26 نوفمبر 2010

بؤجة الخيرالشتوية+ تحديث

 كل سنة وانتم بخير وعيد سعيد عليكم جميعا 
 بمشيئة الله تعالى تقرر تحديد ميعاد بؤجة الخير الشتوية
الميعاد : الجمعة الموافق 10 ديسمبر 2010 
المكان : جمعية صحبة خير بمسجد زهراء مصر القديمة 
الزمان : من العاشرة والنصف صباحا امام  مقر الجمعية الكائن 20 شارع احمد خيرى فوق كافتيريا السرايا بعد محطة مترو الزهراء بحوالى 100 متر تقريبا 
دى خريطة لمحطة مترو الزهراء و لونها بالازرق اما اللون الاحمر فهو لمكان المسجد وده اسهل للناس اللى هتستخدم المترو

فى حالة اى استفسار او حد تاه عن المكان  ممكن يتصل على الرقم ده 

0101345140
وبعد الانتهاء من تسليم البؤج وصلاة الجمعة فى أقرب مسجد سنتوجه الى مكان قريب لتناول الغذاء وغالبا هيكون فى منطقة السيدة زينب او نادى المحامين .
وفكرة البؤجة تتلخص فى الاتى 
- بما انكم طالعين من العيد واكل الفتة واللحمة عمل عمايله معاكم فبساطة كده انت وبتبدل الملابس الصيفى بالملابس الشتوى تشوف ايه اللى انت مش محتاجه منها يكون ضاق عليك او خلاص زهقت منه او موضته خلاص فات اوانها او ربنا كرمك وعامل دايت وتجمع الحاجات دى مع اى حاجة تكون مش عايزها فى بيتك ملايات - فوط - احذية - ادوات منزلية - اى حاجة انت مستغنى عنها و نروح كلنا لعشوائيات اسطبل عنتروعزبة خيرالله ونديها للناس هناك فى جمعية صحبة خير وهم بيخدوها و بيعملوا بها معرض للاسر الفقيرة و تتباع لهم الحاجات باسعار رمزية و المبلغ اللى يتجمع من المعرض بتستغله الجمعية فى عمل خيرى تانى و ده علشان الناس اللى هتتباع لهم الحاجة تحس انها اشترتها بفلوسها وانها مش متسولة.
يا ريت واحنا بنقرا البوست نفتكر انه فى الوقت اللى عندنا فيه حاجات كتير قوى مش بنحتاجها  وبنقول لنفسنا خليها مركونة يمكن نحتاج لها تاكد ان ربنا سبحانه وتعالى هيعوضك خير منها فى الدنيا والاخرة .
وكمان تخيل برد الشتاء القارص وتخيل ولو لثوان انك مكان الشخص الفقير او إن ابنك اواخوك فى مثل هذا الموقف فماذا تفعل من اجلهم ؟؟؟!!!
والتبرع ممكن يكون بأى شىء عينى او مادى او حتى معنوى بوجودكم ومشاركتكم وتشجيعكم للاخرين .
ياريت كل مدون يقدر ينزل بوست عن الموضوع يبقى جزاه الله خيراعلشان نبلغ اكبر عدد ممكن .
والدال على الخير كفاعله 
جزاكم الله خيرا 
*************
تحديث 
***********
http://www.1st-art-gallery.com/thumbnail/106006/1/Charity-Or-The-Indigent-Family$27,-1865.jpg
سقعانه يا ناس دفونى
بالحضن الدافى غيتونى

وهوكله على الرحمن
عملك عنده يا انسان
استرنى بالفستان
ارفع عنى الحرمان
ف قلوبكم الواسعه خدونى
استرو جسمى ودفو عيونى
الصورة والكلمات منقولة من عند مارو هانم قلب القطة

*************
ان شاء الله بعد تسليم البؤج هنتوجه الى منطقة الحسين 
لتناول الغذاء والمشروبات وقضاء وقت ممتع ان شاء الله 
وده بناء على رغبة بعض الاخوة والاخوات من المدونين

هناك 48 تعليقًا:

فاتيما يقول...

انا معاك يا خاااالد
انتا عارف ان اختك معاك دايما
لأن معاك
مفيش غير الخير

ان شاء الله
قبلها بوقت كافى
اكتب بوست
اعزم الحبايب

عقبال كل صيف
كل شتا

سلامى لشابى وهمس ومامتهم
وليكم قبلهم

لــــ زهــــــراء ــــولا يقول...

ربنا يعينك على فعل الخير وربنا يجازيك كل خير وسعادة في الدارين اللهم امين
لولا

بنت الصالحين يقول...

جزاكم الله خيرا

سيتم نشر التدوينة إن شاء الله

أنا - الريس يقول...

حديث أبي هريرة أن النبي صلى الله عليه و سلم قال: ما من يوم يصبح العباد فيه إلا ملكان ينزلان فيقول أحدهما اللهم أعط منفقا خلفا ويقول الآخر اللهم أعط ممسكا تلفا "
صدق المصطفي

ربنا يجعل كل من يشترك في الحملة تغفر له ذنوبه وإن كانت كبائر ويرفع بها في عليين ويرضي عنه الرحمن الرحيم

غير معرف يقول...

