كان حلما .. فخاطرا

نعم كان حلما فخاطرا واليوم اضحى حقيقة لا خيال

لقاء المدونين بمدينة الاسكندرية يوم 19 8-2008 كان درب من دروب الخيال او حلم من احلامى الصغيرة اننا نتقابل فى عروس البحر مع مدونى الاسكندرية والحمد لله ان الحلم تحقق برغم اعتذار عدد كبير من المدونين نظرا لظروف العمل او ظروف شخصية

البداية كانت مجرد فكرة عمل لقاء مدونين رغبة من بعض مدونى الاسكندرية والتعارف على اناس نكن لها كل حب وتقدير .لذا قررت عمل اللقاء بالاتفاق مع درة المدونين والاب الروحى لنا والدى العزيز ابو خالد واختى العزيزة دكتورة لماضة وتم اختيار اليوم والمكان ودعوة بعض الاصدقاء المدونين لحضور هذا اللقاء .

طبعا انا كنت بصراحة خايف قوى قوى وقلقان بدرجة فوق الوصف لدرجة انى قعدت من قبل اللقاء بيومين من غير نوم ويوم اللقاء نزلت من البيت قبل السادسة صباحا بعد محاولات يائسة مع النوم اللى خاصم عيونى وقررت انى اسافر اسكندرية واكون اول واحد هناك وفعلا نزلت واتجهت الى الموقف وركبت الميكروباص الساعة 7.15 صباحا متجه الى اسكندرية وفعلا اول مرة احس ان السفر متعة والطريق سهل جدا والامور ميسرة والحمد لله طبعا قبلها كنت مظبط مع احمد سكر اننا نسافر مع بعض وبعدين سوووو اتصل بيه وكنا ناويين نسافر مع بعض برده بس نظرا لظروف الاخ سكر وانه كان بياكل رز مع اهل الكهف فاخدته نومة وصحى متاخر وبيتصل يقولى انت فين قولتله انا قربت اوصل يا باشا صح النوم المهم انا استعجلت ومشيت اتصلت بابو خالد بعد ما ركبت قالى انا لسه راكب زيك وفى الطريق ، المهم اجمل مفاجاءة سمعتها وحسيت انى سعيد قوى قوى هى اتصال فاتيما بيه وبتقولى انا جاية اللقاء ما كنتش مصدق نفسى وطاير من الفرح قلتلها معقولة مش ممكن بجد مش مصدق قالت انا نازلة اهو وجاية ، بصراحة كده كنت عايز انزل من الميكروباص وارجع اجيبها معانا بص مع الاسف كنت فى الصحراء وكنا قطعنا اكتر من نصف المسافة المهم قولتلها سوووووو جاى اتصلك بيه وحاولو تيجوا مع بعض المهم هى زى حالاتى طلعت مستعجلة وركبت سوبر جيت وجاءت لوحدها وسووووو ظبط مع سكر وجم مع بعض انا وصلت اسكندرية الساعة 9.30 ونزلت الموقف لقيت الدنيا زحمة وحسيت ان مصر كلها احتلت اسكندرية المهم وقفت تاكسى وعلى محطة الرمل جرى نزلنى التاكسى قدام المكان بالظبط قلت الحمد لله مفيش توهان النهاردة دخلت المكان بصراحة عجبنى لحد ما وقلت اهو ينفع لحد ما نتجمع وبعدين لو مش عجبنا نروح مكان تانى وطبعا وصلت اول واحد وانتظرت الحضور الكرام ونبدا مراسم اللقاء ونشوف اولى المفاجات.

- حنين القلب : انسانة جميلة خفيفة الظل جدعة وطيبة جدا جدا والكارثة انها طلعت خجولة قوى ووشها بيحمر وتبص فى الارض دايما وهى اللى مقطعانى فى التعليقات والمدونات بس بجد بجد اول ما شوفتها حسيت انها اختى واعرفها من عشرميت سنة روحت جبتها من قدام سينما امير كانت تايهة يا ولداه وقال ايه من اسكندرية بس بصراحة كنت فى قمة السعادة انى قابلت انسانة طيبة زيها واقولها ربنا يكرمك ويفرح قلبك دايما واللقاء الجاى يكون مخصوص علشان سبوع النونو وخلى الفيشار عليكى برده .( ملحوظة ما تاخديش على كده يعنى دى حالة مؤقتة بعدين اهلا بالمعارك )

