14 مايو 2008

انا ....ميييييييين

التاج ده جاى من اجمل وارق وزة فى عالم التدوين( صاحبة مدونة انين الحزن ) واللى ابقى فى يوم من الايام حماها واطلع عينها علشان التاج ده اللى تهربت منه كتير وحاولت ابعد عنه بشتى السبل بس اعمل ايه فى التدبيسة دى
عامة انا قلت اجاوب عليه اكراما لمازن ومحد ش يسال مين مازن وايه دخله بالموضوع .
التاج بيقول ايه

تكلم عن نفسك فى عشر نقاط :-
يا نهار ابيض عشرنقاط مرة واحدة يلا بينا نشوف
1- كنت طفل بيحمل براءة الاطفال وشاب بيحمل احلام وطموحات كل الشباب وحاليا انسان بداخله كل المتناقضات اللى فى الكون .وصدق رب العزة " ونفس وما سواها فالهمها فجورها وتقواها ".
2- تولدت فى الريف وتربيت وسط المزارع والحقول تعلمت الطيبة والعطاء من الارض الطيبة تعلمت الصبر والكفاح من الفلاحين الغلابة .
3- كان نفسى احفظ القران واتعلم امور دينى وابقى فرد نافع لدينى وامتى لكن اصبحت من اشد المقصرين
4- بحب البساطة والهدوء وبكره الزحمة والصوت العالى واحيانا بحس انى انسان سلبى بدرجة تخنق.
5- كنت اتمنى احقق كل طموحاتى واهدافى فى الحياة وابقى شخص ملتزم اكثر واكثر بكل القيم والمبادىء .
6- بحب الرومانسية والخيال فى الشعر وفى عقلى الباطن وبحب اعيش الواقع على ارض الواقع .
7- ببقى سعيد بسعادة الاخرين وبحزن لحزنهم مش بحب حد يزعل منى ولا ازعل من حد مش بحب العتاب الا مع شخص بكون بعزه وبحترمه وبحب الصداقة والتعارف فى اطار من المحبة والاحترام المتبادل .
8- بكره الانانية والغيرة العمياء وبكره الصيف علشان بيبقى عندى شغل كتير ومش بروح المصيف والناس بتبقى زهقانة وبعشق السهر وبموووت فى الليل وسكونه.
9- بحب الاستقرار وبكره السفربحب التهريج وبكره الكابة مع انى احيانا ببقى استاذ كابة وبتطلب معايا شوية نكد وكابة بس بترجع تروق وتحلى .
10- بحب اهلى واصحابى وبمووووووووووت فى همس لانها اكتر مخلوقة ممكن تنسينى قسوة الحياة وتشدنى ضحكتها وبراءتها فى الحياة وبتقولى اجمل كلمة فى الدنيا بحب بابا .
هو فيه حاجات كتير جوايا بس كفايه كده النهاردة .

اختار خمسة واهديهم التاج .

بصراحة التاج ده كارثة من كوارث الطبيعة وصعب قوى علشان كده انا اهديه لكل اللى ايعلق عليه بشرط طبعا ما يكونش جاوب عيله .قبل كده ولو عايز يجاوب تانى بالرحب والسعة يتفضل بالهنا والشفا .

لازمن ابلغهم
من عينى طبعا الاول اعرف هم مين وانا اروح اخبط عليهم .
وعامة ليكى يوم يا وزة روحى يا شيخة ربنا يكرمك بدكر بط وتعزمينا على العشاء
.

هناك 52 تعليقًا:

حنين القلب يقول...

هيييييييييييييييييييييييييييييه اول تعليق ايه الجمال ده ...
بجد اجابتك جميله اوى وبسيطه واكتر حاجه عجبتنى همسه ربنا يحفظها ليك ويخليها وبعدين تكره الصيف ليه تعالى اسكندريه ولو رفضوا فى الشغل يدولك اجازة قدم استقاله وتعالى صيف عندنا صيف وشتاء واهه تبقى فاضى .
اوعى تسمع كلامى انا بهزر يا راجل
سلام يا خالد وربنا يوفقك ويكرمك لانك انسان بسيط وتستحق كل خير .

حنين القلب يقول...

على فكرة خالصين انت كنت عندى اول تعليق وانا اهه الاولى والتانيه كمان
سلام

hamssah يقول...

