29 مايو 2008

دقيقة سكوت لله

**** ياهـــــل المغنـــى****


يااهل المغنى دماغنا وجعنا

دقيقه سكوت لله

داحنا شبعنا كلام ماله معنى

ياليل وياعين ويااّه

========

طلعت موضه غصون وبلابل

شابط فيها حزين شاكى وباكى

وقال موش عارف

يشكى ويبكى لمين

واللى جابت له الداء والكافيه

طرشه ماهش سامعاه

يااهل المغنى دماغنا وجعنا

دقيقه سكوت لله

========

ردى عليه ياطيور بينادى

وارمى له الجناحين

وانت كمان يابور الــــوادى

قل له رايح على فين

قل له اياك يرتاح يابابـــــوره

ويريحنــــــــــا معــــــاه

ياهل المغنى دماغنا وجعنا

دقيقه سكــــــوت لله

==========

كل جدع فرحان بشبابه

يقول فى عنيه دمـــوع

ياللى جلبتى شقاه وعذابه

حلّى لنــــا الموضــــوع

طالع نازل يلقى عـــــوازل

واقفــــــــه بتستنــــــاه

ياهل المغنى دماغنا وجعنا

دقيقه سكوت لله

==========

حافضين عشره اتناشر كلمه

نقل من الجـــــــــورنال

شوق وحنين وأمل وأمانــــــى

وصد وتيـــــــه ودلال

واللى اتعـــاد ينزاد ياخــــــــــوانا

وليل ونهــــــــار هـــوّاه

ياهل المغنى دماغنا وجعنـــــــــــا

دقيقه ســكوت لله

************

قصيده ياهل المغنى

للشاعر محمود بيرم التونسى

عجبتنى قوى وصورت حال المغنى

فى عصرنا الحالى

مع انه كان كاتبها فى زمن الطرب الاصيل

يا ترى لو سمع اللى بنسمعه حاليا كان ايقول ايه

نيابة عنه احب اقولهم برده

ياهل المغنى دماغنا وجعنا

دقيقة سكوت لله

هناك 74 تعليقًا:

أم أحمد المصرية يقول...

ايه ده و اول تعليق كمان و لزجل جميل جدا لبيرم التونسي اللي كلامه زي ما يكون كاتبه اليوم انا بحبه جدا خصوصا القلب يعشق كل جميل من اجمل ما قرأت من ازجال
ادعوك انت ايضا لقراءة جديدي

امل يقول...

السلام عليكم
اعتقد انه لو كان سمع اغاني اليومين
دول كان لغى القصيدة دي وكتب واحدة
يقول فيها سكوت على طول مش دقيقة بس
بس قصيدة دمها خفيف قوي
تحيـــــاتي

رئـــــيسـة حزب الأحلام يقول...

امال لوسمع اللى احنا بنسمعوا كان عمل اية دة كان قال كلام تانى
كان قال ياهل المغنى سنه سكوت
عشان نقدر نميز الصوت
مش عارفين دة صوت راجل ولا صوت كتكوت
ياهل الغنى عنينا كمان وجعتنا
من كليبات مالاهاش معنى
كويس انه مش موجود معانا دة كان قال ماسكتش على اهل المغنى
تحياتى لك

Abo 7anf يقول...

خالد باشا
الراجل قال يااهل النغنى
انما لو غناها لينا مش هيعرف يقول مغنى
تبقى يا اهل الفيديو كليب
ياهل ....
دا ربنا رحمه ان مش موجود دلوقتى

فاتيما يقول...

