4 يوليو 2008

ناسف للازعاج

بصراحة مش عارف اقولكم ايه غير انكم وحشتونى قوى قوى من هنا لحد مدوناتكم جميعا

اولا انا اسف جدا على التاخير والتقصير فى متابعتكم بس والله غصب عنى لظروف خارجة عن ارادتى ،طبعا انتم عارفين 30-6 وما يحمله من كوارث وتوابع متمثلة فى الجرد واعداد الميزانية وضغط عصبى وبدنى فوق الوصف فى اعداد الكشوف والمراجعة بالاضافة الى موسم تحصيل الاشتراكات السنوية .

ويا ريت على كده وبس لا الكارثة الاكبر انى بجهز فى شقتى الجديدة ودى لوحدها عايزة تفرغ تام وطبعا نظرا لظروف الشغل ما قدرتش اخد اجازة فكنت مضطر انى اصحى من النوم الثامنة صباحا علشان اشوف الصنايعية اللى طلعوا عينى بجد وبعدين اروح على الشغل وارجع البيت حوالى الساعة 4 الفجر وهكذا لمدة اكثر من 15 يوم متواصلة لحد ما وقعت من طولى وكنت فى لحظة بين الحياة والموت بس الحمد لله ربنا ستر .


وكمان يوم 2-7 شرفت الاميرة حنين بنت اخويا صاحبة بوست القمراسمه ايه وتم اختيار اسم حنين وطبعا كلكم منتظرين الاسبوع والفتة وانا لسه برده عند وعدى مع انى اتدبست فى عزومة كباب وكفته لعمال الكافتيريا وبما اننى صاحب العزومة نابنى من الحب جانب وطلعوا عيال جدعان خدوا 100 جم ورجعوا منها 8 جم بحالهم ولانهم عارفين انى مش باكل اللحوم من بره جابولى فراخ مشوية قلت يلا خير وبركة ودى كانت النهاية انا اكلت من هنا وكنت اودع تانى يوم من هنا واحمل لقب مرحوم بصراحة مش عارف العيب فى الاكل ولا العيب فى معدتى مش واخدة على كده .

المهم انا فعلا مشغول بجد فى الشغل وفى التوضيب بتاع الشقة ونقل العفش وده اخره الاسبوع ده ان شاء الله وارجع تانى اقرفكم .

انا عارف انكم مفتقدينى وانى كنت مسليكم احسن من بريزة لب بس اعمل ايه ما تهونوش عليه انى اسيبكم فى الضلمة لوحدكم .

ملحوظة : انا مش ناسى انى وعدتكم ببوست خاص عن اقتراحات مجرد فكرة بس اعذرونى فى التاخير .

هناك 30 تعليقًا:

ٍSOU يقول...

اولا ربنا يعينك على شغلك و الشقة ..تعرف اول لما قريت كام سطر قلت غريبة انك الحمدلله لسة قادر تكتب بوست :)) ..ربنا يعينك يارب

ثانيا الف الف مبارك للعروسة الصغيرة ربنا يبارك لك فيها و يقدركم على تربيتها التربية اللى تشرفكم

ثالثا غريبة انك شربت من مياة النيل و عايش فى مصر و لشة بطنك بتوجعك لما تاكل م الشارع :)) ..الف سلامة عليك

كاميليا بهاء الدين يقول...

.انا عارف انكم مفتقدينى وانى كنت مسليكم احسن من بريزة لب بس اعمل ايه ما تهونوش عليه انى اسيبكم فى الضلمة لوحدكم
........


هههههههههه

هههههههههههه


آلف مبروك على مجئ حنين
ربنا يبارك فيها يارب
ويكتب لها السعادة
وتكون ذرية صالحة ان شاء الله


ربنا يعينك ويقويك وينعم عليك بالصحة والرزق الوفير يارب


فى انتظار جديدك


تحياتى

عبده الرايق يقول...

كباب وكفته وفراااااااااااااااخ ؟؟
ياربى
انا فين ؟؟
الاسماء دى سمعتها قبل كده
فين .... مش فاكر
خلاص غلب حمارى
اسماء ايه دى يا خالد ؟؟؟

nigro يقول...

خالوووووود
حمد لله على السلامة يا باشا
تسعتلاف مليون مبروك على العتبة الجديدة
عتبة خير إن شاء الله
و مبروك تشريف البيبيهاية الصوغنطوطة .. ربنا يباركلكم فيها يا رب
و يا راجل عيب عليك
كنت مسلينا أحسن من ببريزة لب إيه بس؟
ده اسمه كلام برده؟
قول بخمسين قرش .. بجنيه و ربع .. مش ببريزة .. هي البريزة تجيب إيه دلوقت؟ .. يدوبك لبّيتين و متاكلين قبل كده
آه بالنسبة لأسم القمراية الصغننة أنا اخترت الأسم الصح على فكرة
بس مش عارف كده يا خالود الكيبورد عندي غريبة قوي
تلاقي حرف الـ(ح) شبه الـ(ه)
و حرف الـ(ن) شبه الـ(ل) و في نفس ذات الوقت شبه الـ(د)
يعني ماتعرفش حاجة غريبة قوي
بس الحمد لله الـ(ي) متظبطة
يعني العربية الأوبل و الشقة و العشر تلاف جنيه اللي انت وعدت بيهم بقوا كده من نصيبي
ولا ها؟

يلا سلام

حنين القلب يقول...

