20 يونيو 2008

القمر اسمه ايه ؟؟

تحديث اخير

البقــاء لله

توفى والد الاخت العزيزة صاحبة مدونة حنين القلب

نسالكم الفاتحة

تحديث تانى

**********

الاخت الرائعة سومه نزلت البوست ده ردا على بوست

مذكرات زوج

تحديث

خبــر عاجـل

======

اليكم هذا الخبر والحاضر يعلم الغايب غدا باذن الله تعالى سوف يتم نشر بوست مذكرات زوج فى مدونة فرنسا والرايق السيدات يمتنعون والرجال عايزكم تشجعونا لحد الصبح ويا خوفى يا بدران منكم .

=================

اخوانى واخواتى المدونين :

طبعا وحشتونى ودايما بتوحشونى ولكن ظروف غصب عنى بتخلينى مش مركز فى التدوين الفترة الماضية منها ظروف العمل وظروف عائلية لكن بما ان التدوين اصبح ادمان فأقر وأعترف انى مدمن حتى النخاع لذلك برغم انشغالى مقدرش ابعد كتير ولازمن ولابد انى اتابعكم باستمرار.

ومن هذا المنطلق اود ان تشاركونى افراحى واحزانى وكذلك عايز رايكم فى مواضيع كتيرة قوى منها ما هو شخصى ومنها ما هو عام

الموضوع الشخصى :

ان شاء الله اخويا الصغير ربنا ايكرمه ببنوته زى القمر الاسبوع القادم وبما اننى الاخ الكبير فمطلوب منى اختيار اسم للمولودة القادمة باذن الله انا فى دماغى اسماء كتير اقولكم عليها وانتم تضيفوا او تختاروا من بين الاسماء المذكورة عايز مشاركتكم وتفاعلكم والاسم الفائز ليه جائزة كبيرة كيس اسبوع بحاله وممكن صينية فتة كمان اعتقد الجائزة تشجع انكم تشاركوا فى الاستفتاء مش كده

الاسماء المقترحة من العبد لله

تسابيح - اهلة - تسنيم - حنين - شهد - فجر - غيداء- رهف -جنى - رويم - بيسان - أناهيد - رواء- سوار- جمانه-ليساء -ترنيم - ود - ميلاء - هديل -نغم

كفاية كده عليكم وابدعوا فى الاضافة .

البوست القادم ايكون عن مناقشة اراء ومقترحات البوست السابق مجرد فكرة من خلال وجهات نظر مختلفة

اشوفكم صدفة .

هناك 118 تعليقًا:

عبده الرايق يقول...

عد الجمايل يا باشا
اول تعليق

عبده الرايق يقول...

عد تانى
وتااااااااااااااااااااانى تعليق

عبده الرايق يقول...

ياحلولى
انا لوحدى فى الملعب
والكوره معايا
وبسجل اجوان براحتى
وماشى الرايق بالكوره
وماشى
وماشى
وبيشوط
وهيسجل التالت
وجوووووووووووووووووووووووووون
وجون وجون وحون

عبده الرايق يقول...

خالد حبيب قلبى
انا هاختار اسمين
ولو اسم فيهم كسب
ابعت صنيه الفته على السويس طوالى
ولا بقولك
الدنيا حر
وممكن الفته تحمض من السخونه
ابعت انت 15 الف جند وانا اشترى لحمه وفته ورز على مزاجى

عبده الرايق يقول...

اه نسيت اكتب الاسمين
شهد
او
هديل

عبده الرايق يقول...

طيب احاول تانى يمكن اسجل الجون السادس
الجماهير بتهيص
رااااااااااااااااايق
يلا يارايق يا ابهه
بيب بيب
رايق
بيب بيب
رايق
بيب بيب
رايق
وشوطه جااااااااااااااااااامده
والجون السادس
هيييييييييييييييييييييييييييه
احمدك ياااااااااارب

عبده الرايق يقول...

كفايه كده
لحسن انضرب بالنار
ولا حد يزعل منى
عموما
انا فى انتظار السبوع

عبده الرايق يقول...

اه صح يا خالد
هتعمل البارتى فين ؟؟؟؟؟؟؟؟
انا ممكن اكلملك ماى فرند المحافظ
يخصص لنا استاد القاهره
كايرو ستديوم
ونجيب الفنانه الكبيره
مانسى عجرن
والفنان الكبير
ناصر الساهر
والفنانه
اكوشكا
ونعملها بارتى 9 نجوم محصلشى

nigro يقول...

