12 ديسمبر 2010

ما بعد البؤجة


من الصعب ان تبدا خطوة للامام وتتبعها خطوات الاخرين وفجاة تجد نفسك تتراجع خطوات للخلف ومطلوب من الاخرين ان يتقدموا للامام وكأنك بشر وهم ملائكة احساس انتابنى قبل لقاء البؤجة الاخير كان بداخلى احساس بالهروب من ذاتى ومن الاخرين ،احساس بداخلى يدعونى بالبعد وترك الساحة لمن هم افضل منى واقدر على  العطاء والحمدلله انهم كثيرون .
ولكن هناك شىء اكبر من كل هذا انه ثقة الاخرين فيك وتشجيعهم لك على مواصلة خطواتك للامام  والبعد عن الهروب لاى سبب من الاسباب ربما اكون بطبعى شخص غير انهزامى ولا اقبل بالانسحاب مهما تكن الظروف والمبررات لانه من الافضل لك ان تعيش رجلا ليوم من ان تعيش دهرا جبانا .
مقدمة لا داعى لها ولا مبرر لها غير تذكرة النفس والاخرين باننا طالما بدانا خطوة للخير لايجوز التراجع عنها مهما تكن الاسباب
ونبدا الحكاية من جديد حكاية كل شاب وفتاة كل رجل وسيدة حكاية كل مدون ومدونة ساهم وشارك معانا فى البؤجة منذ بدايتها وحتى البؤجة الاخيرة شكرا ليكم وجزاكم الله خيرا وجعلها فى ميزان حسناتكم جميعا .
الفكرة بدات صغيرة وباعداد لا تتجاوز أصابع اليد الواحدة ولكن بتوفيق من الله وبفضل مجهود الاخت قوس قزح ورحاب وفاتيما وخيخة وكل المدونين الذين شاركوا بمالهم ووقتهم ومجهودهم ودعواتهم اصبحت البؤجة من اكبر واهم التجمعات  الخيرية بين المدونين .
بؤجة الخير الاخيرة كانت مختلفة عن البؤج السابقة فى كل شىء من حيث الحضور  وكم التبرعات العينية والمادية .
اولى تلك الاختلافات المشاركة الفعالة والحضور المميز لاهل اسكندرية المارية( مارو قلب القطة - ودودو عاشقة الرومانسية  - ايمان الحب الجميل وبنتها علياء )  لان حضورهم اعطى اليوم طعم ومذاق خاص فلهم منى كل تقدير وشكر وعرفان لان  الكلمات لاتستطيع وصفهم وتبخسهم كثيرا من حقهم لذا ادعوا الله ان يجعله فى ميزان حسناتهم جميعا
والحضور الدائم والمشاركة الجميلة من اهل بور سعيد اللى  بينورونا دائما فى اعمال الخير نهر الحب ونسمة اختها سفراء الخير دائما والمشاركة الفعالة من اهل الشرقية والمنصورة وطنطا والاسماعيلية وكل محافظات مصر سؤاء من حضر أو اتصل تليفونيا  وشاركنا  فرحة اللقاء .
شكر لاهل السودان الشقيق متمثل فى الاتصال الدائم من عاشقة القمر للاطمئنان على الجميع شكرا يا سمية ، وشكرا دكتورة علا على المكالمات الدائمة وافتقدنا وجودكم
اهل القاهرة دائمى الحضور والمشاركة شكرا ليكم وجزاكم الله خيرا يا اجمل ناس وصحبة    ابو حميد - ضياء - مصطفى ريان - عمرو يسرى - حسنى المستفز -كريم شاب فقرى - كيمو صوت من مصر - وليد الدوغرى - احمد سكر دول  الرجالة الجدعان  اللى بتظهر وقت الشدة
شريف باشا وخطيبته اللى نورونا وشرفونا بالحضور ربنا يتمم بخير ونشوفكم عصفورين كناريا فى الكوشة  بس بلاش القهوة يا باشا يوم الفرح .
شفقة هانم واحسان بك وجودكم ليه طعم تانى اكيد ربنا ما يحرمكم منى وخصوصا احسان بك ما تنساش الدرس الخصوصى .
استاذ / هانى نط فى الكوز سعدت جدا بتشريفك وحضور حضرتك وشكرا على الهدايا القيمة 
د/ ستيته  معشوقة المدونين  حضورك اثلج صدورونا جميعا 
