21 مارس، 2008

حبيبتى


حبيبتى !


ملاك يسير على الارض !



فى وجهها نور.. وفى قلبها نور .. وبين يديها نور.. ولسانها يقطر حلاوة !



اخذت من النساء حنانهن وعفتهن ، ورقتهن ودفئهن ،



ومن الرجال صلابتهم فى المواقف ، ومواجتهم للصعاب ..



ومن الاطفال براءتهم !



اخذت من لقمان حكمته ومن ايوب صبره ومن عمر بن الخطاب عدله ،



ومن السيدة نفيسة علمها وورعها .



اسمع صوتها فى زقزقة العصافير !



وارى عطاءها فى جريان النهر ..



الكلمات تعجز عن وصفها !



الافعال تتضاءل امام عطائها !



الزمن يتلاشى فى حضرتها !



الكراهية لاتعرفها ولا تعرف الطريق اليها !



حنانها يسع الارض وما عليها !



فى احزانى اول من يمسح دمعتى !



فى افراحى اول من يرسم ضحكتى !



عندما انطق اسمها يحلو الكلام فى فمى !



عندما ارى وجهها أصبح اسعد الناس !



عندما تدعو تتفتح ابوب السماء.. وابواب الخير .



عندما تبتسم تتفتح الازهار ..وتشرق الشمس ..



عندما تحزن تغيب الشمس ويابى القمر ان يظهر !



هى سر وجودى ونجاحى وسعادتى وبقائى !



هى ملجئى ومسكنى وعشيرتى وسندى !



هى نصفى الاول .. وبوصلتى ودفتى !



ان كنت قد قصرت يوما فى حقها ..



فاننى اثق واطمع فى صفحها وعفوها !!



لو كتبت عنها بكل لغات العالم ..



لو ملأت كل اوراق الدنيا ..



وتحدثت عنها لكل خلق الله الى ان يقضى الله امرا كان مفعولا ..



لن اوفيها حقها ...الست دى أمى .


أمى .. كل سنة وانتى طيبة ..


كل عام وجميع الامهات بخير وصحة وسعادة



حقا الجنة تحت اقدام الامهات ..



لانها الانسانة الوحيدة فى الكون التى تعطى بلا مقابل



بل تعطى بكل سخاء وعن طيب خاطر ..



الامومة اسمى الغرائز على وجه الارض ..



الام مدرسة.. بل جامعة بكل ما تحمل من معان وقيم .



الكلام عن امى لا يكفيه بوست واحد بل مئات وربما الاف ..



بحثت عن هدية لاقدمها للام فلم اجد .. غير قلبى وروحى ..



من ابن عاق وناكر للجميل



الى ارق واطيب قلب فى الوجود



الى امى الحبيبة .. وكل الامهات ..



اطال الله عمركم لنا



وكل عام وانتم بخير ..

هناك 42 تعليقًا:

د/اجدع بنوته يقول...

اول كومنت ياخالد

وااااااااااااااااو

د/اجدع بنوته يقول...

ربنا يخليهالك يااارب

ويهديك ليها ويفرحها بيك

كل سنه وهى طيبه وبصحه وبسلامه

Desert cat يقول...

ايه الجمال ده يا خالد ده انت طلعت قلبك كبير اوى
بس بامانة هى تستاهل كل خير
كل سنة ومامتك ومامتى وكل الامهات بالف خير

سمية يقول...

اول مرة ازور مدونتك..

كلمات اكثر من رائعة..
بس في حاجة زعلتنى...ايه حكاية ابن عاق دى و ناكر لجميل و الحركات دى..

اوعى تكون كده فعلا..دا رضا الام عمره ما يتعوض..

تحياتى لها و لكل ام ...احم احم..وانا منهم طبعا..

دكتور حر يقول...

كلمات جميله أحيت في قلوبنا مشاعر كامنة عن امهاتنا

بوركت كلماتك

***********
بيني وبينك انا قلت انك كاتبها على مراتك ولا حاجه وكنت بدأت أحسد فيك
:)

لك خالص تحياتي

عبده الرايق يقول...

اه لو كنت قلت غير كده
قاعد مستنى اشوف الصفات الحلوه دى فى مين
وقلت يمكن الولد دماغه ضرب ولا حاجه
ويمكن بيحب حب جنونى نساه اسمه
بس
فى الاخر عرفت ان عندك حق
الام
لها كل تلك الصفات وان اردت ان تزيد فزد فانها تستحق اكثر من هذا
كل عام والست والدتك وكل المصريات بخير
فى عيد الام
وبعدين انت طلعت حنون اهه
ممعكشى 1000 يورو سلف

Abo 7anf يقول...

