28 مارس 2008

بكاء القمر

في ليلة إشـتقـت...إليــك
لمخـاطبتـك ...لمنـاجـاتك .
لـهمسـاتــك...لإبتـسامـاتك...
ولـم تكن بالوجود...وليس بالوجود أفضـل من حب لك بداخلي موجود
كلما نظرت إلـى شيء أمامـي وجدتك أجمـل...وأجمـل.
نظرت إلـى الماء...وجـدتك أصـفى...وأنـقـى
نظرت إلـى الورد...وجـدتك أحـلى...وأبـهى
تذكرت الوفاء...وجـدتك من الوفاء...أوفـى
وفـجـأة...نظرت لأعلى رأيت القمر...
يسير بكبرياء أمـامـه نجوم...وخلفه...نجوم
أعـجبنـي جماله...فأهـديتـه سـلامي
أتبعـت سلامي...بابـتـســامه
وقلت لــه؟
كم أنـت مغرور أيها...القمــر
ألا تعلم أنـني أمـلك أجمـل منـك ؟؟
فلماذا تتكبر؟؟؟؟
ألم تنظر إلـى هذه الأرض؟؟؟؟
ألـم تعلم أن بالوجود...أفضـل منك ؟؟؟
لم تعجبه كلماتي...
وقف في كبد السماء!!
وقال لـي...من يكـون هــذا ؟؟؟؟
قلت إنـه امير..في أرضـه ...
ملاك..في سمـائــه وأنـا اميرٌ له...
إذا ابتسم...رأيت برقاً يتلألأ من فمه ..... لايعرف الكبرياء
فقال أيـن هو؟؟؟
ففتحت له صدري...
وقلت هنا مـسكنه وعلى قلبي...نـقشـت إسمـه ..
وكلمة أحـبـك...دائما على فمه
فــجـــأة !!
تساقطت عـليّ أمـطــار...من السماء بدون غيوم...
فوجدتها دموع من عيون القمر !!!!
رأى نورا يشع من قلبي أحـمــله...
وهو شرف لي
نعم...لقد أبـكيـت القمر
فقال لـي...فعلا أنـا شبيه له
فقلت صدقت...
فأنـت تشبهه وضياءك...مستمد من نـوره
فلأجلك حبيبي سيبكي...القــمر
ويتفتح...الـزهـر ويفنى...الـعــمر
فأنت نور...في كياني
وأنت زهرة...ببستاني
أنت أمنيتـي...واميري التي لم تتحقق
وجنة...بقلبي زرعــت
جروحي بك قد شـفـيـت
وأحــزانـي بوجودك بـلا رحمة دفنت
فقليل بحقك أن يبـكي القــمـر ..

21 مارس 2008

حبيبتى


حبيبتى !


ملاك يسير على الارض !



فى وجهها نور.. وفى قلبها نور .. وبين يديها نور.. ولسانها يقطر حلاوة !



اخذت من النساء حنانهن وعفتهن ، ورقتهن ودفئهن ،



ومن الرجال صلابتهم فى المواقف ، ومواجتهم للصعاب ..



ومن الاطفال براءتهم !



اخذت من لقمان حكمته ومن ايوب صبره ومن عمر بن الخطاب عدله ،



ومن السيدة نفيسة علمها وورعها .



اسمع صوتها فى زقزقة العصافير !



وارى عطاءها فى جريان النهر ..



الكلمات تعجز عن وصفها !



الافعال تتضاءل امام عطائها !



الزمن يتلاشى فى حضرتها !



الكراهية لاتعرفها ولا تعرف الطريق اليها !



حنانها يسع الارض وما عليها !



فى احزانى اول من يمسح دمعتى !



فى افراحى اول من يرسم ضحكتى !



عندما انطق اسمها يحلو الكلام فى فمى !



عندما ارى وجهها أصبح اسعد الناس !



عندما تدعو تتفتح ابوب السماء.. وابواب الخير .



