5 يونيو 2008

made in china

تحديث واجب
======
تهنئة قلبية للاخت العزيزة
بمناسبة عقد القران
الف مليون مبروك
وبالرفاء والبنين
=======
منذ ايام نزلت مول للكمبيوتر علشان اجيب جهاز كمبيوتر حديث للشغل فانتهزت الفرصة وجمعت جهاز يواكب تطورالعصر ويتماشى مع التكنولوبيا بالملوخية ،نزلت قلت نشوف ايه الموجود فى السوق طبعا لاقيت حاجات حلوة كتير بصراحة بس جاءتلى حاجة كده غريبة من الانبهار والازبهلال على شوية عبط ليه بقى.
كل ما امسك حاجة اقرا بلد الصنع made in china من اول المفعوص اللى بيسموه ماوس الى اكبر حاجة وهى الشاشة برده made in china ايه اللى بيحصل يا رجالة انا كنت عارف انه الكمبيوتر بيبقى تجميع من كل بلد حاجة مثلا الشاشة ماليزى او تايوانى وبعض المستلزمات كورى على صينى وكله ماشى .
لا دلوقتى من الالف للياء كله صينى اللهم لا اعتراض .
السؤال اللى محيرنى بجد!!!
المنتجات الصينية غزت العالم بشكل رهيب وكل حاجة تلاقيها مكتوب عليها صنع فى الصين
يعنى سجاجيد الصلاة صنع الصين يا مسلمين
فوانيس رمضان بتاعت وحوى يا وحوى صنع الصين
لعب الاطفال بكل اشكالها صنع الصين .
الاجهزة المنزلية والادوات الكهربائية من الصين .
حتى مندوبى المبيعات فى الشوارع من الصين .
بكرة قمر الدين والملوخية والبامية نستوردها من الصين
الحاجة الوحيدة اللى ممكن ما نستوردهاش من الصين هى الفول المصرى لانهم لو بعتونا فول مش بعيد نبقى زيهم ونخترع كل حاجة ومنتجاتنا تغزو اسواق العالم ونبطل نوم فى العسل .
سؤال غبى من واحد بياكل فول ازاى الصين وصلت لهذه المرحلة المتقدمة من التكنولوجيا والسيطرة على اسواق العالم ؟؟؟
الصين عدد سكانها يربو على المليار نسمة اصبحت قوة عظمى وليها حق الفيتو وحق بيع عيش الفينو كمان.
وتلاقى فى كل منزل مصنع تحت السلم او فوق السطوح بس مش زى مصانع الزبالة اللى عندنا وكل حاجة ليها اهمية ومفيدة عندهم وليها استخدام وممكن يصنعوا منها منتجات تبدا من الابرة للصاروخ .
كنا بندرس زماااان فى اولى كلية تجارة مبادىء الادارة من عوامل نجاح اى مشروع توافر 3 عناصر اساسية :
1- راس المال ( وده موجود فى مصر وعندنا اغنى اغنياء العالم اللهم لا حسد )
2- الايدى العاملة ( بسم الله ماشاء اكتر من الهم على القلب بنتكعبل فيهم على النواصى والمقاهى يشرحوا القلب الحزين عواطليه بالوراثة )
3- المواد الخام ( مصر غنية بمواردها الطبيعية والمواد الخام وجوها ربيع طول السنة كانوا بيقولوا كده فى الدراسات الاجتماعية فى ابتدائى واعدادى ولاهما غيروا المناهج وغسلوها بتايد ابو خمسين قرش )
الحمد لله كل العناصر متوفرة لقيام مشروع ناجح وقيام صناعات محلية تنافس المستورد الصينى .
طب يا ترى ايه السبب فى تخلفنا والسبب فى تقدم دولة مثل الصين ( طبعا الاسباب كتيرة بس بصراحة مش مقتنع بيها )
هى الصين ليها حضارة تمتد عبر الاف السنين والمصريين برده عندهم حضارة منذ الاف السنين .
الصين حافظت على حضارتها وريادتها ولم تتوانى او تتفاخر بحضارة منذ القدم ووقفت محلك سر .
احنا حافظنا على حضارتنا وبنفخر باننا احفاد الفراعنة بناة الاهرام وابو الهول
وبنغنى وبناة الاهرام فى سالف الدهر كفونى الكلام عند التحدى .
اى تحدى اللى بنتكلم عليه شوية حجارة وتماثيل وياريت بنحافظ عليها او بنستغلها صح لكن بنهربها ونسرقها او تتسرق مننا ومش بنعرف نرجعها كمان.
يلا ما علينا من التماثيل خلينا فى المساخيط قصدى فى المنتجات الصينية .
لا بجد الصين غزت العالم باجهزة تكنولوجية هائلة واصبحت قوى عظمى لها شانها فى زمن قياسى جدا بل سحقت دول عظمى وتفوقت عليها .
نعم المنتجات اللى موجودة فى مصر رديئة بعض الشىء وده مش عيب منهم العيب فينا بنحب نسترخص ونشترى بملاليم علشان نبيع بالملايين ونبقى رجال اعمال معاهم الملايين ومش مهم الجودة ومش مهم مصلحة الشعب ما هو كله ماشى .
يا ترى امتى انصحى من النوم ونلحق بركب الامم المتقدمة ؟؟؟
تعرفوا انا خايف يوم اقوم من النوم الاقى مراتى مكتوب عليها صنع فى الصين .
بس يا ترى ايبقى معاها كتالوج وقطع غيار ولا اللى هيتكسر يترمى و نجيب غيره !!!!!!!
واللهم لا اعتراض ..