بجد موضوع جامد اوى
وكلماتك جميله
وكل سنه ووالدتك بالف خير وسلامه

عمر المصرى يقول...

قال صلى الله وعليه وسلم
خاب وخسر قالوا من يا رسول الله قال من أدرك والديه أو أحدهما ولم يدخل الجنة أو كما قال صلى الله وعليه وسلم
جزاك الله خيرا يا خالد

رئـــــيسـة حزب الأحلام يقول...

السلام عليكم
اية الكلام اللى كله حنان دة ربنا يخلى كل الامهات

فرنسا هانم يقول...

فعلا الام تستحق كل الاوصاف دى واكتر
كل عام وكل الامهات بخير
والسلام امانه للوالده

monaliza يقول...

كل سنة وكل ام بتتقى ربنا فى ولادها بخير وبصحة

appy يقول...

كل سنه وكل الامهات بخير
بس كلامك حلو يا خالد بصراحه ربنا يبارك فيك ويخليها لك

همس الاحباب يقول...

د/ اجدع بنوته
شرفتنى يا دكتورة
وكل سنة وحضرتك بخير وكل الامهات بصحة وسعادة
تحياتى خالد

همس الاحباب يقول...

العزيزة الغالية قطة الصحراء
كل سنة وانتى بخير
وميرسى ليكى
وكل سنة وامهاتنا بخير وصحة وسعادة
وعقبالك كده لما تبقى ام
تحياتى ليكى

همس الاحباب يقول...

العزيزة / سميه
سعيد جدا بتشريفك لمدونتى المتواضعة
وكل سنة وانتى طيبة
لا ما تخافيش انا بار بيهم قوى
بس برده باحس انى عاق وناكر للجميل
لانها عملت كتير وكتير
كفاية انها علمتنى حب الناس والعمل على اسعادكل من حولى ..
تحياتى ليكى وارجو التواصل

همس الاحباب يقول...

استاذى / دكتور حر
الله يبارك فيكى يا اخى ويحفظك
ههههههههههه
ملحوقة المرة الجاية ابقى اخليها لمراتى علشان تحسد براحتك
تحياتى ليكى وسعيد بتواصلك

همس الاحباب يقول...

حبيب قلبى عبده باشا
منور يا باشا اى خدمة يا باشا
1000 يورو بس
ولا يهمك انا اكتبلك شيك بالمبلغ على بنك فرنسا هانم وخلى وزة تصرفه ليك
ههههههههههه
تحياتى يا رايق

همس الاحباب يقول...

اخى ابو حنف
شكرا لكلماتك الرقيقة
ومنورنى دائما يا اخى
تحياتى خالد

همس الاحباب يقول...

الاخ العزيز / عمر المصرى
بارك الله فيك
وصدق المصطفى صلى الله عليه وسلم
تحياتى ليك ويسعدنى تشريفك الدائم

همس الاحباب يقول...

رئيسة حزب الاحلام
ربنا يكرمك ويخليكى
وسعدت بتشريفك
منورة دائما
تحياتى خالد

همس الاحباب يقول...

خالتو العزيزة / فرنسا هانم
منورة المدونة كلها
طب سحلب بالمكسرات او عصير قصب من بتاع الرايق
ربنا يكرمك يا فرنسا
والسلام وصل يا خالتو
وكل سنة وانتى طيبة وبصحة وسعادة
خالد

همس الاحباب يقول...

العزيزة موناليزا
كل سنة وحضرتك بخير
ومنور يا باشا المدونة دائما
تحياتى خالد

همس الاحباب يقول...

العزيزة قوى / ابى
منورنى يا اجدع دماغ فى الدنيا
وميرسى لكلامك الرقيق
وكل سنة وانتى طيبة
وكل الامهات بخير وصحة
تحياتى ليكى

The Queen يقول...

كل عام وكل أم بخير

واطال الله اعماركن جميعا وبارك في صحتكن

كلامك من القلب واكيد وصل للقلب

ربنا يحفظ لك والدتك

تقبل مروري

مروة جمعة يقول...

الله عليك يا خالد تسلم إيدك
أنا قلت الله ربنا يخليها له القمر دي.. بس لما لقيها والدتك قلت فعلا ما حدش في الدنيا يستحق الكلام ده إلا الأم طبعاً..
ربنا يبارك لك فيها
تحياتي

بت خيخة وأى كلام يقول...