اول تعليق ؟ كويس
اتكلمت عن نفسك بطريقه جميله ياريت الواحد يعرف يتكلم عن نفسه كده بالصراحه دي
وبالنسبه لحفظ القران الكريم عندي همسه من الهمسات فيها طريقه مبسطه لحفظ القران الكريم ياريت تنفعك ولا اقولك اللينك اهو
http://www.jebril.com/ar/holy_quran/kottab_online.htm
http://www.elsharawy.com/
وربنا يخليلك همس يا ابو همس
صديقتك همسه

كاميليا بهاء الدين يقول...

جميل جميل جميل

جميل ان الانسان يبقى دايما حاسس ان فيه حاجه بيحلم يعملها
وانت بتحلم انك توصل الى انك تكون انسان ملتزم اكتر ومش بتنسى الحلم ده دايما على بالك، شايف نفسك فى صورة معينة ومصمم من جواك انك تكونها بدليل انك ذكرت ده فى تلات حاجات من العشرة
وهنا انا بقولك انك اكيد فى يوم هتوصل للصورة اللى انت بتحلم تكون عليها.

طبعا النشأة فى الريف بتكون مشاعر الانسان وبتشكل ميوله وملامح من شخصيته، وهنا انت بتحب الهدوء وعدم الزحمة وبتحب لما تنظر تلاقى امامك مساحة تكفى ابعد نقطة يوصل لها نظرك

الكأبة والحزن، لانك بداخلك رومانسى، وخارجك واقعى، فيحصل شوية تصادم بين الاتنين.

انت حكاية من الاخر كده

بس حكاية جميلة

ربنا يخلى لك همس ويسعدك بيها
وتشوفها احسن واحدة فى الدنيا
يارب

ربنا يحفظها لك ويحفظك لها


تحياتى

فرنسا هانم يقول...

الله هو همس اسم بنتك ؟؟؟؟؟؟؟؟؟؟
انا مكنتش اعرف
اجاباتك ممتازه جدا يا خالد
وانت مش سلبى ولا حاجه

بتحب التهريج زى حالاتى وزى الرايق ؟
انا حاسه انكم قريبين من بعض انت والرايق
تحياتى لك يا خالد

آخر العنقود يقول...

اووووول تعليق
اجابات هادية ورايقة بجد
حلو اوى رومانسية فى الخيال وواقعى على ارض الواقع
احسن حاجة ان يكون لكل مقاممقال
بس اكيد لما نحب نطبق من الخيال على الواقع ونكون قادرين بتبقى حاجة جميلة ولا ايييه؟

وربنا يخليلك بنوتك يارب
الاطفال دول نعمةوضحكتهم البريئة والجميلة بالدنيا كلها
:)

تحياتى ليك ودمت فى خير وسعادة

قوس قزح يقول...

اولا ربنا يخليلك همس
ثانيا واضح من كلامك انه بيدل على بساطة الانسان المصرى اللى اتعلم فعلا من الفلاحين صبرهم و بساطتهم و حبهم للاخرين
ثالثا القران ممكن تحفظه فى اى سن .. حاول تانى

تحياتى

فاتيما يقول...

ربنا يخلى همس و تشيل ولادها يا رب
و متفقة معاك فى عدم حب الصيف و الغيرة و الأنانية ...
و بتفق معاك فى حب الهدوء و مشاركة الىخرين سعادتهم و لو كنت موش عارفهم حتى ...
إنت مليان تناقضات كتير بس بفترض مع ذلك إنك شخصية جذابة و مثيرة لأعجاب اللى حواليها لأن تنوع الصفات فى شخصيتك بيديلك ميزة فى تجميع الناس حواليك على إختلاف طبايعهم ...
الحاجات اللى كان نفسك تتعلمها و تعملها مفتشى اوانها و بكرة تلاقى الوقت و الامكانية إنك تعملها
و ربنا يسعدك فى كل الاحوال
تحياتى لأسرتك الجميلة

حاجات جوايا يقول...

مبروك عليك التاج ..
ومبارك علينا المُتوج ..

