14 مارس 2008

صعبان عليا


تحــــــــديث

=============

دى الصورة بعد الحلاقة بيوم واحد ومش عايز تريقة ولا شماتة والا......

الساعة الواحدة والنصف صباحا حالة ملل وضيق

انا لسه قاعد فى الكافتيريا خلصت على الجرايد كلها

ايه الزهق اللى انا فيه ده كله بس وجدتها اكيد من شعرى

فعلا شعرى بقى طويل وعامل زى الاسفلت بتاع الشوارع الشعبية

كله مطبات وامواج احسن حاجة اروح احلق اضيع شوية وقت بس النهاردة الاتنين

مش مهم فيه حلاق فاتح جنب الكافتيريا هو بيبوز الشعر بس مش مهم .

بقول للصنايعى ممكن تشوف الحلاق فاتح ولا قفل طلع ورجع بسرعة قفل طبعا

طب وايه يعنى انا اتصل بالحلاق بتاعى اكيد لسه فاتح بس برده النهاردة الاتنين

مش مهم اكيد هو فاتح محدش بيقفل دلوقتى وهى طالبة معايا انى احلق النهاردة

المهم اتصلت بالسيد الاستاذ / بولو ومحدش يسال مين بولو ده اسم الحلاق
انا كده موعود بولو ودقدق واسماء مش عارف بتيجى منين ما علينا المهم احلق بس .

-الو ايه يا بولو ازيك عامل ايه

-الحمدلله ازيك يا استاذ خالد

- انا الحمد لله

-طبعا انت فاتح النهاردة اه بصراحة كنت فاتح ولسه قافل من 10 دقايق

- ده اسمه كلام انا كنت عايز احلق النهاردة .

- معلش يا استاذ خالد والله عندى ظروف اصل اخويا جاب بنوته ورايح اشوفها.

- طب الف مبروك وعقبالك كده .

- انا على العموم منتظرك بكرة يا باشا

- انشالله لو عشنا لبكرة ابقى اجى يا بولو .

قفلت الموبيل وانا قرفان من نفسى مفيش فايدة افضل كده لبكرة

انا بكرة اجازة وكنت عايز احلق واروح انام اليوم كله من التعب

يلا مش مهم الساعة الثانية والنصف كفاية كده اسيبهم يروقواالكوفى

اروح انا انام وبكرة ابقى احلق بجملت ما جاتش على يوم .

تانى يوم يلا يا رجالة خلوا بالكم انا رايح احلق واجى بسرعة ما تعملوش مشاكل مع بعض علشان انا عارفكم لا ما تخا فش عيب احنا رجالة ( اه انا عارف ويا خوفى يا بدران )

المهم الساعة كام الساعة 1.30 صباحا يا ترى بولو لسه فاتح

اجرب ارن عليه ترررررررررن،جرس وما حدش بيرد كويس يبقى قاعد جنب اخوه بيشد من ازره

لا انا اروح يمكن مش عايز يرد عليا. قربت من المحل مفتوح طب الحمدلله وكمان رايق ما فيش حد بس.

فين بولو الصبى بتاعه راح يجيب حاجة وراجع طب مش بيرد ليه على الموبيل ..

اصله نسيه وخرج يجيب حاجة اوك ما فيش مشكلة استناه،

ثوانى ولاخ بولو جاى ماسك كيس شيبسى وبيتسلى ولا على باله حاجة طبعا .

- ايه يا عم بولو مش انحلق فى سنتكم دى ولا ايه

- لا طبعا اتحلق يا باشا معلش امبارح انا قفلت لانكنت رايح اشوف بنت اخويا اصلهم بيقولوا شبهى .

- شبهك طب كويس واجب يبقى لازم تشوف شبهك طبعا .

- اتفضل اقعد على الكرسى .

- حاضر يا عم بولو محسسنى انى اقعد على كرسى الرئاسة ما علينا يلا.

