11 يوليو، 2008

حدث فى مثل هذ اليوم

تحديث
======
دعوة عامة
دعوة كريمة من والدنا العزيز / ابوخالد لمدونى بورسعيد وجميع المدونين يوم الخميس الموافق 17-7-2008 بمركز شباب الاستاد - استاد بورسعيد الرياضى الساعة السابعة مساء لمزيد من التفاصيل الرجاء متابعة مدونة ابو خالد
================
زى النهاردة 10-7-2004
اخدت اوبشن جديد عليه اول مرة اتنادى بيه من اول ما اتولدت من اليوم ده بقيت ابو همس
اليوم من اوله كان عجيب نزلت الصبح رحت الشغل حوالى الساعة الرابعة والنصف عصرا جانى تليفون من اخت المدام

بتقولى انها عند الدكتورة علشان المتابعة والدكتورة بتقولها انتى لازم تولدى حالا طبعا انا افتكرت نفسى انى بقيت دكتور ولا حاجة ومطلوب منى اجى اساعد الدكتورة فى عملية الولادة او بصفتى استشارى على مستوى عالى وخبرة طبعا فى الوقت ده انا كنت فى الشغل وعندى مشكلة فى تقفيل الميزانية وبنشد فى شعرنا وعمالين نتخانق مع طوب الارض قلت بلاها خناق بلاها شغل نروح نشوف المودام يمكن الدكتورة تحتاج مساعدة ولااستشارة طبية انكون فى الخدمة .

همس وابن اختى فى حديقة الحيوانات

طبعا خرجت من الشغل على المستشفى رحت لقيت امة لا اله الا الله موجودة هناك مش عارف مين قالهم ولا هم جم امتى الله واعلم .

طيب انا مطلوب منى ايه دلوقتى انا جيت اهو لا مفيش حاجة هى قربت تطلع من غرفة العمليات طب كويس ومال اتصلتوا ليه وكنتم مستعجلين.احنا عايزينك تيجى تحاسب المستشفى اه انا بقول كده برده ماشى ما يضرش ( كده جينا لحرق الدم وقلة الذوق ) ،وعايزين لبس للنونو بعد ما تولد لبس ايه ما هى ليها سنة عمالة تجيب لبس اولاد وبنات مرة ولد و مرة بنت لدرجة مش عارف احط هدومى فين من هدوم النونو .

اصلنا جينا مش عاملين حسابنا على ولادة ااااااه ماشى انزل اجيب من المحل اللى اول الشارع

عم الحج يا عم الحج انا عايز لبس نونو لسه مولود يرد الحج عايز ايه بالظبط بصراحة مش عارف هات كل اللى عندك يخص النونو .

الراجل ما كدبش خبر وجاب المحل وحطه قدامى وقالى اختار اللى انت عايزه طبعا انا وقفت مزبهل مش عارف حاجة فاختارت اى حاجة وطلعت جرى على المستشقى لانهم بيستعجلونى لان الست همس شرفت وعايزة الهدوم بتاعتها .

طبعا طلعت دخلت الحسابات دفعت تكاليف عملية الولادة وشوية فاقت خدنا العربية وروحنا البيت والدنيا هاصت والكل جاى يبارك على المولودة الجديدة اللى بقت بعد كده اسمها همس .

طبعا كل سنة وانتى طيبة يا همس وعيد ميلاد سعيد

الموقف التانى برده يوم 10-7 -2002 ده كان يوم عقد القران بتاعى والمفروض انى اقدم اجازة وما اروحش الشغل

قدمت الاجازة قبلها بيومين واعتمدت من المدير وخلاص لقيت يوم 10-7 الصبح امين الصندوق بتاع النادى بيتصل بيه ومتنرفز ومتعصب انت مقدم اجازة اه كتب كتابى النهاردة يرد بكل برود مفيش كتب كتاب احنا عندنا شغل وتقفيل ميزانية وانت لازم تيجى النهاردة ضرورى طب ازاى اجى والناس والماذون طب الحل ايه

ما فيش حل غير انك تيجى تخلص الشغل النهاردة

امممممممم حاضر الشغل اولى طبعا بلاها جواز بلاها كتب كتاب

المهم نزلت رحت الشغل اشوف الشغل المتاخر لقيت حاجة عبيطة ما خدتش اكتر من نص ساعة شغل

المهم خلصت الشغل والمفروض انى امشى اروح الحق كتب الكتاب والمعازيم لا متصل بيه مصصم انه استناه لحد الساعة 7 مساء طبعا ما ينفعش جيت مقفل المكتب والساعة 3 مشيت علشان الحق اغير هدومى احط شوية نفتالين بلى واروح كتب الكتاب .