هناك 79 تعليقًا:

Dr.m يقول...

السلام عليكم ده أول تعليق ليه في مدونتك وإن شاء الله مش هيكون الأخير..
بالنسبه للصين ببساطه هم ناس عايزه تتقدم..عايزه تطلع فوق ...أما إحنا فمصرين نفضل تحت مع إن الطريق قدامنا أسهل بكتير من الصين..ولازم الأول نبطل شعار ((الأذكياءو الشرفاء يمتنعون و الأغبياء و الفسقاء يمتنعون))..والسلام

Dr.m يقول...

معذره أقصد والفسقاء يتقدمون

فاتيما يقول...

أزيك يا خالد
بص بقى من الآخر
مصر ينقصها الأدارة الجيدة
إحنا ممشينها أللوى يعنى مفيش نظام موحد و محكم نمشى على أساسه
فيه عشوائية و انامالية و فهلوة فى اى حاجة
لو لقينا الأدارة الصحيحة الجادة اللى عاوزة تتقدم بالبلد دى
هيبقى حالنا غير الحال
و الدليل إن المصرى لما بيخرج بره او حتى بيعقد هنا فى مصر تحت إدارة متطورة شوية و منظمة بيطلع احلى شغل و يتفوق كمان على ناس تانية فى العالم
إحنا هنا بنغزل برجل حمار
بس دا عمره ما كان قانون ثابت
عشان كدا بننجح مرة و عشرة لأ
و على رأى عمنا سيد حجاب
يا مصرى ليه دنياك لخابيط
تحياتى يا أبو همس

nigro يقول...

خالد بيه
احب أولاً بس ألفت نظر حضرتك إن احنا الحمد لله دلوقت بنستورد الفول من أمريكا و عجينة الطعمية و إبر الخياطة و لِيَف المواعين و بِنَس الشعر و الشباشب و أسلاك الكهربا و سلاكات السنان و الكور البلاستيك و الكور الشراب من الصين
و احنا من فجر التاريخ و احنا بنحب الخير لغيرنا و بنحرم نفسنا من الغطا عشان غيرنا يستغطى و بنحرم نفسنا من العشا عشان غيرنا يستعشى وهكذا
فلما نلاقى كل السلع الأساسية دي موجودة عند أختنا و شقيقتنا في الإنسانية رفيقة الكفاح جمهورية الصين الشعبية فلازم نمشّي سوقها و ننفعّها بأي حاجة أو حتى بكل حاجة
يا خالد بيه إحنا شعب كسول لازم ياخد فوق دماغه علشان يفوق و يشتغل
وعلشان كسلنا ده من مصلحة ناس معيّنيييين
فبيخلونا مرتاحين على الآخر و يجيبولنا البزازة لحد بؤّنا و يغسلولنا رجلينا و ينيمونا في سرايرنا
و خلى غيرنا يشتغل و يعلى و يعلى و يعلى و خلينا إحنا كده نطاطي نطاطي نطاطي

اهو ده عيبه يقول...

يا استاذ خالد
هما نسيوا يعلمونا فى كلية تجاره باقى العناصر اللى هى الاراده والضمير ،والنظام وحب العمل والتفانى لتحقيق الهدف ده اذا كان فيه هدف من الاساس ،وتفضيل مصلحه المجموع على الفرد ،والتخطيط السليم والمسبق لاى خطوة ، الامانه والشرف وغيره وغيره من الحاجات اللى افتقدناها علشان كده بنلاقى بلدنا بترجع بينا

عموما الحاجه الوحيده اللى مش هتزعلنى لو صحيت الصبح لقيت رئيس وزرا صينى يمكن ساعتها الحل يتعدل شوية

تحياتى لك

قوس قزح يقول...

عارف المثل اللى بيقول اقرع و نزهى ؟

اهو احنا كده
تقول للشاب من دول اشتغل اى حاجة يقول لاااااا انا عايز اشتغل مدير و اروح الشغل بعربية و البس اشيك بدل .. بيقول كده وهو قبل ما ينزل يقعد على القهوة متخانق مع باباه على مصروف ايده و الخرم فى شرابه اد كده
احنا مش راضيين نعترف اننا عالم تالت و كفاية اوى علينا فرحتنا اننا احفاد الفراعنة
ده لو الفراعنة شافونا هيتبروا منا

فضل لنا من الفراعنة غرورهم و تعظيم لنفسهم و بس


لما بيسافر المصريين بره و بيلاقوا مفيش غير قدرتك فى انتاجك و غير كده تداس بالرجلين بيشتغلوا سورى زى الحمير

لكن هنا طول ما فى ماما بتدى المصروف و بابا بيدورلك على شغل او شقة يبقى خلاص نام فى العسل بقى

و تحية كبير اوى لشعب الصين اللى احنا بنسخر منه لانه برغم فقره لكن شعب منتج و مش مستهلك

مجداوية يقول...
أزال المؤلف هذا التعليق.
مجداوية يقول...

