30 مارس، 2009

مذبحة .. بلا دماء

حقا انها مذبحة بالغة  البشاعة  ولكن بدون نقطة دماء
انها مذبحة تجريف وتدمير 500فدان قمح بمنطقة الكوامل بمحافظة سوهاج


نشرت جريدة الأهرام في عددها الصادر يوم الخميس 26 مارس 2009 خبراً كارثياً عن قيام محافظة سوهاج بتدمير500 فدان منزرعة بالقمح بعد أن صدر قرار بإزالة الزراعات‏,‏ وبدأت الجرافات التنفيذ قبل شهرين فقط من حصاد محصول القمح المخضر في الأرض‏!‏. مخلفة بهذا التدمير خسائر حجمها 15‏ مليون جنيه فضلاً عن سحب الأرض من المزارعين في منطقة الكوامل بالطريق الصحراوي الغربي بسوهاج مع رفض مسئولي المحافظة منح المزارعين مهلة شهرين حتي يتمكنوا من جني المحصول‏,‏ كما أصروا علي رفض طلبهم بتقنين أوضاعهم‏,‏ أو تأجير الأرض لهم حتي يأتي جهاز مدينة سوهاج الجديدة لتنفيذ المشروعات الخدمية عليها‏.
ودافع الدكتور أبوالقاسم زهرة وكيل وزارة الزراعة بسوهاج عن الحملة التي قامت بها المحافظة ضد هؤلاء المزارعين‏,‏ قائلاً أنهم تعدوا على أراض مخصصة لمشروع إبني بيتك وكان يجب إخلاؤها لتسليمها لأصحابها
ده كان ملخص للخبر الذى تم نشره ‏بجريده الاهرام
والسؤال الملح فى الوقت الراهن وبغض النظر عن الوضع القانونى والروتين
اين كانت الاجهزة المعنية بمحافظة سوهاج عندما تم الاعتداء على تلك الاراضى ؟؟؟
لماذا تركتوهم يقومون باستصلاح الاراضى الصحراوية ؟؟؟
لمصلحة من تلك المذبحة البشعة ؟؟؟
لماذا لم تنتظر المحافظة حتى موعد الحصاد ؟؟علما بان موعد الحصاد باق عليه اقل من شهرين
نفترض جدلا ان من قام يالزراعة تعدى على املاك الدولة واراضيها لماذا لم تقم المحافظة بمصادرة المحصول لصالح الدولة مثلا
ما الفائدة من تدمير تلك الزراعات ؟؟
اكاد اجزم بان الاراضى لو تم زراعتها بانواع من المخدرات والبانجو لتم تركها
الموضوع بحتاج اسئلة عديدة واجابات شافية
ولكن مهما تكن الاجابة فالنتيجة كارثة بكل المقاييس،، فمصر من اكثر الدول استيرادا للقمح
ناهيك عن نداء الدولة وسياستها وتشجيعها لاستصلاح الصحراء وزراعتها  
هل يعقل بعد كل هذا المجهود وبعد ان وصلت الارض لمرحلة الانتاج يتم تدميرها بهذه الطريقة لكى يتم انشاء مشروع ابنى بيتك
اين هو تلك البيت مع العلم ان البديل موجود لقيام تلك المشروعات
ماهذا التناقض الغريب فى استصلاح الاراضى الصحراوية فمن تخصص لهم اراضى للزراعة يقومون يالبناء عليها ومن يقوم ياستصلاح الصحراء وزراعتها نقوم بتدميرها
الى متى تظل تلك الفوضى بمحافظة سوهاج ففى العام الماضى تم تشريد اكثر من 1200 مواطن وتم سحب 4000 فدان مزروعة لانشاء مطار سوهاج مع ان البديل ايضا موجود فى اماكن كثيرة بصحراء سوهاج
يا سادة انتم تعلمون ان سوهاج من اكثر المحافظات طردا للسكان لمحدودية الرقعة الزراعية بها
ومع ذلك يلجا ابناءها الى استصلاح الصحراء وزراعتها لزيادة الرقعة الزراعية
واعتقد ان مصر فى حاجة ماسة لكل شبر من ارضها فى الوقت الحالى
وفى حاجة ماسة الى كل جرام من القمح التى تستورده بالعملة الصعبة
لماذا هذا السفه والجنون وتدمير كل ما هو اخضر لمصلحة من يتم هذا على مسمع ومراىء من السادة المسئولين
ان ما حدث لتدمير القمح المصرى فى سوهاج لكارثة ووصمة عار فى جبينكم ايها المسئولين
وحسبى الله ونعم الوكيل

