2 مايو 2008

علاوة ... علاوة



يا حلاوة يا ولاد

الريس بتاعنا بيخطب وبيقول كلام كبير قوى احلى من كلام شهر زاد فى الف ليلة وليلة وبيقول كمان فيه علاوات ومنح وجوايز وفكر ثوانى تكسب دقايق.

وتصفيق حاد جدا للريس بتاعنا وقلبه الكبير وعطفه علينا ما احنا برده اولاده واحفاده مش كده ولا ايه ولا احنا ولاد البطة السوداء .

طبعا الريس بيخطب بمناسبة عيد العمال كل سنة وانتو طيبين يا عمال اللى مش عامل مالوش نصيب فى الكعكة وخليه واقف فى طابور البطالة شوية .

طبعا الريس بتاعنا كان بيخطب خطاب رسمى ومجمع كبار رجال الدولة ورجال الحكومة طبعا والبشوات وكبار رجال الاعمال، والريس بتاعنا طلع متابع كل كبيرة وصغيرة فى البلد اتابع على مدار الساعة ازمة طوابير العيش وارتفاع الاسعار طب الحمد لله ان حضرتك متابع وانه فيه ازمة فى البلد وانك طالبت الحكومة بحلها فورا والسيد رئيس مجلس الوزارء تعهد بانهاء ازمة طوابير العيش خلال 6 اسابيع والكلام ده كان بالتحديد فى 23-3-2008 يعنى باقى 3 ايام والازمة تنفرج طبقا لكلام الدكتور احمد نظيف يا مسهل .

السيد رئيس الجمهورية تكرم بمنح العاملين بالدولة علاوة خاصة قدرها 30 % ( زيادة غير مسبوقة طبعا ) تصفيق حاد وتهليل وعاش مبارك رجل الحرب والسلام وربنا يديك على قد نيتك يا ريس .

ده كلام جميل ولا غبار عليه انا عايز افهم حاجة بس هما الناس اللى كانت بتصفق بحرارة وعناق البعض وزغاريط من السيدات ليه علشان 30 %علاوة اشك والله ليه بقى لان الزيادة للعاملين بالقطاع العام والحكومة ودول الغالبية منهم طلعوا معاش مبكر من زمان والباقى اتخصخص مع الخصخصة مش مهم دى كمان الزيادة دى على ما سمعت انها بتتراوح ما بين 32.40 جم للدرجة السادسة الى 201 جم لوكيل الوزارة بحسبة بسيطة كده يعنى نصيب الفرد فى اليوم كام يترواح ما بين 1.06 جم للحد الادنى الى 6.60 جم يوميا للحد الاقصى . يعنى بمعدل 4 ارغفة من ابو ربع جنيه ولبانة بشلن الى ما يعادل 26 رغيف من ابو ربع جنيه و2 لبانة بشلن اه والله تصدقوا هى كده .

بلاش نمردة ونكران للجميل واللى يجى من الصعايدة فايدة ، طب الاخوة والاخوات كبار رجال الدولة اللى ايديهم تعبت من كتر التصفيق ( الاحصائية بتقول انه تم التصفيق 21 مرة اشدهم طبعا كانت لحظة اعلان نسبة العلاوة ب30% ) على اعتبار انهم من الدرجة الممتازة جميعهم يعنى اياخدوا كل واحد 201 جم تييييييييييت يا بلاش طب ايعملوا بيهم ايه ولا ايه ايزودوا مصاريف الفلبنيات والسواقين ولا ايه بالظبط بس دول بياخدوا بالدولار يعنى 201 جم ايطلعوا كام دولار اكيد ايجيبوا كيس شيبسى و حاجة ساقعة صاروخ مش كده برده.

يلا ما علينا ده رزق بتاع ربنا وكرم من الرئيس والحكومة والحمد لله عليه وبما انى مش تبع الحكومة ولا القطاع العام يبقى اكيد القطاع الخاص ايبقى كريم معانا ويخصم مننا 30 % مساهمة للدولة .

