27 مايو، 2010

تفاصيل لقاء اسكندرية+ تحديث

تحديث 
***********
بالنسبة لمدونى القاهرة المسافرين يوم السبت 29-5-2010
ان شاء الله هنتجمع فى ميدان رمسيس امام عمارة رمسيس امام محل العصير اللى فى الميدان الساعة 7 صباحا وهنتحرك فى السابعة والنصف وهنستقل ميكروباص الى اسكندرية اللى عايز يسافر معانا فى انتظاره لحد 7.30 هيكون موجود ان شاء الله ضياء وفاتيما وريم ومصطفى ريان وفيه ناس هتركب متاخر وهتيجى على مكان التجمع فى اسكندرية 
بصفة عامة مكان التجمع هيكون فى بحرى عند قلعة قايتباى المكان معروف للجميع 
ولاى استفسار فيه رقم موبيل اخر البوست 
ان شاء الله نشوفكم جميعا على خير 
************************************
 
بناء على طلب الجماهير المطحونة وتلبية لمطالب الطبقة الكادحة من مدونى ومدونات مصر المحروسة اليكم  تفاصيل لقاء اسكندرية 
الميعاد : السبت الموافق 29 مايو 2010 
المكان : اسكندرية المارية 
الزمان : من العاشرة صباحا 
مكان التجمع : عند باب قلعة قايتباى بمنطقة بحرى بالاسكندرية 
التجمع بالنسبة لاهل اسكندرية وجميع القادمين من خارجها هيكون عند باب القلعة من العاشرة صباحا وحتى الحادية عشرة بعدها رحلة  قصيرة داخل القلعة ومشاهدة الامواج وصراعها مع الصخور من فوق القلعة بعدها ممكن نتأجر مركب و وناخد بيها بلطة فى البحر بعدها هنحس بدوار البحر وعصافير البطن بتنهق وتلبيه لتلك العصافير الجائعة هنروح على  مطعم الزعيم ببحرى لتناول الغذاء او اى مطعم اخر وبعدها ايس كريم من جيلاتى  عزة او من عند الشيخ وفيق بعدها يوم مفتوح على شاطى الانفوشى امام الشيخ وفيق حيث الرمال والمياه والامواج  .

من الاخر كده اليوم ترفيهى وكل اللى فى نفسه فى حاجة يعملها اللى عنده موهبة اللعب فى الطين  يعمل بيوت من الرمال والى عنده موهبة الشحاتة والتسول المتاخر هنسيبه قدام  القلعة يقلب عيشه واللى عنده موهبة العوم والغطس هناخد معانا طشت بزعانف للغطس 
واللى عنده رغى او حرمان من حنان الام  معانا فاتيما هانم خير من يقوم بذلك  يعنى مش هنحرمكوا من حاجة ابدا 
اضافة الى انكم هتشوفوا عمر باشا ومامته وخالتو دودو واخر جيل المدونات  مارو هانم قلب القطة وكل مدونى اسكندرية والقاهرة والاقاليم .
وطبعا لو كل ده اعتذر ولا يهمكوا كفاية انكم هتشوفونى وده فى حد ذاته لقاء ولا فى الاحلام ( التواضع مطلوب طبعا ) 
بالنسبة لمدونى القاهرة هناك عدة احتمالات للسفر 
الاحتمال الاول:اننا نأجر اتوبيس رحلات ذهاب وعودة وتنقلات داخل اسكندرية وهيكون التجمع السادسة صباحا فى رمسيس  وده فى حالة ان عدد المسافرين هيزيد عن 15 شخص يعنى اللى ناوى يسافر يا ريت يبلغنا قبلها بفترة .
الاحتمال الثانى اننا نتجمع فى السادسة صباحا ونركب ميكروباص من رمسيس وننزل محطة مصر وده فى حالة انكم عايزين نسافر مع بعض مجموعة .
الاحتمال الاخير : اننا نسافر كالمعتاد فى السوبر الجيت من موقف عبدالمنعم رياض ونركب الساعة السادسة صباحا.
فى انتظار مقترحاتكم بالنسبة لبرنامج اليوم
ولمدونى القاهرة فى انتظار اختيار طريقة السفر وسوف نوافيكم بكافة  تفاصيل السفر قبل السفر ب72 ساعة على الاقل 
يلا علشان تعرفوا انكم تعيشون فى ازهى عصور الديمقراطية 
اى خدمة انتم تقشروا واحنا ناكل 
لاى استفسار يمنكم الاتصال 
0101345140

هناك 71 تعليقًا:

حنين القلب يقول...