- مها زين( انها الحياة) يا لهوووووووووووى مش ممكن خفة الدم والشقاوة والجو والمهرجان اللى عملته فى اللقاء اتصلت بيها اعرف هى فين قالتى انها عند السينما وانا عمال اشرحلها المكان وانا بصراحة مش عارف انا فين وجيت ازاى اصلا لقيتها بتقولى انا جاية اهو ومعايا اتنين صحابى قابلنى قدام الكوفى طبعا طلعت استناهم وقلت اى مجموعة يكون عددهم ثلاثة اسالهم وانا ونصيبى ممكن الموضوع يعدى على خير وممكن ينتهى بعلقة سخنة ونبات فى التخشيبة للصبح بس ربنا ستر وطلعوا اول ثلاثة جم ودخلت بكل شجاعة وانا متوجس خيفة مين فيكم مها لقيت واحدة زى العسل كده بتقولى انا مها قولتلها اتفضلى يا دكتورة وكان معاها اتنين من صاحبتها زى العسل برده هدوء وعقل وخفة دم وعرفت فى الاخر هى جابتهم معاها ليه انا كنت فاكر انهم بودى جارد وناويين على نية لكل من تسول له نفسه انه يحتك بالبرنس مها زين طلع الموضوع اكبر من كده بكتير وجايين علشان يقوموا بتسجيل وتصوير الدكاترة مها وهى بتكشف على الدكتورة لماضة وحنين القلب ولبست البالطو بتاع لماضة واشتغلت كشف وقياس ضغط حسيت انها عايزة تقولهم اسفة جدا مضطرة اضحى بالمريض علشان خاطر انا اعيش بس بصراحة يا مها نورتى المكان وعملتى جو من المرح وخفة الدم يا برنس ومبروك عليكى العدد التانى من مدونات مصرية للجيب والف مبرووووووووووووووك حلو التسييييح والتصييييييييييييت ده صح .

- ابو خالد : وطالما قلت ابو خالد يبقى سمع هس ونسمع احلى سلام من بور سعيد لحد مطروح ومن اسكندرية لحد اسوان لاجدع واجمل شخصية فى عالم التدوين واللى بوجوده اى مكان يبقى جنة وبحس انى طاير فى السماء طالما هو جنبى وعايز اقوله حاجة بسيطة ربنا يخليك لينا ويبارك فى عمر حضرتك وما يحرمناش منك ابداااااااا ولا من حبك وحنانك لكل المدونين والمدونات الاحياء منهم والاموات .

- دكتورة لماضة : رسالة حب وتقدير وعرفان لاجمل واطيب شخصية قابلتها فى حياتى الجدعنة والشهامة وخفة الدم واللماضة والطعامة تبقى ايه يا حلوين شطار تبقى لماضة الف الف شكر على تعبك واهتمامك بينا وتشريفك اللقاء يا دكتورة وعقبال ما نشوفك كده اشهر دكتورة فى بر مصر المحروسة .

- دكتور محمود ( بطوط حبوب ) منوفى الجنسية وسعيد بها وانا كمان سعيد انك من المنوفية لانك اكدت عندى انطباعى وحبى للمنايفة بالرغم مما يقال عنهم بس بصراحة كل الى عرفتهم عشقتهم وحبيتهم الا واحد بس ومع الاسف الكل عارفه كفاية انه خانق بلد بحالها المهم بطوط طلع شخصية جميلة قوى اخلاق جدا جدا خفيف الظل كعادته دائما رزين ومثقف بس يا خسارة بيحب النوم وفقرة النوم من الفقرات المحببة لنفسه وعلشان كده كان بيدخل فى غيبوبة ويخرج منها سريعا وبصفته دكتور اسنان قام بالكشف مجانا على الاخ سوووووو بس اعتقد انه بيجر رجل الزبون وناوى ياخد ثمن الكشف فى الاستشارة منوفى يا جرعان والطبع يغلب بصراحة سعيد بمقابلتك وتشريفك يا بطوط باشا .

مصطفى ساجى : وده الضلع الثانى فى مثلث المنوفية وجه مع بطوط انسان هادى ورزين ومثقف قليل الكلام بس مبتسم دائما ابتسامة خجل سعيد بتشريفك يا صاحب اكبر عدد من المدونات المغلقة وكفاية علينا حلم وسط الضباب .

رومانسى :الضلع الثالث فى المثلث المنوفى شخص هادى جدا جدا منتبه ومركز مع الجميع بيخزن على سى دى فى الجانب الشمال من المخ البشرى ليعيد البث فى الوقت المناسب .

