13 نوفمبر، 2009

تااااج المحبة ولا كرسى اعتراف


التاج ده هجاوبه بناء على طلب من ماما الفراغ لان طلباتها اوامر وعلى عينى وراسى
يس اعتقد بعد اجابة التاج هنقطع كل العلاقات الدبلوماسية وهنسحب السفراء وهنعلن الحرب 

 
انت مين بقى؟
انا البحر فى احشائه الدر كامن
خالد
مدونة همس الاحباب
عندك كام سنه؟
السنة اللى فاتت كان 33 اكيد السنة دى 34
هل انت متزوج ؟ وهل عندك اولاد؟
متزوج واعول مع الاسف
عندى همس وشابى
دراستك ايه؟
بكالوريوس تجارة – شعبة محاسبة
كم طولك...وما لونك...???
جينا للاسئلة المحرجة اللى هتزعلنا من بعض
طبعا طويل جدا جدا والكل شاهد على كده والصور موضحة ذلك
اللون من الوان الطيف ممكن قمحى ممكن خمرى ممكن اسمريكا
ممكن كروهات كده يعنى
هل تمارس عملا بشهادتك ام عمل حر وماهو؟؟؟؟؟
اى نعم بعمل محاسب بجانب عمل حر
ماهى مدة عملك اليوميه؟؟؟
الطبيعى لا يقل عن 16 ساعة او 18 يوميا
ماذا تفعل بوقت فراغك؟؟؟؟؟؟
امممممممم الكلمة دى كنت بسمعها زمان
بس مع الاسف ضاعت فى الزحمة
بس احيانا القراءة او النت او اختراع مشاكل
 
هل لديك هوايات....وهل تمارسها؟؟؟
اى نعم انا كنت بحب العب كرة وسباحة بس الان بكتفى بالفرجة
وكان عندى هواية فى صغرى كنت احب افك الاجهزة الكهربائية 
واطلع كل اللى فيها ومع الاسف مش برجعها تانى .
هل تشعر برضا ربنا عنك ؟
امممممم احيانا واحيانا ببقى خايف جدا من غضبه 
لانى مقصر جدا فى طاعته وعبادته 

هل تحب؟...ومن بقلبك الان؟
نعم الحب موجود بالفعل لا قلبى مساكن شعبية يشيل من الحبايب الف
لو لم تجد من تحب ....فماذا ستفعل؟
اعمل اعلان واقول مطلوب حبيبة
هعمل ايه ولا حاجة الحب مالوش ميعاد ولا مكان ولا زمان بيجى خبط لزق ومن غير استئذان
عندما تكون فى موقف اتخاذ القرار..تخالف الجماعه.. ام تشرك معك الاخرين ؟
غالبا بشرك معى الاخرين وفى النهاية بمشى اللى فى دماغى طالما يتماشى مع راى الجماعة

