25 نوفمبر 2009

عيد أضحى سعيد



 
كل عام وانتم بخير 
وعيد سعيد عليكم وعلى الامة الاسلامية جميعا 
اللهم تقبل منا ومنكم صالح الاعمال

20 نوفمبر 2009

مبروك لمصر



قدر الله وماشاء فعل
تلك هى الحياة لحظات انتصار يعقبها لحظات انكسار والعكس بالعكس
وتلك الايام ندوالها بين الناس
ولكن فى الرياضة هناك اخلاقيات لابد ان نتبعها وروح رياضية نتمسك بها مبروك للفائز وحظ افضل للخاسر فى المرات القادمة
حتى لو كان الفريقان المتباريان اعداء تلك مع تعلمناه
لكن الموضوع اختلف تماما فى المنافسة غير الشريفة بين منتخبى مصر والجزائر بالرغم من وحدة الدين واللغة واننا اشقاء كما نزعم
لكن ما حدث يوم 18 -11 بالسودان لم يمت الى الرياضة باى صلة ولا يوجد هناك اى اخوة ولا منافسة شريفة،لان المنافسة الشريفة تكون فى الملعب وعلى مدى 90 دقيقة هى عمر المباراة ومبروك للفائز
اما ترويع الامنين من نساء واطفال بصورة همجية ووحشية وسفالة خارج المدرجات فهذا شىء فاق الحد والتوقعات
مع احترامى لشعب الجزائر ومصر هل يساوى الفوز بكاس العالم لا مجرد حلم الوصول اليه تلك الكراهية والحقد والهمجية
الى الشرفاء من ابناء الجزائر ابناء شهداء التحرير لا الخونة وابناءهم والى الشرفاء من ابناء العروبة فقط اوجه كلماتى الاتية
- عدونا واحد وديننا واحد ولغتنا واحدة
- كرامتنا واحدة حبنا لكم نابع من حبنا لديننا وعروبتنا
- لابد من الوحدة لاجل الاقصى والقدس فعدونا سيطر علينا بذكاء
- مع الاسف الكل اصبح فى ضلال وابتعد عن الطريق القويم
- تهنئة الى اليهود والصهاينة لانتصارهم فى شتى المجالات
- المصرى ظل محتل لمئات السنين ومع ذلك لم ينحنى او ينكسر
- المصرى ترك ارضه ووطنه بسبب الحروب وويلاته وذهب اليكم من اجل لقمة العيش لا من اجل الذل
- اذا كان المصرى دخل فى حروب مع اليهود او غيرهم فمن اجل العروبة والاسلام
- لا عزاء لكم يا معشر العرب ولا سلام لكم معهم بعد اليوم
الى الهمج وعديمى الكرامة فى جميع الشعوب العربية
- لا كرامة لكم بعد اليوم عند كل مصرى
- الشعارات الرنانة مثل الاخوة والاشقاء والقومية العربية والشقيقة الكبرى اصبحت مصطلحات بالية لا ايمان بها بعد اليوم
 - الحقد والكراهية لكل ما هو مصرى معروف لنا ونعلمه علم اليقين لكن تجلى فى ابشع صوره بعد مباراة مصر والجزائر
اعتقد جميعنا عرف من هو العدو ومن هو الصديق
- كرامة المصرى لن تهان طالما هناك شرفاء يحبون وطنهم
الى كل مصرى داخل وخارج ارض الوطن
- كفانا تفريط فى كرامتنا وكفانا مشاعر وعواطف خادعة وكفانا طيبة او بمعنى ادق جبن وسلبية
- لابد من تكاتفنا وخوفنا على وطننا بالداخل والخارج
- لا معنى للحياة بدون كرامة ولا طعم للخبز بالذل والمهانة
- مصر لها اكثر من 5000 الاف عام تنهب وتسرق وما زال بها خير كثير
الى حكوماتنا العزيزة
- هناك فرق بين كرامة المصرى داخل مصر وخارجها
- كفاكم ضعف ومهانة بالداخل وعليكم المحافظة علينا بالخارج لان كرامتكم من كرامة اصغر مواطن بالخارج
- اعتقد ان كل الرؤى وضحت امامكم وعرفتم قدركم بين العرب
-الشقيقة الكبرى وقلب العروبة بفضل حكمتكم وجبنكم اصبحت لا تساوى مجرد خادمة من دول شرق اسيا
- لابد من اتخاذ الاجراءات التى تكفل كرامة مصر والمصريين فى المحافل الدولية وعدم التهاون فى حقوقنا لانها ليس البداية ولن تكن النهاية
- دعكم من المصالح الشخصية جانبا طالما الموضوع يمس كرامة الوطن
- لا تنسوا التاريخ ولا الاحداث فما حدث بالامس حدث اليوم وسيحدث غدا
الى اليهود والصهاينة
- نعلم انكم المستفيد الاكبر وانكم سبب الفتنة
- تريدون هدم الاقصى وتهويد القدس لكن مع الاسف لن تنالوا ذلك
- دفاعنا عن القدس والاقصى نابع من حبنا لديننا وانه فرض علينا
- مصر دخلت الحرب وانتصرت بمساعدة الشرفاء من العرب لا الخونة والهمج
- لا تفرحوا كثيرا فنصر الله قريب
الى وسائل الاعلام المقرءوة والمسموعة
- ما اسهل الكلام والشعارات والويل والثبور ولكن اين الافعال
-الحقد والكراهية اصبحت واضحة والضرب علنى
- تصفية الحسابات والشماتة واضحة والحقد الدفين ظهر
- المعدن المصرى الاصيل يظهر وقت الشدة
اعلام الجزائر 