سيبك من مبلغ العلاوة كام الاجمل انها تنفذ من اول مايو مش اول يوليو كما هو المعتاد يعنى الاسعار اتولع قبل الجو ما يسخن كمان،طبعا الريس بفطنته المعهودة خد باله من كده وشدد على الرقابة على الاسعار فى الاسواق يشكر طبعا واللى عجبنى قوى انه طالب الحكومة بتوفير الموارد الحقيقية لتلك الزيادة وشدد على الاهتمام بالمحليات وظروفهم القاسية ( يعنى عبده الرايق جاله الكادر اهو وايسدد كل ديونه وايروش نفسه وايجيب حتة همر بسواق كمان يعنى خلى بالك يا فرنسا هانم منه يعنى ممكن ينفع فى توصيلة ولا حاجة ) .

الحمد لله يعنى فيه موارد فى البلد ذهب ياقوت مرجان احمدك يا رب وبما ان العلاوة تحتاج زيادة تقدر من 4 الى 5 مليار جنيه فى الموزانة الجديدة للدولة وبما ان عجز الموزانة الحالى 70 مليار جنيه يعنى احتمال كبير يزيد عن 75 مليار فى الموزانة القادمة 2008/2009.

طب الزيادة فى الاجور الحكومة اتعمل فيها ايه والعجز ده اتوديه فين طبعا قدام الحكومة 3 حلول لا رابع لهم .

1- البحث عن موارد جديدة للدخل تحقق زيادة فى ايرادات الموزانة تعادل تلك الزيادة فى الاجور وده شىء صعب ومستحيل لاننا بعنا المصانع والارض بتراب الفلوس المورد الوحيد انهم يبيعوا الشعب ده لو لقيوا حد يشتريه اصلا يبقوا ضربوا عصفورين بحجر جابوا فلوس وتخلصوا من قرف الشعب ومشاكله .

2- تخفيض بنود الانفاق الحكومى والمصاريف النثرية اللى بالمليارات وطبعا ده شىء مستحيل يعنى البشوات يعيشوا عيشة التقشف والزهد ده كلام .

3 - الدين الخارجى وده اسهل طريقة بتنفذها الحكومات بمعنى انها تستلف من الدول والاشخاص على هيئة قروض وسندات بفائدة مبالغ فيها طبعا ودى خيبة ما بعدها خيبة لان اثرها يمتد لسنوات طويلة ويتاثر بها من سياتى بعدنا زى ما يحدث معنا الان ديون خارجية تسدد بنظام الجدولة منذ سنوات وحكومات ترحل لحكومات وشعب يئن ويجوع لسنوات وسنوات .

طيب كل ده ليه علشان اديك جنيه باليمين اخده 3 بالشمال طب مبلاها سوسو وخد نادية وبلاها الام والجنين وكفاية تعيش انت ، طب الحل بسيط و اسهل واضمن من كده ، يعنى دعم رغيف العيش 20 مليار جنيه يا خبر ابيض عيش دعمه 20 مليار ومش بيتاكل اصلا ومال لو عيش صح كان الدعم بقى كام طب فيه حلول والخبراء قالوا عليها وتطبيقها سهل وغير مكلف ، دعم المواد البترولية والطاقة 63 مليار سنويا زغرطى ياللى انتى مش غرمانة يعنى ابيع الغاز والبترول بنصف تكلفته لليهود والاجانب واديهم دعم كمان ايه الهنا اللى احنا فيه وازود المستثمرين بالطاقة والغاز بملاليم وهما يلموا الملايين ده اسمه كلام يلا رزق الهبل على الحكومة ..

لو الحكومة قامت بالسيطرة على الاسعار وحاربت الاحتكار وقامت بادارة المؤسسات والمصانع الانتاجية وفرضت الرقابة الصارمة على مؤسساتها الحيوية وخفضت من الانفاق الحكومى غير المبرر مش اسهل واخف وطئا من زيادة الاجور التى لا تسمن ولاتغنى من جوع .

