18 أكتوبر، 2008

تضامنا مع ... مدون

بسم الله الرحمن الرحيم "
"ولكم فى القصاص حياة يا اولى الالباب "
تضامنا مع الحملة التى يشنها المدون خالد الصاوى ضد وزير الزراعة الاسبق بخصوص المبيدات المسرطنة
هناك وقفة احتجاجية امام دار القضاء العالى يوم الاثنين 20-10-2008 الساعة الحادية عشر ظهرا
مزيد من التفاصيل اضغط هنا او هنا
شكر وتقدير واشادة بالدور الايجابى الذى قامت به رابطة مدونى الدلتا والعمل التطوعى الذى قام به الاخ يوسف الشافعى والاخ رامز عباس تضامنا مع المدون خالد الصاوى المريض بمرض العصر اللعين .
بصراحة الموضوع شدنى واستفزنى فى نفس الوقت انا جايز اكون مواطن مصرى عادى زى الملايين قانع وراضى بالحال ومش عاجبه حال البلد برغم حبى الشديد لبلدى وخوفى عليها علشان كده انا سوف اتحدث عن الموضوع بصفتى انسان مصرى بسيط
لقد تزايد اعداد المرضى بمرض السرطان فى مصر بطريقة ملفتة للنظر فى الاونة الاخيرة وذلك بعد دخول المبيدات المسرطنة الى مصر فى عهد وزير الزراعة الاسبق يوسف والى والكارثة بل الطامة الكبرى انها دخلت بعلم منه اى انه يعلم علم اليقين انها مسرطنة ومع ذلك سمح بدخولها الى مصر ضاربا بكل القيم والمبادىء عرض الحائط وتناسى انه مواطن مصرى قبل ان يكون وزير ومسئول وان المرض سوف يفتك بالمواطنين والاقارب بل نسى انه معرض لذلك المرض ولكن ربما ظن ان مزارعه الخاصة واطيانه سوف تغنيه عن الحاجة الموجودة بالاسواق والمصابة بالمبيدات ونسى ان ابنائه واحفاده ربما تناولوا تلك المنتجات فى احد الفنادق او العزومات الخارجية واصابهم ما اصاب عامة الشعب .
ايها السادة ربما تملكون الاموال للعلاج بالداخل والخارج ولكن هل تملكون المقدرة على تحمل الام المرض اللعين ؟؟؟
عامة الشعب ايها السادة لا يملكون قوت يومهم ناهيك عن تكاليف العلاج الباهظة التى تنوء منها الاسر الغنية قبل الفقيرة
ايها السادة المسئولين اين ضمائركم؟؟ اين الامانة التى حملتوها فضيعتوها؟؟ اضاعكم الله كما ضيعتوا شعوبكم .
اننى لا اسبق الاحداث ولا اشكك فى عدالة القضاء المصرى فى امكانية تبرئة المسئول عن تلك الكارثة كما حدث فى اكياس الدم او حادثة العبارة ولكن هل لوتم تبرئته سيصبح ضميره مستريح ربما ماتت الضمائر!!!
تخيل ايها المسئول ان ابنك او اخيك او قريب للك اصابه ما اصاب تلك المرضى المساكين ما هو موقفك ؟؟
كفانا ايها السادة المعاناة والفقر الذى نعيشه ارحمونا من الامراض وراعوا ضمائركم ولا تبيعوها بحفنة من الدولارات زائلة
لا امتلك الاعتراض على خصخصة المال العام وبيع اراضى الدولة بالملاليم والاحتكار السائد فى شتى المجالات لانى على يقين انها سوف تعود لابناء مصر يوما ما وراجعوا التاريخ يا سادة فمصر من ايام الهكسوس حتى الاحتلال الانجليزى وهى تنهب وتسلب مواردها ولكن جاء يوم عاد فيه الحق لاهله والتاريخ سوف يعيد نفسه وما الحرائق والمتهم البرىء فيها الماس الكهربائى ببعيد ولا الاحتكار وهيمنة راس المال غريبة عنا وان غدا لناظره قريب .
لكن لى حق الاعتراض حماية لمستقبلى ومستقبل ابنائى واحفادى وعامة الشعب المصرى ضد المتاجرة بارواحنا وامراضنا
من حقك ومن حقى ان نضمن لابنائنا حياة خالية من الامراض وان كنا لا نملك قوت يومنا فاولى بنا ان ندافع عن صحتنا .
رضيتم بالخنوع والتطبيع مع العدو الصهيونى مع علمكم بان اليهود لا عهود لهم ولا وعود استوردتم منهم المبيدات والتقاوى الزراعية وتناسيتم انكم اصل الزراعة والحضارة فى العالم منذ القدم ،
جلبتم منهم مبيدات مسرطنة وانتم تعلمون انهم لايريدون لشعوبكم الخير بل المرض .. نعم يريدونا شعب مريض فى ذيل الامم
العدو هو العدو وسيظل الى ان تقوم الساعة يحمل كراهية للعرب والمصريين عامة وللمسلمين خاصة .. هى مسلمات وبديهيات لاتحتاج فطنة ولا ذكاء لن تصفو نفوسهم ابدا ولن يتمنوا لشعوبكم الخير مطلقا .
ايها السادة ان برائتكم ساحات القضاء وماتت ضمائركم وقتلت النخوة فيكم فاعلموا ان مكانكم مزبلة التاريخ وسوف تردون الى عالم الغيب والشهادة وهو العادل فوق عباده سوف يقتص منكم قصاصا عادلا .0
" وحسبى الله ونعم الوكيل "

