8 يناير 2009

مصر الحاضر والمستقبل



رغم الحصار الممتد لشهور 
رغم القذائف التى لا تنقطع ليل نهار 
رغم الطائرات وصوتها الخارق للصوت
رغم وحشية العدو وحبه لسفك الدماء 
رغم ان العدو اشتهر بمجازره الوحشية
لكن كل هذا لم يؤثر فى عزيمة الشعب الاعزل 
فاصبحت عزيمته تزداد قوة مع كل رصاصة غدر
اصبح لا يهاب الموت ويتمنى الشهادة ويرفض الذل والخنوع
شعب لو امتلك قدر قليل من السلاح والعتاد وتشجيع من الاخوة والاشقاء لفعل الكثير والكثير من المعجزات .
تلك الكلمات هى ما شعرت بها داخلى اثناء زيارة المرضى الفلسطينين امس بمستشفى الهلال الاحمر المصرى ومستشفى معهد ناصر
فى غضون اسبوع واحد فقط تم الدعوة من قبل الاخت العزيزة ايناس صاحبة مدونة اوتار لزيارة المرضى الفلسطينيين بالمستشفيات المصرية وتم تلبية الدعوة من جانب عدد كبير جدا من المدونين وغيرالمدونين وتحمس الجميع للفكرة بشعور نابع من داخلهم بانه واجب علينا واقل شىء نقدمه للاخوة فى غزة ان نرفع من روحهم المعنوية ونشد من أزرهم ونشاركهم لحظات من الاوقات العصبية التى مرت بهم  ونشعرهم باننا معهم
الكل حضر والهدف واحد وهو اننا اشقاء وقضيتنا واحدة وعدونا واحد وعزيمتنا صلبة
تجمعنا فى الحادية عشر صباحا امام مستشفى الهلال الاحمر برمسيس لزيارة المرضى الفلسطنيين بالدور التاسع بالمستشفى 
العدد لم يكن كبيرا ولكن الاصابات والحالات كانت تستحق الزيارة والوقوف بجانبها
المرضى استقبلونا رافعين ايديهم بعلامة النصر والكل مصمم على النصر او الشهادة ولن تمنعهم اصابتهم مهما تكن عن مواصلة الجهاد وتحقيق النصر
شعرت بعزة نفس وفخر بتلك الروح والعزيمة الصلبة من جانب الاخوة الفلسطنيين واقصد فلسطين الام التى تحوى بين جانبيها كل الفصائل الفلسطينية على اختلاف تياراتها وانتماءاتهم الكل لابد ان يكون يدا واحدة امام العدو واقسم بالله العظيم ان النصر قادم لا محالة
شاهدنا شباب ورجال قد بترت ايديهم وارجلهم جراء القصف الجوى الغاشم من العدو الصهيونى وجدنا نساء مسنات اصابتها الغارات الجوية
شاهدنا رجل كبير فى السن يصلى فى غرفة منفردا وقد علمنا ان ابنه قد استشهد صباح اليوم ولكنه صامد ولم تسقط من عينيه دمعة واحدة ولكنه صبر واحتسب اهتزت مشاعرنا واقشعرت اجسامنا و سقطت دموعنا ولكنه ظل كالجبل الراسخ امامنا
قرر بعض المدونين التبرع بالدم نظرا لحاجة المستشفى للدم وذهبنا الى بنك الدم المجاور للمستشفى ولكن مع الاسف الشديد لم نجد دكتور واحد فى بنك الدم واخبرونا بانهم سوف يحضرون الساعة الثالثة مساء ورجعنا بدون تبرع 
بعدها ذهبنا الى مستشفى معهد ناصر فى مجموعات والتقينا هناك فى الدور الرابع وقد قمنا بزيارة المرضى الفلسطينين وكان عددهم اكبر بكثير من الهلال الاحمروقد قام الاخوة المدونين بتوزيع الهدايا والعصائر على المرضى والمرافقين لهم وتحدثنا معهم عن العلاقات المصرية الفلسطينية واننا اشقاء وقلوبنا معهم ودعواتنا لهم بالنصر 
وان كانت الاصابات مختلفة بعض الشىء عن مستشفى الهلال الاحمر لكن العزيمة واحدة والاصرار واحد ولا مفر من النصر اوالشهادة
شاهدنا سيدات فقدن فلذات اكبادهم امام اعينهم ولكن ما زالوا يقدمون شهداء وسيظلوا كذلك دوما  فان كانت الام فى مصر تلد لكى تربى وتعلم وتزوج ابنائها فالوضع مختلف فى فلسطين فالام تلد وتربى لكى تقدم شهيدا  كل يوم وكفاها فخرا انها ام الشهيد.
وعلى الجانب الاخر يقف الاب بجوار ابنه المصاب ويتمنى شفائه باسرع وقت لكى يعود به الى غزة ويعاود الكرة مرة اخرى واما النصر اوالشهادة
والمصاب يتمنى الشفاء ليعود سريعا ليدافع عن بيته وارضه ويلقن العدو درسا فى البطولة ولا خيار له الا النصر او الاسشهاد فوق تراب ارضه
شاهدنا الطفل بلال الذى لم يتجاوز السبع سنوات والذى اصبح بيننا اشهر من رئيس السلطة الفلسطينية والكل تهافت للتصوير معه وزيارته خصيصا.
قمنا بزيارة جناح المرضى المصريين بالمستشفى وقمنا بتوزيع بعض الهدايا والمشروبات والمعلبات عليهم ايضا
هناك فرق شاسع بين  الجناح الخاص بالمرضى المصريين وجناح المرضى من فلسطين ، الجناح المصرى هادىء جدا جدا ولا يوجد غير المريض والمرافق 
الجانب الفلسطينى مكتظ بالزائرين والغرف مزدحمة بالزائرين الذين حضروا من جميع انحاء مصر لزيارة اخوانهم الفلسطينيين وتقديم المساعدات والرفع من روحهم المعنوية ومشاركتهم وجدانيا ومعنويا
كنت اتمنى زيارة باقى المرضى فى مستشفى فلسطين بمصر الجديدة لكن الوقت لم يسعفنا وان شاء الله تتكرر تلك الزيارات 
اليوم كان جميل جدا وعدد المدونين بصراحة يشرف ويفرح بجد واسف جدا لعدم ذكر اسماء الحضور نظرا لان القائمة طويلة جدا وخشية نسيان البعض  لكن احب اشكر جميع من شارك بالحضور واقولهم فخور بكم وسعيد بتشريفكم لنا بالحضور 
واكثر ما اسعدنى فى اللقاء ان عدد الحضور فاق كل التوقعات  والاجمل من هذا حضور عدد كبير من الاقاليم البعيدة فقائمة الحضور شملت اخوة من مدن بورسعيد وكفر الشيخ وبنها والزقازيق وميت غمر وطنطا والسويس واسيوط
جزاءكم الله خيرا على الحضور والمشاركة الفعالة 
اللقاء والمشهد الذى رايته فى معهد ناصراثبت لى ان مصر ليست حكومة فقط لكن مصر شعب وتاريخ وحاضر مشرق باذن الله
لمتابعة المزيد عن اللقاء 