عندما تبتسم تتفتح الازهار ..وتشرق الشمس ..



عندما تحزن تغيب الشمس ويابى القمر ان يظهر !



هى سر وجودى ونجاحى وسعادتى وبقائى !



هى ملجئى ومسكنى وعشيرتى وسندى !



هى نصفى الاول .. وبوصلتى ودفتى !



ان كنت قد قصرت يوما فى حقها ..



فاننى اثق واطمع فى صفحها وعفوها !!



لو كتبت عنها بكل لغات العالم ..



لو ملأت كل اوراق الدنيا ..



وتحدثت عنها لكل خلق الله الى ان يقضى الله امرا كان مفعولا ..



لن اوفيها حقها ...الست دى أمى .


أمى .. كل سنة وانتى طيبة ..


كل عام وجميع الامهات بخير وصحة وسعادة



حقا الجنة تحت اقدام الامهات ..



لانها الانسانة الوحيدة فى الكون التى تعطى بلا مقابل



بل تعطى بكل سخاء وعن طيب خاطر ..



الامومة اسمى الغرائز على وجه الارض ..



الام مدرسة.. بل جامعة بكل ما تحمل من معان وقيم .



الكلام عن امى لا يكفيه بوست واحد بل مئات وربما الاف ..



بحثت عن هدية لاقدمها للام فلم اجد .. غير قلبى وروحى ..



من ابن عاق وناكر للجميل



الى ارق واطيب قلب فى الوجود



الى امى الحبيبة .. وكل الامهات ..



اطال الله عمركم لنا



وكل عام وانتم بخير ..

16 مارس 2008

ماذا تفعل ؟؟

**لو كنت رئيسا للوزراء ماذا تفعل ؟؟


* لو كنت رئيسا للوزراء..


لاسرعت بتقديم استقالتى وتركت منصبى لمن هو اقدر منى على حل مشكلات البلد ..
بعد ان طفش الشباب فبعضهم من هاجر وارتمى فى الاحضان الشائكة
احضان العدو الصهيونى وتزوج من اسرائيليات ووطأ بقدميه على تراب الوطن مضحيا باهله وذويه والبعض الاخر سلم نفسه لتجار الموت .. الذين صوروا لهم السفر الى اوروبا على انه
طريقا ممهدا مفروشا بالورود والازهار .. خدعوهم وقالوا لهم إن " الساعة بخمسة جنيه والحسابة بتحسب" مع الاعتذار للفنان عادل امام - فباع من باع كل ما يملكه واستدان من استدان .. واستقلوا المراكب
وبدلا من الوصول الى شاطى الاحلام ( المرتقب ) جذبهم قاع البحر وكتب النهاية للاحلام ونشوة الشباب ..عزائهم الوحيد انهم بحثوا عن وطن لن يجلسوا فيه على المقاهى او يقفون على نواصى الشوارع .. وطن يحلمون فيه برغيف خبز لا ياكلونه بالكاد والانتظار لساعات فى طوابير لا تنتهى ..



*لو كنت رئيسا للوزراء ..




لوقفت بالمرصاد للوزراء الذين يطلقون سيولا من التصريحات البراقة والوعود الزائفة
لاقلت وزير طوابير العيش الذى ترك مهام وزارته وانشغل بتغيير مسمى عيد الام الى عيد الاسرة .
لطالبت براس وزيرة عقود الخادمات كيف لها ان ترضى لاختها او ابنتها بتلك المهانة والاهانة .


* لو كنت رئيسا للوزراء ..



لتفاعلت مع مشكلات الجماهير وهمومهم ولما سكنت فى برج عاجى وصممت اذنى عن كل ما يكتب او يسمع من تلك الهموم والمشاكل .

* لو كنت رئيسا للوزراء ..