اتذكر موقف منذ اكثر من اربع سنوات بينى وبين امين الصندوق بخصوص مبلغ العلاوة وكنت مسئول عن اعداد كشوف المرتبات وكانت نسبة العلاوة 10% بحد ادنى 30 جم وحد اقصى 120 جم وساعتها كانت الاسعار رخيصة جدا بالنسبة للوقت الحالى ،وبادرنى بقوله ما فيش علاوة ليكم بكل تجهم وحزم فرديت بكل بساطة انا على نفسى مش عايز علاوة واتكلم بالنيابة عن باقى العاملين انهم برده مش عايزين العلاوة بس بشرط ان حضرتك تضمن لى عدم زيادة الاسعار فى الخارج فتبسم ضاحكا وانا اضمنها ازاى دى ،فرديت وانا ما اضمنش اننا نتنازل عن العلاوة برده وفعلا تمت الزيادة وقتها .

يعنى مش مهم العلاوة كام المهم انفلات الاسعار لا يلتهم العلاوة واضعاف مبلغ العلاوة يعنى اللى ناخده باليمين ندفعه اضعاف مضاعفة بالشمال .طب يا ترى اصحاب المهن الحرة والاعمال الخاصة والعاطلين والقطاع الخاص نصيبهم ايه من التورتة وكعكة الرئاسة .

يلا نقول المنحة يا ريس ..

تحديث واجب 4-5-2008

كل سنة وحضرتك طيب يا ريس وعقبال مليون سنة

ده مش كلامى لوحدى ده كلام مصر كلها حتى شوفوا كده

الجمهورية

الاهرام

الاخبار

هناك 56 تعليقًا:

حاجات جوايا يقول...

عندك حق والله يا خالد
خبر العلاوة ده أد ما فرح ناس .. مأثرش فى ناس تانية كتير
فرح بس موظفين القطاع العام اللى الأساسى بتاعهم أعلى من 300 ج
والباقى مش هيأثر معاهم كتير لأن الأسعار اغلى بكتيررررررررر من نسبة العلاوة حتى بعد زيادتها

ده غير اللى مش لاقيين شغل أصلااااااا
ومش بينتموا لقطاع عام ولا خاص


ربنا يرحمنا ويبارك لنا فيما رزقنا

دمت بخير أخى
سالى

النمر الشرس يقول...

السلام عليكم ورحمة وبركاته
مدونتك جميلة جدا
والسلام عليكم ورحمة وبركاته

فاتيما يقول...

يا خالد
هوه فيه فايدة من الكلام
أنا كنت عند قطة الصحراء إمبارح و كانت بتقول فيه ناس فرحانة إستغربت قوى و قولت يمكن عشان حاليا قاعدة فى البيت فموش واخدة بالى بس بعد الضهر جه أخويا يززورنا و بصفته موظف غلبان عرفت بقى الفوله
ال30 % دى على الأساسى يعنى كلام فارغ يعنى تلت أربع أزايز زيت و دمتم
و لا يحوقوا و لا يبردوا نار الزيادات اللى هتحصل بعدة فترة وجيزة إحنا هارسينها و بتحصل بعد العلاوة كل سنة
مبقاش فيه حاجة دلوقتى بنفرح
و ربنا يستر بس على يوم 4 مايو أنا قلقانة من اللى ممكن يحصل يوميها يا خالد
و بوست فى الصميم يسلم لسانك

فرنسا هانم يقول...

هى الناس الكبار دول يقدروا ميصقفوش
لاطبعا
لازم يصقفوا ويصقفوا
دول فى حضره الريس
ربنا يفتح بصيرتهم علشان يفهموا ان كلنا فى حضره الله عز وجل
ياريتهم يتأكدوا ان الله موجود
عموما
العلاوه بقلاوه
يعنى هم المم ضاعت فى الهوا شاشى وانت متدراشى
اما بخصوص توصيله الرايق
نو
نو
نو
على راى الرايق نفسه
انا اركب مع الرايق ده اخره عربيه كارو
لا ويقولك همر
طيب اسأله كده شكلها ايه الهمر ؟؟؟

عبده الرايق يقول...