حسبى الله ونعم الوكيل
يا أيها الذين آمنوا اذا جاءكم فاسق بنبأ فتبينوا، ان تصيبوا قوما بجهالة فتصبحوا على ما فعلتم نادمين.) صدق الله العظيم
الى منتخب مصر
شكرا لكم جميعا اجهزة فنية ولاعبين ليس من اجل الفرحة او الخسارة ولا البطولات التى حققتوها ولكن من اجل اخلاقكم والتزامكم وقدوتكم الطيبة لنا
الى منتخب الجزائر
اسف جدا لانى صفقت لكم بعد المباراة على انكم اشقاء
ولن استطيع تشجيعكم حتى لو اخذتم كاس العالم لانكم لا تستحقون حبنا ولا تشجيعنا بعد اليوم
اسئلة لا تحتاج اجابة
- وصول 48 طائرة عسكرية تقل مشجعى الجزائر الى الخرطوم تابعة للقوات الجوية هل تم بعيدا عن علم الحكومة الجزائرية؟؟؟؟؟ بالطبع لا
-وصول عدد من البلطجية والهمج أوالحيطست كما يطلقون عليهم فى الجزائر وشراء الاسلحة البيضاء ودخول المدرجات بعلم الجميع هل له من تفسير ؟؟؟
- الحكومة الجزائرية والمسئولين بها والسفير الجزائرى والمصرى ما تم فى الجزائر قبل المباراة الفاصلة وتشريد الاسر والعاملين بالجزائر وتدمير المنشات المصرية هل يوجد تفسير غير حسبى الله ونعم الوكيل فيكم
- الحكومة المصرية ورئاسة الجمهورية شكرا لكم على نقل المصريين واغاثتهم لكن الى متى نتحرك بعد وقوع الكارثة؟؟!!! لماذا لا نسبق الكارثة طالما لدينا علم بها مسبقا؟؟!!
- فى تلك المحنة واهدار كرامة المصرى بالسودان قرأت الفاتحة ترحما على السادات !!لماذا؟؟!!
- السودان بلد شقيق فعل الكثير وله منا كل التحية والتقدير .. لكن هناك من باعوا السودان والمصريين للهمج لماذا ؟؟!!
-رئيس الاتحاد المصرى والجزائرى هل البيزنس والمصالح اهم من الشعوب وارواح الابرياء ؟؟!!