السلام عليكم
اخى الكريم
تصحيح معلومات قبل ما اعلق
الصين تعدادها أكتر من مليار و300 مليون نسمة
ثانيا احنا بنستورد الفول من الصين مشوفتش الفول الصينى حبته كبيرة وأبيض وزى الفل

طيب عايز تعرف ليه مصر عمرها ما حتبقى زى الصين الا لما تحصل معجزة والشعب يتغير بسلالة جديدة لأن احنا شعب فوضوى ولا نعرف الصمت ولا نعرف الطاعة ولا نحترم القوانين ونعتمد على الفهلوة وشغل التلات ورقات ولبس طاقية ده لده ولا نتعامل بروح الفريق ولم نتعلم احترام الآخر ولا احترام الوقت ولا احترام الذات والتعليم عندنا فى أدنى مستوياته وتحكمنا حكومة متخبطة لا تعرف بوعها من كوعها

اقولك خبر اسود من قرن الخروب

مصر ليست على خريطة العالم أساسا مستقبلا

الناس الكويسة اللى فيها يا اما حيحصلوا اللى هاجروا ويبقى لهم شأن بره يا اما حيجيلهم اكتئاب ويموتوا كمدا جوه

وباقى الشعب الفهلوى الفوضوى حيفضل تحت حكم الحرامية والمافيا ورجال الأعمال وتجار الأعراض والأعضاءيسرقهم ويسرقوه فى دورة لا نهائية من الانحلال الى أن يأت أمر الله فيستبدلنا أو يقبضنا اليه

دى رؤية من واقع قراءة شديدة الواقعية لمستقبلنا فى هذه البلد التى تنهار

والملاذ الوحيد الذى بقى لمن أراد ان ينجو بنفسه وبمفرده هو الصلة مع الله

فقط

فلنا الله

أبو خالد يقول...

أبنى الحبيب /خالد
كلامك صحيح و كل أراء من سبقونى صحيحة
إذن أين المشكلة ..السنا من هذا الشعب
المشكلة أننا كلنا عن بكرة أبينا نشخص
الداء و نكتب الدواء و ننسى
أننا يجب أن نبدأ بأنفسنا
و كما قال أبنتى مجداوية
يجب أن نتصالح أولا مع الخالق
ثم نتصالح مع أنفسنا
صدقنى خالد شعبنا لو وضع على المحك
يصنع المعجزات ، هذا ما رأيته بعينى
فى حرب أكتوبر ..
المطلوب جدية و همة و مصالحة مع الله
و سنكون فى طليعة الأمم المهم نجد الدافع لهذا و نربى فى أولادنا الحمية و النخوة ..
ما أختلف معك فيه هو تصبح تلاقى زوجة
صناعة صينية ..حرام و هى أم همس مالها
لا ..لا يا أبو همس لن تجد مثل الست المصرية فى العالم .
دمت خالد مبدع ..و أشتاق للحديث معك

سبهللة يقول...

يا استاذى الفاضل
احنا تم احتلالنا صينيا
واحنا نايمين فى العسل نوم
وعلى ما نقوم من نومنا
هاتكون الدنيا قامت قيامتها
ربنا يرحمنا ونفوق بدرى
تحياتى
والسلام عليكم ورحمة الله وبركاته

دعاء مواجهات يقول...

ههههههههههههههههههههههههه

بقى مش خايف تسمعك

والله الوااحد بيتحر على الحال دة فعلا

بس الموضوع بيتلخص فى حاجة او كلمة واحدة

(هكذا تريد أمريكا وهكذا سمعنا وأطعنا)

(ربنا لاتؤاخذنا بما فعل السفهاء منا)

Empress appy يقول...

@انت مسمعتش كلمه تشتري هاجه صيني بابا هههههههههههههه
يا خالد معلومه جديده اردء الانواع الصيني هى اللي بتنزل مصر صدقني لو قارنتها بالصيني فى العالم وانا شاريه ده وده وعارفه
احنا عندنا امكانيات بس مع تكبير دماااااااااغ

رئـــــيسـة حزب الأحلام يقول...

هههههههههههههههههههههههه
ربنا يستر بجد بس بجد موضوع جميل وعايز دراسه ليه كدة احنا ممكن نفهم لو حد سافر الصين زيارة متعمقة ويجي يقول لنا
ماراى انا فى اعتقادى انهم ناس بتحب العمل وعندهم نشاط
وبعتذر عن التأخير لان النت كان فاصل
تحياتى لك

امل يقول...

السلام عليكم
صحيح الصين بتثير الاعجاب قوي بالنشاط والهمة اللي عندهم بس فيه حاجة برضه فيه مصريين كتير لما بيسافروا بره بيشتغلوا بهمه كبيرةقوي وبيصنعوا نجاحات مش بيعملوها في مصر مش عارفة فايدة الكلام ده ايه بس ممكن تكون فيه حاجة محبطة في مصر...
بالمناسبة عايزة اشكر حضرتك جدا لانك
وضعت اسم مدونتي من المدونات اللي بتحبها ده شرف كبير قوي لي جزاك الله عني كل خير...تحيــــاتي

الربان يقول...

تحياتي

اخي الكريم...الصين ستصبح القوة العظمي
خلال عشرين سنه...ان لم يكن اقل ستزيح
امريكا من الطريق او تنحيها جانبا.

الميزان التجاري مع كل دول العالم لصالح
الصين...حتي امريكا.


بالمناسبة...الصين تنتج الفول المصري في معلبات طبعا...و تنتج فول مدمس بالنكهة المصرية و اللبنانية و السعودية...يعني تنوع في الانتاج.

عما قريب ستكون الهند علي نفس الطريق
لانها بدأت...و نجحت ...و ستكون ذات شأن.

تحياتي و تقديري

Unknown يقول...

حتى سجاجيد الصلاة والفوانيس وكل مظاهر ثقافتنا وتاريخنا بقت صينى ناقص بس البنى ادمين وطبعا كلنا بقينا made in china
موضوع جميل جدا وان شاء الله مش الزيارة الاخيرة

funckydoctor يقول...

اه معاك جق
أنا خايف انى أكون مصنوع فى الصين
احنا خم نوم ده المشكلة

همس الاحباب يقول...

