6 نوفمبر 2008

انا ..والسعادة


تحديث اخير
======
تهنئة قلبية للاخت العزيزة مفروسة هانم
بمناسبة عيد ميلادها
كل سنة وهى طيبة وعقبال مليون سنة
وياريت اللى يجيب هدية بلاش يعلن عنها
بس علشان الحسد
===========
تحديث
=========
شاركوا مدونى بور سعيد يوم 14-11 فى دار الايتام التفاصيل هنا
======
لا تنسوا يوم البؤجه 28-11 والتفاصيل هنا
===========================

التاج ده جاااااى من الاخ العزيز محمد غاليه زميل المهنة على اعتبار ما سيكون باذن الله وبيسال فيه عن السعادة وبيدورعليها قلنا احنا كمااااااان ندور ونبحث عن السعادة معاه .
التاج مكون من 14 سؤال اجبارى ما فيش حتى اختيار من بين القوسين ولا اختيار من متعدد .
السؤال الأول:ماهى السعادة من وجهة نظرك؟
السعادة يا صاحب السعادة طب ما تقولى انت ايه معنى السعادة السعادة هى شىء معنوى غير محسوس مجرد احساس داخلى بنحس بيه احيانا بيظهر فى ملامحنا واحيانا بنختصره فى مجرد ابتسامة صافية او شعور بالفرحة ونسميه سعادة .
والسعادة بمفهومها العام احيانا بترتبط بمقومات لنصل الى السعادة من وجهة نظرنا .
السؤال الثانى: كيف تصل إلى السعادة؟
سؤال صعب ما جاوبش عليه
لانى لو عارف طريق الوصول للسعادة عمرى ما اسيبه واتشبث بيه للنهاية
وان كنت بصراحة ببقى سعيد لما باكون قريب من الله سبحانه وتعالى .
وغالبا السعادة بتبقى نعمة يمن الله بها على عباده .
السؤال الثالث: هل السعادة وهم أم أنها حلم صعب؟
السعادة واقع ملموس وليست وهم وطبيعى اننا نمر بظروف سعادة واحيانا نحلم بالسعادة فمجرد الحلم بالسعادة هو سعادة فى حد ذاته .
السؤال الرابع: هل السعادة طريق للنجاح ؟وضح؟
بالطبع لا فهناك اناس ناجحون ولا يشعرون بالسعادة فلا ارتباط بينهم وان كان النجاح يعطيك احساس بها احيانا بمعنى ان النجاح طريق من طرق السعادة وليس العكس .
السؤال الخامس: ماهى أكثر اللحظات التى شعرت فيها بالسعادة؟
اكثر اللحظات سعادة لما احس انى قريب من ربنا وربنا راضى عنى ودى مع الاسف قليلة لانى مقصر جدا فى طاعته .
وعندما اكون سببا فى سعادة الاخرين
عندما ربنا يوفقنى لمساعدة اى شخص محتاج
عندما اشارك فى عمل الخير ولو باقل القليل .
ولما اشوف ابتسامة طفل صغير وبحس بالبراءة فى عينيه .
لما اكون مع انسان بحبه وليه مكانة فى قلبى .
السؤال السادس:هل ممكن أن تحقق كل شىء؟
المقصود من السؤال السعادة طبعا احيانا تحقق ما نحلم به وتشعرنا باحساس جميل اما كل شىء ده صعب وان كانت السعادة نتاج طبيعى لاشياء تحققت فاسعدتنا .
السؤال السابع: السعادة تجعلك تقبل على الحياة أم لا؟
بالطبع اااااه السعادة تجعلنا نحب الحياة ونقبل عليها وتدفعنا الى الامام دائما .
السؤال الثامن: هل أحسست يوما انك وصلت لقمة السعادة؟
الانسان بطبعه طماااااااع وعمره ما يشبع من اى حاجة جميلة وما بالك بالسعادة احيانا نقول اننا فى قمة السعادة لمجرد موقف ما بس يا ترى ايه هى قمة السعادة فى حد ذاتها ؟؟؟؟
السؤال التاسع: لماذا تمر أوقات السعادة بسرعة؟
هى غالبا تمر مثل الاوقات العادية بس احنا بنحسها كده مرت بسرعة لانها لحظات جميلة .
السؤال العاشر: هل ترى السعادة فى التدين؟
بكل تاكيد السعادة فى القرب من الله والبعد عن معاصيه وطاعته دى سعادة الايمان التى لا تضاهيها سعادة بعيدا عن كلمة التدين بما تحمل من معانى وتحريف احيانا .
السؤال الحادى عشر: هل أنت متفائل وعندك أمل؟ وضح؟
الحمد لله متفائل جدا جدا وان كان ينتابنى بعض التشاؤم احيانا بس بطبعى متفائل غالبا لانى مؤمن بقضاء الله وقدره ومتاكد انه لن يصيبنا الا ما كتب الله لنا .
السؤال الثانى عشر: إذا شعرت بالحزن ماذا تفعل؟
احيانا اقعد لوحدى واستغفرالله لذنوبى واتذكر قول الله تعالى الا بذكر الله تطمئن القلوب واحيانا الجا لاى انسان اثق فيه واتكلم معاه واحيانا استرجع مواقف مشابهة واتذكر كيفية الخروج منها
السؤال الثالث عشر: هل يستمر معك الحزن فترة ام ينقضى فى الحال؟
على حسب الحالة النفسية وصعوبة الموقف الذى ادى الى حالة الحزن .
السؤال الرابع عشر: ما رأيك فى الأفراد المتشائمين ؟؟
ربنا يكون فى عونهم لانهم احيانا بيبقوا مرضى واحيانا ايمانهم ضعيف واحيانا ظروفهم اقوى منهم .