وبدا الاستاذ بولو فى الحلاقة سويعات ودقائق مرت والاستاذ بولو شغال يحلق
ويرغى فى ودانى وانا ساكت خالص باسمع بدون تعليق.

- بقوللك ايه يا باشا.

- نعم يا بولو قول .

-انت عندك شعر ابيض كتير .

- طب وايه المشكلة .

ايه رايك اصبغه ليك انت مش عايز تتجوز .

-انا لا طبعا مش اصبغه كده عاجبنى قوى وبعدين اتجوز تانى ليه هو اللى يجوز مرة

يفكر تانى فى الجواز يا بنى اللى يتجوز مرة يبقى بطل فى الايام دى .

- طيب وايه يعنى ما عندك الحاج متولى متجوز اربعة هههههههه0

- طب ده الحاج متولى امكانياته مساعداه وده عامة تمثيل فى تمثيل .

- يا بنى اللى متجوز اتنين بيصوت فما بالك باربعة .

- انت عارف يا عم خالد .

- لا مش عارف يا بولو00 خير اطرشنى !!

- انت عارف فيه واحد جنبى هنا متجوز اربعة .

- معقولة ربنا يكون فى عونه.

- انت عارف ومقعدهم فى شقة واحدة مع بعض .

- انا بدهشة واستغراب يا سلام ده قادر وفاجر صعب يا بنى اللى انت بتقوله.

- اه والله زى ما بقولك وعيالهم بيحبوا بعض .

- ربنا يوفقه يا عم بولو وعقبالك لما تبقى زيه ،الكلمه شكلها عجبته ضحك قوى.
- ههههههههههههه انشالله.

- بقولك ايه انا زهقت عايز اروح .

- خلاص اهو قربت اخلص ايه رايك كده .

- حلوة بس الجناب طويلة يا بولو خفها شوية.( ودى كانت غلطتى )

- حاضر بس كده اتبقى رقم واحد .

- انا بقى بكل ثقة عادى يا بولو مش مهم واحد ولا اتنين .

- لا انا بقولك بس علشان تبقى عارف .

- ماشى يا عم بولو ادينى عرفت ..

بولو افندى جاب المكنة واشتغل فى الجنب اليمين فجاة وبتامل فى المرايا لقيته شايل الشعر كله

- ايه يا بنى ده انت بتعمل ايه .

- يا استاذ ما انا قولتك اتبقى رقم واحد .

- انت خليتها زيرو كده مش واحد ولا يحزونون .

- لا ما تخافش انا اظبطه ليك

- ماشى براحتك

وسيبته براحته وفجاة لقيت الجناب بيضة والقفا يا عينى على القفا مبقاش قفا

بقى زى قفا تايسون فى مباريات الملاكمة

- ايه رايك كده يا باشا كده حلاقة انجليزى وقريبة من الكابوريا كمان.

- الله يخرب بيتك والبيت اللى جنب بيتك انجليزى ايه وكابوريا ايه انا بقيت زى الديك الشركسى كده ليه

-انا عمرى ما حلقت كده من يوم ما تولدت قفا النجعاوى الكبير ضاع يا رجالة .

- لا اتعجبك قوى يا باشا .

- ماشى يا عم بولو شكرا ليك ولخدماتك اوعى كده انا اغسل شعرى علشان انا زهقت منك .

- لا ثوانى اعملك ماسك وحمام كريم .

- ايه اللى بتقوله ده يا بنى انا كده اهلى ايتبروا منى ومش بعيد يضربونى بالنار .

طبعا انا خلصت حلاقة ورجعت الكافتيريا كانت الساعة 3.30 صباحا

فجاة لقيت الصنايعية بيبسوا قوى وبيضحكوا ، ايه ده يا استاذ خالد ايه اللى انت عامله ده.
عامل ايه يا غبى منك ليه احنا اول مرة نشوفك كده بس جميلة قوى فيك .

يا سلام شكلى كده ارجع اقتل بولو واجى اخلص عليكم انتوا كمان وارتاح .
لا والله جميلة بجد ماشى يا عم الظريف منك ليه اتريق .