د/ محمد
منورنى يا باشا ومنور اول تعليق
عندك حق فى كلامك
اجنا نغسنا نفوق شوية ونهتم بماضينا وحاضرنا
تحياتى وتقديرى

همس الاحباب يقول...

فاتيما
الغالية ام يوسف
متفق معك طبعا وكلامك مظبوط جدا
وعلشان كده عايزين نحس بالكارثة اللى احنا فيها ونحقق لبلدنا الرقى والتقدم .
تحياتى وتقديرى

همس الاحباب يقول...

نيجرو
بس يا باشمهندس
مش عيب اننا نستورد كل ده
العيب اننا عندنا الامكانيات التى تؤهلنا اننا نصنع اللى احسن من ده
وبما انك من المحلة وانت عارف غزل المحلة واصوافها ومنتجاتها كانت بتنافس منسوجات العالم وتتفوق عليهم يا ترى ايه السبب فى التراجع
وغيره وغيره احنا فالحين فى الشيبسى والسمنة والزيت مش اكتر من كده
تحياتى وتقديرى

همس الاحباب يقول...

اهو ده عيبه
حتى لو علمونا يا اختى
حال البلد بقى يغم
ولا تخطيط ولا ضمير ولا ارادة
ولو موجود عند بعض الاشخاص بنقضى عليه وبندمره
كاننا منومين ومسلوبى الارادة
والله لو جه رئيس صينى برده انا علمه زينا النوم فى العسل
تحياتى وتقديرى

همس الاحباب يقول...

قوس قزح
العزيزة ام نور
ههههههههههه
كل ده شايلاه فى نفسك وصابرة
هههههههه
طبعا انتى كلامك فى الصميم وده عيب مجتمع وافراد عبر مراحل التاريخ
السلوك والتربية والتواكل على الاخرين
واحنا فعلا شعب فرعون مش بنجى غير بالضغط فقط
نعم لهم تقدير واحترام الجميع يكفوا انهم اصبحوا من اهم القوى الصناعية والاقتصادية فى العالم
تحياتى وتقديرى

همس الاحباب يقول...

اختى العزيزة / مجداوية
شكرا لحضرتك على التصحيح
ولكن المشكلة تكمن فى اننا فعلا شعب فوضوى واتكالى
وكلام حضرتك ينم عن تجارب وخبرة
مع انى متفاءل خير فى مصر وشعبها
ولابد ان يبزغ الفجر يوما بعد الظلام
لان المصريين الشرفاء معدنهم نفيس وبيظهر وقت المحن والشدائد
لذلك اتمنى من الله عزوجل ان ياتى هذا اليوم قريبا وتنجلى هذه الغمة
تحياتى وتقديرى

همس الاحباب يقول...

والدى العزيز / ابو خالد
طبعا انا متفق مع كلامك قلبا وقالبا
وكلام الاخت مجداوية ومقتنع ان الشعب المصرى معدنه نفيس وغالى هى مجرد سحابة صيف وسوف تزول باذن الله
هههه لااختلاف بين الوالد وابنه
وان كان لى الشرف ان يكون لى راىء يستوجب الخلاف مع خضرتك ولكنى اصغر بكثير من الاختلاف مع حضرتك
وان كان الامر لايتعدى الدعابة مش اكثر وفعلا الست المصرية لا مثيل لها
تحياتى وتقديرى

همس الاحباب يقول...

سبهللة عالاخر
عندك حق احنا نايميين فى العسل
وبقت سبهللة بجد حياتنا
تحياتى وتقديرى

همس الاحباب يقول...

دعاء مواجهات
ههههههههه
لا سمعت ما تخافيش
لا مش امريكا لوحدها
واحنا بنساعدها كمان
امين يارب
سعيد بتواصل حضرتك

همس الاحباب يقول...

احلى دماغ فى الدنيا / ابى هانم
مع الاسف عارف اننا بسترخص وبنحيب الفرز العشرين ومنتجات الصين فى باقى الدول تفوق اليابانى فى مجده
مع الاسف فعلا بنكبر الطاسة لانه مفيش دماااااغ اصلا
تحياتى

همس الاحباب يقول...

رئيسة حزب الاحلام
ولا يهمك يا ستى
انتى تنورى فى اى وقت
وسعيد جدا بتواصلك
تحياتى

همس الاحباب يقول...

اختى العزيزة / امل
عندك حق طبعا اننا عندنا المهارة
بس فيه حالة من الاحباط
اما بالنسبة للاضافة انا متابع حضرتك دائما ومتواصل معكى بغض النظر عن الاضافة وشرف ليه انا
تحياتى ليكى

همس الاحباب يقول...

استاذى العزيز / الربان
عقبالنا يا رب
لما نوصل كده ويبقى عندنا فائض فى ميزان التجارى حتى 5 جنيه
تحياتى وتقديرى

Abo 7anf يقول...

خالد باشا
مالها الصين سونه اجدع ناس
هما وصلوا علشان عازوا كدا
بصوا وعرفوا ان الحياه مش هتقف تسناهم يقوموا من النوم
عرفوا انهم ممكن يتغنوا كتير قوى بالناس مش من الناس
كل واحد بقى ليه دور
مش واحد بس بيمثل كل الادوار
بس نصيحه
بلاش حاجات الكمبيوتر الصينى
لان البينزل مصر بيبقى مرتجع من اوروبا
شفت حتى الاستيراد مبنعرفش نعمله

موناليزا يقول...