- اتحاد الكرة الى متى نتهاون فى حقوقنا الدولية ونجعل الاخرين يسلبونها منا حتى لو كنا على صواب ؟؟!!
- هناك فرق بين اختلافنا مع الحكومة ووقوفنا جميعا فى خندق واحد لمصلحة الوطن !!

- اذا كنا نحن فى نظر الهمج يهود وصهاينة ولا يخلو بيت فى مصر من شهيد استشهد فى الحروب مع اليهود بما تسمون من سيطرت عليهم اليهود وساقتهم مثل الاغنام ؟؟!!
-  لا اختلف معكم اذا كنا يهود وصهاينة فمن باب اولى ان تحاربوا اليهود والصهاينة وتحرورا الاقصى اولا وكل من على شاكلتهم ثانيا  ؟؟!!

الف مبروك لمصر 
ورب ضارة نافعة


13 نوفمبر 2009

تااااج المحبة ولا كرسى اعتراف


التاج ده هجاوبه بناء على طلب من ماما الفراغ لان طلباتها اوامر وعلى عينى وراسى
يس اعتقد بعد اجابة التاج هنقطع كل العلاقات الدبلوماسية وهنسحب السفراء وهنعلن الحرب 

 
انت مين بقى؟
انا البحر فى احشائه الدر كامن
خالد
مدونة همس الاحباب
عندك كام سنه؟
السنة اللى فاتت كان 33 اكيد السنة دى 34
هل انت متزوج ؟ وهل عندك اولاد؟
متزوج واعول مع الاسف
عندى همس وشابى
دراستك ايه؟
بكالوريوس تجارة – شعبة محاسبة
كم طولك...وما لونك...???
جينا للاسئلة المحرجة اللى هتزعلنا من بعض
طبعا طويل جدا جدا والكل شاهد على كده والصور موضحة ذلك
اللون من الوان الطيف ممكن قمحى ممكن خمرى ممكن اسمريكا
ممكن كروهات كده يعنى
هل تمارس عملا بشهادتك ام عمل حر وماهو؟؟؟؟؟
اى نعم بعمل محاسب بجانب عمل حر
ماهى مدة عملك اليوميه؟؟؟
الطبيعى لا يقل عن 16 ساعة او 18 يوميا
ماذا تفعل بوقت فراغك؟؟؟؟؟؟
امممممممم الكلمة دى كنت بسمعها زمان
بس مع الاسف ضاعت فى الزحمة
بس احيانا القراءة او النت او اختراع مشاكل
 
هل لديك هوايات....وهل تمارسها؟؟؟
اى نعم انا كنت بحب العب كرة وسباحة بس الان بكتفى بالفرجة
وكان عندى هواية فى صغرى كنت احب افك الاجهزة الكهربائية 
واطلع كل اللى فيها ومع الاسف مش برجعها تانى .
هل تشعر برضا ربنا عنك ؟
امممممم احيانا واحيانا ببقى خايف جدا من غضبه 
لانى مقصر جدا فى طاعته وعبادته 

هل تحب؟...ومن بقلبك الان؟
نعم الحب موجود بالفعل لا قلبى مساكن شعبية يشيل من الحبايب الف
لو لم تجد من تحب ....فماذا ستفعل؟
اعمل اعلان واقول مطلوب حبيبة
هعمل ايه ولا حاجة الحب مالوش ميعاد ولا مكان ولا زمان بيجى خبط لزق ومن غير استئذان
عندما تكون فى موقف اتخاذ القرار..تخالف الجماعه.. ام تشرك معك الاخرين ؟
غالبا بشرك معى الاخرين وفى النهاية بمشى اللى فى دماغى طالما يتماشى مع راى الجماعة