الف سلامه عليك يا خااااااااااااالود
ومعلش يا سيدى كلها اسبوع وتخلص من وجع القلب ده
والف مليون مبروك لابو وام وعم حنين وربنا يبارك فيها ويحفظها
انا كده كسبانه حصوصا انها مش بس انى اختارت الاسم لالالا دى كمان على اسمى
عايزة الفته وتكون حته من الموزة
والحمص وباقى الحاجات كلها تجيلى احسنلك مااااااااااااااااشى
حمد الله على السلامه
سلام

فاتيما يقول...

خاااااالد
زعلان منى ؟؟
زعلان
صح؟؟
عندك حق
بس إنت عارفنى
ندلة مأصلة بحق و حقيق
و المفروض أخويا و تسامحنى بقى
مبروك على حنين
و مبروك ع الشقة و العزال
و عقبال شقة همس ما تتوضب و تنقلولها عفش العروسة يا رب
و حكاية المغص و التعب دى جاتلى و بقالها يومين يظهر المية اللى فيها حاجة لأنى بحس بالوجع بعد ما أشرب الميه
و يعنى ما تشوفلنا شغلانة مع عمال الكافيتريا دى يا عم عشان ناكل كباب
حتى اللى بيشتغلوا عندك محظوظين ؟؟
مش بس أهلك و أصدقائك يعنى
تحياتى ليك يا صديقى
و أشوفك على ألف خير يا رب

رئـــــيسـة حزب الأحلام يقول...

بجد مفتقدينك
وربنا يرجعك بالسلامه
والف مبروك على العتبه الجديدة
والف مبروك لاخوك على حنين
وربنا يكتر الافراح ويعينك فى الشغل
الف تحيه لك

Radwa يقول...

ربنا يعينك
وتخلص الشقه
عقبال امال تلاقى العروسة وتتجوز
...........................
ومبروك حنين
وعقبال
........................
كان نفسى اعقلك على بوست غير دا
بس الجيات اكتر
..........................
سندريلا

حاجات جوايا يقول...

ألف سلامة عليك يا أبو همس
ربنا يخليك ليها ويخليها ليك ولمامتها

والف مبروك على المولودة الجديدة حنين
ربنا يباركلكوا فيها ويخليهالكوا

وألف مبروك على الشقة الجديدة
ربنا يملاهالكوا خير وبركة وفرح

يبقى كده عندك 3 الاف ليا
متخافش مش هاخدهم
دول نقوط
هههههههههههههه


خالص التحيه

سالى

عصفور المدينة يقول...

أعانك الله

ومبروك الاسم حنين

Dr.m يقول...

السلام عليكم
أعانك الله على ما أنت فيه..الصنيعيه فعلا متعبين ..
مبروك (حنين)ما شاء الله لا قوة إلا بالله اسم جميل ربنا يباركلكوا فيها ويجعلها من أسباب نهضه الأمه...آمين..
مستنيين رجوعك...
تحياتي
سلام

(احمد سكر ) يقول...

الف سلامه ياخالد

يلا اتجدعن

لحسن اللب اللى فى المقله كله خلص

ههههههههه

بجد انت شىء جميل اوى ف التدوين

ربنا مايحرمنا منك ياباشا

احمد

غير معرف يقول...

هي الدنيا كده،، تلاهي على رأي بابا ،، مشاغل على رأي ماما،، مشاكل على رأي الشعب المصري :)

مبروك عليكو حنين اهي دي الاسامي ولا بلاش مش مش عارفة مين دي ولا خليني ساكته بأه عفى الله ما سلف :)


وانا هقوم بأه احسن جريت ريقي بسيرة الفراخ والكلام اللي مش كويسة ده،، دي الفاظ دي برضه تتقال في بوست كده يقراها الرايح واللي جاي؟ استغفر الله استغفر الله
لا والله هقوم يا عم،، اوعى كده لأ لأ ابدا ما انا قاعدة نهار مش فايت

مها ميهوووو

زُمُرده يقول...