منى ابو السعود بالرغم من عدم معرفتى بحضرتك لكن ربنا يكرمك لانك الوحيدة اللى حفظتى ماء الوجه لاهل القاهرة مع مدونى اسكندرية جزاكى الله خيرا .
كيارا وسونى 2000 تؤام الشقاوة والعفرته 
ريم رسائل بلا بريد ما فيش اختلاف وجودك اسعد الجميع 
غادة محسن واصدقائها حضور خاص للبؤجة كالعادة
ساجى الجدعنة والجراة كلها
حفيدة عرابى حضور مميز كالعادة واللى مدرستش تاريخ فى الجامعة
بنات االفيس بوك حضور مميز كالعادة ومشاركة فعالة 
قوس قزح امممممممممم.. وش الخير ورمانة الميزان 
اكيد نسيت ناس كتير جدا جدا لهم منى كل تقدير واعتزاز 
اليوم كان رائع جدا بوجود ناس هدفها الخير وحب الخير 
اليوم كان ملىء بالاحداث الجميلة والتهريج والصحبة الرائعة 
ابتسامة سعادة ونظرة فخر واعتزاز كانت مرسومة على وجوه مسئولى الجمعية بكم البؤج والتبرعات وجودة ونظافة الاشياء المتبرع بها .
لا اختلاف ان من اهم سلبيات اليوم عدم حضور فاتيما لانها كانت الغائب الحاضر فى قلوب الجميع وغيابها اثر سلبيا على الجميع وخاصة العنصر النسائى الذى افتقد احضانها وحنانها واهتمامها الخاص بهم 
بالرغم  من تاكدى من غيابها قبل اللقاء لكن احساسى انها ستكون موجودة بروحها مع الجميع وهذا ما حدث بالفعل ونالت دعوات اتمنى من الله ان تكون من نصيبها وان يزيح عنها ويفرج الهم والكرب ويسعدها  ان شاء الله .
فاتيما : بخصوص التعليق ما ينفعش ازعل منك انا مقدر ظروفك جدا جدا لكن رغبتى فى حضورك علشان الناس اللى بيحبوكى وعلشان تخرجى من حالتك النفسية ليس الا وانتى لسه عندك شك انى زى هانى وماجد يبقى عليه العوض يا ام يوسف .
ابو خالد : كان عندى امل كبير انك تحضر بس اكيد الظروف غير مواتية  حضورك له طعم خاص . 
حنين القلب : كان عندى امل كبير يكون حضورك الاول للقاهرة بصحبة عمر باشا .
خيخة  غياب غير مبرر وغير متوقع
كيكى عووو : فاتك نص عمرك ونص الفرخة كمان .
منووونة : كأن القدر اراد ان يحرمنا من الاشقاء فاتيما ومنونة .  
رحاب كوكب ابى : كل سنة وانتى طيبة والبؤجة الجااية معانا ان شاء الله
تفاصيل اليوم يا نهار ابيض ومال اللى فاااااات ده كان ايه ده مقدمة فقط اللى مستعجل يرجع يقرا من الاول تانى 
اليوم بدأ منذ التاسعة صباحا على غير العادة نشاط واستيقاظ مبكر لان فاتيما مش جااااية ولازمن حد يكون موجود من بدرى ولكن تاتى الرياح بما لا تشتهى السفن فالبرغم من نزولى مبكرا ووصولى فى العاشرة صباحا الا ان اتصال عاشقة الرومانسية اصابنى بالاحباط لانهم وصلوا المكان وفى انتظارنا نحن اهل القاهرة يلا واجب عليهم عملناها قبلكم يا مارو كده خالصين المهم قابلت اهل اسكندرية الجميلة وناسها الطيبين عند الجمعية مارو وايمان ودودو وعالية ومعاهم منى ابو السعود من القاهرة واللى طلعت بميت راجل واجدع مننا كلنا .