جزاك الله كل الخير يا خالد
ربنا يجعله فى ميزان حسنات
هحاول اجى ان شاء الله
يارب
ييسر الامور

Unknown يقول...

على فكرة انا مش مقتنعه بالبؤجة
الا يعنى اية بؤجة ؟؟؟؟

Unknown يقول...

طب اقولك
تدفع كام وانا اجى
اتجننت صح ههههههههههههه
كل سنة وانت يارب طيب انت والاسرة وكل الناس الجميلة اللى بتعمل خير يارب
وان شاء الله ربنا يوفقكم ويجزيكم خير ويجعله فى موازين اعمالكم الحسنة يارب

richardCatheart يقول...

صباح الفل على خالد الجدع

علم وسيتم النشر يا فننننننننننننننننننننننندم

كــركــبــة دمـــاغ ㋡ يقول...

برضه يوم جمعه !!!

انا حظي وحش برضه المرة دي
:(:(

يلا انتو الخير والبركه اكيد

ربنا يكرمكم ياااااااارب ويجازيكم بكل الخير في الدنيا وفي الاخرة
ويجعله في ميزان حسناتكم جميعاً يااااااااااااارب

متضامنه بقلبي معاكم

richardCatheart يقول...

انت بستاذن ليه ياعم خالد مانت عارف انه بيتك تدخل تاخد الكنبه الكرسى براحتك ياعم

وليا الشرف والله بس ياريت مافيش داعى لكتابه اسماء مالهاش لازمه

ربنا يسترك انت وكل اللى زيك

كلمات من نور يقول...

جزاكم الله خيرا و كتر من أمثالكم

أسير الجراح يقول...

السلام عليكم

جزاك الله كل خير

وربنا يبارك فيك وفى امثالك

ربنا يجزيك كل خير يارب

IMSA يقول...

جزاك الله خيرا يا خالد ..
بإذن الله هحاول التواجد معكم بإذن الله ، هذه أول مرة لي مع المدونين
لهذا ادعو الله ان اكون معكم واتمنى أن يوفقني في هذا ..
//
جزاك الله خيرا مرة اخرى على فعل الخير ..
//
تحياتي لك وتقبل مروري ..

gogo!sf يقول...

جزاك الله كل خير يا خالد

وربنا يجعله فى ميزان حسناتك اللهم امين

جوجو

Ramy يقول...

أن شاء الله جى

بس أدعيلى بس ربنا يسهل الدنيا

و اقدر أجى

ربنا يبارك لك فى أولادك يا أستاذ خالد

اسماء عبدالعزيز يقول...

جزاك الله خيرا
وعطاك ما تتمنى
واصلح مابين يديك
دمت بخير

sony2000 يقول...

وانا معاااااااكو بأذن الله

همس الاحباب يقول...

فاتيما
دايما معانا فى كل خير يا ام يوسف
اول الحاضرين والمشاركين دوما
ربنا يحفظك ويسلمك
تحياتى

همس الاحباب يقول...

لولا وزهراء
ولكى مثل دعائك
جزاكى الله خيرا
تحياتى

همس الاحباب يقول...

عاشقة الفردوس
ربنا يجعله فى ميزان حسناتك
شكرا لحضرتك على مشاركتك الفعالة دوما
تحياتى

همس الاحباب يقول...

mr.president
اللهم اميين
جزاك الله خيرا وشكرا على تواصلك ودعوتك الطيبة
تحياتى

همس الاحباب يقول...

الحب الجميل
وميزان حضرتك
تنورينا طبعا
وربنا ييسر ان شاء الله
ونشوفك على خير
تحياتى

همس الاحباب يقول...

نهر الحب
هههههههه
ولا انا بصراحة
بس هنيجىء برضه

همس الاحباب يقول...

نهر الحب
ادفع كمان
مش كفاية هنشوفكم ههههههههه
وانتى طيبة وبصحة وسعادة وكل اسرتك وشعب بور سعيد بخير
وان شاء الله تنورونا كعادتكم دوما
تحياتى

همس الاحباب يقول...

قلب القطة
مارو هانم
جزاكى الله خيرا
وجعله فى ميزان حسناتك
تحياتى

همس الاحباب يقول...

كركبة دماغ
حاولى تيجىء واعتبريه انه يوم عادى من ايام الاسبوع
جزاكى الله خيرا وان شاء الله تشاركينا فى المرات القادمة
تحياتى

همس الاحباب يقول...

مارو هانم
بصراحة انا منشن على النيش باللى فيه
الكراسى والكنب كتير ههههه
ربنا يجعله فى ميزان حسناتك
وشكرا على كرم حضرتك وعلى تلك الكلمات تسلم الايادى يا باشا
تحياتى

همس الاحباب يقول...

كلمات من نور
جزاكى الله خيرا
وشكرا لتواصلك الدائم
تحياتى

همس الاحباب يقول...