هل تتعامل بواقعيه؟
الحمد لله اغلب الاوقات
ماهو الشيء الذى فعلته وندمت عليه طول عمرك ؟
اممممممم لا كتير بس هيفيد بايه الندم كل شىء قسمة ونصيب وكل شىء بامر الله
هل تصارح غيرك بالحقيقه ؟ ام ام تقول له مايريد سماعه؟
غالبا ببفى صريح وصراحتى بتزعل بعض الناس بس انا بحب امشى بمبدا يا بخت من بكانى وبكى عليه
لو انسان عادى ممكن اجامله واقوله ما يريد سماعه اما طالما قريب منى يبقى لازمن الحقيقة المرة
صف انسان يمكن ان تحبه عمرك كله؟؟؟
يكون مرآتى وبيخبرنى بعيوبى قبل مميزاتى
احس بحبه من افعاله وليس كلماته
صديق وقت الشدة
احساسه بما فى داخلى
متى يقسوقلبك ؟
لما حد يخدعنى او يكدب عليا ويصمم على كدبه وخداعه
بس مع الاسف قلبى قلب خصاية
ومتى يقسو لسانك؟
لا ده كتير جدا وخصوصا فى الشغل
عندما يخطىء انسان وارفض معاقبته ماديا
ويبقى فى منتهى القسوة مع الحرامى البجح ده بيجننى ويخرجنى عن شعورى
من هو اول من قلت له احبك؟
ده اكيد من زمان قوى وهتكون لحد من اسرتى
ما هو مش ممكن اكون قولتها لفتاة وانا بيبى فاين يعنى
هل يمكن ان تحب احد من المدونين؟
طبعا ........بحبهم كلهم
وهل يمكن ان يكون شريك حياتك؟
مين ده المدونين كلهم لا كفاية 15 او عشرين
والباقى يشاركوا حد غيرى هههههه
ماذا تعنى لك المرأة او الرجل؟
المراة : ام او اخت او زوجة او ابنة المراة نصف المجتمع وتلد النصف الاخر
المراة : رومانسية جدا رقيقة جدا قنوعة جدا جدا قبل الزواج
المراة طيبة جدا صبورة جدا نكدية جدا جدا جدا بعد الزواج
الرجل : اب او اخ او صديق ومطحون يا عينى طول اليوم
الرجل : رغاى جدا مهرج جدا دمه شربات جدا خارج المنزل
الرجل : ابو الهول داخل المنزل
فى زمن البحث عن الماده ..عن ماذا تبحث انت ؟
عن المادة بالطبع
لانها مع الاسف بقت الوسيلة الوحيدة لكل شىء
ولكن الحمدلله بطبعى مش مادى وده عيب مش ميزة فى العصر الحالى
متى تعرف انك تحب ؟
قول للزمان ارجع يا زمان
ارجع يا سهر مع الغزل فى ضوء القمر
زيد يا قلب فى دقاتك عند لقاء الحبيب
اللى بيحب دايما مفضوح قدام حبيبه حتى لو لم ينطق بكلمة فافعاله تفضحه
ماهى الشخصيه التى اثرت بحياتك ؟
والدى فى شدته وسيطرته وجراة قرارته
والدتى فى طيبتها وحبها للاخرين
دكتور المحا سبة فى الجامعة
هل يوجد من تراه سعيدا فى الدنيا ولماذا ؟
اكيد السعادة موجودة بين البشر بس تختلف نسبيا وحسب الموقف
لانه مفيش انسان سعيد دائما ولا تعيس دائما
ولكن السعادة الدائمة فى طاعة الله والقرب منه
سياره وسائق ووقت متاح ....تذهب الى اين ؟ ولمن ؟ بالترتيب
ام تفضل ان تكون وحيدا؟؟؟
ياااااااااه اذهب الى اسكندرية شاطىء المعمورة بصحبة انسان عزيز وغالى ونقضيها ترمس واستمتاع بمنظر البحر والسماء
ثم اذهب الى سوهاج امام كورنيش الجامعة بصحبة اصدقاء الدراسة ونرجع لاجمل ايام العمر
اذهب الى اشخاص نفسى اشوفهم من زمن واقعد معاهم للصبح
اعتقد ان السواق نام منى فاحسن حاجة ارجع وحيدا .
ماهى درجة صراحتك ؟
100 % مع نفسى و80 % مع الاصدقاء والزملاء اللى اعرفهم و70% مع الاشخاص اللى معرفتهم بسيطة
وماهى المواقف التى يمكن ان تكذب فيها ؟
هو السؤال ممكن يبقى بصيغة اخرى ما هى المواقف التى لا تكذب فيها .
بس بصراحة اكتر كذب بيبقى فى حالات انى بدافع عن اهمال واخطاء زملائى
واى انسان ممكن يتعرض لاذى او جزاء
وفى حالة الصلح بين متخاصمين
وطبعا مراتى بكدب عليها دائما من قبل الزواج لانى بقولها يا قمر
هل يتغير الحب بعد الزواج؟
اكيد لكن بنسب ممكن يزيد وممكن يقل
وده شىء طبيعى لان العلاقة قبل الزواج مختلفة عن مسئوليات ما بعد الزواج
غالبا قبل الزواج الحب بيعبر عنه بكلمات لكن بعد الزواج بالعشرة والافعال
فيما تفكر الان ؟
هدخل البيت ازاى بعد التاج ده
لو لم تعيش بمدينتك؟؟؟فاى مدينه اخرى تفضلها؟؟
انا كده ولا كده مش فى مدينتى
بس لو داخل مصر تبقى اسكندرية
لو خارج مصر تبقى المدينة المنورة
من اول من ياتى ببالك لتحكى له اسرارك؟
صديق قريب منى
صديقة بثق فيها
مع ان السر لو طلع منك مابقاش سر
من تريد ان يكون دائما بجوارك ؟
شخص يخاف عليه ويحبنى ويكون فى ظهرى وقت الشدة وفى حضنى وقت الرخاء
من هو الد اعدائك؟
صديق جاهل يبقى عامل زى الدبة اللى قتلت صاحبها
ومن هو صديقك؟؟
من صدقك النصيحة واصبح تؤامك فى الحياة
ماهى صفات شريك العمر؟
الطيبة
الحنان
الاحساس بك بدون كلام
خوفها عليك
مراعاتها لبيتك واولادك
واعتقد كده قمة الحب
لو الدنيا كلها زيك....لمن تقول هذه العباره ؟
لو الدنيا كلها زيك يبقى خربت بقولها لاشخاص كتير فى العمل او فى البيت
ماذا تكره فى الدنيا ؟
الحرامى البجح
المراة النكدية
الحكومات الفاسدة
وماذا تحب؟؟؟
الصداقة
مساعدة الاخرين
عالم التدوين
كيف تواجه مايضايقك؟؟؟
غالبا بالسكون والهدوء واحيانا بالتهريج واللامبالاة حسب الموقف طبعا
وماذا تفعل عند المفاجآت؟؟؟
رب مفاجاة خير من الف انتظار
الحمد لله فى جميع الاحوال 
لو معاك فلوس اكثر مما تتخيل...فماذا ستفعل بها؟؟؟
فلوس كتير يعنى خد عندك
- اعمل مشروع للايتام وذوى الاحتياجات الخاصة لكفالتهم ورعايتهم
- مشروع يساعد على تقليل البطالة وتشغيل الايدى العاملة
- مشروع خيرى يضم مستشفى تخصصى باجر رمزى وبالمجان للفئات الغير قادرة
- مساعدة كبار السن والمحتاجين فى اداء فريضة الحج باذن الله
- مشروع زواج جماعى للشباب بعد توفير المسكن طبعا
هل الفقر يصنع حبا؟؟
الحب الشىء الوحيد الذى لايعترف بالفقر ولكن يهرب من فقر المشاعر
اما الفقر ممكن يصنع حب النجاح وحب اشياء اخرى طبعا
وماذا لو وجد الحب فى زمن الفقر المادى؟
يبقى لاحول ولا قوة الا بالله
والبقاء لله والعاقبة عندكم فى المسرات
وممكن الحب يصنع المستحيل وايدينا فى ايد بعض نبنى عش حبنا
ماهى اقسى صدمه تعرضت لها حتى وقتنا هذا؟؟؟؟
صدنة عاطفية الحمد لله مافيش
ممكن يكون الزواج هههههههه
بصراحة كان مجموعى فى ثانوى عام كان صدمة لاهلى
وماذا كان رد فعلك؟؟؟
الحمدلله كان ماض وانتهى
اما الزواج ما زلت اعانى من صدماته الكهربية هههههههه
وهل تعلمت منها شيء؟؟
لو تعلم اللى قبلى يبقى انا اتعلمت
هل انت على استعداد لتلقى صدمات اخرى؟؟
على اساس انى مفيش غيرى فى البلد دى ولا ايه يا جدعان
ومين عنده استعداد لاستقبال الصدمات
بس طالما قضاء من الله فالحمد لله راض بقضائه
اذا احببت انسان ما ...هل تصرح له بحبك ؟
اكيد طبعا وغالبا يكون بالافعال مش بالكلام
وماذا تفعل لو لم يتجاوب معك؟
هعمل ايه امرى لله هحاول مرة ومرات
وفى الاخر اشده من شعره واقوله فوضت فيك امرى الى الله
الحب الحاجة الوحيدة اللى مش تعرف تشتريها بكنوز الدنيا ولا تخلى حد يحبك غصب عنه
هل تؤمن بالمثل القائل:انا احب فانا اعيش؟؟
ممكن اكون متفق معاه بس مش مؤمن بيه لا ..لان الايمان بالله وحده
وبعدين حتى لو لم احب فانا عايش بس باختلاف المعيشة طبعا
ماهى القضايا التى تشغل بالك؟
المشاكل التى تتعلق بالدين او الوطن
او الاسرة والاصدقاء تشغلنى كثيرا
هل تستطيع تحقيق كل احلامك؟؟
اتمنى ولكن ليس كل ما يتمناه المرء يدركه
علينا السعى وعلى الله التوفيق
هل تمتلك طموحا...وماهو؟
طبعا ابقى رئيس .. رئيس مراجيح مولد النبى طبعا محدش يفهمنى غلط
طموحى انى ابقى انسان يفيد دينه وبلده بقدر المستطاع
كيف ستحقق طموحك...ام سيبقى حلما فقط!!!!!!!!!!
اتمنى انه يتحقق بالطاعة لله والعمل الجاد وحب الخير والناس
ماهى علاقتك بالدنيا؟؟؟
اعيش بها كانى ضيف سيغادر الى مكان اخر فى وقت ما
ماهى علاقتك بالموت؟؟
نهاية طبيعية لكل منا لان البقاء والدوام لله وحده