بعدها توجهنا الى مقر الجمعية الجديد وسلمنا البضاعة يا معلمة ونزلت انا ورشا نجيب كيارا وسونى من محطة المترو وسبنا عمرو يسرى وحسنى المستفز على الكوفى اللى تحت الجمعية  وصلت كيارا وسونى ورجعنا للجمعية ابص بعينى الاقى زعيمة العصابة مارو هانم  جايبة الناس وقاعدة بيهم على الكافتيريا وطالبة قهوة دوبل وبتوزع المهام على الصبيان والسريحة ومش ناقص غير شيشة قص البرج وتبقى المعلمة الباتعة، بعدها توافد الصبيان قصدى المدونين حضرمصطفى ريان وضياء وقوس قزح وساجى وايناس نهر الحب ونسمة اختها  وحفيدة عرابى وجاءت عبير من الاسماعيلية وريهام من الفيس بوك وابو حميد ومفاجاة اللقاء شريف باشا وخطيبته ،فجاة حضرت دكتورة ستيته واستقبلت استقبال صلاح الدين بعد فتح اورشليم وخاصة من ريتشارد قلب القطة التى انقضت عليها انقضاض القط على فريسته والحمد لله خرجت من بين براثنها بسلام .
بعدها حضر ا/ هانى نط فى الكوز واللى وزع علينا كتيب رائع لمحاسبة النفس وتقييم اعمالنا على مدار العام كما حضر الدويتو التدوينى الرائع شفقة واحسان ،بعدها اتجهنا معشر الشباب  لصلاة الجمعة وعلى غير العادة خرج مصطفى ريان اولنا من الصلاة واثار الغضب والحنق تكسو وجهه البرىء من طول الخطبة واستفزاز الامام ومعه كل الحق ، بعدها اتجهنا الى الجمعية لانتظار باقى الحضور وقمنا بتوزيع انفسنا على العربيات الموجودة  للذهاب الى الحسين وركبت البنات اولا طبقا للمقولة السيدات اولا ومش عارف انهو شخص قالها بصراحة لانها مقولة خاطئة جدا لانى فؤجئت بعد ما الجميع ركب وتحركت العربيات انى واقف وحدى وما فيش حد سال فيه لكن من حسن الحظ لقيت بعض الشباب رايحيين يركبوا المترو ركبت معاهم وخدناها مواصلات وكانت فكرة عبقرية من شاب فقرى ومصطفى ريان وعمرو يسرى وحسنى المستفز لاننا وصلنا قبل الجميع وبسهولة وييسر .
عند الحسين تجمعنا وانضم الينا كيمو صوت من مصر وغادة محسن وصحباتها وصبرنى يا رب واسرتها الجميلة واتجهنا الى بيت زينب خاتون وهو بيت اثرى من العصر المملوكى طبعا العيال انطلقت فى ارجاء البيت وكانهم اول مرة يشوفوا مكان براح مش علب سردين وانطلق كيمو وضياء ومصطفى ريان الى اعلى السطح  وبعدها حركة نص كم من كيمو مع مصطفى ريان طلعه فوق السطح وبعدين شال السلم وسابه متشعلق فوق ومن مزنقى هذا اعلنها صريحة انه هناك مخطط  شرير من ابناء المطرية  متمثل فى وليد الدوغرى وكيمو ضد ابناء حلوان متمثل فى  مصطفى ريان وبصفتى على الحياد بقولهم ما ينفعش كده مرة الهريسة ومرة السلم  انا جااااااااى بهدى النفوس على فكرة يعنى يا ريت هجوم من ابناء حلوان على المطرية لانه كده حرام ههههههه . طبعا الناس الكبارة اللى زى حالتى جلسوا فى فى صحن البيت يتابعوا الاخرين وانضم للجلسة الاستاذ هانى وابو حميد وايمان الحب الجميل ،بعدها اتجهنا الى مطعم جاد لتناول الغذاء وانضم الينا وليد الدوغرى واحمد سكر بعدها انتهى اليوم بالنسبة لى ولاهل اسكندرية الذين غادروا الى محطة القطار  وتركنا الجميع ليقضوا باقى اليوم فى الكافيه ماشية معاكم يا ولاد المحظوظة .
بعدها توجهت مع اهل اسكندرية لتوديعهم وركبت المترو من محطة رمسيس لقيت مهرجان وضرب وتكسير بين مشجعى الزمالك ورجال الامن بعد مشادة كلامية والفاظ نابية لمشجعى الزمالك بعد فوز فريقهم على بنى عبيد فى كاس مصر والحمد لله انه بيفوز فى المناسبات كانت مصر زمانها متكسرة .
كل سنة وانتم طيبين وكل بؤجة منورين 
جزاكم الله خيرا 
تفاصيل اليوم بعيون هؤلاء :-