27 مارس، 2009

يا اسكندرية يا


معلش اعذرونى على التاخير   انا دايما متاخر فى كل حاجة
وبصراحة مش عارف اكتب ايه عن اللقاء بعد اللى قريته فى البوستات اللى تحدثت عن اللقاء
بس صراحة اللقاء يستاهل انى اتكلم عليه لانه يوم من اجمل الايام لما تقابل ناس تحمل من الطيبة والكرم الكثير والكثير
لقاء اسكندرية يوم 24 -3-2009 تم بدعوة من العزيزة على قلوبنا جميعا  فاتيما روح قلب ماما بناء على طلب من هنودة علشان عايزة تشوفها  وطبعا احنا رحنا معاهم غتاتة
المهم اللقاء بدا حوالى الساعة السادسة صباحا بمقابلة الصديق الجديد هشام صاحب مدونة جعلونى مريضا نفسيا واللى حسيت انه انسان محترم جدا واخلاق وحسسنى  فى البداية انى اعرفه من زمان قوى وطلع ولا مريض ولاحاجة وبيشتغلنا يا جدعان
بعدها قابلنا فاتيما ومعاها ماجد اخوها واللى سعدت قوى بمعرفته وحسيت ان الاخلاق والجدعنة وراثة عندهم
ركبنا السوبر جيت واتجهنا الى اسكندرية اللى لسه راجع منها من اقل من اسبوع لكن حاسس انى  غايب عنها من سنين
طبعا وصلنا اسكندرية ورحنا نادى الاطباء كانت الساعة لم تتجاوز التاسعة والنصف  صباحا ووقفنا على الكورنيش فى انتظار الست الدكتورة لماضة هانم ومدونى الاسكندرية الاعزاء وطبعا الدكتورة لماضة خدتها نومة وجاءت متاخرة يا جدعان يلا هنشرد فيكم للصبح
طبعا اول الحاضرين من مدونى اسكندرية كانت عروسة الليلة وصاحبة الفكرة الست هنودة واللى كانت جاية  ومش عارفة لا فاتيما ولا حد من المدونين يا ولداه  وبخبرتى المعملية الفذة بقولها انتى مدونة تعالى اصل كان مكتوب عليها مدونة وتايهة فى الغربة  
ولسه بقولها اسمك ايه وبتقولى هند وبقولها دى فاتيما وعينك ما تشوف الا النور ولقيت بالاحضان يا بلدنا وزغاريد والمحاقظ باعت قوات الدفاع المدنى تفك الاشتباك اصلكم ما تعرفوش فاتيما اصبحت ليها شعبية ولا عبدالناصر ايام تاميم القناة  
المهم هنودة طلعت بنت بلد قوى وانسانة ملائكية  من جواها ومبتسمة دائما وده انطباعنا كلنا 
تانى واحدة جت كانت شيمو القمر صاحبة اعترافات قلب ودى اول مرة نتعرف بيها بنت زى القمر فى تفكيرها واخلاقها وخفة دمها اسكندرية بقى
بعدها جاءت مين يا جدعان مدونة مش عارف هى جاءت ليه اصلا مع انى كنت منبه عليها انها مش تيجى بس جاءت علشان تغيظنى  احب اقولها اه احنا عاملين زى توم وجيرى  بس بجد انتى انسانة طيبة جدا وجدعة جدا وبحس انك زى همس وعلشان كده بقولك ربنا ما يحرميكش منى وانا هجيبلك معايا مصاصة المرة الجاية علشان  تقعدى على جنب  تلعبى بيها يا ست حنين القلب