لوفرت تامينا صحيا يناسب الحد الادنى من الادمية بدلا من المرضى الذين يفترشون طرقات المستشفيات الحكومية لانهم لم يجدوا ثمن العلاج فى المستشفيات الخاصة ..

*لو كنت رئيسا للوزراء ..


لبحثت عن سكان القبور الذين يزاحمون الموتى فاضطروا السكن فوقهم دون مراعاة لحرمتهم
لبحثت عن العشوائيات وكيفية الحياة غير الادمية بها ..( او اتفرجت على فيلم حين مسخرة قصدى حين ميسرة )

*لو كنت رئيسا للوزراء ..


لنظرت الى المستقبل وتعلمت من تجارب من سبقونى ..



هذه مصر التى وهبها الله خيرا كثيرا لا مثيل له فى العالم ..
قناة تدر علينا ذهبا ..ونهر جميل يجرى باراضيها .
وارض طيبة يخرج من بطنها كل ما يفيد البشرية
وسماء صافية وتراث عريق يجذب اليه السائحين ..
سامحكم الله يا من تاكلون اموال الشعب وتستحلون لقمة العيش سائغة فى بطونكم وتحرمون اصحابها منها !!


*** على فكرة انا لما ابقى رئيس وزراء مش انسى اخوانى المدونين والمدونات
ومش انسى الكادر بتاع الرررررايق علشان يعزمنا فى الاستاد ويسدد ديونه الغلبان
ومش احرم لماضة من المليون جنيه اللى بتحلم بيه ..ولا وزة واخوها من 7 مليون كمان
ومش انسى طبعا اروح احلق فى لندن او باريس واسيب بولو اللى شغال يبوز فى قفايا ده برده ايبقى قفا رئيس الوزراء .
وعامة كل اللى نفسه فى حاجة يقولها قبل ما اقعد على الكرسى وانساكم وانسى اليوم اللى شفتكم فيه.



وقبل معلق يافطة على باب مصر مكتوب عليها


ويجعله عامر ...
la

14 مارس 2008

صعبان عليا


تحــــــــديث

=============

دى الصورة بعد الحلاقة بيوم واحد ومش عايز تريقة ولا شماتة والا......

الساعة الواحدة والنصف صباحا حالة ملل وضيق

انا لسه قاعد فى الكافتيريا خلصت على الجرايد كلها

ايه الزهق اللى انا فيه ده كله بس وجدتها اكيد من شعرى

فعلا شعرى بقى طويل وعامل زى الاسفلت بتاع الشوارع الشعبية

كله مطبات وامواج احسن حاجة اروح احلق اضيع شوية وقت بس النهاردة الاتنين

مش مهم فيه حلاق فاتح جنب الكافتيريا هو بيبوز الشعر بس مش مهم .

بقول للصنايعى ممكن تشوف الحلاق فاتح ولا قفل طلع ورجع بسرعة قفل طبعا

طب وايه يعنى انا اتصل بالحلاق بتاعى اكيد لسه فاتح بس برده النهاردة الاتنين

مش مهم اكيد هو فاتح محدش بيقفل دلوقتى وهى طالبة معايا انى احلق النهاردة

المهم اتصلت بالسيد الاستاذ / بولو ومحدش يسال مين بولو ده اسم الحلاق
انا كده موعود بولو ودقدق واسماء مش عارف بتيجى منين ما علينا المهم احلق بس .

-الو ايه يا بولو ازيك عامل ايه

-الحمدلله ازيك يا استاذ خالد

- انا الحمد لله

-طبعا انت فاتح النهاردة اه بصراحة كنت فاتح ولسه قافل من 10 دقايق

- ده اسمه كلام انا كنت عايز احلق النهاردة .

- معلش يا استاذ خالد والله عندى ظروف اصل اخويا جاب بنوته ورايح اشوفها.

- طب الف مبروك وعقبالك كده .

- انا على العموم منتظرك بكرة يا باشا

- انشالله لو عشنا لبكرة ابقى اجى يا بولو .