اعوذ بالله
فرنسا هنا وفوقى كمان
يارب استر
خالد حبيب قلبى مش هو ده الكادر اللى فى بالى
لا
دى حاجه كده لزوم قزقزه اللب
لكن الكادر اللى بحق وحقيقى هو اللى هجيب منه الهمر
واسوق على سرعه 500 كيلو فى الساعه
واعدى بسرعتى جنب اللى بالى بالك
واغرقها ميه من الشارع
قال بتقولك كارو قال
ارجوك يا خالد بلغها علشان انا مش بكلمها
قولها
يافرنسا هانم بطلى تطلبى من الرايق فلوس سلف

مجداوية يقول...

السلام عليكم

شوفت انت كمان قدرت تسمع خطاب كله الريس وتطلع منه العبر
خطاب معجز

بس فيه طريقة كمان للم الموارد للمنحة حيعملوا قوانين تدفع الشعب غرامة يعنى لو واحد عطس يدفع 100 جنية لو واحد كح 50 جنية اتنين اتخانقوا فى الشارع 33 جنية اشمعنى 33 جنيه عشان يتخانقوا تانى على الفكة وهكذا فمتقلقش الحكومة بتاعتنا تفوت فى الحديد وحيتصرفوا دول خلوا الشيطان يروح يصيف فى مارينا ويسيبهم يشتغلوا لوحدهم

تحياتى وتقديرى اخى الكريم

mohamed يقول...

طرأتك في الكتابه عالية أوي

انين الحزن يقول...

خالد

انت بتتفرج ع التلفزيون زينا ولا الريس خطب في حته غير التلفزيون وانا معرفش

طب وهو بيخطب مجبش سيرتي مقالش مرتبك هيزيد ياوزة


سلاموووووووووز

وزة

امل يقول...

لولولييييييييي
دي زغروته عشان العلاوة
اصل خطاب الرئيس فاتني
وعلى العموم انا قطاع خاص
يعني يا فرحة ما تمت
العلاوة طارت

Empress appy يقول...

هو انتم مطهدينى
هى بتتكتب ازاى دى بس
ما علينا حلاوة ايه يا خالد ارحمونى بقى الراجل عنده بنزهير احم احم محدش يقوله بس والنبى هههههههه
اعذروة يا رجاله
قال موارد قال مش طار الغاز فى الهوا شاشى وانت متدراشى يا جدع

المـــفـــــــقــــــــوعـــــة مــرارتـهــا يقول...

ربنا يعمر بيته ويعلي مراتبه
بس هي من جيبه ... لامؤاخذة

Marwa Friday يقول...

صباح الفل يا خالد
ههههههههههههه
والله يا بن الناس علاوات مين
لازم الاسعار تزيد
ومووووولد يا دنيا
الله المستعان

القط البرى يقول...

السلام عليكم ورحمة الله وبركاتة
دى اول زيارة ليه فى هذه المدونة الجميلة الظريفة ام دم خفيف

شكرا

والسلام عليكم ورحمة الله وبركاتة

همس الاحباب يقول...

الاخت العزيزة / سالى
طبعا كلامك مضبوط
وربنا يستر على اللى جاى من زيادة واتاوات
تحياتى ودمتى بخير وسعادة

همس الاحباب يقول...

النمر الشرس
وعليكم السلام ورحمته الله وبركاته
ميرسى لذوقك وتشريفك ودائما منورنى
تحياتى

همس الاحباب يقول...

الغاليه ام يوسف
منورة يا ام يوسف
وعندك حق طبعا فى كل اللى انتى قولتيه
يا ريت بلاش علاوة ويخفضوا الاسعار احسن
النتيجة اتبقى اقوى واسرع واجدى لكل الناس
تحياتى ليكى وليوسف

همس الاحباب يقول...