بالنسبة للبوست ما تقلقش ياأبو همس
هألم شوية محلاوية و بالشوم و هنيجي نكسر المدونة تشجيع
انت تأمر بس

أما بالنسبة للكتكوتة الأمورة الوافدة الجديدة ربنا يباركلكم فيها و يجعلها يارب قرة عين لباباها و مامتها .. حرام عليك ياخالود إيه الأسماء دي ياراجل؟
انت كده هتعقد البنت لما تكبر
ده غير انها مش هتعرف تنطق اسمها غير بعد تدخل الإبتدائية و لا حاجة ده غير انها احتمال ما تعرفش إيه معناه أصلاً زي حالاتي كده

أنا عن نفسي ناوي لما أخلف بنت أسميها نحن
تبقى اسمها
نحن محمد النجار
شايف العظمة

أنا بأرشح اسم هديل
و طبعا بما اني عارف انه كسبان كسبان
فأنا مش هأكلفك خالص و أقولك سبوع و فتة و الحاجات المكلفة دي
حولّي انت بس رصيد ب200 جنيه و تبقى كده مرضية ع الآخر

من البداية أهو أنا حاجز قبل أي حد
الواحد فين دلوقت يلاقي عروسة يربيها على ايده؟

يلاسلام

عبده الرايق يقول...

ولو عايز احوك الرايق هو اللى يغنى
انا مستعد
وصوتى كروان
ولا تقولى صوت الفنات الكبير ابو تريكه
ولا الفنان الكبير هادى خشبه
انا صوتى كروان
يعنى زى صوت على الشريف كده
ومعايا الفرقه الخصوصى بتاعتى
بس ادعى ربنا يفك حبسهم على خير
ومعايا الراقصه العالميه شيشى البلطيه
بس هى دلوقتى فى المصحه بتحاول تخسس
اصل وزنها وصل 286 كيلو متر \ ساعه
وبقت عامله زى الفيل
لكن متقلقشى
احنا هنجيبها ونلبسها بدله الغوريلا
وتقعد طول البارتى تهز فى ديلها
واهو منها تشم شويه هواء بعيد عن المصحه
قلت ايه ؟؟؟؟؟؟؟؟؟؟؟؟
اجى واجيب الفرقه ؟؟؟؟؟؟؟؟؟؟؟؟
ومش هناخد منك ولا مليم
برضه الصاحب لصاحبه
وانا سيد من يعرف فى الاصول
بس هتدفع
350 الف جند
لزوم بدل انتقال واضافى وحوافز ورهن للفرقه والعده

الـسـيـدة نـون يقول...

انا ارشح اسم حنين

فاتيما يقول...

أيه يا خالد الأسامى دى ؟؟
دنا بقيت دقة قديمة قوى
أنا معجبنيش غير أسم تسابيح عشان على إسم بنت الدكتور زين الأستاذ و الصديق الغالى عليا ...
طب أنا هقترح إسماء بحبها بس هتطلع قديمة زيى
ملك
فريدة
نور
حبيبة
بس كدا
و مبروك لأخوك مقدماً

همس الاحباب يقول...

عبده الرايق
بما انك على الهواء
انا عايزك فى موضوع
افتح الموبيل
اوالياهو عايزك ضرورى
بسرعة
وبلاش لعب فى المدونة
عندك ضرب نار بكرة
وشكله كده الاسبوع ايتاجل لحد عمها اللى هو انا ما يطلع من المستشفى

Unknown يقول...

انا ممكن اقولك
اسم ناوية اسمية لبنتي
غير مياسة طبعا
بنتي التانية
اسم بيارل
يعني لؤلؤ
بالاتيني او الانجليش
ها اية رايك
ومبروك هتبقي عم
عقبالك
سلام

المـــفـــــــقــــــــوعـــــة مــرارتـهــا يقول...

انت بتسن السكاكين من دلوقتي
هو انت فاكر عبده ده ينفع ببصلة
ده عايوديك في داهية
وعايطلع يجري وعايسيبك لوحدك
عانقدوكوا وعانطلع عينيكوا
ماتخافش كله قانوني يامعلم

funckydoctor يقول...

ربنا يخليهاله
ليه الأسامى الملعبكة ده سموها أسماء
نسمة حنان
بلاش لعكبة أصل الناس بتحور دايما فى نطق الأسماء
وعايز كيس سبوع :D

امل يقول...

السلام عليكم ورحمة الله
مبروك مقدما البنوتة الجديدة ان شاء الله
أما بخصوص الاسامي فأنا اقترح من المعروضين حنيــــــن ومن عندي ريـــم
أو حبيبة وربنا يبارك فيها وتكون قرة عين لوالديها
تحياتي

دعاء مواجهات يقول...

ههههههههههههههههههههههه

اية دة عبدة الراايق
خد المدونة لحسابة ولا اية

لالالا انا مش لاعبة...

دعاء مواجهات يقول...

انا بقوول سميها ريم

او بسملة

هتاخدوا ع حسها حسناات بالهبل

صدقنى

بيس

رئـــــيسـة حزب الأحلام يقول...

ادة المدونة كلها الرايق ادة فى ايه ماتش ادة ياعم ازيك ياهمس
الف مبروك لاخوك وانا بقترح هديل
تحياتى لك

Abo 7anf يقول...

بص يعم خالد
انا عن نفسى بحب
تسنيم أو رهف

بنت الصالحين يقول...

حلو اوي تسنيم واهله

ربنا يجعلها من الذريه الصالحه باذن الله

عصفور المدينة يقول...

