23 أغسطس، 2009

تفاصيل افطار صائم


كل عام و انتم بخير

و رمضان كريم

و يارب يتقبل صيامنا و صلاتنا و قيامنا فيه

السنة اللى فاتت ربنا وفقنا و عملنا يوم جميل التقينا فيه على الخير 
و اسعدنا اطفال كتير معنا فى مستشفى ابو الريش

و يمكن يومها شوفنا ان اغلب الاطفال سنهم صغير و بيحتاج وجود مرافق معهم و
غالبا بيكون المرافق ده ام الطفل او باباه .. الناس دى لاحظنا انهم وقت الفطار
بيدور على اى حاجة بسيطة تنفع يفطروا بها لدرجة ان فى امهات فرحت بشوية
البسكويت اللى وزعناهم للاطفال علشان تخليها للفطار


طفل مريض و بيتالم حاجة صعبة جدا .. لكن فى نفس الوقت المرافق له بتكون حالته اصعب لانه مش


عارف يخفف عنه ازاى .. و علشان كده الفكرة المرة دى هتكون للناس دى .. محاولة للتخفيف عنهم و نقولهم اننا بنشارككم حتى لو بوجبة افطار بسيطة




و طبعا اللى يحب منا يقدم تبرع مادى او عينى بجانب الوجبة يبقى جزاه الله خيرا


الوجبة هتكون عبارة عن : رز + خضار + قطعة فراخ او لحمة + مخلل


عيش + ثمرة فاكهة


و هيكون تكلفيتها 10 جنيه


و المعاد هيكون يوم 5 سبتمبر


الساعة 3 قدام باب مستشفى ابو الريش اليابانى للاطفال


نفس المستشفى اللى اتجمعنا فيها قبل كده




و لو ربنا اكرمنا و كان عدد الوجبات يفرح و عددها كتير ممكن نفطر التمرجية


بتوع المستشفى او نطلع على المستشفى اللى جنبها و هى مستشفى المنيرة لاطفال و


نوزع على المرافقين هناك


و اليوم ده مش بس للناس ده كمان لنا احنا لان الرسول الكريم قال " مَن فطَّر


صائماً كان له مثل أجره غير أنه لا ينقص من أجر الصائم شيء "يعنى ان شاء الله 
ناخد اجر صيام كل شخص قدمنا له وجبة



و فى حاجة عايزة اقولها للناس اللى مش هتقدر تشارك فى التبرع انهم ممكن


يحضروا معنا و يشاركوا فى توزيع الوجبات و التخفيف عن الاطفال و اكيد ده


بردو له اجر عند الله


و طبعا لاننا مش هنلحق نرجع بيوتنا على وقت الفطار ممكن بعدها نروح نفطر مع


بعض فى نفس المكان اللى روحناه المرة اللى فاتت - جزا الله سوو هو اللى راح


صور المكان و جاب قائمة الاسعار منه - محل ابو خالد فى شارع شمبيليون و


ده بيقدم مشويات و رز و سلطات و سعر الفطار عنده ممكن يكون فى حدود ال 50 جنيه


و لو حد عنده اقتراح بمكان تانى للفطار ياريت يقول


اما بقى عن الوجبات اللى هنقدمها للناس فيفضل كل حد ناوى يشارك معنا يبعت يقولنا على الايميل او برسالة على الموبايل بالعدد اللى ناوى يشارك به علشان احجزه


المرة دى مينفعش نحدد يومها لازم على الاقل يوم الاربع اكون عارفة عدد الوجبات اللى هحجزها علشان تتحضر ليوم السبت


ده ايميلات الناس المسئولة عن اليوم











و ده ارقام ممكن تبعتوا رسالة عليها او تسالوا على اى شىء خاص باليوم ده


داليا صاحبة مدونة قوس قزح


0117742287


 خالد صاحب مدونة همس الاحباب


0101345140



اللهم ارزقنى و اياكم فى هذا الشهر رحمة الايتام و إطعام الطعام و إفشاء السلام و


صحبة الكرام يا ارحم الراحمين

هناك 29 تعليقًا:

دموع القمر يقول...

ماشاء الله

اووووووول مرة اكون اول تعليق عندك ياخالد

نحسب ذلك دائما
هههههه

دموع القمر يقول...

والتانى كمان

حجججججججججججززززززززز

دموع القمر يقول...

والثااااااااااالت

وسسسسسسعععععععع

بارك الله فيك
وجزاك كل خييييير

دموع القمر يقول...

بارك الله فيك ياخالد

هى فكرة جميلة
احنا دايما عندنا بنعملها للايتام
بس فكرة جديدة ان شاء الله نقوم بتنفيذها اننا نشوف مستشفى اطفال
ونزورهم ونفطر معاهم

ربنا يجزيكم كل خير انت وكل اللى شارك معاك

كفاية انك هتدخل سرور على قلب مسلم
وهتاخد ثواب افطار صائم

دموع القمر يقول...

سعيدة جدا انى مريت بالمدونة
وهكون اسعد لو نورتنا

كل سنة وانت طيب

Pink Dreams يقول...

جزاك الله كل خير يا استاذ خالد

ربنا يجعله فى ميزان حسناتكم يا رب

وكل سنه وحضرتك طيب وكل الاسره بخير وصحه وسلامه

وطبعا متنساش تسلملنا على هموسه القمر بتاعنا

تقبل تحياتى

mimi يقول...

كل سنة وانت طيب يا خالد

ان شاء الله هكون متواجده معاكم

غير معرف يقول...