قفلت الموبيل وانا قرفان من نفسى مفيش فايدة افضل كده لبكرة

انا بكرة اجازة وكنت عايز احلق واروح انام اليوم كله من التعب

يلا مش مهم الساعة الثانية والنصف كفاية كده اسيبهم يروقواالكوفى

اروح انا انام وبكرة ابقى احلق بجملت ما جاتش على يوم .

تانى يوم يلا يا رجالة خلوا بالكم انا رايح احلق واجى بسرعة ما تعملوش مشاكل مع بعض علشان انا عارفكم لا ما تخا فش عيب احنا رجالة ( اه انا عارف ويا خوفى يا بدران )

المهم الساعة كام الساعة 1.30 صباحا يا ترى بولو لسه فاتح

اجرب ارن عليه ترررررررررن،جرس وما حدش بيرد كويس يبقى قاعد جنب اخوه بيشد من ازره

لا انا اروح يمكن مش عايز يرد عليا. قربت من المحل مفتوح طب الحمدلله وكمان رايق ما فيش حد بس.

فين بولو الصبى بتاعه راح يجيب حاجة وراجع طب مش بيرد ليه على الموبيل ..

اصله نسيه وخرج يجيب حاجة اوك ما فيش مشكلة استناه،

ثوانى ولاخ بولو جاى ماسك كيس شيبسى وبيتسلى ولا على باله حاجة طبعا .

- ايه يا عم بولو مش انحلق فى سنتكم دى ولا ايه

- لا طبعا اتحلق يا باشا معلش امبارح انا قفلت لانكنت رايح اشوف بنت اخويا اصلهم بيقولوا شبهى .

- شبهك طب كويس واجب يبقى لازم تشوف شبهك طبعا .

- اتفضل اقعد على الكرسى .

- حاضر يا عم بولو محسسنى انى اقعد على كرسى الرئاسة ما علينا يلا.

وبدا الاستاذ بولو فى الحلاقة سويعات ودقائق مرت والاستاذ بولو شغال يحلق
ويرغى فى ودانى وانا ساكت خالص باسمع بدون تعليق.

- بقوللك ايه يا باشا.

- نعم يا بولو قول .

-انت عندك شعر ابيض كتير .

- طب وايه المشكلة .

ايه رايك اصبغه ليك انت مش عايز تتجوز .

-انا لا طبعا مش اصبغه كده عاجبنى قوى وبعدين اتجوز تانى ليه هو اللى يجوز مرة

يفكر تانى فى الجواز يا بنى اللى يتجوز مرة يبقى بطل فى الايام دى .

- طيب وايه يعنى ما عندك الحاج متولى متجوز اربعة هههههههه0

- طب ده الحاج متولى امكانياته مساعداه وده عامة تمثيل فى تمثيل .

- يا بنى اللى متجوز اتنين بيصوت فما بالك باربعة .

- انت عارف يا عم خالد .

- لا مش عارف يا بولو00 خير اطرشنى !!

- انت عارف فيه واحد جنبى هنا متجوز اربعة .

- معقولة ربنا يكون فى عونه.

- انت عارف ومقعدهم فى شقة واحدة مع بعض .

- انا بدهشة واستغراب يا سلام ده قادر وفاجر صعب يا بنى اللى انت بتقوله.

- اه والله زى ما بقولك وعيالهم بيحبوا بعض .

- ربنا يوفقه يا عم بولو وعقبالك لما تبقى زيه ،الكلمه شكلها عجبته ضحك قوى.
- ههههههههههههه انشالله.

- بقولك ايه انا زهقت عايز اروح .

- خلاص اهو قربت اخلص ايه رايك كده .

- حلوة بس الجناب طويلة يا بولو خفها شوية.( ودى كانت غلطتى )

- حاضر بس كده اتبقى رقم واحد .

- انا بقى بكل ثقة عادى يا بولو مش مهم واحد ولا اتنين .