ربنا يخليهالك
اكتر كلمة عجبتنى
حكاية من ابن عاق وناكر لجميل
عارف ليه
علشان مهما عملنا متهيالى مش هنعرف نوفى جمايل امهاتنا علينا
مهما اديناهم من حقهم هنفضل مقصرين فى حقهم
تحياتى ليك على الكلمات الجامدة
اختك خيخة

همس الاحباب يقول...

الملكة
تحياتى ويسعدنى تشريفك دائما
واطال الله عمرك
وكل سنة وانتى طيبة
تحياتى خالد

همس الاحباب يقول...

الاخت / مروة جمعة
منورة الوادى الجديد ومدونتى كمان
كل سنة وانتى طيبة
وشكرا ليكى ولتشريفك
خالد

همس الاحباب يقول...

خيخة عندنا يا مرحبا
اقيدوا الشموع ودقوا الطبول
منورة يا ام شريف
طبعا علشان كده عندى احساس انى عاق وناكر للجميل
لان فضلها على مش ممكن اوفيه مهما فعلت .
كل سنة وانتى طيبة وربنا يخليلك شريف ويبقى بار بيكى انشالله
تحياتى اخوكى خالد

انين الحزن يقول...

خالد باشا

كل سنه وهيا طيبه وبخير وربنا يخليهالك يارب

وتشوف همس وهيا عروسه وتشوف مازن الا في علم الغيب وهو عريس

وانت تشوف همس ام قمر كدا وانت تبقي عجوز اوي

سلاموووووووووز يامعلم
وزة
اه اتاخرت انا علشان النت فاصل عندي
كان يعني

سهر الليالى يقول...

قال وتقولى الكلام بتاع البوست بتاعى جميل هو فى أجمل من الكلام دة
تسمحلى طيب أهديه لأمى مدام معرفتش أكتبلها حاجة حلوة كدة
:)

تسلم ايديك وربنا يخليلك والدتك يارب وكل سنة وانت طيب وكل أم طيبة
تحياتى

مجداوية يقول...

أخى الكريم
أصدق وأروع الكلمات هى التى تخرج للأم
ربنا يديم وجودها فى حياتك ومتعها الله بالصحة ومتعك بوجودها ولا تقل على نفسك ابنك العاق فلا يوجد مسلم حق يكون عاق بوالدته فالكلمة كبيرة جدا وحسابها عسير عند الله بل قل ابنك المقصر فكلنا مقصرون مهما فعلنا أو قل ابنك الصغير فكلنا أمام امهاتنا صغارا مهما كبرنا أو قل ابنك المدين لك فكلنا مدينون لأمهاتنا ,,,بارك الله لك ولها ولكل أم

•√♥ أريــ السمر ــج ♥√• يقول...

سلم قلمك .. و دام برك لها

كل عام و والدتك و كل أم بخير و عطاء و سعادة

أسعدني مروري الاول بمدونتك

دمت بخير

دعاء مواجهات يقول...

ياريت كل الناس يعترفوا بفضل الام زيك كدة ويوفوها حقها

يابشامحاسب

شبــ اون لاين ـــاب يقول...

مدونه جميله

و بندعوك علشان تيجى تقول رايك عندنا و يمكن يكون فيه تعاون

همس الاحباب يقول...

الغالية / وزة
حمدلله على السلامة
ولا يهمك يا عسل
منورة دايما يا وزة
وكل سنة وانتى طيبة
ما تخافيش اجوزك مازن برده
ههههههههه
تحياتى ليكى يا وزة

همس الاحباب يقول...

سهر الليالى
منور يا باشا
ده من ذوقك بس
وعامة المدونة وكلماتهاوصاحبها كمان تحت امرك وامر ست الحبايب
كل سنة وانتى طيبة ومامتك بالف صحة وسعادة
وشكرا على تواصلك
تحياتى خالد

همس الاحباب يقول...

الاخت العزيز / مجداوية
كل سنة وانتى طيبة
وميرسى على كلماتك ونصائحك الغالية
دائما سنظل مدينين لامهاتنا مهما فعلنا .
ويسعدنى تواصلك دائما
تحياتى خالد

همس الاحباب يقول...

اريـ السمرـج
يسعدنى زيارتك
ومنورنى دائما
وشكرا على تواصلك
تحياتى ليكى

همس الاحباب يقول...

دعاء مواجهات
اهلا بيك ومنور دائما
وربنا يحفظك
تحياتى

همس الاحباب يقول...

شباب اون لاين
شكرا لزيارتك وطبعا لازم نتواصل
تحياتى

مستــ ج ــــدة يقول...

ربنا يباركلك فى والدتك ويبارك فى امهات المسلمين ويجازيهم خير
كلماتك جميلة وصادقة
رزقناالله بر الوالدين