15 نوفمبر 2008

يوم جميل .. لا

تحديث هام جدا
*********
بابا ابو خالد ( ذكريات ابو خالد )
حمدا لله على عودتك لعالم التدوين ولكل احبائك
=================
الرابع عشر من نوفمبر كان يوم جميل ... لا اعتقد.. لانه كان يوم اكثر من رائع فكلمة جميل تبخسه كثير من حقه
يوم زيارة دار الايتام ببور سعيد كان يوم حافل بالمفاجاءت السارة والسعيدة على كل المستويات
اليوم ابتدا من السادسة صباحا بالتنسيق مع الاخ العزيز محمد ( ابن حجر العسقلانى ) للسفر معا الى بور سعيد وركبنا المترو فى طريقنا الى الترجمان وهناك قابلنا خال المخاليل احمد الصباغ وكان برفقته اثنين من المدونين بعدها ركبنا السوبر جيت متجهين الى مدينة بورسعيد وخلال الرحلة بدا كعادته احمد الصباغ بتصوير كل كبيرة وصغيرة حتى سلة المهملات لم يتركها ودارات الاحاديث الجانبية والتى تركزت فى الحديث عن ابو خالد وامكانية رؤيته من عدمها وان كان يساورنى بعض الشك فى عدم مجيئه نظرا للاتصال الهاتفى الذى دار معه يوم الخميس مساء قبل اللقاء بسويعات والذى احسست بعده باحباط شديد والم نظرا لاخبارى بانه لن ياتى لظروف ما ويعتذر لى بشدة ويطلب منى ان اسامحه ومزعلش منه لعدم مقابلتى وكان ردى فى منتهى البرود نظرا لحالة الحزن والاحباط التى انتابتنى خلال المكالمة وقولتله ولا يهمك
عادى انا مش عايز اكتر من انى اطمئن عليك لانك وحشتنى وبراحتك وانهيت المكالمة وداخلى بركان من الحزن والاحباط .
ولكن سبحان الله لم تمر اكثر من ربع ساعة واتلقى اول مكالمة هاتفية من ابو خالد منذ غيابه منذ اكثر من 55 يوم بيسالنى انت زعلت
قولتله اطلاقا وازعل ليه انا مقدر ظروف حضرتك وباحترم رغبتك كل ما فيها انك وحشتنى وكنت عايز اشوفك مش اكتر وكانت مازال تمتلكنى حالة من برود الاعصاب خلال الحوار مع انه بداخلى بركان يريد ان ينفجر ويعلن العصيان لرفضه عدم المقابلة ولكن .. قدر الله وماشاء فعل نطق بكلمة واحدة اثلجت صدرى ومحت كل ملامح الاحباط والحزن وانا ما ينفعش تيجى بور سعيد من غير ما اشوفك بس سيبنى لحد بكرة وابقى اتصل بيك اشوف نتقابل ازاى .. طبعا على الفور وافقت لانه وعد من ابو خالد ..ونحن بالسوبر جيت وما زال الحديث عن ابو خالد بينى وبين الصباغ وعسقول واحتمال عدم حضوره اذ بشاشة التليفون تخبرنى بانه هناك اتصال من ابو خالد ؛ قمت سريعا بالرد عليه واخبرنى بانه سياتى اللقاء بناء على رغبتى والمفاجاة السارة انه سياتى مع افراد الاسرة واذ بى اخبر الصباغ وعسقول بالخبر الذى جعلهم يطيرون من الفرح بهذا الخبر.
وصلنا مدينة بور سعيد فى الحادية عشر صباحا وركبنا انا وعسقول تاكسى والصباغ والمدونتين تاكسى اخر واتجهنا الى دار الايتام
وكان هناك فى استقبالنا اصحاب المجهود الرائع واصحاب الدعوة الكريمة:
ايناس نهرالحب
داليا اهو ده عيبه
دعاء ربع ضارب
ونسمة اخت ايناس
واللى احب اقولهم كلمة كنتم رجالة ووقفتوا وقفة رجالة مع ان الواحدة فيكم بميت راجل بصراحة .
دخلنا الدار كان هناك المدونة الرائعة بحق ماما امولة والتى طلعت من بور سعيد واللى سعدنا جدا جدا بالتعرف عليها وتشريفها اللقاء طبعا دخلنا الدار وجدنا الاطفال يلعبون فى فناء الدار والدنيا فوضى وعدم وجود احد من المشرفين على الدار للاشراف والاهتمام بهؤلاء الاطفال الصغار وكان فى استقبالنا عبدالرحمن صاحب الصورة التى ادمت قلوبنا فى البوستات السابقة لكن هذه المرة كان ناوى يدبحنا بالمنشار