طبعا روحت البيت الساعة 4 صباحا قعدت ابس فى المرايا والله شكلها حلو مش وحش برده

بس صعبان عليا القفا حرام عليا اسيبه كده مش مهم بكرة يكبر وينسى .

يلا مرة تفوت ولا حد يموت ..

وده جزاء اللى ما يسمعش كلام بابا وماما وينسى يشرب اللبن كل يوم.

وكمان ينسى يغسل اسنانه ورجليه كويس .

هناك 38 تعليقًا:

Desert cat يقول...

الاول احجز اول رد
واروح اراجع البوست

Desert cat يقول...

ههههههههههههههههههههههههه
متخيله منظرك يا خالد بالحلقة الجديدة
وفرحانه فيك اوى
وانت عارف انا فرحانه فيك ليه
يا بابا خالد
لووووووووووووول

د/اجدع بنوته يقول...

ههههههههههههههههههههههه

خالد ياخالد

ياحول ولا قوة الا بالله

بس سيبك انت شكلها جامده برده

بس انا عندى استفسار صغير

هى كابوريا .. ولا اشبهه بالكابوريا

تفرق برده

ههههههههههههههههههههههه

همس الاحباب يقول...

اختى العزيزة اسد الصحراء
مبروك اول تعليق
بقى فكرينى اجيبلك مصاصة بتنور بنص جنيه .
تحياتى

همس الاحباب يقول...

قطة الصحراء
انتى كده اتخسرى الجايزة
واحرمك من الميراث
يا شماتة ابلة ظاظا فيه
عامة مردودلك فى الافراح
تحياتى يا قطة

همس الاحباب يقول...

د/ اجدع بنوته
نورتينى طبعا
معلش يا اختى بتحصل مع احسن قفا
هو قالى اسمها قصة انجليزى
والعيال الصنايعية اقوللى كابوريا
بس انا حاسس انى زى الديك الشركسى يا اختى اللى نافش ريشه ده ايام ما كان ليه ريش
تحياتى ولا اراكى الله مكروه فى ديك يخصك
تحياتى

عبده الرايق يقول...

خالد
ايه ده
انت لسه بتحلق هنا فى ايجبت
نو
كنت قولى وانا اوديك للحلاق بتاعى فى باريس
او فى لندن
او فى مقديشيو
او كيوشو
على العموم حصل خير
والمره الجايه متحلقشى لوحدك
الطياره المخصوص تحت امرنا
نحلق ونرجع فى نفس اليوم
بس انا اللى هتحاسب
علشان الكادر لسه مجاش
وانا بطمنك من دلوقتى على الكادر
واول ما تحب تحلق
اتصل بيا
وابعت لى الف جند رصيد علشان اكلم اصحابى فى الخارج

عبده الرايق يقول...

تصحيح

انت اللى هتحاسب
احسن تفهم غلط
واقع فى شر اعمالى

مجداوية يقول...

سؤال وجيه هم ليه الرجاله دايما يروحوا للحلاق اللى دايما بيبوظ شعرهم ,,أنا سمعت الجملة دى كتير انه بيبوظ شعرى بس بأروحله ,,ليه بقاااااا؟؟ محدش قالك نعيما ,,نعيماوعقبال المرة الجاية عند نفس الحلاق برضه

انين الحزن يقول...

خالد ازيك


نعيماً يامعلم

عارف نفسي اشوفك بالنيو عوك الجديد
قصدي النيو لوك بتاع بولو

سلاموووووووووز
وزة

Unknown يقول...

اخى الفاضل

دعوة
للتضامن مع

حملة حماية

والتى اطلقها الداعية الاسلامى الكبير

عمرو خالد

فى انتظارك ولا تتردد

موناليزا يقول...