المهم روحت البيت استحميت حميت العيد وغيرت هدومى ونزلت اروح كتب الكتاب لقيت كل الناس هناك والماذون مستنى واهلى بيدورا عليا واهل العروسة طبعا قالوا الولد غير رايه وعمل الدنيئة معانا .

المهم طلعت ولما فتحوا الباب لقيت الزغاريط اشتغلت والعريس جه والكل بيجرى عليا كنت فين قولتهم كنت فى الشغل

لقيت الكل متنح كده وحاسس انى بقيت نكرة فكرونى بحنفى فى مسرحية سك على بناتك فضحكت وقولتهم والله مفيش اوفر تايم النهاردة ده انا حتى سبت الشغل وجيت فقعدوا يضحكوا .

شوية والاقى السيد المبجل امين الصندوق بيتصل وزعلان وازاى امشى وما استنهوش ولازم اروح الشغل حالا

قولتله انا قاعد دلوقتى قدام الماذون اسيبه واجى يعنى قلى ااااااه.

ااااه لا ده كده طالبة رخامة وغتاتة ( طبعا فى سرى ) وسلام وجيت قافل الموبيل وسيبته ياكل فى نفسه لحد تانى يوم

وكتبنا الكتاب ودخلت المصيدة والمغفلين زادو واحد من هذا التاريخ .

وبعدين عرفت ان الراجل ده كان عايز مصلحتى وكان عايز ينقذنى من شر اعمالى بس مع الاسف انا طلعت غبى وما سمعتش الكلام هههههههه.
وهكذا تستمر الحياة وتمر الايام وارجع واقول ليت العذوبية تعود يوما .

هناك 67 تعليقًا:

•√أريـ السمر ـج√• يقول...

عيد ميلاد سعيد و أن شاء الله تفرح بيها عروسة كبيرة و يخطفها منك عريسها

و عيد زواج سعيد

الحمد لله اول تعليق فى مناسبة سعيدة

دمت بكل الخير
و جعل الله ايامكم كلها سعادة و همس احبة

حنين القلب يقول...

تااااااااااااااااااانى تعليق مش فيه فايده كان نفسى اكون الاول
يلا بقى اروح اقرى وارجع اعلق

حنين القلب يقول...

كل سنه وانتى طيبه يا همس وعقبال مليون سنه وليكى منه احلى بوستين وعقبال ما اشوفك عروسه واحضر فرحك يا رب
وطبعا تاريخ عقد القران تاريخ لا ينسى
حد ينسى يوم ما اتكلبش
بس والله حلوة اوى انك روحت يوم فرحك ويا ترى روحت بالبيجامه ولا بالبدله
اكيد زى حنفى
ههههههههههههههههههههههههههه
بوست زى العسل وتعيش وتحتفل بهمس وام همس
سلام يا ابو همس

قوس قزح يقول...

كل سنة وهى طيبة و عقبال 100000 سنة
و تشوفها عروسة ان شاء الله
و يطلع عينك فى تجهزها يا قادر يا كريم هههههههههههههه


امورة ما شاء الله عليها
ربنا يخلهالك يا خالد و تقر عينك و تسعد قلبك

قوس قزح يقول...

لا استنى ده فى كمان عيد جوازك
كله منك
مش تصبر كده شوية على التعليقات


عيد جواز سعيد

و واضح انك منقى اليوم علشان تهرب من الجرد و الميزانية هههههههههههههههههههههههه

عاشقه الفردوس يقول...