خالتى فرنسا هانم
ههههههههههه
سيبك من الجزء الاول انا متفق معاكى فيه
اما عبده خلاص ايبقى فوق لازمن نعامله كويس برده هو صحيح ميعرفش ايه الهمر بس ايركبها لو فتح مخه ولا انتى عندك شك برده
تحياتى وتقديرى
خالد

همس الاحباب يقول...

عبده باشا الرايق
هههههههههههه
بعد فرنس هانم احمدك يا رب
يعنى القمر والشمس عندنا يا مرحبا
بس يا رايق الكادر اللى لنت بتحلم بيه عمره ما يتحقق طول ما انت شريف وقاعد على السلم بس اللى يجى من الصعايدة فايدة يا رايق
كده برده افرض انا واقف جنبها اتغرقنى برده انا متاكد انك ما تعملهاش انت اتنزل واتفتح الباب وتقولها اتفضلى يا هانم
وهى اتقولك اطلع يا اسطى
سلف يا رايق ما بلاش خلى الطابق مستور انتى حبيبى اه بس لسانى فالت وانت عارف مين بيستلف من مين
بحبك وبحب خفة دمك والله..
تحياتى وحبى واشواقى

همس الاحباب يقول...

العزيزة الغالية / مجداوية
حمدلله على السلامة بعد الانقطاع والغيبة الطويلة هههههههه
بصراحة انا قريت الخطاب ما سمعتوش بس فعلا فيه عبر وكلام حلو كتير بس اسلوب التنفيذ ربنا يستر ما تخفيش ايعملوا اكتر من كده اللى خلاهم يخلواالشيطان فى اجازة ايعجزوا عن تدبير الموارد
تحياتى اختى العزيزة
خالد

همس الاحباب يقول...

centoaph
منور وسعيد بزيارتك
وميرسى لكلماتك الرقيقة
تحياتى

همس الاحباب يقول...

انين الحزن
وزة اللذيذة
لا مش بتفرج على التليفزيون زيك
انا قريت الخطاب فى الجرايد
بس مع الاسف هو امر بذبح جميع الوز الى فى البلد خايف من انفلونزا الطيور
استخبى يا وزة وانسى زيادة المرتب هههههه
عامة انا اكلمك محسن بيه اخو على بيه
واعتقد انك مش اتزيدى برده
تحياتى يا اجمل وزة

همس الاحباب يقول...

امل
حلوة الزغروطة
الحال من بعضه يا اختى انا زيك قطاع خاص بس برده حتمن ولابد لازم يكون فيه علاوة حتى 1/2% بلاش فضايح
تحياتى ليكى

همس الاحباب يقول...

ابى هانم
اجدع دماغ فى الدنيا
هههههه
ماشى يا ستى مش اقوله انتى قصدك حلاوة المولد ما هى خلصت وتاكلت من زمان
شفتى انا شطورة ازاى
الغاز والفحم والتراب كمان طار
المهم انا سمعت انه العلاوةعندكم 90% مش كده برده
تحياتى يا جميل
خالد

همس الاحباب يقول...

مفقوعة مرارتها من حماتها
منورانى بجد وسعيد بزيارتك
مش عارف بصراحة من جيبه ولا من جيوبنا منه وله واليه مين ده الله اعلم
تحياتى ليكى

همس الاحباب يقول...

مروة جمعة
صباح الورد والياسمين
منورة دايما يا ستى
طبعا الله المستعان
تحياتى ليكى
خالد

همس الاحباب يقول...

القط البرى
وعليكم السلام
دى مش اول زيارة دى التانية ههههههه
وعامة منور دائما حتى لو الزيارة المليون
وميرسى على ذوقك وتشريفك
تحياتى
خالد

أبو خالد يقول...

حبيبى خالد
أحسب لى كده المعاش المبكر ها يصرف كام؟
و لا أقولك و لا تحسب و لا حاجة ربنا
ساترها معانا

رئـــــيسـة حزب الأحلام يقول...

حلاوة حلاوة وهناكل الحلاوة

إنسان || Human يقول...