لو لك اختيار زمن تعيش به....فماهوذلك الزمن ؟ ولماذا ؟
بدون ادنى شك عصر النبى صلى الله عليه وسلم وصحابته
او زمن الفتوحات الاسلامية وازدهار الحضارة الاسلامية
هل يمكن ان ارا ك وانت غائب؟؟؟؟؟؟؟
ممكن طبعا ادخل مدونتى واقرا الفاتحة هتلاقى روحى حضرت
ماذا ترى فى نفسك مميزا عن الاخرين؟
بصراحة مش شايف ميزة واحدة لو حد شايف حاجة يقول
وده مش تواضع دى حقيقة
من اذا اقترب منك ...هربت منه بعيدا؟
صديق السوء .. وشارب الخمر
من تقول له : قرب منى قرب ...ياقلبى يا متغرب
ههههههههه اكيد اللى جوه قلبى
ماذا تريد ان تقوم به قبل ان تموت؟؟؟
يااااااااااااه حاجات كتير
اولها ان ربنا يرزقنى حسن عبادته وطاعته ويحسن الخاتمة
مارايك فى اسئلتى؟؟؟ وبدون مجامله
دى مش اسئلة دى صواريخ وكرسى اعتراف وربنا يستر
ونصيحة بلاش تاجات تانى ارحموا عزيز قوم ذل