المهم طلعنا انا وعسقول نسترجع ذكرياتنا مع الاطفال فى لعب الكرة والتنطيط والصباغ كعادته اندمج فى التصوير والمراجيح
بعدها اتجهنا لصلاة الجمعة فى مسجد قريب من الدار وكان مخطط اننا نقابل ابو خالد هناك
بصراحة خطبة الجمعة كانت رائعة جدا بس حسيت ان الامام مدون ومتضامن مع البنات فى كلنا ليلى وشرد الشباب .
انتهت الصلاة وخرجنا من المسجد وانتظرت ابو خالد لينتهى من صلاته وجريت عليه وسلمت عليه وارتميت فى حضنه وحسيت باحساس غريب جدا لما الاب يكون مسافر بعيد جدا وفجاة يظهر امام ابنائه احساس جميل وصعب الكلمات توصفه او تعبر عنه بعدها جاء الصباغ وعسقول واعتقد انهم حسوا بنفس الاحساس اتجهنا مع ابو خالد وبصحبته ابنه الصغير خالد والسيدة الفاضلة ام خالد لدارالايام وكانت هناك سعادة وفرحة فى الدار من الموجودين برؤية ابو خالد.
وطبعا كان بدا توافد بعض المدونين اثناء الصلاة منهم سارة صاحبة مدونة محاولات فى البحث عنى ودى اول مرة نلتقى بها واللى جاءت من المنصورة خصيصا واللى بذلت مجهود فى اللعب وتسلية الاطفال ومحاولة ادخال السعادة والسرور اليهم ربنا يجازيها خيرا وشفقة هانم واحسان بك ودول جم من القاهرة وكان تانى لقاء لى بهم ولكن بصراحة طلعوا حكاية تمتعوا بخفة الظل واضفوا بهجة وسرور علينا بتواجدهم ومشاركتهم الجميلة للايتام.
بعدها قمنا بتسليم التبرعات لادارة الدار وقمنا بتوزيع العصائر والحلويات والهدايا على الاطفال فى جو من المرح والسرور من الجميع ولكن هناك بعض الملاحظات على ادارة الدار
- عدم الاشراف الجيد ومراعاة الاطفال رعاية سليمة
- عدم وجود اخصائى اجتماعى ونفسى بالدار وخصوصا ان هناك اطفال بصراحة حسيت بالحزن والاسى تجاههم نظرا لانطوائهم وعدم مجاراتنا فى اللعب والسعادة معهم وحسيت بنظرات حزن واسى فى عيونهم وهناك اطفال لديهم طابع عدوانى وشراسة لابد من تقويمهم سلوكيا والاهتمام بالجانب النفسى لدى الاطفال من جانب الادارة .
كمية التبرعات والهدايا بسم الله ما شاء الله كانت كثيرة جدا وربنا بارك فيها حتى اللعب والعصائر الكل انبسط وفاض منها
طبعا شكر واجب لكل من ساهم فى تلك التبرعات ولم يحالفه الحظ فى الوجود معنا وجزاءهم الله خيرا
فاتيما روح قلب ماما - داليا قوس قزح - بت خيخة ام شريف - محمد فاروق قلب مصرى - احمد سكر .
شكر خاص للاستاذ / ممدوح زميلى فى العمل لمجهوده معى فى شراء الادوات وتبرعه مع انه لا ينتمى لعالم التدوين ربنا يبارك فيك يا ابو ضحى
انتهى اللقاء فى دار الايتام واتجهنا الى بور فؤاد وركبنا المعدية وانتقلنا من قارة افريقيا الى قارة اسيا فى غضون 10 دقائق سبحان الله جلسنا فى نادى ببور فؤاد على قناة السويس المنظر بصراحة رائع وحركة السفن جميلة والمكان جميل جدا
جلسلنا فى جو اسرى وسط والدنا العزيز ابو خالد والسيدة حرمه وماما امولة والصباغ وعسقول وشفقة واحسان وسارة وايناس ونسمة وداليا ودعاء وانضم بعض المدونين من بورسعيد الينا فى الجلسة بعدها انصرف ابو خالد واسرته لارتباطهم بمواعيد فى المنزل
وتناولنا الغذاء بالنادى وكانت نهاية الصباغ من بعدها واصبح ابو التهييس بدلا من خال المخاليل واصبح لا حول له ولا قوة والكل قام بتصويره واحتفظ بالصور لمساومته عليها وخصوصا انا وعسقول واحسان بك وسارة وناويين نخلص تار المدونين منك يا صباغ وننشر الصور على الفيس بوك وعلى جدران المدونات والحوائط .
بعدها رجعنا ثانية الى بور سعيد فى رحلة استكشافية لمعالمها العريقة واكلنا جلاس يا مدونين ودوبنا قلوب الناس .
بعد رحلة جميلة ببور سعيد حان وقت الرحيل الساعة تقترب من التاسعة مساء ولا بد من العودة عزمنا الرحيل واتجهنا الى السوبر جيت وحجزنا التذاكر وانتظرنا فى قهوة قريبة لحين حضور احسان وشفقة وركبنا الباص انا والصباغ وعسقول واحسان وشفقة فى طريق العودة الى القاهرة وكانت رحلة ممتعة جدا وخصوصا من الصباغ وتهييسه بصراحة ضحكنا لينا وللزمن والحمد لله كنا مبسوطين جدا
كلمتين وبس :
ابو خالد : وجودك اعطى لليوم رونق خاص وجمال واثلج صدورنا جميعا وحمد لله على السلامة وفى انتظار المدونة كما وعدت .
الصباغ : انت انسان رائع جدا وبتضفى على التجمعات جو من البهجة والسرور وخفة الظل بس ده ما يمنعش انى اساومك على الصور
عسقول : ربنا يجزيك خيرا لانك انسان من داخلك جميل ونقى وسعدت بصحبتك ذهابا وايابا وخصوصا اننا اولاد منطقة واحدة .
شفقة واحسان : سعدت بمعرفتكم وتواجدكم جدا جدا وشرفت بعودتكم معنا ، محمد انت انسان خفيف الظل وامتعتنا بالحديث معك .