- لا انا بقولك بس علشان تبقى عارف .

- ماشى يا عم بولو ادينى عرفت ..

بولو افندى جاب المكنة واشتغل فى الجنب اليمين فجاة وبتامل فى المرايا لقيته شايل الشعر كله

- ايه يا بنى ده انت بتعمل ايه .

- يا استاذ ما انا قولتك اتبقى رقم واحد .

- انت خليتها زيرو كده مش واحد ولا يحزونون .

- لا ما تخافش انا اظبطه ليك

- ماشى براحتك

وسيبته براحته وفجاة لقيت الجناب بيضة والقفا يا عينى على القفا مبقاش قفا

بقى زى قفا تايسون فى مباريات الملاكمة

- ايه رايك كده يا باشا كده حلاقة انجليزى وقريبة من الكابوريا كمان.

- الله يخرب بيتك والبيت اللى جنب بيتك انجليزى ايه وكابوريا ايه انا بقيت زى الديك الشركسى كده ليه

-انا عمرى ما حلقت كده من يوم ما تولدت قفا النجعاوى الكبير ضاع يا رجالة .

- لا اتعجبك قوى يا باشا .

- ماشى يا عم بولو شكرا ليك ولخدماتك اوعى كده انا اغسل شعرى علشان انا زهقت منك .

- لا ثوانى اعملك ماسك وحمام كريم .

- ايه اللى بتقوله ده يا بنى انا كده اهلى ايتبروا منى ومش بعيد يضربونى بالنار .

طبعا انا خلصت حلاقة ورجعت الكافتيريا كانت الساعة 3.30 صباحا

فجاة لقيت الصنايعية بيبسوا قوى وبيضحكوا ، ايه ده يا استاذ خالد ايه اللى انت عامله ده.
عامل ايه يا غبى منك ليه احنا اول مرة نشوفك كده بس جميلة قوى فيك .

يا سلام شكلى كده ارجع اقتل بولو واجى اخلص عليكم انتوا كمان وارتاح .
لا والله جميلة بجد ماشى يا عم الظريف منك ليه اتريق .

طبعا روحت البيت الساعة 4 صباحا قعدت ابس فى المرايا والله شكلها حلو مش وحش برده

بس صعبان عليا القفا حرام عليا اسيبه كده مش مهم بكرة يكبر وينسى .

يلا مرة تفوت ولا حد يموت ..

وده جزاء اللى ما يسمعش كلام بابا وماما وينسى يشرب اللبن كل يوم.

وكمان ينسى يغسل اسنانه ورجليه كويس .

7 مارس 2008

الحب والزواج

خير اللهم اجعله خير حاجة جت على بالى من كتر ما باسمع وباشوف عن عزوف بعض الشباب والبنات عن الزواج بدون حب قبل الزواج ( حلوة عزوف دى ) يعنى هو موضوع يستاهل نتكلم عنه ولا ما فيش داعى هو صحيح الظروف الاقتصادية خلتنا عزفنا عن كل حاجة سواء عن الحب والزواج واى حاجة حلوة بس من وجهة نظرى مشكلة وتحتاج لمناقشة.

وبالمناسبة دى نقرا الحوار ده من حوارات هو وهى ونشوف اراء الاخوة والاخوات ده لو حد عبرنى اصلا وقرأ البوست .

هى : اخشى ان تسام الحب!!

هو : كيف اسام الحب.. والنظرة فى عينيك متجددة وحديثك يبعث فى نفسى الدفء!!

هى : من يدرى لو تزوجنا ماذا سيكون مصير هذا الحب ؟

هو : من يحب لابد ان يفكر فى الزواج ..

هى : واذا لم يكن الزواج مستطاعا ؟

هو : يبدو انك ترفضين الزواج ..