هل تتعامل بواقعيه؟
الحمد لله اغلب الاوقات
ماهو الشيء الذى فعلته وندمت عليه طول عمرك ؟
اممممممم لا كتير بس هيفيد بايه الندم كل شىء قسمة ونصيب وكل شىء بامر الله
هل تصارح غيرك بالحقيقه ؟ ام ام تقول له مايريد سماعه؟
غالبا ببفى صريح وصراحتى بتزعل بعض الناس بس انا بحب امشى بمبدا يا بخت من بكانى وبكى عليه
لو انسان عادى ممكن اجامله واقوله ما يريد سماعه اما طالما قريب منى يبقى لازمن الحقيقة المرة
صف انسان يمكن ان تحبه عمرك كله؟؟؟
يكون مرآتى وبيخبرنى بعيوبى قبل مميزاتى
احس بحبه من افعاله وليس كلماته
صديق وقت الشدة
احساسه بما فى داخلى
متى يقسوقلبك ؟
لما حد يخدعنى او يكدب عليا ويصمم على كدبه وخداعه
بس مع الاسف قلبى قلب خصاية
ومتى يقسو لسانك؟
لا ده كتير جدا وخصوصا فى الشغل
عندما يخطىء انسان وارفض معاقبته ماديا
ويبقى فى منتهى القسوة مع الحرامى البجح ده بيجننى ويخرجنى عن شعورى
من هو اول من قلت له احبك؟
ده اكيد من زمان قوى وهتكون لحد من اسرتى
ما هو مش ممكن اكون قولتها لفتاة وانا بيبى فاين يعنى
هل يمكن ان تحب احد من المدونين؟
طبعا ........بحبهم كلهم
وهل يمكن ان يكون شريك حياتك؟
مين ده المدونين كلهم لا كفاية 15 او عشرين
والباقى يشاركوا حد غيرى هههههه
ماذا تعنى لك المرأة او الرجل؟
المراة : ام او اخت او زوجة او ابنة المراة نصف المجتمع وتلد النصف الاخر
المراة : رومانسية جدا رقيقة جدا قنوعة جدا جدا قبل الزواج
المراة طيبة جدا صبورة جدا نكدية جدا جدا جدا بعد الزواج
الرجل : اب او اخ او صديق ومطحون يا عينى طول اليوم
الرجل : رغاى جدا مهرج جدا دمه شربات جدا خارج المنزل
الرجل : ابو الهول داخل المنزل
فى زمن البحث عن الماده ..عن ماذا تبحث انت ؟
عن المادة بالطبع
لانها مع الاسف بقت الوسيلة الوحيدة لكل شىء
ولكن الحمدلله بطبعى مش مادى وده عيب مش ميزة فى العصر الحالى
متى تعرف انك تحب ؟
قول للزمان ارجع يا زمان
ارجع يا سهر مع الغزل فى ضوء القمر
زيد يا قلب فى دقاتك عند لقاء الحبيب
اللى بيحب دايما مفضوح قدام حبيبه حتى لو لم ينطق بكلمة فافعاله تفضحه
ماهى الشخصيه التى اثرت بحياتك ؟
والدى فى شدته وسيطرته وجراة قرارته
والدتى فى طيبتها وحبها للاخرين
دكتور المحا سبة فى الجامعة
هل يوجد من تراه سعيدا فى الدنيا ولماذا ؟
اكيد السعادة موجودة بين البشر بس تختلف نسبيا وحسب الموقف
لانه مفيش انسان سعيد دائما ولا تعيس دائما
ولكن السعادة الدائمة فى طاعة الله والقرب منه
سياره وسائق ووقت متاح ....تذهب الى اين ؟ ولمن ؟ بالترتيب
ام تفضل ان تكون وحيدا؟؟؟
ياااااااااه اذهب الى اسكندرية شاطىء المعمورة بصحبة انسان عزيز وغالى ونقضيها ترمس واستمتاع بمنظر البحر والسماء
ثم اذهب الى سوهاج امام كورنيش الجامعة بصحبة اصدقاء الدراسة ونرجع لاجمل ايام العمر
اذهب الى اشخاص نفسى اشوفهم من زمن واقعد معاهم للصبح
اعتقد ان السواق نام منى فاحسن حاجة ارجع وحيدا .
ماهى درجة صراحتك ؟
100 % مع نفسى و80 % مع الاصدقاء والزملاء اللى اعرفهم و70% مع الاشخاص اللى معرفتهم بسيطة
وماهى المواقف التى يمكن ان تكذب فيها ؟
هو السؤال ممكن يبقى بصيغة اخرى ما هى المواقف التى لا تكذب فيها .
بس بصراحة اكتر كذب بيبقى فى حالات انى بدافع عن اهمال واخطاء زملائى
واى انسان ممكن يتعرض لاذى او جزاء
وفى حالة الصلح بين متخاصمين
وطبعا مراتى بكدب عليها دائما من قبل الزواج لانى بقولها يا قمر
هل يتغير الحب بعد الزواج؟
اكيد لكن بنسب ممكن يزيد وممكن يقل
وده شىء طبيعى لان العلاقة قبل الزواج مختلفة عن مسئوليات ما بعد الزواج
غالبا قبل الزواج الحب بيعبر عنه بكلمات لكن بعد الزواج بالعشرة والافعال
فيما تفكر الان ؟
هدخل البيت ازاى بعد التاج ده