هيييييييييييه
واخيرا زست
اخيرا هنشوفكم فى اسكندرية
انا بحلم باللقاء من زمااان
طبعا انا اول تعليق

richardCatheart يقول...

هياه هياه هياه

الناس الحلو جايه هياه هياه

والله انا قمه فى السعاده ان شاء الله يوم طيب

وهانشوفو تيما وحبيبنا الحلوه

يارب يجعله يوم جميل مليان حب وخير ان شاء الله

richardCatheart يقول...

على فكره يا خالد الجاتوه والحاجه السقعه

بتوع الافتتاح عندى شيلهملك منابك ههههههههههه عيب انت تستاهل والله الحلو كله يا جدع ايييييييييييييييو

فاتيما يقول...

أخيراااااااااا

البوست بتفاصيله نزلت خلاص
طب الحمدلله

و ايه حكاية الحرمان دى ؟؟

انتوا هتاخدونا تقلبونا عاتشيفيا ف السفرية دى و لا إييييه؟!!

ربنا يستر

هيستر ان شاء الله
و يكون يوم جميل زى الناس اللى احنا رايحينلهم و زى اجمل بلد ف الدنيا تمام

و ايه نوظام السفر من الكاعرة دا
الحاجة الوحيدة اللى استوعبتها ان ف كل الأحوال هتخرجونا من بيتنا الفجرية يا حااااج ..و هنتخوطف بقى شكلنا ؟؟

لأ متقلقش
الواد ماجد هيوصلنى بقى و امره الى الله ... اومال اخ أونطة مثلاااا

و يسلمك العهدة زى كل مرة
منحرمشى منك ابدا يا أبو ببش

بص المواصلة اللى تقول عليها انا معاك يا أخى العزيز ..انتا عارف يعنى منقدرش نفتح بوقنا يا جناب الكومندااااا

و بورنامج الرحلة برضو انا موافقة
بس اتقعدوناااش ف السمس كتير عشان بشرتى و التصوير انتا عارفة معروض عليا ييجى خمسين فيلم و الراكور هيبوظ و اخد تان و دا مش كيويس ع الأفيش

قوس قزح وش الخير
مش هينفع تيجى للأسف عشان امتحانات نور و بتتمنلنا زيارة سعيدة

و ريم جاية ان شاء الله اعمل حسابها تانى إسم بعد إسمى علطول إن شاء الله

يلا بقينا تلاتة اهو
1- خالد
2- reem
3- ام يوسف


يلا شوف مين تانى جااااى

هعمل لينك من عندى لعندك عشان يكون البوست بتاعك هوه القول الفصل


لما افتكر حاجة تانى هاجى اقولك

انما مبدئيا
انا معاااااك يا ريس
ممكن اوجه كلمة للجمنهور الحبيب الله يخليك بمناسبة اننا واقفين ع الئمة
يعنى الناصية بالإسكنكرانى
طيييييييييب



يا حنين القلب
-----------
انا كمان يا حبيبتى نفسى اشوفك و ابوس عمر .زو متوصية من ناس بتحبه ف مصر ابعت امانة و ان شاء الله اديهاله او ل ما اوصل

بوسيلى نفسك و عمر و دودووووووووو
لحد ما اجيلكم



richardCatheart
----------------

يا قلب القطة
انا كمان يا حبيبتى عاوزة نشوفكو و نقعدو معاكى ..
يا لهوووووووووى لما بتقلبوها اسنكدرانى
بموت ف اللغوة دى

هتوحشينى لحد ما اشوفك يا قطقوطتى

سلام مؤكتا

عاشقه الرومانسيه يقول...

تعليق اسكندرانى جدااااا

احنا موافقين جدا على برنامج اللقاء ياخالد
وسبحان الله انت قلت كل اللى عايزين نقولوه
بس ضيف على البرنامج الجامد ده مفاجئات من دودو ربنا يسهل وتكون مفاجئات سعيده

انا فرحانه من دلوقتى انى هاشوفكم ياخالد

ان شاء الله يكون يوم مميز زى ما بنتمنى

تيجوا لنا بالسلامه
(:

عاشقه الرومانسيه يقول...

فاتيمااااااااا


الساعه 6 دى مش فجر يابطه النهار بيكون طلع ياام يوسف
بطلى كسل ماانا باروح شغلى كل اليوم فى الوقت ده
وموضوع الشمس هناخده فى الاعتبار ياحبيبتى ولا يهمك
انتى تأمرى بس
احنا نقدر نضيع فرصتك السينمائيه برضه؟؟؟؟!!!