- مهندس / محمد حسن( اسكندرانى اوى ) من اجمل الحاجات اللى انا شوفتها بكل امانة انسان ناضج صاحب فكر عالى انسان تحس انه خليط من الاخلاق والثقافة والشهامة وخفة الدم والوعى بما يحدث مع قليل من ماء البحر ورمال الشاطىء تحطهم فى خلاط سعة 5000 لتر يطلع انسان بيعشق تراب اسكندرية اسمه محمد حسن بجد واجهة مشرفة لشباب مصر العاملين بالخارج انسان تثق به من اول وهلة وتتمنى انه يبقى اخ وصديق لك طوا العمر احب اقولك يا باشمهندس سعيد جدا جدا بمعرفة حضرتك وتشريفك وكنا نتمنى تقعد معانا لاخر اليوم بس الظروف بقى وخيرها فى غيرها واتمنى اننا نشوفك دايما على خير .

- احمد سكر : سكر وصل يا جدعان بعد غياب اصله كان محتكر السكر اللى فى البلد كله لحسابه طبعا يا سكر انت حاجة حلوة فى حياتى وكفاية انى بحلى بيك كل حاجة فى حياتى بس طبعا ما يمنعش انك بتظهر هادى قدام الناس وانت اخر شقاوة وعندك خفة دم تحسد عليها وكنت عايزنى اشترك معاك فى مؤامرة وعايزنى اقلب شنطة حنين القلب اللى عاملة زى شنطة الحقن بس على مين بصراحة كنت طمعان فى المانجة وشنطة سووووو كانت فاضية واكبر بس نسيت اقوووووول لسووووو كان هيتصرف هو يلا شردة بالجامد قوى عرفتى يا مها ولا لسه عدى الجماااااايل .

احمد سووووو : (عجوز وعنده الف سنه ) يااااااااااااه يا جدعان الشخص ده مالوش مثيل كل يوم اعرفه احبه اكتر واتعلق بيه اكتر واكتر انسان مصرى من الزمن الجميل تسمع عنه فى الحكايات خفة دم بتلقائية شديدة جدا مثقف وموهووووووووووب بجد ربنا يكرمك واشوفك حاجة كبيرة قوى قد تمثال الحرية كده وكفاية عليك كده علشان تيجى تعلق وما تزعلش .

فاتيما روح قلب ماما قمر المدونين والكريزة اللى بتنور وبتجمل الحياة التدوينية سعيد جدا بتشريفك يا ام يوسف برغم الظروف القاسية بس بجد من اجمل الحاجات فى اللقاء تشريفك لان الكل كان عايز يشوف ام يوسف ويستمتع بحنان الامومة الجميل وكفاية انك اخدتى حنين القلب وريحتينا من صداعها شوية بس هو انتم كنتم فين ده كله فى بيت الراحة انا قلت حنين خطفتك ولا حاجة كان نفسنا تكملى اليوم معانا بس كفاية انك جيتى واسعدتينا بوجودك ربنا ما يحرمنا منك ولا من حنية الامومة وربنا يقرب البعيد وتشوفى يوسف احسن واحد فى الدنيا بس بصراحة حسيت كده انتى وحنين شبه بعض فى حاجات كتير وقريبين من بعض سبحان الله .

- شيماء سمير ( احتمال ) مفاجاة من العيار الثقيل تشريفك يا شيماء ودعوة كريمة من الرائع دوما ابو خالد لحضورك وتشريفك اللقاء والقاء بعض القصائد من ديوانك الاول اطياف الصمت وانبهار الحضور بطريقة الالقاء واعجابهم بالديوان احب اقولك انك انسانة رقيقة وشفافة وفناااااااااااااانة موهوبة بجد ربنا يوفقك دوما وكفاية عليكى ابو خالد ونظرة الفخر والاعتزاز بابنة رائعة مثلك .

- زمردة : انسانة هادية ورقيقة بس مع الاسف ما شرفتش بالتعرف عليها كويس بس سعيد بحضورك وتشريفك طبعا

- اميرة ( سهر الليالى ) جت من الشغل علينا بدعوة كريمة من لماضة انسانة هادية ورقيقة جدا وما قعدتش كتير وما لحقناش نتعرف عليها بس برده كفاية تعبها وتشريفها .

مييييييييين تانى اه مدونة وزوجها من اسكندرية اسف ما لحقتش اتعرف بيهم كانوا مستعجلين قوى بس برده شكرا لتشريفهم وخيرها فى غيرها .