أقترح جنى
ولي قاعدة في اختيار الأسماء بسيطة وهي أن يكون الاسم ينطقه الناس كما سميته أنت بدون تعريف
,ايضا بخصوص أسماء الفتيات يستحسن ألا يكون الاسم فاتنا في نفسه
مثل
غيداء ونغم وميلاء

عصفور المدينة يقول...

أقصد بدون تحريف

mohammed alsha3r يقول...

شهد


وشكرا ياعم خالد على الواجب اللى عملته معانا

غير كدا

انا كنت ماسك نفسى على الاخر وانا قاعد معاك ومكسوف جدا

مش عاوز اقوم

لكن يومين كاملين متواصلين

كنت مسقظ سيستم والله

بس ان شاء الله نتقابل مرة تانيه اكون فيها فاااااااااااااايق

ولا يكون فى كورسات ولا فى ايى شىء

ربنا يبارك لك وفيك وفي بنتك

اخوك محمد الشاعر

عًٍمًرٌٍوٍ آلنْوٍبٌَِى يقول...

السلام عليكم ورحمة الله

الف مبروك مقدما على اخوك يا خالد ومبروك ليك انت كمان
انا بحب اسم (( حبيـبة )) جدااااا
وان شاء تتربى فى عزكم

قوس قزح يقول...

حنين حلو

همس الاحباب يقول...

عبده باشا
منور التعليقات كلها يا باشا
الاول وتانى وتالت ودشليون
متخافش انا ابعتلك 150 جند بحوالة بريدية عبر الخطوط الجوية القادمة من كوالامبور استناها ممكن توصل خلال 15 سنة بكتيره

همس الاحباب يقول...

عبده الرايق
شهد وهديل
بحبك وانت رايق كده يا رايق
استنى لاخر الحفلة وانت كسبان كسبان

همس الاحباب يقول...

عبده الرايق
ههههههههه
متشكر يا حبيب قلبى
بلاش المحافظ والنبى ومانسى عجرم
عايزين الاسبوع يتم على خير
ناصر الساهر
روح نام يا عبده
اكوشكا دى اخت توشكا مش كده
ههههههه

همس الاحباب يقول...

نيجرو
حبيبى من ايام الجيزة
ايوه والنبى شوم ورجالة كده
بس خلى بالك اوعى تكسرها على دماغى
اصل انا عارفك زى حالاتى بتحب تخدم قوى
ويا عمربنا يكرمك وتجيب نحن وانا وهم
200 جم رصيد تصدق انت راجل قنوع
وانا كده بدات احبك
انا خفت تطلع طماع زى الرايق وتطلب 2 جند ولا حاجة
يلا كوم نفسك تكويمه كويسة وتعالى انا اتوسطلك

همس الاحباب يقول...

عبده الرايق
يا دى النهار اللى مش فايت
يا عمنا انت ساكن فى المدونة
يلا انرش ميه
ههههه
اتغنى انت
بنت ايجيلها صرع هى والمعازيم
انا على نفسى احط قطنة واركب سماعات
ونعم الفرق والراقصات
وانهى ترلة اتنقلها ان شاء الله
و350 الف جند يا بلاش
يخرب بيت دى صحوبية يا جدع
هههههههه

همس الاحباب يقول...

خيخة
ام شيكو
انتى كده كسبانة كسبانة
ويلا كومى الواد شيكو علشان يوقف فى الطابور ومتخافيش انا ازكيه عند العروسة
تحياتى وبوسة كبيرة لشيكو

همس الاحباب يقول...

ام يوسف الغالية
هههههههه
ماشى يا ستى انا تحت امرك
والله يبارك فيكى
وعقبال ما تفرحى بيوسف كده
تحياتى وتقديرى

همس الاحباب يقول...

my hope$
الله الاسم جميل بس صعب برده دول ناس صعايدة اخرهم بصراحة بهانة ونعسة وتفيده
هههههههه
ربنا يخليهم ليكى
والله يبارك فيكى
وانا عندى همس يا ستى

همس الاحباب يقول...

مفقوعة مرارتها
سوسو هانم عندنا وانا بقول الدنيا شتت كده ليه
هههههههه
نحن لها
وكله قانونى يا معلمة

مجرد خواطر يقول...

اللهم اجعلها قرة عين لأمها وأبيها. انا كان نفسى يكون عندى بنوته وكلن نفسى اسميها اما مريم أو البتول مش عارفة تمشى الأسماء دى عندكم ولا ايه؟!

ويكا يقول...

هيفااااااااء
شرااااارة

عاشــــــ النقاب ـقــــة"نونو" يقول...

السلام عليكم
هقترح تسنيم من الموجود
واقول جديد من عندي
اسراء
مريم
اسماء بنوتاي ههههههههههههههه
رؤى ععلى وزن ضحى
تقى
ايات
وبما انك بتحب السماء الغريبة
اقترح لوجين ومعناه الفضة الخالصة
روميساء
تيجي بالف سلامة وتفرحوا بها وبسلامة
مامتها
بورك في الموهوب وشكرت الواهب
تحيتي

أم أحمد المصرية يقول...