واخيرا ظهرت فى الافق دكتورة لماضة على سن ورمح  حسيت ان عرابى ماشى على الكورنيش يا جدعان بحصانه وبيقول لقد ولدتنا امهاتنا دكاترة وسع يا ياض منك ليه
وطبعا لماضة مش  محتاجة انى اوصفها بحاجة غير انها بنت بميت راجل
دخلنا نادى الاطباء وبدا التوافد التدوينى .جت  سالى مدونة حرووووف ربنا يكرمها وتبقى كلمات انسانة رقيقة وخفيفة الظل  وليها حضور مميز وجاءت  حنان الشافعى ودكتورة داليا ونبض اسكندرية ودول بصراحة ما لحقتش اخد اى انطباع عنهم غير انهم مبهورين ومش متعودين على اللقاءات لسه .
وبعد كده جاءت مين عاشقة الرومانسية اللى اتضح بعد كده انها عاشقة فاتيما مش الرومانسية وبس واللى طارت فى الهواء كده وارتمت فى حضن فاتيما ونسيت نفسها لمدة سنة كده ودى مش هينفع معاها غير قوات الامن المركزى لفض المظاهرة 
وعاشقة الرومانسية انسانة طيبة بلا حدود وعندها شهامة وجدعنة بتاعت ولاد البلد ايام الحرافيش 
وطبعا كان  فاكهة اللقاء احمد اسير الجراح واللى جه نورنا وانا سعيد جدا بمعرفته واللى وعدنا انه هينورنا فى القاهرة .
طبعا الجلسة تناولت حكايات وقصص التدوين واللقاءات وكده 
بعدها  اتجهنا الى بحرى علشان نقف على القمة بس مع الاسف ما لحقتش نقف معاهم لانى رحت  مشوار سريع ورجعت تانى
على بحرى علشان قررنا ان نرجع القاهرة بدرى علشان فاتيما
وقابلت مييييين يا جدعان زمردة والى كان ليها تار بايت عندى وعايزة تفجرنى بس على ميييييين يا خسارة ما لحقتش تخلص اى
حاجة عامة خيرها فى غيرها 
طبعا ما قدرش انسى الغائب الحاضر برسايله وبقلبه مهندس محمد اسكندرانى قوى اللى افتقدناه قوى وبقوله ربنا يوفقك ونلتقى على خير فى الاجازة 
وداليا قوس قزح اللى اصرت انها تشاركنا اللقاء بمكالمتها الرقيقة وتسلم على الحضور
وحبيب قلبى نجم الضاحكون والتدوين عبده باشا الرايق اللى ناوى يعزمنا فى السويس على حسابنا طبعا 
وكمااااان احمد سكر اللى كان قاعد فوق جناح الطيارة وبيكلمنا علشان يعرف احنا فيييييين وبيسال على الجميع معلش يا سكر
المرة الجااااية مش هسيبك لازمن تيجى معانا   
والغائب الحاضر فى قلوبنا بابا ابو خالد اللى كان نفسى يشرفنا بالحضور بس الظروف ما سمحتش وطبعا اتصل اكتر من مرة علشان يطمئن علينا
ولحد هنا كفاية عليكو قوى كده وكملوا هنا 
روح قلب ماما .... كنا هناك فى الجنة
عاشقة   الرومانسية ....لقاء السحاب
 إعترافات قلب ..... أجمل إعتراف
حنين القلب .... تصدقوا وحشتونى