هى: اخاف من المشاكل ، هل يمكنك ان تقول لى كم عدد السعداء من المتزوجين ؟

هو: اتعنين ما تقولين ؟

هى : لو اننى وافقت وتزوجتك ماذا سيحدث ؟

هو : سيكون لنا بيت واطفال ..

هى : ولكنك ستملكنى ، ساصبح شيئا تراه كل يوم سوف تضيق بى وتملنى !!

هو : انت امراة غريبة .

هى : بل امراة تدافع عن حبها ، امراة لا تريد ان تعيش لتاكل وتشرب وتنجب اطفالا..

هو : انها سنة الحياة !!

هى :الحب هو حياتى الحقيقية ..اريد ان تكون حياتى مملوءة بالخوف والقلق واللهفة ..اكره ان اعيش فى برود .

هو : لقد خدعتنى !!

هى : انا لم اخدعك .. انها فلسفتى فى الحياة ..

هو : ولكنى لن اعيش بلا زواج .. كنت انت املى الوحيد ..

هى : تزوج بمن تشاء ، اننى لا امنعك .

هو : وتدعين انك تحبيننى !!

هى : انا لن اتزوجك لاننى احبك ولا اريد ان اقتل هذا الحب !!

هو : الحب الذى لا ينتهى بالزواج حب ناقص !!

هى : وماذ ينقصك ؟

هو : ان تكونى زوجتى واما لأولادى ، ان تكونى رفيقة عمرى ، هذا ما يفعله كل الناس ..

هى : انا لست مثلهم ، لا اريد ان افسد حياتى بالمشاكل !!

هو : انت انسانة انانية ، وتركها وانصرف وهو يكاد يحترق من الغيظ .

كلمات للاستاذ / سمير عبد القادر بجريدة الاخبار ..

السؤال : هل حقا الزواج يقتل الحب ؟؟؟

ده سؤال للمتزوجين اولا وغير المتزوجين طبعا ..

بس المهم مش عايز حد يحدف طوب ولا زلط علشان خاطر الزجاج ما يتكسرش والشاشة كمان لسه جديدة

يعنى ممكن اللى ايحدف يحدف طماطم و بطاطس وبدنجان رومى ويا سلام لو معاهم زجاجة زيت لزوم عمل المسقعة

ماهى فعلا الحياة بقت مسقعة .
ويجعله عامر ...

5 مارس 2008

تحديث

للتعليق على بوست صعيدى فى البرلمان

2 مارس 2008

صعيدى فى البرلمان

يا سلام وابقى نائب فى البرلمان يا فرحة امى بيا
زغرطى ياللى انتى مش غرمانة

وانتخبوا ابن الدايرة ( مش دايرة على حل شعرها عيب )

منكم وبكم ولكم

خير من يمثلكم فى البرلمان

ده لزوم الدعاوى الانتخابية طبعا

وابقوا اضربونى بقبقاب شجرة الدر لو شوفتونى تانى او نفذت حاجة من الوعود الانتخابية ( الكلام ده فى سرى طبعا )
نبدا الجلسة و الله المستعان

دخلت مجلس الشعب من اوسع ابوابه ايه هو رمزك الانتخابى المفضل ؟

ممكن رمز القلم

بس قلم رصاص ولا حبر مش عارف

كنت تفضل الدخول مستقل او تتبع حزب معين ؟؟؟؟

والله لو فيه احزاب فى بلدنا تستاهل يبقى مفيش مانع بس انتوا عارفين الله يرحم الاحزاب

اذا دخلت مستقل هل توافق على التوقيع للحزب الوطنى بعد نجاحك كمستقل ؟

ما فيش مانع بس بشرط يبقى حزب وطنى ايام الزعيم مصطفى كامل اما حاليا الحزب الاحتكارى الديكتاتورى ( الوطنى سابقا ) يبقى بالطبع لا والف لا

اول حاجه هتعملها لنفسك ولاسرتك ؟

اول حاجة اشترى ثلاجة كبيرة لزوم تسقيع الاراضى المنهوبة من الدولة وعجبى !!!