فعلا استاذ خالد بقى فيه غزو صينى واحنا كل اللى بنعمله نبصلهم بانبهار ومش عارفين نقلدهم لكن لو عملوا فيلم ولا كليب خادش للحياء اكيد هنقلدهم ماهو احنا بنقلد السلبيات بس
بس تعرف استاذ خالد مرة واحدة صاحبتى اشترت ملايا سرير حلوة جدا ومن السعودية ووجدتها صنع فى مصر
يعنى مصر بتصنع الحاجة الحلوة اهى امال احنا مش بنشوفها عندنا ليه
اكيد فيه سبب للى احنا فيه بس انا لسه معرفوش
بوست يدعو للتفكير فى احوالنا بجدية احييك عليه

wael يقول...

ركب تقدم مين بس صلي على النبي
مش هنلحقه ودي مش نظره متشائمه دي واقعيه
تحياتي

كلاكيت تانى وتانى يقول...

ازيك ياخالد فعلا كان نفسى اقعد اتكلم معاك بس للأسف الظروف دايما مبتسمحش تحياتى لك فعلا انا رحت اشترى اللاب ولى صينى وفالنهاية قالولى كل حاجة صينى
سألت عن اليابانى برضة جاب لى الصينى ولما رحت لمهندس تصليح تلفزيون ودش اسألة عن نوع تلفزيون يابانى كويس قاللى مفيش يامدام كل حاجة من جواها صينى حتى الأن أى سى بتاع زمان الان كل مكوناتة صينى
تعرف احنا كمان بقينا صينى مش اصلى
تحياتى

دعاء مواجهات يقول...

الف مبرووك ليها وربن يوفقها


البوست الجديد

نزل وحضرتك قاعد هنا

ركز معايا شوية

سلاام

بنوته مصرية يقول...

دائما سباق بلخير يا خالد

الف مبروح لي كاميليا واعبال همس يارب ونور بنتي

تحياتي

بنوته مصرية يقول...

جيت تاني معلشي بقي مزعجه ههههههههه

بلنسبة للصين فانا بقول دائما ماسورة وانفجرت كل شويا الاقي وحده صينية ومعاها واحد وجاين يبيعولي علي الباب

وجمب البيت معرض صيني المهم انهم نصحين واكنهم كانو مولودين في وكاله البلح
هههههههههههههههههههه مش بينزلو حتي مليم

وبعدين انت بتتكلم علي الملوخية والبامية

دلوقتي السكر والرز والسمك والجمبري صيني بس علشان تعرفه صيني ولا لاء هتعرفة من عنية هتلاقيها

عملة كدا (-_-) هههههههههههههه

موضوع جميل كالعاده يا ابو همس

تحياتي

حنين القلب يقول...

والله يا خالد عندك حق
فعلا بقت كل حاجه من الصين دول بقوا بيلفوا على البيوت
ده بقى غزو صينى يا رب نتقدم ونبقى نصهم حتى بس اشك اهم حاجه السرقه تنتهى من بلدنا وده اشك فيه
وطبعا انت تتمنى ان اللى يتكسر تغيره وتجيب غيره بس انسى الا المدام دى صناعه مصريه اصيله
سلامى لهمس ولابو همس

الـسـيـدة نـون يقول...

لما تلاقى القلم اللى بتكتب بيه مستورد من المانيا
والنجفة من ماليزيا
والسجادة من طهران
ولعب العيال من الصين
والهدوم من امريكا
والاجهزة الكهربائية من اليابان

يبقى انت اكيد اكيد فى مصر

سلام
اختك خيخة

Asmaa mahaba يقول...

سيبك بقى يا عم همس من الصين والهند والمهم هو مبروك لكاميليا لسببين ملحين العنوسه الرهيبه اللى واقعين فيها دلوقت والغلاء اللى خلى الناس متتجوزش لما الواحد بقى يهيص لما يشوف واحده اتجوزت ويشعر بالامل ومنى للصين بوجه نداء يعملوا جهاز خشب صينى رخيص للشبب بالاضافه الى توفير وحدات سكنيه صينيه للشباب بالرخيص
تحياتى ليك وسلم على الصين
هونجا بونكا
سومه_87

عاشــــــ النقاب ـقــــة"نونو" يقول...

السلام عليكماول زيارة ومتابعة باذن الله اذا حضرتك سمحت
موضوع الصين للاسف الشديد التوجه اللي مصر بتسعى ليه دلوقتي ووصى بيه كمان المؤتمر بتاع السكان انهم دلوقتي يتضافروا علشان يمنعوا الخلف ومفيش مانع يحاولوا كمان يموتوا البني ادمين
مش انهم ازاي يتعاملوا مع الثروة البشرية دي اللي غيرنا بيتمنى نصفها زي امريكا مثلا وزي دول اوربية كتيرة
الصين للعلم مليار وربع نسمة تقريبا وخرجت برضه من حروب لكن عرفت تستغل ثروتها دي صح
فيه مخطط بقى للصين انها تكون المهيمنة الاولى على السوق الصناعي بحلول عام الفين وعشرين
ولو تعرف حضرتك دلوقتي بيمروا علينا في البيوت يبيعوا بضاعتهم وبتبقى جيدة جدا بنص تمنها ماحدش سأل ليه؟؟!!!
اقولك ليه علشان يعرفوا السوق المصري بيحتاج لايه بالضبط ويبتدوا ينتجوا احتياجاته وبعد كدة يرجعوا يبيعوها بسعرها الاصلي
العمالة الصينية كمان بقوا يستقدموها هنا في المدن الجديدة ويلموهم في مكان واحد وبياكلوا اي حاجة لدرجة اعزك الله ممكن ياكلوا كلاب مش فارقة وكمان بيناموا في مكان واحد خلطبيطة مش بتفرق
وارخص في اجرتهم وبيشتغلوا طحن يعني
يبقى يستقدموهم ولا لا
المصري هنا عمال يقول مفيش شغل والعيشة نار بيتوفر شغل بس مش مناسب للاسعار
بس فيه بديل ارخص منه اللي هو العامل الصيني يبقى نعمل ايه
انا شايفة اننا نمتنع عن شرا اي سلع صينية فكرت بكدة فعلا بعد ما عالم اقتصاد اتكلم عن خطورة الوضع دة وانه بيدمر اقتصادنا المصري
لكن هل يا ترى متوافر بديل مصري ؟؟؟
طيب ان توافر اصلا كويس ؟؟؟
طب سعره مناسب؟؟؟
للاسف الموضوع كبير وخطير
اعتذر عن الاطالة
تحياتي لحضرتك
ملحوظة على جنب [ بالرفاء والبنين]
طيب هي يعني البنات وحشة:)

