عن بور سعيد احدثكم

تحديث هام

باذن الله تعالى يوم الجمعة الموافق 1 اغسطس 2008 ميعاد الحملة الخيخية للتبرع بالدم بهيئة المصل واللقاح بالدقى

طبعا اتيجوا كلكم العنوان ما يتوهوش واللى يسال برده ما يتهوش اللى يجى بالمترو ينزل محطة الدقى ويركب اى حاجة توصله بهيئة المصل واللقاح واللى يجى مواصلات عادية يركب اى حاجة رايحة البطل احمد عبدالعزيز او رايحة وزارة الزراعة هينزل قدام الهيئة لمزيد من التفاصيل هنا خيخة- روح قلب ماما .

==================

عن بورسعيد احدثكم

بداية الموضوع اتصال هاتفى من والدى العزيز ابو المدونين (ابو خالد ) ودعوة كريمة من حضرته لحضور اجتماع مدونى بورسعيد يوم الخميس الموافق 17-7-2008 الساعة السابعة مساء ، وبما ان الدعوة من ابو خالد كبير العائلة التدوينية فصعب بل مستحيل الرفض لانى لا امتلك الجراة ولا الشجاعة فى مجرد التفكير فى عدم تلبية الدعوة مع ان ظروف العمل لاتسمح بالغياب ولو لساعة واحدة ولكنى قررت فورا الذهاب مهما تكن العواقب وبادرته مازحا على فكرة يوم الخميس ده يبقى يوم عيد ميلادى 17-7 فرد بجد انا هاعملك احلى عيد ميلاد فقولتله ربنا يكرمك انا بهرج ما فيش داعى هو فعلا عيد ميلادى يوم الخميس بس انا مش بحتفل بيه اصلا وانتهت المكالمة على وعد بلقاء يوم الخميس ببور سعيد .

يوم الاربعاء 16-7 اكدت على حضرته انى جاى بكرة باذن الله واتفقت مع الاخوة والاخوات المدونين الموجهة لهم الدعوة من القاهرة لحضور اللقاء بالسفر مع الاخ العزيز احمد سكر الساعة الثانية بعد الظهر ولكنى فوجئت باتصال من والدى العزيز يؤكد على حضورى مبكرا لان سكر وباقى المدونين احتمال يتاخروا وكالعادة وافقت على الفور ووعدته انى اكون الصبح فى بور سعيد وظللت الليل كله اترقب اللقاء والخوف والرهبة والشوق يعتصرنى لرؤية مدونى بور سعيد ورؤية مدينتهم الباسلة .

واستيقظت مبكرا على غير عادتى واستعددت للسفر وتوجهت الى محطة السوبر جيت بالترجمان بناء على تعليمات والدى العزيز ابو خالد ولسوء حظى لم الحق بميعاد 11.30 وانتظرت الميعاد التالى 12.30 وحجزت وتوكلت على الله واتصلت بابو خالد وقولتله ان شاء الله هاكون فى بور سعيد الساعة 3.30 ولسوء حظى الطريق كان زحمة موووووووت كالعادة وتاخرت اكثر من نصف ساعة بس بصراحة الرحلة كان دمها خفيف وما حسيتش بالمسافة وخصوصا ان ابو خالد كان متابعنى بالتليفون لحظة بلحظة لدرجة حسسنى اننى طفل صغير والده خايف عليه احسن يتوه بجد ربنا ما يحرمنى منك ابدا ولا من حنيتك والدى العزيز .

الحمد لله وصلت ارض الوطن بسلامة الله طبعا مجرد ما نزلت لقيت ابو خالد فى انتظارى فى المحطة حسسنى انى واحد مهم قوى وممكن ناس تنتظره .

طبعا ركبنا تاكسى وتوجهنا الى مسجد السلام لصلاة العصر وخلال الطريق ظل يشرح لى معالم بورسعيد ومعالمها واسماء شوارعها التاريخية وكم كنت سعيدا بتلك المعلومات القيمة وكم كنت منبهرا من جمال بورسعيد وروعتها .

نزلنا من التاكسى ودخلنا مسجد السلام لصلاة العصر وانتهت الصلاة وذهبنا لانتظار مدونى القاهرة اللى شرفونا بالحضور

اخى الحبيب احمد سووووووو ( عجوز وعنده 30 سنة ) فنان مصرى اصيل موهوب بحق وكان مفاجاة انه حضر اللقاء

المبدعة دائما اللى دماغها لاسعة من كتر النطح مع خرفانها ابى هانم ( كوكب ابى ) اللى بجد بتخلى اى لقاء له طعم ولون .

الرقيقة صاحبة اخف دم رودى ( بنوته مصرية ) بنوته مرحة شقية جدعة قوى قوى .

