made in china

تحديث واجب

======

تهنئة قلبية للاخت العزيزة

كاميليا

بمناسبة عقد القران

الف مليون مبروك

وبالرفاء والبنين

=======

منذ ايام نزلت مول للكمبيوتر علشان اجيب جهاز كمبيوتر حديث للشغل فانتهزت الفرصة وجمعت جهاز يواكب تطورالعصر ويتماشى مع التكنولوبيا بالملوخية ،نزلت قلت نشوف ايه الموجود فى السوق طبعا لاقيت حاجات حلوة كتير بصراحة بس جاءتلى حاجة كده غريبة من الانبهار والازبهلال على شوية عبط ليه بقى.

كل ما امسك حاجة اقرا بلد الصنع made in china من اول المفعوص اللى بيسموه ماوس الى اكبر حاجة وهى الشاشة برده made in china ايه اللى بيحصل يا رجالة انا كنت عارف انه الكمبيوتر بيبقى تجميع من كل بلد حاجة مثلا الشاشة ماليزى او تايوانى وبعض المستلزمات كورى على صينى وكله ماشى .

لا دلوقتى من الالف للياء كله صينى اللهم لا اعتراض .

السؤال اللى محيرنى بجد!!!

المنتجات الصينية غزت العالم بشكل رهيب وكل حاجة تلاقيها مكتوب عليها صنع فى الصين

يعنى سجاجيد الصلاة صنع الصين يا مسلمين

فوانيس رمضان بتاعت وحوى يا وحوى صنع الصين

لعب الاطفال بكل اشكالها صنع الصين .

الاجهزة المنزلية والادوات الكهربائية من الصين .

حتى مندوبى المبيعات فى الشوارع من الصين .

بكرة قمر الدين والملوخية والبامية نستوردها من الصين

الحاجة الوحيدة اللى ممكن ما نستوردهاش من الصين هى الفول المصرى لانهم لو بعتونا فول مش بعيد نبقى زيهم ونخترع كل حاجة ومنتجاتنا تغزو اسواق العالم ونبطل نوم فى العسل .

سؤال غبى من واحد بياكل فول ازاى الصين وصلت لهذه المرحلة المتقدمة من التكنولوجيا والسيطرة على اسواق العالم ؟؟؟

الصين عدد سكانها يربو على المليار نسمة اصبحت قوة عظمى وليها حق الفيتو وحق بيع عيش الفينو كمان.

وتلاقى فى كل منزل مصنع تحت السلم او فوق السطوح بس مش زى مصانع الزبالة اللى عندنا وكل حاجة ليها اهمية ومفيدة عندهم وليها استخدام وممكن يصنعوا منها منتجات تبدا من الابرة للصاروخ .

كنا بندرس زماااان فى اولى كلية تجارة مبادىء الادارة من عوامل نجاح اى مشروع توافر 3 عناصر اساسية :

1- راس المال ( وده موجود فى مصر وعندنا اغنى اغنياء العالم اللهم لا حسد )

2- الايدى العاملة ( بسم الله ماشاء اكتر من الهم على القلب بنتكعبل فيهم على النواصى والمقاهى يشرحوا القلب الحزين عواطليه بالوراثة )

3- المواد الخام ( مصر غنية بمواردها الطبيعية والمواد الخام وجوها ربيع طول السنة كانوا بيقولوا كده فى الدراسات الاجتماعية فى ابتدائى واعدادى ولاهما غيروا المناهج وغسلوها بتايد ابو خمسين قرش )

الحمد لله كل العناصر متوفرة لقيام مشروع ناجح وقيام صناعات محلية تنافس المستورد الصينى .

طب يا ترى ايه السبب فى تخلفنا والسبب فى تقدم دولة مثل الصين ( طبعا الاسباب كتيرة بس بصراحة مش مقتنع بيها )

هى الصين ليها حضارة تمتد عبر الاف السنين والمصريين برده عندهم حضارة منذ الاف السنين .

الصين حافظت على حضارتها وريادتها ولم تتوانى او تتفاخر بحضارة منذ القدم ووقفت محلك سر .

احنا حافظنا على حضارتنا وبنفخر باننا احفاد الفراعنة بناة الاهرام وابو الهول

وبنغنى وبناة الاهرام فى سالف الدهر كفونى الكلام عند التحدى .

اى تحدى اللى بنتكلم عليه شوية حجارة وتماثيل وياريت بنحافظ عليها او بنستغلها صح لكن بنهربها ونسرقها او تتسرق مننا ومش بنعرف نرجعها كمان.

يلا ما علينا من التماثيل خلينا فى المساخيط قصدى فى المنتجات الصينية .

لا بجد الصين غزت العالم باجهزة تكنولوجية هائلة واصبحت قوى عظمى لها شانها فى زمن قياسى جدا بل سحقت دول عظمى وتفوقت عليها .

نعم المنتجات اللى موجودة فى مصر رديئة بعض الشىء وده مش عيب منهم العيب فينا بنحب نسترخص ونشترى بملاليم علشان نبيع بالملايين ونبقى رجال اعمال معاهم الملايين ومش مهم الجودة ومش مهم مصلحة الشعب ما هو كله ماشى .

يا ترى امتى انصحى من النوم ونلحق بركب الامم المتقدمة ؟؟؟

تعرفوا انا خايف يوم اقوم من النوم الاقى مراتى مكتوب عليها صنع فى الصين .

بس يا ترى ايبقى معاها كتالوج وقطع غيار ولا اللى هيتكسر يترمى و نجيب غيره !!!!!!!

واللهم لا اعتراض ..