اخي الفاضل همس الاحباب
الف مبروك انك حتبقي عمو و حادخل اقرأ تدوينتك عند فرنسا و الرايق و ارجو ان نظل بعدها اصدقاء :))
بالنسبة للاسماء عجبني جدا اسم رهف
و اسمح لي اقترح عليك اكتر اسمين بحبهم في الدنيا و اكيد انت حتعرف ليه
شروق و شادن و معني شادن طبقا لمختار الصحاح :الغزال اليافع التي بدأت قرونه في النمو
لو حاز احد هذه الاسماء القبول انا في انتظار كيس السبوع و فطيرة لو اخترت من اسماء بناتي :)

غير معرف يقول...

how about JUDY a very nice and modern name and it also is a name of a mountain in alganaa...

موناليزا يقول...

بورك له فى الموهوب
وشكر الواهب
وبلغ اشده ورزق بره
الف مبروك وان شاء الله تبقى بنوتة جميلة ورمز من رمز الاسلام
اما عن الاسم فانا اقترح اسم "غيداء"

اتحادالمدونين المصريين يقول...

اخى الفاضل

اختى الفاضلة

********************** دعوة ***********************

ندعوكم للمشاركة فى حملتنا من اجل فلسطين ومن اجل اسرى المسلمين فى سجون

الاحتلال وجوانتاناموا ومن اجل التذكير بحقوق الشعب الفلسطينى وبخاصة حق العودة الذى

تجرى محاولات لشطبة وطمسه من قرارات الامم المتحدة .....

فى انتظاركم لدعم اخوتنا ومواجهة المحاولات الصهيونية الامبريالية الاسرائيلية الامريكية

عيله مفتريه سابقا يقول...

بصراحه كل الاسماء تحفه

انا عاجبنى جمانه وحنين وشهد

ومريم ( ده بالاخص )

انا ملاحظه هنا ملحوسه كده

هو الكومنتات لعبده الرايق فقط؟


ده مجرد سؤال صوغيور يعنى

سلامى

الربان يقول...

تحياتي

اولا مبروك لاخيك و زوجته...و لكل الاسرة
الكريمة...ان شاء الله تكون ذرية صالحة

اقترح: مريم او تسنيم

تحياتي و تقديري

سبهللة يقول...

خالد خد التلات اسامى دول واديعلى
الاسم الاول
ريناد
ودة اسم عربى معناه
ريناد هى زهرة لشجرة تزرع فى الشام ويستخرج منها عطر تعطر به كسوة الكعبة الشريفة
الاسم الثانى
ريتاج
ودة اسم عربى معناه باب الكعبة ويقال كسوة الكعبة
الاسم الثالث
ريفال
ودة اسم عربى معناه ضوء الشمس او النور الساطع

Asmaa mahaba يقول...

طبعا انا حشجعكم ببوست وحتشوفوه ان شاء الله
اشمتوا اشمتا لينا يوم نردهالكم
ايه رايك فى اسم حبيبه
هههههه طبعا دا مش محطوط فى الللسته بس انا حطيته وخلاص
تحياتى ليك سومه_87

Asmaa mahaba يقول...

ايه دا كله الرايق بيتفسح فى المدونه سد الباب يا ابنى ورش ميه

•√أريـ السمر ـج√• يقول...

أن شاء الله تنور الدنيا بالسلامة و ربنا يرزقكم برها و يصلحها

وجدان و حنين و تسابيح حلوين اوى من اللى انت اخترتهم
دمت بكل خير

Unknown يقول...

اول مرة اجى هنا بس شكلى هاجى على طوووووووووووول الاسماء كلها حلوة بس ممكن تحط معانى رويم-بيسان-اناهيد-بيسان

غير معرف يقول...

همس الأحباب،،،يااااااااه،، انت عارف انا بقالي أد إيه عايزة ازورك بس والله مشاغل الحياة والدنيا تلاهي انت عارف
ما علينا
شدني موضوع الاسماء ده واقبل تعليقي ارجووووك ارجوووووك من غير ضرب انا بقولك اهوه،، انا ورايا .......... احم تقريبا مش ورايا حاجة انما بعرف ادافع عن نفسي،، هه

بسم الله

تسابيح،، حلو بس مش عارفة بحس تسبيح أحلى

اهلة،، نعم بأه؟؟ انت متأكد ان فيه بنت هتسمح لنفسها يبقى اسمها كده؟؟

تسنيم،، بحبه

حنين،، بموت في الاسم ده

شهد،، كتر بأه كفاااااية

فجر،، مميز على فكرة،، بحس مش أي حد بيبقى اسمه فجر

غيداء،، ممممممممممممم

رهف،، بيعجبني اوي الاسم ده

جنى،، برضه كتر فجأة مش عارفة ليه

رويم،، ودي تصغير ريم دي ولا حاجة حضرتك؟؟ طب لو كده فريم مالها ما هي زي الفل

بيسان،، مش عارفة اول ما قريتها افتكرت عربية نيسان كانت معدية من جنب عربية خالو الشاهين النهرده وانا جاية الشغل نياهاهاهاها