كاميليا بهاء الدين يقول...

السلام عليكم

خالد انا جيت أسلم
واشكرك على التهنئة الجميلة
ربنا يخليك ليا يارب

عقبال همستنا يارب
تفرح بيها بنجاحها
وبعدين فرحها

تحياتى واحترامى اخى العزيز

rtrcbh يقول...

السلام عليكم ورحمه الله وبركاته
جزاكم الله خيرا اخى الكريم على متابعه هذا الامر الهام

اعتقد ان السبيل للخروج منه هو اتجاه الشباب للعمل الحر الجاد وترك التفكير الغير سوى المتمثل فى كونة ينظر انه بمجرد ان يتخرج من الجامعه ان يصبح مدير عام وراتب مرتفع وسيارة فاخره

والا فلا يقبل باقل من هذا
اى عقل هذا
الكل فى بيته نائم ولا يتعمل مهنه ثم يقول أين العمل ابحث اخى عن عمل ام ان هناك من يبحث لك ؟؟اعتقد انه سياتى الى باب البيت لا تقلق اتعرف من وقتها الذى سياتى ليس العمل ولكن الصينينون سيعملون على دفن من ليس منهم فائدة

هذه كلماتى اوجهها الى كل شاب كسول لايسعى ولا يعمل
لان الله تعالى قال
ان الله لايضيع أجر من احسن عملا

جزاكم الله خيرا اخى الكريم لاتاحتك لى الفرصه فى الحديث حول هذا الامر

وفقكم الله وجزاكم عنا خحيرا

والسلام عليكم ورحمه الله وبركاته

دعاء مواجهات يقول...

ازيك يابرنس

بدعيلك لزيارة مدونة حدث

المدون التى ستقلب موازين التدوين

المدونة الجامدة

الفظيعة

المجنونة

ضربة شمس

تعالى وهاات معااك اكبر عدد من الناس فية اوبن بوفية

http://darbetshamss.blogspot.com/

Tamer Nabil Moussa يقول...

بوست مميز ياخالد

وانا بقول نصحى من النوم وقت لما يكون اغنى الناس عندنا ورجال الاعمال قلبها على البلد وتحاول تعمل اللى يفيد مش اللى يضر

تحياتى

rtrcbh يقول...

السلام عليكم ورحمه الله وبركاته
آخى الكريم
لما أراك لم تشارك معنا فى حملتك إلى الآن ؟
أخي العزيز : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أخي الحبيب أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

همس الاحباب يقول...

hdايمن بدر
منورنى اخى الكريم
مع الاسف نحن كمسلمين لم ننجح فى ذلك
واصبحنا نستورد كل شىء من الصين
تحياتى ويسعدنى تواصلك جدا

همس الاحباب يقول...

فنكى دكتور
هههههههه
منور يا باشا
مش مهم نبقى صينى المهم نصحى من النوم
تحياتى وسعيد بزيارتك

همس الاحباب يقول...

ابوحنف
اخى العزيز منورنى
انا مش معترض يا باشا انا مؤيد ههههه
مع الاسف ده حقيقى اننا بنستورد البواقى ومخلفات الصناعة الصينية
وربنا يستر على الجهاز الجديد
تحياتى

همس الاحباب يقول...

اختى العزيزة / موناليزا
مع الاسف ده واقع وبيحصل اننا بنقلد التافهات اكثر من الجد وما يفيد
نعم عندنا صناعات تم تدميرها وصناعة المنسوجات من الصناعات الرائدة مع الاسف فيما مضى
تحياتى وتقديرى

همس الاحباب يقول...

وائل
اهلا يا دكتور
ربنا يستر علينا ونلحق حتى السبنسه
تحياتى ومنور يا دكترة

همس الاحباب يقول...

كلاكيت تانى وتانى
العزيزة نرمين
انا ليا الشرف انى قابلت حضرتك والامورة لينا هى فعلا الظروف ما سمحتش اننا نتكلم مع بعض بس كفاية اتشرفنا بوجودك
نعم كل شىء اصبح صينى وجميع الاجهزة المنزلية بقت صينى مع ان هناك منتجات صينية فى منتهى الروعة بس مع الاسف مش بنشوفها عندنا لاننا بنستورد البواقى
تحياتى وتقديرى

همس الاحباب يقول...

دعاء مواجهات
هههههه
اوك يا قمر مركز اهو
تحياتى

همس الاحباب يقول...

بنوته مصرية
ام نور ازيك
يارب يتمم بخير
بس همس ونور شوية
ولا انتى مستعجلة تبقى حما
هههه

همس الاحباب يقول...

