10 يونيو، 2009

انا مغمن عليا .. يا سلام


الحمد لله تمت عملية التبرع بالدم بنجاح بعد معاناة 
كان من المقرر انى اذهب للتبرع يوم الثلاثاء  ولكن لظروف ما تأجلت لليوم التالى اللى هو النهاردة، مع انى كنت بذلت مجهود ونظرا لزحمة المواصلات اتخنقت من الطريق ونزلت اتمشى فى الشارع والجو كان مولع بصراحة والشمس حارقة جدا والساعة 2 الظهر ومع ذلك وصلت الحمد لله الى المركز، وطلبت انى اتبرع للمريضة شيماء حسين نظرا لتوافقها مع فصيلتى واحتياجها للتبرع ، المهم الاستقبال كان رائع بصراحة  دخلت لقياس الضغط ونسبة الهيموجلوبين 
الضغط طلع منخفض حاجة بسيطة نظرا للسير فى الشمس كثيرا الهيموجلوبين الحمد لله طلع عالى جدا 17.1 ودى نسبة ممتازة جدا 
المهم دخلت غرفة التبرع وقعدت على السرير وسلمت دراعى علشان انا عارف ان الوريد عندى دايما بيبقى مختفى وبنلاقيه بصعوبة
يس الحمد لله ظهر بعد وقت قصير  بس الانسة اللى  يتاخد الدم ايدها تقيلة شوية حسيت بحاجة غريبة فى دراعى  بس قلت ولا يهمنى 
المهم عملية التبرع مستمرة وفجاة لقيت امة لا اله الا الله واقفة على دماغى وبيقولوا حضرتك كويس 
بفتح عينى كده لقيتنى مغمى عليا وبيفوقوا فيا 
انت حضرتك تعبان او حاسس بدوخة 
لا عادى كملوا التبرع عادى مفيش حاجة 
بس انا مشيت فى الشمس كتير ودى حاجة عادية المهم كملت عملية التبرع 
وفعدت شوية تحت الرعاية وشغالين يشربوا فيا عصائر 
يا جدعان خلاص ما فيش حاجة انا كويس المهم البنت اذنبت جنبى وحسيت  انها خايفة وبتقولى انا اسفة ايدى تقيلة شوية 
ولا يهمك يا ستى المهم التبرع تم بنجاح
اى حاجة بعد كده مش مهم 
وفعلا نزلت من عندهم ورحت الشغل 
والحمد لله على كل حال 
بس بصراحة الناس فى المركز ذوق ذوق ويشجعوك انك تتبرع كل يوم 
ومافيش مانع يغمن عليك وتلاقى الكل بيطمئن عليك 
فى النهاية التبرع تم بنجاح 
والدعوة للتبرع مستمرة 
بس بلاش بذل مجهود قبل التبرع ولا بعده 
بلاش التعرض للشمس مباشرة 

هناك 19 تعليقًا:

حنين القلب يقول...

اووووووووول تعليق

اروح اعرف بقى ايه اللى حصل
رغم انى متوقعاه

هههههههههههههههههههه
وش بيطلع لسانه

حنين القلب يقول...

وربنا كنت حاسه ان ده اللى هيحصل

انت اصلا كل اللى عندك ربع لتر دم عمال تبعزق فيه

هههههههههههههههههه

المهم انك اتبرعت
بس بجد يا خالود
ربنا يجعل كل نقطه دم فى ميزان حسناتك

بدراوى يقول...

طب حمد الله على السلامة
يا ابو همس
بيعملوا عصير حلو
يمكن افكر اروح اتبرع
هههههه

موناليزا يقول...

:) ربنا يجعله فى ميزان حسناتك
والحمدلله انك بخير

عاشقه الرومانسيه يقول...

الف سلامه عليك ياخالود
وربنا يجعله فى ميزان حسناتك



صحيح اللى حنين بتقوله ده؟
هو ربع لتر بس؟
ولا كل واحد على قد طوله؟

طيب بلاش تبعزقه قوى بقى
فكر فى نفسك شويه
لو اتزنقت هنجيب لك دم منين؟
كده هتتصفى ياابنى
(:
صحتك بالدنيا
ههههههههههههههههههههه

حنين القلب يقول...