أناهيد،، خير بأه بإذن الله؟؟ هههههههههه!! مش عارفة حاسة اني بعد ما اندهلها هبقى عايزة آخد تنهيدة عميقة واعمل كده هححححححححححح :)

رواء،، ليها علاقة بالعطش والمية الساقعة والتكييف البارد اللي انا فيه وشهور الصيف؟؟

سوار،، غوايش يعني؟؟ هتسموها غاويش؟؟
مصير البنت دي هتبقى ف رقبتك

جمانه،، يختييييييييي بيفكرني بأيام عجيبة بلاش الله يخليك احسن مش هحضر السبوع

ليساء،، ليس!! ليس عارفة المعنى والله،، وليس هسامحك ع الاسم،، ولسنا نوافق،، وحنفي لا يحبذ

ترنيم،، شغال

ود،، بس كده،، هيفتكروا اختصار وداد،، ايه القدم ده؟؟

ميلاء،، بتميل يعني؟ دلع ولا ايه؟

هديل،، قديم قدم يا ربيييييي

نغم،، وماله ما يضرش

عموما فكروا في: رؤى حلو بحبه هو كمان

عموما،، ربنا يكرمه سريع سريع عشان تعبكو ما يروحش هدر ولازم البنت انا بقولكو اهوه تكون أد مسؤلية الاسم

حححححححححححححح

طولت مش كده :)

سلاااااااااااام

مها ميهوووو

دعاء مواجهات يقول...

مااشى ياعم

اللى عليى عليى بقى

ربنا يوفقك فرحنالك

بس مش من اولها هتضرب تحت الحزام فينا كدة بقى

تحياتى يابرنس

بيس

همس الاحباب يقول...

فنكى دكتور
منور يا باشا
عايزين نحسن الاسماء فى العيلة
بدل نفيسة وزكية ونعناعة
وكيداهم وست ابوها
ههههههههههه
تحياتى

Unknown يقول...

عودا حميدا
وانا عن نفسى هختار اسمين:
شهد ونغم
ولو واحد كسب ماشى ولو الاتنين يبقى فضل ونعمة
تحياتى

شهرزاد يقول...

مبروك البنوتة الجميلة ..
ربنا يجعلها من ابناء السعد
بقترح اسمين بحبهم: سلمى و مريم
تحياتي

hamssah يقول...

مش عارفه انا جيت متاخرة والقمرة وصلت بالسلامه ولا لسه شويه
مش مجهزة اسامي بس انا بحب اسم- حور
- جنه - ميرنا- حلا
ولا اقولك هي حتيجي باسمهايعني كده اول ما تشوفها وتلمسها هتقولها اهلا يا ....؟
همسه

Mafrousa يقول...

انا جيت اشوفك رحت فين
قلت للنصيبه تكون زعلت و لا حاجه
ان كيدهن عظيم
ههههههههههههه
لاقيت فيه سبوع و محتاسين مش لاقيين اسم
إزاي ...انت عندك اسم مفروسه اوريجينال خاااااص ههههههههههههه
-----------------------------
الاسماء اللي انت اقترحتها كلها حلوه و جديده صراحه انا في كتير منها اول مره اسمعها
انا الاسم اللي سمعته قريب هوه-شادن-
مش عارفه ليه الاسم عجبني ز..و لو ان الاسماء القديمه....بدات ترجع تاني موضه زي
خديجه...رقيه-فريده-
المهم الف حمدا لله على السلامه بالمولوده .......و يرقكم الله من رزقها يااااارب
----------------------
المهم اوع تكون صحيح زعلان ...
ده كله تشويق و جر رجل الزوار هههههههههههه
ده البوست بتاعك اكتر تعليقات....
عاوزين نقفلهم 200
هههههههههههه
انت انسان جميل
اه نسيت...انت سالتني يعنى إيه مسهوك
مسهوك يعني حنين و نلعم و رومانسي تناسبا للشموع اللي فى القلب
ههههههههههههههههه
تعالى كمل الرد عاوزين نعدي 200

Tamer Nabil Moussa يقول...

السلام عليكم

ازيك ياخالد

اخبارك اية

ربنا يعنيك يارب

مبروك لااخوك


انا اقول كدة كم اسم

اسماء
هاجر

اميرة

ربنا يكرمك

تحياتى

رندا يقول...

الغالى خالد

ازيك احوالك اية يارب تكون بخير
يااجمل قلب

حلو انا نفسى احضر سبوع من زمان :)
اختار الاسامى بس اسامى صعبة قوى
ياعم اتكل على الله واقترح رندا وخلص نفسك هههههه

بجد هختار اسمين

مريم
وحنين حلوين جدا

الف مبروك هتبقى عم ياعم هههه

مش تنسوا اهم حاجة بقى العقيقة
ماشى

كل الود

رندا

همس الاحباب يقول...

اختى العزيزة
امل
ان شاء الله اتكسبى معانا واسماء جميلة
تحياتى

همس الاحباب يقول...

دعاء مواجهات
اهلا وسهلا
لا ما ينفعش الانسحاب

همس الاحباب يقول...