إحنا شعب عبيط ..ومش فاهم حاجه
الخطاب مليان كلام مجعلس كأنه بيكلم ناس متخصصه في الإقتصاد
...
يضحك علينا بكلمتين وبس

المـــفـــــــقــــــــوعـــــة مــرارتـهــا يقول...

إذيك ياحما أبني ... انت محظوظ ياراجل
خلينا في البوست
انت عارف العلاوة دي اكتر ناس هايستفيدوا بيها مين ؟
هما الأخوة ربنا يعمر بيتهم الوزرة .. مش هما برضه موظفين حكومة ... ولا أنا فهمت غلط
وحدوتة العلاوة دي ملعوبة من ريسنا ... مش سهل جدو حسني .. بيعرف يلعبها صح ... عرف ان الشعب بيفكر يعمل إضراب يوم عيد ميلاده ... قام حب يسبقهم ويسكتهم
وهو فيه حد يرضي يقضي عيد ميلاده وهو حاسس ان الناس قلبها شايلة منه وبتلعنه وتلعن اليوم اللي اتولد فيه
... ماتفهمنيش غلط ... الراجل ده حبيبي بحبه ذي مابحب حماتي بالظبط
وخصوصا ان الاتنين مواليد سنة واحدة
وأنا بأعذر فيفي علي عمايلها عشان بقول السن له أحكامه وفتاة التمانين مافيش مانع انها تخرف شوية ... وهي دي أحكام السن الكبير
وأفهم الباقي انت بقي

غير معرف يقول...

عزيزي خالد

و الله عندك حق ياخالد الناس دي كلها اللي كانت موجوده معاه وقت ماقال الخطاب بتاعه بيصقفوا علي ايه؟يمكن فرحانين للناس الغلابه اللي حيزيدوا ياخالد؟حاكم قلبهم طيب
الصراحه اتفقعت من كميه النفاق الغير طبيعيه بتاعت الصحف القوميه امبارح
لأ و الشخص اللذيذ اللي كان مستضيفه تامر امين و بيقول الناس اللي كانت حتعمل اعتصام يوم 4 مايو طبعا ماعملوش لأنهم فكروا و قالوا ان ده كبيرنا و مش عايزين نبوظ عيد ميلاده ده اللي مالوش كبير بيشتريله كبير
و كلام بقه من العينه دي
حاجه تفقع صح؟
صباح الفل ياجميل

الربان يقول...

تحياتي

اخي الكريم اسمح لي ان اختلف معك قليلا
يخطيء من من يعتقد ان الاحوال يمكن ان تنصلح بين غمضة عين او بين يوم و ليله

اذا تمت زيادة المرتبات الناس تسخر و ان لم تزداد...الناس تأجر بالشكوي...

المهم ان هناك بداية... و نأمل ان تتواصل حتي تعم الجميع....


اما بالنسبة لعيد ميلاد الرئيس...
فأنا اعتقد ان الصحف القومية كانت
فجه و بها لجاجة زائدة عن اللزوم في التهنئة.

لكن اقول ايضا للرئيس و غير الرئيس
و كل من يصادف عيد ميلاده كل سنة و انتم طيبين...و بصحة و بخير.

همس الاحباب يقول...

استاذنا العزيز / ابو خالد
انا سعيد جدا جدا بزيارتك وتشريفك مدونتى المتواضعة
ههههههههه لا المعاش المبكر ماتقلقش ايجيب حاجات كتير يعنى ممكن ربع فرخة ومن غير عيش كمان وباقى الشهر ربنا يسترها علينا
تحياتى ومنورنى يا باشا
خالد

همس الاحباب يقول...

رئيسة حزب الاحلام
صح النوم يا ريس
اكيد على ايدك اناكل حلاوة وبقلاوة كمان
تحياتى وتقديرى

همس الاحباب يقول...

human
منور وسعيد بزيارتك
ولا كلام مجعلس ولاحاجة هى شوية ارقام من هنا وهناك واى كلام بنوم بيه الشعب وانت مش عارف اننا شعب فهلوى وبنفهمها وهى طايرة .
قصدى الطايرة طبعا ما تفهمنيش غلط .
تحياتى

همس الاحباب يقول...

