24 فبراير، 2008

رسوم مسيئة -كلاكيت تانى مرة

الا رسول الله

بسم الله الرحمن الرحيم


" ان تنصروه فقد نصره الله "

صدقت ربى نعم رسول الله لا يحتاج نصرنا لان الله ناصره

لكن نحن محتاجين نصرك يا الله لانه قد تداعت علينا الامم كما تتداعى الاكلة على قصعتها

واصبحنا غثاء كغثاء السيل كما اخبرنا سيدنا ونبيبنا محمد صلى الله وعليه وسلم .

نعم رسول الله افضل خلق الله يهان كل يوم ونحن ماذا فاعلون ؟؟؟؟؟؟

بداية الاساءة رسوم حقيرة من اشخاص اقل من الحقارة نفسها فى جرائد الدانمارك وهولندا عام 2005
تسىء الى شخص رسول الله بعدها بشهور طويلة رد فعل غاضب من المسلمين فى جميع انحاء المعمورة
واستنكار واستجهان وشجب وشد الشعور ولطم الخدود من حكوماتنا الاسلامية .
بسم الله ما شاء الله رعبوا بها الاعداء وحرروا بها القدس وخيبتاه ثم ومصيبتاه ....


طبعا الشعوب والاشخاص كانوا اشد جراة استنكروا وطالبوا بالقصاص ومقاطعة البضائع والمنتجات الدنماركية والهولندية وقاموا بمظاهرات لنصرة الحبيب المصطفى كلام جميل.

الاخوة الاعلاميين والمثقفين والمدونيين كذلك ابلوا بلاء حسن فى نصرة الحبيب المصطفى من خلال مقالاتهم وتدويناتهم الرائعة.

خلال الايام الماضية اعيد نشر تلك الرسوم المسيئة فى عدة صحف بالدانمارك واوربا ماذا فعل المسلمين ؟؟؟

-الحكومات الاسلامية لسه نايمة فى العسل لانى حرام اشبهم باهل الكهف ( لان اهل الكهف فتية امنوا بربهم )

يا حكومات الاسلام اين اصواتكم اين الجعجة الكدابة اين الاستنكار والاستهجان ما فيش( ليه الخنوع والاستكانة ؟؟؟)

تخيلوا كده لو ان الصحف الدنماركية نشرت رسوم مسيئة لرئيس احد الدول الاسلامية الحاليين.

يااااااااااااااااااه الدنيا اتقوم ومش اتقعد تانى ناهيك عن استدعاء السفير الدنماركى واحتمال طرده من البلاد واستدعاء سفيرهم فى الدنمارك وغلق السفارة وقطع العلاقات الدبلوماسية ومقاطعة اقتصادية واستنكار واستهجان ....الخ .

يا مسلمين من يهان حاليا رسول الله افضل البشر فافيقوا مما انتم فيه ..

انا بصراحة مش عارف اقول حاجة عن حكومات الاسلام غير انا لله وان اليه راجعون .

ومش اتحدث عن رسول الله وصفاته وسنته لانى اقلكم جميعا علما وهناك مواقع رائعة بارك الله فى اصحابها وجزاهم عنا خير الجزاء تحدثت عن رسول الله وسنته وكل شىء يخصه مثل موقع رسول الله مترجم باكثر من لغة

http://www.rasoulallah.net

اضافة الى ان المستشرقين واصحاب الرسوم المسيئة انفسهم يعرفون عن رسول الاسلام اكثر مما يعرف المسلمون انفسهم ويكفى انا المنصفين منهم وصفوه بان العظماء مائة افضلهم سيدنا محمد رسول الله .

وامال انا عايز ايه ؟؟؟؟؟؟؟؟؟؟؟؟

انا وباصلى العصر وخلصت الصلاة جه سؤال فى بالى حيرنى ورعبنى فى نفس الوقت !!

تخيل يوم القيامة لو وقفت بين يدى رسول الله وطلبت منه الشفاعة وسالنى يا خالد لما ظهرت الرسوم المسيئة لرسولك وشفيعك يوم القيامة ماذا فعلت ؟؟؟؟

يا ويلتاه بماذا اجيب ؟؟؟؟؟؟؟؟؟؟؟؟

فداك ابى وامى يا رسول الله .

بصراحة مش عارف اقول ايه غير يا ليت امى لم تلدنى او يا ليتنى كنت ترابا ....طبعا واعوذ بالله من الكفر .. اللهم ثبتنا على الايمان واعنا على حبك وحب من احبك .