هل نسيت سؤال كان هاما بالنسبة لك؟
هو حضرتك سيبتى حاجة ما سالتيش فيها غيرما هو طبقك المفضل
هل استطعت تغطية شخصيتك ؟؟؟
ربما اشياء كثيرة ولكن الجانب الاكبر لا نستطيع التحدث عنه بالكلمات ولكن بالافعال
مع ملاحظة انى ماليش فى الكوره..........هههههههههه
هو لسه فى كورة تاااااااااانى لا ... شكرا بجد
من يهمك ان يجاوب على هذه الاسئله؟؟؟؟؟؟؟؟؟؟؟؟؟؟؟؟؟
طبعا كل المدونين والمدونات اللى هيعلقوا واللى مش هيعلقوا
ده حقد طبقى منى
ولازمن كله يشرب من نفس الكاس اللى شربت منه

هناك 58 تعليقًا:

حنين القلب يقول...

ربنا ما يقطع لينا عاده

اووووووووول تعليق

هقرى وراجعه تانى

حنين القلب يقول...

ايه الاجابات الجامده دى

بس اغلبها كدب
بقى يا كدااااااااااب
انت طويل جدا يا ابنى هى تقصد بالنسبه للانسان العادى مش للاقزام
هههههههههههههههههههههههههههه

وفشمعنه دكتور الجامعه
ليه مش قولت على مدرس الانجلش اللى مدك فى نص الفصل على رجليك
فاااااااااااااااكر

على العموم يسلم ايدك وربنا يرحمنا منك ومن اجاباتك اللى تعلى الضغط

همس الاحباب يقول...

حنين القلب
ربنا بقطع نفسك يا شيخة وانتى بتجرى تاخدى اول تعليق

7annen يقول...

خالد يا جامد هههههههههههههههههه

ايه ياعم الاجابات الجامده دى

بس اشك فى موضوع طويل جدا دا

هههههههههههههههههه

انا مشوفتكش بس احساس بقى

وانا احساسى عمره ما يكدب

حنين القلب يقول...

وعايز تيجى تعيش فى اسكندريه
ليه يا ابنى كده ده انت فى مصر ومش طيقاك فما بالك لو جيت اسكندريه

هههههههههههههههههههههه

ولازم تحب المعمورة علشان كل ما تيجى لازم تنزل فيها اسبوع عشر ايام بس فى مستشفى المعمورة عارف دى بتاعه ايه ؟؟

همس الاحباب يقول...