ياعسسسسسسسسل

بنوتكم ماشاء الله عليها الله اكبر

الله يجعلها من الذريه الصالحه وتكون يارب دايما منوره حياتك يارب


وعيد جواز سعيد


انت منقيهم ولا ايه


علي فكره شهر سبعه ده شهر العظماء
اه اسالني انا
اانا اتولدت 4/7

يعني بنتك من العظماء
:)))


ربنا يخليهالك ويخليلك زوجتك اللهم امين

ňįĝŗő يقول...

شوف بقى يا عمنا
أنا مش قريت البوست
قريت أول سطرين بس لأني زي مانت عارف
بس اللي أنا عملته زيادة إني شوفت صورة همس
عاوز اقولك إني خلاص صرفت نظر عن حنين
بلاها حنين أنا هآخد سوسو
أيوه سوسو
أنا هأدلعها و اقولها سوسو .. فيه مانع؟
تقولي بقى محجوزة
فيه خماشر واحد قبلك اتقدموا و اترفضوا
الكلام ده ماياكلش معانا يا ريس
هأتفق معاها نهرب و نتجوز و نحطك قدام الأمر الوائع
شوف مصلحتك كويس و فكر بالعقللللل
خلاص البنت دي اتحجزت
انسى
يا لهوي
إيه البنت الحلويات دي؟
يا خبر
زي العسل
ما شاء الله ولا قوة إلا بالله


سلام بقى علشان انا واخد خمس دقايق بالظبط افراج بالعافية


يلا سلام

همس الاحباب يقول...

اريج السمر
ربنا يكرمك يا رب
والله يبارك فى حضرتك
انتى منورانى دايما اول تعليق او حتى اخر تعليق
معلش انا مقصر معاكى بس غصب عنى
دمتى طيبة اختى العزيزة
وربنا يسعدك دائما

همس الاحباب يقول...

حنين القلب
ههههههه
احسن برده
عملتها اريج السمر
بصراحة انا فرحان فيكى
هههههههه

همس الاحباب يقول...

حنين القلب
وحضرتك طيبة وبصحة وسعادة
وعقبال ما نيجى نهنى ونبارك بقدوم شهد وحنين وخالد كمان
اكيد طبعا حد ينسى يوم الكلبشة الابدية هههههه
بس انتى مش عارفة
شهر 7 ده واخده لحسابى مناسبات
خدى عندك
10-7 كتب كتاب وشبكة
10-7 عيد ميلاد همس
17-7 عيد ميلادى
24-7 عيد الزواج
ولسه البقية تاتى
لا رحت بالبيجامه طبعا هههه
وركبت اتوبيس كمان عندك مانع
هههههههه
تحياتى وتقديرى اختى العزيزة
ههههههههه

همس الاحباب يقول...

قوس قزح
اميرة الالوان عندنا يا مرحبا
وانتى طيبة يا ستى وعقبال ما تفرحى باولادك ان شاء الله
ااااه انتى بترسمى على ايه بالظبط انا مش ناوى اجهز حد عاجبك على كده ماشى
مش عاجبك انتى حرة طب اتدفعى مهر كام هههههههه
ربنا يكرمك ده من ذوقك
كفايه انها طالعة لابوها ههههههههه
تحياتى

همس الاحباب يقول...

قوس قزح
ههههههههههههههههه
لا مش عيد جوازى ده خطوبة وكتب كتاب بس
عيد جوازى 24-7 ان شاء الله
لازم تفكرينى يعنى
اقول ايه بس يلا روحى يا شيخة ربنا يكرمك دنيا واخرة

همس الاحباب يقول...

عاشقة الفردوس
منورانى دائما اختى العزيزة
وربنا يكرمك دائما
يارب يجعلنا جميعا ذرية صالحة
لا جاءت صدفة والله
بس 10-7 ده الخطوبة وكتب الكتاب
الجواز كان 24-7 .
ههههههه كل سنة وانتى طيبة وعقبال 100 سنة
هو فعلا شهر العظماء عندك شك فى كده
انا بقى مواليد 17-7
ههههههه يلا بقى محدش احسن من حد
تحياتى وتقديرى

همس الاحباب يقول...