كان نفسى داليا تكون موجوده وستوته كماااان مش هتيجى بسبب الامتحانات
:(



ان شاء الله يكون يوم جميل يابطه بوجودك فيه

حنين القلب يقول...

خالد نسيت اقولك
ان الناقص فى البوست بتاعك كلمه

يسعدنا خدمه التوصيل للمنازل

حسستنى انك من اللى بيجوا فى التليفزيون بين المسلسلات اللى بيبيعوا البطاطين ومفارش السرير دول عارفهم

كان فاضل شويه وتقول موسى نبى وعيس نبى ومحمد نبى وكل من له نبى يصلى عليه معايا 10 توك بجنيه معايا 10 بنس شهر بجنيه
يلا يا هانم يلا يا بيه

ههههههههههههههههههههههههههههه

حنين القلب يقول...

خالد
نصيحه منى ليك
لو خايف على عمرك بلاش تيجى
انا اللى قولت على موضوع المركب وانت مش عارف ايه فى ضميرى
وانت قصييييييييييير يعنى لو غطست مش هتقب

ماااااااااااااااشى

حنين القلب يقول...

فاتيما

يا حبيبتى انا والله اللى فرحانه زى ما يكون يوم عيد علشان هشوفك باذن الله

اختى والنبى الا ايه الراكور اللى هيبوظ ده
يا ستى لو بيحمض نحطه فى التلاجه ولا يهمك

وبعدين ماجد هيوصلك علشان الساعه 6 منا بقالى 12 سنه بنزل من بيتى الساعه 6 عمر ما حد فكر حتى يخطفنى
لا بس عند حق انت القمر واحنا النجوم يا باشا
وحشتينى وبحبك موووووووووت

حنين القلب يقول...

ريتشارد قلب القطه

يا مارو انا حنين صحيح انا ودودو واحد بس انا برضه حنين
علشان انتى معلقه عندى على انى دودو
ههههههههههههههههههههه
المهم
انا مبسوطه انى هشوفك جدااااااااااا

حنين القلب يقول...

عاشقه الرومانسيه

ايووووووووووووووووووه يا جدعان على الغوه الاسكندرانى

بصى يا دودو
احنا موافقين على البرنامج برضه
ويا رب يكون يوم حلو

حنين القلب يقول...

همس الاحباب

خالود
انا رديت على التعليقات بالنيابه عنك
ايك يتمر بس
اهه ريحتك
وبمناسبه البوست ده بطلب اغنيه
من بحرى وبنحبوه على الئمه بنستنوه
شبك الجملات وشابكنى وازاى نقدرو ننسوه
من بحرى وبنحبووووووووووه

ايوووووووووووه ايوووووووووووووووه

ههههههههههههههههههههههههههههههه

شذا الروح يقول...

السلام عليكم

يارب دايمآ متجمعين بالخير
ورحلة عطاء بلا حدود

ربنا يكرمكم يارب

مودتى

ahmed_k يقول...

يا خالد إنتخابات الشورى يوم 1/6
يعني دايما مواعيدك بتكون مناسبه بصراحه
ربنا يستر وأعرف ازوغ منهم

سلام يا أبو همس

ندى الياسمين يقول...

انا هاموت اجي يا جدعان

بس انى لي ذلك

عموما لو جيت يبقى هيه هيه

ولو ما جيتش ربنا يسعدكمممممممم وانا باجز على سناااااااني

اسكندراني اوي يقول...

يعني كده بجد يوم حيبقى حلو اوي برضه
بس يوم مصيفيين مش يوم اسكندرانيه
ههههههههههههههههههههههههههههههه
حتنورولنا المنطقه يا شباب والله

وزي كل مره حقول كان نفسي ابقى معاكم
لكن بقى نقول قدر الله وماشاء فعل
تحياتي للجميع ووقت سعيد ان شاء الله

richardCatheart يقول...

هههههههههههههههه معلش يا حنين
انا روحت عندك وكتبت تعليق تانى

العنب على الجزر والله كنت فكراهم بيقولك دودو هههههههههههههه

بس ان شاء الله هانتقابل ونعرف وهايكون يوم طيب باذن الله


فاتيما الجميل اييييييييييييييوه
عليكى اخيرا ياام يوسف داحنا هنلكو لك
حلو الاسكندرانى بتاعك شكلك هاتخدى الجنسيه قريب هههههههههه

ميرا ( وومن ) يقول...