هناك 21 تعليقًا:

حنين القلب يقول...

انا قولت الحق اول تعليق

و اقرى براحتى
وراجعه

حنين القلب يقول...

والله انا اللى فخورة بيكم كلكم
بجد ربنا يبارك فيكم ويجعل كل خير فى ميزان حسناتكم

من كلامك يا خالد حسيت بمرارة اوى لما بتقول الام فى مصر بتربى وتعلم وتجوز
والام فى فلسطين بتربى علشان ابنها ينول الشهاده
اظن ده اصعب احساس ان الام تربى وتكبر علشان تشوف ابنها بيضرب برصاص عدو غدار وتفرح وتتمنى يكون عندها بدل الولد الف علشان تقدمهم كلهم للشهاده وعلشان تحافظ على تراب ارضها

ربنا يثبتهم

وحسبنا الله ونعم الوكيل فى اليهود

حنين القلب يقول...

خاااااااااااااالود

بجد بجد انت تستاهل انى المرة دى مش ارخم عليك
ربنا يبارك فيك وفى اسرتك الكريمه

عاااااااااااااااادى
اتعودنا منك على الرجوله والشهامه والجدعنه ولما يطلع منك موقف فيه قمه الشهامه والرجوله زى ده يبقى مش نشكر فيك
لان ببساطه ده اللى اتعودنا عليه منك

ربنا يكرمك ويحفظك يا ابو همس

عاشقة القمر يقول...

ربنا يجعل في ميزان حسانتكم
لسه دنيا بخير



انا جيت قول لكمع سلامه لان اهقفل مدونه

أمل حمدي يقول...

ربنا يصلح حالكم يارب

كان نفسي اكون معاكم بس ظروفي لم تسمح

البركة فيكم

وجزاكم الله كل الخير

rovy يقول...