حبيب قلبى
نيجرو باشا
ههههههههههه
ايه يا عمنا داخل سخن كده ليه
مش ناخد راى العروسة الاول يمكن تغير رايها ولا حاجة
وبعدين انت يدوب تناسبك حنين
عنده 11 يوم اما همس 4 سنين كبيرة عليك يا جدع
وبلاها سوسو خد نادية ههههههه
ربنا يوفقك يا باشمهندس
ويكون فى عونك وما يحرمنيش من خفة دمك ولا شقاوتك يا باشا
وعقبال ما نفرح بيك كده ونشوف اولادك
تحياتى وتقديرى

رئـــــيسـة حزب الأحلام يقول...

أولا كل سنه وهمس طيبة وتشوفها فى أحسن حال
وعيد زواج سعيد
بس ايه اللى بيقولك تروح الشغل دة
حاجة غريبه جدا والحمد لله انك ماسمعتش كلامة
وكل عام وانتم بخير
تحياتى

عبده الرايق يقول...

كل سنه وهمس بخير وعبقال ماتشوفها عروسه منوره الكوشه
طبعا انت خدتنا مشورتنا
من عيد ميلاد همس
للولاده
لكتب الكتاب
يعنى مشيت عكس التيار كان مفروض تكلمنا عن كتب الكتاب وبعدين الولاده وبعدين عيد ميلاد همس
بس انا بجد زعلان منك قوى
اولا
زعلان لانك كلمتنى امبارح فى التليفون ومقولتليش ان عيد ميلاد همس كان يوم 10
ثانيا
زعلان منك لانك ظلمت الراجل الطيب امين الصندوق اللى كان عايز مصلحتك
امال هو اسمه امين ليه
ياريتنى كنت اتعرفت على الشخصيه النادره دى
كان زمان الواحد بقى من العاقلين

الف بوسه لهمس من عمو الرايق
اما بالنسبه للهديه
قولها تفتح الحصاله وتجيب لعمو الرايق هديه

لماضة يقول...

ههههههههههههه
كل عيد جواز وانت طيب
وكل سنه والامورة همس بخير يارب
وعقبال يارب ما تكبر وتشوفها دكتورة قد الدنيا
وترجع تقول اموت واعرف مين اللى زقني لما يجي عريسها يعمل زيك بالظبط وياخدها منك

رندا يقول...

خالد ابو همس

كل سنة وهمس بخير ربنا يجعلها من المسعدين يارب
وكل سنة وعيد زواج سعيد وزوجتك بالف خير يارب

هو امين الصندوق كانت طالبة معاة غلاسة فعلا

كنت قلت لية انا عندى جرد مع الماذون ههههه
مش برضة كانوا
بيجردوك من العزوبية ههههه

فين بقى التورتة

بوسة لهمس وبوسة لام همس
وتحية كبيرة خالص لاجمل اخ

كل الود


رندا

appy يقول...

خالووود طيب ومخبى ليه افهم بقى علشان مش تعزمنا ونعمل لها عيد ميلاد يا ابنى هو انت فاكر همسه دى بنتك لوحدك ولا ايه كل ولد او بنت ابن مدون واخ صديق زيك كده ابننا او اخونا الصغير يبقى مش من حقك بس هسامحك علشان خاطرها
كل سنه وهمسه طيبه
وانت واللدتها طيبيبن وفسحتها ولا لا

انين الحزن يقول...

خاااااالد

ابو همس ومازن قريباً ان شاء الله

ولا شكلي كدا اجيب مازن قبلك

كل سنه وهيا طيبه وعقبال مليون سنه

وكل سنه وانت طيب علشان عيد ميلادك خلاص قرب انا اول حد يقولك اهوه اعرف الجمايل دي

سلامووووووز ياسكر

وزة

النجمة الصامدة يقول...

كل سنة وانتي طيبة يا همووووسة


وكل سنة وحضرتك طيب بمناسبة التدبيسة
ههههههههه

بس واضح ان يوم 10 - 7 دا عامل معاك عمايل
هههههههه

يلا تعيش وتاخد غيرها في 10 - 7 - 2009
D:

سلام

المـــفـــــــقــــــــوعـــــة مــرارتـهــا يقول...

بقي تكتب كتابك ياراجل
وماتاخدش جزي
لا كدة فيه تقصير منالمدير بتاعك انا هابلغ عنك

saragebaly يقول...

