13 ديسمبر 2009

مشاركة فعالة


بالرغم من برودة الجو وتقلبه لكن اليوم يحمل من المشاعر الدافئة ما يذيب جبل من الجليد انه يوم الحادى عشر من ديسمبر 2009 يوم البؤجة الشتوية ولقاء تدوينى قد يكون من اللقاءات الخيالية بالرغم من حضورى لقاءات كثيرة رائعة بالفعل وبالرغم من الارهاق والتعب والسهر لمدة 48 ساعة قبل اللقاء لظروف طارئة
الا اننى بمجرد وصولى الى مسجد الزهراء ورؤية الكوكبة الرائعة من المدونين زال كل شىء اليوم ابتدا بسيل منهمر من المكالمات التليفونية من التاسعة صباحا والكل يؤكد المجىء والحضور والبعض يعتذر ويرسل سلام وتحيات للجميع
لن اسرد تفاصيل كثيرة للقاء فكما عودتنا الرائعة دائما ام يوسف بسرد الاحداث للجميع وكانك تعيش الحدث بنفسك
لذلك ساكتفى ببعض الانطباعات والاحداث الهامة خلال اللقاء
- الانطباع الاول خاص بعدد المشاركين ولفت نظرى زيادة الحضور بشكل رائع كما اسعدنى مشاركة مجموعة كبيرة تحضر اللقاء للمرة الاولى
- مشاركة عدد لا باس به من مدونى المحافظات القريبة والبعيدة من القاهرة مثل بور سعيد والاسماعيلية وبنها والزقازيق والغردقة
- المشاركة الايجابية والفعالة فى حجم التبرعات والتفانى والاقبال المتزايد فى المشاركة والمساعدة من جانب الحضور
- احساسى قبل اللقاء بان الحضور سيكون مشرف واليوم سيكون رائع حقا والحمد لله انه احساس صادق
- الشىء الرائع حقا واعجبنى كثيرا ان عدد المشاركين الرجال كان اكثر بكثير من الاخوات ودى ظاهرة قلما تحدث فى اللقاءات حسيت اننا عزوة ولسنا اقلية فى عالم التدوين ..
- بالرغم من قلة عدد المشاركات من النساء لكن تلاحظ انهم اضعاف مضاعفة وان الواحدة بعشرة رجال ونشاطهم ملحوظ جدا
- الحضور القهرى لقوس قزح بالرغم من الوعكة الصحية وظروفها الصحية ولكن اصرارها على المجىء شىء رائع وتقدير للجميع
-نادى المحامين والدعوة الكريمة والاختيار الموفق من الاخ شريف باشا المكان جميل وقريب من مكان التجمع وموقعه على النيل اضفى كثيرا من البهجة
- اللقاء التدوينى بداخل القاعة الشتوية بنادى المحامين والحوار المثمر بين المدونين ومناقشة بعض القضايا الهامة مثل الاحداث الناجمة عن مباراة مصر والجزائر وبالرغم من اختلاف الرؤى ووجهات النظر المتباينة فان الهدف واحد وهو الحب وعدم الكراهية والتعايش السلمى والحوار الديمقراطى ساد الحوار بفضل حيادية الاستاذ الرائع احمد عبدالمنعم
ووجهات النظر والتعبير عنها بطريقة بسيطة كانت السمة الرائعة فى الحوار واحسست باننا شعب يعشق الديمقراطية ومن السهل تطبيقها اذا اتيحت لنا فى الحوار يالرغم من ديكتوريتنا فالديمقراطية لها حيز بداخلنا
اهم الاهداف التى تبلورت من خلال اللقاء والحوار كان الاتى
- اجتماع شهرى بصفة دورية للمدونين لمناقشة اهم القضايا على الساحة وليكن الجمعة او السبت الاول من كل شهر برغم تحفز البعض على عدم الحضور الدائم الا ان الفكرة لاقت ترحيب الجميع
- نقل نطاق الاعمال الخيرية لخارج القاهرة وخصوصا بعض المحافظات التى تحتاج لمساعدات عاجلة
- تفعيل دور المدونين والمشاركة الفعالة فى القضايا الهامة ومشاكل الوطن من خلال ابداء الراىء والمشاركة فى جروبات وانشطة تدوينية لمساعدة المجتمع والايجابية خاصة فى الانتخابات القادمة .