هو ممكن أسأل سؤال استفساري ؟؟؟

هو يوم 29 دة أجازة ولا حاجة يعني لو أجازة أوك انا اول حد معاكم

بس لو مش اجازة اقدر اسأل هو يوم الجمعه كان إية مشكلتة ؟؟؟

يعني انا مش باخد اجازة السبت ولا ينفع اصلا اخد اجازة علشان لسة جديدة ومليش اجازات

غير اني اخدت 5 أيام مرضي يعني مفيش التزام احسن من كدة بصراحة

أذهبوا تصحبكم السلامة وسيبوني هنا أحقد عليكم براحتي

marmar يقول...

عجبتني اوي الحته اللي بتقول فيها اللي عنده موهبه التسول والشحاته دي هههههههههههههههههههههههه

طب بالنسبه للعايشه برا مصر تعمل ايه
مينفعش تيجي وتحضر اللقاء طيب وتشوفكم
>>>>بدأت موهبه الشحاته


المهم تتبسطوو وتفرحو في اليوم ده
والاهم
بعد اللقاء تقولونا اللي حصل بالصور ليكم كلكممممممممممممممممممم عشان احس بجد اني كنت معاكم

غير معرف يقول...

خالد

بقي بزمتك يهون عليك تروح اسكندريه وتتفسح لوحدك وكمااااااااان راييحين القلعه دنا نفسي اوي اروح القلعه

خالد انا بنقُ عليكم كلكم وبحقد كمان


وزة

غير معرف يقول...

خالد


هو انا قلتلك ازيك ووحشتني وكدا

احسن اكون نسيت ولا حاجه

Diyaa' يقول...

ربنا يقدرني وأكون موجود
بس أثناء ما إنتم هتكونوا في البحر غالباً هبيعكم وأروح مكتبة إسكندرية :)

والميكروباص هو الحل زي ما كتبتلك في الفيس بوء يا أستاذنا :)

mostafa rayan يقول...

خالد باشا
ان شاء الله اكون معاكو وانا رايي نروح بأتوبيس يكون معانا طول اليوم
وشايف لو نخلى المعاد يوم الجمعه 28 يبقي احسن بحيث ان يكون في مساحة اكتر ان ناس اكتر تيجي لان فعلا ممكن يبقي ناس كتير عندها مشغوليات السبت
تحياتى لك يا اخي وان شاء الله نلتقى على خير

د. إيمان مكاوي.. أم البنين يقول...

وفقكم الله
تحياتي

لـــولا وزهراء يقول...

اسكندريه هتنور بضيوفها وزوراها طبعا

فى انتظاركم ان شاء الله هتشرفونا بجد
فى انتظاركم ان شاء الله

زهــــراء

همس الاحباب يقول...

حنين القلب
ان شاء الله ربنا يسهل ويكون يوم جميل

همس الاحباب يقول...

مارو هانم
ربنا يكرمك وشرف لينا اننا نشوف حضرتك
اللهم امين
تحياتى

همس الاحباب يقول...

مارو هانم
ههههههه
طب انا عايز حقى ناشف
يعنى ممكن جوز جنيهات ونعدى الليلة
هههههههه
ربنا يكرمك ويسعدك يا ست الكل
ونشوفك على خير ان شاء الله
تحياتى

همس الاحباب يقول...

فاتيما
اخير نزلت الحمد لله
بصى يا ست الكل هو الاحتمال الاغلب اننا هنركب من رمسيس ان شاء الله
وهبلغك قبلها بكل حاجة ان شاء الله
ومتخافيش مفيش شمس ولا حاجة كل شىء هيبقى كويس ان شاء الله
تحياتى

همس الاحباب يقول...

عاشقة الرومانسية
الحمد لله ان البرنامج عجبكم
وان شاء الله هيكون يوم جميل بوجودكم جميعا
وربنا يسهل ونشوف مفاجات دودو وما تكونش مقالب ههههههههههه
تحياتى

همس الاحباب يقول...

حنين القلب
ههههههههه
ايه يا بنتى انتى شغالة تاجرة شنطة ولا توك وبنس شعر فى الاتوبيسات
انا كنت حاسس بكده
عامة ممكن نوقفك قدام القلعة بالفرش بتاعك اهو تسترزقى من الاجانب والمصريين
هههههه

همس الاحباب يقول...

حنين القلب
بلاش انتى علشان خاطر عمر
خلى حد غيرك يتكلم
يا بنتى انا واخد بطولة الجمهورية فى السباحة فى الترع والمصارف والبطولة الاوليمبية فى الغطس فى البانيو

همس الاحباب يقول...

حنين القلب
تشكر يا معلم
ده واجب عليك
وحلو قوى التتر ده ينفع تتر للبوست
بس بلاش صوتك والنبى احسن يطفش المعلقين
ويلم علينا الخنافس
تحياتى

همس الاحباب يقول...