همس الاحباب

كل سنة وهمس طيبة وبالف خير وصحة وسعادة

وعقبال 100 مليون سنة

وعقبال ما تشوفها عروسة جميلة

وتفرح باولادها ان شاء الله

سارة

همس الاحباب يقول...

رئيسة حزب الاحلام
وانتى طيبة وعقبال ما نفرح بيكى كده ونمشى فى جوازتك ونشوف اولادك
تحياتى يا جميل

همس الاحباب يقول...

عبده باشا الرايق
حبيب قلبى
كل سنة وانت طيب يا باشا
معلش نسيت بصراحة
وعامة انت ابو الواجب كله
واوصلها سلامك وبوستك
اما امين الصندوق هههههههه ربنا يسامحه
معرفش يقدر يضغط عليه شويتين علشان افلسع من الجوازة
هههههههههه
حتى همس عايز الحصالة بتاعتها
هو انت متعرفش مش انا فتحتها من وراها ولقيت فيها 120 جم وخدتهم وهى متعرفش لحد دلوقتى .

همس الاحباب يقول...

لماضة
دكتورة لماضة عندنا وانا بقول الدنيا منورة والعصافير بتزقزق ليه
وانتى طيبة يا دكتورة ووعقبال ما نفرح بيكى
ونشوفك وزير صحة قد الدنيا
انا موافق يا ستى المهم تبقى زيك كده ههههه
تحياتى اختى العزيزة

دكتور حر يقول...

تعيش وتفتكر يا ابو همس

حكاويك شدتنا معاك


كل سنه وانت طيب يا جميل

فاتيما يقول...

كل سنة و همس طيبة
و عقبال يوم فرحها
بس العريس ييجى بدرى و ميوقفش قلبكو زى ناس ما عملت ....
و تعيش و تفتكر
قصدى عيد زواج سعيد
و لو إن كلمة زواج متمشيش مع كلمة سعيد
إنما هما بيقولوها كدا و خلاص
و امين الصندوق دا راجل طيب بس إحنا كدا مبنسمعش كلام العقل
و ساعة القدر يعمى البصر
نهايته
أتمنى تستمعوا بلقاء مدونى بورسعيد و تحياتى جدا لأبونا الراجل الطيب اوب خالد و لعبدو الرايق و داليا أهو دا عيبه و لدوللى قوس قزح و كل اللى جاى يوميها إن شاء الله
سامحنى عشان غلاستى معاك فى حكاية الرد دى بس أصل إنت لو سمعت نبرة صوتى الأيام دى مش هتعرفنى
لما أروق إن شاء الله يبقالنا كلام
و لا أقولك
انا مش عايزة إتكلم على البوست دا خالص و اللى حصل فيه أحسن
أشوفك على خير يا خالد
تحياتى

NIDAAL PAL يقول...

كل سنة و همس طيبة و ابو همس طيب و كل حبايب همس و النقطة دى جاية منى انا ...انا...انا. الى آخره
انزل من على المسرح بقى شوية .
بس عارف كله كوم و امين الصندوق ده كوم تانى خالص .
بس ممكن افرض عليك سطوة الرخامة و الرزالة و أسألك سؤال انت مش عايز تجاوبه .. أيـــــــوة هو ده !!
كان ايه السبب بقى ؟
و بوظت ايه و هو كان عايز يصلحه .
هههههههههههههههههههه
تحياتى
نضال

أم أحمد المصرية يقول...

اخي الفاضل
كل سنة و همس بخير و عافية و قرة عين لكم يارب
و كل عيد زواج و انتم بخير بس اكيد حصل خطأ مطبعي و انت بتكتب انت قصدك ان السعداء زادوا واحد
اعطيتك فرصة للتراجع استغلها قبل المدام ما تقراالمكتوب او حد ابن حلال زي يقول لها :))))))

همس الاحباب يقول...

اختى العزيزة / رندا
ام خالد
كل سنة وحضرتك طيبة وبصحة وسعادة
ههههه هو فعلا كانت طالبة معاه غتاتة ورخامة
بس بصراحة كان عنده حق
يوصل ياستى وعقبال ما تفرحى باولادك
دمتى طيبة وما يحرمنيش منك ولا من ذوقك اختى الكريمة

همس الاحباب يقول...