سارة ( رحيل ) شرفت بمعرفتك انسانة رقيقة وطيبة جزاكى الله خبرا كثيرا على تعبك مع الاطفال .

ماما امولة : كنت سعيد جدا جدا بوجودك وبالتعرف على حضرتك بارك الله فيكى .

ايناس * داليا * نسمة * دعاء بصراحة مش عارف اقول ايه فى حقكم غير ربنا يجعله فى ميزان حسناتكم ويبارك فيكم
انتم كنتم فى منتهى الجدعنة والشهامة وكرم الاخلاق بجد بجد انتم بمليون راجل
والف مبروك عليكم وعلينا اليوم كان رائع جدا بمجهودكم وتعبكم ومبروك النجاح
والحمد لله الذى بنعمته تتم الصالحات

هناك 39 تعليقًا:

Unknown يقول...

اول تعليق
بجد بجد جزاك الله خيرا
انت تعبت معنا جدا وانا علمت لك قلق وتوتر وتعبتك اوى
فجزاك الله خيرا
بجد اليوم من غيركم لا شئ
ربنا يكرمك ياخالد ودايما مع بعض فى الخير يارب

رحــــيـل يقول...

بصراحه ياخالد فعلا كان يوم رائع

ووجود ابو خالد اسعد الجميع انا كمان اول حاجه سألت عنها اذاكان هيحضر ولا لاء

سعيده جدا انى اتعرفت عليكم جميعا وان كان فى عمل خير بيجمعنا

بنات بورسعيد عملوا احلى واجب معانا ربنا يكرمهم يارب

كان نفسى اكمل اليوم للاخر معاكم بس ظروف السفر بقى نعمل ايه

هو مفيش حد من الاطفال اصور غير عبد الرحمن ولا ايه ههههه
حتى الصور اللى معايا ليه

اما بقى بالنسبه لصور الصباغ مش تقلق انا هقوم بالواجب معاه يصبر بس عليه اخلص تارنا جميعا ههههههههه

تحياتى وتقديرى

أمل حمدي يقول...

ابني الغالي خالد

بجد انا سعيدة جدا بالتعرف عليك

انسان محترم وفي قمة الاخلاق

ربنا يصلح حالك ويجعل عمل الخير في

ميزان حسناتك

وان شاء الله يتكرر اليوم الجميل دا تاني ونتجمع في الخير يارب

ودمت بكل الخير

حنين القلب يقول...