مفقوعة مرارتى من حماتى
هههههههههه
ماشى يا ستى فعلا محظوظ وبنتى كمان محظوظة اتبقى حماتها دمها شربات ومرارتها اتتفقع منها هههههههه
اكيد طبعا هما كده ولا كده مستفيدين من كل حاجة
طبعا ربنا يديله طولة العمر وفيفى كمان ربنا يطول عمرها
واضح الحب مقطع بعضه بجد
هههه لا يا ستى وانا مالى افهم ايه انه بعيد الشر يعنى .00. لا طبعا عيب ههه
انا متنازل عن النسب ده
تحياتى
خالد

همس الاحباب يقول...

عزيزتى / اجندا حمرا
ههههههههه طبعا لازم يفقوا ويهيصوا كمان
اما عن النفاق فحدث ولا حرج كل عام بيصل لدرجة الرسل والانبياء فى الطهارة والنقاء ومهما يكن فده بشر له اخطائه ومزاياه
كبرى دماغك يا اختى واتعدى برده
وربنا يصلح حال الرعية والراعى
تحياتى
خالد

همس الاحباب يقول...

استاذى العزيز / الربان
حضرتك استاذ كبير واخ فاضل واختلافك معى شرف ووسام على صدرى
ولكن لا اختلف معك فى الراىء وانا على يقين من صلاح الامور يتتطلب ووقت وجهد كبير ولا يتم فى غمضة عين ولا سنوات ولكنى قصدت شىء اخر وهو لماذا زيادة العلاوة وهناك طرق اسهل واجدى نفعا لكل المواطنين وليس فئة واحدة وهى خفض الاسعار والرقابة على الاسواق ومنع الاحتكار والضغط على المستثمرين ومنعهم من المغالاة فى الارباح وزيادة الانتاج واستثمار ثرواتنا بطريقة فعالة ليس اكثر واعتقد ان هذا افضل من زيادة العلاوة بنسبة 100%
اما بالنسبة للصحافة وخصوصا القومية ربنا يرشدهم للصلاح ويهديهم لما يحبه ويرضاه وطبعا كل سنة والريس طيب ومصر بخير وحضرتك بصحة وسعادة
تحياتى وتقديرى استاذى
خالد

دكتور حر يقول...

ولسه قدامنا كتييييييييييير




والعوض على الله

غير معرف يقول...

السلام عليكم
واللى كان متوقع حصل
فعلا الحكومة هتمرر قانون لزيادة أسعار البنزين والسولار بنسبة 40 فى المية بيقولوا علشان تغطى نسبة العلاوة
وفيه اخبار متسربه بتقول ان وزارة المالية مش هتقد تغطى غير 5 مليار جنية
فى حين ان النسبة بتاع العلاوة محتاجة 12.5 مليار
واعتق ان الزيادة فى نسبة الوقود
هترجع فلوس زيادة عن اللى محتاجاها العلاوة كمان
يعنى العلاوة للريس مش لينا
حسبنا الله ونعم الوكيل

همس الاحباب يقول...

دكتور حر
منور يا دكتور محمد
ولسه كتير قوى قوى
وعليه العوض ومنه العوض
تحياتى

همس الاحباب يقول...

عمر المصرى
عندك حق يا باشا البنزين زاد اليوم
ولسه الاسعار اتولع
وحسبنا الله ونعم الوكيل
تحياتى

Desert cat يقول...

يا فندم هما زودوا العولاة للقطاع العام
وبيقطعوا من لحمنا احنا الحى علشان يدبروا الموارد
واستعدوا جميعا يا شعب للعرى والجوع والضياع
ان ما طفشتكو واحد واحد وقعدت انا لوحدى فى البلد
نياهاهاهاهاها

قوس قزح يقول...