- لقاء تدوينى ببور سعيد بدعوة كريمة من نهر الحب يوم 29 يناير 2010 
انطباعات شخصية عن الحضور
سعدت جدا بمقابلة د/ احمد عبدالعدل ومشاركته معنا بالرغم من غربته فى السعودية لكن اصر على المشاركة وهانى ابوزيد من الطيور المهاجرة ومانو وسعدت بالمشاركة الايجابية والمجهود الرائع للاخ شريف باشا
سعدت بوجود الرائعات فى عالم التدوين فاتيما ام يوسف ود /ستيته اللى ما عرفتش اتكلم معاها طبعا بس شرفت بها جدا
الحضور الدائم والرائع بحق لاهل بور سعيد ايناس نهر الحب ونسمة والوافد الجديد الجميل محمد وعلى الهامش اتصال من الغائب الحاضر دائما بابا ابو خالد ودعوتى بالشفاء العاجل لماما امولة ربنا يطمنا عليها
سعدت بمقابلة بسكوته اللى جاءت من الاسماعلية خصيصا للمشاركة وسعدت جدا بمقابلة الاخ العزيز احمد عبدالمنعم وابنه عمر اللى شرفونا كعادتهم دائما
كذلك الاخوة والاخوات دائمى الحضور والمشاركة فى اعمال الخير عادل البلد دى فيها حكومة ومينا جرجس منامينو وضياء بيوتفل مايند ومحمود الدوح وميرا امراة بعقل رجل وسومه مجنونة فى بلد عاقل ومروة زهرة الجنة ووليد كنج توت وزوجته وابنه الجميل عمر وفاروق عادل .
الثنائى الرائع والذى يضفى بهجة وسرور على كل لقاء شفقة هانم واحسان بك توم وجيرى عالم التدوين
سعدت بوجود وصحبة الاخ العزيز الخدوم جدا احمد k اللى حضر من الغردقة خصيصا للمشاركة ،نور الدين محمود العقل الناضج والفكر المستنير والغالى على قلبى عسقول
فاكهة اللقاءات والحضور على الماشى دوما احمد كمال ومهندس شريف واسامه عبدالعال
شكر خاص بجميع المتصلين والمشاركين وجدانيا معنا الاخ العزيز ايهاب الطائر الحزين واميرة على كوكب مهجور وساسو سكرة وبحر الحياة وحنين القلب وعاشقة الرومانسية واهل السودان متمثل فى عاشقة القمر
شكرلجميع الحضور والمشاركين
شكر خاص لقوس قزح وابى هانم على الحضور والمشاركة الفعالة بالرغم من ظروفهم الخاصة
احداث اللقاء بعيون اخرى
احمدك يارب ... روح قلب ماما
 المدونون حجر الزاوية .. نور الدين 

هناك 27 تعليقًا:

حنين القلب يقول...

هيييييييييييييييييييييييه اول تعليق
بالعند فى ناس
وش بيطلع لسانه

حنين القلب يقول...

ربنا يجعل اليوم فى ميزان حسناتكم ويتقبل منك صالح الاعمال

حنين القلب يقول...

كفايه كده ولا ناخد التالت كمان بالمرة ؟؟

عاشقة القمر يقول...

هو ياختي ياحنين بتنامي في مدونه

عاشقة القمر يقول...

انا بتعبر نفسي اول تعليق

حنين القلب يقول...

اااااااااااااااااه بنام على باب المدونه
هو ده اى حد ده خالود يعنى اخويا

فيه حد عنده مانع ؟؟ ههههههههههههههههههههههه

عاشقة القمر يقول...

ربنا يقدركم علي عمل الخير
ربنا يجعل في ميزان حسناتكم

عاشقة القمر يقول...

انا سعدت بمعرفتكم

غير معرف يقول...

ربنا يقدركم على فعل الخير يارب
وجعله الله فى ميزان حسناتكم

فاتيما يقول...

ربنا يبارك فيك يا خالد
انت جزء أصيل من هذا اليوم
و من أى يوم فيه خير
انت و خيخة و ووش الخير و آبى هانم
عودتمونا على إنكم بتقودوا المسيرة فى صمت
بقينا بنبصم وراكوا عمياااانى
لأن الخير دايما معاكو بيتضاعف و يكبر و يزيد
انا كمان المرة دى كان قلبى حاسس إننا هنكون أكتر من المرات الماضية
بس الرجالة شادة حيلها فعلا المرة دى
كان لازم خوخة تديكوا
كلمتين فى جنابكو يعنى ؟!!!
بهزر بهزر
متهيألى الشتا اللى جاى علينا شادد حيله هوه السبب
و الناس لا شعوريا تقولش كدا
إن ربنا بعت ف قلوبها الرحمة
على قد البرد
عشان فيه ناس تانية محتاجة
فعلا و مستنية بفراغ صبر ما تحويه
البؤج
كل بؤجة و أنتى معانا
يا أبو همس و شابى

مهندس مصري بيحب مصر يقول...