الحمد لله انتهى التاج
واتمنى لكم جميعا السعادة
واللى يحب يجاوب التاج يتفضله بالهنا والشفا


هناك 60 تعليقًا:

حنين القلب يقول...

هييييييييييييييييييييه اول تعليق

اروح اقرى وارجع
مااااااااااشى

حنين القلب يقول...

وعندما اكون سببا فى سعادة الاخرين
عندما ربنا يوفقنى لمساعدة اى شخص محتاج
عندما اشارك فى عمل الخير ولو باقل القليل .
ولما اشوف ابتسامة طفل صغير وبحس بالبراءة فى عينيه .
لما اكون مع انسان بحبه وليه مكانة فى قلبى .


دى فعلا حاجات بتسعدنى جدا انا كمان
السعاده مش شىء فردى ولا احساس انانى
السعاده انك تسعد كل اللى حوليك

حنين القلب يقول...

وبعدين سعاده ايه اللى بدور عليها
وانت فيه حد يقدر ينكد عليك ده انت تنكد على بلد بسكانها

ايييييييييييوه يا جدعان
قال بيدور على السعاده
(الفاضى يعمل قاضى)

mohamed ghalia يقول...

أخى وحبيبى فى الله وزميل المهنة القادم
حقيقى إجاباتك أكثر من رائعة
تعلمت منها الكثير واستفدت بدون ادنى مجاملة ابدعت بمعنى الكلمة
واتمنى لو نفذنا نعلم الطريق ولكن التنفيذ صعب والله المستعان
تقبل تحياتى أخى العزيز

حنين القلب يقول...

بقولك ايه يا عم الحج

ربنا يسعدك ويسعد كل اللى حواليك
ويبارك ليك فى همس وام همس

واجابتك جميله جدا
تسلم ايديك

mohamed ghalia يقول...

متشكر جدااااااااا على قبول التاج استمتعت بالإجابات الرائعة
تحياتى

رئـــــيسـة حزب الأحلام يقول...

موضوع التاج جامد جدا واجابات حضرتك مقنعة جدا
وخصوصا ان حياتنا فى مجملها هى رحلة للبحث عن السعادة
والسعادة اكيد موجودة فى القرب من الله والرضا بقضاءه وقدرة
وربنا يرزقنا الرضا اللهم امين
تحياتى

Gannah يقول...

أبو همس
التاج منتشر جداا فى المدونات ومع ذلك كل واحد له طريقة مختلفه فى الاجابة
انا برضه المطلوب منى اجاوبه بس بعد اللى انت قلته صعب الكلام
اجاباتك بتدل على شخصيتك
انسان محب لمساعدة الاخرين ويرى سعادتهم جزء من سعادته
الحاجة اللى كلكم اتفقتم عليها ان السعادة فى القرب من الله وان قمة السعادة ملهاش تعريف اساسا
ربنا يسعدك ويفرحك بهمس
تحياتى

كاميليا بهاء الدين يقول...

مش عندى غير اني اقول

الله عليك الله

ربنا يسعدك قلبك يارب

....
ملحوظة صغنونة
عجبنى اوى اوى
اسرة الضاحكون
توم وجيرى عالم التدوين
واسرة نكد
هههههههههه

ربنا يحفظك يارب

حاجات جوايا يقول...