ممكن اخلى والدى والدتى يطلعوا للحج ( حتى شعائر الاسلام بقت بالواسطة )

ايه المشروع اللى ناوى تعمله لاهل دايرتك ؟

مشاريع كتير لدايرتى وكل الدوائر فى برمصر المحروسة

مستشفيات تليق ببنى ادم وتحسسه بادميته ومدارس لاستيعاب الطلبة ومياه نظيفة وصرف صحى .....الخ

قعدت فى المجلس جنب نائب مميز . من هو النائب ؟

كل نائب محترم وبيحب مصر ودخل عن طريق الشعب و بدون تزوير( ممكن اقعد جنب سامح عاشور نائب دائرتى الاسبق ) .

مع انى كان نفسى اقعد مكان فتحى سرور( او فتحى موافقة على راى قطة الصحراء )

ويا سلام لو اسعدنى الحظ وقعدت جنب دكتور نظيف اووووووه انسى انقعد نقزقز لب للصبح

ولا عزاء لمشاكل وقضايا الشعب .
شوفتوا مجلس التسالى واللب ( البرلمان سابقا )
قدمت سؤال للحكومه ايه هو السؤال ؟

عجبنى كلام لماضة قوى وموافق عليه اكل وسممتوه بقر وجننتوه دعم ولغيتوه عمر افندي وبعتوه بنك مصر ونهبتوه نهر النيل ولوثتوه فاضل ايه تانى ناويين تعملوووه؟؟؟

ونفسى اقولهم كمان نصيحة بالبلدى

احب اقولهم الكفن مالوش جيوب

(يعنى انموت زى ما اتولدنا مش اناخد حاجة معانا )

وخلوا بالكم كرسى الوزارة زى كرسى الحلاق مش بيدوم لاحد كل واحد بيقعد عليه شوية

طلب احاطه موضوعه ايه ؟ وبتقدمه لمين ؟

فى طلبات كتيرة قوى اكتر من 75 مليون طلب باسم الشعب المصرى بكل طبقاته وفئاته :مشكلة رغيف العيش وارتفاع الاسعار وزير التضامن وتصريحاته عن الاسرة اللى بتنفق جنيه ونصف فى اليوم تعتبر اسرة مش فقيرة هى فعلا مش فقيرة هى معدومة وبتعيش تحت مستوى حد الكفاف

إحتكار صناعة حديد التسليح والاسمنت للنائب المدلل أحمد عز وحيتان الاسمنت مما يضر بإقتصاد البلد ومصالح المواطنين

استجواب لاتنين من الوزراء موضوعه ايه ؟ وبتستجوب مين ؟

اول استجواب لوزير الخارجية عن كرامة المواطن المصرى وحقوقه الضائعة والاحكام الصادرة ضد المواطنين فى جميع الدول واين وزارة الخارجية من كل هذا .

وزير التجارة والصناعة ( وزارة تضليل المستهلك حاليا ) عن ارتفاع الاسعاروالاحتكار واين جهاز حماية المستهلك

انت مع الخصخصه ؟

خصخصة سمك -لبن- تمر هندى وكله ينهب ويجرى لا ...

ممكن نطبق الخصخصة بمفهوما الإقتصادى السليم وبلاش نبيع البلد لكل من هب ودب علشان شوية ملاليم حرام !!!

هل انت مع قطع العلاقه مع اسرائيل ؟

انا مع قطع رقبة اسرائيل وكل اللى بيساعدها وحسبى الله ونعم الوكيل ..
هل تؤيد الحرب على العراق ؟

لأ طبعا .. وده ارهاب بكل صوره

وحسبى الله فيهم وفى اللى ساعدهم على كده

هل تؤيد مرور الامريكان فى القناه ؟

مرور سفن تجارية فقط

غير كده بالطبع لا ..