بنوته مصرية
انتى تنورى فى اى وقت يا ستى
واحنا لينا غير نور والست والدتها
مع الاسف ده حقيى فعلا كانهم ماسورة وانفجرت بتلاقيهم فى كل شارع وحارة
والمعارض فى كل ميدان
وكالة البلح هههههه لا ياشيخة بتوع الوكالة بينزلوا فى الاسعار
تحياتى وتقديرى

همس الاحباب يقول...

حنين القلب
منورانى دائما يا حنين
فعلا غزو ولا غزو التتار
المدام طب بلاش تغيير ما فيش قطع غيار
او كتالوج للصيانة
تحياتى وتقديرى

همس الاحباب يقول...

بت خيخة
ام شيكو الغالية
اكيد انت فى مصر
بس نفسى ابقى فى مصر التى فى خاطرى
تحياتى وسلامى لشيكو

همس الاحباب يقول...

سومه المجنونة
طبعا الف مبروك لكاميليا وعقبالك
بس تعرفى انها فكرة مجنونة
بجد يا ريت ينزلوا منتجات صينية ومساكن من الصين
خلى الازمة تنفرج والكل يتجوز
احييكى على فكرتك الرائعة
تحياتى يا سومه

همس الاحباب يقول...

nonoyam
وعليكم السلام ورحمة الله وبركاته
ده شرف ليا ان حضرتك تشرفينى وتنورى مدونتى المتواضعة
وسعيد جدا بالتواصل مع حضرتك
وانا متفق مع كلام حضرتك قلبا وقالبا
وياريت نحس بالكارثة اللى احنا فيها
ونلجا الى الله والى ديننا الذى يحثنا على العمل
لا طبعا البنات مش وحشة مين قال كده
بس هما بقوا صينى كمان .
تحياتى وتقديرى

همس الاحباب يقول...

العزيزة / كاميليا
الف مليون مبروك وبالرفاء والبنين
ميرسى لزيارتك وربنا يسعدك دائما
تحياتى وتقديرى

همس الاحباب يقول...

د/ ابو يحى وادم
وعليكم السلام ورحمة الله وبركاته
منورنة اخى الكريم
وسعيد جدا بتواصلك
ومتفق مع حضرتك فيما تقول
واسف جدا لتقصيرى فى زيارتك
تحباتى وتقديرى

همس الاحباب يقول...

دعاء مواجهات
علم وجارى التنفيذ
والف مبروك اختى العزيزة

همس الاحباب يقول...

اخى العزيز/ تامر نبيل
وانا باضم صوتى لصوتك
ويارب نفوق ونصحى قبل فوات الاوان
تحياتى

همس الاحباب يقول...

اخى العزيز / د/ ابو يحى وادم
جزاك الله خيرا وجعله فى ميزان حسناتك
جارى التنفيذ والمشاركة طبعا
انا من اشد مؤيدى اللغة العربية
وبعشقها بجنون
واسف لتاخرى نظرا لظروف العمل
تحياتى

حاجات جوايا يقول...

السلام عليكم ورحمة الله وبركاته

احنا فعلا بجد لازم نفوق .. عندنا طاقة شبابية هايلة .. وعندنا رجال أعمال على درجة كبيرة من الثراء .. مش عارفه ليه مش بيعملوا مشاريع للشباب ويساعدوهم على الابتكار والاختراع ويشجعوا البحث العلمى ..
احنا لو فضلنا كده مش الصين بس اللى هتغزونا .. دى الصومال و دارفور مش بعيد يسبقونا ويغرقوا أسواقنا بمنتجاتهم

ربنا يصلح حالنا

دمت أخى الفاضل بخير وصحة وسعادة

المـــفـــــــقــــــــوعـــــة مــرارتـهــا يقول...

تعرف ان علامة صنع في الصين دي ليها مكانتها برة لكن في مصر بتلاقي اكتر حاجة وحشة ورديئة الصنع من الصين .. ليه بقي
لان الصينين لما بييجوا يصنعوا حاجة بيعملوها بكذا جودة عشان يناسبوا كل شعوب العالم
واحنا بقي لان اللي بيستوردوا المنتجات بيبقي ضميرهم نايم وذمتهم واسعة فتلاقيهم بيستوردوا أردأ المنتجات عشان يحققوا هامش ربح عالي

اما بقي لسؤالكاحنا ليه مش ذيهم
الإجابة بسيطة أبحث عن الإدارة عزيزي
وستجد الحل الشافي

Soooo يقول...

اقولك ازاي الصين وصلت للي هي فيه دلوقتي

الصين زرعو فيهم حب الشغل وحب العطاء وعلى قد ماتشتغل على قد ماتاخد
مش بالكلام
بالتنفيذ
واحنا احلى شعب يتكلم ويقولك ان شاء الله
ولما حاجه ماتحصلش يقولك ايه ياعم ربنا ما ارادش .. انت هتكفر ولا ايه

حاجه كمان
عارف الاسره الصينيه المكونه من اربع افراد .. اب وام وابنين .. عارف بيقضي حياتهم ازاي
الولاد بعد مايروحو بيوتهم من المدرسه يبدأو في تجميع مكونات احد الاجهزة الصغيره
هنقول مثلا .. فانوس رمضان
العيال يجمعو اللشكل الخارجي
الاب بيعمل بوردة التوصيل الصغيره
الام بتحطه في الكيس .. بتحط الفانوس يعني مش الاب

وقيس على كده كل حاجه

تعتقد السبب في ده .. الاسره .. ولا النظام .. ولا حبهم لاثبات ننفسهم ؟؟

فكر واديني الو على زيرو تسعميه .. زيرو زيرو زيرو زيرو زيرو زيرو زيرو زيرو


وسلامي لهمس هانم



سلامووووووووووز

همس الاحباب يقول...