حنين القلب
اهى دى الاجابة اللى غاظتنى فى التاج كله
المفروض الناس تراعى مشاعر الناس القصيرة اللى زيك
عارفك بتحقدى عليه
بس برده طويل غصب عنك ههههههه
هو انتى مش تصونى سر ابدا
ونعم الاصدقاء
لعلمك بقى عمرها ما حصلت معايا والحمد لله احنا كنا بننضرب على حاجة تانية
وطالما ضغطك على عند طبق مخلل يستاهل بقك
خليه يعلى كمان وكمان ونخلص
منك

حنين القلب يقول...

انا بهدى ليك الجمله دى

لو الدنيا كلها زيك تبقى خربت

ههههههههههههههههههههههههههه

خالود

بجد اجاباتك حلوة ويسلم ايدك
وربنا يخلى ليك شابى وهموسه وامهم

همس الاحباب يقول...

حنين
انتى كمان
ايه يا بنتى ما عندكيش اخوات صبيان ولا ايه
ما بلاش الحقد ده
هههههههههه
خلى احساسك يكدب عليكى المرة دى
وعديها الناس لبعضيها

تحياتى

حنين القلب يقول...

استنى نسيت حاجه
حكايه ان مش فيك مميزات دى حرام وظلمت نفسك

انت كلك مميزات يا خالود

انت تاخد المركز الاول فى الرخامه والغلاسه ودى شهاده لابد ان تفتخر بيها
ههههههههههههههههههههههههههه

وش بيطلع لسانه وبيغيظك

همس الاحباب يقول...

حنين القلب
ده مستشفى المعمورة هتدخليها على ايدى ان شاء الله
مش دى اللى زى العباسية
كده
انا خلاص غيرت كلامى رايح اعيش فى بلصفورة احسن
هههههههه

همس الاحباب يقول...

حنبن القلب
هههههههههه
فعلا لو الدنيا كلها زى كانت خربت من زمان
كفاية انى عرفتك يا ام عمر
وش متغاظ وعايز يعضك
هههههههههه

حنين القلب يقول...

عم الحج

فين بلصفورة دى جنب مينا القمح ولا بعدها ؟؟؟

والنبى اتكلم على قدك انت اخرك الصعيد

همس الاحباب يقول...

حنين القلب
هههههههههه
اهى دى انا عارفها لوحدى
بس طبعا انا فى المركز التانى بعد حضرتك
عيب العين ما تعلاش عن الحاجب

همس الاحباب يقول...

حنين القلب
بلصفورة دى جنب باريس البلد
على الترعة مباشرة
ههههههههه
ناس جاهلة يالتاريخ والجغرافيا

حنين القلب يقول...

لا يا خالود ممكن تعلى

لو العين شبه عنيك الحولانه ساعتها مش هتعرف اذا كان الحاجب فوق العين ولا تحت

هههههههههههههههههههههههههههههه

الشعب لابد له من حكومه تشكمه يقول...

هههههههههههههههههههههههه,,,حلوه الايجابات دى..

الرجل : رغاى جدا مهرج جدا دمه شربات جدا خارج المنزل
الرجل : ابو الهول داخل المنزل

ليييييييييييييييه باه هاه لييييييييه؟؟نفسى الاقى ايجابه للسؤال ده...
مستغربتش ايجاباتك لانها تقريبا زى متخيلتك مع انى متكلمتش معاك كتير:)

sookra يقول...

طوييييييييييييييييييل
ايوه دى صح اوى
ههههههههههههههه
بس ايه الاجابات المبتكره دى
اسكندريه عشقى الاول
بس المعموره ليه؟!!

الأحــــــ إيناس ــــــزان يقول...

الله عليك بجد

انا جايلى التاج ادعيلى اكون زيك رغاية واجاوب عليه

تحياتى ليك

ماما أمولة يقول...

ايه الجمال دا يا ابو همس

انت موتني من الضحك

اما الزواج ما زلت اعانى من صدماته الكهربية هههههههه


والله يا ابو همس انك من أجمل القلوب التي تعاملت معها

ربنا يصلح حالك وينورلك طريقك

ويباركلك في همس وشابي

تقديري

همســات عــلى ضــوء الــقمر يقول...

حلوة اوى اجاباتك
ياخالد

وجاااامدة جدا

همســات عــلى ضــوء الــقمر يقول...

هو انا لما جاوت عليه سميته كرسى اعتراف

اى والله

همســات عــلى ضــوء الــقمر يقول...

مستنيين زيارتك اكييييد

صمت المشاعر يقول...