دعاء مواجهات
الاسمين حلوين
شكر جزيلا واستنى نتيجة الفرز
ههههههه

همس الاحباب يقول...

رئيسة حزب الاحلام
اعمل ايه لقى الملعب فاضى
قعد يلعب ويجيب جوان
لا ممكن نسيمها حزب الاحلام

همس الاحباب يقول...

ابوحنف
ايه الجمال ده
الاسمين احلى من بعض
ربنا يكرمك وتشوف الاسمين
تحياتى

همس الاحباب يقول...

عاشقة الفردوس
اهلا ومرحبا بحضرتك
واختيار حضرتك جميل طبعا
نورتينى اختى العزيزة

همس الاحباب يقول...

استاذى الكبير / عصفور المدينة
عندنا
يا هلا بحضرتك احنا عندنا سبوح وفرح وضرب نار كمان
ربنا يبارك فى حضرتك
وشكرا للزيارة والمشاركة

همس الاحباب يقول...

محمد الشاعر
اخى العزيز اختيارك رائع انا كان نفسى اسمى همس شهد الاول
وانا اللى سعيد بمعرفتك وزيارتك كمان
وما فيش واجب بين الاخوات
انت تنورفى اى وقت
تحياتى

همس الاحباب يقول...

عمرو النوبى
اهلابيك اخىالكريم
منورنى
الله يبارك فى حضرتك
اسم حبيبه جميل قوى
شكرا لاختيارك

همس الاحباب يقول...

قوس قزح
شكلك كده اتاخدى كيس اسبوع
بالشيكولاتة السايحة
هههههه

همس الاحباب يقول...

ويكا
ربنا ايكرمك قريب
وابقى سميه كده هيفاء
او شرارة ابن انتيخ

همس الاحباب يقول...

نونو
هههههه
اختيارك رائعة اختى
وربنا يخليلك اسراء ومريم
والحمد لله رب العالمين
منورة يا ام اسراء

همس الاحباب يقول...

ام احمد المصرية
هههههه
مع الاسف اختيارك رائع
بس شادن بنت اختى
وهمس بنتى
عايزين جديد
هههههههه
وليكى سبوع وفطير يا ستى

همس الاحباب يقول...

غير معرف
ههههههه
انت ناوى تخلى الصعايدة يضربونا بالنار ولا ايه
ههههه
منور وشكرا لاختيارك ومشاركتك

همس الاحباب يقول...

موناليزا

الحمدلله
والشكر لله
شكرا لكى اختى
العزيزة

واختيارك موفق جدا وجميل

همس الاحباب يقول...

عيله مفترية سابقا
الله يكرمك يا اختى
الواضح ان اختيارك جميل
والرايق بيلعب فى الملعب لوحده
اخويا الكبير وفرحان بالمدونة
تحياتى وسعيد بالزيارة

همس الاحباب يقول...

مجرد خواطر
اسف جدا
العتب على النظر يا اختى
لا تمشى طبعا
وسعيد جدا بزيارتك وتشريفك الدائم

همس الاحباب يقول...

الربان
الله يبارك فى حضرتك
وشكرا لاختيارك وتشريفك ومشاركتك الجميلة

همس الاحباب يقول...

سبهلله ع الاخر
ههههههههه
الصعايدة ايجروا ورايا فى الشارع
وممكن يبيحوا دمى
ههههههه
فعلا اسماء سبهللة
بس بجد الف شكر على هذه الاختيار اتنفع فى المستقبل

همس الاحباب يقول...

سومه مجنونة فى بلد عاقل
ههههههه
منتظرينك
بس بوست رائع
عملتى زى الدبة اللى قتلت صاحبها
ههههههههه
بس بجد انصفتى الرجالة
حبيبه اسم جميل
عقبالك يا جميل

همس الاحباب يقول...

سومه مجنونه
معلش نسيت الباب
دخل يلعب جوه
علم وجارى التنفيذ
هههههه

همس الاحباب يقول...

اريج السمر
تسلم اختياراتك

وربنا يكرمك ويسعدك
وسعيد بمشاركتك واختياراتك

دعاء مواجهات يقول...

اشوفك على خير

سلااام

لا اله الا الله

مجداوية يقول...

حبا فى رسول الله

نجتمع دائما معا لنطبق منهجه صلى الله عليه وسلم فى كافة أمور الدين والدنيا فنكن باذن الله خير أمة أخرجت للناس كما وصف الله أمة خير الأنام فهل نكون خير أمة ؟؟
هل نلبى الدعوة لنجمع جهودنا ونصطف معا كالبنيان المرصوص و نشد بعضنا بعضا كلٌ فى مجاله بفكرة أو نصيحة أو مساهمة فعلية

هل نثبت حبنا لرسول الله فعلا لا قولا ؟؟

فالحب أفعال لا أقوال

هلموا معا نجتمع ونتفاعل ونصلح من شأننا كله

حباُ فى رسول الله

http://www.7obnferasolallah.blogspot.com

http://www.facebook.com/group.php?gid=18625528460




http://la3lahakhier-2.blogspot.com/

مجداوية يقول...