طبعا الاجتماع اشتمل على الكثير من الحوارات والمناقشات وخصوصا فكرة لمااااااااضة عن حق الملكية الفكرية للمدونيين وكيفية الحفاظ على حق المدون فى الحفاظ على حقوقه الادبية وكان اغلب الاقتراحات التسجيل فى الشهر العقارى او عمل ميثاق شرف للمدونين او خلى اللى يسرق يسرق هى جاءت على الافكار ما كله بيتسرق فى البلد وكذلك مناقشة السلبيات فى السينما المصرية والمونات ومدى تاثيرها على المصريين العاملين بالخارج ودى ليها بوست خاص ان شاء الله ،وكذلك استطرق الحديث للسؤال عن غياب قمر التدوين وشمسه الغائب الحاضر فى قلوب الجميع فرنسا هانم ربنا يتم شفائها على خير وترجع بالسلامة تنورنا واحب اقولها يا فرنسا اسمك وحبك منقوش فى القلوب للابد .

لحد كده انتهى اللقاء فى الكوفى شوب وانصرف كل من مها وصاحبتها وسافرت فاتيما وانصرف مهندس محمد حسن .

خرجنا من الكوفى الى البحر ماهو مش ينفع نروح اسكندرية ومش نشوف البحر كنت رحت فيها طبعا المهم اتجهنا الى منطقة بحرى والقلعة وطبعا لازمن نشوف ونسمع من بحرى وبنحبوه وعل الامة بنستنوووووه ايووووووووه يا جدعان منظر البحر يجنن وخصوصا ساعة الغروب المنظر تحفة واسكندرية جميلة برده المهم اتجهنا ناحية القلعة وبعدين دخلنا مطعم علشان ناكل بناء على طلب الطفل الطخين اللى دايما جوعان سووووو باشا اللى بيعشق الكلام عن الاكل والمطاعم ويدخل يشوف الاكل يقعد ساكت ومؤدب المهم قعدنا كل واحد طلب الاكل بتاعه كبده وبيتزا وكشرى وحاجات كتير كده المهم اجمل ما فى الموضوع ان سكر وابو خالد طلبوا بيتزا الاكل كله جه وقربنا نخلص والبيتزا مش عايزة تيجى المهم جات واحدة بيتزا لسكر وقعد الراجل ياكل ويدور على فواكه البحر وابقى قابلنى لو شفت رجل جمبرى واحدة الراجل عمال ياكل وابو خالد منتظر البيتزا بتاعته وبعدين جه الراجل يقول من طالب بيتزا فواكه البحر اييييييييييييييه فواكه البحر ومال سكر بياكل ايه طلعت البيتزا بتاعت ابو خالد وبتاعت سكر هى المتاخرة ابو خالد بص لسكر وبلهجة بور سعيدية جميلة انت اكلت بتاعتى وانا قاعد بتفرج عليكم .

المهم خلصنا اكل وطلعنا نحلى عند عزة مييييييين عزة مش عارف المهم احنا طلبنا ايس كريم والاخ سووووو طلب ام على وابو على والعيلة الكريمة بس مع الاسف ام على ما طلعتش حلوة واستكفى بابو على بس

المهم خلص اليوم الجميل الرائع وانصرف الجميع ابو خالد لبور سعيد وبطوط على المنوفية وسوووو وسكر وانا على القاهرة فى عربية سكر وطبعا انا ليه يومين ما نمتش وكنت طمعان اقعد فى الكنبة اللى ورا واديها الحنان بس الواد سووووو عمل الدنيئة واحتل الكنبة وناااااام وانا قعدت جنب سكر وكان هاين عليه اسيبه وانام بس بصراحة خفت لان سكر كان تعبان ومرهق ونفسه ينام هو كمان قلنا وعلى ايه بلاها نووووووم النهاردة كمان المهم استريحنا شوية فى الطريق ورحت جبت مشبك لهمس ومامتها قلت اضحك عليهم واسمى جبت حاجة روحت البيت قالولى جبت معاك من البحر قولتلهم مشبك قالوا يا ما جاب الغراب لامه وقعدوا ياكلو برده المهم انا كنت جعاااااااااااان نوم وعايز اناااااام علشان اروح الصبح الشغل والساعة بقت 4.30 الفجر قلت غراااااب غررررررراب وده جزاءت اللى يجيب حاجة لمراته .

فى النهاية شكر وتقدير وعرفان لكل الحضور وعتااااااب بسيط لكل اللى ما جاش وخصوصا الرااااايق ومواطن مصرى نايم براحتك يا اسلام .

بس برده راجع تااااااانى يا اسكندرية

موضوعات ذات صلة

يوم من عمرى حنين القلب

ايووووووه ياجدعان مها زين

المهم انى روحت روح قلب ماما

كوفى شوب وقلعة بس بطوط حبوب