اختى العزيزة / سالى
ربنا يستر ونفوق
ونصحى من تلك الغقوة
تحياتى وسعيد بتواصلك

همس الاحباب يقول...

المفقوعة مرارتها
منورة يا سوسو هانم
طبعا عندك حق
نحتاج ادارة وضمير وحب لهذا الوطن
تحياتى

همس الاحباب يقول...

سووووو
ازيك يا باشا وانا اقول المدونة منورة ليه
بصراحة انا متفق معاك فى كل اللى قولته واعتقد ان هذاخليط من كل هذا
تحياتى وتقديرى

عبده الرايق يقول...

يا كسوفى
هو انا معلقتش هنا ؟؟؟؟؟؟؟
اذن فليسقط الرايق
فليسقط الرايق

عارف يا خالوووووووووود دلوقتى مش الغريب انك تلاقى منتج صينى
نو
نو
نو
الغريب فعلا انك تلاقى منتج مش صينى
بحد والله
لو مسكت منتج ولقيت بلد صنعه غير الصين او حتى ميد ان ايجيبت
ابقى مستغرب
هو لسه فى ميد ان ايجيبت ؟؟؟؟؟؟؟؟

رندا يقول...

تعرفوا انا خايف يوم اقوم من النوم الاقى مراتى مكتوب عليها صنع فى الصين .
بس يا ترى ايبقى معاها كتالوج وقطع غيار ولا اللى هيتكسر يترمى و نجيب غيره !!!!!!!

.........................

ههههههههههههه

اتصدق فكرة بكرة يعملولها ربنا يستر

عارف ياخالد

فعلا تطور مرعب
والى هتستغرب لية اكتر ان الهند كمان بتنتج
حتى الهند الى كان اى حد بيهزر مع التانى يتريق علية ( اصلك هندى )

شكلنا ضعنا بجد ربنا يستر

نفسى اسئل سؤال بس اعتقد مفيش لية اى اجابة
فين زمان لما المنتج كان مصرى
فين عمر افندى فين صدناوى
لو عرفت راحوا فين هتقول اننا ولا هننتج اى حاجة ولا هنصنع
حتى العلماء بتوعنا بيسافروا برة مصر
ويرجعوا مصر فى توابيت لان لو حد عمل فكرة معينة او اكتشف شئ بيخلصوا على الموضوع بقتلة
ربنا يسترها معانا بجد

تحياتى وتقديرى

رندا

حبيبـــــــة القمـــــر يقول...

السلام عليكم
ازيك ياخالد بقالي فترة مجتش عندك
عارف بجد ان موضوع الصين دا بيستفزني جدااا
مش لأنهم وحشين .. لكن عشان احنا عندنا عقول جباره وشباب ميه ميه وامكانيات الى حد ما افضل منهم بكتير ومع ذلك مش قادرين نوصل لربع اللي هما وصلوا ليه
ليييييييييه .. هنا السؤال
بس افتكر ان مفيش اصرار عالنجاح ولا صبر كمان
الكل عايز يبدأكبير ومش مهم على حساب مين او ازاى
خالص تحياتي

حنين القلب يقول...

ايه يا خالد فينك
اتاخرت علينا كده ليه بقالنا كتير مش شوفنا ليك بوست وحشتنا بوستاتك
ومستنياك
سلام يا خالد

همس الاحباب يقول...

عبده باشا الرايق
هههههههه
انت لسه فاكر يا راجل
انا نسيت انك موجود فى مصر
منورنى فى اى وقت وزمان يا باشا
كان زمان نفرح قوى لما نشوف صنع فى مصر دلوقتى مع الاسف كله صينى
تحياتى وتقديرى

همس الاحباب يقول...

الاخت العزيزة / رندا
منورانى اختى العزيزة
بس بجد انتى الوحيدة مع ابو خالد اللى علقتوا على تلك الجزئية ههههه
هى مجرد فكرة قابلة للتطبيق
كان زمان عمر افندى وصيدناوى الله يرحمهم ويخرب بيت اللى كان السبب فى تدهور صناعتنا وخلينا كده
طبعا الهند قادمة هى كمان
يارب عقبالنا احنا كمان
تحياتى لكى

همس الاحباب يقول...

حبيبة القمر
منورة وسعيد جدا بزيارة حضرتك
واتمنى التواصل
وانا متفق معك طبعا
فعلا كلنا عايزين نبقى مديرين ورجال اعمال من الهواء
تحياتى وتقديرى

•√أريـ السمر ـج√• يقول...

السلام عليكم
المصيبة الأكبر اننا كمان كل ده و بنستورد أسوأ الأنواع عندهم .. يعنى حتى اللى بيدخل مصر بيكون الاقل جودة لان المستوردين هنا بيطلبوا الخامات الأقل سعراً و يبيعوها أغلى من حقيقتها بكتير ..

لو شوفت نفس الشىء فى دول الخليج حتلاقيه كمان افضل و يمكن مقارب بالسعر او ارخص .

ده غير اللى بيصدروه للدول الأوربية و امريكا .. امال امريكا بتعمل لهم حساب ليه


ما اظنش ان فى امل اذا كان بدل ما اى واحد يعمل مصنع هنا بيسافر يستورد حتى الفوانيس بنستورها !! عايز ايه تانى اكتر من كده




دمت بكل الخير و اسعدنى المرور بمدونتك

غير معرف يقول...

هنقول ابتسم فأنت فى مصر
وحسبنا الله ونعم الوكيل