لو لم تعيش بمدينتك؟؟؟فاى مدينه اخرى تفضلها؟؟
انا كده ولا كده مش فى مدينتى
بس لو داخل مصر تبقى اسكندرية
لو خارج مصر تبقى المدينة المنورة
من اول من ياتى ببالك لتحكى له اسرارك؟
صديق قريب منى
صديقة بثق فيها
مع ان السر لو طلع منك مابقاش سر
من تريد ان يكون دائما بجوارك ؟
شخص يخاف عليه ويحبنى ويكون فى ظهرى وقت الشدة وفى حضنى وقت الرخاء
من هو الد اعدائك؟
صديق جاهل يبقى عامل زى الدبة اللى قتلت صاحبها
ومن هو صديقك؟؟
من صدقك النصيحة واصبح تؤامك فى الحياة
ماهى صفات شريك العمر؟
الطيبة
الحنان
الاحساس بك بدون كلام
خوفها عليك
مراعاتها لبيتك واولادك
واعتقد كده قمة الحب
لو الدنيا كلها زيك....لمن تقول هذه العباره ؟
لو الدنيا كلها زيك يبقى خربت بقولها لاشخاص كتير فى العمل او فى البيت
ماذا تكره فى الدنيا ؟
الحرامى البجح
المراة النكدية
الحكومات الفاسدة
وماذا تحب؟؟؟
الصداقة
مساعدة الاخرين
عالم التدوين
كيف تواجه مايضايقك؟؟؟
غالبا بالسكون والهدوء واحيانا بالتهريج واللامبالاة حسب الموقف طبعا
وماذا تفعل عند المفاجآت؟؟؟
رب مفاجاة خير من الف انتظار
الحمد لله فى جميع الاحوال 
لو معاك فلوس اكثر مما تتخيل...فماذا ستفعل بها؟؟؟
فلوس كتير يعنى خد عندك
- اعمل مشروع للايتام وذوى الاحتياجات الخاصة لكفالتهم ورعايتهم
- مشروع يساعد على تقليل البطالة وتشغيل الايدى العاملة
- مشروع خيرى يضم مستشفى تخصصى باجر رمزى وبالمجان للفئات الغير قادرة
- مساعدة كبار السن والمحتاجين فى اداء فريضة الحج باذن الله
- مشروع زواج جماعى للشباب بعد توفير المسكن طبعا
هل الفقر يصنع حبا؟؟
الحب الشىء الوحيد الذى لايعترف بالفقر ولكن يهرب من فقر المشاعر
اما الفقر ممكن يصنع حب النجاح وحب اشياء اخرى طبعا
وماذا لو وجد الحب فى زمن الفقر المادى؟
يبقى لاحول ولا قوة الا بالله
والبقاء لله والعاقبة عندكم فى المسرات
وممكن الحب يصنع المستحيل وايدينا فى ايد بعض نبنى عش حبنا
ماهى اقسى صدمه تعرضت لها حتى وقتنا هذا؟؟؟؟
صدنة عاطفية الحمد لله مافيش
ممكن يكون الزواج هههههههه
بصراحة كان مجموعى فى ثانوى عام كان صدمة لاهلى
وماذا كان رد فعلك؟؟؟
الحمدلله كان ماض وانتهى
اما الزواج ما زلت اعانى من صدماته الكهربية هههههههه
وهل تعلمت منها شيء؟؟
لو تعلم اللى قبلى يبقى انا اتعلمت
هل انت على استعداد لتلقى صدمات اخرى؟؟
على اساس انى مفيش غيرى فى البلد دى ولا ايه يا جدعان
ومين عنده استعداد لاستقبال الصدمات
بس طالما قضاء من الله فالحمد لله راض بقضائه
اذا احببت انسان ما ...هل تصرح له بحبك ؟
اكيد طبعا وغالبا يكون بالافعال مش بالكلام
وماذا تفعل لو لم يتجاوب معك؟
هعمل ايه امرى لله هحاول مرة ومرات
وفى الاخر اشده من شعره واقوله فوضت فيك امرى الى الله
الحب الحاجة الوحيدة اللى مش تعرف تشتريها بكنوز الدنيا ولا تخلى حد يحبك غصب عنه
هل تؤمن بالمثل القائل:انا احب فانا اعيش؟؟
ممكن اكون متفق معاه بس مش مؤمن بيه لا ..لان الايمان بالله وحده
وبعدين حتى لو لم احب فانا عايش بس باختلاف المعيشة طبعا
ماهى القضايا التى تشغل بالك؟
المشاكل التى تتعلق بالدين او الوطن
او الاسرة والاصدقاء تشغلنى كثيرا
هل تستطيع تحقيق كل احلامك؟؟
اتمنى ولكن ليس كل ما يتمناه المرء يدركه
علينا السعى وعلى الله التوفيق
هل تمتلك طموحا...وماهو؟
طبعا ابقى رئيس .. رئيس مراجيح مولد النبى طبعا محدش يفهمنى غلط
طموحى انى ابقى انسان يفيد دينه وبلده بقدر المستطاع
كيف ستحقق طموحك...ام سيبقى حلما فقط!!!!!!!!!!
اتمنى انه يتحقق بالطاعة لله والعمل الجاد وحب الخير والناس
ماهى علاقتك بالدنيا؟؟؟
اعيش بها كانى ضيف سيغادر الى مكان اخر فى وقت ما
ماهى علاقتك بالموت؟؟
نهاية طبيعية لكل منا لان البقاء والدوام لله وحده