هناك 19 تعليقًا:

Abo 7anf يقول...

السلام عليكم
ازيك ياستاذ خالد
المشكله ان الناس نسيت الحديث الشريف
كلكم راع وكلكم مسؤل عن رعيته
وبالتالى فا مش بالسهموله انهم يسمعوا كلامنا
لازم الناس تغيرها علشان تتغير
لانها مش هتيجى لوحدها

حنين القلب يقول...

انا قولت اجى اعلق الاول وبعدين اقرى

استنى بقى هقرى وراجعه

حنين القلب يقول...

حسبيا الله ونعم الوكيل
تفتكر يا خالد دول اصلا عندهم دين ولا ضمير يدخلوا البلد مبيدات مسرطنه دى الفلوس عميت عنيهم بقى كل واحد بيقول يلا نفسى مش مهم البلد ولا الناس نتحرق
المهم
هاخد كااااام لما ادخل المبيدات دى
هاخد كاااام لما فلان ولا علان ياخد براءه
هاخد كام لما اخرب واقتل اهد
كله بقى بيسئل هاخد كام
يا ريت حد بيقول دى بلدى ولا دول ناسى
لالالالالالا انسى ده كان
والله ما عارفه اقول ايه غير حسبيا الله ونعم الوكيل فى كل مرتشى وظالم

حنين القلب يقول...

المهم يعنى الفاكهه والخضار بقوا مسرطنين
طيب والنبى هو حد دلوقتى لاقى الاكل ولا الفاكهه
الحمد لله
انا عرفت دلوقتى هما بيغلوا ليه علشان مش نشترى ولا يجى لينا سرطان

الناس دى بجد طيبه وقلبهم كبير
وكمان عملوا لينا مستشفى للسرطان
واد يا خالد هات ودنك اقولك حاجه

(يكونش الراجل ده دخل المبيدات المسرطنه دى علشان يبقى للمستشفى دى قيمه واهميه والله يعملوها )

حنين القلب يقول...

خالود بص بقى يا سيدى
سيبك انت من الاشاعات دى ولا يهمك من الكلام ده
احنا الفراعنه
المصريين اهما حيويه وعزم وقوة
ومش فيه حاجه بتعوا فينا
يعنى اشترى 24 كيلو فاكهه واقعد كل فيهم
ماااااااشى
وبالهنا والشفا

~*§¦§ Appy §¦§*~ يقول...

خالد افهم تعليقى كويس
خالد الصاوي مشكور على جهده اوي بس كان فين من زمان من اول الموضوع ده وليه مطلعش بيه من قبل ما يكتشف مرضه طيب ما مصر ياما فيها هو احنا مش نتحرك غير لماالمصيبه تحصل لنا ولا ايه

مش بقلل من مجهوده ولا غيره بس معتقدش هيكون لها تاثير من زمان لبسوا العمه ليوسف عبد الرحمن والتاني طلع منها
كل يوم المبيدات بتظهر الوقفه المفروض ضد استيراد المبيدات المسرطنه وانهم يدوروا عليها فى السوق ويبلغوا عنها تفتكر حد هيعمل كده
تفتكر الحكومه هتتحرك بدون ما واحد يكون عنده ضمير ويحرق الحاجات دي
تفتكر شركه ايزيس اللى قرفانا بالاورجنيك بتاعها هتبطل تقول انا بضحك عليكم ولا اللى بقى بيقلدها هيعترف
هيقولوا انها بياخدوها من مزارع عاديه الاورجنيك غالى اوي ودول بيستعبطوا
هو ايه بيض اورجنيك دي اذا كان الفراخ بتتسمن بهرومنات
ربنا يرحمنا وربنا معاه

شفقة هانم واحسان بك يقول...

ربنا ينتقم منهم بجد .....بحيك على البوست واختيار الموضوع

mohamed ghalia يقول...

ايها السادة ان برائتكم ساحات القضاء وماتت ضمائركم وقتلت النخوة فيكم فاعلموا ان مكانكم مزبلة التاريخ وسوف تردون الى عالم الغيب والشهادة وهو العادل فوق عباده سوف يقتص منكم قصاصا عادلا
لعلهم يسمعون أو يعقلون أو تستيقظ ضمائرهم
تقبل تحياتى
دمت بود

رامز عباس يقول...

