تهنئة ...

تهنئة قلبية

بمناسبة عيد ميلاد الاخت العزيزة حنين القلب

احلى 24 ساعة تمضى فى حياة الشخص

ودع عام ودخل عام جديد

وعلشان كده احب اقولها

اعذب تهنئة لاعذب احساس

يالى غلاوتك ما لها قياس

كل عام وانتى اسعد الناس

فى احلى يوم بالشهر

حبيت اسبق البشر

واهنىءاللى اجمل من القمر

واغلى من النظر

وابارك لها بيوم ميلاد العمر

واطلب من ربى يحفظها طول الدهر

واقولها كل عام وانتى منورة عالم التدوين

اااااااه نسيت اقولكم ده العيد الخمسين بعد المائة وعلشان كده جبت 50 شمعة

يلا التورته قدامكم بالهنا والشفا

فخور بانى ..

لست فخورا بانى مدون فقط ....

ولكن فخور لاننى كنت وسط كوكبة من المدونين الذين تجمعوا على قلب رجل واحد لاداء عمل خيرى ابتغاء مرضاة الله عز وجل ليس لفرقعة اعلامية ولا لمصلحة شخصية ولا لهوى نفسى زائل.

لذلك فخور بكم اخوانى واخواتى المدونين وفخور جدا بانكم استطعتم فى فترة وجيزة جدا ان تصلوا لمكانة سوف يحسدكم عليها الكثير والكثير .

كان لقاء رائع جدا ويوم جميل بما يحمل من معانى الحب والاخاء كان تجمع المدونين لزيارة مستشفى ابو الريش الجامعى يوم السبت 13-9 2008 يوم من الايام الجميلة فى حياة الكثير ممن حضر اللقاء .

بدا اللقاء بتجمع للمدونين امام المستشفى بدعوة كريمة من الاخت العزيزة قوى قوى داليا قوس قزح والرائعة جدا ابى هانم واللى بصراحة بذلوا مجهود جبار ومش ينفع انى اشكرهم عليه لان جزاءه عند الله سبحانه وتعالى وهو اكرم واعظم شكر وجزاء ، طبعا انا جيت ودخلت المستشفى وفوجئت بعدد هائل بسم الله ماشاء الله من المدونين وغير المدونين عدد فاق كل التوقعات والمفاجاة السارة جدا كثرة الوجوه الجديدة والمشاركة لاول مرة فى تجمعات المدونين وده شىء اسعدنا كثيرا واثلج صدورنا ان تغطية اللقاءات السابقة واظهار ايجابياتها شجعت الكثير من المشاركة والتفاعل الايجابى من قبل المدونين الجدد .

ومما اسعدنا كثيرا حضور عدد كبير جدا من محافظات كفر الشيخ وطنطا والشرقية وبورسعيد

تم توزيعنا مجموعات لزيارة بعض الاقسام والحالات الحرجة وتقديم المساعدات للاطفال ورسم بسمة على شفاهم

نعم الحالات صعبة والمناظر تدمى القلوب قبل العيون ولكن مجرد ان تشارك وتشعر الطفل بانك معه بدون سابق معرفة فهذا فى حد ذاته شىء نبيل وربما تنزع من نفوسهم المرارة والام المرض بابتسامتك والاطمئنان على صحته .

اليوم كان رائع فى تنظيمه ورائع فى الاقبال لدرجة ابهر المسئولين عن المستشفى والمرضى انفسهم وبادرنى احد المرافقين لنا من الادارة انا نفسى هاخد ايميلاتكم كلكم واشكركم واتواصل معكم بس بسم الله ما شاء الله العدد كبير جدا .

فابتسمت واجبته لا ولسه فى ناس جاية كتير شد حيلك انت بس .

الحمد لله الذى بنعمته تتم الصالحات انتهى التجمع داخل المستشفى وعادته دائما قام الصباغ باخد الصور التذكارية للمدونين والمدونات امام المستشفى .

وبعدها انتقلنا الى مكان الافطار الجماعى بوسط البلد عند حاتى ابو خالد .

وطبعا العدد كان غير متوقع على الاطلاق حيث فاق ال35 شخص وكان المكان رائع بصراحة والجو العام بين المدونين جميل جدا وبعدها انتقلنا الى كوفى فى وسط البلد صحيح احنا مشينا كتير وهضمنا الاكل بسرعة بس كانت تمشية جميلة فى شوارع المحروسة وكان لقاء اكثر من رائع مع كوكبة جميلة جدا جدا من المدونين واللى اذكر جانب من الحضور لو اسعفتنى الذاكرة ولو نسيت احد فله منى الاعتذار والحب والتقدير .

نبدا بام العروسة وخالتها داليا قوس قزح وابى هانم بجد فخور بكم

- مجموعة بور سعيد الرائعة والتى الفناها دائما فى كل لقاء للخير

بابا ابو خالد - ايناس نهر الحب واختها نسمه - دكتورة جنة ربنا يطمن عليكى وتروحى وترجعى بالسلامة .

وجوه الفت لقائها دائما : احمد الصباغ - احمد سوووو - احمد سكر - محمد مدحت - عسقول - احمد الباحث عن الحقيقة - رودى بنوته مصرية - ميرا امراة بعقل رجل - محمد فاروق قلب مصرى - احمد كمال رحايا العمر - دعاء مواجهات - مفقوعة مرراتها سوسو واخواتها سلوى وسالى وسماح - سومه مجنونه فى بلد عاقل - سارة وبلاعة الحكومة - محمد حسام - عبدالرحمن فارس - محمد الشاعر -محمد محمود يوسف -الاستاذ شريف - الرقيقة شيماء سمير - ايما ام البنين

وجوه جديدة سعدت بمعرفتها وبمقابلتها جدا :

محمد وقلب ابيض اللى سعدت بمقابلته جدا وشكرا على التوصيلة يا باشا .