هناك 55 تعليقًا:

حنين القلب يقول...

اول تعليق

راااااااااااااااااااجعه يا خالود

حنين القلب يقول...

والله غصب عني انا كان نفسي اكون معاكم والله بس خيرها ف غيرها

وانت شايف الجو كان عامل ازاي

المهم انتوا تنورونا قريب

ماااااااااااااااشي

حنين القلب يقول...

ربنا يتقبل منكم صالح الاعمال

ويجعله في ميزان حسناتكم

ويكا يقول...

خالد

كل اللى اتمناه دلوقتى لك هو ان ربنا يتقبل هذا العمل.

وبعد كده كلى شئ سعيد لوحده هيحصل اكيد

انت انسان طيب ومخلص النيه والدليل على ذلك استمرار الموضوع ونجاحه.

صدقنى

فمن رسائل القبول والاخلاص هو (التمكين )

تحياتى من كل قلبى ومسيرى هبقى معاكم فى يوم من الايام

همس الاحباب يقول...

حنين القلب
ههههههههههه
عودة الندل
فيلم الموسم وكل موسم
يااااااه اخيرا شوفنا طلعتك البهية

همس الاحباب يقول...

حنين القلب
عملتى طيب انك مش جيتى
كفاية علينا مارو خبطتين فى الراس توجع
هههههههه
ان شاء الله هنوركم قريب
جهزوا الدابيح انتم وهتلاقونا عندكم

همس الاحباب يقول...

حنين القلب
الله اميين
منا ومنكم ومن الجميع يا رب العالمين
جزاكى الله خير يا ام عمر

همس الاحباب يقول...

ويكا
حبيب قلبى
ربنا يكرمك وجزاك الله خيرا
واحنا فى انتظار مشاركتك ووجودك وسطنا ان شاء الله
الحمد لله الذى بنعمته تتم الصالحات
وشكرا على كلماتك الطيبة اخى الكريم
تحياتى

شاب فقرى يقول...

عقبال كل لقاء
:)
وكل سنة وانته بخير
شاب فقرى

حنين القلب يقول...

والله لو انا عودة الندل فانت اللي عملتنا الندالة اصلا

وليه يا خويا مش كنت عايزني اجي هو انت تطول ده عمر كان هينوركم

علي العموم ربنا يسامحك

شوفت الادب

همس الاحباب يقول...

شاب فقرى
وانت طيب يا كريم
ودايما معانا ومشاركنا بقلبك الكبير
تحياتى

همس الاحباب يقول...

حنين القلب
ونعمة الادب ياسلام
لا عمر باشا ينور طبعا وكان نفسى اشوفه والله مش جوز البونية اغلى من نور عينيا
هههههههه
وبعدين انتى مالك ومال الطول بلاش فضايح
خليها على العرض احسن
ههههههه
تحياتى

فاتيما يقول...

انا مش هقول
غير جملة واحدة


ربنا يباركلنا
فيك يا خالد


بس كدا

غير معرف يقول...

متشكرة لك يا خالد على كل شىء
كان يوم جميل فعلا بناسه
ربنا يخليك لنا يا أبو التدوين كله
وجزاك الله كل الخير
والحمد لله ان اليوم كان ناجح

تعبناك معانا والله
كل بؤجه وانت بخير

richardCatheart يقول...