انا جيت قريت كلامك اول ما نزلته فى البوست
و بصراحة كنت فرحانة بالعلاوة للناس الغلابة و زعلت لما قريت كلامك مع انى عارفة انه صح
جيت تانى اهو علشان اقولك انى لسه دلوقتى عارفة من ال بى بى سى ان فى حل رابع عملته الحكومة
و هو انها تاخدالفلوس من الناس الاغنية للناس الفقرا ( ابتسامة عريضة )
الاغنية دول مين بقى !!
هل هم اصحاب الملايين و الفدادين ولا يقصدوا اللى دخلهم من القطاع الخاص ؟؟

شوفت بقى يا خالودة حل الحكومة مش تقولى قرض دولى ولا تقولى نثريات
دول هيطحنوا الكل يا باشا هيعصرونا كلنا لاخر نقطة فى دمنا

تحياتى

سبهللة يقول...

حالد
كنت كاتبه اقتراح بخصوص العلاوة والاسعار يهمنى انك تقراه ويهمنى اعرف رأيك

الـسـيـدة نـون يقول...

متهيالى بعد اخبار عن زيادة الاسعار فى البنزين والسجاير والحديد ومعرفش ايه كمان
مش هيخلى للعلاوة اى اثر
عالم ولاد كلب
اللى بيدوه باليمين بيرجعوا ياخدوه بالشمال واليمين تانى

تحياتى ليك
اختك خيخة

انين الحزن يقول...

خالد

ليك تاج عندي يله ياعم

عيييييييييييييييش


سلامووووووووز

وزة

همس الاحباب يقول...

قطة الصحراء
حمدلله على السلامة يا جاى من السفر
انا عايز اسمع اغنيه اودعك اخر وداع
طالما نويت تبعنا يا ريس وتقعد لوحدك
طب ينفع تقعد من غيرنا وتقرف فى مين وتجوع مين وتذل مين
احنا الشعب برده
تحياتى ليكى يا قطة

همس الاحباب يقول...

rainbow
انا اسف طبعا انه كلامى زعلك
بس مع الاسف ده الحقيقة المرة
اللى كنت خايف منه هو اللى حصل
اللى احنا اناخده باليمين اندفعه مضاعف بالشمال واليمين ما اننا لسه ما اخدناش علاوة ولا غيره وبرده اندفع باللتى هى احسن
تحياتى وسعيد بزيارتك

همس الاحباب يقول...

سبهللة ع الاخر
علم يا فندم وتم التنفيذ فورا
تحياتى

همس الاحباب يقول...

خيخة هانم
تصدقى ليكى وحشة
سيبك من ولاد الكلب
ده واقع ملموس ومعروف مسبقا يا ختى
حسبنا الله ونعم الوكيل
ولنا الله على اى حال
تحياتى وتقديرى

همس الاحباب يقول...

انين الحزن
وزة يا وزة
تاج حتة واحدة طب خليهم جوز جنيهات
وبلاش التاج
طب ربع جنيه لب
يلا ما علينا امرنا لله
وربنا يستر
تحياتى

Abo 7anf يقول...

خالد باشا
معلش على التاخير بجى
شفت يعم الموارد منين
ولادين خارجى ولا حاجه واصل
رجع خد العلاوه تانى
وشرم برم حال الانسان
تجديد
فى الافكار

موناليزا يقول...

خدت بالك من زيادة اسعار البنزين جت بعد العلاوة بقد ايه
يعنى حتى اللى فرحوا بالعلاوة مالحقوش يتهنوا بها
لنا ولكى الله يامصر
بالتوفيق دائما استاذ خالد

همس الاحباب يقول...

ابوحنف
حمدلله على السلامة ومنورنى دائما
مع الاسف عرفت يا باشا
تحياتى ياباشا

همس الاحباب يقول...

العزيزة موناليزا
طبعا ضربة معلم مش كده
نومى الشعب تنويم مغناطيسى صح
لنا الله وحسبى الله ونعم الوكيل
تحياتى وتقديرى