بارك الله فيكم وتقبل منكم صالح الاعمال وجعل اليوم ده فى ميزان حسناتكم
شىء مش جديد عليك يا خالود طول عمرك والشهامه والجدعنه بتجرى فى دمك

بس بجد كان نفسى اكون معاكم

حنين القلب يقول...

المهم انك شوفت بابا ابو خالد

دى كفايه اوى
يا بختك يا عم
مين قدك
المهم هو بخير والحمد لله
يا رب يرجع لينا بالف مليون سلامه
قولى يا عم سلمتلى عليه ولا لاء؟؟

حنين القلب يقول...

استنى بقى
قعدت تلعب مع العيال
هو ده اخرك
هو ده اللى انت فالح فيه
يا رتنى كنت جيت كنت رميتك من المعديه دى وخلصت منك

(معلش مش ينفع امشى من غير ما اجر شكلك)


واد يا خالد
(انت جدع وشهم واخلاق وتربيه واحترام بجد وربنا يبارك فيك يا ابو همس )

رئـــــيسـة حزب الأحلام يقول...

الله الله شوقتنى بجد ان اكون معاكم
بس نعمل اية بقى
بجد حاجة تفرح وحضرتك بتحكى حسيت انى كنت معاكم وكان نفسى اشوف جدا ابو خالد بجد ازاى يسيب اهله وناسه دة الواحد كان بيحس باطمئنان وهو معانا وتحس ان والدنا ازى بقى يسيبنا بجد بجد لازم يرجع ينور عالم فعلا محتاجه
ياريت الكلام دة يوصله بجد
تحياتى لحضرتك

موناليزا يقول...

جعله الله فى ميزان حسناتكم جميعا
وجمعكم دائما على طاعته

Unknown يقول...

عارف يا خالد
ابو خالد رغم انه لم يطل التواجد معنا الا ان تواجده كان له اثر طيب على نفسنا جميعا والكل كان فرحان لانه
مش مدون دا ابوالمدونين ويملك روح جميلة
ربنا يكرمة وان شاء الله يتواجد معنا
بأستمرار

Mahdi Mahdi يقول...

اناجديد ومن يؤمن بهدفى فليساعدنى على الانتشاربين الاصدقاء فى المدونات

وكل ما ارجوه الدخول الى مدونتى وقراءة كل حرف بامعان وان نكون جادين فجماعات الافساد متكتلة ومدعومة وشبابنا غارق فى الغزل والمجاملات السخيفة ارجو التريث وعدم الغضب

ابن حـجـر الـعـسـقـلانـى يقول...

و الله يا خالد اليوم كان جميل جدا .. و الواحد استمتع بصحبتك انت و الصباغ طول رحلتى الذهاب و العودة

بس كنا عايزين نتطمن على الصباغ و نشوفه رجع لعقله تانى و لا لسة مهنج بعد الأكل اللى أكله

و ربنا يجعله فى ميزان حسناتنا يا رب

ahmed_k يقول...

جزاكم الله خيرا
وجعله في ميزان حسناتكم
أنا والله كان نفسي أشارككم اليوم الرائع ده والمفعم بروح التقرب إلى الله
ولكن حال بيني وبينكم بعد السفر وسوء
الأحوال الجويه على الطريق,
ولكن بإذن الله نلتقي يوم بؤجة الخير
فأنا سمعت عنك كتير ومحالفنيش الحظ بزيارة مدونتك ولكنها بإذن الله البدايه ولن تكون النهايه

وتقبل مني خالص التحيه

Unknown يقول...

خالد شوف احمد ك
بيقولك اية اسألة بقى سمع اية ؟؟
ههههههههههههه
ربنا يستر

اهو ده عيبه يقول...

ازيك ياخالد وحمدلله على السلامه
انتوا بجد شرفتونا ونورتونا
ويارب دايما متجمعين فى الخير
وانت كان لك مجهود كبير معانا ان اليوم يكون بالشكل ده

مجداوية يقول...