ابى هانم
يا مرحبا نوركم غطا على الكهربا
ولا مخبى ولا حاجة يا ستى
اكيد طبعا انتم ليكم فيها اكتر منى كمان
وربنا يديم المعروف
فسح ده كلام عيب يا اختى ما تفتحيش ودان البونية على كده
تحياتى وتقديرى

همس الاحباب يقول...

انين الحزن
وزة ازيك يا قمر
والله ليكى وحشة اكتر من بريزة لب يا شيخة
كل سنة وانتى طيبة وعقبال ما نفرح بيكى انتى ومنيع
ماشى انا موافق يلا شدى حيلك وهاتى مازن قبلى
منورة يا وزة
وانتى طيبة لازم نسيح يا عينى
اه عيد ميلادى يوم 17-7 فين الهدية

همس الاحباب يقول...

النجمة الصامدة
سعيد جدا بزيارة حضرتك
وكل سنة وحضرتك طيبة
بصراحة عامل عمايله
بس شهر 7 ده الشهر المناسبات عندى
تحياتى وتقديرى

همس الاحباب يقول...

المفقوعة مرارتها
قلبك ابيض يا ست سوسو
عفى الله عما سلف
انا عارف انك جاية تهدى النفوس
هههههه
تحياتى

همس الاحباب يقول...

الاخت / سارة
منورة المدونة والمدونات المجاورة
وانتى طيبة يا ستى وعقبالك كده
يا ما نفرح بيكى وباولادك باذن الله

تحياتى

همس الاحباب يقول...

دكتور حر
وحشنى يا دكترة
والله مشتاقلك بجد
وانت طيب وبصحة وسعادة
عقبالك كده علشان نفرح بيك وفيك هههههه
تحياتى اخى العزيز

همس الاحباب يقول...

فاتيما
الغالية ام يوسف
وانتى طيبة وبصحة وسعادة
روقى يا طمطم ما ينفعش كده
انا طبعا مش زعلان ما ينفعش ازعل من اختى انا مضايق عليكى مش اكتر
وعارف انك حساسة زيادة عن اللزوم
ويا ستى ولا يهمك وربنا يديم المعروف
وربنا يسعدك ويقرب البعيد
كنا نتمنى انك تكونى معانا فى بور سعيد
بس النصيب
وسلامك هيوصل ان شاء الله
وكانك معانا بالظبط
كفاية روحك معانا
تحياتى وتقديرى لام يوسف

همس الاحباب يقول...

نضال
ازيك يا باشا
وكل سنة وانت طيب
وعقبال ما نفرح بيك
ههههه
لا هى غلاسة مش اكتر
والدليل على كده انى رحت الشغل وخلصت الموضوع فى اقل من نص ساعة
والميزانية قعدت لحد 15-8 علشان يعتمدوها بس تقول ايه على الغتاتة
يلا سيبك انت ذنوب ناس بتطلعها ناس
ههه
تحياتى وتقديرى

همس الاحباب يقول...

ام احمد المصرية
حمدلله على السلامة اختى العزيزة
وانتى طيبة وبصحة وسعادة
هههههه
هى فعلا خطا مطبعى
عديها الناس لبعضيها
المدام خلاص عرفت الحقيقة المرة وارتضت بالامر الواقع
تحياتى وتقديرى

سومه...مجنونه فى بلد عاقل يقول...

وتقفيل ميزانية وانت لازم تيجى النهاردة ضرورى طب ازاى اجى والناس والماذون طب الحل ايه

هههههههههههه انت فكرتنى بحنفى...ويا ترى ركبت اتوبيس ولا اخدت تاكس
وانا لسه بقول انك فكرتنى بيه لاقيتك انت افتركته لوحدك هى الساعه كام صحيح
ربنا يخليلك همس ويا شيخ بقى الدنيا وما فيها والعزوبيه تسوى ايه قصاد ضحكتها
تحياتى ليك سومه_87

•√أريـ السمر ـج√• يقول...