متصور ايه من واحد هيحلقلك وش الفجر طبعا الراجل فاصل وعايز ينام ده غير انه فاضيلك انت وبس يعنى يجرب التسريحات اللى مابتمشيش براحته
تانى مرة احلق بالنهار
عموما نعيما

la3lahakhier يقول...

بص انا جربت اعمل اى حاجة ومودى مش رايق لازم ماتطلعش مظبوطة
هما قالوا النهار له عنين ليه ؟
على العموم حلقة تفوت ....
تحياتى

فرنسا هانم يقول...

نعيما يا اخ خالد
مش كنت تحط للاخ بولو
الف
ويبقى اسمه ابولو
كانت هتبقى حلاقه فضائيه
مكوكيه
ونعيما للمره الجايه

Empress appy يقول...

حد يعمل كده ههههههههه
طيب لو سمحت متكلمنيش لغايه لما قفاك يطلع قصدى شعرك يطلع وبعدين حج متولى ايه انتم هتصدقوا نفسكوا ما هو ده اللى وداكم فى داهيه
رجاله متجيش غير بالعين الحمرا هههههههههههههههههههه
وبعدين الماسكات والحركات دى سبوبه اى كلام خلى المدام تعملك فى البيت عادى يعنى والله من حاجاتها واوفر برضه

همس الاحباب يقول...

حبيب قلبى عبده باشا الرررررايق
منور يا عبد طب اعمل ايه مضطر احلق فى ايجيبت اصل المودام بتاعتى حرمانى من المصروف وطالما انت عازمينى مفيش مانع طالما انت اتحاسب بس المهم الكادر ده ايجى امتى انا عندى احساس انك اتبيعنى قريب وعايز الف جند بس طب خليهم 5او 6 الفلوس كتير بس النفس اللى تصرف وناخد شوية فكة يورو على دولار مصاريف البنزين بتاع الطيارة
تحياتى ليك

همس الاحباب يقول...

الاخت مجداوية
هو بصراحة مش باز بسببه بسببى انا
هو خفه قوى مش اكتر على العموم ميرسى ليكى وانعم الله عليكى
تحياتى ...
===========================
انين الحزن
ازيك يا وزة
انعم الله عليكى
على فكرة عندى صورة بالنيو لوك وانزلها فى البوست
احسن انا حاسس بريحة شماتة من الاخوة المدونين واتبقى موجودة على الايميل بتاعى كمان kh_cyc2006@hotmail.com
حتى انتى يا وزة وانا اللى بقول عليكى وزة ونعم البط .سلاموووووووز يا وزة

===============================
عمو حسن
حاضر انا ما اقدرش اتردد طبعا
تحياتى ..
===============================
موناليزا
تحياتى ليكى
وحاضر ابقى اروح بالنهار بس مش ببقى فاضى بالنهار ده غصب عنى .
تحياتى وميرسى

==============================
لعله خير
والله المود كان تمام التمام
والليل فى انوار واضاءة حلوة بس اعمل ايه النصيب
حلقة تفوت ولا حد يموت..
تحياتى ....

============================
خالتو فرنسا
ازيك وحمدلله على السلامة
اعمل ايه حظى كده مرة بولو ومرة دقدق كواكب غريبة يا خالتو
لا ما تخافيش المرة جاية رايح احلق مع عبده الرايق وانتى طبعا عارفة عبده
يعنى ما فيهاش نعيما خالص وربنا يستر يا خالتى ..
تحياتى ليكى

=================================
عزيزتى آآآآآآآآآبى هانم
منور يا باشا
لا ما تخافيش هو خلاص القفا بقى تمام التمام وبعدين كفاية الاخت قطة فرحانة فيا وشمتانة كمان
حاضر ياستى مش اعمل زى الحاج متولى
وبعدين انا مش باجى بالعين الحمرا انا باجى بالعيون الخضر بس ههههههههه
عندك حق حاجات المدام اوفر برده ...
تحياتى وسعيد بزيارتك..

ويكا يقول...