هههههههههههههههههههههههههههههه
ههههههههههههههههههههههههههههههههههه

قتلتنى ياقاتل من الضحك


الله كنت خرمانه ياخى وعايزه اظبط الطاسه والنبى لولا الملامه ياهوا كنت شيشت مع مستا ههههههههههههه

ثم انهم اتبسطو من القاعده ونفعنا الراجل ولا زعلان علشان كاعيت ههههههههههه

العموم دا العادى فى كل لقاء لازمن ولا بد تكع يا ريس انت ابو الكرم كل
وعقبال كل مره ان شاء اللهوانت معانا
قال تهرب قال وربنا نخطفك هههههههههه
ربنا يجعل فى ميزانك يارب ومانتحرمش منك ابداااااااااااااااااا

Mona Hekal يقول...

استاذ خالد شكرا ليك جدا
اولا علي مجهودك و عملك للخير و ربنا يكرمك ان شاء الله
ثانيا شكرا علي راي حضرتك فيا انا كنت بعمل الواجب بس و كلنا بنكمل بعض اكيد انت كمان عملت الواجب و زيادة
و ان شاء الله اتعرف علي حضرتك بشكل احسن المرة الجاية
شكرا تاني لذوقك

Empress appy يقول...

كل بؤجه وانت طيب يا خالود يا طيب وان شاء الله البؤجه الجايه اكون موجوده ميرسى انك افتكرتنى وميرسى لكل الناس اللى بتسال عليا دايما فى غيابى

إنسان || Human يقول...

ربنا يباركلكم ويجعله في ميزان حسناتكم
طبعا دي تاني مره ادخل مدونة وألاقي موضوع البؤجه ده ...وبجد فكرة جميلة ان أجد فائدة جديدة للتدوين ..الا وهي عمل الخير ...لننتقل بالتدوين والمدونات من عالم إفتراضي لعالم واقعي مفيد

sony2000 يقول...

واناااااا بردوووووووووووذ كتبت
وقلت علحركه اللي حصلت
وادي البوست اهو
http://sony2000-sony2000em.blogspot.com/2010/12/blog-post_11.html#comments
والله ربنا يخليكو لينا
علي بتعملوه معانا دا
دا كتييييير اوي

عمرو يسرى يقول...

كان يوم جميل
عقبال اللقاء القادم

عاشــــــ النقاب ـقــــة"نونو" يقول...

يارب دوما في الخيرمتجمعين
ربنايبارك فيكم يارب
جزاك الله خير دوما سؤالك علي بيسعدني
تحياتي

ahmed_k يقول...

ياااااااه كان نفسي أكون موجود بس مليش نصيب
ملحوقه في القادم بإذن الله
بارك الله فيك يا خالد دايما حامل عبئ هذه التجمعات ودينامو التنظيم
جعلها الله في ميزان حسناتك

ستيتة يقول...

انبسطت اني شفتكم جدا
وربنا يديمك جدع في زمن قلة الجدعنة والشهامة
ونشكركم على حسن وصفكم التمثيلي لليوم
حسيت اني أتممته معاكم

мαησηα يقول...

ابو همس الغالى ..

:(( انا كان نفسى اكلمك يوميها جدا بس الشبكة كانت بشعة حتى مارو وايما كلمونى معرفتش ارد عليهم

انا كان نفسى اجى ونفسيتى كانت بجد تحت الصفر بمراحل تخيل انا محضرة الشنط وكل حاجة وكنت بجهز نفسى انى اجى كل ده وبقول يمكن تحصل معجزة واقدر اجى

بس انت عارف ظروفى كويس وربنا عالم انا كنت متضايقة قد ايه بسبب عدم حضورى

بس البركة فيكم كل الناس الحلوة الطيبة اللى راحت بجد ربنا يجازيها كل خير يارب

ويكرمكم ويرزقكم رزق حلال طيب ع قد نيتكم الصافية الطيبة ويبدل سيئاتكم كلها حسنات يارب اللهم امين


انت اللى صبرتنى وقولتلى اللقاءات جاية كتير تقوم تقول ماكنتش هتروح كنت هازعل منك ع فكرة لو تراجعت

ده انت قدوتنا اللى بنحنذى بيها يا باشا

يارب القاكم ع خير قريبا جداااااا يارب

انا عايشة ع الامل ده بجد

Kiara يقول...

اليوم بجد كان مختلف غير كل التوقعات

انا فرحت فيه جدا جدا :)





كان نقصني ثلاثي

فاتي ومنون وحنون :(

Kiara يقول...