اسير الجراح
تسلم يا حماده
ربنا يعزك ويجعل كلماتك فى ميزان حسناتك
تحياتى

همس الاحباب يقول...

imsa
تنورنا يا باشا واحنا فى انتظار حضرتك
ربنا يوفقك وتشاركنا اليوم باذن الله
جزاك الله خيرا
تحياتى

همس الاحباب يقول...

جوجو هانم
ربنا يكرمك ويجازيكى خيرا
يلا شدى حيلك هاتى الاستاذ نادر والاولاد وشرفونا
تحياتى

همس الاحباب يقول...

رامى
لا انت لازمن تيجى طبعا
ربنا ييسر الامور بس احنا فى انتظارك يا باشا
ربنا معاك
تحياتى

همس الاحباب يقول...

اسماء عبدالعزيز
اللهم اميين
جزاكى الله خيرا
وشكرا على دعوتك الطيبة
تحياتى لحضرتك

همس الاحباب يقول...

سونى 2000
ما بلاش يا معلم خبطتين فى الراس توجع
ههههههه
تنورنا يا باشا طبعا
فى انتظارك ان شاء الله
تحياتى

ghada mOhsen يقول...

بحب صحبتكم أوي أوي بجد

أنا هاحاول أجمع شلة الخير ونيجي

ربنا يجازيكم كل خير ياااااارب

^_^

Lady E يقول...

ان شاء الله في ميزان حسناتكم

بجد نفسي اشارك معاكم جدا بس انا في قارة تانيه وحتى لو انا في نفس القارة بعيد برضه :)

ان شاء الله هكتب عن الموضوع عندي

صباح الورد

أبو خالد يقول...

كل عام أنت بخير يا أطيب قلب و جعل الله أعمالك الخيرية أثقل من جبل أحد يوم العرض عليه اللهم آمين و ارجو الله أن يوفقني لحضور هذا اللقاء الجميل

همسات وبحــ الحياه ــر يقول...

كل عام وانتم الي الله اقرب هذا عام جديد وعلى عملك شهيد فبادر بالسعى والتجديد .......اللهم اجعله عاااام يعز فيه الاسلام والمسلمييييييين ......ولا تنسوا احب الصيام الي الله بعد رمضان صيام شهر محرم ولا تنسونا من صالح دعائكم اللهم احسن خاتمنتنا

بعتذر عن تقصيرى معاكم

طهر فؤادك يقول...

السلام عليكم ورحمة الله وبركاتة

ربنا يكرمك يارب والمسلمين

وربنا يتقبل منك ومنا والمسلمين صالح الاعمال

وحشتنا ياخالد باشا جداا وربنا يكرمك يارب ويتقبل منك ... ونفسى ابقى معااكوا بس ظروف السفر خارج مصر وربنا يكرمكوا لفعل الخير دايما اللهم امين

غير معرف يقول...

يعنى يااستاذ خالد الطريق ازاى
انا من الشرقيه ومش عارفه الطريق

همسات وبحر الحياه

همس الاحباب يقول...

غادة محسن
تنورينا انتى والشلة ان شاء الله
وربنا يجعله فى ميزان حسناتكم
وفى انتظاركم ان شاء الله
تحياتى

همس الاحباب يقول...

lady e
ربنا يرجعك بالسلامة وان شاء الله تشاركينا فى المرات القادمة وانتى سبتى دمياط ورحتى فين
دعواتك معانا
تحياتى

همس الاحباب يقول...

ابو خالد
والدى العزيز
جزاك الله خيرا واسف جدا لتقصيرى مع حضرتك
وان شاء الله تكون اول الحاضرين باذن الله
وجودك له طعم خاص
تحياتى

همس الاحباب يقول...

همسات وبحر الحياة
كل سنة وانتى طيبة
ربنا يتقبل منا ومنكم صالح الاعمال
تحياتى

همس الاحباب يقول...

طهر فؤادك
باشا والله انت كمان ليك وحشة كبيرة
وربنا يردك لينا سالم غانم باذن الله
وان شاء تشاركينا فى المرات القادمة
جزاك الله خيرا على دعواتك الطيبة
تحياتى وتقديرى

همس الاحباب يقول...

غير معرف
بص يا باشا انتى تركبى من الشرقية لحدميدان رمسيس
او موقف عبود وبعدها تسألى على محطة مترو رمسيس وتركبى المترو اتجاه حلوان وتنزلى محطة الزهراء ودى بعد محطة مار جرجس وقبل محطة دار السلام هتلاقى الجمعيةبعد حوالى 100 متر من المحطة فوق كافتيريا السرايا ويا ريت تخلى معاكى رقم موبيل بتاع اى واحد من الموجودين لسهولة الوصول باذن الله
http://ar.wikipedia.org/wiki/%D9%85%D9%84%D9%81:Cairo-Metro-Stations-ar.png

ahmed_k يقول...

غن شاء الله يكون يومكم جميل وفيه من الفائده الكثير
تقبل الله منك يا خالد ومن كل القائمين على العمل الكبير هذا

حياتى نغم يقول...

السلام عليكم ورحمة الله وبركاته

أعانكم الله على فعل الخير ودمتم طيبين .