نونا ومدونة المهاجر سعيد جدا بمعرفة حضرتك بجد نورتينا واسعدنا تواجدك معنا

همس : مصرية متغاظة اند مفروسة مش عارف متغاظة من ايه ومفروسة من ايه مع انك تفرسى بلد بس بجد نورتى القاهرة وكفر الشيخ برجوعك .

عبدالرحمن مواطن صيدلى مطحون اللى جه من الشرقية مخصوص ربنا يكرمه

صباح الصباح لسه فيه تعارف

احمد شاهين احنا اتصورنا مع بعض

طارق كوارث : ربنا يستر من كوارثه بس شخصية جميلة قوى

طبعا فيه ناس كتير مش ذكرتها لانه لم يسعدنى الحظ بالتعرف عليهم والزهايمر اشتغل وتاثير الصيام طبعا بس برده لسه الفرصة قائمة للتعارف .

الغائب الحاضر فى قلوبنا دائما فاتيما روح قلب ماما بقولها على لسان بعض المدونين احنا بنفرح لفرحك ونزعل لزعلك وانا اضيف كمان بصراحة بوجودك بتدى طعم ولون لينا وبتملى الجو بهجة وحنان ربنا يطمنا عليكى ويقرب البعيد .

حنين القلب اللى كانت معانا بقلبها وبصوتها عبر الاثير قصدى عبر التليفون .

بت خيخة كنا مفتقدينك بصراحة .

كل سنة وانتم طيبين

وفى الخير مجتمعين

تغطيات اخرى للقاء :

زرنا المستشفى لاحمد الصباغ

من اجمل الايام قوس قزح

شكرعميق من القلب احمد سكر

واجب شكر ابى هانم

حزب بلامقر ايناس نهر الحب

اللهم تقبل منا رمضان

تحديث هام جدا

خيرو فطار

عايزين الكل يشارك معانا يوم السبت 13-9-2008 الساعة 3 عصرا أمام مستشفى ابو الريش

لمزيد من التفاصيل هنا

=========================
رمضـان كريم

كل عــام وانتم بخير

رمضان على الابواب .... كل عام وانتم بخير

بسم الله الرحمن الرحيم

كل سنة وانتم بخير وبصحة وسعادة

طبعا كلنا فى انتظار ضيف عزيز على قلوبنا جميعا ضيف بننتظره مرة فى العام وعلشان كده هو عزيز وغالى قوى على قلوبنا بس السنة دى مختلف شوية عن كل عام حاسس باحساس مختلف انى وسط احبابى واصحابى فى عالم التدوين علشان كده ليه طعم مختلف شوية بالنسبة ليه وعلشان كده باقولكم كل سنة وانتم بخير واشهد الله انى احبكم فى الله جميعا ..

الفترة اللى فاتت كانت فترة مليئة بالاحداث العالمية والمحلية منذ لقاء اسكندرية مرورا ببؤجة الخير ثم اخيرا حفل توقيع العدد الثانى من مدونات مصرية للجيب ( مصر فى قطعة جاتوه).

طبعا شرفت بلقاء عدد كبير جدا من المدونين والمدونات خلال تلك اللقاءات مما زادنى سعادة وسرور بمعرفة اناس واشخاص اقل ما يوصفوا به انهم اناس رائعون واصحاب قلوب نقية شفافة ونظرا لانشغالى خلال الفترة الماضية والفترة القادمة كمان اسف لعدم متابعة كل المدونات اللى انا بحبها.

وخلال شهر رمضان ابقى متواجد احيانا لمتابعة الاحداث وادارة شئون وغالبا اتبقى فيه بوستات دينية خلال الشهر الكريم .

طبعا ناوى اسافر الصعيد اقعد كام يوم كده ليه زمان ما حضرتش رمضان فى الصعيد من عشرميت سنة كده

اهو فرصة نشوف الدنيا هناك وصلت لفين ومنها نغير جو القاهرة اللى اصبح يخنق ونشوف الاهل واصدقاء الدراسة

ياااااااااه بجد وحشتنى ايام الدراسة قوى ووحشنى النيل والجامعة فى سوهاج وحشتنى الخضرة والشجر والزرع

يلا كانت اياااااام الله يرحمها بقى .

المهم شدوا حيلكم فى رمضااااااااان عايزين حسنات كتير كفاية سيئات طول السنة وبلاش فوازير ومسلسلات وبلاش كنافة وقطايف علشان خاطر وزنكم والله بحس ان الشعب المصرى صايم طول السنة ومش بيفطر غير فى رمضان

وبمناسبة حلول شهر رمضان المعظم اقولكم على اجمل رسايل وصلتنى على الموبيل :

" ابليس بيهنيك بحلول رمضان وبيقولك شهر وراجع لك يا جميل "

" يقولون فى شهر رمضان تفتح ابواب الجنة وتغلق ابواب النار وتقيد الشياطين .. والله هتوحشنا "

" غدا اول ايام رمضان وتم اعلان ذلك فى الصعيد حيث شوهد الهلال على سيارة اسعاف "

اما انا عايز اقولكم " زهر وورد وريحان قطفته من حديقة الرحمن هدية لاعز الناس بحلول شهر رمضان"

كل سنة وانتم بخير

رمضان كريم