السلام عليكم

الحمد لله ان فيه ناس زيكم بيتحركوا وبيشاركوا وبينشروا الخير ربنا يجعله فى ميزان حسناتكم وأدام الود بينكم وأدخل الفرح دائما الى قلوبكم

وزى ما ربنا طمنك على الأخ الكريم أبو خالد
أتمنى أن تقوم باتصالات لمعرفة أخبار أخونا محمود صاحب مدونة (خايف من الحقيقة ) فهل تعرفه ؟؟؟
منذ أن طل علينا ليخبرنا بنجاح عملية القلب ولم يدخل بعدها منذ شهور

وبارك الله فيك أخى الكريم

الربان يقول...

تحياتي اخي الكريم

اود ان أشكر لكم سفركم و تحملكم للمشقة ...اغبطكم لتمكنكم من السفر
و القيام بعمل الخير....وادعو الله ان يجعله في ميزان حسناتكم...و ادعوه ايضا
ان ييسر لي الحضور المرة القادمة.

خالص تحياتي و تقديري

محمد فاروق الشاذلى يقول...

أخى الكريم خالد
الآن اثلجت صدرى بعودة أبينا الغالى ابو المدونين أبو خالد والله فرحت جدا كأنى كنت موجود بالظبط وربنا يارب يجمعنا دايما فى الصالحات
وإن شاء الله نتقابل يوم البؤجة

قوس قزح يقول...

بحقد علييييييك
يعنى مش كفاية انك شاركت فى اليوم ده
لكن كمان شوفت بابا ابو خالد ؟؟

يا حظك يا حظك يا حظك


انفجرت و لا لسه ؟؟

المهم مش هينفع اطمن منك عليه هنا
انت عارف انا عايزة بالتفاصيل المملة

و للاسف
و غصب عنى
ولابد منه
انى اقولك
شكررررا يا خالد يا اجدع واحد فى البلوجرية

لا بجد جزاك الله خير
و كفاية تعبك معايا
انت نعم الاخ يا خالد
و دايما مشارك فى الخير كده

mohamed ghalia يقول...

أخى العزيز
أنا قرأت تفاصيل اليوم بالكامل
بجد انت حسستنى بالتقصير قوى وإننا مقصرين فى حق الأطفال بس انت عارف الدراسة وكمان الإمتحنات قربت جدااا
ربنا يسعدك دايما يا حبيب قلبى ويار الى مسكين الرعاية يخدوا بالهم من ملحوظاتك
تحياتى
دمت بكل الود

عاشقة القمر يقول...

ربنا يجعل في ميزان حسناتكم
والله احد كان يتمني ان يكون معاكم بس نعمل ايه في البعد يبنا وبينكم



ياريت تكون شوفت الجواب عندي في مدونتي
لي سؤال سالتني عنه

فاتيما يقول...

يا خالود
ربنا يبارك فى الجهد و يكتبلكم حسنات اكتر و اكتر ...
كان نفسى أكون معاكم قوى
بس مواعيد الرجوع خلتنى أتأكد انى مكنش ينفع خالص آجى ...
معلش ربنا يسهل و تتعوض فى يوم تانى و أبقى أمشى بدرى زى إسكندرية
كلامكم عن الأيتام فى الدار قطع قلبى و ربنا يكرمهم باحسن من كدا و اللى يتقى ربنا فيهم
و لعل و عسى حد يقرى البوستات بتاعتكم و يتحرك لتغيير الحال
و برضو زى إيناس كتبت الأسامى يا خالد و الواحد حاسس كدا إنه عمل عملة !!
أحلى حاجة إن بابا أبو خالد جه
كان قلبى حاسس
و بتمنى لو يقدر ييجى يوم البؤجة
حسيت قوى بيك لما قولت إنك إترميت ف حضنه لأنه وحشك ...
أنت وصفت إحساس الأبن الحقيقى
ربنا يصلح الاحوال و يقدر يتواجد معنا كعادته ...
تحياتى للبنات اللى بميت راجل زى ما قولت يا خالد ...
و تحياتى لعسقول و الصباغ و كل اللى راح و بغبطه من قلبى ...
و تحياتى ليك يا اخى العزيز
ربنا يكتبلك الخير ف كل خطوة بتخطيها

شفـقــة و إحســــان يقول...

ايه الكلام الجامد ده
لا بس حلو اوى الكلمتين الجامدين اللى فى حقنا دول
بجد اليوم كان تحفة واكثر من رائع
واحنا كمان سعدنا جدا جدا بمعرفتكم يا خالد
احسان بيسلم عليك وبيقولك انك رفعت من معنوياته

حاجات جوايا يقول...