شذا الروح
ربنا يكرمك يا ست الكل
ويسعدك دنيا واخرة
تحياتى

همس الاحباب يقول...

احمد K
ههههههههه
انتخابات مين يا عم
بتحسسنى انك من ضمن المرشحين سيبك منهم وتعالى بلا انتخابات بلا وجع دماغ
كده ولا كده بتوع الحزن الوطنى ناجحين
مبروك عليك مقدما
فى انتظارك يا باشا

همس الاحباب يقول...

ندى الياسمين
حاولى تيجى يا ام مريم
هاتى الاولاد وباباهم وتعالوا
بجد اليوم هيكون جميل بوجودكم معانا
هههههه ربنا يسعدكم من غير نفس كده ليه
متخافيش هنجيبلك زجاجة مياه من البحر
تحياتى

همس الاحباب يقول...

اسكندرانى اوى
هههههههه
هو فسحة ولقاء يا باشا
بس بجد هنفتقدك وكان نفسى اشوفك
ايه النوظام نازل امتى اجازة واحنا نعمل لقاء مخصوص يا هندسة
ربنا يرجعك بالف سلامة
تحياتى

همس الاحباب يقول...

ميرا
يوم 29 ده يوم سبت ومش اجازة يا ست ميرا
وبعدين زوغى احنا كلنا مزوغين
ويخصم من رصيد الاجازة
الجمعة مش مناسب لناس كتيرة وخصوصا اهل اسكندرية بالاضافة ان اسكندرية بتبقى زحمة يوم الجمعة علشان الاقاليم المجاورة كله بينزل يقضى يوم ويرجع وكده
فعلشان كده اخترنا السبت
تحياتى

همس الاحباب يقول...

مرمر
انتى تنورينا طبعا
ربنا يرجعك بالف سلامة
وبعدين مكانك محجوز انا حاجز اول ناصية وهحجزلك جنبى هنبقى زمل فى التسول
ان شاء الله هنقلكم الحدث صوت وصورة
تحياتى

همس الاحباب يقول...

غير معرف
ههههههه
خلاص هاتى منيع وتعالى يا سلام غالى والطلب رخيص نبعتلك القلعة والبحر لحد عندكم ولا تزعل يا باشا
تحياتى

همس الاحباب يقول...

غير معرف
هههههههه
انتى داخلة تنقى وتقرى بس
مش فاضية للسلام وكده
وانتى كمان ليكى وحشة اكتر من بريزة لب
اخبارك ايه واخبار منيع والاسرة يا رب تكونوا بخير وامتى هنفرح فيكم
ايه ما فيش كلمنى شكرا عندكم ولا ايه
سلاموزززززز

همس الاحباب يقول...

ضياء
ماشى يا باشا ولا يهمك المهم تنورنا
وان شاء الله الاحتمال الاكبر هنركب من رمسيس وميكروباص علشان خاطرك
عامة هاكد عليك قبلها باذن الله
تحياتى

همس الاحباب يقول...

مصطفى ريان
ربنا يسهل يا باشا وهتنورنا طبعا
اهو بنجمع عدد كبير علشان ناخد ميكروباص مخصوص يفضل معانا اليوم كله
لو امكن
يوم الجمعة مش ينفع لظروف اهل اسكندرية زى ما وضحت لميرا
تحياتى

همس الاحباب يقول...

د/ ايمان مكاوى
ربنا يكرمك ويسعدك يا دكتورة
تحياتى

همس الاحباب يقول...

لولا وزهراء
اسكندرية منورة باهلها طبعا

ده شرف لينا اننا نشوفكم باذن الله
تحياتى

فاتيما يقول...

يا خاااااااااالد

ازيك

بص نودااااااااء انسانى

فيه ناس رقيقة و بسكوتاية خالث مش هينفع تنزل من بيتها و تجيلنا ف معاد التجمع الساعة ستة خالص
لأن مجييهم يستلزم ساعة بدرى نزول

يعنى عشان يجيوا ستة
لازم ينزلوا من البيت خمسة
و غالبا هيكون معاهم اطفال صغننة
و انتا ميرضيكش الحكاية دى تحصل اكيد


و طبعا محدش هياخد باله انى بتكلم عن ريم رقيقة الرقيقات
و اللى مشوارها بتاع ساعة
ساعة الا ربع ف احسن الاحوال ..