كل سنة وانتي طيبة ياابي :)

عمرو يسرى يقول...

اللقاء
http://7akawy-amr.blogspot.com/2010/12/blog-post_13.html

مدونه ما كفايه بقى يقول...

انا بس نفسى اعرف حاجه واحده بس

هو يعنى ايه بؤجه كمصطلح ؟

ويعنى ايه بؤجه فى معناها ومكانها فين وبتتعمل كل قد ايه ولمين وهل انا ممكن احضرها وهدفها ايه

كل دول حاجه واحده ههههههههه

كلام المدونين كتر اوى عن البؤجه ليه؟

بس كفايه كده

تحياتى

ghada mOhsen يقول...

دايما كده
بتزرعوا جوايا خير بشوفتكم والله
^^

بجد صحيح أنا مش بطول كل مره بقعدتي معاكم بس بنبسط كتيييييير بالشويه دول

بجد جزاكم الله كل خير واحلى خير ياأحلى صحبه للخير

وكفاية إن نولت شرف الأكل جنبك
:))))))

طهر فؤادك يقول...

السلام عليكم ورحمة الله وبركاتة
اخبارك اية
وبارك الله فيك وخطواتك ماشاء الله الثابتة فى طريق الخير وربنا يزيدك والمسلمين اجمعين وتحية للجميع
للتذكرة بس صوم التاسع والعاشر من محرم (عاشوراء وماقبلها)1
وأما صوم يوم تاسوعاء فسببه ما في صحيح مسلم من حديث ابن عباس ـ رضي الله عنهما ـ قال: صام رسول الله صلى الله عليه وسلم يوم عاشوراء وأمر بصيامه،

قالوا يا رسول الله: إنه يوم تعظمه اليهود والنصارى فقال: إذا كان العام المقبل ـ إن شاء الله ـ صمنا اليوم التاسع. انتهى.

شمس النهار يقول...

ربنا يكرمكم ويجعله في ميزان حسناتكم

انتوا اهل للخير

وانبسطت جدا ان الكل انبسط


وان شاء الله البؤجه تكبر اكبر واكبر

Maha Shahen يقول...

دايما مجتمعين فى الخير يا رب
ربنا يديم قلمك بنوره وقلبك عامر بالخير دايما
دايما بيسعدنى القراءه عن اللقاءات دى بشعر كأنى حضرتها بالظبط
بتخليينى اتعرف اكتر علي كل شخص تواجد وكأنى شوفته بعينه
جزيل الشكر منى لوصفك للقاء دايما اتمنيت حضوره

gogo!sf يقول...

يعنى يا خالد انت وست هانم قوس قزح بتهرجو

انا متصله بيها مرتين ازاى بقى معرفش التفاصيل غير من البوست على العموم انا كده اخدت موقف لا راجعه فيه
وكده احنا متخاصمين بجد

وبعد كده بقى هبقى افضل الف المدونات كلها عشان اعرف مواعيد لقاءاتك

ماشى يا خالد
لتانى مرة تعملها

ميرسيه يا باشا

جوجو

gogo!sf يقول...

على العموم يا معلم كل بؤجه وانتم بالف خير

همس الاحباب يقول...

فاتيما
ربنا يكرمك يا ام يوسف
وما يحرمناش منك ابدا
تحياتى

همس الاحباب يقول...

الحب الجميل
انتم نورتونا طبعا
وخليتوا اليوم ليه طعم تانى
بالعكس احنا اللى تعبناكم
ربنا يجازيكم خيرا ويجعله فى ميزان حسناتك
تحياتى

همس الاحباب يقول...

مارو هانم
هههههههههه
والله كل ما افتكر منظرك والعيال حواليكى افطس على نفسى من الضحك
اليوم كان رائع بوجودكم بصراحة
لا اطلاقا مش كده خالص ده انتم اهل الكرم كله
ربنا يجعله فى ميزان حسناتكم
تحياتى

همس الاحباب يقول...

منى ابو السعود
جزاكى الله خيرا
اكيد طبعا كلنا بنكمل بعض
بس انتى طلعتى بميت راجل برضه
ان شاء الله نشوفك دائما على خير وفى الخير دوما
تحياتى

همس الاحباب يقول...