اجاباتك فيها صدق حسيته من معرفتى القصيرة بك

وخاصة فى الجزء ده

ببقى سعيد بسعادة الاخرين وبحزن لحزنهم مش بحب حد يزعل منى ولا ازعل من حد مش بحب العتاب الا مع شخص بكون بعزه وبحترمه وبحب الصداقة والتعارف فى اطار من المحبة والاحترام المتبادل .

حقيقى حضرتك انسان محترم

دمت بخير اخى
سالى

Unknown يقول...

اجابات عفوية

بس بتدعى على وزة ليه؟

مجداوية يقول...

السلام عليكم

اجمل حاجة فى التاج ده انه بيعرفنا بيك اكتر واعترافك بالتقصير احترمك فيه وكلنا مقصرين اخى الكريم بس ربنا يديك العمر انت قدامك فرصة تعوض فالحق طالما حاسس بتقصيرك فيه ناس ولا هما هنا فانت تملك نفس لوامة ربنا يا رب ييسرك المعسر ويخليلك همس وتشوفها عروسة وتشيل ولاد ولادها وتحقق كا ما تتمنى
فيه مقوله معناها اذا حرصت على ارضاء الكل فلن ترضِ أحدا لازم يكون فيه أبيض واسود فى أمور معينة واللون الرمادى قلل منه على أد ما تقدر خصوصا فى الحق.
ولا أعتقد أبدا ان فيه حد ممكن يزعل منك وانت بهذا القدر من الخلق ومراعاة شعور الغير
ربنا يبارك لك أخى الكريم خالد

(احمد سكر ) يقول...

كلامك حلو اوى ياخالد

قربتنا بيه من شخصيتك

انت انسان جميل والله

ربنا يخليلك همس يا عم

ههههههههه

الا مين همس دى ياخاالودا

تحياتى

اخيك

احمد سكر

بنوته مصرية يقول...

هههههههههههههههههههه

انا بضحك علي الدعوة اللي بتعي بيها وزة بدكر بط وتعزمك علي العشا
هههههههههههه

بلهنا والشفا التاج

انا كمان جالي زيه بس لسة مجاوبتش عليه

بوست جميل زي صاحبة

تحياتي
رودي

الـسـيـدة نـون يقول...

بتكره السفر ؟؟؟؟؟؟؟؟
اول مرة اشوف حد بيكره السفر

لا بجد غريبة دى

بس عجبتنى لاختيارك الاية الكريمة
اصل الاية دى انا بعشقها بشكل شخصى
بحس انها بتتكلم عنى اوى

سلام
اختك خيخة

Abo 7anf يقول...

السلام عليكم
اه يعم الشخصيه الجميله دى
ربنا يوفقك يخالد

Miss. Sosa يقول...

الا التاج ده علي دماغ مين .. كل وا اروح مدونة يقولولي تاج .. تاج .. هو فيه حد تاني هيتجوز والعروسة لابسة تاج
.....بس بجد اجاباتك جامدة

همس الاحباب يقول...

حنين القلب
منورة دائما اول تعليق واخر تعليق كمان وميرسى على كلامك الرقيق وشكرا على المصيف انا بحب اسكندرية واهلها كمان وهزرى براحتك ياستى
وربنا يوفقك ويسعدك يا اختى
تحياتى وسعيد بزيارتك
خالد

همس الاحباب يقول...

حنين القلب
ماشى خالصين
مع انى يشرفنى زيارتك دائما
تحياتى
خالد

همس الاحباب يقول...

الصديقةالغالية / همسة
منورة يا ختى دائما وسعيد بزيارتك وشكرا على مساعدتك وهمساتك الرائعة
وجزاكى الله خيرا
تحياتى وتقديرى
خالد

همس الاحباب يقول...

اختى العزيزة / كاميليا
مش عارف اقول ايه بصراحة كلامك كتير قوى عليه واتمنى انى اكون عند حسن ظنك بى دائما
وميرسى لدعواتك وكلامك الرقيق وربنا يبارك لنا فى حضرتك ويكرمك بزوج صالح وذرية صالحة
تحياتى وتقديرى

همس الاحباب يقول...

اجدع خالتو فى الدنيا
فرنسا هانم
منورانى دايما وببقى طاير من الفرح لما بشوف تعليقاتك لانى بموووووت فيكى وفى الرايق بصراحة وببقى فى قمة السعادة لما اشوفكم بصراحة
وهمس ده اسم بنتى ايه رايك حلو الاسم
بمووووووت فى التهريج وبعشق الرايق بصراحة
تحياتى وتقديرى لحضرتك

همس الاحباب يقول...