لو لك اختيار زمن تعيش به....فماهوذلك الزمن ؟ ولماذا ؟
بدون ادنى شك عصر النبى صلى الله عليه وسلم وصحابته
او زمن الفتوحات الاسلامية وازدهار الحضارة الاسلامية
هل يمكن ان ارا ك وانت غائب؟؟؟؟؟؟؟
ممكن طبعا ادخل مدونتى واقرا الفاتحة هتلاقى روحى حضرت
ماذا ترى فى نفسك مميزا عن الاخرين؟
بصراحة مش شايف ميزة واحدة لو حد شايف حاجة يقول
وده مش تواضع دى حقيقة
من اذا اقترب منك ...هربت منه بعيدا؟
صديق السوء .. وشارب الخمر
من تقول له : قرب منى قرب ...ياقلبى يا متغرب
ههههههههه اكيد اللى جوه قلبى
ماذا تريد ان تقوم به قبل ان تموت؟؟؟
يااااااااااااه حاجات كتير
اولها ان ربنا يرزقنى حسن عبادته وطاعته ويحسن الخاتمة
مارايك فى اسئلتى؟؟؟ وبدون مجامله
دى مش اسئلة دى صواريخ وكرسى اعتراف وربنا يستر
ونصيحة بلاش تاجات تانى ارحموا عزيز قوم ذل