بجد بحييك انك قدرت تجاوب عليه
التاج ده صعب اوى
ربنا يسعدك ويباركلك فى ابنتك وزوجتك ويرزقكم رضاه والجنة
ودى السعادة الحقيقة بجد

دمت فى حفظ الله أخى الفاضل

همس الاحباب يقول...

حنين القلب
ههههههه
حذفنا اول تعليق
اقرى براحتك بس اوعى تتكعبلى فى السجادة

همس الاحباب يقول...

حنين القلب
ده حقيقة بجد
فعلا لما ربنا يقدرك على سعادة الاخرين
بتحسى بسعادة مضاعفة
بسم الله ما شاء الله عليكى
لما المخ بيشتغل بيطلع جاز

همس الاحباب يقول...

حنين القلب
لا مش بيطلع جاز
بيطلع هباب
ههههه
هو فى نكد زلى زى اللى انا شايفه دلوقتى
ولعملك ااااه محدش يعرف ينكد عليه
وبانكد على بلد وممكن ادخل على اللى جنبها بس ظروف المواصلات بتمنعنى
وعلى ايه بلاها سعادة
بلاها تاااااج
انرش ميه ونقفل المدونة

همس الاحباب يقول...

محمد غاليه
هههههه
يا باشا ربنا يكرمك
وشكرا على مجاملتك الرقيقة
وكلامك الجميل
والحمد لله التوفيق من الله سبحانه وتعالى
وانا احبك فى الله
تحياتى

همس الاحباب يقول...

حنين القلب
بقولك ايه يا عم الحج
ما تيجى تضربينى احسن
ايه يا حاجة
انتى بترزعى باب المدونة كده ليه
المفصلات طارت ههههههه
يا ستى وانتى كمااااان
ربنا يسعدك دنيا واخرة
ويحققللك كل احلامك
وما يحرمنيش من تعليقاتك
تحياتى

همس الاحباب يقول...

محمد غالية
يا باشا انت تقشر واحنا نأكل
ده انا اللى باشكرك
وربنا يديم المعروف اخى العزيز

همس الاحباب يقول...

رئيسة حزب الاحلام
الله يكرمك ويبارك فى حضرتك
شكرا على ذوق حضرتك وكلماتك الطيبة
وامين يارب العالمين
تحياتى

همس الاحباب يقول...

جنة
والله يا دكتورة مجرد انك تعلقى عندى
ده فى حد ذاته سعادة بل قمة السعادة
ربنا يحفظك من كل سؤء
ويكرمك يارب
ويوفقنا واياكى الى ما يحبه ويرضاه
تحياتى

همس الاحباب يقول...

كامىليا
الله عليكى انتى
والله دايما متالقة
ربنا يسعدك ويحفظك من كل سوء
ههههههه
اه عيلة نكد
وتوم وجيرى فى اجازة
ربنا يرجعهم بالسلامة
تحياتى اختى العزيزة

همس الاحباب يقول...

حاجات جوايا
ربنا يحفظ حضرتك
ويبارك فيكى وفى اولادك
ويسعدك دنيا واخرة
ويمتعك بالصحة والعافية
ويرزقنا واياكى رضاه
امين يا رب العالمين

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي ِمدونتك
البنر موجود علي مدونتي

ميرا ( وومن ) يقول...

كل ده كلام عن السعاده بس بجد احسن حاجة فيك يا خالد انك متفائل والإجابات حلوة وواقعية

ومازال البحث مستمراً عن السعادة

م/ الحسيني لزومي يقول...

ارسل لي ميلك كي ارسل لك كود البنر حتي يكون البنر متحرك

مجداوية يقول...

السلام عليكم

الانسان بطبعه كما ذكرت طماع وكمان هو خلق فى كبد يعنى غاوى يتعب نفسه وشال الأمانة اللى السموات والأرض أشفقن أن يحملنها فدائما ستجد الانسان متطلع الى ما يفتقده ولا ينظر الى ما يملكه ولا يملأ عين ابن آدم الا التراب

اللى وصل لحالة من الاكتفاء ويمكن الزهد بيكون سعيد لأن من وجهة نظرى السعادة هى الاكتفاء والاستغناء

اجاباتك كلها تدل على انسانيتك الذهبية التى نراها جميعا أخى الكريم زادك الله سعادة ورضا ولكن ملحوظة صغيرة لا تؤثر على صدق وجمال اجاباتك (( ان كنت بطبعك متفائل جدا فلا مكان للتشاؤم ولو قليلا لأن المسلم لا يتشاءم طالما معه الله ولأن كل أمر المسلم خير))

متعك الله بايمانك وقربك من الله وأسعدك فى الدارين

فشكووول يقول...