21 مارس، 2009

كل سنة وانتى امى

تحديث هام
********
الى كل سكان المحروسة وسكان عروسة البحر

لقاء تدوينى بمدينة الاسكندرية يوم الثلاثاء 24-3-2009

كل التفاصيل هنا فى مدونة روح قلب ماما

************
********************
طبعا الحديث عن الام لا يكفيه بوست ولا مدونة
ولا العمر كله يسعفنا لذكر فضلها علينا لذلك
ظلموكى امى فقالوا ان اليوم عيدك
كيف هذا وكل يوم اراكى هو عيد
كيف اختصر الدهر فى يوم
واقول انه عيد
كيف اعبر عن حبك وطاعتك فى يوم عيد
وانا وكل ما املك ملك يمينك
امى يا من لا تحصي قدرك الكلمات والحروف  
ولا يحيط بحنانك  الايام والشهور
امى يا  نبع الحنان الذى لا ينتهى
كل عام وانتى بخير
********
اجمل ما قيل عن الام
الجنة تحت اقدام الامهات
- المصطفى صلى الله عليه وسلم -
********
وَاخْضَعْ لأُمِّكَ وأرضها

فَعُقُوقُهَا إِحْدَى الكِبَرْ
- الإمام الشافعي -
*******
الأُمُّ مَدْرَسَةٌ إِذَا أَعْدَدْتَهَا
أَعْدَدْتَ شَعْباً طَيِّبَ الأَعْرَاقِ

الأُمُّ رَوْضٌ إِنْ تَعَهَّدَهُ الحَيَا

بِالرِّيِّ أَوْرَقَ أَيَّمَا إِيْرَاقِ

الأُمُّ أُسْتَاذُ الأَسَاتِذَةِ الأُلَى

شَغَلَتْ مَآثِرُهُمْ مَدَى الآفَاقِ

- حافظ إبراهيم -
*********
لَيْسَ يَرْقَى الأَبْنَاءُ فِي أُمَّةٍ مَا

لَمْ تَكُنْ قَدْ تَرَقَّتْ الأُمَّهَاتُ

- جميل الزهاوي -
********

العَيْشُ مَاضٍ فَأَكْرِمْ وَالِدَيْكَ بِهِ

والأُمُّ أَوْلَى بِإِكْرَامٍ وَإِحْسَانِ

وَحَسْبُهَا الحَمْلُ وَالإِرْضَاعُ تُدْمِنُهُ

أَمْرَانِ بِالفَضْلِ نَالاَ كُلَّ إِنْسَانِ

- أبوالعلاء المعري -
********
الأُمُومَه أعظمُ هِبَةٍ خَصَّ الله بها النساء

- ماري هوبكنز -
********
ليس في العالم وِسَادَةٌ أنعم من حضن الأم

- شكسبير -
********
قلب الأم مدرسة الطفل

- بيتشر -
********
من روائع خلق الله قلب الأم

- أندريه غريتري -
********
إني مدينٌ بكل ما وصلت اليه وما أرجو أن

أصل اليه من الرفعة إلى أمي الملاك

- لينكولن -
********
لن أسميكِ امرأة، سأسميك كل شيء

- محمود درويش -
**********
 امى الحبيبة
كل سنة وانتى أمى
**********
كل سنة وكل امهاتنا بخير وسعادة
والى كل من فقد امه العزيزة
اللهم ارحم امهات المسلمين جميعا
وادخلهم برحمتك فسيح جناتك