محدش خد باله ؟؟


طب كيويس



و بناء عليه
بنهويب بسيادتكم
تزحزح المعاد لسبعة

الله يكرمك





ثانيااااااا

يا ريت اضم صوتى
لأخويا الغالى ضياء

ان


الميكروباص هو الحل



عشان ف الرجوع ندفعله مبلغ كويس و يوصل ريم لبيتها بدل ما تروح ف تاكسى و عشان مينفعشى نسيبها تروح مع البنات ف معاد متاخر بعد عشرة و لا حاجة كدا بينما ممكن نكون معاها

و طبعااااا للمرة التانية انتا ميرضكش أكيد غير كدا يحصل


يبقى نتكل على الله
و نمشيها ميكروباص

و ناخده مقاولة من اول اليوم
لآخره و لحد المرواح ..ماشى ؟

طواااايب

لما افتكر حاجة تانى
هاجى أقولك بقى


تحياتى لك حد علق عندك
خصوصاااا اهل اسكنكرية الماريا

سلامى لشابى و هموسة و امهم

الشـوكة الــنـاعـمـة يقول...

اولا انشالله يكون يوم كويس وسعيد يارب
بس ياخساره انا مش من القاهره ولا
اسكندريه
ياريت تنورونى فى السويس
انا عارفه ان ده صعب
خصوصا انى المدونه اليتيمه هنا
عشان تقريبا مافيش مدونين سوايسه هنا
ياللا حظى بقا
يارب تنبسطو واليوم يكون زى السكر زيكم

Diyaa' يقول...

احم احم ...ميكروباص مقاولة طول اليوم يعني مبلغ مهوووول
هو الحل ميكروباص وإحنا مروحين ونسأله قبل ما نطلع..تاخد 20-30 زيادة وتوصل حد فينا لمنطقة كذا بعد ما تنزلنا الموقف ؟:)
ومستني رأيكم :)

لكن ميكرو معانا من 7 الصبح لحد 9 بليل...ده هياخد أقل حاجة 600 جنيه !!

فاتيما يقول...

صباح الخير عليكم يا جماعة

ازيك يا من الخير فى ركابه

و فيها ايه يا ضيا
لما ياخد المبلغ دا ؟؟

اصلا احنا عاملين حسابنا ع المواصلات رايح جاى و داخلياً فى اسكندرية
كل واحد مش اقل من خمسين ستين جنيه


يعنى لو ال 600 دول
مجموع مواصلات ست انفار مننا بس
ف الأحوال العادية



و متهيألى احنا هنبقى اكتر من كدا
و المبلغ لما يتقسم علينا
هيقل كتير


دا غير ان المواصلة هتبقى معانا طول اليوم ونتحرك بيها أسرع
و كمان نروح بيها كل اللى بيتهم بعيد زى ريم و ميبقاش فيه مشكلة


شوفوا النظام ايه
و قولولنا


عموما
احنا معاكم يا ضيا ف كل الاحوال
و لو هتودونا مشى يا عم
انتا عارف ..
موااااافقة

واحنا بنسافر معاكم اساسا و احنا مغمضين عشان متأكدين اننا مع اخواتنا الرجالة و هتشيلونا فوق راسكم لو الموقف إستدعى ذلك و لن تتأخروا

ادينا بنتناقش يعنى و نتبادل الاراء
و نشوف هنرسى على ايه

سلااااام موقتا
يا أغلى ناس و صحبة و عالم

فاتيما يقول...

يوووووه

انا عكيت كالعادة
و مقولتش الكلام صح

كنت اقصد ان مصاريف اليوم بتبقى سوبر جيت و مواصلات جوا البلد لو روحنا اكتر من مكان هتقرب على المية

(عند ناس مثلا زى ريم اللى هتدفع فلوس للتاكسى ف المرواح )


و لو حطينا بند الأكل كمان .. هتلاقيها بتعدى و زيادة


لو جمعنا من بعضينا
فلوس المواصلات بس
هتلاقيها كفت
ان شاء الله يا ضيا


عموما اكرر اننا بنتناقش و ربنا يسهل و نوصل لأحسن حل

سلام

Diyaa' يقول...

لو عددنا جاب العشرة أو زاد ممكن
وبعدين خدي بالك :) إحنا لسه مش متأكدين هياخد كام :)

وكمان مش هيوصل كل حد فلو في ناس تانية هتتبهدل في المواصلات...ربما يبقى تقيل عليهم دفع ال 100 مثلاً وبعدين يرجع يدفع مواصلات تانية رايحين جايين
مش بتكلم عن نفسي
لما نتقابل نفكر سوا بإذن الله:)

فاتيما يقول...