جزاكم الله خيرا وبارك الله فيكم على الفكرة دى
كنت اتمنى اشارك بجد بس انا مش من القاهرة :(

عاشقة الأحزان يقول...

رمضان كريم

كان نفسى بجد اشاركك معاكم بس يلا بقا مافيش نصيب احنا من محافظات بعيده قوووووووى

جزاكم الله كل الخير

مودتى

أبو كريم يقول...

اللهم أجعله فى ميزان حسناتك والله لو كنت قريبا منكم لما تأخرت عن الحضور ولكنى بالغردقه أعمل هناك ودعواتى لكم بالبركه فيما ستقدمون وان يجعل الله كل خطوه فى ميزان حسناتكم جميعا


هكذا الشباب المسلم

كيــــــــــــارا يقول...

تمام جدا ياخالد

ولو في حد من اللي هيجو جم بدري عن المعاد ممكن يجي ليا الشغل ونروح سوا

ان شاء الله يكون يوم جميل

وان شاء الله جايه

7annen يقول...

كل سنه وانت طيب يا خالد وربنا يقدرك على فعل الخير يارب

رمضان كريم

ahmed_k يقول...

جزاكم الله كل خير
وجعل مجهوداتكم في ميزان أعمالكم
وكل عام وأنتم بخير

norahaty يقول...

وفقكم الله
لما يحب ويرضى
وبارك فيكم ولكم.

فاتيما يقول...

الله ينور يا خالد
ارتب مع صاحبتى داليا و اقولك آخر كلام إن شاء الله
و اكتب بوست عندى كمان
خالص الود ليك يا فندم

hasona يقول...

السلام عليكم

جميلة جداً هذه الفكرة
والاروع التنفيذ من هذه القلوب التي تتجمع علي حب الله

يا مراكبي يقول...

ربنا يكرمكم ويجريكم خير الجزاء على الإيجابية الجميلة دي

أحسن تـستاهـل يقول...

طيب تمام اوي
هي فين أصلا المستشفى دي؟ مش دي ابو الريش اللي في السيدة ولا ربنا يشفيني بألف؟؟!!

عموما حلو معاد اليوم وانا كده هخلص شغل واجيلكو جري ولما اوصل هتصل بحد فيكو اقوله اني جيت فتعملولي نشيد الترحيب وكده ماشي؟؟

اسيبكو دلوقتي في انتظار وصول بابا من الشغل عشان اقوله وكده بأه احم ماشي؟؟

سلام بأه عشان انا ماشي :)

مها ميهوووو

سمسمه يقول...

كل سنه وانت طيب يااستاذ خالد
وربنا يجعله فى ميزان حسناتك
ياريتنى كنت اقدر احضر

Shimaa يقول...

السيد الأستاذ صاحب مدونة: همس الأحباب.
" تحية طيبة" وبعد..
اعتذر عن الخروج من موضوع التدوينة، لقد أرسلت لك رسالة عبر البريد الإلكتروني تتعلق باستمارة استقصاء بيانات عن المدونات المصرية تشتمل على البيانات التي تساعدك على الإجابة عن الاستمارة.
أرجو الاهتمام والرد سريعا.
تحياتي وتقديري.
شيماء إسماعيل
باحثة بالماجستير- كلية الآداب جامعة القاهرة.

♥ Am fOpa'D ♥ يقول...

كل عاام وانتوا بخير,,,
ان شاء الله احاول اتواجد وان لم يكن هيبقى في طريقة باذن الله

جزاكم الله كل خير وربنا يتقبل منكوا صالح الاعمال والنوايا ومجهودكم

اللؤلؤة يقول...

السلام عليكم
جزاك الله خيراً وجعله فى ميزان حسناتك
وجهد مشكووووووووووووور
دمت بكل الخير

يا خوف فؤادي من غدي يقول...

يا بختكم ياريتني كنت معاكم بس بيني وبينكم بحور وبحور
جزاكم الله خيرا ووفقكم لما بحبه ويرضاه

العصفورة يقول...

السلام عليكم
كل عام والأمة الإسلامية بكل خير
ورمضان كريم
خالص تقديرى

حنين القلب يقول...

كل سنه وانت طيب يا خالود

وربنا يجعل اليوم ده فى ميزان حسناتكم

كان نفسى اكون معاكم اوى
بس والله قلبى معاكم

رمضان كريم

شجرة الدر يقول...

جعله الله في مزان حسناتكم يارب وعمل مقبول ان شاء الله
كل سنة وانتم
فيعمل الخيرات مجتهدون
تحياتي

ضكتور جدا يقول...

ما شاء الله ربنا يجعله في ميزان حسناتكم
ويتقبل منكم يارب
ورمضان كريم

Hannoda يقول...

ربنا يوفقكم للي فيه الخير دايما.. بفرح قوي و الله لما بتقرا عن برامج زي دي وبتمنى جددا لو كنت قادرة اشارك معاكم فيها

كل سنة و حضرتك طيب
ويااارب يتحقق هدفكم في اسعاد كل الناس دي اللي حايكون ليكم نصيب كبير فيها أكيد لان فعل الخير مصدر سعادة كبير جدا

جزاكم الله أعظمم الاجر انشاء الله
تحياتي

الفراغ يقول...

كل سنه وانت طيب يا ابو همس
وشكرا على دعوتك الجميله الهادفه
بس اعذرنى غصب عنى المشوار صعب جدا عليا
بس هاكون معاكم بقلبى
وربنا يجازيك خير وكل اللى معاك
ورمضان كريم