انا نفسى رؤساء وملوك الدول الاسلامية يسالوا انفسهم السؤال ده ويتخذوا موقف ايجابى بعيدا عن الاستنكار والشجب اللى ضيعوا بيها القدس وفلسطين لاننا نستنكر ونشجب وبعدين بننسى او نتناسى بس عدونا مش بينسى وعرف نقطة ضعف المسلمين غضب واستنكار واستهجان وبعدين نسيان وضياع لحقوقهم واخيرا وليس باخرا حالة بلادة ولامبالاة وهذا ما حدث مع الرسوم المسيئة اول مرة والمرة دى حالة لامبالاة من الحكومات والشعوب انفسها .

طب الحل ايه ؟؟ من وجهة نظرى المتواضعة ووجهة نظر الكثير ممن هم افضل منى :

- الشعوب دى ما ينفعش معاها الحوار ولا الاستنكار ولا الغضب لوحده ايجيب نتيجة حتى لو قتلنا اصحاب الرسوم المسيئة نفسه ايبقى بطل قومى عندهم واحنا ارهابيين ،يبقى ما فيش غير حل وحيد على المستوى الرسمى اى للحكومات الاسلامية قطع العلاقات الدبلوماسية مع الدول التى تنشر تلك الرسوم المسيئة سواء بسحب سفرائها او طرد السفراء الاجانب .

وعلى المستوى الشعبى مقاطعة المنتجات الدانماركية واى دولة تسىء للاسلام لان هذه الدول لا تعترف بغير القوة الاقتصادية ولا تخضع الا لمصالحها الاقتصادية فقط .

اللهم بلغت اللهم فاشهد .

هناك 17 تعليقًا:

Desert cat يقول...

جميل الكلام اللى بتقوله يا خالد
وجميل اوى موقفك
الرسوم لما ظهرت اول مرة قولنا المقاطعة وشجبنا واستنكرنا وذهب عمرو خالد للدنمارك وبين لهم وجه الاسلام الصحيح والمفروض ان الصحيح
حضرتك مفكرتش فى لحظة هما اعادوا رسمها مرة تانية ليه
شابين حلوين ظراف كدا اخدتهم الحماسة وقالوا نروح نقتل الرسام الدنماركى ونهدر دمه ده ميستحقش الحياة ... طيب ما هو اتحل فى الاول وعرفوا يعنى ايه اسلام ويعنى ايه مسلمين ... الشابين الحلوين دول رايحين يقولوا لهم احنا همج وقتالين قتلة والتار ولا العار ... تفتكر لو رسولنا وشفيعنا كان عايش فى وقتنا هذا كان سمح باللى بيحصل ده ... كان وافق على قتل الرسام ... الرسول فى حياته جاء له من يقتله ... وعلى ما اعتقد والله اعلم امسك به عمر بن الخطاب اجلس الرسول الرجل وسأله هل أكلت شيئاً ... كان رايح يقتله مش كان راسم له صورة ... مواقف الرسول المشرفة كتير واللى تجعل اشد الكفار يسلم ... احنا كدا بنشوة صورة الاسلام سيدى الفاضل ... بنقولهم انتوا صح الاسلام اتنشر بحد السيف .. صح احنا قتالين قتلة .. ما تقلقش لو وقفت بين ايدين الرسول سوالك عملت ايه او دافعت عنى ازاى هيكون مبسوط اوى لو قولت له انا اتصرفت بعقل وحكمة وطبقت نهجك واهتدى على ايدى شخصين او شخص يهودى ... وهيحزن ويزعل اوى لو قولت له انا قتلت يهودى ... مواقف الرسول كتير اوى ... تذكر جاره اليهودى اللى كان بياذيه وهو خارج لصلاة الفجر ولما فى يوم ملقاش القمامة اللى كان بيرميها امام منزله راح زاره ... مش المفروض انه قدوتنا برضه ... عمرك شوفت موقف حصل على ايام الرسول والرسول قتل او دافع بالشتيمة والاستهزاء ... الراسول هيكون مبسوط بينا اوى لما نقابله ونقوله احنا حافظنا على الاسلام من بعدك بطريقة صحيحة الناس فهمته كويس .. مش شوهناه وقتلنا وسخرنا وشتمنا ... لان دى مكانتش اخلاق الرسول
تحياتى

همس الاحباب يقول...