اخر العنقود
منورانى دائما وسعيد بزيارتك
وشكرا على كلماتك الرقيقة
اكيد طبعا الرومانسية فى الواقع برده جميلة
وربنا يكرمك واشوف همس زيك
والاطفال نعمة طبعا وربنا يرزقك ذرية صالحة .
تحياتى
خالد

همس الاحباب يقول...

rainbow
وربنا يخليكى ويحفظك من كل سوء ويخليلك اولادك وتفرحى بيهم دائما
اكيد الطيبة والفلاحين شىء اساسى فى حياتى
وربنا يسهل واعوض اللى فاتنى منه
تحياتى
خالد

همس الاحباب يقول...

الغالية قوى / ام يوسف
ربنا يكرمك ويفرحك بيوسف دايما وتشوفيه احسن انسان فى الدنيا
والحمد لله اننا متفقين فى حاجات كتير
الانسان من داخله الخير والشر بس المهم يعرف يحجم الشر ويخلى الخير ينتصر دائما
وكلنا جوانا تناقضات كتيرة وغريبة احيانا.
وربنا يكرمك يا ستى ويجزاكى خيرا
تحياتى وسلامى ليوسف باشا

همس الاحباب يقول...

الاخت العزيزة / سالى
ربنا يبارك فى حضرتك
وميرسى لكلماتك الرقيقة
وده من ذوق حضرتك وكرم اخلاقك
تحياتى وتقديرى
خالد

همس الاحباب يقول...

عاليا حليم
ههههههههه
وزة دى غالية عندى قوى
بس دبستنى فى التاج بصراحة وكنت خايف منه ومن اجاباته
بس متخافيش الدعوة حلوة مش قاصد بيها شر
تحياتى وتقديرى

همس الاحباب يقول...

اختى الفاضلة/ مجداوية
الحمدلله على اى حال
واتمنى انى اكون من الذين يستمعون القول فيتبعون احسنه
وبارك الله فيكى وجزاكى خيرا وانا اعلم انكى انسانة فاضلة وجديرة بكل تقدير واحترام وربنا يكرمك باولادك ويجعلك ذخرا لهم ويجعلك عونا لنا دائما
واتمنى ان اكون عند حسن ظنك بى دائما
تحياتى وتقديرى لحضرتك
خالد

همس الاحباب يقول...

اخى العزيز / احمد سكر
منورنى يا باشا
وميرسى لكلامك الرقيق وربنا يكرمك فى اولادك ويفرحك بيهم
همس دى يا سيدى تبقى روح قلب بابا
بنتى الوحيدة
تحياتى وتقديرى
خالد

همس الاحباب يقول...

بنوته مصرية
هههههههه
وانتى كمان معزومة يا ستى عليه
معانا وبالهنا والشفا
والتاج لازمن تجاوبى عليه
ده من ذوقك واخلاقك يا ستى
تحياتى ليكى
خالد

همس الاحباب يقول...

بت خيخة واى كلام
اجدع خيخة فى الدنياام شريف
اه مش بحب السفر كتير بصراحة وخصوصا المسافات الطويلة
الاية دى اه طبعابتفسر التناقضات اللى بداخلنا وكيفية السيطرة على الخير والشر بداخلنا
ماشى يا ام شيكو تحت امرك بس ياريت تبطلى تاكلى الشيكولاته بتاعت شيكو
تحياتى وتقديرى
خالد

همس الاحباب يقول...

ابوحنف
وحشتنى يا باشا
الله يكرمك اخجلتم تواضعنا ولا جميلة ولا حاجة شوية كده وشوية كده
تحياتى وتقديرى

همس الاحباب يقول...

miss.sosa
طب اعمل ايه تاج تدبيسة ولازمن اجاوبه واما انضرب هههههه
يسعدنى تشريفك وزيارتك دائما
وميرسى لذوقك
تحياتى
خالد

رحاله يقول...

بسم الله
اجابات حلوة وصريحه
تحياتى
جيلان

القط البرى يقول...

يا خالد انا محمود

مدونتك جميلة اوى وحلوة وظريفة اوى

هى ين الوزة اللى جه من عندها التاج


سلاااااااااام

الربان يقول...