أزيك يا خالود
عاوزة أشكرك على اللقاء الجميل بتاع النهاردة و مبسوطة قوى بيك و بأبى الغالى الراجل الطيب أبوخالد...
و عاوزة مرة يبقى عندى دم و ذوق و أشكر فى ساعتها موش عارفة ليه بنسى بس عاوزة أشكرك جدا على القهوة الجميلة اللى عزمتونى عليها و مكنش عندى دم أقولكم ميرسى و ربنا يجعله عامر دايما ...
سماح بقى الألزهماير منت عارف إنى حنت بحتفل بالغيد الماسى من أسبوع على حسب رواية واحد صاحبنا متعرفوش
تحياتى يا أبو همس الغالى

رئيس جمهوريه نفسى يقول...

كان هيقولهم محدش يتكلم ولا يفتح سيرة اصلا ولا يقول يا غنى
اختياراتك حلوة يا خلود

رحاله يقول...

بسم الله
السلام عليكم
بجد جميييييييييييييييله اوى اوى
جزاكم الله كل خير
تحياتى

غير معرف يقول...

خالد باشا


الحفل سيكون بالمركزالثقافي بالمنيرة

الساعه 6 حسب اتصالي بمدير الفرقة

رندا يقول...

خالد

اسمك لفت نظرى لانة من احب الاسماء الى قلبى
وايضا شاهت الصور فى مدنة احمد الصباغ وكانت صورتك بجانب ابو خالد
ففرحت جدا بها
ولفت نظرى جدا اسم مدونتك
همس الاحباب
عجبى جدا الاسمين اذاى بقى مش اجى عندك

تحياتى وتقبل مرورى


رندا

Empress appy يقول...

خد بنادول يا خالود او انطح خروف من بتوعي ودي مجربه هههههههههههههه
ولا هما هيبطلوا ولا احنا هنسمع لهم

همس الاحباب يقول...

ام احمد المصرية
منورة اول تعليق واخر تعليق كمان
طبعا انا بحب زجل بتاعه قوى
وبصراحة انا زهقت من اللى باسمعه اليومين دول
تمت الزيارة والموضوع رائع بحق
تحياتى وتقديرى
خالد

آخر العنقود يقول...

ياريتهم يسكتوا خالص ويريحونا
بس على راى آبى ولا هما هيسكتوا ولا احنا نسمعهم
ههههههههه
وربنا يرحمنا ويسترها علينا
ويهينا ويهديهم

تحياتى ليك

همس الاحباب يقول...

امل
هههه
بصراحة اهفعلا سكوت على طول
شكرا لزيارتك وكلماتك الرقيقة
تحياتى

همس الاحباب يقول...

رئيسة حزب الاحلام
استاذة سلوى ازيك واخبارك ايه
ههههههههههه
بجد كلماتك جميلة وتنفع زجل كمان
مش عارفين صوت راجل ولا صوت كتكوت
ههههههههههههه
بجد فطستينى من الضحك
والحمد لله انه مش موجود زمان جاءتله ذبحة سمعية من الاصوات الموجودة
تحياتى وتقديرى

همس الاحباب يقول...

ابوحنف
منورنى يا باشا
والحمدلله وربنا يرحمنا من اللى بنسمعه
تحياتى وتقديرى

همس الاحباب يقول...

ام يوسف الغالية
هههههه
بجد انا اللى كنت سعيد جدا جدا بوجودك ونورتينا طبعا وانا اللى محظوظ بجد لانى كنت قاعد مع ناس رائعة وزى الفل والدنا العزيز ابو خالد وام يوسف اطيب قلب فى الدنيا
يعنى زى مابيقولوا كده لقاء السحاب بين اطيب قلبين فى عالم التدوين فاتيما وابو خالد
اه جينا لكلام العيال الصغيرة هههههه
يا اختى ما فيش شكر بين الاب وبنته ولا الاخ واخته ليكى علينا المرة الجاية انجيب كتكوت صغير وندبحه احتفالا بيكى حلو كده شايفة الكرم
ههههههه انا واخد بالى من الزهايمر حكم السن بقى
انتى تعرفيه انا ما اعرفوش بصراحة
تحياتى وتقديرى لاختى العزيزة ام يوسف

همس الاحباب يقول...