قطتى الجميلة
شكرا ليكى طبعاانا معاكى اننا لو فكرنا كده انبقى ارهابيين وهمج
والرسول بينا او من غيرنا الله تكفل بنصره
تحياتى ليكى

لماضة يقول...

اممممم
كلام معقول برضه
بس اشك ا نهم هيتوقفوا
جميلة اجاباتك على التاج يا خالد على فكره
ومعلش انا مقصرة معاك انا عارفه

همس الاحباب يقول...

دكتورة لماضة
ولايهمك يا دكترة كلنا فداك وربنا يكون فى عونك اتلاقيها من البشر ولا القرود والحمد لله ان الاجابة عجبتك
بس بلاش النسيان والتقصير .
تحياتى

My Hope$ يقول...

اول زيارة
وموضوع جامد
بس هنعمل اية اذا تكلم السفية
يابني دول مش لاقين حاجة يعملوها
ورد افعالنا لازم يبقي هو الرسول علية الصلاة والسلام لوموجود كان هيعمل اية
ونتصرف علي اساسة
وبشكرك علي زيارتك ليا
وياريت تقولي
عملت اية
علشان تنسي
علشان اعمل زيك
مش انت بتقول مريت زي كدا
يلا وربنا يوفقنا جميعا
ان شاء الله الزيارت تتكرررررررر
سلام

همس الاحباب يقول...

انسة منى
تحياتى ومتشكر جدا على زيارتك وكلماتك الرقيقة وربنا يكفينا شر السفهاء من امة الحبيب المصطفى مع اطيب امنياتى بالصحة والعافية
تحياتى خالد

عبده الرايق يقول...

انا يهيىء لى شخصيا
ان الاوروبيين خلاص
اخدوا الموضوع ده لوى دراع
ومسئله شخصيه
وحريه رأى
وحرب اسلام
ومش هيتراجعوا ابدا

همس الاحباب يقول...

عبده الرايق
ازيك و حمدالله على السلامة يا رررررايق
مش لى دراع ولا حاجةبس موقفنا السلبى وتهور السفهاء منا
هو اللى عمل كده وربناينصر الاسلام ويعز المسلمين.
تحياتى ومنور يا رايق باشا

بت خيخة وأى كلام يقول...

بص بقى يا خالد
انا ليا رأى عن الموضوع ده
كنت رديت بيه على قارئ دائم ليا اسمه ابو خالد
كنت كتبت بوست اسمه طنط ام هانى
وابو خالد طلب منى انى اكتب بوست عن نصرة الرسول
هاعملك كوبى وبيست لردى علشان تعرف رأى

ابو خالد
انا اكتب بوست
عن نصرة الرسول؟؟؟؟؟؟؟؟
للاسف يا ابو خالد
انا ماقدرش اعمل ده
انا اقل بكتير انى اكتب بوست عن سيدنا محمد رسول الله صلى الله عليه وسلم
الحاجة التانية بقى انى اساسا مش مقتنعة ان سيدنا محمد رسول الله حد يقدر يهينه
واساسا ازاى نقتنع ان فيه حد يقدر يهين الرسول وعلينا ان احنا نكتب بوستات ونعمل مظاهرات لنصرة رسولنا الكريم
انا بالنسبالى سيدنا محمد ده حاجة كبيرة اوى وفوق اوى
محدش يقدر يطولها بشوية كلام لا هيودى ولا هيجيب
سيدنا محمد مش محتاج مننا ان احنا نكتب بوستات علشان ننصره
لانه اساسا محدش يقدر يهينه
فيه مثل بيقولك الكلاب تعوى والقافلة تسير
دول شوية كلاب بتهوهو
معقول انا انزل من مستوايا لمستوى شوية كلاب واهوهو معاهم علشان اوضحلهم وجهة نظرى
مايغوروا فى داهية
انا لو كتبت بوست عن سيدنا محمد
معنى كدة انى صدقت بجد ان سيدنا محمد اتهان
وعلشان كدة لازم ادافع عنه
وانا من جوايا مش مصدقة يبقى ليه التفت لكلامهم
من وجهة نظرى البسيطة جدا
ان سيدنا محمد اكبر بكتير من ان اى حد يقدر يهينه
واكبر بكتير ان واحدة خيخة تكتب عنه بوست
سيدنا محمد عليه الصلاة والسلام
هيفضل هو رسولنا الكريم
كلامنا عنه بالايجاب مش هيزوده
وكلام بعض المغرضين عنه بالسلب مش هينقصه
هيفضل دايما هو سيدنا محمد رسول الله وخاتم الانبياء
اسفة يا ابو خالد
اذا ماقدرتش البى طلبك
لكن لو مصمم ان حد يكتب بوست عن رسول الله فانا متهيالى ان فيه ناس احق منى بالشرف ده
عندك دكتور حر وابو العساقيل والباحث عن الحقيقة
والطائر الحزين
على ما اعتقد من معرفتى بمدونتهم
انهم قادرين على كتابة مثل هذا البوست
لكن انا ماقدرش
انا خيخة
تحياتى ليك