السلام عليكم

الأخ الكريم
امتنانى وتقديرى لسؤالك الدائم

رحم الله جميع موتى المسلمين
وبالنسبة لاختيار الأسماء
أحلاهم هو تسنيم ( عينا يشرب بها المقربون)

ربنا يقر بها عين والديها ويجعلها من الصالحات

ولا أوصيك بالانضمام الى الحملة فكن ممن يسارعون فى الخيرات كما عودتنا دائما

Dr.m يقول...

السلام عليكم
ربنا يخليها ويحرصها ويحميها ويجعلها خير لأهاليها
أقترح جومانه أو تسنيم
تحياتي
سلام

المستنصر بالله يقول...

الف مبروك لاخوك

اسم جمانه حلو


مع خالص تحياتى

حنين القلب يقول...

اولا احب اشكرك على التعزيه بجد انت نعم الاخ يا خالد
ثانيا انا برشح شهد وحنين ولو سميتها شهد انا عايزه خروف لالالالا مش بحب الضانى خلاص خليها جاموسه وامرى لله مش هقول حمص والكلام ده ولا هقول عقيقه لانى مش هاجى ابعت ليه الجاموسه وانا هعمل العقيقه فى اسكندريه ماااااااااااااااشى
سلام يا ابو همس

(احمد سكر ) يقول...

حرام عليك والله ياخالد

ايه الاسامى دى ياعم

طيب بما انك بتدور لاسم لبنت اخوك

دور لاخويا انا كمان على اسم بنوته

بس مش من الاسامى دى

خد عندك ونقى


مـــــريم - ايمــــان - منـــى _

نقى اسم بئه

وتحياتى ليك

اخيك احمد

اه صح

كفايه كدا عليك راحه

ونزل بوست جديد


احمد

Asmaa mahaba يقول...

ايه دا تلات تحديثات اسمى جاى فى واحد فيهم
يتشمت فينا الرجاله يا خالد ربنا يكرمك.....مردودالك
البقاء لله
كلنا لها انا رحت مدونتها ولاقيت فى بوست مكتوب انها مخنوقه سبحان الله ربنا يفك خنقتها
تحياتى ليك سومه_87

rovy يقول...

السلام عليكم اخى الكريم و رحمة الله و بركاته ..
اشكرك جدا لزيارتك الغالية التى اسعدتنى كثير و اخجلتنى ايضا لانك كنت الاكرم و بدأت بما كنت انويه لولا انشغالى حقيقى كان فى بالى ازور مدونتك
على كل حال واضح ان سيادتك الاكرم فلك كل الشكر و الامتنان ..
مبروك للمولوده القادمه ان شاء الرحمن
باركها الله و حفظها و جأت بألف سلامه لها و لأمها ان شاء الله .
بالنسبه للاسم فأنا ارى اجمل ما ذكرت فى حنين او تسنيم ..
دمت بكل خير و سلام
تقديرى و تحياتى
rovy

حبيبـــــــة القمـــــر يقول...

السلام عليكم
ازيك يا خالد ربنا يعينك على مشاغل الحياه
انا لسه كنت هتعذر عن تقصيري في زيارتك ولكن فعلا الدنيا تلاهي

المهم مبروووووك المولوده ربنا يبارك فيها يارب انا كمان في انتظار بنت اختي تشرف الدنيا بالسلامه خلال الاسبوع دا
بس خسارة حماتها منشفه دماغها البنوته تتسمى على اسمها (سوسن ) بس هحرفه وهدلعا بمزاجي .. تقريبا اتفقت على الحكايه دي من قبل الجواز
كان ناقص تكتب الشرط دا في القايمه ههههههههههههههه

بقولك ايه اسم حبيبه جميل جداااا
اه بجد طب جرب كده تناديها بيه هتلاقيها تبصلك على طول هههههههههه

ربنا يبارك فيها يارب عايزة السبوع بلاش تنساني فيه احسن اكل عليك السبوع بتاعك

أم أحمد المصرية يقول...

اخي العزيز
لسه جاية من مدونة فرنسا و الرايق
و مصرة جدا اسمع تعليق المدام علي تدوينتك هناك :))
هو ده بس اللي ممكن يهديني و الحمد لله ات ابو احمد لسه ما تعرفش علي مدونتك

همس الاحباب يقول...

انجى
اهلا وسهلا ومنورة دايما وسعيد بزيارتك
اما معانى الاسماء يا ستى هى :
رويم : تصغير ريم ومعناه الغزال الخالص البياض
بيسان : اسم منطقة فى فلسطين
اناهيد : المراة الفاضلة واصلها انا هيتا الهندية
شرفتى يا اختى

همس الاحباب يقول...

احسن تستاهل
والله انا اللى استاهل اكتر من كده انى عملت موضوع وخليتك تعلقى عليه ههههههه
بس بجد انتى روعة يا مها
ايه خفة الدم دى كلها
بجد بجد انا سعيد جدا جدا بزيارتك وبخفة دمك
نورتينى قوى قوى

همس الاحباب يقول...

دعاء مواجهات
هههههههه
على ايه بس
ده انا غلبان
نورتى يا دودو
تحياتى

همس الاحباب يقول...