رئيس جمهورية نفسى
محمود باشا
منورنى يا باشا
كان ايقولهم نقطونا بسكوتكم ههههههه
بعض ما عندكم يا باشا
تحياتى وتقديرى اخى العزيز

همس الاحباب يقول...

رحاله
وعليكم السلام ولرحمة الله وبركاته
سعيد جدا بتواصلك ومنورانى دائما
وميرسى لكلماتك الرقيقة
تحياتى

همس الاحباب يقول...

رامز عباس
ربنا يكرمك
وجزاك الله خير
ان شاء الله احاول اجى
بس انا بخلص شغل الساعة 8 مساء
تحياتى وتمنياتى بالتوفيق لحضرتك

همس الاحباب يقول...

رندا
عجبك الاسمين
طب الحمد لله
ومال مش بتيجى ليه
ده حتى المدونة هواها بحرى وجنب النيل مباشرة هههههههه
بجد انا سعيد جدا بزيارة حضرتك ومنورانى دائما ويارب المدونة تنال رضا حضرتك
وانا زرت مدونتك الاكثر من رائعة ويا ترى خالد ده اسم ابنك مش كده
تجياتى وتقديرى
خالد

همس الاحباب يقول...

اختى الغالية قوى / ابى هانم
هههههه
مش بحب الادوية يا اختى
ممكن انطح خروف اسهل بس خايف الدم يبهدل الكوكب عندك ولا انا ما عنديش دم صح اتحرق كله هههه
على فكرة كنا مفتقدينك قوى امبارح
تحياتى وتقديرى

همس الاحباب يقول...

اخر العنقود
الاخت الرقيقةامانى
يارب يهدينا ويهديهم
ويريحنا من اصواتهم
منورانى دائما وسعيد بمرورك
تحياتى وتقديرى
خالد

عًٍمًرٌٍوٍ آلنْوٍبٌَِى يقول...

كلام جميل طبعا ده بيرم التونسى

بس على رأيك لو كان شاف وسمع حال المغنى دلوقى كان عمل اية .....؟؟

اكيد كان انتحر وريح نفسوووو

بجد بوست زى العسل تسلم ايدك

تحياتى

رئيس جمهورية اسوان العربية

وياريت تشرفنى فى المدونة بتاعتى

funckydoctor يقول...

مش دقيقة لأ أكتر شوية يا ريت

Soooo يقول...

عارف يا خالد
بيرم التونسي وبديع خيري وفؤاد حداد وناس كتير كتييييييير زيهم .. سبقو عصرهم بعصور

اللي قالو بيرم ينفع دلوقتي وامبارح وبكره وبعد خمسين سنه
هي دي عبقرية الكلمة
هي دي قمة النبوغ الفكري

اقولك .. في حاجه اسمها هاتجن ياريت ياخواننا مارحتش لندن ولا باريز .. دي حاجه بيرم كاتبها من ايامو .. يعني بقالها بتاع ردح من الزمن .. ومع ذلك لو سمعتها دلوقتي تحس انها لسه مكتوبه امبارح

الله يرحمك يابيرم
والله يرحممنا من المغنى بتاع دلوقتي

سلامي لهمس



سلاموووووووووز

أبو خالد يقول...

أبنى الحبيب الغالى /خالد
لا أجد كلمات تناسب تعبيرى عن فرحتى
عندما كنت معى ..
و عندك حق فرق شاسع بين غناء اليوم و
الأمس ..و من أجل هذا مريح دماغى من سماع الأغانى ..
و ده لا يمنع من سماع و جيه عزيز
مطرب عملاق يحترم نفسه و تستمتع بسماعه
دمت إنسان نبيل و على خلق عالى

الربان يقول...

تحياتي

احييك...اول مرة اقرأ القصيدة بالكامل...شكرا لك.