هههههههههههههههههههههههه

اجابتك جميله جداااا
بسفكرت هتدخل البيت ازااي

انت اقرا ايه الكرسي قبل ما تدخل

اكيد في حد بلغ عنك


دمت بكل خير

عاشقه الرومانسيه يقول...

التاج ده لو المودام شافته يبقى الله يرحمك ياابنى
ههههههههههههههه
وايه حكايه طويل جدا دى؟
احنا هنكدب من اولها؟
مفيش مرايات فى بيتكم ولا ايه؟
انت لا ترى بالعين المجرده ياابنى
P:


لا بجد دمك شرباااااااات ياابو همس
ربنا يكرمك ضحكتنى

بدراوى يقول...

ردودك جميلة اوووى
يا استاذ خالد بجد
ربنا يحميك
ردود لا تخلو من الطرافة و خفة الدم

mohamed ghalia يقول...

خالد باشا
إجاباتك هايلة ياصاحبى وبتدل على شخصية رائعة زى متخيلنا
ربنا يكرمك ويسعدك دايما

حاجات جوايا يقول...

كلام جميل كلام معقول
عايزة اقول كتيرررررررررر عنه
بس خلينى ساكتة احسن
ههههههههههههههه
والله فتحت نفسى على كام بوست كده كانوا فى دماغى من فترة ونسيتهم شكلى هبتدى فيهم بس بعد ما اطمن عالمنتخب

هسن السواطير وانزلهم على طووووووووول
هههههههه
-----------

يعنى رايحين جايين لفيتوا الجمهورية كلها لقاءات .. وتبقوا فى المنصورة ومتجوش دمياط .. ماشى ماشى

لو جيتوا المنصورة تانى تبعتولنا البنات دمياط .. انا بقولكوا اهه.. البنات بس ها ..؟؟
هههههههههه


ميرسى عالكلام الحلو اللى قولته على اهل دمياط .. ربنا يكرمك .. وكويس انى معلقتش عالتاج عشان متغيرش رايك فيهم ههههههههههههه

سلامى لهمس وشابى ومامتهم
هااااا
مامتهم

الفراغ يقول...

ايه خفت الدم دى يا خالد
بجد اشكرك

أم بتول يقول...

خالد التاج طبعا رائع و الأروع أجاباتك التى تدل على شخصية رائعة محبة للخير و للغير ، و قلب و عقل يبحث دائما عن مرضاه الله و حبه و رضاه ، ربنا يبلغك أمانيك و يبعد عنك كل سوء و شر .
وشكرا لصاحبة التاج علشان خلتنا نقرب من أفكارك و نعرف شخصيتك ألأكتر .

بنت مصريه يقول...

لا بجد ايجابات فذيعه
بس انت مش طويل بقى وبشهاده الشهود كمان هههههههههههههه
تاج جامد يا استاذ خالد
اتمنى تنورنى

شفـقــة و إحســــان يقول...

دى اسئلة امتحان يا همس مش تاج
بس بجد انت طلعت جون اجابتك ممتازة فيما عادة الاجابات الخاصة بالجواز ...بقى يا همس الجواز صدمة طب والنعمة والنعمة
لو ام شابى ما قريتش البوست ده ...
لاقولها
لازمن ولابندق تعرف اللى بيتقال من وراها
انا حبيت بس اهدى النفوس
ده احنا اخوات يا راجل
شفقة

ليس فقيرا من يحب يقول...

السلام عليكم

اول زيارة للمدونه الاقى التاج

اللى يقصف العمر ده هههههههههههههه

مشاء الله اجاباتك خفيفه جدا وزى

العسل

واكتر حاجه عجبتنى هوايه انك تفك

الاجهزة دى اخويا بيعمل كده بالظبط

مبوظ مالا يقل عن تلاته تسجيل و2راديو

دا غير اجهزة اصحابه شاطر اوى يفتح

الجهاز من دول ويلعب فيه وانسى انه

يرجع تانى ههههههههههههههههههههههههههههههههه

ياريت تتقبل مرورى

فى حفظ الله

فاتيما يقول...