ماشى يا ضيا

اتفقنا

اللى تشوفوه
انتوا اخواتنا الردااااالة
و منكسرلكمشى كلمة
و لا نستجريش يعنى


لما نتقابل يومها إن شاء الله
نشوف الحكاية تمشى ازاى

ربنا
ما يحرمنا
منكم

همس الاحباب يقول...

فاتيما
بصى يا ام يوسف انا معنديش اعتراض او مانع من تغيير الميعاد ولا تغيير اى شىء انا ديمقراطى وبحب الديكتاتورية جدا
ومن هذا المزنق اعرب عن عميق اسفى
اننا قررننا تاجيل الميعاد لحد السابعة صباحا بحيث يكون تحركنا بمشيئة الله من السابعة وحتى السابعة والنصف لكى نلحق ميعادنا فى اسكندرية
ولو عايزين نخلوه 9 صباحا ولا يهمكم بص فى الحالة دى نوصل اسكندرية نسلم عليهم ونرجع تانى هههههههه
انا هدفى الوحيد من التبكير اننا ناخد اليوم من اوله ونرجع بدرى علشان ظروف الاخوات المدونات مش اكتر
ولكن نزولا على رغبتكم الكريمة خليها الساعة 7
ومتفق معاكى على موضوع الميكروباص
تحياتى

همس الاحباب يقول...

الشوكة الناعمة
اولا ربنا يكرمك ويسعدك وشكرا لزيارتك وتواصلك
ثانيا السويس بلد البطولات وفعلا نفسى ازورها وان شاء الله هيكون لينا لقاء فى السويس
وبعدين مين قالك انك المدونة الوحيدة فى السويس
السويس بها اشهر المدونات والمدونين
وبها مدونين اجمل واروع المدونين امثال فرنسا هانم وعبده الرايق ومدونات اخرى كتير
تحياتى لحضرتك

همس الاحباب يقول...

فاتيما وضياء
ردا على تعليقاتكم ومناقشتكم
اولا: بالنسبة لموضوع الميكروباص ما فيش مشكلة اننا نتفق مع ميكروباص خاص يكون معانا لو العدد كبير وذلك مراعاة لظروف الجميع لان ايجاره هيكون اكتر من 600 جنيه بكل تاكيد
بصفة عامة اضعف الايمان اننا هناخد ميكروباص ونتفق معاه يوصلنا ويرجع ياخدنا اخر اليوم ونتفق معاه يوصل ريم واى حد بعيد اذا امكن لاننا فى جميع الاحوال فى اسكندرية مش هنحتاجه لان اليوم اغلبه هيكون فى منطقة بحرى يعنى تحركاتنامحدودة
وبفرض اننا ركبنا ميكروباص ونزلنا محطة مصر هتكون المسافة لبحرى بسيطة جدا وهنلاقى مشروع بسهولة جدا
اخر شىء كل حاجة باذن الله هتمشى بسهولة ويسر وزى مانحن نتمنى باذن الله
اما بالنسبة لريم او اى حد من الاخوات المدونات مش هنغلب نوصلهم الحمد لله احنا هنكون مجموعة كبيرة وهنوزع انفسنا اذا احتاج الامر
ما فيش داعى لاى قلق من اى شىء ان شاء الله
وغالبا انا فكرت فى كل الاحتمالات التى تشغل حضراتكم جميعا وعلشان كده هحاول بقدر الامكان انى اصل لحل يرضى جميع الاطراف فى حدود الامكانيات المتاحة لنا
تحياتى لكم جميعا

فاتيما يقول...

ربنا يخليك لينا
يا خالود
و انتا كمان يا ضيا


والمسنود عليكم أصله
ميشيلش هم أبدا


ان شاء الله
يكون يوم جميل
زى قلوبكم

بس خلاص

mostafa rayan يقول...

خلود
اناعايزاقول حاجة ماينفعش نروح اسكندرية ونرجع بدري احنا مش بنروح كل يوم عايزين نفضل هناك اكتر وقت ممكن اما اخواتنا المدونات مش هيجري حاجة لما يتأخرو يوم ده سفر ولهم عذرهم ودي اسكندرية يا جدعان

فاتيما يقول...

واد يا صفصف

كدا برضو ؟؟
بتصربوا نار علينا احنا الحريم ؟؟
ماشى ماشى


بص يا مصطفى
بالنوسبة للمرواح ..
مينفعشى نون النسوة يتأخرن
عن عشرة حداشر بالكتيييير
و الا يبقى فيها ضرب نار
و طرد
و تشريد
و حاجات كدا تستدعى أن
يتدخل فيها منظمات حقوق الأنسان
و لجان الإغاثة الدولية
ماشى؟؟

فالإقتراح سيادتك
كالآتى


زى آخر مرة سووو و عادل
قعدوا و كملوا السهرة
و رجعوا على مهلهم

بينما عاد الجميع للقاهرة
عشان متأخرش طبعا ع البيت
و كمان عشان كان ورانا
اشغال تانى يوم
لأنه برضو كان يوم سبت



فبالتالى
احنا مؤنث سالم المدونات
معندناش مانع
تقعدوا انتوا
يا مذكر سالم المدونات براحكتم ..