انه عصر التكونلوجيا...التجهيزات و الاعدادات الخاصة بالصوت مثل مضخمات
الصوت و مكبرات الصوت...و برامج الكومبيوتر الخاصة بالصوت....جعلت من الممكن جدا ان اي انسان يغني...طالما عنده من المال ما يكفي...و رزق الهبل
علي المجانين....

تحياتي و تقديري....

Tamer Nabil Moussa يقول...

السلام عليكم

كلامك سليم ياخالد

المشكلة فى الفن الايام دى اصبح تحارة عن اى شىء اخر مش مهم الصوت مش مهم الجودة المهم الفلوس

وكمان الوسط دة سيطر علية مجموعة من محبين الجشع والخلاعة ولايسمحون لااى فنان اصيل للدخول الى العالم الفنى

مما اثر على الساحة الفنية

ربنا يوفقك

تحياتى

غير معرف يقول...

دماغنا وجعتنا بجد
من الدنيا الخربانه وانا مش انا وكل حنجوري بيجعر فى الشارع وفاكر ان صوته فزيع وختير
الناس دى لما باسمعها بابقى نفسي اولع فيهم
بس برضه ماننساش ان فيه ناس كتير كويسه قوى فى جيلنا ده
ومش تمام اننا ننقد الوحش لدرجة تنسينا الحلو
تحياتى

موناليزا يقول...

احييك على امانة النشر
فكرتها فى الاول كلماتك وقلت استاذ خالد شاعر كبير ومخبى علينا
بس بجد اختيار موفق

قوس قزح يقول...
أزال المؤلف هذا التعليق.
قوس قزح يقول...

مكنش هيقول اهل المغنى لان دلوقتى مفيش اهل مغنى

كان هيقول
يا اهل المرقص دماغنا وجعنا
دقيقة ثبات لله
ده احنا شبعنا هز مالى حياتنا
يا هىء و يا مىء و يا اه

حنين القلب يقول...

والله عندك حق يا ابو همس
دماغنا وجعناااااااااااا
ومفيش احلى من كلام التونسى
تسلم ايدك بجد
الا قولى بالمناسبه سمعت اغنيه العبد قال للشيطان دى مكسرة الدنيا فى اسكندريه اغنيه من الاغانى الهابطه ابقى اسمعها علشان تقول دماغنا وجعنا انا بتبقى مفروضه عليه فى الباس بتاع الشغل كل يوم على الريق لما شويه وهيجيلى الضغط
ربنا يستر عليه ويرحمنا جميعا
سلام يا خالد

اهو ده عيبه يقول...

اولا دى اول مرة ازور المدونة بس ات شاء الله ابقى زبونة مستديمة

عم بيرم كانه مغابش عننا لحظه وكل كلمه بتعبر عن حال الاغنيه فى زمانا ده ولو انى متاكده انه لو كان موجود دلوقتى كان مات الف مرة من اللى ممكن يشوفه ويسمعه

تحياتى لك

rtrcbh يقول...

السلام عليكم ورحمه الله وبركاته
والله ربنا يكرمك على نقل القصيده دى
فعلا الواحد خلاص لم يعد يتحمل مايسمعه
الرائع والمبدع بيرم التونسى كل اعماله تصلح لعصرنا الحالى كانت الانتخابات المحليه الماضيه وانا ابحث فى اعماله وجت له قصيده تتحدث عنها وعن التزوير فيها رغم انها من نصف قرن
سبحان الله وكانه يروى الواقع الحالى
أحييك
وفقكم الله

rtrcbh يقول...

السلام عليكم ورحمه الله وبركاته
والله ربنا يكرمك على نقل القصيده دى
فعلا الواحد خلاص لم يعد يتحمل مايسمعه
الرائع والمبدع بيرم التونسى كل اعماله تصلح لعصرنا الحالى كانت الانتخابات المحليه الماضيه وانا ابحث فى اعماله وجت له قصيده تتحدث عنها وعن التزوير فيها رغم انها من نصف قرن
سبحان الله وكانه يروى الواقع الحالى
أحييك
وفقكم الله

(احمد سكر ) يقول...