و الله يا خالود
احييى صراحتك
خاصة فيما يختص بالراجل جوا البيت و برا البيت
و بعدين شميت ريحة مش عاجبنى كدا
عن اللى جوا قلبك
و اللى انتا مفروض تحبه
و أبصر إيه
إيه يا حاج أنتا
هوه احنا حدانا حد يحب غير المدام
أيه؟
بتتكلم بشكل عام و مش محدد يعنى
أيوه كدا تراجع
هيا هزلت و لا إيه؟؟؟
و انت مش لاقى ميزة .. يخربيت كدا
طب دنتا اصدق و اصرخ مثال للجدعنة و الاخوة اللى ف الدنيا يا بنى
و انا من اول العالم اللى تشهدلك بذلك و ربنا يخليك لينا يا رب
هوه تاج متين فعلا و فيه بلاوى
بس انت خرجت منه آخر تمام
و بناء عليه محدش يفكر إنه يباصلهولى خالص مطلقاً أبداااااا
لأنى مش هجاوبه
الا على حثتى ى ى ى ى ى ى
سلامى لأم البنات الغلبانة
و لشابى و همس

أسير الجراح يقول...

بجد

مش عارف اقول اية

اجبات جميلة

بس الاسئلة صعبة وكتيرة

يا ابو شابى دخلت البيت من اليوم التاج ولا لسة

هههههههههههههههههههههههههههههههة


بجد اجباتك جميلة جدا

وبجد اى انسان يتمنى انك تكن اقرب صديق او اخ ليك

ربنا يحبب فيك خلقة يا ابو همس

مودتى

اسير الجراح

مسدس صغير يقول...

تاج جديد
اجابات جديدة
جميل اوى
بس متعتبرنيش من الناس اللى علقت وللا من اللى معلقوش
هههه
ربنا يباركلك فى همس وشابى
شخصية محترمة
بس يا ترى انت صريح معايا بنسبة كام؟؟
هههههه
سلاموزك معاك

البروفيسير يقول...

انا دخلت اهنى واقول مبرووووووك لمصر
تحياتى

نهر الحب يقول...

السلام عليكم ورحمة الله وبركاته:
كيف حالك يا أستاذ خالد؟
اجابات منطقية بس مش كلها صراحة.
المهم انك نجحت فى انك تعدى فى الامتحان.
هههههههههه.
ياترى ام همس أخدت حقها بعد البوست ده واللى ما شافتهوش؟


ربنا معاك.

نهر الحب

همس الاحباب يقول...

الشعب لا بد له من حكومة تشكمه
هههههه
عجبتك قوى انه ابو الهول
علشان يحرس الاولاد وامهم يا ستى
ههههههههه
الحمد لله انها كما تخيلتى
مع انى مش عارف التخيل ده ضدى ولا لصالحى
نورتينا يا شيما

همس الاحباب يقول...

سكرة
هههههههه
اهم حاجة انك خدتى بالك انى طويل
انا بقول ما فيش حد غيرك فى التدوين
هههههههه
اسكندرية ده عشق
واللى بيعشق اخرته الجنان
ومستشفى المجانين فى المعمورة
فانا بقرب المسافة
دمتى بخير يا سكرة

همس الاحباب يقول...

عاشفة الاحزان
ربنا يوفقك
ونكون احنا ربعك بس فى اجاباتك يا ست الكل
تمنياتى لكى بالتوفيق والسعادة

همس الاحباب يقول...

ماما امولة
ههههههه
ربنا يسعدك دنيا واخرة
وبفرحك باولادك ان شاء الله
الص راحة حلوة يا ست الكل
تحياتى

همس الاحباب يقول...

همسات على ضوء القمر
الحمد لله انها عجبت حضرتك
هو فعلا كرسى اعتراف بالكهرباء كماااااان
الحمد لله تمت الزيارة
واسف لتقصيرى

همس الاحباب يقول...

صمت المشاعر
ههههههههه
الحمد لله عدت على خير
ونمت على السلم ما وصلتش للشارع
سعيد بتواصلك
دمت بكل ود

همس الاحباب يقول...

عاشقة الرومانسية
يا بنتى احنا ولا يهمنا
احنا جدعان قوى بس لحد البيت واشك
يعنى بلاش تفتنى يا دودو
هو عندك شك انى طويل ولا ايه
وبعدين انابقول طويل جدا جدا
وده اكيد لسانى افهموها بقى
ربنا يسعدك دائما
نورتينا يا دودو

همس الاحباب يقول...

بدراوى
يا هلا بيك يا بدراوى
منورنا ومنور المدونة كمااااان
ربنا يكرمك ويحفظك اخى العزيز

همس الاحباب يقول...

محمد غالية
ربنا يكرمك
جزاك الله كل خير
وربنا يديم المعروف
تحياتى

همس الاحباب يقول...