تحياتي

اجابات ما شاء الله.... كلنا أخي خالد
بين التقصير و العمل الجاد...يعني في رأيي ان التقصير في العبادة يمر علينا جميعا...لان القلوب بين اصبعي الرحمن يقلبها كيفما يشاء...فتارة يرتفع العمل و تارة ينقص...

تحياتي و تقديري

المـــفـــــــقــــــــوعـــــة مــرارتـهــا يقول...

ربنا يسعدك يا أبو همس

رئـــــيسـة حزب الأحلام يقول...

تاج جميل واظهر حضرتك قد اية انسان رائع ور بنا يخليلك همس اللى بتوديك لعالم البراءة


وتحياتى لك

نسر الشرق يقول...
أزال المؤلف هذا التعليق.
نسر الشرق يقول...

هذة المدونة جميلة وظريفة بجد
هذة اجابات صريحة

Empress appy يقول...

انت اكتر حد مؤدب من الناس المؤدبين اللى انقرضوا فى الزمن ده
واجدع واحد وحساس جدا بس خلاص

سمية يقول...

اصعب حاجة ان النسان يتكلم عن نفسه ..

واكبر دليل على تسامح الانسان مع نفسه انه يقدر يتكلم عنها بصدق و من غير ما يزوأ الكلام ..


تحياتى لك و لو انك معتزل مدونتى بقالك فترة ...

همس الاحباب يقول...

رحاله
منورة دايما وسعيد بزيارتك يا جيلان
تحياتى ليكى
خالد

همس الاحباب يقول...

القط البرى
ازيك يا حوده
لو عايز التاج اتفضله
ما يغلاش عليك
وزة دى تبقى صاحبة مدونة انين الحزن
تحياتى ومنورنى
خالد

همس الاحباب يقول...

استاذى العزيز / الربان
تعليقك وكلماتك وسام على الجبين
وكلامك صحيح طبعا سبحانه يغير ولا يتغير
منورنى دائما استاذى العزيز
تحياتى وتقديرى
خالد

همس الاحباب يقول...

حمااااتى ملاك
ويسعدك يا ستى ويهدى فيفى عليكى
وتبقوا زى السمن على العسل
تحياتى
خالد

همس الاحباب يقول...

رئيسة حزب الاحلام
منورنى دائما يا ريسة
وكله من ذوقك وميرسى لكلماتك
تحياتى وتقديرى
خالد

همس الاحباب يقول...

نسر الشرق
طالما انت قلت كده يبقى اكيد انت صقر مش نسر هههههه
سعيد بزيارتك ومنورنى
تحياتى
خالد

همس الاحباب يقول...

اختى العزيزة قوى / ابى هانم
اممممممممممم
طب انا مش شايف كده فى نفسى ليه
هههههه
طبعا كلماتك الرقيقة دى شرف ليه ووسام على صدرى واتمنى انى اكون عند حسن ظنك بى دائما
تحياتى وتقديرى
خالد

همس الاحباب يقول...

الاخت العزيزة / سميه
فعلا التاج ده كان صعب قوى عليه
ومش من السهل انى اتكلم عن نفسى بسهولة
بس ربنا سترها معايا ببركة دعاء الوالدين
انا فعلا مقصر مع حضرتك واسف جدا
تحياتى وتقديرى
خالد

Unknown يقول...

بتكره المصيف
هتخليني اغنيلك زي شيرين
مشربتش من نيلها
البحر ده حاجه جمييييله جدااااااااااا
كفايه بس انك تقعد او تتمشى عليه
وربنا يارب يخليلك همس ويبارك فيها
وتلاقيها ضااااكتورة جد الدنيا زي واحده معرفهاش

همس الاحباب يقول...

لماضة هانم
اجدع دكتورة فى مصر
يا هلا بيكى والله نورك غطى المدونة والمدونات المجاورة
انا مش بكره المصيف انا بمووووت فى البحر والمياه انا مش بحب الصيف علشان مش بروح المصيف يا ضاكتورة
ربنا يكرمك يا رب واشوف همس زيك كده .
تحياتى وتقديرى

ادم المصرى يقول...

والله مدونه رائعه بجد ياريت نكون اظدقاء وتشرفنى مدونتى