هو ده كان ردى عليه وهو ده راى فى موضوع الاساءة لرسولنا الكريم


سلام يا خالد
اختك خيخة

فرنسا هانم يقول...

اه صحيح
لو سألنا رسول الله نفس السؤال هيكون ردنا ايه ؟؟؟
يبقى كل واحد يبدء من نفسه ويعمل اللى عليه
لان كل منا لو انتظر الجماعه
سنعود الى المره الاولى من الرسوم
وستتكرر
مرارا وتكرارا

همس الاحباب يقول...

الاخت خيخة
طبعاانا سعيد جدا برايك وتشريفك لمدونتى المتواضعة ومتفق معاكى فى الراىء واناركزت على حاجة واحدة وهى ليه احنا متخاذلين وليه نسكت على الاساءة للاسلام ورسول الاسلام لازم يبقى فيه ايجابية فى الرد واناعارف انى اقل شانا من اناس كتير وده قولته فى البوست وده بوست فيه وجهة نظرى ودى تحتمل الخطا والصواب وانا مقتنع طبعا ان رسول الله اكبر من كل هذا واعظم .
تحياتى ليكى وسعيد برايك طبعا
اخوكى خالد

همس الاحباب يقول...

خالتى فرنسا
منورة الدنيا وحمدلله على السلامة
طبعا لازم كل واحد يبدا بنفسه وينصر الرسول باتباع سنته والتمسك بمبادىء الاسلام الصحيحة وناخذ منه القدوة الحسنة فى كل شىء لكى نعطى صورة ايجابية وصحيحة عن الاسلام .
تحياتى وسعيد جدا بزيارتك

حسن توفيق يقول...

اخى الفاضل
خالد
شرفت بمرورى على مدونتك الجميلة وزادت سعادتى عندما وجدت اسمى الفقير الى الله من بين مدوناتك التى تتواصل معها كل الشكر لك على هذه الثقة التى اعتز بها ويارب اكون عند حسن ظنك واهل لهذه الثقة
-------------------
اخى الفاضل تم اضافة اسمكم الكريم الى قائمة اعضاء اتحاد المدونيين المصريين واتمنى ان تزور لجنة العضوية وتكتب استمارة العضوية
شكرا لك وفى انتظارك

حسن توفيق يقول...

اخى الفاضل
خالد
شرفت بمرورى على مدونتك الجميلة وزادت سعادتى عندما وجدت اسمى الفقير الى الله من بين مدوناتك التى تتواصل معها كل الشكر لك على هذه الثقة التى اعتز بها ويارب اكون عند حسن ظنك واهل لهذه الثقة
-------------------
اخى الفاضل تم اضافة اسمكم الكريم الى قائمة اعضاء اتحاد المدونيين المصريين واتمنى ان تزور لجنة العضوية وتكتب استمارة العضوية
شكرا لك وفى انتظارك

بت خيخة وأى كلام يقول...

خالد
هو انت ليه لاغى التعليقات على البوست الجديد
يارت تظبط التعليقات علشان نعرف نكتب التعليق هناك
وبعدين انت مختفى ليه
سلام
خيخة

همس الاحباب يقول...

استاذ / حسن
نورت المدونة واهلاومرحبا بك
علم وجارى التنفيذ يا افندم
تحياتى خالد

همس الاحباب يقول...

اختى خيخة
منورة طبعا
مش لاغيها ولا حاجة
انا عملت تحديث ليها
وممكن تسيبى تعليقك انا فى انتظارك
اسف لانى كنت مشغول جدا خلال اليومين اللى فاتوا
تحياتى ليكى وسلامى لشريف