هل نسيت سؤال كان هاما بالنسبة لك؟
هو حضرتك سيبتى حاجة ما سالتيش فيها غيرما هو طبقك المفضل
هل استطعت تغطية شخصيتك ؟؟؟
ربما اشياء كثيرة ولكن الجانب الاكبر لا نستطيع التحدث عنه بالكلمات ولكن بالافعال
مع ملاحظة انى ماليش فى الكوره..........هههههههههه
هو لسه فى كورة تاااااااااانى لا ... شكرا بجد
من يهمك ان يجاوب على هذه الاسئله؟؟؟؟؟؟؟؟؟؟؟؟؟؟؟؟؟
طبعا كل المدونين والمدونات اللى هيعلقوا واللى مش هيعلقوا
ده حقد طبقى منى
ولازمن كله يشرب من نفس الكاس اللى شربت منه

9 نوفمبر 2009

نصيحة .. بلاش لقاءات المنصورة





نيل المنصورة بعدسة ليساندرا 
اذا اردت ان تحضر لقاء فتجنب لقاءات المنصورة نظرا لما تسببه لك تلك اللقاءات من حالات صعب الشفاء منها
اولى تلك الحالات عشقك لمدينة المنصورة وجمالها وطيبة اهلها
ثانيها  احساسك بالالفة والعشرة مع اهلها كانهم اناس تعرفهم من زمن بالرغم من معرفتك القصيرة بهم
ثالث تلك الحالات الحفاوة فى الاستقبال والكرم فى الاخلاق المنقطع النظير
رابعها جمال الاماكن ونظافة الشوارع وصغر حجم النيل ونظافة شاطئه
خامسها احساسك بان مصر لسه بخير وبها من الشباب والاخلاق ما يعطيك الامل فى الغد
سادسا اكتشافك ان خطبة الجمعة ما زالت بخير وان الامام يستطيع ان يشد انتباهك له ويجعلك تتناسى تعب السفر
سابعا اذا سافرت المنصورة مع صحبة من فاتيما روح قلب ماما وداليا قوس قزح وخيخة شردة هانم وميرا وعسقول وضياء فانت مع اخوتك ومع كوكبة من الجدعنة والشهامة وخفة الدم
ثامنا فى المنصورة علامة بارزة فى فن المطبخ اسمها صبرنى يا رب وانصحك الا تنساق وراء الكيك بالشيكولاته لانك حتما ستصبح مدمن كيك .
تاسعا  اذا قابلت صلاح مسدس صغير او محمد رحلة البحث او ابراهيم العدوى او مصطفى فانت امام شباب تفخر بانك معهم لانهم يدخلون القلب بلا استئذان وصورة مشرفة لشباب الغد المشرق باذن الله
عاشرا اذا دخلت مستشفى الاطفال فى المنصورة واردت التبرع فلا تقلق كل شىء فى بدايته صعب ويكفيك الصحبة الطيبة
- فى المنصورة سوف تشاهد البراءة والطفولة على طبيعتها فى ايمان سما مصر وليدى طفلة مش عايزة تكبر كماتشاهد الجدعنة وبنات البلد على حق فى شيماء الشعب لابد له من حكومة والطيبة والاحترام فى د/ سوول ويسبر وسارة رحيل اللى على نفسى باعتبرها بورسعيدية نظرا للقائنا اكثر من مرة فى بور سعيد
- اذا سالت عن كفر الشيخ واسباب كفره جاءتك الاجابة بان ايمانه كان ضعيف لكن انا بقولك ان الشيخ تم الغرغرة به نظرا لخفة دم اهل كفر الشيخ وانهم عشريين بطريقة رهيبة جدا وده اللى اكدته ساسو اللى كانت مفاجاة اللقاء بخفة دمها واخلاقها العالية واللى كنت حاسس انها تؤام همس مصرية متغاظة اند مفروسة .
- المحلة بلد الرجولة والجدعنة والطيبة نظرتك سوف تتغير عنها اذا قابلت عاشقة وغلبانة لانها لاعاشقة ولا غلبانة اطلاقا بل القوة والجبروت مع خفة الدم امتزجا معا .
- فى المنصورة ستجد اهل دمياط برقتهم وجدعنتهم واخلاقهم العالية وحسهم الفنى العالى متمثلة فى اليساندرا اللى فكرتنى بالاخت العزيزة سالى حاجات جوايا .
- مفاجاة اللقاء واللى جاءت تسلم عليه وتعرفنى بنفسها ايناس عاشقة الاحزان الجدعنة والرومانسية بتاعت افلام ابيض واسود هانى ثندر اللى سعدت بمقابلته والتعرف عليه شخصية طيبة جدا ومسالم جدا بالرغم من شقاوته فى المدونة والتعليقات .
- فى المنصورة شخصية رائعة جدا اسمها استاذ عبد الجليل حضر لاستقبالنا بالرغم من حالته الصحية ولكن حضر لدقائق ربنا يتم شفائه على خير
اليوم كان رائع جدا والعدد كان مفاجاة متوقعة بالنسبة لى نظرا لارتفاع عدد مدونى المنصورة ،اللقاء حاز على اعلى نسبة بوستات تم تسجيلها عن لقاء تدوينى
ونظرا للاسباب سابقة الذكر انصحك بالتطعيم بمصل وقائى من عشقك وحبك للمنصورة واهلها من الوهلة الاولى
كنت اتمنى وجود مدونى بور سعيد نظرا لقرب المسافة بينها وبين المنصورة وخصوصا بابا ابو خالد وماما امولة و ايناس ونسمة افتقدت وجود ا/ وليد عارفة .. مش عارفة ليه وابنه مهند ومدونة المنصورة بنت قلبى .