بس تركبونا المواصلات
الله يكرمكم
و يبقى كدا كتر خيركم قوى


ان شاء الله يكون يوم جميل
انا مبسوطة جدااا انك جاى
بجد

اشوفك على ألف خير السبت الجاى

سلااااام

همس الاحباب يقول...

مصطفى ريان
ههههههههه
ايه يا درش انت اللى بتتكلم على التاخير يا باشا انت اخرك 9 بالليل وبعدها تقول يا غربتى
عامة ان شاء الله اليوم هيكون جميل وهيعوضك عن اسبوع بحاله
فى انتظارك يوم السبت ان شاء الله
تحياتى

همس الاحباب يقول...

فاتيما
ولا يهمك يا ام يوسف براحتك اليوم يومكم وتمشوا براحتكم وتقعدوا براحكم
احنا معاكم يا ريس
وان شاء الله اليوم يكون جميل باذن الله
تحياتى

mostafa rayan يقول...

فاتيما
اوك .. هحاول اقنع نفسي رغم انى لسه مش مقتنع .. ان شاء الله نتقابل السبت على خير

خلود
انت يا برنس ناسي انى عازبنجي يعنى مالك امري ورئيس جمهورية تفسي والمتحكم الوحيد في امرها
ههههههه
ان شاء الله اليوم يكون حلو بلقائنا وبتجمعنا مع كل الناس الجميلة
لك كل الود والمحبة يا اخي الجميل

Sharm يقول...

جميلة فعلا اللقاءات دي

ghada mOhsen يقول...

واااااااااااء
ماليش دعوه .. هاتولي طياره مخصوص وأنا أجي >>> بهزر :)))

ربنا يسعدكم ياااااااارب ويحميكم

سلملولي على كل الناس الحلوه إللي هاتروح ...
وأكبر سلام للبحر :) ...

... ;) ,,, ;) ...

شذا الروح يقول...

رحله جميلةان شاء الله
بالتوفيق

همس الاحباب يقول...

مصطفى ريان
ههههههههه
يعنى ايه عازبنجى ما هو احنا متجوزين وماشيين بدعاء الوالدين
ههههههههه
ماشى يا درش براحتك
تحياتى

همس الاحباب يقول...

sharm
الحمد لله جميلة بوجود قلوب ناس جميلة زيكم
تحياتى

همس الاحباب يقول...

غادة محسن
ههههههه
طيارة مرة واحدة ما ينفعش دراجة بخارية

ربنا يكرمك وكان نفسنا تكونى معانا
نلتقى دائما على خير باذن الله
تحياتى

همس الاحباب يقول...

شذا الروح
ربنا يكرمك ويسعدك
سعدت بمرورك وتواصلك
تحياتى وتقديرى

سومه...مجنونه فى بلد عاقل يقول...

يا بختكم ربنا معاكم يا رب

حنان الشافعي يقول...

صراحة مشرق كالعاده
وديما بتتخانق مع دوودو كده
اولا اليوم كان حلو قوي
(بعد اللوكلوك بقول اولا)
ثانيا معلش والله اني رخمت واتصلت كتير بس انا شخصيه قلوقه وكان نفسي اطمن بس بس
ورزلت علي حضرتك تحديدا لان رقمك الوحيد اللي كان معايا
فعذرا يعنيي
وكالعاده حضرتك كنت همس الحضور يعني ايه بقي الله اعلم D:

حنان الشافعي يقول...

معلش بقي انا اصلي كنت خايفه اكون بضايقكم يعني وعارفه والله ان حضرتك اتصلت بس انا بعد ما قفلت رحت في غيبوبه اصلا بسبب الدوا اللي كتبه الدكتور الله يسامحه بس اطمنت عليكم الصبح من انجي اللي اطمن من شريف
:)
متشكره انا علي اهتمام حضرتك بالرد وانا فعلا يومها معملتش حاجه كنت ناويه علي حاجات كتير بس تغيير المكان منعني اعملاي شئ ملحوقه بقي بعد الامتحانات ان شاء الله

خالص ودي وسلامي لهمس وشابي