ايه ياعم خالودا

الجمال دا

زجل

دا ودانك طلعت حلوه

هههههههههه

تحياتى اخى الفاضل

احمد

حاجات جوايا يقول...

السلام عليكم
جبتها منين دى ؟
هههههههه
بتهيألى لو كان موجود دلوقت كان قال سنة سكوت لله
من المهازل اللى بتحصل دلوقت

دمت بخير أخى

قوس قزح يقول...

خالد لك عندى تاج .. تعالى خدوه بقى لحسن تقيل اووى :)

عبده الرايق يقول...

ابو همس حبيب قلبى
معلشى اخوك الرايق جالك متأخر
عموما انا مستعد لاى غرامه
انا بحب الزجل جدا جدا ومعجب جدا ببيرم التونسى
وانا عندى بعض ازجال من تأليفى لكن مخبيها علشان الناس تأكل عيش
وحشنى يا خالد

بسمه عبدالباسط يقول...

لو سمع اللى بنسمعه كان اتمنى انه يموت وينسى كل اللى بيحصل

Unknown يقول...

انتقاء جميل
عارف فى كل العالم العربى مرفوع شعار
اكثر من مغنى لمواطن واحد


كل الاحترام

دعاء مواجهات يقول...

هههههههههههههه

عندك حق والله بجد

لو عاايش دلوقتى كان قااال:

ارحمووناااااااااا سنة سكووت لله


تحياااتى لييك ياخالد...

- شفت وزة وتطنيشها وكمان غيرت نمرتها وف البيت محدش بيرد..

تعرف انت حاجة عنها؟؟

لو تعرف طمنى

بيييس.....

همس الاحباب يقول...

عمرو النوبى
مشرفتى يا بن العم
واهلاوسهلا بيك وباهل اسوان الجميلة
عندك حق طبعا
واكيد ازورك طبعا
تحياتى

همس الاحباب يقول...

فنكى دكتور
منورنى يا باشا وخليهاسنة ويوم علشان خاطرك
تحياتى

همس الاحباب يقول...

سووووو
حليب قلبى من جوه
خطوة عزيزة يا شيخ
ههههههه
طبعا عندك حق فعلا هو سابق عصره بمراحل وتحس انه عايش بينا
تحياتى وتقديرى يا باشا

همس الاحباب يقول...

والدى العزيز / ابو خالد
انا اللى كنت سعيد جدا جدا بحضرتك
وربنا يديم عليك الصحة وتنورنا دائما
يارب يرحمنا ويهدينا لما يحبه ويرضاه
انا فعلا مش بحب اسمع اغانى اصلا
بس الميكروباص والتكوكتوك فى الشارع بسم الله ما شاء الله بيجيبوا اغانى درر بصراحة
تحياتى وحبى لوالدى العزيز

همس الاحباب يقول...

الربان
استاذى العزيز منورنى دائما
عندك حق فيما تقول كله من التكنولوبيا
تحياتى وتقديرى

همس الاحباب يقول...

تامر نبيل
منور يا باشا
وكلامك صحيح وواقعى
ربنا يرحمنا
تحياتى وتقديرى

همس الاحباب يقول...

وينكى
منورة الدنيا كلها
طبعا انا متفق معكى انه فيه ناس صعب تسمعى صوتها
وفيه ناس كويسة طبعا
تحياتى

همس الاحباب يقول...

الاخت العزيزة / موناليزا
طب الحمدلله انى شاعر بس مش شاعر كلمات
شاعر بالكارثة اللى احنا بنسمعها فى الميكروباصات وبيقولوا عليها اغانى
تحياتى وتقديرى

همس الاحباب يقول...

قوس قزح
هههههههههه
عندك حق يا ام نور
فعلا بقت رقص وعرى اكتر منه مغنى
تحياتى وتقديرى

همس الاحباب يقول...