حاجات جوايا
اهلا وسهلا
حمدلله على السلامة يا ام دودو
نورتى المدونة
الحمدلله ان نفسك اتفتحت
وفى انتظار ابداعاتك
وان شاء الله نعمل لقاء فى دمياط
علشان خاطر شعب دمياط وخاطر احسن ناس وصحبة
وهنبعت البنات بس حاضر
الله يسلمك يا ست الكل
تحياتى

همس الاحباب يقول...

الفراغ
ههههههههه
بجد رائع جدا التاج
والاروع تعليق حضرتك
مناسب جدا لطول البوست
هههههههه
اى خدمة يا ماما علشان خاطرك انتى بس
تحياتى

همس الاحباب يقول...

ام بتول
ربنا يكرمك
ويجازيكى حيرا
فحضرتك مثال يحتذى به فى الالتزام وحب الخير
بارك الله لكى
تحياتى

همس الاحباب يقول...

ينت مصرية
هههههههه
اه فعلا بشهادة الشهود وانتى واحدة من شهود العيان
هههههههه
ربنا يكرمك
ان شاء الله طبعا
نورتينا

همس الاحباب يقول...

شفقة واحسان
ههههههههه
ما بلاش انتى يا سفقة يا اختى
انا عارف تهدئة النفوس بتاعتك
كفاية اخويا سونه مختفى من اخر بوست
ومش عارفين الزمن عامل فى ايه
قلبى معاك يا سونه ربنا يصبرك ويصبرنى
على الملايكة اللى معانا
ههههههههه
من خاف سلم يا جدع
تحياتى وسلامى لحضرتك ولاحسان بك

همس الاحباب يقول...

ليس فقيرا من يحب
ههههههههه
الحمد لله ان الهواية اختفت
احسن ومان المدام كانت رفعت قضية خلع
نورتينا وسعيد جدا بتواصل حضرتك
تحياتى

همس الاحباب يقول...

فاتيما
ام يوسف منورة الدنيا
ههههههه الصراحة راحة يا ام يوسف
وبعدين لا بلاش تفهمنى غلط
احنا ناويين نعمل شركة وشراكة بين المدونين مش حاجة تانية
ربنا يكرمك ويسعدك
ده من ذوقك وكرم اخلاقك
دمتى بكل ود
تحياتى

همس الاحباب يقول...

اسير الجراح
هههههههه
لا متخافش يا جدع احنا نعجبك دخلنا فى حراسة مشددة طبعا
ربنا يكرمك ويديم المعروف ما بينا
تحياتى للك يا حماده

كيكى عوووووو يقول...

يااااااااااادى الفضااايح!!!
يعنى لو عندك وقت فراغ تعمل مشاكل مش مشكلة يعنى!!!
يالهوى من طول البوست نسيت الحاجات الى علقت فى دماغى
مجموعك فى الثانوية العامة ان الثانوية بتاعتى كانت صدمات متتالية لاهلى وصمة عااااااااار لحد دلوقتى والله
***فكرتنى بهنيدى لمة راح الصين وقالها انا اطول واحد فى مصر!!!
كع كع كع
انا لو مراتك والله العظيم اعمل عليك حجر فى شهامتك المفرطة الى تخليكوا اخر الشهر متلاقيش حته طبق مش بدود هتلاقى الدود هرب منكم اصلا مش بكلم ع التاج بس بكلم ع حاجات شوفتها بعينى وشهامة برضة حصلت معايا
والله ياخالد انت مثال لبقايا الرجال المصرى الى بجد!! ربنا يحفظك
ونبى قولى شااابى دة ولد ولابنت ولا دة اسم دلع اصل الاسم دة مجنينى اوووووى مش عارفة ليه!!!!!!

اقصوصه يقول...

مبروووك :)

خواطر شابة يقول...

بداية تحية طيبة
تانيا انا نفسي اعرف حاجة واحدة بس المدام قرأت اجاباتك عن هدا التاج ولا لا عشان اشوف رد فعل المرأة المصرية وأعمل دراسة مقارنة مع رد فعل المرأة المغربية وابقى اقولك على النتيجة
مع تحياتي

rovy يقول...

ما شاء الله عليك بجد برافوا انك قدرت تجاوب التاج ده :)
واضح انك مثابر و صبور ..
حقيقى اجاباتك رائعه و دمها خفيف جدا و عجبنى قوى حبك لمدينتى الحبيبه اسكندريه ..
ربنا يبارك لك فى اولادك و زوجتك و يرزقك كل السعاده

تحياتى دوما