15 مارس، 2009

هل اصبحنا ؟؟

هل اصبحنا فى نظر الاخرين يهود ومنافقين ؟؟؟
فى نهاية شهر فبراير الماضى  واثناء اندماجى فى انهاء بعض الاعمال اليومية الخاصة بالعمل جاءتنى رسالة تنبيهية على برنامج سكيب وهو برنامج لا استخدمه اطلاقا ولكن اعتز به لانه عن طريقه دخلت عالم التدوين
الرسالة كانت من شخص مجهول بالنسبة لى واليكم  مقتطفات من الحديث الذى دار بيننا
الشخص: السلام عليكم
خالد : وعليكم السلام ورحمة الله 
الشخص : انا سعيد من الجزائر 
خالد : اهلا بحضرتك وانا خالد من مصر 
الشخص : من مصر
خالد : اه اى خدمة 
سعيد : صدقة.. انت حيوان صح  
خالد : شكرا ده من ذوقك
لحد كده الموضوع عادى ما اخدتش فى دماغى وقولت انه شخص عادى وكان متخيل انه هيكلم بنت بس حظه طلع مع ولد
واندمجت فى انهاء باقى الشغل ونسيت الموضوع
تانى يوم فى نفس الميعاد لقيت رسالة تنبيهية اخرى وكنت مخنوق ومش طايق نفسى  قلت اشوف مين لقيت الاتى
سعيد : انا بكره مصر وبكره كل المصريين انتم يهود
خالد : على فكرة كرهك ولا حبك مش هيفرق كتير مع مصر والمصريين وبالراحة على نفسك
سعيد : انتم يهود ومنافقين انتم عار على العرب
خالد : اللهم طولك يا روح اه وبعدين ايه كماااااان
سعيد : انتم عندكم سفير لاسرائيل 
خالد : هههههههههه هو اللى مزعلك السفير  
سعيد : انتم خونة انتم ليه مافتحوش المعبرعلشان غزة انتم يهود
خالد: بص يا اخى اولا ما ينفعش انك تشبه مسلمين بانهم يهود ومنافقين مهما تكن الاسباب
وبعدين بلاش تسمع الانباء من مصادر واحدة قد تكون مغرضة او ليها اهداف اخرى الواضح ان حضرتك مش واخد بالك من حاجات كتير
سعيد: الجزائرمليهاش علاقة مع اسرائيل وما عندناش سفير 
خالد : كلام جميل طب ايه اللى عملتوه انتم ولا العرب للقضية الفلسطينية  
خالد :مش هقولك الحكومة عملت ايه ولا النظام عمل كذا وكذا لانه بصراحة كل الانظمة العربية بلا استثناء وبمافيهم النظام فى الجزائر مقصرين وتعاملوا مع الموقف بسلبية
سعيد : انت بتشتغل ايه
خالد : محاسب وحضرتك ؟؟
سعيد : صحفى فى جريدة الخبر الرياضية
خالد : اه صحفى وبتقول كده لانك بتاخد الانباء من مصدر واحد مش اكتر
سعيد : انا ليه اخ استشهد فى فلسطين
خالد : ربنا يرحمه ونحتسبه شهيدا عند الله بس كلنا لينا اقارب واخوة شهداء  ونتمنى ان نكون مثلهم  
سعيد: امين وشكرا لك 
خالد: يا اخى نحن عرب ومسلمين ونتهم بعض ويعادى بعضنا البعض ونسينا العدو ونسينا القضية الاساسية انا احب الفت نظر حضرتك الى ان مصر  كشعب مختلف عن النظام تماما 
يا اخى فى محنة غزة الشعب باكلمه كان يقتطع من قوت يومه لمساعدة الاخوة فى غزة ناهيك عن المواقف الانسانية التى شاهدتها بنفسى اثناء زيارة المرضى الفلسطينيين بالمستشفيات المصرية 
وبالمناسبة انا مدون مصرى وممكن اديك لينك مدونتى ومدونات مصرية رصدت الحالة بكل صدق وشفافية 
بل هناك مدونات انشئت خصيصا لنصرة غزة والتعريف بالقضية الفلسطينية والدفاع عنها مثل مدونة كلنا مقاومة 
سعيد: اولا انا اسف 
خالد : ولا يهمك حصل خير انا هدفى اننا نكون اخوة كعرب وتصبح قضيتنا واحدة وهدفنا واحد 
سعيد : ان شاء الله لما ارجع من الشغل نبقى نكمل حديثنا 
خالد : باذن الله وانا سعيد بمعرفتك وفى انتظارك 
لحد هنا الحديث انتهى على خير 
لكن هناك اسئلة دارت فى خيالى بعض الحديث:
هل نحن فعلا اصبحنا يهود ومنافقين فى نظر العرب ؟؟؟
اذا كنا كذلك فى نظر الاخرين فما هى نظرتنا لانفسنا ؟؟؟
مهما تكن الاجابات فمصر ليس نظام فقط مصر تاريخ وشعب
مصر نايمة  بس النوم فى العسل طال يا مصر
مصر بتحتضر بس لسه فيها الروح
اولادك خنقوكى يا مصر بس لسه بتقاومى
صح النوم يا مصر

12 مارس، 2009

بما كسبت ايديكم

بما كسبت أيديكم

لابد للمسلم أن يدرس أسباب المصائب والنكبات التي تمر بها الأمة
فإن الذي قدرها حكيم خبير ، لا يعاقب إلا بذنب ، ولا يأخذ إلا بسبب ،