لسلام عليكم
ما شاء الله عليكم جميعا
جزاكم الرحمن كل الخير و بارك لكم و بارككم ..
كم كنت اتمنى ان اكون معكم
يارب يقدرنى و تتعوض
ربنا يكرمكم جميعا و ييسر لكم و يوفقكم للخير دائما

دمت سالما و للخير سباق

خالص التحيه

ميرا ( وومن ) يقول...

خالد

انا كان عندي حق لما قول اني مينفعش اكتب عن أي تجمع بس ايناس أمنتني وبصراحة لو كنت اعرف انك نزلت البوست دة قبل ما انشر كنت اخدتة كوبي

بس اظاهر اني بقيت مش قادرة اكتب اي حاجة

اليوم كان يستحق فعلا تسجيلة وربنا يجعلة في ميزان حسنات كل المشاركين

تحياتي

maha zein يقول...

فعلا ربنا يكرم كل الناس اللى جت
ويصبر اهالى الفلسطينين المصابين والشهداء
ويثبتهم

قوس قزح يقول...

الحمدلله يا خالد
الحمدلله ان الخير موجود فى قلوبنا كده و كل مرة ناس جديدة بتشارك و العدد بيزيد
على اد ما كان جوايا فى حزن على المصابين كان جوايا فى فرحة بالمصريين اللى رايحين يزوروا الفلسطينين كأنهم رايحين يزوروا مصابين من اهلهم

الحمدلله مصر بخير طول ما اهلها كده

Unknown يقول...

ياه يا خالد
ياربنا كلمات من رصاص
عبرت وقلت وتكلمت عن دموع لا تتوقف عن الانهمار منى لكن ليتها دمائى
بجد بجد انا فرحانة انك احساسك هو نفسة احساسى وانك شفت وحسيت بالحاجات دى وعبرت عنها بجمال
كمان مونى كلامها حلو اوى شوفها كاتبة اية
ربنا يبارك فيكم
انتم اللى رجالة ووقفتوا وقفة رجالة

عاشــــــ النقاب ـقــــة"نونو" يقول...

السلام عليكم
ودة اللي نفسي يوصل لهم اننا كشعوب حاجة تانية غير الحكام
يارب يبارك لك ويجازيكم خير

محمد حمدي يقول...

بجد كان يوم رائع

ممكن تخش عندى تشوف الصور وقصتى عن زيارة مستشفى الهلال

تحياتى

دعاء مواجهات يقول...

عندك حق اخى خالد ف كل كلمة قولتها

اللى بيحصل دليل ان لسة فية امل فعلا

الشباب هما الامل كل واحد فينا هو الامل

تحياتى ليك..

همس يقول...

ايه الكلام بالحساس العالى دا يا عم ابو همس

ماشاء الله عليك


وجزاك الله كل خير

ونشوفك ديما على خير

رحــــيـل يقول...

ربنا يصبرهم ويشفى مرضاهم وينصرهم
كنت اتمنى اكون موجوده بس محصلش نصيب

ربنا يكرمكم ويجزيكم كل خير

تحياتى واحترامى

SemSem يقول...

جزاكم الله كل خير ماتفعلوه
ويارب يجعله فى ميزان حسناتكم باذن الله

تحياتى

Gannah يقول...

السلام عليكم
جزاكم الله خيرا يا أبو همس انت وكل من شارك صمود المقاومة شىء نفخر به جميعا ويزيد من شعورنا بتقصير مصر كحكومة وليس شعبا
فالكل مستعد بالمشاركة بما يستطيع
ربنا يزيدهم صمودا وثباتا ورزق كل الشهداء الجنة ورزق اهلهم الصبر والفرح بشهادتهم
تحياتى

اهو ده عيبه يقول...

ربنا يجعله فى ميزان حسناتكم ان شاء الله
وده اكبر دليل ان علاقتنا بيهم غير الصورة اللى بيحاول البعض يقولها

ان شاء الله متكونش اخر زيارة

مجداوية يقول...

السلام عليكم

برجاء قراءة تدوينتي الأخيرة واعطائي رأيك للآهمية

مع الشكر

صبرني يارب يقول...

فى ميزان حسناتك يارب وربنا يكرمكم كلكم


وربنا يصبرهم ويعينهم

Unknown يقول...

اللقاء يوم الجمعه 16/1
عدد الجرحى فى الاسماعيلية 19 حالة
بعد ان توفيت شابه هذا الصباح
منهم سيدة تبلغ من العمر 58 عام
وشابة فى العناية المركزة عندها 17 سنة
والباقى رجال من سن 17 عام الى الاربيعنيات
ومازالت المستشفى تستقبل المزيد
محتاجين تبرعات مالية
وبعض الملابس
رقم تلفونى هو 0188047779