ايمن بدر
ربنا يكرمك
ويا رب تكون من الفائزين معانا
منورنى يا باشا

همس الاحباب يقول...

شهر زاد
الله يبارك فى حضرتك
ودايما منورانى
تحياتى

همس الاحباب يقول...

همسه
لا لسه مستنياكى
ومنورة فى اى وقت
هههههههه همسه
مش اينفع
عندنا همس وكمان همسه
ماشى يا ستى

me يقول...

مبروك لاخيك و مبروك على عمها

جيداء كويس
جنى
انا كت هسمى لمى
و ياسمين
نادين

سعيدة بمرورى

سلامى

ابو درويش يقول...

دى اول زياره ليى
مدونه جميله ودمها زى الشربات
ارجو لك التوفيى
السلام عليكم
تحياتى
من ابودرويش

حنين القلب يقول...

عم الحج صباح الفل
انا عارفه انك مشغول بس انت مش شايف انك اتاخرت شويه على تنزيل بوست جديد
هتقولى منتى عارفه يا رخمه انى ورايا شغل كتير هقولك بوست فى نص ساعه مش هيعمل حاجه علشان وحشتنا بوستاتك
سلام ومنتظره البوست فى اقرب فرصه

همس الاحباب يقول...

واحدة مفروسة
مش ممكن
مش مصدق عينى
مفروسة عندنا يا مرحبا
وانا بقول الدنيا نورت
والنت اتفرس من ايه
ههههههه
لا طبعا انا عمرى ما ازعل من اخواتى
انا خايف انكم انتوا تزعلوا
طب الحمدلله
صافى يا لبن حليب يا انجوى
تحياتى

همس الاحباب يقول...

تامر نبيل
ازيك يا تامر
انا اسف جدا لانى مقصر معاك بس غصب عنى
منور يا باشا

همس الاحباب يقول...

اختى العزيزة
رندا
ام خالد
منورة يا اطيب اخت فى الدنيا
ياستى انتى تنورى اى اسبوع
والعقيقة توصل لحد عندك
رندا اسم جميل طبعا وشرف لينا طبعا
تحياتى وتقديرى

همس الاحباب يقول...

اختى الكريمة / مجداوية
دائما سباقة بالخير
اسف جدا على التاخير
وسوف انضم باذن الله
تحياتى وتقديرى

همس الاحباب يقول...

مجداوية
بارك الله فيكى
وعقبال ما تفرحى بنسمة كده
نورتينى وشكرا على المشاركة

همس الاحباب يقول...

دعاء مواجهات
عمرة مقبولة ان شاء الله
ترجعى بالسلامة ان شاء الله

همس الاحباب يقول...

dr.m
وعليكم السلام
منور اخى الكريم
وشكرا على اختيارك الجميل

همس الاحباب يقول...

المستنصر بالله
الله يبارك فيك اخى الكريم
وعقبالك ان شاء الله
تحياتى وسعيد بزيارتك

همس الاحباب يقول...

حنين القلب
ما فيش شكر على واجب
واحنا اخوات ولازم نشارك بعض فى السراء والضراء
وربنا يرحم اموات المسلمين جميعا
هههههه لا طبعا مش اسميها شهد
طالما فيها جاموسة وعقيقة
مش ملاحظة انك داخلة على طمع
هههههه

همس الاحباب يقول...

احمد سكر
هههههههههه
ليه كده بس
صدمتنى يا جدع
ماشى كلامك يا باشا

همس الاحباب يقول...

سومه مجنونه
منورة يا سومه
احنا بنهدى النفوس بين الرجالة والستات ههههههه
بارك الله فيكى وجزاكى خيرا
تحياتى

همس الاحباب يقول...

روفى
شكرا لكلماتك الرقيقة
ولكن انا سعيد جدا بزيارة حضرتك
ويشرفنى زيارة مدونتك دائما
والله يبارك فى حضرتك
تحياتى وتقديرى

همس الاحباب يقول...

حبيبة القمر
اهلا بالقمر
سعيد جدا بزيارة حضرتك والله
ههههه
جربت الاسم لقيتها ولا عبرتنى
ههههه
بتقولى الاسم حلو بس انتشر قوى
عايزة حاجة جديدة
تحياتى وشكرا لزيارتك الكريمة

همس الاحباب يقول...

ام احمد المصرية
ههههههههههه
الحمد لله انه لسه ما شافش
احنا بنهدى النفوس مش اكتر
تحياتى وتقديرى اختى العزيزة

همس الاحباب يقول...

البت قباحة
الله يبارك فى حضرتك
وسعيد جدا بزيارة حضرتك
ودائما منورانى
وشكرا على الاختيار

همس الاحباب يقول...

ابو درويش
منورنى يا باشا
وان شاء الله نتواصل دائما
وشكرا على زيارتك وكرم اخلاق حضرتك
تحياتى

همس الاحباب يقول...

حنين القلب
صباح الياسمين يا ستى
معلش غصب عنى والله
وعامة مش اتاخر كتير
تحياتى