شكر خاص للمجهود المبذول والتنظيم الرائع والتنسيق من جانب صبرنى يا رب جزاكى الله خيرا مع ان انه فيه تار بينا والتار ولا العار يا ولدى بخصوص الصور اللى اتنشرت يا صبرنى  والبادىء اظلم وشكر خاص لصلاح مسدس صغير وابراهيم العدوى وكل الحضور من اهل القاهرة والمنصورة والمحافظات الاخرى
لمزيد من التفاصيل باقلام اخرى رائعة 

و كان لقاء من الخياااال بالناس اللى فيه ... الشعب لابد له من حكومة تشكمه
كان أجمل يوم ...صبرنى يا رب
على هامش لقاء المنصورة...lyssendra
يوووم جميل .. مسدس صغير
الناس الحلوين ... هبة bobo
يوم فووووق الخيال .. سوووول ويسبر
يوم ما قابلتكم ..... سما مصر
لقاء العمالقة ..بسويسرا (المنصورة) ..ميادة أيامنا الحلوة
إبقوا تعالوا كل يوم ...رحيل محاولات للبحث عنى
لقاء المدونين بالمنصورة..ياااه دنا إتاخرت قوى .. دعاء مجرد حلم
المنصورة و النيل و الوجه الحسن .... king tooot
المنصورة نورت...محمد الغرباوى رحلة البحث
 
بوست بالتفاصيل عشان خاطر عيونكم...مسدس صغير
دنيا من طراز الروح ...ابراهيم العدوى كاتب مصرى كأنى أتكلم
المدونين و أرائهم فى اللقاء...مصطفى فك زنقة
كل تجمع و انتوا بخير....عاشقة و غلبانة