نشكرك لجهدك معنا

واعتقد انك يجب ان تتطلع علي البوست الجديد فالرابط بتاعي عنك


يتكلم عن الموعد القديم تم التغيير للساعه 11 بحضور اعضاء حركة كفاية

وومن يقول...

خالد

حتي لو برئتهم ساحات المحاكم زي ما بتقول دي بدايه لينا كشعب علشان نطارد كل واحد تهاون في حقوقنا تهاون في أدميتنا

عاشقة القمر يقول...

لهم حساب عند ربنا يستمتعون في دينا وفي الاخر يتعذبون عذاب شديد
وحسبنا الله نعم الكويل فيهم

واحدة مفروسة يقول...

السلام عليكم
حسبنا الله و نعم الوكيل
و الله الواحد مش عارف يقول ايه و لا يعمل ايه
انا ليا استفسار واحد بس
هل يا تري يا هل تري
الناس المسؤلة اللى بتسمح بدخول المواد المسرطنة و لا رش المبيدات الفتاكة اللى بتفتك بالشعب بياكلوا من نفس المنتج اللى بناكل منه؟؟؟
و لا ليهم مزارع خاصة؟؟؟
ديه حاجه تفرس
استغفر الله العظيم
مسير حد فيهم ان ما كانش كلهم ان شاء الله يدوقوا اللى الشعب بيتعرض له من امراض و معاناه
ما هيه الحياة ديه عاملة زي الرسم البياني
مهما طلع لفوق مسيره ينزل تحت
سلام

دعاء مواجهات يقول...

فعلا ليس لدينا سواها

حسبنا الله ونعمالوكيل

تحياتى ليك
اخى الكريم



سلام

موناليزا يقول...

ربنا يسلمك من كل شر اخى الكريم
بصراحة انا اول مرة اسمع الموضوع ده منك دلؤتى
ربنا يسدد خطاكم
وعايزين تقوللنا ايه اللى حصل النهاردة

همس يقول...

السلام عليكم

ازيك يا ابو همس

يارب تكون بخير

بص فى الحوار دا كلو

احنا بنستنى المصيبه تحصل والناس تموت وتشل والراجل يتنيل يطلع من منصبه

وبعدين نتحرك

يعنى حتى لو وقفتوه فى ميدان عام واضرب بالجزمة لحد ما يموت

مش هيرجع اللى راح

بس على العموم انا معاكم قلبا وقالب

وانااول ضربة جزمة ادهالو

حسبنا الله ونعم الوكيل فيهم

صحيح هموسه عامله ايه؟؟؟

قلب مصرى يقول...

أخى الحبيب خالد
للأسف لم أقرأ البوست إلا يوم الثلاثاء 21/10 أى بعد يوم من موعد الوقفة، لكنى أتضامن معكم فيما يلى ذلك من إجراءات وحسبنا الله ونعم الوكيل

خواطر ليست عابرة يقول...

حسبي الله ونعم الوكيل في كل مسئول لم يرع حقوق الناس وواجبات المسؤولية الملقاه علي عاتقه
مش عارف الناس دول اتربوا في مصر ووسط الشعب المصري ولا هم جايين مستوردين من إسرائيل
وفين الباشا الكبير من ده كله
فضل سايبه لحد ما ريحته فاحت وعفنت قام قال لما أشيله قبل ما الشعب يقول علية متواطئ معاه
وبعد ما شالو يا ريته(الباشا الكبير) حاكمه.

مجداوية يقول...

السلام عليكم
دائما حاضر أخى الكريم فى كل المواقف مساندا للجميع فى أفراحهم وأتراحهم جزاك الله كل خير
اسمح لى أننى نوهت عن هذه التدوينة عندى من قبل أن اعلق هنا وعلقت عليها هناك
وكتبت أن المسئول الساسى عن دخول هذه المبيدات ليس يوسف والى فقط فمحاكمته هو فقط ينطبق عليها المثل البلدى مقدروش على الحمار قدروا على البردعة فذا كان يوسف والى هو البردعة فعلى من يريد الحصول على عفوووو التصريح لمن يرمز الحمار ؟؟؟
ربنا كريم

fashkool يقول...

تسمح لى ادخل :
هناك مؤامره على صحة وحياة المواطنين المصريين واطراف هذه المؤامره من الداخل والخارج .. انت ناسى البضاعة اللى كانت مستورده من اوربا واللى كانت كلها اشعاع ايام تشيرنوبل ..الغرقى على شواطئ ايطاليا واليونان .. عبارة الموت فى البحر الاحمر .. شبكة الطرق المميته داخل البلد واللى ضحاياها سنويا بالآلاف.. لو حبيت اعد لك مشحخلص لان القائمه كبيره .. تمنياتى بالشفاء لزميلك وتحياتى