حنين القلب
منورة يا ستى
مع الاسف سمعتها وكل يوم باسمعها فى التوكتوك او المواصلات واحيانا على المحمول فى الشغل من زملائى
هو انا زهقت من شوية
تحياتى وسعيد بمرورك

همس الاحباب يقول...

اهو ده عيبه
استاذة داليا
منورانى وسعيد جدا بزيارة حضرتك
وانا مقصر معاكى معلش
تحياتى وتقديرى

همس الاحباب يقول...

د/ ابو يحى وادم
منورنى وسعيد بزيارتك
وفعلا التونسى رائع جدا
تحياتى اخى الكريم

همس الاحباب يقول...

سكر
منور يا باشا
وانا اروح جنبك فين يا باشا
معلش اخوك الصغير واتحملنى
هههههههه
تحياتى وتقديرى

همس الاحباب يقول...

سالى
جبتها من عند عم بيرم التونسى
ههههههه
او كان فال بلاها مغنى ورش ميه
وكل واحد يغنى قدام بيتهم
تحياتى وسعيد بزيارتك

همس الاحباب يقول...

قوس قزح
ام نور ليه كده كفاية تاجات
التاج ده للمرة التالتة
والتالتة تابتة
حاضر ياستى تحت امرك

همس الاحباب يقول...

عبده الرايق
انتى اللى وحشتنى موووت
وبجد مفتقدكانت وفرنسا هانم
انا فعلا مشغول الفترة اللى فاتت بس متابعك بجد وفى انتظارك دايما
وانت من امتى بتدفع غرامات يا رايق
خلى الطابق مستور
وبعدين بلاش زجل والنبى كفاية حرام
عايزين نسمع الرايق
ههههههه
تحياتى وحبى واشواقى لحبيب قلبى من جوه

همس الاحباب يقول...

bos bos
منورنى وسعيد جدا بزيارتك وتواصلك
تحياتى وتقديرى

همس الاحباب يقول...

نهر الحب
ميرسى لكلماتك الرقيقة
وسعيد جدا بتلك الزيارة
تحياتى وتقديرى

همس الاحباب يقول...

دعاء مواجهات
منورة يا اختى
وخليها العمر كله سكوت
وزة اه شفت وسمعت طبعا الطبع المنوفى ايشتغل مع انى كنت واخد صورة حلوة عن المنوفيه بس خلاص راحت ههههههه
انا زيك والله من ساعة ما غيرت رقم تليفونها وانا معرفش عنها حاجة
لو فى جديد ابلغك
تحياتى

فرنسا هانم يقول...

اخى خالد
دخلت اسجل حضورى واسلم عليك
لقيتك حاطط صورتى عندى
شكرااااااااااااااااااااا

اتحادالمدونين المصريين يقول...

اخى الفاضل

اختى الفاضلة

عضو اتحاد المدونين المصريين

انصحك بالتواصل مع موضوع لحمايتك مما

قد يوقعك تحت طائلة القانون ونحن نعمل

لمصلحتك وحمايتك ..

فى انتظارك بمدونة الاتحاد ولك كل الشكر

نعمل من اجلك ولوجه الله
------------
العزيزة الغالية
همس الاحباب
اين شعار الاتحاد ؟

كاميليا بهاء الدين يقول...

D:

اخيرا عرفت ادخل المدونة بتاعتك

كان لازم اروح هانوفر يعنى؟؟

المهم

ازيك؟ يارب تكون بألف خير

بيرم التونسى ده من احب الشعراء لقلبى
بيعجبنى حزنه ويأسه واستسلامه وقتاله وبسالته ,, يااااه شاعر اسطورة
وأجمل ما فى شعره انك عمرك ما تحس انه من زمان,, دايما تلاقيه بيلمس ايامنا دلوقت.