ربنا يجمعكم دايماً على خير و يسعدكم و يقدركم على فعل الخير و يبارك لكم فيه

ستيتة يقول...

انا اتشرفت بيكم كلكم
بنشاطكم وصباحكم الفل
ربنا يجمعنا دايما فيما يحب
تحياتي

Mano يقول...

كان يوم جميل جدا ياستاذ خالد
والاجمل اني تعرفت بحضرتك وباقي الاخوة المدونين
تحياتي وربنا يبارك فيك

P A S H A يقول...

اليوم كان زي الفل حقيقي والحمد لله ... حقيقي بجد بجد بجد أنا اتشرفت بيكم كلكم ... وربنا يجازيك خير الثواب على المجهود الجبار اللي حضرتك عملته في اليوم ده عشان يطلع بالصورة المشرفة دي وربنا يا رب يجعله في ميزان حسناتك ... وبإذن الله نتقابل قريب في الخير
تقبل مروري وتحياتي واحترامي

عمرو جويلى يقول...

السلام عليكم
كنت أتمنى مشاركتكم فى هذا
التجمع الرائع ولكن قدر
الله وما شاء فعل
جمعكم الله فى الفردوس الأعلى
خالص تقديرى

نور الدين (محمد الجيزاوى) يقول...

خلود حبيب قلبى
....
والله ربنا يجزيك كل خير على مجهوداتك الجبارة خاصة انت وداليا
واللى بتثبت انه لولا افراد دايما بينكرو نفسهم زيكم مكنش اتحقق اى شيء
فعلا ياخالد انت حد جميل وروحك صافية وربنا يعلم قد ايه انا بحبك فى الله
جزالك الله كل الخير ويارب دايما نلتقى على خير

الطائر الحزين يقول...

ربنا يقدركم دوما على التجمع فى الخير

simply me يقول...

دايما متجمعين فى الخير يارب

Baskouta يقول...

أ\ خالد
ميرسي على زيارتك للمدونة
وبجد انا سعدت جدا بلقائي معاكم كلكم
طبعا كان نفسي اتكلم معاكم اكتر واستنى شوية كمان بس انت عارف بقا ظروف السفر وكدة وكان لازم امشي بدري
ان شاء الله المرة الجاية استنى شوية اكتر واتعرف عليكماكتر ونتكلم ونتحاور
وانا باذن الله هحاول ما افوتش اي لقاء تدويني لان انتوا بجد احلى صحبة في الدنيا
تحياتي واحتراماتي

قوس قزح يقول...

بقى اقولك اليوم بتاعك تقولى لا يا اختى

اديك ادبست يا جميل و انت مش واخد بالك نييييياهاهاها


اعمل حسابك
بؤجة اول جمعة فى مايو .. تبعك
و احنا بس مساعدين ايمن و ايسر ههههههههههه

Lyssandra يقول...

أ. خالد

تحية طيّبة لشخصك الكريم

بالطبع فاتني اللقاء ده بروعته كما بلغني من الأصدقاء
لكن معلش تتعوّض ان شاء الله علي خير

ربنا يجازيكم خير
وان شاء الله أقدر أساهم مرة تانيه

تحياتي :)

Lyssa

Lyssandra يقول...
أزال المؤلف هذا التعليق.
صفــــاء يقول...

وش مكسوف وباصص فى الأرض

معلش بقى يا ابوهمس
انت عارف الظروف حدانا فى الصاعيد

وربنا يقدركم دايما على فعل الخير

ahmed_k يقول...

شكرا يا خالد على اليوم الجميل ده
واللي مجهوداتكم بتظهر فيه كل مره عن سابقاتها
ربنا يوفقكم ويجعله في ميزان حسناتكم
ولكم كنت سعيد بأنك أول من قابلت في هذا اليوم المميز
ربنا يجعلها عاده دايمه يا رب

rovy يقول...

جزاكم الرحمن خير جميعا و أعانكم و أعان الجميع على فعل الخير يارب

تحياتى

ليس فقيرا من يحب يقول...

جزاك الله كل خير

كل سنه وحضرتك طيب يارب والاسرة الكريمه

بمناسبه العام الهجرى الجديد

وان شاء الله الايام الجايه تكون اجمل

نور الدين (محمد الجيزاوى) يقول...

جرى أيه ياخلود
كل ما آجى اشوف جديد ملاقيش
شد حيلك ياباشا
جايلك الكافتريا قريب على فكرة
اعمل حسابك بقى
..
تحية لك اخى الحبيب