ابى هانم
وانتى طيبة وبصحة وسعادة
وان شاء الله تشاركينا دائما فى الخير
ربنا يرجعلك لينا بالف سلامة
تحياتى

همس الاحباب يقول...

HU-MAN
نورتنا بزيارتك
الحمد لله ان الفكرة عجبتك وان شاء الله تشاركنا فى المرات القادمة
تحياتى

همس الاحباب يقول...

سونى 2000
هههههههه
ماشى يا ستى تعيشى وتكتبى وكل بؤجة وانتى طيبة
تحياتى

همس الاحباب يقول...

عمرو يسرى
الحمد لله
وكان جميل بوجودكم جميعا
تحياتى

همس الاحباب يقول...

عاشقة النقاب
ربنا يجازيكى خيرا
ودوما معانا بدعواتك
ده اقل واجب يا ست الكل
ربنا يطمنا عليكى دوما
تحياتى

همس الاحباب يقول...

احمد باشا
ربنا يجازيك خيرا
وكنا مفتقدينك بصراحة
ان شاء الله معانا دوما فى الخير
تحياتى

همس الاحباب يقول...

د/ ستيته
ده انتى اللى نورتينا واثلجتى صدورنا بحضورك ومشاركتك الطيبة
دمتى نبراسا للخير واهله
تحياتى

همس الاحباب يقول...

منونة
ربنا يكرمك ويجازيكى خيرا على كلماتك الطيبة
وان شاء الله هتشاركينا مرات ومرات
وباذن الله الظروف هتتحسن وهتكونى معانا فى المرات القادمة
وقدر الله وماشاء فعل
وكفاية انك معانا بدعواتك وبصوتك دوما
تحياتى

همس الاحباب يقول...

كيارا
ههههههه
هى كده
ما هم لو جم الثلاثة ما كانش هيبقى يوم عادى
هيكون يوم معجزة
ان شاء الله نلتقى دائما على خير
تحياتى

همس الاحباب يقول...

عمرو يسرى
علم وتم التنفيذ

همس الاحباب يقول...

مدونة ما كفاية بقى
اهلا وسهلا بحضرتك
باختصار بسيط كل ما يتعلق بالبؤجة ممكن تلاقيه فى البوست السابق
بكل تفصيل
جزاكى الله خيرا وشكرا على تواصلك

همس الاحباب يقول...

غادة محسن
احنا اسعد بتشريفك وحضورك بالصحبة الجميلة فى كل لقاء
جزاكم الله خيرا وجعله فى ميزان حسناتكم
الشرف لينا يا افندم
تحياتى

همس الاحباب يقول...

طهر فؤادك
اخى الكريم جزاك الله خيرا
ودوما دال على الخير وسباق اليه
سعدت بمرورك الدائم
تحياتى

همس الاحباب يقول...

شمس النهار
دكتورتنا ربنا يجعله فى ميزان حسناتك
وجزاكى الله خيرا على مشاركتك الفعالة دوما
الحمد لله ان الجميع انبسط والكل اجتمع على حب الخير
تحياتى

همس الاحباب يقول...

نور شاهين
باذن الله تشاركينا يوم ما
والحمد لله ان اللقاء والوصف نال رضاكى
وشكرا لتواصلك
تحياتى

همس الاحباب يقول...

جوجو هانم
هههههههه
لا انتى كده بتهرجى علشان انا دخلت عندك قبل لقاء التبرع بالدم وقولتلك
وقبل البؤجة برضه
والموضوع كان منتشر فى كل المدونات
بس انتى اللى مش عايزة تيجى وبتكبرى دماغك
عامة ليكى عليه اللقاء القادم هكتبلك بوست فى التعليقات عندك وهعمل اعلان على باب المدونة ونشوف هتيجى ولا هتكبرى دماغك
وعامة يا ستى ما تزعليش
حقك علينا

همس الاحباب يقول...

جوجو هانم
ههههههههه
بعد ايه بقى
وانتى طيبة وبصحة وسعادة
ويشرفنا مشاركتك معانا طبعا