همس الاحباب .... يا همـــــــــــــــــــــــس
انا ماليش دعوه بالبلد يا ابنى انا بتكلم فى سيدى المحظوظ الله يحظه تلاقى برضه فى اسيوظ سيدى المجذوب وله جامع كبير وميدان كبير باسمه .....
يا همــــس ... الله يحظك

م/ الحسيني لزومي يقول...

تم ارسال كود البنر عبر الميل المرسل

زُمُرده يقول...

جيت اطل على حبيب الكل
لقيته بيقول كلام فل الفل

ههههههه والله جت كده
يلا بقى بختك

ايه الاجوبه التام اووووي دي

عارف لما تقرب من ربنا وترضى
وتقدر لما يصيبك شيءوحش متبقاش زعلان وتلاقي 300 شيء فيه يسعدك وترضى باللي اختاره ليك ربنا
هتبقى في سعاده
اعتقد ده الطريق

وحشتني ووحشني ابو خالد اوووووي

طمني عليك

Mony يقول...

اول دخول للمدونة و مش الاخيرة ان شاء الله

اجابات مرتبة و صادقة

ربنا يرزقك السعادة و الرضا و قرة العين في الدنيا و الاخرة

رندا يقول...

عندما نحب ان نتعرف علي شخص وندخل بداخلة نسئلة
ومن الايجابات نعرف مكنون
الشخص الساكن بداخلة

فلكل منا بداخلة شخص ليس بشخص اخر لا يعرفة بل يعرفة كل المعرفة

ولكن لا يستطيع ان يخرج كل ماعندة من ايجابات دون اسئلة

اجاباتك واضحة وجميلة كما عاهدتة فيك

ويدل على انك من الداخل شخص رائع وجميل ومتفائل
تبحث عن السعادة بهدوء
وتلمسها بحكمة

كم انت جميل ياصديقى وبداخلك جميل
فى زمن عز فية كل جميل

كل الدعوات بدعيها لك

رندا

nona يقول...
أزال المؤلف هذا التعليق.
همس الاحباب يقول...

م/ الحسينى لزومى
شاكر لحضرتك مجهودك واهتمامك
شكرالك اخى العزيز

همس الاحباب يقول...

وومن
ههههههه
شكرا يا ستى بعض ما عندكم
ومازال البحث جارى .
تحياتى

همس الاحباب يقول...

اختى العزيزة مجداوية
شكرا لكلماتك الطيبة
وان كنت اقصد من التشاؤم الحزن وليست التشاؤم فى حد ذاته
لان كل ما يصيب المسلم خير
فان اصابته سراء شكر فكان خير له
وان اصابته ضراء صبر واحتسب وكان خير له
تحياتى وتقديرى

همس الاحباب يقول...

فشكول
مدد يا سيدى المحظوظ
هههههه
ماشى يا عمنا انمشيها المجذوب
نورتنى وسعيد بزيارتك

همس الاحباب يقول...

زمردة
حمدلله على السلامة
وشكرا لكلماتك الطيبة
وربنا يكرمك ويسعدك
وانا الحمد لله بخير
تحياتى

همس الاحباب يقول...

مونى
الحمد لله انها عجبتك
واهلا بك فى اى وقت
سعيد جدا بالزيارة
وشكرا لتشريفك
تحياتى

همس الاحباب يقول...

الاخت العزيزة / رندا ام خالد
ربنا يكرم حضرتك
ده من ذوقك
اشكرك على كلماتك الرقيقة
وانا اللى سعيد بمعرفة حضرتك
تحياتى وتقديرى

همس الاحباب يقول...

نونا
الله يكرمك يا ستى
انا سعيد انى قابلت حضرتك فى التبرع بالدم
وكان نفسى اكمل اليوم
بس حكم القوى
عامة خيرها فى غيرها
والحمد لله انك شايفانى كده
ربنا يسعدك ويكرمك
تحياتى

غير معرف يقول...

اخى الفاضل

اختى الفاضلة

نهاية التساؤل الذى طرحناه على مدونتنا


------------- ( كيفية مواجهة المدونات المسيئة ) ------------------


واليكم رد ادارة مكتوب على خطابنا بهذا الخصوص ..

شكرا لكم تواصلكم معنا

صبرني يارب يقول...

استاذنا تحياتي على التاج

ومن وجهة نظري انا السعاده هى الرضا

بادعوك تشوف البوست ده عندي من ارشيفى

http://raghy-emraao-gheer-mathona.blogspot.com/2008/02/blog-post_18.html

بعنوان لو تقولي ايه هى السعاده

تحياتي لحضرتك على التاج الجميل

اقصوصه يقول...