اولاً :مبروك الحلاقة الجديدة خالص
بس انا مش عارف اقولك مبروك ولا اقول للقفى انا طبعاً عارف منظره عامل ازاي
ثانياً: هي كابوريا ولا انجليزي ولا الديك الشركسي هو شكله كده عملك من كل فيلم اغنية بس لو كان الديك الشركسي يبقى أحمر
بس نيو لوك جااااااااامد
اكيد انت بعدها غنيت اه ياقفى أو صعبان عليا قفاك
يلا منك لله يابولو

الـسـيـدة نـون يقول...

ههههههههههههههههههههههههههههههه
ايه الصورة المسخرة اللى انت حطتها دى
هههههههههههههههههههه
طب كنت نشرت صورة ليك علشان نقولك راينا فى الحلقة الجديدة
وبعدين هى ايه حكاية الكافتيريا اللى انا قاعد فيها علطول دى
انت معندكش شغل لاجئ كدة علطول فى الكافتيريا

يلا حلقة تفوت ولا حد يموت
وسمعنى سلام خلى القفا عالى

تحياتى ليك
اختك خيخة

همس الاحباب يقول...

ويكا
طب بلاش انت يا أنتيخ
خليها تيجى من حد غيرك
ولا احنا علمناهم الشحاتة سبقونا على الابواب ده حتى المكتب جنب المكتب
وانت اكتر واحد عجبتك الحلاقة يا ويكا
عامة مبروك عليك المدونة وابقى تعالى اسالنى فى حاجة

همس الاحباب يقول...

خيخه هانم
حتى انتى يا خيخه وانا اللى كنت عشمان ترفعى من روحى المعدنيةشوية
عامة يا ستى عندى صورة للحلقة الجديدة ابقى اوريها ليكى على الايميل بتاعى kh_cyc2006@hotmail.com
وبعدين انا مش لاجىء فى الكافتيريا دى بتاعتى انا محاسب الصبح ومعلم بعد الظهر ايه رايك بقى
ومردودللك يا ام شيكو
تحياتى

ويكا يقول...

انت صعبان عليا بس ياخلوده
اصل اللي حصل ده كبير قوي
معلش تعيش وتاخد غيرها

ابن حـجـر الـعـسـقـلانـى يقول...

مش معقول

أنا مت من الضحك

يا راجل انت كنت اضربها كلها زيرو و ريح نفسك .. هاتبقى مراية

بس بجد ضحكتنى كتير

آخر العنقود يقول...

ههههههههههههه
نفسيتك تعبت طبعا

خلاص خلاص
انا مش هتريق خاااااااااااااااااالص
عشان ماتزعلش
بكرة يكبر ويبقى زى الفل


وييبقى شطورة ويروح المدرسة كمان
ههههههههههههههه

نعيما يا استاذ خالد
:)
تعيش وتاخد غيرها

همس الاحباب يقول...

استاذى ابن حجرالعسقلانى
نورتنى طبعا
بس ما تخافش هى بقت مرايا ومصنفرة كمان
الحمد لله انك انبسطت تعالى عندنا كل يوم واحنا انخليك تفرفش خالص
تحياتى ليك خالد

همس الاحباب يقول...

العزيزة اخر العنقود
براحتك اتريقى ولا يهمك
هو خلاص كبر وراح المدرسة
وبقى شطورة كمان
وانعم الله عليكى يا اختى
تحياتى خالد

Unknown يقول...

ههههههههه
نعيما

همس الاحباب يقول...

لماضة هانم
ازيك ايه اخبارك
انعم الله عليكى
وشكرا على اى حال
تحياتى خالد

منوفيـــايــة يقول...

ايه يا استاذ خالد الحلاّق التحفه اللى انتى بتتعامل معاه ده
دا سارح ف شعرك وبيفنن كمان
بس انت اللى غلطان ازاى تسيبه يسرح اوى لحد ميخليك انجليزى كده
طب احنا دلوقتى نكلمك ازاى بقى يا مستر خالد
عموما" ولا يهمك على رأى خيخة
حلقة تفوت ولا بولو يمووووت
تحياتى ليييك

الـسـيـدة نـون يقول...

