , لو بترحم حتكون انسان ولو انت انسان الحب حيكون سهل عليك يعنى المودة والرحمة أكبر شموليه من الحب لأن لو الحب فتر لأسباب الرحمة حتنقذه ,, مشاكل الدنيا خلتنا (نعزف) على الربابة أخى الكريم,,

غير معرف يقول...

الحب هو قناعة من الطرفين ببعض
انا أقتنع تماما باللى بحبه وبيكون اللى بحبه هو الأفضل برغم أن أكميد فيه أفضل بس بالنسبة لناس تانية
تحياتى على حسن الطرح
أدعوك لزيارة مدونتى آفاق الإسلام
http://islamic-horizon.blogspot.com/

همس الاحباب يقول...

الاخت العزيزة / عاليا حليم
شرفت بزيارتك لمدونتى المتواضعة
وحقا ما قولتيه وانا متفق معه تماما
تحياتى ليكى واتمنى التواصل
خالد

همس الاحباب يقول...

عزيزتى لماضة
حمدلله على السلامة
وربنا يكرمك يااختى بابن الحلال اللى يعرف قيمةلماضة هانم
ماشى يا ستى عمو عامر ايقوم بالواجب طبعا .
تحياتى ..

همس الاحباب يقول...

مجدواية
سعيد جدا بزيارتك الكريمة واتمنى التواصل
تحياتى

همس الاحباب يقول...

اخى العزيز عمر المصرى
شرفت بزيارتك جدا
ومعك وحق وتمنياتى لك بالسعادة والتوفيق
وطبعا سوف ازورك فى مدونتك
تحياتى

Empress appy يقول...

انت رحت فين مش بتكتب ليه هو انت اتكعبلت فى السجاده ولا ايه بركاتك يا شيخه آبى هههههههههههههههههه

الـسـيـدة نـون يقول...

هو انت مختفى ليه
فين جديدك يا عم خالد

موناليزا يقول...

الحب من وجهة نظرى دعامة قوية للزواج ولكن الطريقة فى التعبير بتختلف قبل الزواج عن بعده
وما اجمل الزواج القائم على الحب