ما شاء الله يوم جميل
جعله الله فى ميزان حسناتكم
وان شاء الله تتجمعوا دايما فى الخير

دمت فى حفظ الله
سالى

Ehab يقول...

تحياتي ليك يا خالد
واحشني بجد

سلااااااااااااااااااام
اخوك ايهاب

المستنصر بالله يقول...

الخير فى وفى امتى الى يوم القيامه
بارك الله مجهودكم وجعله فى ميزان حسناتكم

تحياتى

daktara يقول...

شئ جميل جدا وخير
جزاك الله عنه كل خير
علي فكره انا زرت نفس دار الايتام انا ونفر من زملائي في الكلية من حوالي اربع سنين
الاطفال ملائكة علي الارض

Gannah يقول...

أبو همس
ألف مبروك عليكم اليوم الرائع واللى حسيت بسعادتكم به فى كل كلمة كتبتها
طبعا أنت بورسعيدى لاننا بنعتبرك أخ لينا كلنا ولازم نديك الجنسية
ربنا يكرمكم ويجعله فى ميزان حسناتكم

أحلى حاجة حضور بابا ابو خالد..دا خبر رائع

انت خليتنى أحس انى عايزة أطير على بورسعيد دلوقتى حالا..وحشتنى جداااا

لي عندكم يوم لما أرجع ان شاء الله فى الصيف

ايناس وداليا ودعاء والقمر نسمة أجدع بنات طبعا

ربنا يكرمك يا أبو همس
تحياتى

فشكووول يقول...

العزيزخالد همس الاحباب .. بارك الله فى الشله الجميله التى قامت بواجبها الانسانى الجميل .. وليتنى استطيع ان اكون معكم ولكن لله الحمد من قبل ومن بعد

دعاء مواجهات يقول...

مهو الواحد ميقدرش يحقد علشان دة عمل خير

مش هقدر غير انى اقووول بجد يابختكم

وربنا يجازيكم خير على كل حاجة حلوة عملتوها

تحياتى ليكوا كلكوا

ربع ضارب يقول...

والله نورتم بورسعيد يا استاذ خالد ويا ريت الزيارة تتكرر وشكرا جدا على الكلام الجميل اوى اللى قلته فى حقنا وربنا يخليك يا رب ويجعلك دايما سباق فى الخير

د. إيمان مكاوي يقول...

جزاكم الله كل خير..وجعله في ميزان حسناتكم
كان نفسي أكون معاكم ..لكني طرت على غربتي من جديد
ألقاكم على الخير دائما
تحياتي وتحيات البنين

همس يقول...

عااااااااااااااا

عاااااااااااااااا

انا بعيط

كان نفسى اكون معاكم

علشان اشوف بابا ابو خالد

وكمان بحب بوووووووور سعيد

واشوفكم كوووووووولكم


يا خسااااااااااره

ان شاء الله نتقابل كلنا قريب

الربان يقول...

تحياتي اخي خالد

من فترة لم نقرأ لك جديد...ان شاء الله
تكون و الاسرة بالف خير.

تحياتي و تقديري

هى فوضى يقول...

ميرسى يا خالوداليوم كان جميل ياابو همس وكل اللى شرفنا من القاهرة
يارب نتجمع علي خير دايما

ميرا ( وومن ) يقول...

ايه الجمال ده والحلاوه دي ، بجد بحسدكم علي اليوم وبدعي علي الشغل والمذاكره من قلبي

كويس كدة يا خالد قعدت تقول بروح في كل حته اديني اتعملي حظر تجول اهو واحتمال تتحدد أقامتي

كفاية حقد عليك لحد كدة بقي

ربنا يجازيكم خير يارب

سلام

DR.HAMAS يقول...

وفقكم الله لفعل الخير




د.حماس

خواطر ليست عابرة يقول...

جميل جدا هذا التواصل

طريقة عرضك يا خالد للرحلة خاللتني أقول يا ريتني كنت معاهم

أتمني أن أتعرف عليكم أيها المدونون الجدعان جدا والخيريين للغاية والاجتماعيين الي أقصي حد

Empress appy يقول...

خالد خالد انا سمعت انك ركبت المراجيح ادفع نص عمرى واشوشك يا خالد وازقك وتقع هههههههه
ربنا يكرمكم يا رب

Maha Shahen يقول...

يا رب دايما فرحانين ومبسوطين ومتجمعين في الخير بقلوب صافيه ونفوس جميله بيغلقها روح الحب فى الله