خليك جدع وانشر الصورة علنى
انت خايف من ايه
كلنا اخواتك وكلنا ستر وغطا على قفاك

غير معرف يقول...

أعزك الله أخ خالد
موضوع جميل وممكن يكون فيه فكر بردوا بعد الحلاقة
يا ريت تشرفنى فى المدونة علشان الإشارة التانية فيه كلام كتير
تقبل تحياتى

همس الاحباب يقول...

الاخت مستجدة
تحياتى ليكى وشكرا على تشريفك مدونتى النتواضعة
والغلطة فعلا غلطتى انى سيبته براحته
تحياتى ليكى
==============================
الاخت خيخة
عندا فيكى بقى احط الصورة
لانى عارفك اتموتى وتشمتى فى قفايا
ههههههههه
تحياتى ليكى يا ام شريف
=============================
الاخ عمر المصرى
شكرا لزيارتك
وطبعا انا اجى بسرعة البرق
تحياتى ليك يا اخى

الـسـيـدة نـون يقول...

ههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههه
طب ومالك مكشر ليه فى الصورة
وبعدين معلش يعنى احنا كنا عايزين نشوف الصورة من منظور خلفى
عايزين نشوف القف لو سمحت

بس عموما يعنى يا خالد الموضوع مش وحش اوى
انا شايفة ان شكلك معقول
انت بس ناقصلك شريطة سودا على عنيك ويكتبه تحت صورتك المجرم الهارب
او تدينا حتة منظور جانبى ويكتبه
ابحث مع الشرطة

يعنى شكلك فوتوجنيك خالص
ههههههههههههههههههههههههههههه
اللهم لا شماتة
ههههههههههههههههههههههههههه
عادى عادى اكتر من كدة وربنا بيزيح والله
انت بس ابقى ادعى ان ربنا يزيح الغمة
ههههههههههههههههههههههههههه
مش قادرة امسك نفسى من الضحك بصراحة
مش على تسريحة شعرك بس على الوش اللى انت مديهولنا
بجد هو انت كنت زعلان كدة ليه؟
ههههههههههههههههههه
وبعدين على فكرة انت خضتنى جدا
انا بفتح الصفحة بتاعتك الاقى وش فى وشى
بقول ايه ده
انا فتحت صفحة غلط ولا ايه

بس والله شكلك مش بطال يعنى
ولا انت قاصد انك تتصور بوشك علشان متوريناش قفاك واللى حصله
عموما نعيما
ههههههههههههههههههههههههههه
واللهم لا شماتة تانى
هههههههههههههههههه
سلام
وتحياتى
اختك خيخة

همس الاحباب يقول...

خيخة
عملتيها يا خيخة
يا خسارة ده انا برده ابقى حما شريف
خليها تيجى من حد غيرك
المجرم الهارب هههههههههههه
ابحث مع الشرطة
حلوة منك يا ام شريف
بس اشوف شريف الاول وانا اشكيله وهو ايجيب حق حماه
تحياتى وميرسى

إخوانى حتى النخاع يقول...

صورة حلوة يا عم ....



مش وحشة

هههههههههههههههههههه



أخوكم إخوانى حتى النخاع
http://ikhwangeeee.blogspot.com

انين الحزن يقول...

ياااااااااااااخالد

احنا عايزين نشوف الافا والا حصله

ومع ذلك نعيما بردك يااااااااامعلم

اه انت عامل ايه وبوسلي همس

سلامووووووووز
انا ضحكت علي ضحك خيخه

drpharma يقول...

الصرىاخالد ( احسب الناس ان ىتركو ان يقولو امنا و هم لا يفتنون)

Pink Dreams يقول...

هههههههههههههههههههههههههههههه

دى بقت كابوريا خالص

يلا نعيما يا استاذ خالد

ههههههههههههههه

تحياتى