اخى العزيز قوى قوى احمد سكر ( احمد سكر ) شاب مصرى جميل جدع شهم تحس انه هادى بس شقى جدا وخفيف الظل .

اميرة الالوان المتالقة دائما داليا ( قوس قزح ) بنت مصرية جدعة تحس انها اجدع من 100 راجل تتميز بالتلقائية وخفة الدم المصرية .

ده جروب مدونى القاهرة

طبعا بدعوة كريمة من اطيب واحن اب فى مصر ابو خالد عزمنا على الغداء وكان كباب وكفته على البحر ياعبده يا رايق خليك بقى فى راس سدر وسط الرمل والزلط وانت فاهمنى طبعا ( بس بجد كان نفسى تكون موجود ..)

طبعا كرم واهتمام ابو خالد بينا جميعا كان فوق الوصف وصعب انى اوفيه حقه مهما اتكلمت عنه بكلمات تحمل اجمل الحروف والمعانى لانه يستحق اكثر من ذلك بكثير .

المفاجاة المدوية اللى كنت مش مصدق انها اتحصل فى يوم من الايام انى احتفل بعيد ميلادى او حتى افتكر اليوم ده من اساسه انا بعد 33 سنة اتولدت وتعلمت فى سوهاج وعشت فى القاهرة يتعملى عيد ميلاد فى بور سعيد تخيلوا انتم مقدار السعادة اللى انا فيها

طبعا ابو خالد كان عند وعده وفعلا عملى اجمل عيد ميلاد فى حياتى وجابلى تورته وحلويات ياااااااااااااه انا باحلم .

بعد كده توجهنا الى مكان اللقاء بمركز شباب الاستاد بصحبة ابو خالد وتقابلنا مع مدونى بورسعيد اللى بجد لما قابلتهم حسيت انى بعرفهم من زمان

الاستاذ طارق غنام (بور سعيدى ) شخصية مثقفة واعية مدركة لما يحدث من حولها بس واضح انه مغرم نطح خرفان .

والاستاذة داليا محمد ( اهو ده عيبه ) بنت بلد جدعة مثقفة فكرها عالى وكان نفسى اتكلم معاها اكتر بس خيرها فى غيرها

وأختها دعاء محمد (ربع ضارب) هادية وكلامها قليل قوى بس تحس انها واعية برده .

والأستاذة ايناس ( نهر الحب ) رقيقة جدا تحس انها عصفور كناريا رقيق مثقفه جدا لبقة فى حديثها .

والأستاذ محمد (كراكيب شيكو) انسان مهذب دمه خفيف جدا ومهرج وحاسس انه عنده عقدة من الزواج والحمد لله انا زودت العقدة دى عنده بس احب اقوله برده انسى يا عمرو بكرة تدخل الخية يا جميل .

والأستاذة الرائعه شيماء (اشمعنى انا) اللى بجد طلعت حدوتة فى خفة الدم والفكاهة وتحس انها فاهمه وواعيه بطريقة تبهرك وربنا كرمها بالجلوس جنب المبدع سووووو اللى عملها كوكتيل دخان استنشقته لوحدها وعايز اقولها تستاهلى .

كان يوم جميل بكل المقاييس بصراحة وكان لقاء رائع جدا تحت رعاية والدنا العزيز ابو خالد وبدات رحلة العودة من الساعة العاشرة مساء وحتى الثالثة فجرا وكانت رحلة جميلة جدا وخصوصا بصحبة مدونين بجد يتميزوا بخفة الدم والحضور البديهى اللى خلوا رحلة العودة درب من الخيال .

وخصوصا النحلة والدبور والصداع المزمن ابى هانم بخفة دمها وصداعها.

وخفة الدم المصرية والجدعنة رودى ام نوراللى طلعت كوميديان من الطراز الاول .

اللى مالوش حل خالص وبحس انه تؤام روحى سووووووو باشا الفنان المبدع

وحبيب قلبى من جوه احمد باشا سكر

اللى اتشرفت برجوعى معاهم فى رحلة العودة واللى اتمنى اكون معاهم دايما .

ايه رايكم نقضى يوم جميل فى اسكندرية فى شهر 8 ونقابل مدونى اسكندرية اللى موافق يرفع ايده . موافقة

وفى النهاية احب اوجه شكرى وعرفانى لوالدى العزيز ابو خالد على كرمه وحنانه واهتمامه بى على وجه الخصوص وعلى الجميع بوجه عام واحب اقوله انت فعلا اب حنون وتستحق ابو المدونين بلا منازع والله العظيم .

ربنا يبارك فى حضرتك وما يحرمناش من حنانك واهتماماك بكل المدونين .