لا طبعاً لا تقصير و لا شىء همس شفعت لك خلاص

ربنا يجعل كل ايامكم سعادة و هناء يارب
----

لك عندي تاج .. أتمنى أن تقبله مني

http://ana-we-heya.blogspot.com/
دمت بكل الخير

نونو يقول...

السلام عليكم
طبعا طبعا زي ما قالت عاشقة الفردوس ان شهر 7 شهر العظماء
ربنا يخلي البنوتة همس وتخاويها يارب
وحمد الله على سلامة حنين ومامتها
ضحكت ضحك على حكاية كتب الكتاب
اصلي كان ليا طرفة برضه
كنت برة واخدت تاكسي وجيت على مدخل الشارع قالي لا مش داخل قعدت اتحابل عليه ابوس ايدك الماذون في البيت اصلي كنت بعمل كل حاجة بايدي وطبيعي اني اتاخر
يلا الحمد لله
سلامي لام همس وهمس

امل يقول...

السلام عليكم
كل سنة وهمس الجميلة بألف خير أنا سبقتها بكام يوم ههههه يعني في شهر سبعه برضه ما شاء الله شكلها عسولة قوي ربنا يبارك فيها وتشوفها أجمل عروسة في الدنيا
تحياتي ودمت بخير

موناليزا يقول...

كل سنة وهمس طيبة ويارب عقبال 110 سنة وتشوفها اجمل عروسة واحلى مسلمة
على فكرة الجواز مش وحش ولا حاجة يكفى ان بسببه بقى عندك بنوتة ذى القمر ربنا يحميها وبسببها سمعت اجمل كلمة وحصلت على افضل لقب "بابا"

نهر الحب يقول...

عيد ميلاد سعيد
وذكرى زواج كمان سعيدة اكيد
بوست دمه خفيف بجد
شرفنى جداا المرور من هنا

إيما ( أم البنين) يقول...

كل سنه وبنوتك القمر ( ما شاء الله ) بألف خير وسعاده ...ونشوفها مدونه كبيره زي الزعاريييييييير بتوعي
وعيد زواج سعيد..
تحياتي

وينكى يقول...

يا كتاكيتو بنى
كل نه وهم الكتكوته طيبه وربنا يخليهالك يارب
وصدفه حلوه قوى ان عيد ميلاد بنتك وعيد جوازك لهم نف التاريخ
على الاقل هاتعمل حفله واحده بدل اتنين وهاتوفر فى المصاريف
P:

دعاء مواجهات يقول...

جميل اوى البوست بجد

حسيت معاة احاسيس كتير مختلفة مش عارفة سببها

بس قولى بقى

لية ليت العزوبية تعود يوما

ياحنفى؟؟؟؟

هههههههههههههههههه

ربنا يخليلك همس وكل سنة وهى طيبة

تحياتى يااجمل اخ..

رئيس جمهوريه نفسى يقول...

ربنا يخلى همس و ابو همس وما يحرمهمش من بعض يارب شوفت علشان ااقول انى العزوبيه تاج حلو قوى وعلى مقاسى محدش مصدقنى

رئيس جمهوريه نفسى يقول...

ليك عندى واجب تعالى زى الشاطر استلمه وحله

Dr.m يقول...

السلام عليكم
كل عام وهمس بألف صحه وسلامه ويجيلك عريسها يهمس في ودنك انه عايز ياخدها منك
أما اللي كان معطلك يوم كتب كتابك فالمفروض كنت كنت خليت كتب الكتاب في المكتب واهو المعازيم يساعدوك في الشغل شويه
ههههههه
تحياتي
سلام

همس الاحباب يقول...

سومه
ربنا يكرمك وكل سنة وانتى طيبة
ميزانية ايه بس ده الميزانية بازت خالص فى الجواز هههههه
لا كنت مستعجل فركبت تاكسى بصراحة
مع انه كان نفسى فى اتوبيس هههههه
واوفر تايم كمان
ربنا يخليكى ونفرح بيكى وتشوفى اولادك زيها
اكيد طبعا
دمتى بخير اختى العزيزة

همس الاحباب يقول...