احييك ياخالد على الاختيار

سلامى لهمستى ربنا يحفظها يارب

تحياتى

Asmaa mahaba يقول...

ههههههه لو سمع حاليا ممكن ينتحر او يقول يا اهل المغنى الله يحرقكم وجعتوا روسنا اصل بجد كل من هب ودب يغنى واى واحده تعرف تلبس سورى اقصد تقلع تغنى عارف بيفكرونى بالواحد لما يستحمى يتسطل من لميه والنضافه ويغنى فى الحمام
عموما ربنا يهدى انا عن نفسى مليش فى الهجص الجديد دا نا خرى ام كلثوم وعبحليم ولو احتاجت اتقرف بسمع نجوم تف ونم
تحياتى ليك سومه_87

همس الاحباب يقول...

فرنسا هانم
عندنا يا مرحبا يا مرحبا
نوركم غطا على الكهربا
الف مليون سلامة عليك يا خالتو
وحشتينا من هنا لحد السويس يجى دشليون مرة ههههه
منورانى بجد وسعيد بزيارتك

همس الاحباب يقول...

اتحاد المدونين
اشوف الموضوع
وابقى ارد عليكم
شعار ايه

همس الاحباب يقول...

اختى العزيزة / كاميليا
ازيك منورانى والله
وسعيد بزيارتك
مع انى عنوانى مش يتوه خالص
طبعا بيرم التونسى ده مبدع بصراحة
تحياتى وتقديرى

همس الاحباب يقول...

الاخت العزيزة سومه
سعيد بزيارتك قوى
ويشرفنى زيارتك دائما
هههههههههه
عندك حق طبعا
الحمد لله انك بتسمعى ام كلثوم وعبدالحليم كفاية قوى
تحياتى وتقديرى
خالد

nigro يقول...

خالد باشا
إزي حضرتك يا فندم
يا رب تكون بخير
أنا عارف إن حضرتك ممكن تكون مش فاكرني و لو فاكرني يبقى زمانك بتقول عليا واد مايستاهلش السؤال
أنا عارف إني كنت مقصر معاك جامد
بس ياريت تكون عاذرني لأني في موضوع التواصل ده ماعجبكش خالص
بس ده كان الفترة اللي فاتت إنما خلاااص أنا خلصت دراسة و خلصت امتحانات و بقيت فاضي ذهنياً
يا ريت لو كنت زعلان .. ما تزعلش بقى
ماشي

صحيح يا خلود انت ماتعرفش حاجة عن وزة؟
لحسن ده أنا كنت بتصل بيها و ألاقي تليفونها مغلق و عرفت من تعليق دعاء عندها إنها غيرت تليفونها
على العموم او ليك اتصال معاها قولها ألف ألف ألف مبروك على خطوبتها و قولها إني فرحت ليها من قلبي بجد
قولها كمان إنها واحشاني قوي و واحشني "سادساً" منها قوي
و خليها تطمنا عليها بقى و ماتبقاش وحشة كده

لتاني مرة يا ريت ماتكونش زعلان

يلا سلام

Tamer Nabil Moussa يقول...

ازيك ياخالد

احبارك اية


فى انتظار الجديد

تحياتى

همس الاحباب يقول...

نيجرو
وحشتنى يا باشا
وحمدلله على سلامتك
منورنى دايما
ما تقوليش كده انت دايما على بالى وبادعيلك بالتوفيق
انا عارف انك فى امتحانات
انا اللى مقصر فى السؤال عنك
ويا عم ولا يهمك كفاية نورك عليا هههه
اه وزة اتغير رقمها انا كلمتها امبارح وهى بتسلم عليك قوى قوى
وبتقولك ربنايوفقك فى الامتحانات واتكلمك قريب
تحياتى

همس الاحباب يقول...

تامر نبيل
ازيك يا باشا
معلش انا مقصر معاك قوى بس ظروف الشغل معلش
تحياتى وتقديرى
خالد