وسياط التأديب كثرت على أمتنا بسبب ذنوبها وخطاياها ،

وهذه سنة مطردة من سنن الله في عباده فيقول فى كتابه
"أولما أصابتكم مصيبة قد أصبتم مثليها قلتم أنى هذا ؟ قل هو من عند أنفسكم "
165 آل عمران

وما نشاهده الآن في بلاد الإسلام هو
 بلغة العصرقيمة فواتير لم تسدد من قبل

من اللهو والإعراض ، والمعاصي بأنواعها

والله يؤدب المخالفين بأنواع من العقوبات
 من الطوفان  ،أوالريح ، أوالرجفة،
أو عدو كافر غازٍ ، يقتل العباد ، ويدمر البلاد
كما فعل التتار والصليبيون من قبل
وحال المسلمين حال مبكية ؛
فكثير من الجيل هجر المساجد ،
وغالب الحكومات عطلت الشريعة
وأكثر التجار وقعوا في الربا
وكثير من العلماء لم يؤدوا رسالتهم
وجُلُّ العامة جهال بالدين 
والسواد الأعظم من النساء غافلات في باب الإيمان

فمن أين يأتي النصر؟؟؟؟ ومن أي باب؟؟
وقد سددنا الأبواب بالخطايا وملأنا طرق الإجابة بالمخالفات !!
 إن هذه الأمة تعرف الله إذا سمعت أزيز الطائرات ،
وقصف الصواريخ ، وهطول القنابل ،

وهذه معرفة فرعون لما رأى الموت فقال : آمنتُ 

فكان الجواب : الآن وقد عصيت قبل ؟

 

وهي معرفة أبي جهل : وإذا ركبوا في الفلك دعوا الله مخلصين
له الدين فلما نجاهم إلى البر إذا هم يشركون
وإلا فالواجب ذكر الله في الرخاء والشدة
وطاعته في العسر واليسر

والالتجاء إليه في المنشط والمكره ،

والتوكل عليه في السراء والضراء
فلا تلوموا الأعداء ولوموا أنفسكم ؛

فإن صواريخ ونيران الأعداء عقوبة من الله ،

جزاء لمن قصر في دينه وخالف أمره
 
نقلا ً عن د . عائض القرني
منقول

5 مارس، 2009

تهنئة ..ودعوة

معلش البوست ده اتاخر يومين نظرا لظروف قهرية خارجة عن الارادة
تهنئة قلبية بنجاح العدد الثالث من مدونات مصرية للجيب والذى يحمل اسم " انا انثى "
فالف مليون مبروك لفريق العمل الرائع
والف مليون مبروك لجميع المشاركات بتدوينات فى هذا العمل
وتهنئة من القلب  خاصة جدا
للعزيزة الغالية على قلوبنا 
فاتيما  مامت يوسف 
تهنئة خاصة ايضا 
للغائبة الحاضرة دائما 
دكتورة  نجلاء صاحبة مدونة جنة 
والف مليون مبروك للجميع وعقبالكم جميعا 
الكتاب بصراحة بيحمل بوستات غاية فى الروعة تم اختيارها بتمكن 
الغلاف كان رائع جدا ومتناسب جدا مع الاسم 
حفل التوقيع كان رائع وجميل والمكان مناسب جدا 
شرفت بمقابلة اشخاص جميلة جدا
سعدت بمقابلة العزيز محمد غاليه ولكن الظروف لم تسنح للتحدث معه كثيرا 
وعلشان كده  بقوله المرة دى مش محسوبة 
كل حفل وانتم بخير 
********
بناء على دعوة كريمة من الاخت العزيزة نوران صاحبة مدونة  بنت خيخة واى كلام 
موعدنا مع الحملة الخيخية للتبرع بالدم يوم الجمعة 6-3-2009  
الساعة 9.30 امام هيئة المصل واللقاح بالدقى
لمزيد من التفاصيل هنا
عايزين الكل يشارك ويشرفنا بالحضور
واللى ما عندوش دم زى حالاتى وعنده شربات يجىء برده
اهو يبقى المدون للمدون كزجاجة شربات يوم فرحه
نشوفكم جميعا على خير