عاشقه الرومانسيه

عارفه يا دودو
خالود لو خلصوا الدم بتاعه وكان محتاج دم وفصيلتى نفس فصيلته

انا
انا
ايوة طبعا مش هديله ده دمى يا ماما هو بيريل
هههههههههههههههههههههههههههه

بس بقى لو حسيت انه بجد تعبان
هدور على حد يتبرعله
احنا اخوات برضه

عارفه يا دودو
هو ليه راح اتبرع
علشان العصير اللى بيفرقوه وعمل حكايه الاغماء دى علشان ياخد عصير اكتر
الله يسهله يا عم ابقى شيلى واحده
هههههههههههههههههههههههه

الفراغ يقول...

سلامتك يا خالد
واحى فيك شهامة المصريين
تحياتى

yoyo يقول...

صباحك سكر يا ابو همس

الف مليون سلامة عليك

ربنا يجازيك كلالخير يارب
بجد انت كلك اخلاق و شهامة
ربنا يحفظك من كل شر يارب

دمت اخى بالف خير
تحياتى
يويو

نهر الحب يقول...

ربنا يتقبل ويجعلها فى ميزان حسناتك يارب
والف سلامة عليك

نهر الحب يقول...

انت مش بترد على الموبايل لية ؟؟؟؟

اللؤلؤة يقول...

الأخ خالد
السلام عليكم
بارك الله فيك وجعله فى ميزان حسناتك ويارب لما أرو أتبرع يرزقنى بواحدة إيدها خفيفة أحسن أنا بخاف من لون الدم
تقبل مرورى

شموع يقول...

همس الأحباب
جزاك الله خيراً وجعله الله فى ميزان حسناتك على هذه الدعوة الطيبة
فالتبرع بالدم ممكن أن يشفى مريض وهذا المريض من الممكن أن يكون أخى أو أخوك أو والدى أو والدك وبارك الله فيك
تقبل مرورى

وومن يقول...

طبعاً مه انت لما لاقيت التبرع اللي فات مشي سليم وعدي علي خير

قولت تفتري بقي علي صحتك مش كدة

مش يتقري ليه التعليمات اللي علي كارنية التبرع

حمد الله علي سلامتك يا ابو همس وربنا يجعلة في ميزان حسناتك يارب

كيــــــــــــارا يقول...

يالهوي بتفكرني وضد التيار بتتبرع عندي في الشغل كان قلبي هيقف عليها والنهارده مو ارتاح بالي الا لما اتاكدت ان نتائجها سليمه

ربنا يجعله في ميزان حسانتكم

ملكة بحجابى يقول...

ماشاء الله
ربنا يجازيك خيرا بما فعلت
:)
ويبقى هات شوية حسنات ياعم

تقبل مرورى
(ملكة بحجابى )

عمرو يقول...

جزاك الله خيرا و جعله فى ميزان حسناتك ..
و ما شاء الله على نسبة الهيموجلوبين ربنا يزيد و يبارك :)
بس المفروض ينقوا بنات أيديهم مش تقيله علشان اللى يتبرعوا ييجوا يتبرعوا تانى و تالت زى الممرضات الرومانيين اللى فى مستشفى دار الفؤاد بجد يخلوا الواحد مش عاوز يخرج من المستشفى ..
تقبل تحياتى و تقديرى ..

rovy يقول...

حمد لله على سلامتك اخى خالد
ربنا يحفظك و يجازيك كل خير ياارب

جعل الرحمن عملك الطيب و الكريم هذا فى ميزان حسناتك ..

تحياتى

همس الاحباب يقول...

حنبن القلب
بدراوى
موناليزا
عاشقة الرومانسية
الفراغ
يويو
نهر الحب
اللؤلؤة
شموع
وومن
كيارا
ملكة بحجابى
عمرو
روفى
جزاكم الله خيرا
وتقبل الله منا ومنكم صالح الاعمال
وبارك الله فيكم جميعا
تحياتى وتقديرى

مهندس مصري يقول...

ههههههههههههه
ألف سلامة عليك
بقى خلوك نفسك يغمى عليك عندهم يومياً
دا سرهم باتع بقى
:)
ألف سلامة عليك يا ابو همس