جميله جدا اجاباتك على الاسئله

سررت بالمرور :)

محمد فاروق الشاذلى يقول...

أخى الحبيب خالد
ما شاء الله إجاباتك تدل على إنك سعيد فعلاً ويارب دايما
بالنسبة لمين يجاوب على التاج؟ اطمن محمد غاليا بعته لكل المدونين تقريبا

Abo 7anf يقول...

السلام عليكم
اجاباتك جميله جدا
السعاده مش مجرد كلمه
وتقريبا محدش عارف طريقها
هى شئ نسبى

emey يقول...

المدونة عجبانى بس انا عايزة اساْلك سوْال انتى عاملة الاغنية ازاى اصلها عجبانى الفكرة والاغنية

maha zein يقول...

لا لا بس سيبك
انت ما شاء الله سعيد وروحك حلوة
واصلا اساسا انت فاتح قلبك للحياه
ان شاء الله تكون سعيد
ولانك كمان بتسعد غيرك فربنا اكيد هيسعدك

انين الحزن يقول...

خاااااااااااالد

طب ساعدني والنبي وخليهم يزودولي المرتب

وانا افرفشك مش اخليك سعيد بس


لك واحشه جامده من عندي كدا لحد اخر المكتب

ابقه اسئل عليا دنا غلباااااااان

سلامووووووووووز


وزة

انين الحزن يقول...

اه صحيح انا نسيت ازعل منك

بقه ياراجل تروح اسكندرية ومتقوليش
والله انت غلس

مش غلس اوي يعني غلس نص نص

قولي بس انك روحت مش طمعانه في اكتر من كده مش عايزة اجي معاك يعني


عارف لو مقلتش المره الجايه

مش هاقول هااعمل ايه

المستنصر بالله يقول...

اجاباتك جميله جدا وواقعيه قوى
ربنا يحقق لك السعادة التى تتمناه

تحياتى لحضرتك

فشكووول يقول...

والله يا همس يظهر الجينات الوراثيه دى لازقه فينا بغيره امريكانى ومش راضيه تسيبنا .. شفت بقى ان كل حاجه لها اصول وفروع ازاى .. اهو يا عم عمنا مينا حكمنا 62 سنه وحط لنا قاعده مهببه بستين هباب

همس الاحباب يقول...

صبرنى يارب
شكرا لكلمات حضرتك
واسعدتنى الزيارة
واعجبنى البوست عند حضرتك
تحياتى

همس الاحباب يقول...

اقصوصه
سعدت بزيارة حضرتك وتشريفك
تحياتى وشكرا على التواصل

همس الاحباب يقول...

قلب مصرى
منور يا ابو رقيه
وربنا ما يحرمنى منك ابدا ولا من زيارتك
تحياتى وتقديرى

همس الاحباب يقول...

ابوحنف
شاعرنا الجميل
نورت ياباشا
وربنا يسعدك دايما
السعادة شىء نسبى اكيد بس موجودة وبنبحث عنها
تحياتى

همس الاحباب يقول...

emy
اهلا وسهلا اختى العزيزة
وشكرا على زيارتك
وانا تحت امرك فى اى شىء
تحياتى
خالد

همس الاحباب يقول...

مها زين
منور يا دكترة
سيبك انت المهم انت اخبارك ايه يا برنز
ربنا يسعدك ويوفقك يا ستى
تحياتى

همس الاحباب يقول...

انين الحزن
وزة ازيك
منورة بلوج سبوت واولاد عمه كمان
اخبارك ايه
يارب تكونى بخير

همس الاحباب يقول...

انين الحزن
ههههههه
لا متزعليش
المرة الجاااية اخدك انتى ومنيع معايا
بس شدوا حيلكم كده
وانا اعزمكم على اسكندرية
يلا خليها عليكى انتى

همس الاحباب يقول...

المستنصر بالله
سعدت بزيارتك اخى الكريم
وشكرا على كلماتك الرقيقة
تحياتى وتقديرى

همس الاحباب يقول...

فشكول
ههههههه
يا خوفى من الجينات دى بصراحة
عايزين نعدلها
مش هو فى تعديل فى dna
ربنا يستر ومايبقاش فيه امتداد للشجرة
تحياتى

فشكووول يقول...

همس الجميل
يا أخى والله مش عارف كل ما اروح عند مدون الاقيه محاسب .. هما المحاسبين ماليين البلد كده .. المشكله انى كمان محاسب وانا بكره المحاسبه .. ربنا يحاسبها بقى
حيحكم 70 سنه واذا ما كملش فيه ملحق .. موتو بغيظكم