لولولولولولولو

ربنا يباركلم فيها ويجعلها بنت صالحه وباره بأبويها
ويجعل لها شأن ودور كبير في خدمة اسلامها وبلدها

ربنا يعينك كده ع الميزانيه والشقه ويقويك ويرجعك ببوستاتك بسرعه

سؤال ع الهامش
هو في مصر في الاماكن العليا بيقفلوا ميزانيتهم ولا بتبقى متقفله جاهزه؟؟

لالالالالالالا لازم تشرب نص كبايه مية من النيل قبل كل وجبه وبين الوجبات
وبعدها معدتك هتبقى ايييييييييييه؟؟؟
تهضم الظلط

سلامتك الف سلامه

•√أريـ السمر ـج√• يقول...

بيت مبارك ان شاء الله و مبارك عليكم تشريف حنين

و ترجع بالسلامة ان شاء الله

Unknown يقول...

خلوووووووووووووووووووود
وحشتنى قوى ووحشتنى قعدة الكافيتريا عندك ربنا يعينك على اللى انت فيه.
ومبروك يا سيدى تشريف حنين بس متنساش تبقى تشيلى السبوع بتاعى لحد مارجع من المنيا

تقبل تحياتى

موناليزا يقول...

ربنا يقويك ويعينك وان شاء الله تكون الشقة الجديدة وشها حلو عليك وعلى الاسرة الكريمة
وحمدالله على سلامة حنين ووجودها فى دنيتنا ربنا يبارك فيها ويعين اهلها على تربيتها تربية اسلامية

دعوة للأمل يقول...

حمد الله على السلامة و الف مبروك على الشقة الجديدة

انين الحزن يقول...

خاااااااااالد

ماشيه معاك حلاوه ياعم
ربنا يزيد ويبارك

المهم يعني انك واحشني


ورجعت تاني ونورت الدنيا

سلامووووووووز
وزة

الـسـيـدة نـون يقول...

اولا الف سلامة عليك يا خالد
ثانيا عايزة اعرف هتعزل تروح فين
ثالثا حمدالله على سلامة حنين
وعقبال ما تشوفوها عروسة هى وهمس

رابعا
احنا فعلا مفتقدينك ترجعلنا بالسلامة يارب
وربنا يقويك على المشاغل اللى وراك


سلام
اختك خيخة

Doba يقول...

الف مبروك على حنين
اسم جميل
ربنا يبارك فيها ويحميها

وكان الله فى العون ويقويك على عملك
ويقدرك ترجع تنورنا

تحياتى
هبة

rovy يقول...

الف مبروك لتشريف القمر حنين ..
ما شاء الله ربنا يبارك فيها و يبارك لها و يخليكوا لها ان شاء الله ..

كان الله فى عونك بالنسبه للشغل و معامله الصنايعيه اللى ربنا يكرمهم بقوا حقيقى متعبين جدا انا اصلى زيك بأجهز شقه جديده .. ربنا يهديهم و يرحمنا ..

دمت بخير فى رعاية الرحمن

تقديرى وتحياتى

rovy

امل يقول...

السلام عليكم
هييييييييييييييه أنا فزت ومستنية السبوع بتاعي ههههههه مبروك النونو الجديده ربنا يجعلها نبته صالحه ويبارك فيها , وحمد الله على السلامه من أكلة الفراخ المشوية .. تحياتي ودمت بخير ان شاء الرحمن

Unknown يقول...

اولا مبروك الاميرة الجميلة و فى انتظار الفتة يا باشا و اتوصى بالفشار بالنسبة ليا انا
:)

ثانيا ربنا يرتبلك امورك و يسهلهالك و تفضلنا من تانى باذن الله

غير معرف يقول...

الف مبروك ياباشا
على حنين

وربنا يعينك على انت فيه

فى القلب يقول...

ربنا يعينك ويقويك على ألى أنتى فيه وهنستناك لغايه ماظروفك تسمح بالمقترحات

hamssah يقول...

الف حمد الله على السلامه يا خالد
ومبروووووووووووووووووووووك على تشريف حنين القمرايه
ومبرررررررررووووووووووك على الشقه الجديده
ربنا يباركلكم في حنين ويحميها يارب ويهنيكم في الشقه وتكون خير عليكم انشاء الله
همسه

دعاء مواجهات يقول...

الف مليوون سلااامة عليك

ياخالد باشا

وربنا يعينك يارب ويوفقك

معنى كدة نك كنت غايب طوول فترة سفرى

كويس بردو علشان ميفوتنيش حاجة

هههههههه

لا طبعا بجد ربنا معاك ويعينك..

سلااام

سبهللة يقول...

الف مبروك عالشقةالجديدة والنونو الجديدة وربنا يخليها لباباها ومامتها
وألف سلامة عليك

Marwa Friday يقول...

حمداً لله على السلامة
ومبروووك مبروووك على البنوتة
مش باحب أقول مبارك
"مع انها الصح لغوياً!" منور عالم التدوين تاني