اريج السمر
منورة اختى العزيزة
هدية مقبولة يا ستى
وربنا ما يحرمنا من كرمك ولا هداياكى
تحياتى

همس الاحباب يقول...

نونو
هههه
ربنا يسعدك دايما
اكيد حضرتك من شهر العظماء
ربنا يكرمك ويسعدك دايما
هههههه
كانت مغامرات بقى
تحياتى وتقديرى اختى العزيزة

همس الاحباب يقول...

امل
كل سنة وانتى طيبة وعقبال 100 سنة
وربنا يكرمك وتشوفى اولادك زيها
دمتى بخير وسعادة

همس الاحباب يقول...

موناليزا
كل سنة وحضرتك طيبة
وسعيد جدا بزيارة حضرتك
اكيد طبعا عندك حق بس برده ساعات الستات بتبقى خنقة بس خنقة لذيذة يا ستى علشان خاطرك وخاطر همس انا مسامح
هههه
تحياتى وتقديرى

همس الاحباب يقول...

نهر الحب
الرقيقة ايناس
كل سنة وانتى طيبة وبصحة وسعادة
شرفنى زيارتك واسعدتنى
واسعدنى جدا مقابلة حضرتك فى بور سعيد
تحياتى وتقديرى

همس الاحباب يقول...

اختى العزيزة / ايما ( ام البنين)
كل سنة وحضرتك بصحة وسعادة
وربنا يكرمك ويسعدك بالزعاريييير
اللى زى العسل بسم الله ماشاء الله
عليهم اسعدتنى زيارتك وتشريفك لمدونتى المتواضعة
تحياتى وتقديرى

همس الاحباب يقول...

سومه
ربنا يكرمك وكل سنة وانتى طيبة
ميزانية ايه بس ده الميزانية بازت خالص فى الجواز هههههه
لا كنت مستعجل فركبت تاكسى بصراحة
مع انه كان نفسى فى اتوبيس هههههه
واوفر تايم كمان
ربنا يخليكى ونفرح بيكى وتشوفى اولادك زيها
اكيد طبعا
دمتى بخير اختى العزيزة

همس الاحباب يقول...

وينكى
عندنا يا مرحبا
انا فعلا مقصر مع حضرتك بجد
كل سنة وحضرتك بخير
ولا توفير ولا حاجة يا ستى
كل واحد فيهم عايز هدية برده
هههه
دمتى بخير وسعادة

همس الاحباب يقول...

اختى الغالية / دعاء
ربنا يكرمك ده من ذوقك بس
وحضرتك طيبة وعقبال ما نفرح بيكى
ههههه مش هاقولك بكرة لما يجى حنفى اتعرفى لوحدك
تحياتى وتقديرى يا حاجة دعاء

همس الاحباب يقول...

رئيس جمهورية نفسى
محمود باشا والله ليك وحشة من هنا لحد هناك ذهاب واياب
وانت طيب يا حبيب قلبى
وعقبال ما نفرح بيك ونشوفك مدبس كده زينا
هههههههه لا بكرة تقع يا جميل ولا حد يسمى عليك
تحياتى

همس الاحباب يقول...

رئيس جمهورية نفسى
جينا للكلام اللى يزعل ويخلينا نسحب السفراء ونقطع العلاقات الدبلوماسية
يا راجل ده احنا نسينا الواجب من زمان اترجعنا للذى مضى
عامة سمعا وطاعة يا ريس

همس الاحباب يقول...

dr .m
كل سنة وحضرتك طيب وبصحة وسعادة وعقبال ما نفرح بحضرتك
هههههه
والله فكرة حلوة وعلى الاقل كتب الكتاب ايبقى على النيل والمعازيم اتهيص
تحياتى وتقديرى

mohamed ghalia يقول...

عيد ميلاد سعيد يا أبو همس
عقبال مليون سنة
تحياتى

حاجات جوايا يقول...

همس ما شاء الله ربنا يحميها ويخليهالك يارب


ههههههههههه
مفيش فايده فى الرجالة
الرجل هو الرجل مهما اختلف الزمان والمكان
ومهما الزوجة اضاءت له أصابعها شمع
هههههههههههههه
ربنا يخليلك همس ومامتها

خالص ودى
سالى